CAPITAN SENIU
di Nino Martoglio
PERSONAGGI
CAPITAN SENIU
RACHELA, (sua sorella)
MARIU (loro nipote)
TINA (loro nipote)
DON SAVERIU SOLLIMA
NUTARU QUATTROCCHI
DOMESTICA
ATTO PRIMO
SCENA FISSA
Stanzone a pianterreno d'una agiata casa marinara, sulla riviera orientale di Sicilia. In fondo ampia finestra aperta, per la quale si accede in giardino, chiuso da balaustrata prospiciente sul mare. A destra e a sinistra del finestrone grandi mensole su ciascuna delle quali un archetipo di bastimento a vela. Due usci alla sinistra e la comune sulla destra. Una cristalliera, due stipetti a vetro e scarabattoli, dovizioso di vasellame e cristalli, ninnoli e cimeli. Lampadario di Murano al soffitto, sopra tappeti e soprammobili orientali, orologi ed effigi di santi. quadri e diplomi sulle pareti.
Nel centro un tavolo. Divani, poltrone, canapè, sedie, tutto il mobilio in degno intagliato, ricco, solido, destinato ad esser tramandato ad altre generazioni.
Lindura da per tutto e aspetto di benessere.
Di settembre, nel pomeriggio.
Epoca presente.
N.B. - Destra e sinistra dello spettatore.
SCENA I
MARIU e TINA
TINA - (inseguendo Mario per lo stanzone) - Mariu, tòrnami 'ssu libru!
MARIU (girando attorno al mobili, con in mano un libriccino minuscolo, assai ben rilegato) - No, mi servi!...
TINA - (c.s.) - Chi è to', forsi?
MARIU - (c.s.) - E mancu to'...
TINA – E’ d' 'u z'iu ...
MARIU - 'U sacciu... ci 'u pigghiasti di 'nt' 'a libraria, di nascostu ...
TINA - Non su' affari ca ti riguardano, tornammillu...
MARIU - No, ci l'haiua fari vidiri 'a zia...
TINA - Tu non ti'mmiscari, pettegulu! ...
MARIU - Iu, inveci, mi ci 'mmiscu, pirchì tu non divi abbuffuniari a 'dda vicchiaredda.
TINA - (Fa una smorfia).
MARIU - Ci dasti a capiri ca è 'o libriceddu d' 'a míssa, e inveci sunnu 'i puisii di Giusti! 'Na picciuttedda ca leggi sti purcarii!...
TINA - Purcarli, i puisii di Giusti? ... Si vidi ca mancu 'i conusci! ...
MARIU - Cui, iu? ... Ti cumpatisciu! ... Si vidi ca 'n'è capisci.
TINA - (stanca, fermandosi) - Tornimi 'u libru! ...
MARIU - (sollevandolo in aria, col braccio disteso, e guardandola cùpido, pronto ad afferrarla) - No... si t'abbasta l'armu pigghiatillu di cca... Va... iu non scappu chiù! ... Avanti, curaggiu!...
TINA - (Fa per correre e tentar la prova, mi si pente e si arresta) - Beh, tenitillu! ... Tantu, guarda: (toglie da un cestino da lavoro ch'è lì presso un pacchetto di fogli manoscritti e mostrandoglielo) tutti imegghiu poesie m' 'i cupiai e d' 'u libru non nn'haiu chiù chi nni fari,
MARIU - Bravu! ... Chissi chi su', l'orazioni sacri, averu?...
TINA - Ju non sugnu santocchia, comu 'a zia Rachela!...
MARIU - Diccillu ad idda, si hai curaggiu! ...
TINA - Diccillu tu!... Tantu, ci si' abituatu. Haiu nu scantu, fiuriti!
MARIU - Pirchì non dici ca ci sai fari 'a 'nnuccintedda, inveci? ... (girando il libricino tra le dita). Ah, ah?... 'U libru d' 'a missa! ...
TINA - Oh, alla cca, 'a zia, ca veni! ... Diccillu, fammi 'a spia! ...
MARIU - Chiù tardu, chiù tardu, c'è tempu... D' 'u restu, non si chiama fari 'a spia, chistu... E’ pp' 'u to' beni; bisogna educariti com'è di doviri, cara mia...
TINA (ironica e smancerosa, facendogli un inchino fino a terra). - Oh, lustro e lustrissimo signor precettore! ... (cambiando tono). Guarda cu' parra d'educazioni! ... Ridiculu! ...
MARIU - (aprendo la vetrata sul giardino). - Sfacinnata! ...
TINA - Pettegulu 'ntricaloru! ...
MARIU - (uscendo sul giardino) - Cummidianti!...
SCENA Il
RACHELAeTINA
RACHELA - (entrando dalla seconda a sinistra) - Aviti vístu, signurina Tina?... 'A lavannara scanciau certi capi di biancaria di cucina nostra ccu chíddi di munsignur Vicariu; e tuttu chistu succedi pirchì 'a nostra non è ancora cifrata! ... Doppu du' lavati! Ccu 'n'autri du' iorna è vecchia e ancora l'avemu a 'nsingari! ...
TINA - Zia, haiu cifratu tutta 'a bancaria di tavula...
RACHELA - Grazii!... 'A biancaria, bedda mia, 'nt' 'e casi urdinati, unni ci sunnu fimmini massari, si cifra tutta primo di Incignarla... 'Unni ci sunnu sfacinnati, inveci...
TINA - Si àvi ottu jorna ca non fazzu autru ca cifrari biancaria!... Si po' diri ca mancu haju finutu l'asciugamanu...
RACHELA - E bisogna 'nsingari macari 'i cannavazzi di cucina!... Fammi vidiri ss'asciugamanu.
TINA (toglie dal cestino un asciugamani cifrato e glielo presenta).
RACHELA - (inforca gli occhiali, osserva e subito esclama) - Gesù! ... E chi è, chista?
TINA - Non ti piaci?...
RACHELA - Mi piaci?... Gesù, Giuseppi e Maria, guardati ccuquali facci m' 'u dimanna? ... E comu mi po' piàclri 'na cosa di chisti?
TINA - Pirchì?
RACHELA - E si dimanna? Comu, supira l'asciugamani di filu, orlati a giornu, roba d'accussì fina, mi ci fai 'stí tinti e miserabili cifri a catinedda, ccu 'sti magghi granni quantu l'oricchi toi? E l'hai beddi granni l'oricchi, oh!.
TINA - Non ti nni va una giusta, zia! ...
RACHELA - Ah, non mi nni va una giusta? D'accussì si rispunni,' ah?... Stamu a vìdiri ca m'avissiru a pjàciri 'stibelli pastizzi!... Avanti, avanti, bisogna sciunniri 'sti scravagghi russi ca facisti e rifari tutti 'sti cifri ccu tantcchia di decenza! ... Almenu almenu a puntu a cruci.
TINA - (facendo la gnorri) - Comu?
RACHELA - A puntu a cruci.
TINA - (c.s.) - Ma iu n' 'o sacciu fari, u puntu a cruci
RACHELA - (segnandosi) - Chi dicisti? Non sai fari 'u puntu a cruci?...
TINA - No.
RACHELA - Oh, beata Vergini, Santissima, chi mi tocca vìdiri e sèntiri! ... E chi ti 'nsignaru, e chi ‘mparasti, 'nta cinc'anni di cullegiu? ... Non sai fari 'u puntu a cruci e 'u dici accussì, frisca comu 'na rosa?! ... Inveci di ittarití a facci ppi terra, murtificata e china di russuri?! ... Voli a diri ca tu, figghia mia - scusa, ma til'haju a diri, voli diri ca tu non hai puntu d'onuri! ... E chi nni fai d' 'a to' vita? E cu' ti po' vuliri ppi mugghieri, 'nta ‘sti condizioni? (tornando nelle sue stanze) - Guardàtila ddà, 'na fimmina di maritu! ... Oh, Santi di lu Paradisu, chi picciotti, all'epuca d'oggi! ... (via).
TINA - (le fa, dietro, dei versacci di dispetto, poi, udendo zulolare lo zio, che viene dal primo uscio di sinistra, fa un gesto con la mano verso la zia, come per dire « ora t'accomodo io! » e finge, con fine malizia, di singbiozzare).
SCENA III
Capitan SENIU e TINA
SENIU - (entra, zufolando e notando subito Tina piangente, preoccupato, le si accosta) - Tinuzza! ... Chi hai?... Pirchì chianci? ... Oh, picciridda!... E chi è, non si rispunni, o' ziu?... (la prende tra le braccia).
TINA - (abbandonandoglisi scoppia in un pianto tanto dirotto quanto simulato) - Ah, ziu, ziu! ...
SENIU - Ma chi ti successi, che hai? Parra! ...
TINA - (singhiozzando) - Sugnu disonurata! Non ci sarà chiù un cani ca mi vurrà ppi mugghieri!
SENIU - (facendo quasi un salto indietro) Chi?... Chi dicisti?...
TINA - (c.s.) - M' 'u dissi ora ora 'a zia Rachela! ... Megghiu mòriri, ziu miu! ... Vogghiu moriri di fami e di siti!... Non mi dati chiù mangiari... non mi dati chiù acqua!...
SENIU - (c.s.) - Ma pirchì, tuttu chistu? ... Chi facisti, scialarata?...
TINA - Nenti, haiu fattu! ... Ma non è ppi chiddu c'haiu fattu, ca non haiu cchiù onuri, ma ppi chiddu ca non sacciu fari? ...
SENIU - (tirando un sospirone) - Ah! ... E pirchì non parravi prima, figghia!... Mi facisti fari certi mali pinseri! ... Vah, vah, vah! ... (si segna). Ca chistu diceva iu... Puteva essiri mai, ccu 'ssa facciuzza? (la riabbraccia) - E chi è ca non sai fari, sintemu?
TINA - U' puntu a cruci! ...
SENIU - Comu?
TINA - 'U puntu a cruci!
SENIU - E valeva 'a pena di spavintarimi d'accussì ppi 'na cosa tantu ridicula?
TINA - Ridicula?... 'A zia Rachela mi dissi tanti cosi orribili, pirchì 'n' 'o sacciu fari! ...
SENIU - Guarda 'sta vecchia d' 'u diavulu, ca fussi cosa! ... (a Tina) Non chianciri, bedda, non chianciri chiù! ... Ridi, ascuta a mia, e lassila cantare, la zia Rachela! ... (stringendosi ancora la nipote al petto e cullandola) - Povira criatura ... Ma guardati si' su' cosi da dirisi a 'na picciuttedda schetta! ... E tuttu pirchì? ... Pirchì non sapi fari 'u puntu a...comu dicisti?
TINA - A cruci.
SENIU - 'U puntu a cruci!.... Ma fallu a menza luna, a ícchissi, a cuda di cani ca fui... comu diavulu ti pari! ...
TINA - (tra sorridente e commossa) - Allura non l'haiu persu u puntu d'onuri? ...
SENIU - E torna! Ma non ha' persu mancu 'na passula ammuffata! ... Non hai persu un cornu! ... Idda, 'dda vecchia stòlita, è, ca persi 'u vucabulariu e persi la testa!... Veni, veni cca! ... Assèttati cca, vicínu a mia, e asciucati ‘ss'ucchíuzzi (si mette a sedere in un seggiolone sui cui bracciuoli sono appesi tanti lacci di canapa con ami; accosta a sé una sedia e vi fa sedere Tina, la accarezza. la bacia, la vezzeggia). Mischina! ... Tu ascuta 'o ziu, non ci dari retta, zoccu dici dici! ... Chi è, 'stu chiànciri? ... Ti sfardi 'ssa facciuzza a lacrimi, ppi cui? ... E’ vecchia ed è 'nghirríusa, capisci? ... Pirchì è zitidduna arrappatizza e ammuffata 'ncasa, arraggiatizza siccagna, fiùrití! ... Avi tutti 'i difetti, àvi! ... Ma bisogna suppurtalla! ... Non sulu pirchì è me' soru - e soru d' 'a bon'anima di to' patri, puru - ma... (fa, con la mano, stropicciando indice e pollice, il segno noto dei quattrini) anchi pirchì picciuli nn'àvi assai... - chiù di mia, certamenti, pirchì ha 'statu sempri econuma ed ha accumulatu - (si mette a legare i lacci di cui sopra, a due a due, col nodo piano). Fammi u favuri, Tinuzza, pigghíami 'na matassina di mirlinu ddà sùpira 'dda cunsolli, dintra 'u cannistreddu... (Tina si alza e va). Anzi, pòrtami tuttu 'u cannistru.
TINA - (dalla mensola di sinistra prende un cestino di vimini con dentrodelle matassine e dei lacci di canapa). Te' cca. ziu.
SENIU - (togliendo dal cestino i lacci sfusi, che son legati a due, a due ed esaminandone i nodi) - Chi su', 'sii cosi?
TINA - Non sacciu... E’ un lavuru ca cumínciau Maru...
SENIU - (tirando i lacci dalle due estremità e sfilandoli dal nodo con meraviglia) - Mariu?! ...
TINA - Sì, ziu, Maru! ...
SENIU - (continuando a sfilare) - Nni si' certa? ...
TINA - Certissima.
SENIU - Vah, levati, è impossibili!
TINA - Eppuru, cci l'haju vistu fari stamaTINA ccti 'st'occhi mei...
SENIU - (fuori di sé) - Chiamami a 'ssu gnuranti! Unn'è',,...
TINA - Cridu ca è 'nt' 'o giardinu... Ma chi ha fattu?
SENIU - Ci hai fattu? ... Non pozzu diriu, per ora, pirchì stentai a cridirlu! ... Cèrcalu, fammi 'stu favliri, cercalu e fallu veniri cca, subitu!
TINA - Va beni. (corre in giardino).
SENIU - (continuando a disfare, c. s. ripete, sollevando sempre il tono della voce) - Oh, chi sceccu! ... Chi bestia! - Chi bistíuni! ... Chi sciccunazzu! ...
SCENA IV
RACHELA e Capitan SENIU
RACHELA - (entrando dalla seconda di sinistra) - Ccu cu' è ca l'hai?
SENIU - (fulminandola con gli occhi) - Ccu 'dda bestia aricchiuta di to' niputi! ...
RACHELA - Sa comu va! ... Chi miracuiti! Pirchì, c'ha fattu? ...
SENIU - Nenti, cosa dipocu mumentu! ... Non sapi fari 'u gruppu chianu, eccu! ... Vuleva fari un conzu comu a chiddu ca staiu facennu iu - upappaaddu! - e mi sminnau un saccu di mirlinu, attaccannu tutti 'i lenzi cc' ‘uruppu sceccu! ... Sceccu, capisci? Sceccu! ...
RACHELA - Oh!... Tuttu chistu, è?
SENIU - Pirchì, ti pari nenti? Difennilu, ora! ...
RACHELA - Sicuru, ca 'u difennu! Non ha ammazzatu a nuddu, doppu tuttul ...
SENIU - 'A so' carrera, ha ammazzatu! ... (con enfasi). La sua carriera, mummia egiziana, ca non si' autru! ...
RACHELA - Bonu, non siari esageratu, o’ solitu, ... Ppiun gruppu sceccu, sta facennu succediri 'a fini 'u munnu!... Ammazzau 'a so' carrera pirchì fici un gruppu stortu!...
SENIU - (lanciando un mucchio di lacci in aria) - Unu, dui, tri. milli! ... Non sapi fari ‘ugruppu chianu, capisci? ... (c. s.). Non sa fare il nodo piano! ... Un capitano di lungo corso! ... E’ roba di galera!
RACHELA - Già nni facisti 'na tragedia! ...
SENlU - Almenu ti stassi muta, chiappa dificudinniamussuta, almenu ti stassi muta! ... Hai 'u curaggiu di parrari tu, ca facisti spavintari 'dda picciridda, dícennucci ca persi l'onuri?
RACHELA - Iu dissié 'u puntu, d'onuri! ...
SENIU – ‘U puntu, 'a virgula, 'u puntu e virgula, l'accidenti... ca ti pigghia... comu voi tu! ... E tuttu pirchì? ... Pirchì non sapi fari 'u puntu a cruci!.. Ca t''a dassi iu, 'a cruci! ... Ma 'nt' 'e spaddi, t' 'a dassí, vecchiu scíabeccu di Saluniccu! ...
RACIIELA – Bella crianza, ca hai, ccu to' soru 'a ranni! ... Avanti, va, sdivaca tuttu 'u saccu d' 'i mali paroli, e quannu finisci, m' 'u dici, ca parramu di cosi serií, si ti piaci.
SENIU - Comu si chisti fussiru cosi ridiculi! ... Ma venicca, senti, cappata di linusa, non capisci ca fussi ‘ustissu ca ‘n'ingegneri pigghiassi 'i misuri ccu il umbrella, ínveci di pigghialli cc' 'u cumpassu? ... (passeggia per lo stanzone. senza darsi pace) - Si è ingegneri, santue santissimo diantanuni, ha' sapiri tèniri 'u cumpassu 'nt' 'e manu!... E’ logicu? ... E si n' 'o sapi tèniri, non è ingegneri, è mastru scarparu! ... (pausa). Guardati chi c'è cca, signuri mei! ... Unu ca è diplumatu capitanu di lungu cursu - e iu non sacciu com'è ca ci 'a dèsiru, 'ssa licenza, ca si era iu 'u bucciava e 'u vastuniava sparti - unu ca è capitanu di lungu cursu, dicu, ha' sapiri fari 'i ruppa di marinaru, e non di solachianeddi! ... E si ristau solachianeddi, ccu tuttu ca fu mannatu e' scoli natichi, non divi iri mai a cumannari un bastimentu, è logicu? ... Pirchì si no, a prima nisciuta fora d' 'u portu, 'u manna 'nsiccu, o u porta a 'nvestiri ccu' ‘uprimu trabaculu turcu ca ncontra I...
RACHELA - Nuddu ci fa obbligu, a me' niputi, di jri a cumannari un bastímentu.
SENIU - Ah, no? ... E allura chi cosa farà?
RACHELA - Farà 'u signuri.
SENIU - A spaddi nostri! ...
RACHELA - No, a spaddí meí, sulamenti, pirchì iu, chiddu ch'è miu, pozzu dallu a cu' mi pari, si non mi sbagghiu!...
SENIU - Benìssimu! ... E iu chiddu ch'è miu, 'u pozzu ittari d' 'a finestra! Sugnu patruní?
RACHELA - Patrunissimu, cu' ti dici cosa? ... Ma vegnu e cunchiudu ca Mariddu, ppi fari 'u signuri, nn'avi d'avanzu! ... Accussì avemu livatu ogni quistioni e ogni equivucu. Tu sai ppi cu' è ca divi pínsari, pirchì íu, all'infora di me' niputi, non riconusciu a nuddu.
SENIU - lu cci pensu ccu carta bullata, cara mia, noa paroli! ...
RACHELA - Bravu! ... E iu macari!
SENIU - Peggiu ppi cu' si penti! ... Ora mannu a chiamari 'u nutaru Quattrocchi! (si muove verso l'uscio).
RACHELA - Fallu vèniri, ca accussì servi macari ppi mia!
SENIU (fermandosi a mezza strada) - Tuttichisti eranu 'i cosi serii ca m'avevi a diri? ...
RACHELA - No, si trattava di Tina... ma oramai, è inutili, non mi cci 'mmiscu chiù... E’ cosa ca riguarda a tia sulu... (fa per andarsene).
SENIU - Sì, ma mi putissi accinnari, almenu, di chi si tratta! ... Non fussi autru ppi crianza, ppi non lassàrimi accussì, appisu 'nta l'aria, comu l'ugghialoru di mastru Titta! ...
RACHELA - 'Na dumanna di matrimonio, eccu...
SENIU - Da parti di cui? ...
RACHELA - 'Na pirsuna ca tu conusci beni.
SENIU - Sì, ma cu' è, 'ss'imbecilli?... 'ssu vastasi?...
RACHELA - Pirchì 'u chiami imbecilli e vastasi?...
SENIU - Accussì ppi modu di diri!...
RACHELA - Bellu modu di diri!...Mi sta parennu di parrari ccu
un pazzu! ...
SENIU - Rachela! ... Rachela!... Parra ccu crianza ccu to' frati!... Pensa ca iu sugnu l'omu e tu si' 'a fimmina! ... Dunca, cu' è 'st'imbecilli e vastasi ca si rivulgiu a tia e non a mia? ...
RACHELA - Ppi cuntu miu dicu ca è un partitu magnificu...
SENIU (fuori di sé) - Sì, ma comu si chiama?... 'U nomu, ‘unomu, papira cotta di Salaparuta, dimmi 'u nomu! ...
RACHELA - A proposito di crianza! ... Si chiama Luigi Sòllima, lu figghiu d' 'u prufissuri...
SENIU - (appena udito il nome di Sòllima, corre con la mano a impugnare un enorme corno di corallo che gli ciondola sul panciotto) - Professuri di chi?
RACHELA - Chi nni sacciu, iu? ... Don Saveriu Sòllima è 'ntisu accussì, n't' 'o paisi: 'u prufissuri...
SENIU - Basta: qui giace! ...
RACHELA - Chi dicisti?
SENIU - (solenne) - Qui giace!
RACHELA - Cui?
SENIU - 'Ssu discursu- qui giace! Non nni parramu chiù, non numinari a dda pirsuna innominabili!...
RACHELA - Ma non è Don Saveriu, ca si voli proponiri, ti dissi ca è so' figghiu! ...
SENIU - Non vol diri: talis patri, talis figghiu! 'I mutti antichi non fallisciunu!
RACHELA - E va beni, ci dirai di no.
SENIU - Cci dirò? ... lu? ... . 'Nntinzioni di vèniri cca, àvi, 'ssu signuri?
RACHELA - No iddu, 'u patri. Nni fici avvirtiri ppi rnezzu d' 'u prepositu...
SENIU - (riattaccandosi al corno) - Peggiu! ... lu non lu ricivu! ...
RACHELA - Non hai 'na ragiuni plausibili, ppi non ricivillu... fussi ‘na vastasata.
SENIU - 'U ricivi tu!... E diccillu bellu chiaru, un no d'accussì, guarda (fa un segno con le mani, come d'una ciambella).
RACHELA - (quasi offesa) - lu?... T' 'u scurdasti ca sugnu zitella?...
SENIU - Va, va, non mi fari sbuffari a ridiri!... Ccu tutti 'ssi pudicizii antichi e fora locu! ... All'età to' 'na fimmina non è chiù zitella e mancu maccarruni di casa! ... E’ 'na speci di cantaranu vecchiu senza casciola! ...
RACHELA - (inviperita) - T'haiu pregatu di purtarimi rispettu! ...
SENIU - 'Nta 'sta facenna, cara mia, cci vidu tutta la malignità to' contru di 'dda picciridda! ... Vujautri zitidduni ammuffati 'ncasa, n' 'e putiti vidiri, e' picciutteddi beddi, fiorenti...
RACHELA - (c. s.) - E vuiautri scapuli riformati...
SENIU - (scattando) - Rifurmati? ... Chi dicisti? E chi nni sai, tu, si sugnu rifurmatu o in attività di serviziu? Chi nni sai, ah? vecchiu barracanu tinciutu e ritinciutu ca non servi! ...
RACHELA - Bellu parrari, ca usati! ... (fa per andarsene, indignata).
SENIU - Chiddu ca vi miritati, ballattulu 'mpassulunutu di Barbaria! ...
SCENA V
TINA, MARIU e detti
TINA - (dal fondo, seguìta da Mario) - Eccu Maru, allu cca.
RACHELA (si ferma e torna sui suoi passi, per proteggere, ove occorra, il nipote).
SENIU (a Tina) - Grazii! (squadra il nipote, poi) Facitivi avanti, illustre signor capitano di lungo corso!
MARIU - (si avanza, calmo e sorridente).
SENIU - Chi vi 'nsignaru, all'Istitutu Nauticu?
MARIU - Oh, chi bella dimanna! ...
SENIU - 'Na dimanna comu tutti l'autri, e vui rispunniti, senza osservari s'è bella o brutta!
MARIU - Lettere, scienze, storia, geografia, diritto commerciale e marittimo, navigazione, astronomia...
SENIU - E la manovra, e l'attrezzatura, vi l'hannu 'nsignatu? ...
MARIU - Puru chissí...
SENIU - (rifacendolo) - Ah, puru chissi! ... Comu si fussiru una cosa di chiù, un tantu di suprecchiu e d'inutili! ... Materii facoltativi di nudda importanza! ... (fissandolo,irato). Eppi chissu vi licinziastuu capitanu d'altura senza sapiri fari un gruppu chianu! ... Eccu cca, scarparu, ca non siti autru! (gli mette sotto il naso i lacci sfilati). Tanti nni facistivu, tanti gruppi sceccu! ... Sceccu, aviti capitu? ... Sceccu comu a vui... (pausa). Ccu 'ssu conzu vostru, 'i pisci s'avissíru purtatu l'isca, l'amu, la lenza, e a vui stíssu, mastru firraru! ... (sfila altri lacci). Eccu... eccu... eccu...
MARIU - (che è rimasto impassibile sotto la gragnuola, con grande soddisfazione della zia, sorride e risponde) - Non ci aveva fattu casu...
SENIU - Non ci riditi, mammaluccu! Non è ca non ci aveuru fattu casu; non l'aviti saputu fari! ...
MARIU - Oh, chissa, poi! ...
SENIU - (rifacendo il verso) Oh, chissa, poi! ... Oh, chissa, poi!... E facitini unu davanti a mia! (gli porge due lacci). Tiniti cca... Iu sugnu cca, a guardarivi.
MARIU - (prende i due lacci, li gira e rigira, ora d'un verso, ora dall'altro, mentre capitan Senio tentenna il capo, Tina sorride e Rachela si contorce, finalmente stringe i lacci con il solito nodo falso e glieli presenta) - Eccu.
SENIU - (sfilandoli facilmente) - Eccu! ... Bellu marinaru di li me'... stivali! ... Filativi di 'na crucitta o d'un pinnuni, muddativi fora banna ccu un “sbirru”attaccatu accussì, e poi dicitimi unn'è ca jti a sbattiri 'ssu mussu fracitu, sciccazzu di Pantiddaría ccu tuttu 'u tistalí! ... (pausa). 'U ruppu chianu, iu 'u sapeva fari quannu aveva quattr'anni.!!! 'Nnt' 'a nostra famigghia 'u sannu fari tutti 'i fimmini! ... (a Rachela, porgendole due lacci) Te' facci a vìdiri comu si fa.
RACHELA - (respingendo i lacci e scostandosi) - Chi nni sacciu, iu, di ruppa chiani e gruppa jmmuruti! ...
SENIU - Già... non pinsava cchiù ca si' semprí 'dda Rachela... vurrania sarvaggia e pilusa! ... Va, va, vattinni, non mi fari diri autru... (a Tina) - Fammi 'u piaceri, 'o ziu, fammi un gruppu chianu.
TINA - (esegue, in un batter d'occhio, e consegna i lacci legati allo zio, guardando Mario, con malizia) - Eccu cca.
SENIU - (dopo aver esaminato il nodo) - Benissimu. (poi si gira attorno alle due palme delle mani le estremità dei lacci e tira forte) - Chistu non si sfila, signor capitanu! ... Ha' vogghia a tirari! ... (andandosene, trionfante per il primo uscio a sinistra, rivolto a Tina) - 'Nsigna, 'nsignaccíllu tu, o' capitanu d'alto bordo, comu si fa 'u gruppu chianu! ...
RACHELA - (impettita) - Oh, sta beni! ... E tu, Maru, 'nsignacci, a' dutturissa, comu si fa 'u puntu a cruci! ...
MARIU - (si squaglia).
SENIU - (si ferma per fulminare, con gli occhi, la sorella, poi varca la soglia della sua stanza, gridando) - Vo' itimí a chiamari o' nutaru Quattrocchi! ... Si non po' vèniri stasira ci dìciti ca l'aspettu dumani matina, ca mi servi d'urgenza!... (scompare).
RACHELA (varcando alla sua volta, la soglia della seconda di sinistra) - Oh, guarda!... A ognunu 'a so' parti, si Diu voli! ...
TINA (si tiene i fianchi dal ridere e si contorce per non sbuffare).
Cala la tela
ATTO SECONDO
SCENA I
MARIU e TINA, la voce di RACHELA e la voce di capitan SENIU
(Contemporaneamente Tina entra dalla prima di sinistra e Mariu dalla comune. Entrambi si arrestano, indecisi).
TINA - Po' tràsiri, pirchì mi nni vaiu.
MARIU - Grazii, ppi mia, o ci si' o non ci si' è tuttu 'u stissu.
TINA - E allura pirchì tinni stavi iennu?...
MARIU - ju?... Quannu mai!...
TINA - Ah, mi pareva... (entrano entrambi, Mariu va a sedere presso il tavolo di centro, sfogliando un giornale, e Tína presso il suo tavolo da lavoro, dove riprende il paccbetto dei versi ricopiati dal Giusti).
MARIU - (sbadiglia, a posta).
TINA - (con civetteria si decide a rompere il silenzio) - A propositu, mentri non hai chi fari, mi vo' 'nsignari comu si fa 'u puntu a cruci?
MARIU - Ju? Chi mi pigghiasti, ppi fimmina? ... Ju, ppi sapillu, di punti nni conusciu dui suli: il punto stimato e il punto astronomico.
TINA - E allura pirchì, davanti o ziu, ajeri, cci dasti a capiri ca 'u sapevi fari, 'u puntu a cruci?
MARIU - Ppi non faríti un piaciti a tia...
TINA - Grazii! ...
MARIU - Non c'è di chi! ... Tu non t'ammazzasti a farici 'u ‘ruppu chianu? ...
TINA - Ppi fariti dispettu!
MARIU - Obbligatissimo!
TINA - Buntà to'... (silenzio).
MARIU - A mia, guarda, 'i to' dispetti non mi fannu nécàuru, né friddu... Però...
TINA - Però?...
MARIU - Putissi essiri chiù rispittusa ccu 'a zia Rachela.
TINA - Ju?... Sugnu rispittusissima, inveci, 'u vidi?... Si, tu, ca ci manchi di rispettu 'o zu' Seniu...
MARIU - 'U rispettu ppi quantu si merita. Non pozzu certu pigghiallu sùpira 'u seriu quannu fa tutti ddi vuci e 'dd'esagerazioni, ora pirchì ci pari janca, ora pirchì ci pari niura...
TINA - Sarà esageratu - è difettu di famigghia, d' 'u restu - ma è bonu comu 'upani.
MARIU - Ccu tia, ca t' 'u sai trucchiari ccu tutti 'i to' muini e 'i to' smorfi!
TINA - (crucciata) - Ah, sugnu smurfiusa, a veru?
MARIU - Un pocu... Non ti nn'affenniri...
TINA - Fussi stupida, a affinnirimi di tia! ... Però...
MARIU - Però?
TINA - Però si' maleducatu, eccu! ... (si volta dall'altro lato).
MARIU - 'U vidi ca t'affinnisti? ... Hai vogghia a fari 'a fimmina di spiritu!...
TINA - Quantu si' graziusu! ... E’ inutili, già: tra mia e tia non jrremu mai d'accordu!
MARIU - Già... comu 'u ziu ccu 'a zia!... 'U diavulu e l'acqua santa! ... Quistioni di carattiri!.. Ma cci aggiustiremu, non dubitari.. Picca passa, anzi tra quarche jornu...
TINA - (lo interroga con lo sguardo).
MARIU - Sì... Haiu dicisu di imbarcàrimi e lassaríti patruna d' 'u campu! ... Ti lu cedu ccu tuttti lu cori, sai? ... Figurati si vogghiu rimpiangiri 'sta vecchia bicocca, ccti tutti chiddi ca ci su' dintra, scuntenti, vucitari e sgarbati (caricando), tutti!
TINA - Grazii ppi mmia! ...
MARIU - (continuando) - E 'stu paiseddu pettegulu e ridiculu' ... Mi nni jrrò a divirtirimi pp' 'u munnu, avìdiri tanti belli paisi! ... Canuscirò tanta genti ... tanti belli fimmini ... Circasse, Peruviane, Sivigliane, Montenegrine...
TINA (stizzita) - Bon viaggiu!... E salutammilli tantu, a tutti ssi ' fimmini!
MARIU - Ti servirò, non dubitari ... Anzi ti prumettu ca di ognuna ti mannirò 'a fotografia.
TINA - T' 'a poi risparmiari ... non sacciu chi fariminni (breve silenzio, poi fa per andarsene).
MARIU - Chi ti fici, irritazioni, 'stu discursu? ...
TINA - Irritazioni? ... E pírchì? ... E’ un discursu accussì stupidu! ... Mi fa vèniri di ridiri..
MARIU - E allura pirchì ti nni vai? ...
TINA - (con malizia) - Mivaiu a pittinari e vestiri... pirchì divi vèniri un signuri, ppi dimannari 'a me' manu ppi so' figghiu.
MARIU - (incredulo) - Ah, ah! ...
TINA - Parola d'onuri, sai? Addimanniccillu ‘a zia... Vidrai ca ti dici macari 'u nomu.
MARIU - Comu si chiama?
TINA - Cui, 'u pretennenti o so' patri?
MARIU - 'U pretennenti... al trono della bellezza! ...
TINA - Luigi Sòllima.
MARIU - Ah!... Un bonu partitu, non c'è chi diri! ... Piccatu ca àvi ocche trent'anni chiù di tia!...
TINA - Bhoum! ... Non signuri, lei si sbaglia, caro cugino! ... Nn'àvi dudíci suli, di chiù... Una distanza giusta tra omu e fimmina... E’ un omu seriu, non è un bardascia vacanti e capaci di ridiculaggini! ...
MARIU - Bravu!... Discurri da fimmina assinnata. E tu, 'u voi? Ti piaci?
TINA - Chisti sunnu affari mei.
MARIU - No, t'ha' a decidiri prestu, ppi sapillu iu. Pirchì si tu ti mariti iunon partu chiù... Restu cca, sulu, senza nvidii...
TINA - Vih, Gesù!... 'Nta 'sta vecchia bicocca? ...
MARIU - Ristannucci da patruni assolutu, ppi mia diventa bella...
TINA - 'Nta 'stu paiseddu ridiculu, unni non ci su' carcassi... comu dicisti? ...
MARIU - Circasse, gnuranti; donne di Circassia!
TINA - Grazii! Unni non ci su' circassi, e muntinegrini e peri 'i vajani? Ah, ah! ... (ride).
MARIU - Ci sunnu belli picciotti macari cca, non dubitari... Basta ca vogghiu...
TINA - (sibila) - Insolente! ... (e torna a s'edere, spiegazzando le poesie nervosamente e dandosi il contegno di una che vuol leggere).
MARIU - (la segue con un sorrisetto mefistolelico, poi, con apparente indilferenza). Non ci vai chiù, a fari toletta?
TINA - Mi passàu 'u capricciu, no!
MARIU - E 'u fidanzatu? ...
TINA - Vo' facítivi binidiri, tu ed iddu! ...
MARIU - Caspita! ... Semu già a chistu?... 'U sai ca si' volubili assai, cara cucina?... Pessima raccomandazione, per gli aspiranti alla tua mano! ...
TINA - (con ungroppo di pianto - stavolta sincero - alla gola). Mariu, finiscila! Finiscila, ca non haiu vogghia di schirzari! ...
MARIU - Oh chi si scherza, ccu 'ssi facenni?... 'Na fimmina assinnata comu tia...
TINA - Finiscila, Mariu, ti scungiuru! ... Fallu pp"a memoria di to' patri e di to' matri! ... (scoppia in pianto).
MARIU - (le corre incontro, le prende il capo tra el mani e, coprendola di baci) - Bedda! ... Curina! ... Chístu vuleva di tia! ... Chistu, ca mi dimustra ca mi vo' beni!... Chiddu ca disiava, chiddu ca bramava! ... Ciatu di l'arma mia dímmillu ccu 'a to' stissa vuccuzza, ca mi vo' beni e si' gilusa! ... Dimmillu! ...
TINA - (che si sarà prima abbandonata, si alza, ancora conturbata dai baci; a poco a poco le si rischlara il bel volto pieno di lacrime, sorride ed esclama) - Ma bada, ca fu 'na bella priputenza, chidda di fari parrari prima a mia! ... Lariu, bruttu ca si'! ... Aveva giuratu di mòriri, prima di dariti 'sta sudisfazioni! ...
MARIU - E pirchì? ... Si iu suffreva peni di 'nfernu? ...
VOCE DI RACHELA - Mariddu, unni si? ...
MARIU - Ah... (fissando Tina con passione) - Cci staiu 'nsignannu a Tina comu si fa 'u puntu a cruci! ... (la attira e la bacia) -
VOCE DI RACHELA - Tuttu santu e binirittu, figghiu! ... Aviti capitu, signurina Tina?... Ed è un miserabili omu!...
MARIU - (ridendo, forte) - No, zia, pirchì miserabili? ...
VOCE DI RACHELA - Ppi modu di diri! ... Aviti capitu, signorina Tina? ... Non vi casca 'a facci 'nterra di vergogna? ... Quannu finisci, Mariddu, veni cca, tanticchiedda...
MARIU - Ora, ora vegnu, zia (a Tina) - Pirchì si' accussì pallida? ... Ti vergogni ppi daveru? ... Pirchì non sai fari lu puntu a cruci? ...
TINA - (ridendo) - Ma chi! ... E tu ppi daveru ci cridisti ca non sacciu fari 'u puntu a cruci? ... iu 'u dissi apposta! ... M'affruntu, inveci, pirchì pensu ca si 'a zia Rachela traseva e nni truvava abbrazzati! ... Maria, chi vergogna!...
MARIU - Vergogna di chi? Di vulirini beni? ... lu 'u vogghiu diri a tutt 'u munnu, ca ti vogghiu beni tantu, ma tantu, tantu, tantu! ... (la riabbraccia).
VOCE DI SENIU - Tina! ... Tinuzza!...
TINA - (svincolandosi) - Eccu, zíu, chi voi? ...
VOCE DI SENIU - Ora ora 'ntisi 'na vuci di carcarazza. Chi curri, malu tempu?
TINA - (sorridendo) - No, ziu, è bon tempu, tempu bellissimu! ...
VOCE DI SENIU - Chi fai, ddocu? ...
TINA - Sugnu ccu Mariu ca mi sta 'nsigna... cioè, cistaiu ‘nsignannu 'u 'ruppu chianu!...
VOCE DI SENIU - Benissimu! ...
TINA - Finivi, ziu, e vegnu ddocu, aspetta...
VOCE DI SENIU - No, fermati, ca vegnu iu...
TINA - Curri ddà banna, ora, e di cca a un mumentu torna...
MARIU - Bisogna diricci tuttu, e' zii, quantu nni maritamu prestu prestu!
TINA - Iu mi vergognu! ...
MARIU - Ci 'u dicu iu...
TINA - Scappa, scappa... cca c'è 'u ziu! ...
MARIU - (dà a Tina un ultimo bacio di sfuggita e scappa viaper la comune, a destra).
SCENA II
TINA e cap. SENIU, poi la DOMESTICA, indi DON SAVERIU, in ultimo MARIU
SENIU - Ah, Tinuzza mia, assèttati. (siede, le porge una sedia e la fa sedere accanto a sé) - Ascuta a mia ca t'haju a diri certi cosi serii...
TINA - E iu macari, ziu, seriissimi...
SENIU - (guardandola, incuriosito) - Tu?...
TINA - (china il capo, assentendo).
SENIU - Cosi seriissimi?...
TINA - (c. s.) - Seriissimi.
SENIU - Cosi ca riguardano to' cucinu, ah? ...
TINA - (assente col capo).
SENIU - Ci voli pocu a capillu! ... Dunca senti, figghia mia... Cca semu arrivati a un puntu ca non si po' chiù jri avanti! ... Fra mia e to' zia, tra tia e io' cucinu...
DOMESTICA - (sulla comune) - C'è 'u prufissuri Sòllima.
SENIU (correndo subito al corno di corallo) - Morti subitania! ... Dicci ca non ci sugnu! ...
DOMESTICA - Ora ci dissi ca c'è! ...
SENIU - Bestia, aricchiuta, cretina, signa piruviana... Dicci ca non pozzu ricivirlu, ca haiu n'affari urgenti pp' 'i manu...
DOMESTlCA - Comu fazzu?... 'U fici passari...
SENIU - Brutta maccaca!...Nescí, annunca 'na seggia ti lassu curri ri!...
DOMESTICA - (scansandosi) - Allu cca. (si ritira).
D. SAVERIU - (entrando) - Oh, egregiu e stimabilissimu capitanu, come sta? (si avvicina con le braccia tese, per prendere la mano di Senio).
SENIU - (sfiorando appena con un dito l’epidermide di don Saveriu,fa un grugnito che vorrebbe essere una risposta).
D. SAVERIU - (senza scomporsi, con un falso sorrisetto di compiacenza) Dall'aspettu si vidi ca sta benissimo! ... Lei è sempri picciottu, culuritu, sanu, friscu comu 'na rosa...
SENIU - Contru la jttatura, si diu voli! (gli addita una sedie presso il tavolo di centro, a sinistra, tra lui e la nipote, e ostenta in mano il gran corno di corallo, sospettoso e vigile, sempre).
D. SAVERIU - (sedendo) - Sempri accussì, sempri accussì, capitanu, per il bene e la prosperità della sua casa illustre...
TINA - (non vista da don Saverto siede dietro a lui, un po' più in su, verso il fondo, e fa le viste di scartabellare, ma in realtà tiene gli occhi sulla vetrata di fondo, da dove appare).
MARIU - (che dietro le spalle di cap.Senio, e nascosto agli occhi di don Saverio da uno degli stipetti della stanza, comincia a farle segno di filarsela in giardino con lui).
SENIU - Speriamo... Speriamo... signor don... coso... Faremo di tutto per guardarci dai mali incontri... Míttiremu tutti i nostri mezzi per vincere ogni malocchiu... In che posso servilla, prufissuri?
TINA - (non capisce i segni di Mario e glielo fa intendere).
MARIU (per spiegarsi meglio le fa segno di un accoppiamento e di una sfilata).
TINA - (invece capisce che deve mandar via lo zio e, non vista da don Saverio, comincia a fare segni analoghi a Seniu).
SENIU - (che era già sulle spine per la presenza di DonSaverio, ai segni della nipote, che non capisce, perde la bussola e la calma. A questo punto i segni fra i tre incalzano, generando tra i medesimi maggior confusione).
D. SAVERIU - Ecco, illustre signor capitano... La ragione che qui mi adduce è di qualche momento... Dalla nostra conversazione si possono decidere i destini... (vedendolo contorcersi e gesticolare) - Diceva?
SENIU - Nenti... cu' ha parratu? ...
D. SAVERIU - Mi pareva... Dunque... com'ella non ignora, da tempo immemorabile, le relazioni tra le nostre famiglie, la sua illustre per censo...
SENIU - (si lascia scappare, all'indirt'zzo della nipote) - Ma chi? ...
D. SAVERIU - No, non protesti, me lo lasci dire, mio nobile amico: la sua illustre per censo, la nostra non disprezzabile per senno e operosità, sono state improntate alla più grande, alla più schietta...
SENIU - (sempre più irritato perché non sa decifrare i segni di Tina, si alza di scatto, sbucando, ed esclama) - lu non nni capisciu nenti! ... (a D. Saverio) - Senta, mi permetta, pírchì sannunca scoppiu! ... (va via, di corsa, nelle sue stanze).
D. SAVERIU - (come uno che ha compreso, sorridendo) - Si accomodi! Ma le pare? ... Faccia tutti i suoi comodi, egregio amico' (Resta unpo' a guardare il soffitto, mentre)
TINA - (che ha finalmente capito, cerca di svignarsela, non vista, ma si' è appena alzata che D.Saveriu, voltandosi, la sbircia).
D. SAVERIU - Oh, signorina, lei era cca?... Scusi, sa, se non l'ho notata prima! ... Sugnu un pocu miopi...
TINA - Nenti, ci pari! ...
D. SAVERIU - Chi fa, di bello? Studia? ... Ricama? Vidu ca havi il suo cestino da lavoro allatu e il suo quaderno in mano...
TINA - Non è quadernu... sunnii fogghi staccati con poesiemanoscritte...
D. SAVERIU - Sue?
TINA - No, non sugnu poetessa, iu... Sunnu poesii di Giusti...
D. SAVERIU – Amico di famiglia?
TINA - Cui?
D. SAVERIU - Questo Giusti? ...
TINA - (scambiando un sorrisetto con Mario) - No... è un... brigaderi di finanza...
D. SAVERIU - (con una smorfia di compassione) - Cu' sa chi roba!... Si nni po' leggiri qualcheduno, signorina?
TINA - S'accomodi. (gli porge il pacchetto).
D. SAVERIU - (prende il primo foglio, si pulisce le lenti, le inforca e legge) - « La terra dei morti ». Ah è una poesia sacra... sentiamo. « A noi larve d'Italia - mummie dalla matrice ». Matrice ccu 'a emmi minuscola! ... « E’ becchino la balia...» Ahi, ahi!-... Cuminciamu ccu l'erruri digrammatica!... E’ becchina, deve dire. Permette?
TINA - Si figuri!
D. SAVERIU - (cava di tasca una matita e corregge.Proseguendo la lettura) « Anzi la levatrice ». E chi c'entra la levatrice? Ma il senso comune, dove l'ha lasciato, il brigadiere? ... (continua a leggere) - « Con noi sciupa il Priore »... Evviva la bestia! - scusi, signorina. Ma, lei stissa, con la Matrice che ci ha che fare, il priore? ... L'arciprete doveva dire! (corregge c.s.).
MARIU - (per salvare Tina, che sta per scoppiare dalla voglia diridere) Senta, signor Sòllima, 'u ziu ci dimanna scusa se non ci po' dari udienza, per ora, pirchì è statu chiamatu da un affari urgenti...
D. SAVERIU - (con il solito sorrisetto) - L'aveva capitu! ... L'aveva capitu! ... Faccia con tutto il suo comodo... Aspetterò.
MARIU - Già, ma forsi tardirà assai...
D. SAVERIU - Non importa! ... Non importa! ... lu non haju nenti da fari... Ripiglieremo la nostra lettura, qui, con la cara signorina Tina...
TINA - Si figuri con quantu piaciri... ma è ca divu accudiri atanti facenni di casa ca mi divu privari ppi forza...
D. SAVERIU - (interrompendola) - Faccia pure, immagini!... 'U sacciu, 'u sacciu ca lei è massara e donna di casa... Resterò a parlare di cose nautiche col signor Mario, se...
MARIU - lu mi reputerei fortunatissimo, ma giustu giustu haju ju puru un affari d'accussì urgenti da sbrigari, che mi debbo procurare il dispiacere di lasciarla...
D. SAVERIU - Non fa niente, non si dia pena... Guardassiru, aspittirò in giardinu. Mi divertirò a guardari ed a classificaci tutte le piante... Loro sapranno che io mi diletto anche unpo' di botanica...
MARIU - E di chi non s'intendi, lei, professuri? ... (accompagnandolo alla vetrata in fondo, apre la finestra e lo spinge quasi fuori) - Faccia, faccia pure.
D. SAVERIU - Quannu 'u capitano sarà comudu, mi usi la cortesia di farmi chiamarí ...
MARIU - Non dubiti (gli richiude dietro i battenti ed esclama) Cappata di linusa! ... Musca di Milanu! Cuzzica di cuddaru!... (rivolto a Tina) - Ma chi cumminasti, ccu 'u ziu? ... lu ti sínteva diri: ventenni ccu mia, 'nt' 'o giardinu. (rifà i segni che faceva).
TINA - 'U capivi, ma all'urtimu. In principio mi pareva ca dicevi: dicci o' zlu di jrasinni e lassallu sulu. (rifà i gesti c. s.).
MARIU - Avvertulu, ora, o' zzu Seniu, si no, poi si 'nfuria...
TINA - Hai ragiuni (corre al primo uscio di sinistra e chiama) Ziu, ziu, po' vèniri, ca non c'è cchiù nuddu...
SENIU - (riallacciandosi, scruta e poi, sospirando, come chi sìasi liberato d'un gran peso). Si nni ju? Finalmenti! ... (alla nipote) - Ma si po' sapiri chi sintevi duri ccu tutti ddi manovri? (la rifà).
TINA - Non fari vuci, ca cca fora è, 'nt' 'o giardinu! ...
SENIU - Chi dicisti? ... Cui... iddu? ... (riafferra il corno) - Ora
mi fa siccari tutti cosi!... A la facci di li ittatu... Ma aspetta
ca l'accomudu iu (suona il campanello).
SCENA III
La DOMESTICA e detti, poi il NOTAIO
SENIU - (alla Domestica, che appare sulla comune). - Oh bravu! veni cca! ... Dicci o' giardineri ca facissi agiri tuttu 'u jocud'acqua d'ugiardinu... Tuttu, capisci?
DOMESTICA - Sissignuri... Voscenza vidi ca 'nt' 'a sala c'è 'unutaru Quattrocchi.
SENIU - (facendosi serio). - Beni, fallu passari subitu. (a Mario). avverti a to' zia ca favorissi cca.
DOMESTICA - (esce).
MARIU - (va per la seconda a sinistra, per tornare, da lì a poco, seguendo Rchela)
NOTAIO - (entrando) - Servitor suo, capitanu, eccumi all'ordini soi. Mi dispiaci ca jeri sira non potti vèniri, era troppu tardu...
SENIU - Non importa, assittàtivi accostu a 'stu tavulu, nutaru, e facitimi 'u piaciri di pigghiarivi 'st'appunti ca vi dettu, ppi poi fari l'attu relativu e rigistrallu o' chiù prestu possibili (a Rachela). Illustre sorella maggiore, ascutati.
RACHELA - Sugnu tutta orecchi.
SENIU - (dettando) - Fazzu donazione a me’ niputi Tina, cca prisenti e accettanti, (azione di Tina) del brigantino a palu Galatea, di mia proprietà; del mio fondo di Capumulinu e del giardino mio di Aci Sant'Antoniu... Aviti scrittu ? ... Benissimu... In oltri ci dugnu i me' cincu carati supira 'u vapuri Simetu...
TINA - Ziu, ma chi discursu è, chistu?
SENIU - Zìttiti! ... E tutti l'azioni mei di l'Agrumaria... (fissa Rachela con aria di trionfo).
RACHELA - Benissimu! Nutaru, mentri ci siti, pigghiativi macari st'appunti mei ... Fazzu assolu... Non ci siti? ... Spiccíativi! ... Oh, sia lodatu diu, scriviti: - Fazzu dunazioni assoluta a me' niputi Mariddu, cca presenti e chinu di saluti e accittanti, di la scuna a virga sicca...
SENIU - 'A virga sicca è idda, nutaru (accenna a Rachele).
RACHELA - (fa una smorfia di compatimento) - di la scuna a virga sicca L'Aquila, e della goletta Rachelina...
SENIU - (berteggiandola) - Rachelina! ... Sèchila cotta! ...
RACHELA - ... di mia assoluta proprietà; e sparti ci dugnu: a me' vigna di San Crioli, 'u castagnitu miu di Serra Pizzuta e 'a me' casina di Bedduvirdi, giàlina...
SENIU - Pp' 'a colira di vìdiri a tia 'na vota all'annu...
MARIU - Oh, zia, ma chi fai?..
RACHELA - (trionfante, lanciando uno sguardo di sfida a Senìu). Unmumentu, ca non haju finutu! ... Cci dugnu, sparti, sissantamila liri in cartelli di rennita, tuttu l'oru míu, tutta la mia argintiria, e insumma unu di tuttu ca pussedul nenti esclusuu... (a Mariu) - Si doppu tu non mi vo' manteniri, mi nni vaiu 'nta n'ospiziu di mendicità! ...
MARIU - (abbracciandola). - Ma chi dici, zia? ... (all'indirizzo dei due zii) - Ma chi vi pigghiau, oggi? ...
SENIU - (al Notaio) - Non chiuditi, nutaru, non chiuditi: aggiungo, da parte mia, a favuri di me' niputi,,, bedda e frisca comu 'na rosa, cca prisenti e accittanti: 'i me' libretti di risparmiu del Credito Italiano e della Banca Commerciale, per un ammontare di settantasei mila lire, più 'sta casa, ccu tuttu 'u mobíliu, annessi e connessi, cumprisi 'i me' strumenti e persino il mio guardaroba personale: gilecchi, causi, giacchi, tuttu! (a Rachele) Pìgghiti chista! ...
TINA (correndo ad abbracciare Senio) - Ah, ziu míu, ma ti pari ca iu pozzu accettare 'a to' dunazioni? ...
MARIU – No, muta statti, inveci bisogna accittalla.
SENIU - Statti mutu tu, scímiuni! ... Chi c'entri tu? ...
MARIU - Beh, allura non bisogna accittalla...
SENIU - Bisogna, inveci!...
MARIU - L'aveva dittu, e non ti piacìu! ...
SENIU - Ma l'haiu a diri ju, non l'ha' a diri tu, cucutrígghiu!...
MARIU - Sta beni... Ora ci pirmittiti ca dicu 'na parola?... Finistuu, nutaru?...
NOTAIO - Sissignuri.
MARIU - (agli zii). Semu patruni di chiddu ca nn'àviti dunatu?
SENIU - Me' niputi Tina nn'è patrunissima, pirchì capitan Seniu avi 'na parola sula...
RACHELA - E me' niputi Maru macari, pirchì iu non mi rimangiu chiddu c'haiu dittu.
MARIU - Benissimu... Ppi cuntu miu, dal mumentu ca sugnu patruni di un beddu patrimonio, haiu dícisu di pigghíarí mugghieri.
TINA - Ed íu di pigghiari maritu.
SENIU e RACHELA - (guardano i nipoti e poi si guardano, meravigliati).
RACHELA - Tu t' 'a po' pigghiari, pirchì hai vint'un annu cumpiti!
SENIU - E me' niputi si nni po' pigghiari dui, pirchì ha passatu i' dicerott'anni.
RACHELA - Basta ca è 'na bona picciotta, timorata di Diu!
SENIU - Abbasta ca non è 'o figghiu di 'ddu fuanu di maìsa! ...
MARIU - Iu 'a me' scelta 'a fici...
TINA - E iu macari.
SENIU - (azione c. s.) - Ah sì! ... A 'stu puntu erumu junti? ... Avevi già 'a to' ciamma?
TINA - (assente col capo).
SENIU - E cui è?
MARIU - (pronto) - 'A so' ciamma? Sugnu iu...
SENIU - (minacciandolo con il calamaio) - Vattinni, spezzacoddu!
TINA - Si ziu, iddu è... E 'a so' ciamma sugnu iu! ...
SENIU - (guardando attonito Rachele) - E l'imbecilli semu tu e iu!...
RACHELA - Sciarra e diavulu e vogghiu diri!... Avemu custiunatu tanto, tutti dui, ppi pigghiari i parti di l'una e di l'autru! ...
NOTAIO - E 'ntantu 'i picciotti eranu d'accordu!...
RACHELA - Ma chi accordu, si eranu cani e gatta?! ...
MARIU - I nostri eranu dispetti di 'nnamurati, averu Tina? ...
SENIU - Ah, vurpagghiunazzi... a doppiu fodiru!... 'U sapiti ca ppi causa vostra iu e idda (accenna a Rachele) a mumenti nni pinnaumu comu du' 'addi d'innia? ...
RACHELA - Sì, ci avevi a pruvari, tu!
SENIU - Ah, chista è grossa! (scherzando). Iu, ppi cuntu miu, ritiru 'a dunazioni.
RACHELA - (secondandolo) - Ed iu macari.
TINA - Chi mi nni 'mporta, basta ca nni lassati spusari!
RACHELA - Te', te'! ... Guarda 'a picciridda! ...
SENIU - Auh, vecchia, non diri mali di me' niputi, sai, pirchì si no! ...
MARIU - Ah, di Istu mumentu in poi non aviti a questionari chiù mancu ppi scherzu! ... Si no facemu 'i nostri bauli e ni nni iemu...
SENIU - Chi?... Un mumentu, nutaru: la donazione fatta, ppi cuntu miu, vige, ma a pattu ca 'sti du' signuri restanu sempri cca, ccu mia.
RACHELA - (allarmata). - Comu?
SENIU - (correggendosi) - Ccu nui...
RACHELA - Ah, vuleva diri, iu! Giustu dici vostru ziu e 'u stissu dicu iu!
TINA - E nuatri vi prumittemu di stari ccu vuiàutri finu o jornu in cui vi quistiunati ‘n'autra vota...
SENIU - Allura finu a 'stasira...
RACHELA - Ah, 'sta 'ntinzíoni hai? ...
SENIU - Veni cca, vicchiaredda! ... Tu 'u saica sugnu tuttu vucca, comu 'u mazzuni saracinu! ... Quannu sugnu nirvusu bisogna cumpatìrimi, pirchì addumu subitu e non sacciu chiù chiddu ca dicu! ...
TINA (spingendolo in braccio a Rachete) - Va, ziu, abbrazza a to' soru! (i due vecchi si abbracciano e si baciano) E questo sia il suggello della pace...
MARIU - (afferrando Tina) - Suggillamu puru nui! ...
SENIU - (separandoli) - Auh, auh, scimpanzè! ... Tu non suggelli nenti, ppí comora... Quannu sariti maritu e muggheri, poi, vi fazzu nesciri macari suli! ... (appare dietro la vetrata Don Saveriu, tutto fradicio e grondante acqua, col volto acceso. Esso si dà a picchiare dietro i vetri).
SENIU - (notandolo) - A la facci so', cca è! ... Figghi mei, tuccamu ferru, si no semu persi! ... (afferra il suo solito amuleto).
SCENA IV
DON SAVERIU e detti
D. SAVERIU - (entrando, appena Mariu gli avrà aperto la vetrata, e dando una sgrullata) - Scusi, sa, signor capitanu, il gioco d'acqua d' 'u so' giardinu sarà 'na cosa bella, ma è infernali! ... E poi, com'è ca scatta accussì, senza riguardi per nessuno? ... Non mi vitti chiù lustru. Pigghia di cca e mi sgricciava di sutta, pigghia di ddà e sgricciava d'arrerí... Insumma, di tutti i lati, lei osservi comu sugnu ridotto...
SENIU - (soddisfatto, frenando il riso) - No, non ci badi, sa!
D. SAVERIU - Eh, non ci badi! ... Lo so, non ci baderei, se non bagnasse... Ma l'acqua, salvo errore, bagna, illustre signor capitano, e lei me l'insegna! ...
RACHELA - Poviru Don Saveriu! Venga, venga ccu mia, ca 'u fazzu asciugari...
D. SAVERIU - Non occurri, signora... cioè, signorina, scusi... Che vuole, così bagnato... Grazie! Piuttosto, signor capitano, è disposta, ella, ad ascoltare quel discorsetto che avevo cominciato?...
SENIU - Si figuri! ... Sono tutto orecchie, dica.
D. SAVERIU - (guarda in giro sospettoso).
SENIU - Tina e Mariu, vujautri vi nni putiti iri in giardinu (a d. Saverio) - Immaginu ca non mi voli parrari davanti ad iddi... E poi, starebbero a disagio... Sa, si sono fidanzati 'nta 'stu mumentu, cu' sa quantu cosi hannu da dìrisi...
D. SAVERIU - (allibito) - Come?... Fidanzati? ...
SENIU - Già... Sicuru... 'U nutaru è cca, comu lei vidi, pp' 'i capituli matrimuníali...
TINA e MARIU - Sissignuri! ... (fan finta di andarsene ma si fermano in un angolo).
SENIU - Dunca... illustrissimo e stimabilissimo signor professore... e cavaliere, mi pare, ah?... Si accomodi e continui...
D. SAVERIU (turbato, livido di bile) - Veramente... sa... megghiu ca nni parramu un altro giorno.
SENIU - No, parli, parli ora stissu...
D. SAVERIU - (sulle spine) Tanto più c'haju un affarettu urgenti da sbrigari.
MARIU - (intervenendo, benché Tina lo tiri per la giacca) - No, scusi, ora ora mi dissi ca non aveva nenti da fari...
D. SAVERIU - Già... pirchì non mi ricordava... Ho detto male... Ho invece un appuntamentu importanti pp' 'i sei...
SENIU (cavando l'orologio) - Havi tempu! ... Ppuh!... Sunnu appena 'i cincu! ...
D. SAVERIU - (deciso) - Ma lei mi voli fari pigghiari 'na polmonite, scusi! ... Sa, debbo lasciarla, mi duole, ma capirà... (inchinandosi). A ben rivederla! ... Sarà per un'altra volta... (si avvia, giunto sulla soglia si volta e dice, a denti stretti) - Signori.. complimenti... e augurii! ... (s'inchina ancora ed esce).
SENIU - (facendo cenno a tutti di avvicinarsi) - Ppi carità, prestu, picciotti, vinití cca, si no ristati sicchi 'nt' 'e robi! ... Chissu fa cascari aceddi d' 'u giuccu! ... Cu' si guardò, si salvò... (porgendo il corno). Tuccati, tuccati! ... Tu macari, Rachela!... E vui, nutaru.
NOTAIO - (ridendo) - Scusa, capitanu, ma iu non ci cridu 'a ittatura! ...
SENIU - (come mortificato, scusandosi) - Ah, chi diavulu, si scherza! ... Si sapi, su' pregiudizii, roba di fimmineddi... ju, ppi cuntu miu, chi vi pari ca ci cridu? Ma chi! ... Si fa ppi ridiri... (si ode nell'interno un fracasso di stoviglie rotte e allora, traendoselo in disparte, con convinzione) Però esisti, nutaru... Statini certu, esisti! ...
