Danée fà danée… e pioeucc fà pioeucc

Stampa questo copione

(*) Questo lavoro è stato creato

per una casa per anziani ; si presta

per un uso similare.-

                                               (2004) A.Noli

La scena si svolge in tempi passati. Tre contadine, tornando dal lavoro dei campi, si scambiano qualche parola...........

I personaggi: Balduina, moglie di Gildo

             Tecla, moglie di Olindo

             Agata, moglie di Girolamo

BALDUINA      (RIVOLGENDOSI A TECLA ED AGATA) Cari i mè tosann, incoeu an pòdi propi pü. Somm straca com’è’n asen!

TECLA         Incoeu, sevi südada com’è un porcèll.

AGATA         E mì che bestia saréssi? Perchè vüna a l’è ‘n asen, vüna un porcèll.....e alôra al sii mì cosa somm? Un can!

BALDUINA      Oh, bèla! E perchè, Agata?

TECLA         Già, perchè ta saresset un can?

AGATA         Perchè al mè Girolim al ma considera inscì, eco! Specie quaand l’à passaa là i trii mèzz.

BALDUINA      Bével ammò come ‘na vòlta?

AGATA         Noooo! Macchè! Al beef come dô vòlt!

TECLA         Ah, se al mè Olindo al bevess, mì.......

BALDUINA      Tì, cosa? Se ga faresset, eh? T’al coperesset? Inscì ta naresset de déent?

AGATA         E poeu, cara la mia Tecla, creed migna che al tò omett al spüda foeura al vin, se al g’à capita, neh!

TECLA         (INDISPETTITA) Uheila, e tì cosa an séet di abitudin privaa del mè Olindo?

BALDUINA      Beh, privaa un corno sech! Che quaand sevum là a spôsa dèla Rosina, ora de sira l’eva anca lüu püssée de là che de scià.

TECLA         Beh, quell a l’è un oltro para de manich. L’eva drée a fach festa......(VIENE INTERROTTA DA AGATA)

AGATA         ......A fach festa ai butigli de Barbera!

BALDUINA      Ma che, Agata, se diset sü! Al studiava com’è l’è faj al cüu di botigli in Piemoont.

TECLA         Oh, basémm.......’Scolta, Balduina, al tò Gildo, che l’è tütt ca’ e gésa........

BALDUINA      (INTUENDO DOVE TECLA VOGLIA ANDARE A PARARE) Ma dai, Tecla, basta con ‘sti discoorz chì!

TECLA         Ah, sì? Basta, neh? Voeurevi domà dì che, ala sua etaa, l’oo vist.........

AGATA         (COMPLETA).....a fermass a parlà con quela sfaciada dèla Vitorina!

TECLA         ‘Na fréschéta che la pò véss sua tôsa!

BALDUINA      (COME PUNTA DA UNA VIPERA) L’è migna vera!!!

AGATA         Se l’è migna vera, la sarà anèll......

TECLA         (ALLUSIVA) Al nòss Gildo ga piaas la gioventü!

BLADUINA      (MANI SUI FIANCHI) Ma vialtri dô, i giuraa de rompom.....eh?  Piantéla!

AGATA         (FINTA PENTITA) Oh, scüsüm, Balduina, se oo tocaa al tò saant tacaa sü sul muur....al benefatoor....al prioor di confratéj.....

TECLA         Ad ogni bôn cünt, semm poeu migna inscì stracch, se gh’emm voueja de stà chì ammò, dopo ‘na giornada sôta al sôo, a cuntà sü ‘sti scemaad chì!

AGATA         Vera, Tecla. Dai, Balduina, basta. G’ann demm un taj. E poeu, inveci de penza ch ai nòss corni de quatro sòold, sa puderess...vardà i corni....delle alte sfere!

BALDUINA      Parlet divòlt.....de casa De’ Fasanis?

AGATA         No, lì sa seent domà büj l’aqua, che i g’à nagôtt de metich giô!

TECLA         Però, a i’è nobil!

BALDUINA      Tecla, eet mai pruvaa a mangià la nobiltaa, magari in ümid?

TECLA         (RIDE DI GUSTO) Oh, geent, che maa de ventro! Nobiltaa in ümid? Ma loor, in ümid, paar che i mangia domà i fasoeu!

AGATA         Però a sii catiif. Casa De’ Fasanis.........

BALDUINA      .......l’à g’à i fasan domà nel nom, e migna in padèla! (RISATA GENERALE)

TECLA         Però, la contessina figlia..........

AGATA         Contessina...oh Dio.....l’à g’à già i ann de un sass pinin! L’è piena de rügh!

BALDUINA      Ma al portameent l’è regaal! Nobil!

TECLA         Sì, someja che l’à mangiaa un baston de fasoeu! E che superbia! L’oltro dì l’oo trovada facia a facia, e l’à tiraa drizz.

AGATA         Per forza, stüpida! T’avrée gnanca faj la riverenza!

BALDUINA      Agata, credevi che ta voeurevet parlà dèla ca’ del comendadoo Panza!

TECLA         Ta voeureret dì del comendadoo Grassi!

BALDUINA      Ma se tücc i la ciama Panza! Taant l’è istess. Tra lüu, la dòna e i sò fioeu....sperem che i vaga migna süla pesa püblica, se de no chissà che disastro!

AGATA         Ta ma féet sfondrà dèl riid! Cert che l’è già ‘na bèla raza de porcej de ingrass!

TECLA         Al sii cosa semm? Invidioos, eco. Nümm semm invidioos.

BALDUINA      E de cuss’è? De migna somejà a ‘n armadi a tré aant?

AGATA         Penzée che lée, la sciôra Grassi, quaand che la vegn foeura dèla pasticeria, la sa dà un mücc de ari, e tücc i riid, perchè la g’à la bôca ammò sporca de crème e zücher al veel!

TECLA         E i düu rampolli, che i g’à già “il precettore” in ca’, e che inveci de studià al latin, i seguita a mangià pan e salam?

BALDUINA      Però, a l’è salam “della casa”, marca “I tre porcellini”...........

AGATA         (PRONTA) Ma però i purcelin.....a i’è quatro!!! (RISATA DELLE TRE DONNE)

TECLA         Però, a penzach ben, a semm già di bej sagôm, a tajach giô i pagn de dòss di geent.......

BALDUINA      Se i füdéss geent....ma....(RISATE) sicome che a i’è un zich purcej............

AGATA         De ben in mej, tôsann! Chì, bisouegnerà che vagôm a cunfesass del Prevost, pussée svèlt che in prèssa!

BALDUINA      Esagerada de ‘n esagerada! Cosa emm poeu faj de inscì tremendo, dai !

TECLA         Ma poeu...a sii sicüur che ‘n’à sentii nissün?

AGATA         E perchè?

BALDUINA      Già, perchè?

TECLA         Come a sii indrée! I pò mandann a ciamà di carabügneer! Diffamazione, la sa ciama. Diffamazione!

AGATA         Chi che na fà ciamà? I De’Fasanis?

TECLA         Ma no, scema! Quii, i g’à gnanca de piaang, che i g’à migna i danée de toeu un fazolett!

BALDUINA      Alôra, chi? Ah, oo capii....quii marcioni dei Panza-Grassi.

TECLA         Propi: E penzii i nòss omen, se....se i vegniss a savé.....

AGATA         (AVVIANDOSI CON LE AMICHE) Ma n’à sentii nissün.

BALDUINA      Speremm che al siéss inscì, perchè nümm mangiôm pulenta e quii là bigné, e i sciôri i g’à sempro reson, e regordemess che........

TECLA         .........”Danée fà danée.........

AGATA         (RIDENDO).........”E pioeucc fà pioeucc”!

    Questo copione è stato visto
  • 0 volte nelle ultime 48 ore
  • 1 volte nell' ultima settimana
  • 2 volte nell' ultimo mese
  • 17 volte nell' arco di un'anno