… e chi viv se la spassa!

 

..... E CHI VIV

      SE LA SPASSA!

3 ATTI AMBROSIANI

DI

ANTONIO MENICHÈTTI

da Augusto Novelli

Personaggi:

Gino

Lucia

Tògn

Lia

Pina

Carlètto

Lidia

Ugo

Laura

Scena - Un salotto da pranzo di una villa. Nel fondo la comune-   ingresso dal giardino. Porta a destra (camera Gino) e a sinistra (cucina) Sulla sinistra dèlla scena un tavoro da pranzo con sedie e.. su una mensola (o mobile), una foto dèlla defunta padrona, sulla destra un divano.

... E CHI VIV SE LA SPASSA!

ATTO PRIMO

SCENA I°

Lucia ed Ugo

Lucia -  (entrando dalla camera con un cuscino che sta mèttendo in una federa; mormora) Lenzoeu nètt e te dormètt come on angiolètt, dis el proverbi! (annusando) Sent che profum !  Mughètto!! (chiama) Ugo!... Ugo... Dai, moeuvess! La ciav de la valis te l’hee trovada o nò?

Ugo - (dalla comune) La trovavi pù. Con tutta quèlla marea che ghe gira in gir... Ma saria minga mèi s’el lassarien quiètt?

Lucia - T’hee parlaa come vun grand, ma.....

Ugo - (mostrando) Tèlla chì, la ciav: la lassi nel bus de la valisa (esegue) Te se rangett ti a sistemagh i ròbb?... Mi ghe capissi foeura nagòtta.

Lucia - Si, si, me rangi de per mi, tant me ricòrdi ben de tusscòss.

Ugo - Sperèmm! (guardando la foto) Cert che, quand gh’era ancamò la sciora Marcèlla, gh’avevom meno rògn de grattà!

Lucia - Debon! Sperèmm che riessom a contentall! Ti se t’en diset? Ghe la farem  a contentàll, adèss che la padrona la gh’è pù?

Ugo- Varda, mi ona vòlta che gh’hoo preparaa i s’ciòpp e tutt i sò odesei per la caccia, mi sont a pòst. el pesg el sarà per ti!

Lucia - Mi, se appèna m’incorgi che se intendòmm nò, el pianti chì in duu minut.

Ugo- E la carità cristiana in doe la mèttomm?

Lucia - E mi dovarissi stà chì a sentill borbottà come ona pignatta de faseou?

Ugo- Ma che borbottà! Stasera l’ha mangiaa, te l’hee contentaa!

Lucia - L’ha mangiaa de gust?

Ugo - L’ha anca nèttaa el piatt cont el pan!!

Lucia - E allora mei inscì, perchè gh’è nient de pesg che aveggh tra i pee on vedov malmostos! Sent on moment, Ugo.

Ugo- Se gh’è?

Lucia - Ti se te diset, de cossitt gh’hoo de lassann duu come quand gh’era la sciora, o l’è assee vun soll?

Ugo - Ah, mi son de Rovigo e dei fatti altrui...

Lucia - Verament de là gh’è el pòst per duu!

Ugo - Eggià!

Lucia - Si, ma adèss manca....

Ugo- (ammiccando) Manca el mèi....

Lucia - Ma mi soo nò come comportamm!!

Ugo - E sì che te seet vedova anca ti; ti se t’hee faa quand te see restada de per ti?

Lucia - Ona vaccada adree a l’altra! Hoo dovuu vend tusscòss e vegnì chì a fà la sèrva. Se gh’era nò la pòra sciora Marcèlla che la me ciappava chì, stavi frèsca!

Lia - (d.d. chiamando) Lucia!

Ugo - La signorina Lia!

Lucia - Ma la doveva minga stà de là on poo ancamò, sta rompaball! (esce, prende l’altra federa e l’altro cuscino e rientra subito)

SCENA II°

Lia e dètti

Lia - (affacciandosi) Se pò vegnì denter?

Lucia - Avanti, avanti, lee la disturba mai!!

Lia - (entra e va  a guardare in camera) Te me permèttet de dà on’oggiada? M’ha mandaa chì la mia mamma. Minga per nient, nèh, ma adèss l’è de per lù, soll! Pòr scior Gino! Aaah (sospiro)! Me dispias come s’el fudess on nòster parent! (e gira guardando)

Ugo - (tra se) Che brava parenta!

Lucia - (continuando il suo lavoro) Che la guarda, che la guarda pur!

Lia - Se dev avegh tanti attenzion, ma tanti, t’el set.

Ugo - Per mi la pò stà tranquilla.

Lia - Parli nò con ti, parli con lee.

Lucia - Se la voeur insegnamm lee...

Lia - Nò, nò, ti l’è on pezz che te seet in chela cà chì, domà ricòrdes che adèss l’è de per lù!

Lucia - El soo ben!

Lia - De per lù, capiì?

Lucia - L’è minga el primm, la sa, signorina!

Lia - Ma lù... l’è on òmm!

Ugo - E allora? El doveva fòrsi morì prima lù dèlla soa miee perchè l’è on òmm?

Lia - Vialter me capissov nò! Mi hoo ditt inscì perchè el scior Gino adèss el gh’ha pù nanca on parent, nissun.

Lucia - E el sò nevod? Gh’è minga el scior Carlètto?

Lia - El Carlètto se ne sta a Milan a spend di gran danee, ecco s’el fa!

Lucia - La gh’ha reson, la gh’ha propri reson ( poi, con intenzione) Menter invece el podariss viv chì, e magari toeu miee, vera? Ma gh’è nient de fà! Lù el preferiss sta a Milan e viv... Le sa lee con chi el viv a Milan?

Lia - Parlomen nò, tocchèmm nò sto tasto! Quel fioeu el sarà la rovina de tutta sta bèlla fattoria! Disell vialter, l’è minga on peccaa vedè rovinà ogni ròbba in sta manera? L’è minga on peccaa?

Ugo - Mi disi de nò, perchè el di che el scior Carlètto l’eriditerà tutt sto ben di Dio....

Lia - I e mangerà foeura in on boff! Le dis semper anca la mia mamma!

Lucia - E poeu la signorina le conoss ben.. Hinn vegnuu grand insèma!

Lia  - Sicura de sì... e mi l’hoo semper dii che l’è on carna de còll!

Lucia - Lee la conoss ben, se sent subit, e la gh’ha tutt i reson del mond. Ecco perchè el scior Gino el dovariss capì che ona padroncina, che la savess tusscòss e la conossess tutti, la sariss indispensabil in quèlla cà chì.

Lia - Se recòrdii che la padrona de cà che l’era la pòra sciora Marcèlla?

Lucia - E chi l’è che pò desmentegass?!....

Ugo- Me par de vedèlla!....

Lia - Lee la teneva i cunt, lee la controllava quell che tutt i mattin i paesan portaven al Verzee, lee la segnava el latt, i oeuv, la verdura, la frutta: ghe scappava nagòtta, tant l’è vera che te la vedevet semper cont el liber master in man a fa su cunt!

Ugo - Oppur con la ciav de la cantina taccada a la zenta de scossaa.

Lia - La padrona l’era lee! E che oggiad! Che sbragiad! Perchè quand se gh’ha tanta terra e te stee minga pussee che  attent, in quatter e quatter vòtt te spariss tusscòss!

Ugo - Vera!

Lucia - Verissim!

Lia - E adèss? Chi l’è che ciapparà el sò pòst? Ona dònna compagna te la trouvet nò inscì per inscì. Ma guardee, guardee anca chì come l’aveva sistema ben tuttcòss. (girando) Intelligente brava, attiva, nissun el podarà desmentegalla! (capitando davanti alla foto) Se la fà quèlla ròbba chì chicchinscì?

Lucia - Le riconoss nò?

Ugo- L’è la soa fotografia! Se capiss, nò? Intelligent, brava, attiva....

Lia - Già, già... però... mi....gh’el tegnaria nò semper tra i pee.

Lucia - E perchè?

Ugo - La cred che la poda faggh del mal?

Lia - Ben la ghe fa minga de sicur!.... Specialment cont i fior, che de nòtt hinn tutt velen, vist ch’el ghe dorma inscì visin. E poeu, perchè voeurov tegnigh la piaga averta? Bisogna consolall, el capissov nò?  E vialter duu fii de tutt per affliggel pussee!

Lucia -E allora, s’hinn inscì velenos, portaroo via i fior (e va)

Lia - Mi portaria via anca la fotografia! (Lucia rientra col vaso)

Ugo - Però, signorina, l’è staa lù ch’el m’ha daa ordin de mèttel li, el me l’ha anca scritt, quand l’è staa via!

Lia - De bon?.... E allora, se ve l’ha scritt de via...

Lucia - Sarà mei lassà stà tutt i ròbb al sò pòst, vera? (eseguendo) Tò, Ugo, ciappa el vas e cambiegh l’acqua!

Ugo- Pòra sciora Marcèlla! Eppur se la merita, perchè l’era inscì intelligente, brava, attiva... come se fa a desmentegass? (via col vaso)

Lucia (andando a prendere il secondo guanciale lasciato sul tavolo) E adèss voo a finì de fà su el lètt! (fa per uscire)

Lia (stupita) El lètt ancamò con duu cossitt?::: E perchè duu cossitt?!

Lucia -Ghe da fastidi anca questi chì?

Lia - Nò, me dann nò fastidi, ma gh’è fòrsi on quaidun o ona quaiduna che la dorma con lù?

Lucia - Nò, nò, gh’è nissun, che la staga  quiètta, el dorma de per lù!

Lia - E allora l’è ridicol!

Lucia - Ma el lètt l’hoo semper faa su inscì!

Lia - Hoo capii: ti t’el feet per ricòrdagh la disgrazia!

Lucia - (sorridendo, con una punta di ironia) E perchè nò, che la scusa? Quell che foo mi, el pò benissim servì a ricòrdagh quell che l’ha dii lee: la necessità... de toeu ancamò miee! Foo mal a fà inscì?

Lia (sorridendo) Ma mi... disi nò che ti te fee mal... Ma te penset ch’el gh’abbia debon l’intenzion de...

Lucia (furbamente) Che la senta: mi gh’hoo on quai ann pussee de lee, par nò ma ghe l’hoo; donca mi disi quest: la voeur che el vedov el troeuva ancamò miee? La dev mèttigh visin... on cossin voeui!

Lia - (c.s.) E s’el fa on cossin voeui!

Lucia (c.s.) S’el fa? Quand el vedov el se disseda, s’el tasta visin a lù e el sent che gh’è nissun, el comincia subit a ravanà! L’è assee ch’el vedov el ravana! E se poeu ona mattina, se troeuva el sò cossin sbattuu in mezz a la stanza, temp pocchi mes, e el vedov el ghe borla denter ancamò!

Lia (ridendo) Ah, ah, ah! Che balossona, che balossona!

Lucia (col cuscino in mano) allora, el mètti o el tiri via? Quell che la diss lee mi foo!

Lia (c.s.) Ma nò, lassel pur là!

   Lucia - El sarà mei, vera? Perchè lù el dev tastà, ravanà, e sentì che gh’è el voeui d’impienì. L’è inutil, ma in chela cà chì ghe voeur on’altra padròna! E la ghe voeur anca per on alter motiv. L’ha guardaa ben lee?

Lia - Chi?

Lucia - El scior Carlètto.... cioè el scior GIno?

Lia - Son nassuda e cressuda nèlla fattoria chi de part!

Lucia - El ghe par vecc?

Lia - E chi l’ha mai ditt inscì?

Lucia - Tutt’alter, vera? Ecco, l’è propri inscì ch’el dev vess el vero marii d’ona signorina! Siccome la dònna la diventa veggia pussee a la svelta, l’è mei ona certa differenza d’età perchè, col passà di ann, la miee la poda semper difendess da ... la me capiss, vera?

Lia - Come teoria l’è tutt’alter che sbagliada, la toa!

Lucia - L’è la teoria pussè giusta. In de quel caso chì, poeu, còssa la pò pretend pussee ona tosa? Chicchinscì gh’è danee, salùt, e tira l’aria elegantòtta del sciorètt de campagna! Còssa la pò trovà de mei ona tosa che la gh’abbia l’intenzion de curà la soa cà e de diventà ona sciora ma de quei!!!.......

Lia - (dòpo averla fissata) Propri quell che disi mi!

Lucia - Perchè mi el savevi nò? Moglie e buoi dei paesi tuoi; ghe saria de stà allegher se el se mèttess in del coo de menann a cà voeuna de Milan!

Lia - Voeuna de Milan? Còssa ne sann, quei là, de come se fa fonzionà ona fattoria? Ah, el faria propri on bell’affari!

Lucia -  E mi s’hoo dii còss’è? Distinguen nanca el coo d’on porscell dal cuu d’ona vacca!!! L’è quest che ghe voeur mèttigh in del coo!

Lia - Propri! Giust!

Lucia - Cercaroo de convincel mi, che la staga tranquilla. Domà... bisogna augurass ona ròbba solla.

Lia - Che ròbba?

Lucia - Che el venerdì me le travia nò!

Lia - Traviaa come?

Lucia - Lee la pò minga savell... ma l’era propri quest che faseva tribolà anca la pòra sciora Marcèlla; come lee la savarà, el venerdì a Milano gh’è el Verzee....

Lia - Ma quell el gh’è tutt i dì!

Lucia - Si, ma l’è al venerdì che se riuniss in ona sala dell’Ortomercato tutt i pussee gross fattor de la provincia....

Lia - Per trattà i sò affari e fà on salt a la Confagricoltura.

Lucia - E per el rest!.... I miee resten al paes e i marii vann a disnà sui Navili... Tropp bon boccon a Milan, anche se al venerdì l’è de magher: troppe ghiottonerie! Gh’è chi fa el pien per tutta sèttimana e, quand el torna al paesello, el riscia el nas per tutt quell che mètt davanti la miee!

Lia - (che ha finalmente capito, ridendo) Ah, ah, va là, stupidotta!

Lucia - (ridendo anche lei) Ah, ah la gh’ha reson; mi disi inscì per rid on poo (uscendo verso la camera fra sè) Ma ti te diset in sul seri, cara mia!... Scappaa el nevod, che propri el te varda nanca in faccia, ecco che adèss te capita l’occasione del zio!... Ciappel!... Minga malvagia, la toa idea!!! (e continua a portare roba in camera)

Lia - (guardando fuori) Tèlla chì la mia mamma!

Lucia - (tra sè) Sta a vedè che puttòst d’ona padròna, gh’è el ris’c che me ne capita sul groppon addirittura dò!!!!

SCENA III°

Pina e dètte

Pina - (dalla comune) E allora?... L’è pronta la stanza? Tutt a pòst?

Lia - Tutt, mamma; manca nagòtta. Hoo pensaa mi a tusscòss!

Lucia - (tra sè) Sèntela là! La gh’ha pensaa lee, st’òca padovana!

Pina - Vardèmm, vardèmm, perchè che gh’ha la mia pratica in fatto de camer del lètt ghe n’è ben pòcchi!

Lucia - (tra sè) Per forza, l’ha faa passà tutt i stanz da Ciaravall a San Giovann sul Mur! (forte) Che la guarda, che la guarda pur!

Pina - (sulla porta dèlla camera) Eccola! Manca i sciavatt! Te voeurètt ch’el ciappa su on quai còss?

Lucia - Spètti che ie tira foeura de la valisa.

Pina - E allora pòrteghela subit! Ma t’el see nò che l’è tornaa dal sò viagg stracch ‘me on bilòt e che appena el leverà sù de tavola l’andaraa al cobbi drizz ‘me on fus?

Lucia - Se l’è insci!... Se ved che lee le sa mei de mi, però...

Pina - Ma che però e però. Fa quel che te disi e cicciara minga tanto!

Lucia (uscendo a sinistra fra se) Hinn giamò diventà i padrònn!!! Si... ma se mi devi borlà de la padèlla in la brasca, meni i boccol pussee che in pressa! (via)

Lia - Brava mamma! Se gh’è minga on quaivun che la mètt in riga,  quel pòr scior Gino el finissaraa per rovinass!!

Pina - Ma, cara la mia tosa, s’el vuttom minga numm, che l’è che pò fall? In quèlla cà chì poeu... E, cara mia, se chicchinscì ven minga denter ona dònna pussee che in pressa, sèmm a moeui; ma, oeui, ona dònna cont el coo in sui spall, se de nò...

Lia - Vuttemel, mamma, salvemel numm! Perchè, credom mamma, anca mi, soo nò se faria per renderlo felice!

Pina- Eggià, perchè mi el vedi nò, èh? Mi sont ona rembambida che capissi nò che ti... Son minga orba mi!

Lia - E allora, pensigh ti, mamma !

Pina - Citto! L’è lù! (si appartano)

SCENA IV°

Tògn - Gino e dètte

Tògn  - (entra per primo dalla cucina e si volge a chiamare l’amico rimasto indietro) Su, dai, ven denter. Se te steet a pensà còssa? Prima o dòpo te devet pur entrà in cà toa. El primm pass te l’hee faa, t’hee mangiaa in cusina, adèss ven de chi!

Gino - (appare mesto ma col tovagliolo al còllo. Si pulisce la bocca sospira e) Arrivi, rivi. (si ferma, si guarda intorno e risospira. Fatto qualche passo, mètte la mano in tasca, prende il fazzolètto e se lo passa sugli occhi per asciugare una lacrima che non arriva. allora supplisce al pianto soffiandosi il naso e  sospirando di nuovo) Arrivi... Ecco, guarda, sont entraa!

Tògn - L’è minga el caso de mètt giò tutt sto spuèll e ti...

Gino - E chi l’è che le mètt giò? Ma quand vun el torna a cà e el troeuva domà la poltrona, el cantaran e la servitù, bèh, te capissarètt anca ti...

Pina - (avanzando) El gh’ha reson el scior Gino, poerin!

Tògn - Ah, ma sii ancamò chì, vialter dò?

Lia - Prima de andà via me sont permissa de vegnì denter e de daggh on’oggiada a la soa stanza, per vedè se gh’è tutti in ordin. Lù el me perdona, vera?

Pina- Alterchè! Al scior Gino ghe par minga vera che ghe sia on quaivun che ghe da on’oggiada dent per dent.

Gino - (piuttosto seccato) Grazie, tante grazie (e va a guardare in camera)

Pina - Coss’el voeur, bisogna portà pazienza!.... Anca mi, quand m’è mort el mè pòr marii...

Tògn -  Gh’è staa chi gh’ha daa anca a lee ona bèlla oggiada?

Pina - Nò... e poeu mi ghe n’avevi minga bisògn; la Lia l’era giamò grandètta, e poeu el m’ha lassaa chi polito! E si, da quel lato chì el mè Gaitan el m’ha lassaa i spall quattaa!

Tògn - Se l’è per quell i spall gh’i ha quattaa anca el Gino!

Pina - Si, ma chi sorveglierà adèss che l’è restaa de per lù? Gh’è chi la mia Lia che l’è tutta tribolada: “Come el farà? S’el farà el scior Gino?” la seguita a domandamm!

Lia - E si, perchè mi l’hoo semper vist inscì alegher.... Ch’el me creda, chissà se faria mi, pur de vedell ritornà l’òmm che l’era ona vòlta!

Tògn - Oh, se capiss benone quell che la faria lee!

Gino - Grazie, grazie, mi ve ringrazi con tutt el coeur.... eeèh (si apparta sospirando sulla porta dèlla camera)

Tògn - (a parte, alle donne) Fasimell minga piang, per piasè! Vist che dòpo el viaggètt ch’èmm faa a Parigi el piang pù, perchè vorii dagh sta soddisfazion? Lù el gòd a fà vedè ch’el piang semper!

Lia - A Parigi??

Tògn - Eccome!  Se la savess còss’èmm faa a Parigi... de chi ròbb... de chì ròbb che mi, in cinquant’ann, avevi mai faa!!

Pina - Ma ti te ghe deet a trà al scior Tògn? Lù el fa per di, però quand el dis che devon fagh desmentegà quell ch’e success el gh’ha reson; e allora andèmm, su andèmm a cà; tornarèmm chì diman per sentì s’el gh’ha bisògn d’on quai còss. Su, andèmm.

Tògn - Fii benone, inscì voo a cà anca mi!

 Pina - Bona nòtt, scior Gino!

Gino - (fermo davanti alla foto, senza voltarsi)... Nòtte....

Lia - Ch’el riposa quiètt e tranquill.

Gino - (invece di rispondere bacia la foto dèlla moglie)

Pina - Ven, ven a vedè!... Bah, la passeraa.

Lia - Mi ghe l’avevi dii de tiralla via!

Pina - Spètta, Santo Signor! Da temp al temp! (via dalla comune)

Gino - (continua a guardare la foto, tentennando la testa) Bah!! Destin bastard! E disi nient d’alter!

Tògn- Ma t’hee finii de fà el piangina? A mi me par impossibil, t’el seet? Ma com’è? Dòpo duu mes de viagg t’hee nancamò de riessì a mèttes el coeur in pas? Quand la m’è capitada a mi, son minga staa lì a cinquantalla tropp; me son tegnuu el mè dolor e amen, hoo minga faa come ti che par che te siet preoccupaa domà de fagh savè a tucc che t’hee nancamò finii de caregnà!

Gino - Calmess, famm on piasè, dass ona calmada!

Tògn - Calmes on corno! L’hoo spenduu ben, mi, el mè temp a buttà via on monton de danee per compagnatt a Parigi e su la Costa Azzurra!.... Eppur on quai di fà, al Moulin Rouge, te sgambèttavètt a brascètt a voeuna di quei sguangètt come on studentell!

Gino (urlando) Te voeurètt quietass o nò?

Tògn - L’è la verità!

Gino - Ma chi sèmm in on alter pòst e chicchinscì devonn nèmmen recòrdass de quell ch’èmm faa a Parigi!

Tògn - Oeuj, te see staa ti a invidamm. “Bisogna che mi vaga via, lontan” te m’hee dii: “ Accompagnòmm, per piasè” E mi hoo faa nient’alter che contentatt. Ma dimm on poo: L’è colpa mia se t’hoo  vist ballà el Tango e el Can -can.

Gino - (afferrando la foto) Perdonom Marcèlla, perdonom, ma l’è minga colpa mia!

Tògn - (parlando anche lui al ritratto) E nanca mia, nèh, sciora Marcèlla! Ma se l’avess vist anca lee...!!!

Gino - Te voeurètt moccalla o nò? (Caccia la foto in un cassètto) Ecco faa!

Tògn - (chinandosi a parlare a quell cassètto) Che la me scolta, sciora Marccèlla: tutt i ser el casciava giò ona brenta de zabaion e dòpo...

Lucia (d.d.) Permess?

Gino - Avanti.

SCENA V°

Lucia e dètti

Lucia (entra con un vaso di fiori, attraversa e va per mètterli davanti al ritratto. Non trovandolo domanda) E la fotografia? El gh’ha cambiaa pòst? (Gino tace) E allora el me disa lù doe podi mèttei!

Gino  - (con rabbia) S’giacchi on poo doe te voeurètt! Anzi, portei via!

Lucia - Se l’è inscì... Ma second a mì el podeva spèttà on poo ammò per fà sparì la fotografia de la soa miee! (via col vaso)

Gino - (quasi piangendo) Te la sentet? Per colpa toa passi per on òmm ch’el se consola subit!

Tògn - Ma famm el piasè!... Ma se la Lucia l’è la prima a credigh nò!!

Gino - La ghe cred nò?!? Ma mi la casci via, se la ghe cred nò!

Tògn - Ma se ti te la mandètt via, te devètt prima dagh i 15 di.

Gino - Vòtt!

Tògn- Quindes!

Gino - Vòtt!

Tògn - Come te voueret ti! Ma credòmm a mi, Gino: in del tò dolor gh’è pussee de rid che de piang!

Gino - T’averètt riduu ti, quand gh’è mort la toa, de miee!

Tògn - Mi hoo faa la persona seria. Bisogna andà a cercall col lanternin, l’eterno dolore per la mort de la miee!! Ma se gh’è de quei che par che rinassen, quand  ghe capita!

Gino - Ma hinn minga tutti inscì!

Tògn - Tutti sariss on poo tropp!

GIno - E allora perchè te m’el disètt a mi?

Tògn - Perchè te conossi!

Gino - Te voraret minga dì che ghe vorevi minga ben?

Tògn - Tropp te gh’en vorevètt... Ma l’è minga per el vorè o minga vorè ben: mi disi domà che anca quand la gh’era lee ti te seret bon de rangiass; figuress adèss che la gh’è pù!!!!

Gino - Ma dimm el perchè mi dovaressi fing? Per che motiv, sentimm?

Tògn - Perchè ti te scambiètt per dolor el voeui che gh’è adèss in ‘sta cà chì. Te l’hoo giamò dit: al Moulin Rouge, in mez a tutt quel bordell che gh’era, ti te rincorrevet i sgarzolin come on sbarbatell. Chicchinscì, invece, siccome adèss gh’è on quai silenzi, te par de podè pù viv. Varda che l’hoo provaa anca mi! Ma mi me son rassegnaa! A ‘sto mond tutt se rimedia, tutt se giusta, foeura che l’oss del còll, credom a mi!

Gino - Per mi, in quel caso chì, se rimedia pù nagòtta!! (Quasi piangendo) nò, nò e poeu nò! Ti te sarètt anca riessii a mèttes l’anima in pas, ma sèmm minga tucc istess: per mi gh’era domà lee, anca se... bèh, o Dio,... Si, a Parigi hoo cercaa de fà quell che te diset ti ma....

Tògn- Nò, nò, ti te l’hee propri faa! Cerchèmm de minga cascià ball!

Gino - Ma m’è bastaa rientrà in cà mia e vedè la mia stanza per sentì el rimors...

Tògn- Di peccaa!!!

Gino - Ma doman... doman... (e si gira ripetendo) el soo mi quell che gh’hoo de fà! El soo mi!... Tant, ormai se ghe stoo a fà a quel mond chì?

Tògn - (dòpo averlo guardato, fra se) Ma l’è adree a fà sul seri? Hinn duu mes ch’el tampini e hoo nancamò de capì s’el gh’ha denter in quèlla vacca de quèlla crapa lì!!

Gino - (passeggiando) El soo mi!!!

Tògn - Ma fa nò el pistola... se de nò resti chì, me troo foeura e vegni in lètt insèma a ti!

Gino - Te voeuret andà foeura di pee o nò?

Tògn - Mi voo.. ma... disi.... Podi stà tranquill?.... E poeu ten a ment on’altra ròbba: mi adèss avvisi anca l’Ugo perchè doman mattina èmm decis de andà al casott su l’Adda; gh’è el passagg di tord e a ti te piasen.... dì minga de nò prchè t’hoo vist anca pòcch faa a tavola: te n’hee sgandolaa 3 èh? allora d’accòrd? Ai 5,30 son chì!

Gino - Si, si, va ben, però adèss va, voeuri stà on poo de per mi! Te voeuret andà o nò?

Tògn - Voo, voo, buonanòtte! (sulla porta fra se) Me la cunta minga giusta! Di vòlt par che... e di vòlt... mah! chissà s’el ravana còssa in quèlla zucca lì! (via)

Gino - (fermo davanti al cassètto, tira fuori la foto e la rimètte a posto) T’hee sentii, èh? Creden che mi foo apposta, che sia tutta ona finzion... Ma vedarann! Vedarann se foo per rid... (si toglie la giacca e dal taschino spunta un bigliètto da visita che legge) “Madam Cocotte, rue de Chateau Blanch 16. Paris” (Spaventato, come se la foto lo avesso udito strappa il bigliètto in tanti pezzètti dicendo rivolto al ritratto) Nò, mi nò èh! L’è staa lù, el Tògn che l’ha vorsuu conoss sta.. sonnambula! Tant l’è vera che...

SCENA VI°

Lucia e dètto

Lucia - (affacciandosi) Permesso?

Gino - Se te voueret còssa?

Lucia - (entrando) Gh’hoo de disfagh la valisa.

Gino - Lassa stà, t’el faret doman.

Lucia - E se doman mattina el voeur desfà la barba? El gh’ha tusscòss denter lì, anca i sciavatt!

Gino - E allora desfesciess, su. Voeuri restà de per mi! Ma la capissov nò che gh’hoo bisògn de vedè pù nissun?

Lucia - In duu minut hoo bell’e finii! (apre la valigia e comincia l’andirivieni dalla camera portando roba)

Gino - (passeggiando e fremendo) Hinn duu mes che cerchi on moment de pas: duu mes!! (sbatte una sedia e vi si siede)

Lucia - (c.s. poi fra se) Ah, ma mi meni i boccol: gh’hoo de sta chì cont on òmm ch’el par piaa de l’ochin? Son minga scema! Quel ciccin de salùt che gh’hoo voeuri consèrvamela!

Gino - (nel vederla sempre passare comincia a guardarla con una certa attenzione. Ma è come un lampo: chiude gli occhi e si gira da un’altra parte.)

Lucia - (c.s. fra se) E sì, car el mè òmm! E’ minga riessida Parigi a fatt passà la pecundria, figuress se ghe la foo mi...

Gino - (cerca di non guardarla ma si sente a disagio. Si alza e tossisce) Eèmm...eèmm.

Lucia (c.s.) Ghe mancava giust la toss!

Gino - (più forte) Eèmm... Eèmm

Lucia - (fermandosi a guardarlo) L’ha vist? Lù l’e tornaa da Parigi cont ona bèlla costipazion!

Gino - Pò dass!

Lucia - El voeur che ghe prepari on quaicòss?

Gino - Voeuri nagòtta!

Lucia - E allora ch’el cascia giò dò pastigli de la sciora Marcèlla. (va a prenderle) Hinn quei ch’è avanzaa. La diseva che ghe faseven tant ben (gli da la scatola)

Gino (prende, la guarda e leggendo sul coperchio cerca di còmmuoversi) o,5 di fosfato, o,3 di glùcosio, o,2 di amminoacidi... (e si asciuga una lacrima che non scende)

Lucia  (guardandolo tra se) O Signor, anca a legg l’etichètta el se còmmoeuv.

Gino - (l’apre, ne mètte in bocca una, la richiude e bacia il coperchio)

Lucia - Mi i bevarissi nò, perchè l’è vera che fann ben, ma a la sciora l’è nò che gh’hann faa pussee de tanto, tant l’è vera che (e fa il segno dèlla benedizione)....!

Gino - El voeur dì nient. I ha tolt lee, podi toeui anca mi. (e la succhia rimèttendosi a sedere)

Lucia - Per morì?

Gino - (si scuote, mètte la scatola in tasca e mormora) Perchè nò?

Lucia - Ah bèh! allora.... (vede la foto) Toh! L’è ritornada?

Gino - (con la pastiglia in bocca) Chi?

Lucia - La soa miee!

Gino (balzando in pedi e barcòllando spaventato) Tornada?

Lucia - Tèlla lì!

Gino - (rimèttendosi) Quanto te see scema!!

Lucia - Macchè scema! La foto la gh’era pù e tutt’a on tratt la rivedi al sò pòst: lù se l’avaress di? L’è tornada!

Gino - Ma parla ciar, nò! Te capissarètt... a sentiss dì inscì....

Lucia - Ch’el disa la verita: el gh’ha avuu paura che la fudess tornada in sul seri, èh?

Gino - Eccola chì! Anca per ti mi reciti, vera?

Lucia - Se disen inscì, ch’el me creda a mi, gh’hann minga tutt i tort!

Gino - (come se volesse aggredirla, quasi piangendo) Tas!!

Lucia - Mi disi domà ona ròbba solla; per mi lù l’è pesg d’ona pegora: el béra tropp!

Gino - E mi s’hoo dii còssa? Per vialter mi reciti!

Lucia- Se lù el recita mi el soo nò, ma ch’el me creda: a stagh visin a lù vun el se divertiss come al cimiteri. Mi son voeuna che parla foeura di dent!

Gino - Va via, famm el piasè!... Va via subit!

Lucia - Inscì? Su i duu pee?

Gino - Va in lètt, va! (e si siede per spogliarsi)

Lucia - Ah! Credevi... Se l’è per andà in lètt ghe voo de corsa: sont stracca morta (fa per uscire, poi) Gh’hoo de vuttall a tirà foeura scarp e calzètt?

Gino (sforzandosi) Lassa stà, me rangi de per mi!

Lucia - (andandogli vicino) El pò nò: el gh’ha troppa panscia; le diseva anca la sciora Marcèlla (e si piega per aiutarlo)

Gino- Mi sont dimagri! El vedi... m’el senti mi! (e intanto la guarda)

Lucia - A mi me par de nò!

Gino - Doman mattina te foo vedè mi; me pesi e te vedarètt: avaroo perduu on des chili!

Lucia - Per la mort d’ona miee, hinn minga tropp!

Gino - Ti spètta e te vedarètt...

Lucia - Se però el sbaffa su come stasera, sarà difficil! L’ha spassèttaa su tusscòss!

Gino - Ma stii lì a guardà tusscòss? Gh’avii nient alter de fà che guardà quel che mangi mi?

Lucia - Quand vun el bera si! E adèss ch’el vaga in lètt.

Gino - Nò, mi in lètt ghe voo nò!

Lucia - S’el voeur dì?

Gino - Voeur dì che mi, de dormi in del mè lètt de spos, me la senti nò; riessarissi nanca a sarà on oeucc. Dormiroo chì sul divano.

Lucia - Ma fà frecc!

Gino - Và ancamò i calorifer e mi sto benone anche chì! Eamm (tossisce)

Lucia - E questa l’è Parigi! Sissignore, quèlla toss chì l’è el frutto de Parigi!

Gino (che si è tolto la camicia) Mei inscì. Voless el Signor che ciapessi ona broncopolmonite!

Lucia - S’el gira per la cà consciaa inscì l’è facil! El voeur che ghe dervi la finestra per crepà pussè a la svelta?

Gino - Te voeurètt andà foeura di pee o nò?.... Eèmm (tossisce) eèmm...

Lucia - Buonanòtt!... E ch’el vaga in lètt, se de nò, che la toss chì, la va via pù! (lo ascolta tossire e )  Tossiss pussee ben el sò can de caccia! (via)

Gino - (rimasto solo) Oeui, ma come la se permètt de ciappass tutta sta confidenza? Ma chi la cred de vess diventada? (indossa il pigiama) Ma mi la spedissi via se la pensa che, morta la mia pòra miee, mi ghe permètti de controllà se mi mangi pòcch o tant! Quand la gh’era lee, gh’era minga de pericol! Mangiavi  in cà e foeura mangiavi ancamò on’altra vòlta, fasevi quell che vorevi mi! Mai on rimprover de lee, mai! La lassavi in de per lee e mi ..... e mi... Ma in doe la troeuvi on’altra dònna inscì? Doe?

SCENA VII°

Ugo e dètto, poi Lucia

Ugo - (d.d. piano) Scior padron... Scior padron!

Gino - Ancamò?... Chi l’è?

Ugo - (c.s.) Son mi, l’Ugo!

Gino - Còssa te voeuret ?

Ugo -(entrando) Allora, per doman mattina sèmm d’accòrd? Mi porti i riciam al casott de caccia?

Gino - Chi l’è che te l’ha dii?

Ugo - El scior Tògn! Ma lù el ven nò? Gh’è la passada di tord, le sa? L’è giamò cominciada! Stamattina on gruppet de Villanoeuva n’ha ciappà 78: el diseven a Messa Cantada!

Gino  - Ecco, faroo dì ona bèlla Messa anca mi!

Ugo - Per i tord?

Gino - Nò, per i merli me ti!!!

Ugo - Ma allora el ven o nò?... (pausa) allora?

Gino - El soo nò!... Andegh vialter... Ma, porca la malora, vorii lassamm in pas si o nò?

Ugo - Hoo capii: ai quattr’or precis vegni chì a dessedall (via)

Gino - Ma va a ciappà di ratt!... Come se mi podessi andà a caccia!!... Ormai l’è finida... per mi l’è finida. (accende una lampada da salotto e va a spegnere la luce centrale. Resta in penombra. Sedendosi sul divano) La mia vita la s’è s’ceppada, distrutta, a tocchèi. (si alza, va a prendere il ritratto, lo bacia e) Addio, Ti te dormet el sonn del giust... mi dormaroo pù! (va alla porta dèlla camera e guarda il lètto) De per mi!!! Soll!!! L’è vera che l’è minga la prima vòlta, perchè el venerdi, spess e volentara restavi a Milano e allora....

Lucia - (d.d.) Permess?

Gino - (sedendosi sul divano e coprendosi) Se gh’è ancamò?

Lucia (entra in mini camicia da nòtte, sbracciata e portando un piomone) Ch’el me scusa, ma mi voeuri minga aveghel su la coscienza! Mi el foo per el sò ben, e perchè, finchè ghe son chì mi, poden minga dì che l’hoo trascuraa! Pissi el ciar perchè ghe se ved on tubu. (e prima di avanzare, esegue)

Gino - (con la testa appoggiata al bracciolo del divano, segue i suoi movimenti) Se te seet adree a fà cos’è?

Lucia - Siccome stasera tira ona bèlla mariètta e lù el gh’ha ona bèlla toss, hoo tira sù stoo piumon dal guardaròbba! Lù el dev suda!... Ona bèlla sudada e lù doman el sarà come noeuv (va a mètterglielo addosso, mèttendo in mostra le grazie)

Gino - (balbèttando) Mi...mi... mi... te ringrazzi (tossisce)

Lucia - Ch’el pensa a fà andà via quèlla tossascia chi, el me ringrazierà dòpo! E ch’el se agita minga tanto: ch’el cerca de restà bell quattaa! Ch’el spètta on moment ch’el sistemi per ben. (esegue)

Gino (c.s.) Gra...grazie Lucia... Grazie! (e continua a guardarla con occhio voglioso)

Lucia - L’ha mandaa giò i pastigli?

Gino - I hoo lassaa là sul tavol!

Lucia - Che ie toeuva, Signor! E che ie tegna chì, visin al coo! (esegue)

Gino ( con un filo di voce, còmmosso) Grazie, Lucia, Grazie!!!

Lucia - El bera ancamò?

Gino - Nò, mi beri nò, ma te capissarètt,... vedètt chì.... con su... anzi senza su... cioè con questa toelètta... mi... ti... te me capissètt.... i mè ricòrdi.... i mè pensier....(sospira)

Lucia - Ch’el me guarda nò, ch’el se gira de la e ch’el sara su i oeucc e bona nòtt! (Sta per uscire, ma in quel momento si sente il suono d’un piano (o disco) con la romanza “Amami Alfredo” Lei, ripetendo il canto, sottovoce) Amami, Alfredo, La sent? Questa l’è la signorina Lia, nèlla villa chi visin. Se ved che la dorma minga nanca lee. Chissà come la seguiterà a rigirass de chi e de là! “Amami Alfredo” Anca al cald, rembambida!

Gino - La senti, la senti

Lucia - Ma la voeur dì “Amami Gino”! E la fa perchè lù el senta sta sonada, el se persuada e la sposa a oeucc saraa! (ridendo) Ah Ah. Su, a cuccia adèss! (via)

Gino - A cuccia?... Ma mi son minga on cagnoeu! (balzando seduto) Lucia, sent! (afferrato il cuscino fa il gesto di strozzarlo guidando) Ma perchè? perchè?... (gli da un morso e lo scaraventa lontano . Poi si gètta giù e nasconde la testa sotto le coltri) (Veloce il sipario)

FINE PRIMO ATTO

ATTO SECONDO

SCENA I°

(In scena un cavallètto con un quadro figurante la foto)

Lia e Pina

Lia - (presso la porta del giardino guardando con sua madre fuori verso destra) Tèlla là, la sciora padrona, te la vedet nò? L’è adree a parlà cont el trattorista.

Pina - La vedi, la vedi.

Lia - Guarda, ma guarda come la se scalda! Par che l’è adree a daggh ona girada!... Gh’hoo reson quand disi che da on poo de temp la fa da padrona. Guarda se me sbagli!

Pina - Còrr subit a sentì quell che la ghe dis. Fa el gir largh, fass nò capì, mi te spètti chì.

Lia - Pò dass che mi me sbagli, ma, per mi, quèlla li l’è adree a mètt tutti in riga: Allineati e coperti. (con dispètto) Me ven voeuja de ciappà su el mè regal e de fass vedè pù (va a riprendersi il pacchètto che c’è sulla tavola)

Pina - (fermandola) Ma doe te gh’heet el coo? Ma te par possibil che el scior Gino el voeur riperdess via cont ona sèrva?

Lia - Se se riperd via sò nevod cont’ona modèlla de Milan, el pò fall benissin anca lù cont ona sèrva!... Tant e tant, hinn tutt paesanasc, tutta gente dai gusti volgari, hinn!

Pina - Te capissi benissin, ma te voraret minga fà scappà anca quell’occasion chì!?!?

Lia - Vard a che mi foo el vanzausc a nissun!

Pina - Ma che vanzausc e vanzausc! E sconfondom nò i scinivèi se de nò piènti chì baracca e burattitt e m’interessi pù de nagòtta! Donca, lassa giò el pacchètt e va a scoltà! Ghe voeur on attim a infangà la gent. Prima de giudicà ghe voeur vess sicur!

Lia - (col broncio) El dovariss vess lù a capì che se mi accètti de sposall saroo mi a fà on gran sacrifizzi e invece...

Pina - Fatt sentì, se te voeuret minga....

Lia - (continuando) invece... gh’hoo anca de raccomandass! Ah. cara la mia mammètta, sviolinà va ben per on poo, dòpo basta, perchè anca mi gh’hoo la mia dignità!

Pina - (sbuffando) Uffa!!! Disgraziaa quei che gh’ha di tosann! Ti te cerchet de sistemai? Borbotten! Ti te s’interesètt nò? Tutt i dì t’hee de ciamà el dottor perche svenissen! Ma scoltòmm mi, almen ona vòlta: te voeuret savenn pussee de mi?... Quand on òmm l’è rivaa a ona certa età l’è impossibil trovall come te diset ti: el se scalda pù come ona vòlta, el gh’ha pù i scalmann, ma el ciappa i ròbb con calma e ie compesa; el ghe pensa onca dò vòlt, sopratutt s’el troeuva ona tosa per ben  e on tòcch pussee giovina de lù e s’el sa nò come l’andarà a fini! Fòrsi el sarà nancamò convint che ti te ghe voeuret propri ben! Ecco perchè el se comporta inscì!

Lia - Ma se ghe l’hoo cantaa anca in musica!!!...

Pina - Ma quest, come t’hee dii ti, l’è on crapon! El gh’ha paura anca de la soa ombria e el pensa che se “Fidess” l’era ona brava persona, “Fidess minga” l’era on galantòmm doppi!

Lia - E allora, se mi ghe riessi nò, faghela capì ti!

Pina - Ma te vedet nò quell che sont dree a fà? Se podi fà de pù? Ogni moment son chì a domandagh “El gh’ha bisògn de nient?” “El voeur on quaicòss?” “Gh’hoo de mandagh chi la mia tosa per vutall?” Me se ti te seguitet a vegnì chi a rompom la scuffia, l’è inutil che mi stoo chi a tribolà!

Lia - Mamma, quèlla là la me volterà el fioeu in la cuna! (quasi piangendo) Credomm, credom a mi! Ven  a vedè. (e tornano alla comune) Varda, ma varda: siccome lù el gh’è nò, guarda se la par minga lee la padrona!... Sentela, sentela come la ordina e come la ghe comanda a quei paisan la! Cont el liber master in man la sguazza come se la fudess la resgiora!

Pina - Perchè gh’è minga el scior Gino!

Lia - E come la pastrugna! Come la sgagna la punta del lapis, la paisanòtta!

Pina - (spingendola) Va a vedè, te disi! L’è in del tò interess stagh attenta a quell che la fà!

Lia - Quèlla là, t’el disi mi, la ingarbuia i numer per podè fà a metà col fattor, che, t’el see ben...

Pina - Parlomen nò! Va, va, che ghe dervarèmm i oeucc anca su quest, lassa fà de mi. La sèttimana passada quel lifròcch el gh’ha regalà on merlo indian!

Lia - Ch’el dis semper “Amor mio! Amor mio!”

Pina - Ma va!

Lia - L’è ona gran slandra! (e via)

Pina - Ma che torment! E che rompaball! La voeur tusscòss e subit! Ma spètta on moment! Pò dass che el scior Gino el se decida dòpo che sarà passaa el temp del lùtto! Ma pastoremell puttòst! Pastoremel e spèttèmm! Tant l’è inutil: pass dòpo pass el ghe borla denter! Per fòrza, quand me mètti de mezz mi, el dev borlagh denter per forza! Cert, bisogna stagh attent ch’el ciappa minga ona brutta strada, d’accòrd! Ma demegh temp al temp! Me recòrdi che per fà abboccà el mè Gaitan, che l’era on balosset de quei scròcch, gh’hoo miss pussee de duu ann. Ma l’hoo mai mollaa on attim, mai! E l’ha abboccaa èh? Orca, se l’ha abboccaa!!! Ona sera, in de l’ort gh’hoo dii: “Adèss che te see chì, te me scappet pù!” E, fra el ciar e el scur, me ghe sont taccada al còll e l’ha comincia a .... insòmma l’ha pù poduu dì de nò! ( si siede).

SCENA II°

Tògn, Ugo e dètta

Tògn - (entra dal giardino dalla parte opposta dalla quale è uscita Lia, avanza con calma e legge una lèttera cha ha in mano) Ma va che disgraziaa!! Però se el sò zio le vutta nò... (vede Ugo)

Ugo - (entrando dalla comune e andandogli incontro) El scior Gino l’ha dii de spèttall on moment; el finiss de trattà on affari e el ven subit. S’el voeur vedell, l’è de la in del studi cont el nodar. (piano) Me par che ghe sia de mezz l’eredità de la sciora.

Tògn - Perchè? L’accètta?

Ugo - Ma che ragionament!

Tògn - Nò, te seet, siccome l’aveva giuraa che l’aveva minga sposada per interess...

Ugo - (ridendo) Siii!!! Salùdi, scior Tògn! (via dalla comune)

Tògn - Ciao, Ugo! (avanzando, tra se) allora, se l’accètta l’eredità de la miee, el pò anca pensagh on ciccin a sò nevod! (ripone la lèttera)

Pina - (che si era seduta di spalle, sistemando il pacchètto, girandosi) Toeu, va chi l’è che gh’è chì!

Tògn - Oh, sciora Pina, anca lee chì?!?

Pina - Eggià, son chi anca mi, el sa, per sentì s’el ghe occorr on quaicòss! Ma gh’è chi anca la mia tosa, le sa?

Tògn - (canzonatorio) Ma debon!?!

Pina - Sicura de sì, e l’è tutta tribolada perchè doman l’è la soa festa!

Tògn- Ah! Doman l’è la festa de la soa tosa?

Pina - Ma nò! Se l’ha capii còssa? La soa, del scior Gino! Ma come? Le sa nò? L’è nassuu... Ch’el spètta on moment... l’è nassuuu... Ma si, gh’è nanca bisògn de dill perchè ie porta inscì ben, vera? Sembraria nanca!

Tògn - Ah, se l’è per quell, el me amis Gino l’è on omètt ancamò in gamba!

Pina - Gh’hoo minga reson?

Tògn - Ma vialter el savii mei de mi!! Chi l’è che se ricòrdava che doman l’è la soa festa?... Ona vòlta se vegniva a savell ona sèttimana prima perchè gh’era chi faseva i invit, preparava... ma adèss..

Pina - (sospirando) Èheeèh! purtròpp l’è inscì! Adèss quel poer Crist el gh’ha pù nissun! Ma come el fara?... Come el farà a tirà innanz?

Tògn- E chi le sa?

Pina - Ma perchè gh’è nissun che cerca... che cerca... de consiglial?

Tògn - A fà cos’è?

Pina - O Signor! El capissarà che l’è minga bell restà soll per tutta la vita! L’è anca immoral. Ma el ved nò cosa l’è che succed? Lù stess l’ha dii che nissun se ricòrdava che doman l’è el sò compleann!! Se ghe serom minga numm... O mei, se gh’era minga la mia Lia... Perchè si, l’è stada lee a ricòrdassell! Ah, se l’è per quell, l’è ona tosa che quand la ciappa a coeur ona persona, la se desmentega pù de nagòtta: compleann, onomastich, anniversari...

Tògn - (tra se) Sopratutt i sò...

Pina - (mostrandogli la scatola, con un sorriso) Ch’el guarda se l’è minga vera!

Tògn - (con ironica sorpresa) T’hee vist? Ma va se l’è bèlla! Che gusto sopraffino! Propri roba de class!... Ma se gh’è denter còss’è?

Pina - (non cogliendo l’ironia) On pensierino! Ma l’ha cattaa foeura lee, el sa? L’è andata fino a Milan de per lee, solla, a la Rinascente!

Tògn - (c.s.) E l’ha trovaa de per lee, solla, anca la strada de tornà a cà?

Pina (c.s.) Car èh! De chi prezzi anca in quei “Gran Magazzini” lì! Ma l’era on mes che la ghe pensava... (sospirando) Èheèh! Ch’el me creda, scior Tògn, ch’el me creda a mi...

Tògn -(c.s.) La me disa quell che devi cred! Me le disa, lee me le disa e mi ghe credi subit!!

Pina - Ma, Santo Signor, el ghe ved nò? El gh’ha minga i oeucc?

Tògn - Mi... mi vedi nagòtta!

Pina - E allora l’è cieco de bon! Se ved che in quèlla cà chì son cadute le catarrate a tutti!

Tògn - Ma se la se spiega nò, come la voeur che veda, mi? Sont minga on chiaroveggente!

Pina - El gh’ha reson, ch’el me scusa, el gh’ha propri reson! Gh’è domà la mamma che la pò vedè certi ròbb! Bèh, per vegnì ai curt, mi ghe domandi anca a lù se ghe par minga che el scior Gino, a restà semper abbandonaa e soll, el soffrissa minga pesg d’on can in gesa!

Tògn - Bèh, quell, quand che pioeuv, el se bagna nò! Comunque, la voeur che mi ghe disi el mè parer? Per i dì passaa, disi minga de nò, l’avarà anca soffert, ma dal dì che sèmm tornaa de Parigi, me sbagliaroo... ma a mi me par ch’el sospira on tòcch men!

Pina - (spaventata) L’è adree a toeumm in gir?

Tògn - Ma ghe par!!

Pina - Ma se gh’è success, allora?

Tògn - Mah!! Sarà el clima, sarà la primavera... e chi le sà?

Pina - E lù el cred ch’el gh’abbia pù el bisògn de avegh visin?....

Tògn - Che la me daga trà a mi: el temp el cancèlla tusscòss!

Pina - Ma quest l’è minga possibil! Anca perchè, per minga avegh l’impression de vess in de per lù, anca quand el mangia el voeur semper davanti el quader de la pòra sciora Marcèlla; e poeu....

Tògn - Ma che la se faga minga sconfond da l’apparenza: le ten li si, ma domà per adèss. Se lee la ghe starà attenta, la vedarà che da on dì a l’alter el quader el sparissarà e, invece de tegnill chì, sul cavalètt in del pòst doe prima gh’era la cadrega soa de lee....

Pina - Capiss: per minga ciappà di scapusc, le taccherà al mur sì, ma li in dèlla paret in mezz, doe gh’è pussee lùs.

Tògn - Per on poo de temp. Però, pussee tardi, el me cuntarà d’avè comprà on Straforini, e che, per minga passà de brù brù el dev mèttel propri in del mezz; e inscì el Straforini el ciapparà el pòst de la miee!

Pina - (sorridendo sottovoce) El gh’ha reson, el gh’ha propri reson! L’è propri la stessa pensada che hoo faa mi! Minga per cancèllagh de la memoria el ricòrd....

Tògn - Noooo.....

Pina - Quest mai!

Tògn - Anzi, come la vedi mi, perchè in quèlla cà chì, ghe vegna voeuna che la imita in tutt e per tutt la cara sciora Marcèlla e, che, imitandola, la sia bonna de tegnì viv el sò ricòrd!

Pina - Propri inscì!

Tògn - E disi viv, capii?

Pina - Ma propri viv, d’accòrd?, tanto de fagh di: “Istess precis de quell’altra!” E che la faga content!

Tògn - Precis paroll!

Pina - L’è quest! L’è quest che ghe voeur per salvall! Perchè el scior Gino l’è minga on òmm de contentass.....

Tògn - D’on ritratt!

Pina - Tropp sangu in di ven!

Tògn - Tropp dannee in di sacocc

Pina - Troppa salùtt!

Tògn - Troppa terra de sorveglià!

Pina - Lù el m’ha capii perfèttament!

Tògn - Ma l’è minga appena d’incoeu che mi l’hoo capida!

Lia (d.d.) Ah. ah. ah! (ride)

Pina - L’è lee, l’è la mia piscinina!

Tògn - Sent come l’è contenta!

SCENA III°

Lia seguita da Lucia e dètti

Lia - (ridendo sgangheratamente per ciò che legge sopra un libro mastro che tiene aperto) AH! AH! AH!

Pina - Se gh’è cos’è?... (Lucia appare dietro Lia; è umiliata, quasi piangente. Si ferma lontano)

Lia - (leggendo forte) “uovi, tre dossine” Con la esse! “Spinasci sedesi massi” semper con la esse! “Perseghi, due cavagne! Fichi due seggioni! Un gabasso di magiostre”!! Ch’el guarda, ch’el guarda, scior Tògn, s’el gh’ha voeuja de divertiss on poo! Questa l’è el rendicunt de tutt quell che va al mercaa!

Tògn - (guardando) Basta che torna i cunt, e per el rest...

Lucia (che ha aperto il buffet e si è messa a tirar fuori per apparecchiare) Che ghe le disa! Basta che torna i cunt e che se veda ben tutt quell che va foeura del cancell!

Lia - Eggià! Basta fà vedè quell che vun el scriv...

Lucia - Oeui, sciora lee: attenta a come la parla, èh? Perchè mi son bonna come on tòcch de pan, ma se me fann girà i santissim...

Lia - Hoo fòrsi dii on quaicòss de mal?

Pina - Su, su... andèmm!

Lia - La s’è inrabida perchè hoo vorsuu vedè i sò spegasc! Hinn propri bei, i tò cunt! Tò, ciappa e ten de cunt! (e gètta il libro mastro sul tavolo in modo che cada dall’altra parte)

Lucia - (stava per togliere dal tavolo il pacchètto e dòpo averla ossèrvata) Questa la dev vess ròbba soa! Che la tegna! (e fa lo stesso facendo finire per terra il pacchètto)

Lia (raccogliendolo) Ma l’è la manera de fà?

Lucia - (raccogliendo il libro mastro) Istess precis de la soa!

Lia - Ma ti, chi te credet de vess, in quèlla cà chì?

Lucia - Ona pòra dònna, el soo de per mi!

Lia - (indignatissima) Fregon di...

Pina- (subito, troncando l’offesa) Lia!!! (poi, con più calma) E si che... te sonet anca el pianoforte!

Tògn - La soa mamma la gh’ha reson!

SCENA IV

Gino e dètti

Gino - ( in tenuta da cacciatore, entra, guarda tutti e va per deporre sul buffètt giornali e sigarètte) Se gh’è success?

Lucia - (con le lacrime agli occhi per l’umiliazione) Nagòtta! (va in cucina prende le stoviglie, torna subito e continua ad apparecchiare per uno).

 Pina - (sorridente) Numm sèmm vegnuu per lù... perchè doman l’è la soa festa.

Lia - (sorridendo anche lei, col pacchètto tra le mani) Sicura, doma l’è el sò compleann.

Gino - Grazie, grazie, ma mi son sincer: soo nò se gh’hoo de ringraziai o se... Perchè lor me ricòrden che diventi vecc...

Tògn- Tutti diventom vecc!

Gino - Via de quei che moeur giovin!

Tògn - Natural!

Lia - Diventi veggia anca mi, el sa?

Tògn - (tra sè) Eccome!!!

Pina - (sorridendo) Ma lù, a vess sincer, el par nanca!

Gino - Minga vera!                                                                                                         

Lia - Ch’el senta, invegiassi mi inscì ben, come el fa lù! Numm el disom semper, vera mamma?

Tògn - Se disen cos’è?

Lia - Ma guarda come el se manten giovin, el scior Gino!

Pina - Semper el disom! Se parla minga d’alter!

Gino - Vialter dò ve sbaglii de gross: i ann se veden nò, se senten!

Lia - El sa ona ròbba? Mi sont inscì convinta de quel che disi, che... (andando a prendere il pacchètto e dandoglielo) I hoo cattaa foeura mi!

Gino - (Si rigira il pacchètto tra le mani)

Pina - Ch’el guarda, che le desfa!

Gino - /disfando il pacchètto) Oeuilla! Papillòn fiammanti!

Tògn - Propri de scioron!

Lia - Papillòn che adèss el podarà portà, perchè el sò lùtto l’è finiii.

Pina - El sa, minga per piantà lì el lùtto, ma, di vòlt, s’el gh’ha de andà in d’on quai sit...

Gino (con noncuranza) Grazie, grazie, la doveva minga...  Si, i portaroo volentera...

Tògn - (tra se) Oeuuuuuooo!!!

Gino (c.s.) L’è contenta?

Lia - In doe podi mètti èh? Che me le disa.

Tògn - (tra se) Adèss gh’el disi mi in doe la pò mèttessi!

Gino - Che ie mètta on poo doe la voeur!

Lia - Ghe i foo mètt in la soa stanza.

Pina - Sicura, in del prim cassètt del cantaraa.

Lucia - (che ha ossèrvato la scena) El prim cassètt l’è pien ras!

Pina - Se l’è pien ras mètteghi in del second! Toeu, e mètti via subit, che, se nò, ciappen polver. (glieli dà)

Lucia (prendendoli e avviandosi dòpo averle guardate) Ma el scior Gino i  porta minga questi chì. Lù el porta quei classich o quei a foulard; questi hinn ròbb che strangola. Hinn come one corda al còll! Tèhgh! Istess precis! (e facendo l’atto di impiccare entra col pacchètto nèlla stanza di Gino, poi torna per finire di apparecchiare, tirandola per le lunghe per restare lì)!

Pina - (a Tògn) Se l’è mai ignorante, quèlla dònna lì!

Lia (a Gino) - Content!

Gino - Mi?! Contentissim!!!

Lia - Però el dovariss famm on piasè!

Gino -(con disinteresse) Duu, se podi!

Lia - Mi gh’avariss bisògn de andà in de la mia sarta che la sta a Milan in Cors 22 Marz. Lù, come sò solit, el venerdì el va a Milan, e siccome la mia mammètta la pò nò, el voeur vess inscì gentil de  compagnamm lù?

Tògn -(tra sè) Molliii, questi hann sonaa la carica!

Pina - Io gliela affido! Ch’el creda minga che stia tranquilla, el sa?

Lucia (attende attentissima la risposta)

Tògn (tra se, piano a Gino) Hann traa giò l’amin: bocca nò, bocca nò!!!

Gino - (dòpo aver pensato) Podi nò, signorina; l’è mei spèttà on poo amò! Pussee in là la compagnaroo a Milan tutt i vòlt che lee la gh’avarà de bisògn, ma per adèss nò. Me par ancamò prest per fass vedè in gir de per mi cont ona signorina!

Pina - Ma gh’è denter nient de mal: la va in de la sarta!

Tògn - A ciappà i misur...

Pina - El vorariss che la mandi de par lee?

Gino - Ma gh’è minga el fattor?

Lia - (verde) El fattor?

Lucia - (tra se) Bravo!

Gino - El pò compagnalla benissim lù!

Pina - (anche lei fremente) Ma... la mia tosa l’è minga ona cavagna de magioster o de sciress de mandà a Milano cont el fattor! Mi soo appena che el mè Gaitan l’ha minga faa tanti vers... Quand sèmm resta de per numm in de l’ort... cioè... (e si morde il labbro inferiore)...

Tògn - Ma nò, nò; la verità adèss ve la disi mi: l’è che de ona quai sèttimana el mè amis Gino el se moeuv pù de cà, ma nanca cont i canonad... ecco el perchè!

Lucia (strofinando i piatti con una salviètta) Sicura! L’è propri inscì! El se moeuv quasi pù! Tant l’è vera che hinn giamò trè sèttiman ch’el va pù a Milano al venerdì. Disi ben, scior Gino? Vera che l’è quasi on mes che lù el sent pù el bisògn del... venerdì? (e strofina trionfante i piatti)

Pina -(adagio a Tògn, spaventata) De bon?

Tògn - (c.s.) Verità sacrosanta!

Lia - Però la domenega....

Gino - Nanca a parlassen, perchè a Milano, i dì de festa o te ghe veet a la mattina prest o te steet a cà toa per el rebelott che gh’è in gir!

Pina (a Tògn) E come el fa per...

Tògn - El manda el fattor al sò pòst!

Gino - Cont el sò permess voo a lavass i man perchè l’è ora de mèttess a tavola per disnà!

Tògn - Ricòrdess che gh’hoo bisògn de parlatt: mi son chì in vesta de ambasciador!

Gino - Torni subit!

Lia - Allora, arrivederci e buon appetito! (gli tende la mano, addolorata)

Gino - Grazie, ghe doo minga la man perchè hoo appena toccaa la terra d’on vas. Arrivederle e buon appetito anca a lor! (via in camera)

Tògn - (a Lucia) Ghe n’è del giazz?

Lucia - Finchè ne voeur! Hoo impienii el frizer stamattina!

Pina (fra se) Oeui, me sa tant che chicchinscì me la cunten minga giusta! Gh’e on quai còss che me quadra nò!

Lia - ( con bile) ‘Ndèmm?

Pina - (c.s.) Spètta on moment! Mi voraria savè....

Gino (d.d.) Lucia!

Lucia -(continuando ad apparecchiare) Se gh’è?

Gino - In doe l’è la savonètta?

Lucia (passando trionfalmente davanti alle due) Se ghe son minga mi.. nanca i man el se lava!!! (via in camera)

Lia- (via Lucia, si gètta piangendo su una sedia) Ih, Ih...Ih!

Pina - Oh Madonna Santa! Se te gh’heet? Se gh’è cos’è? Ghe sèmm de capp! E riciamèmm el dottor!!!

Tògn - (scuotendola) Signorina! Signorina...:!

Lia -(c.s.) Se almen el m’avess salùdaa... L’ha nanca vorsuu stringiòmm la man!

Pina - Ma s’el te doveva string dòpo ch’el t’ha dii “Buon appetito”? E t’ha minga ditt assee?

Lia (c.s.) Nò, nò, l’è minga vera!!!

Pina - Ma che ghe le disa anca lù, scior Tògn! Ghe le disa anca lù se per el sò caratter, l’ha minga faa infin tropp?

Tògn - Ma si, si... su, andèmm, che la faga nò inscì!

Pina -(piano a Tògn) Ma la gh’ha reson, mila reson! L’è che chì me tocca ciamà ancamò el dottor! (a Lia) Su, andèmm; comunque ti te se sbagliètt, credom a mi!

Lia -(singhiozzando) Nò,nò, me sbagli nò! Tant l’è vera che el venerdì... Te me capissètt, mamma? El venerdì el va pù nèmmen a Milan!!!

Pina (guardando Tògn, piano) Eèh! Ormai l’è granda e certi ròbb ie capiss anca lee!

Tògn (piano) Parariss nanca! (forte) Però lee, signorina, la dovariss vess contenta se el se moeuv pù de cà.

Lia - E el perchè el va pù? L’è bon de spiegamel, lù?

Pina -(c.s.) La capiss, el ved nò? L’è quest el guaio!

Tògn - Citto, citto per piasè, se de nò fèmm maronn!

Lucia - (entra dalla camera adagio; ha un mucchio di banconote in mano, entra in scena leccandosi le dita e sfogliandoli lentamente, lentamente attraversa la scena, va alla tavola apparecchiata, li stira e contandoli) Cent, dusent (chiama) Ugo! (e continua a contare)

Pina - (sempre più spaventata, piano) Ch’el guarda: l’è giamò adree a fà gira lee i danee, ch’el guarda! Ma quest voeur dì che...

Lia -(piano) On disaster, on patatrack!

Tògn - (tra sè) Me son mai divertii inscì tanto!

Lucia -(c.s.) Quattercent ecc. on milion! (chiama) Ugo!!! Ma doe diavol el s’è casciaa?

Lia - (ingoiando amaro, si avvicina alla tavola) Per toa norma e regola, l’è de villan cuntà i danee in su la tovaja!

Pina (come la figlia) Se ghe fudess chì di person per ben, che figura el ghe fariss el scior Gino?

Lucia - (guardandole) Se ghe fudess... Ma quanta gent la vorariss aveghen de cuntà in su la tovaja! (c.s.) Ugo!!!

SCENA V

Ugo e dètti

Ugo - (entrando) Son chì!... Se gh’è?

Lucia - Qund riva el fattor ciamom. Gh’hoo de dagh on milion, t’hee capii? Cent mila! Des cart de des! (ed entra orgogliosamente in cucina cacciandosi nel seno il rotolo del denaro)

Pina (ridendo amaro) Sentela, sentela!!!

Lia - (ridendo amaro) L’è lee che la dev dagh al fattor!

Pina - Segn che la gh’ha in man la cassa lee!!! (a Ugo, a parte) Ma vialter sii orb o ghe vedov nò?

Ugo - Se gh’èmm de vedè cosa?

Lia - Che quèlla cà chì la va a barilòtt!

Ugo (guardando il soffitto) L’è staa el terremott del ‘48. Ma hinn di crèp che hinn nò pericolos, l’ha dit anca l’ingegner del comun. Perchè questa l’è l’antica Villa Mazzacurati, ròbba del sescent e allora i mur eren bon de fai! Perciò tranquilla! (via dalla comune)

Pina - Ma come se fa a ragionà cont i paesan?

Lia - Tutti villan in quèlla cà chì: tutti!!!

Tògn -(ridendo) Ma che se quiètten on moment e che me daghen a trà a mi: lassee passà ancamò on poo de temp! L’è ancamò prest per quell che gh’avii intenzion de fà!

Pina - Mi disi che l’è tropp tardi!

Lia - Ah nò nò e poeu nò! Mai e poi mai! Mi catti su i vanzarott de nissun, ciar?... Ma nanca per idea!!::: E s’el cred che mi...

Pina - Ti lassom fà de mi e quièttes, fann minga girà i santissim anca ti.... Chicchinscì devon escogità on quai intracchen per fagh dervì i oeucc e fagh vedè in che baratro l’è adree a precipità, alter che stori!

Lia - Ven, ven mamma, andèmm! Arrivederci, scior Tògn!

Pina - Lù che l’è sò amis, ch’el ghe disa on quaicòss!

Tògn - Vedaroo, vedaroo, se l’è el caso!

Pina - Ma alter che vess el caso, caro lù!!! El voeur vedell andà in malora?

Lia - Andèmm, t’hoo dii!

Tògn - Salùte, donn, e stee minga lì a tribolà...

Lia - Mi tribolà?!? Ma pensa ti!!! Omen mi, quanti ne voeuri, e pussee bei de lù (ed esce dal fondo sculèttando)

Pina - Scappa nò... damm a trà... scoltom! (a Tògn) Ch’el ghe mètta ona parolina anca lù e el vederà ch’el se pentisserà nò, ch’el me creda! (andandosene) Ma in doe te corret? Borla minga giò el soffitt, èh? T’hee minga sentii? L’era la Villa Mazzacurati.... (sulla soglia voltandosi, a Tògn) Ma mi ghe scomètti che la tosa la tornerà chi pù! Per fà certi figur, poeu! E la gh’ha reson! Che ghe le disa, ghe le disa lù, scior Tògn! Però, me raccomandi: con saver fuar! E pensà che l’è andada perfin a la “Rinascente”! (uscendo) Ven chì! Ven chì! (via dalla comune)

Tògn - (ridendo) Va che coppia: la megera e l’arpia!

SCENA VI

Gino e dètto, poi Lucia

Gino (rientrando in maniche di camicia) Hinn andda via?.... Meno ma!.... Oeui, ma che rompaball!

Tògn - Ma perchè te fee minga ona bèlla ròbba?... Perchè te la sposètt nò?

Gino - Chiii?

Tògn - Ma la giovina, nò?

Gino - Mi? Mi toeu miee ancamò? Cara el me amis, ti te me conossètt nò! Certi dolor, quand hinn sentii come el mè, se desmenteghen pù! Per mi, ormai, qualsiasi dònna ...(ma vedendo entrare Lucia si blocca e comincia a tossire) Èheem!!!

Lucia -(rientrando dalla cucina con una bottiglia di vino in mano) Ma el gh’ha semper quèlla tossascia lì? El voeur on gottin de vin?

Gino - Nò, grazie!

Tògn - E allora curess, perchè l’è ona toss che me piass pòcch!

Gino - Ghe l’hoo dal di che ti t’hee vorsuu portamm a caccia!

Lucia - Però mi, quèlla mattina, ghe l’avevi dii: “Ch’el vaga nò!!”

Gino - Per forza: l’è vegnuu a tiram giò dal lètt!!

Tògn - Savevi che ti te vourevet morì.. e allora...

Gino - (per cambiare discorso) Te mangiètt con mi? Lucia, mètt giò anca per lù!

Lucia - Volentera! (esce per tornare ad apparecchiare per due)

Tògn -(togliendo la lèttera) Ven, ven chì. Lassa perd el mangià, e dagh on’oggiada a sta lèttera.

Gino (prendendola) Che lèttera?!? (legge) “Carissimo signor Antonio, solo lei mi può aiutare parlando a mio zio, che non si vede più neanche quì a Milano....” E nò èh? Adèss basta! Digh che ghe n’hoo pien la scuffia di sò lètterin!

Lucia (è già rientrata e, mèttendo il secondo coperto, ascolta)

Tògn - Ma legg: in fin de la fera l’è el fioeu de tò fradell, e tuo unico erede!

Gino - T’hoo dii che mi leggi nagòtta! Toeu ciappa (e gli rende la lèttera)

Lucia (intervenendo) O Signor! Ma che la leggia, nò? Ch’el ghe daga trà a i amis, almen ona vòlta!

Gino - E ti t’el ciamet amis, quest chì?

Lucia - Sicura! Dòpo tutt l’è sò nevod ch’el scriv, sangu del sò sangu!

Tògn - E se te le dis anca lee, te podet credigh! Se te voeuret nò scoltamm mi, scoltela almen lee!

Lucia - Se gh’el disi mi... su donca!

Gino - (riprende la lèttera e legge)

Tògn - (piano a Lucia) Te seet ona cannonada! Te gh’hee miss su la bria in quatter e quatter vòtt!

Lucia - E bèh!... S’el me dess a trà...

Tògn - El stariss subit mei; ne son sicur anca mi!

Gino - (dòpo aver lètto) Hoo capii, hoo capii! Anzi, avevi capii anca senza legg! E va ben, anca per sta vòlta, mandigh cinquantamila franch e che la sia finida. Ma dev sembrà che te ghe i mandet ti, mi voeuri savè nagòtta!

Lucia - E allora, che ghe ie manda lù, dòpo el scior Gino le rimborserà.

Tògn - Se te m’el garantissètt ti, mi gh’en mandi anca cento. Però, ghe n’avarà assee?

Lucia - Ghe n’ha bisògn pussee?

Tògn - Eèh... te me capissètt... el gh’ha de pagà el fitt de la mansarda doe el viv...

Gino - (che si era allontanato, girandosi) S’el gh’ha la mansarda, ch’el vaga in on monocal! Per lù l’è pussee che assee: basta e avanza!

Tògn - Ma come el gh’ha de fà? Oramai...

Lucia - Ecco, l’è quel che disi anca mi: oramai...

Tògn - El dev... cascialla via? A lee ghe occor el salott per ricev i impresari, i sart e così via.

Gino - Mi l’hoo miss a fà el ragionatt in banca! Lù, del salottin ghe n’ha minga bisògn! Se ghe pias filà con la modèlla, che la paga cont el sò d’on stipendi!!...

Tògn - El sariss a moeuj! (a Lucia) T’el seet s’el ciappa vun a vess in banca?

Lucia (a Gino) - Ma se el scior Carlètto l’avariss miss a pòst el coo? S’el vorariss fass ona famiglia anca lù?

Gino - Ma che famiglia e famiglia! Quell là el pensa domà a pastrugnà e stop!

Lucia - Ma se voeuren minga ben? Per mi l’è assee: lù ragionatt in banca, lee la lavora... Nissun pò di nagòtta, su de lor!

Gino - Sta calma, agitess nò, per piasè! A Milan te vivet ben anca de per ti!!! Podarissi fall mi!!!

Lucia - E perchè le fa nò?

Tògn - La gh’ha reson la Lucia. Perchè t’el fee nò?

Lucia - Chi la tratten? El dev domà licenziamm tutti, ciappà su baracca e burattin e andà a viv in città! Question d’on attim!

Gino - E chì? Chi l’è che manda avanti la baracca? Gh’era chi le faseva, ma adèss la gh’è pù! Son restaa de par mi! Soll! (e passeggia nervoso)

Lucia - (dòpo essere stata lì a guardarlo, piano a Tògn) Ch’el senta, scior Tògn, ch’el me daga trà a mi: quanto l’è fitt de sti fioeu?

Tògn (piano) Dusent mila franch: in de la lèttera el parla de on poo de arretraa!

Lucia (pensa, poi, fissandolo) Anca lù el gh’ha di cà a Milano, vera?

Tògn - (c.s.) Si, trè o quatter palazzin...

Lucia - (c.s.) Tutt lader, i padron de cà!

Tògn (c.s.) - Ma mi gh’aveve propost on bell appartament pussee a bon mercaa dedree de Niguarda, ma lee la m’ha dii che l’era tropp foeura de man e che la preferiva tegnì quel lì in via Borgospesso, pussee car si ma in pieno centro!

Lucia - Ah! allora lù la conoss!!! Come l’è? Come l’è? L’è bèlla? Bèh, de solit i modell de Milano hinn di bei tòcch de tosa!

Tògn - On bijou! On’eleganza!!! E che portament!!! La gh’ha on andà de corp... (e cammina ancheggiando)

Lucia - (c.s.) L’è inutil! Tutt i omen de sta cà chì...

Tògn (c.s.) - Catten foeura tutti ròbba scelta!

Gino (dal fondo) Se mangia incoeu o, se viv d’aria?

Lucia - On moment, ch’el porta pazienza che rivi subit.

Gino (torna a passeggiare)

Lucia (pausa, poi, infilandosi le mani sul seno) Ch’el vegna chi! (lo porta alla tavola apparecchiata) Cioè nò! Su la tovaja se pò nò! (Alza la tovaglia e srotolati i soldi, comincia a contare) Cinquanta, cent... centcinquanta.

Gino - Còssa te feet?

Tògn - Lassela fà!

Gino - (più forte) Ma còssa te seet adree a fà?

Lucia - Paghi el fitt, el ved nò? E se anca lù el fuss bon de fass pagà....

Gino - Stagh attenta nèh? Mi gh’hoo ordinaa  al fattor de ritirà de ti sti danee chì e lù el dev rendòmm cunt fina a l’ultim ghell!

Lucia - E chi gh’ha ditt on quai còss? El ghe renderà cunt de sicur, perchè se ghe domandi un prestit mi, el fattor el me  dis minga de nò!

Gino - Ma el te presta i mè!

Lucia - Mi quest voeuri nanca savell: basta che mii  daga! Minga per mi, ma perchè mi poda daghi a chi lù el sa! Poeu, quand el sò nevod el podarà, mi i darà indree, mi ghe i daroo al fattor e el fattor ghe i darà al sò padron. Come el ved, lù el ghe entra nient!

Tògn - Ah! Ah! Ah! T’hee sentii che girament l’ha traa in pee la nostra Lucia!

Gino - T’el disi mi che girament che me ven! Bah, lassèmm perd! Puttòst, se mangia o se sifola?

Lucia - (dòpo avergli dato le banconote) Allora d’accòrd, scior Tògn?  Gh’è pù bisògn che lù el tira foeura di danee. Me i foo dà del fattor e son mi che ghe i doo al scior Carlètto.

Gino (a Tògn) Me piasariss savè còssa la me daria se ghè i cercassi indree!

Tògn - E chi le sa!!

Gino - Ven a tavola (e si avvicina al tavolo)

Lucia (andandosene dòpo aver riposto i soldi in pètto) Su adèss, a tavola! Perchè quand on zio ch’el gh’ha pù nissun, l’ha faa el sò dover cont el sò unich nevod, el magna cont doppi appetitt (via in cucina)

Tògn - Che tipo!!!

Gino - Ma mi i voeuri indree èh!!!

Tògn - E lù ti i darà, sta tranquill: se ne fa dà di alter dal fattor e inscì te i darà indree.

Gino - Sèttes giò!

Tògn - Me te ringrazi, ma...

Gino - Te voraret minga andà via?

Tògn - Voeuri andà subit a fà el vaglia, perchè quei fioeu là i spètten, se de nò i sfratten!

Gino - (sedendo) Soll... Soll... Semper de per mi! Pazienza, oramai son condannà a stà de per mi.

Tògn - Ma nò... Scusa... Spètta che t’el mètti pussee visin (e preso il cavallètto col quadro lo mètte di fronte a Gino, il più vicino possibile al tavolo) Faa: inscì te see pù de par tì. In del pòst doe dovevi sèttass mi... te gh’heet ona persona pussee indicada. Content, Ginètto?

Gino - (resta un pò male, ma manda un sospiro che non si capisce se è di piacere o di dispiacere. Poi piano) Si, si, grazie.

Tògn - E allora: buon appetito! (tra se) E se te se dessedet minga adèss... (via dalla comune)

Gino - (resta silenzioso guardando di traverso il quadro, quindi, còmmosso) Par quasi che la gh’abbia de slongà la man e tirà su la forchètta! (con un lungo sospiro) Eeeèh! Ghe voeur pazienza! (e si versa del vino che assaggia) Me par quasi che l’è adree a ciappà l’asee!

SCENA VII°

Lucia e dètto

Lucia (entra portando la zuppiera che mètte in mezzo alla tavola. Ha fatto toelètta. Indossa una graziosa camicètta e s’è ravvivata i capelli, magari con un nastro)

Gino - (dòpo essersi fermato a guardarla con il fiasco in mano) Scusa, proeuva a saggià quel vin chì: me par che l’è adree a ciappà l’asee (e versa in un altro bicchiere)

Lucia (dòpo averlo assaggiato) E si, ghe voeur vendell, se de nò el va a mal! E ghe n’è ona quai bott in cantina!

Gino - Te see sicura che ghe n’è pussee d’ona bott?

Lucia - Pussee, pussee, el voeur dimmel a mì?

Gino - E allora bisogna desfesciall!

Lucia - El voeur che parli mi cont el fattor?

Gino - Cont el fattor ghe parli mi! Men t’el vedet e mej l’è: me par d’avèttell giamò dii! (che non ha smessa di guardarla) E s’el voeur di tutt sto lùsso? Perchè te set missa tutta in tir?

Lucia (servendolo) Gh’è minga chì a disnà el scior Tògn? L’è tant che gh’èmm pù de ospiti e allora hoo minga poduu fa a men de festeggià l’occasion! (e preso il piatto davanti al quadro lo riempie)

Gino - E adèss se te seet adree a fa? Per chi l’è quèlla ròbba lì?

Lucia - Ma gh’è minga chi el scior Tògn?

Gino - El Tògn l’è andaa via! (e si mètte a mangiare)

Lucia - Che peccaa! (guarda il ritratto e sospira. Quindi, prende il piatto e fa per rovesciarlo nèlla marmitta)

Gino - Stagh attenta de minga bordegà la tovaja!

Lucia - E se gh’hoo de fà, allora? El quader la mangia nò!

Gino - E mangela ti!

Lucia (si ferma, lo guarda e quindi) La mangi de sicur, ma la mangi in cusina; e, per minga stravaccalla, l’è mej che la versi in de la marmitta.

Gino - (continuando a mangiare) Che bisògn te gh’hee de andà in cusinna?

Lucia - Eggià, el gh’ha reson, podi cascialla giò anca chì, (e va per mangiare restando in piedi accanto al quadro. Poi, non osando toccare la posata) E nò, gh’hoo de andà in cusinna per forza, perchè la mia forchètta (cuggiaa) l’è de là.

Gino - E dopera questa, èrpess!

Lucia (non osando) Ma l’è quèlla cont i cifer dei Mazzacurati!

Gino - Per quel che varen al dì d’incoeu....!

Lucia - L’è minga vera! (prende la posata e, dòpo averla rigirata, decide di mangiare, stando in piedi) Bona, la m’è vegnuda propri bona.

Gino - (termina e beve; poi si mètte comodo e fa per tirare fuori le sigarètte) E adèss ona bèlla fumada!

Lucia - (sparecchiando) O Signor, che pressa de fumà! Ch’el spètta almen che ghe porti el second! E poeu, s’el seguita a fumà? El fariss mei a fà on poo de moto, puttòst!

Gino - Te gh’hee minga tort! (Alzandosi) Voeuri iscrivess al “Clùb Atletico Sani & Belli” che vi fa belli e vigorosi, come la dis la pubblicità! (Al sorriso di compatimento di Lucia) Gh’è pòcch de rid! Quanti ghe n’è de la mia età cont on fisico così asciutto? E così agile e scattante? (ed esegue alcune flessioni con la mano appoggiata alla sedia) Uno-due;uno-due...

Lucia - Ch’el staga attent de restà lì in ona quai manera! (via)

SCENA VIII°

Ugo e dètto, poi Lucia

Ugo - (entra dal fondo, non visto, e si ferma a guardare Gino che fa una flessione in avanti) L’ha perduu on quai còss?

Gino -(raddrizzandosi) Nò nò... l’è che.... (brusco) Se te voeurètt còssa?

Ugo - Vorevi la Lucia. Siccome gh’è giò el fattor....

Gino - La Lucia la gh’ha de damm de mangià a mi!

Ugo - Ma el fattor el m’ha dii de avvisala...

Gino - E mi te disi ghe la gh’ha de damm de mangià a mi! Gh’hoo de restà a digiun per la soa bèlla faccia?

Ugo - Allora ghe disi de andà prima in di cavalee, e quand el ven indree...

Gino - Bravo!

Ugo - Hoo capii (via)

Lucia (entra con un vassoio che pone al centro) Chi l’era?

Gino - L’era el fattor!... El bell fattor, appena vegnii foeura dall’Istituto di  Agraria, ch’el sa nanca da che part se ciappa in man la zappa!!

Lucia - Gh’hoo de dagh sti vòtt cent mila franch (e va p.p.)

Gino - Adèss se mangia! Lassa stà i danee!

Lucia - Nò, siccome invece de on milion hinn meno, gh’hoo de spiegagh...

Gino - Lassa stà, t’hoo dii! Ma t’interessa pussee lù o mi?

Lucia - Ah, per mi... ch’el se figura!!

Gino (tornando a tavola) E allora pientemela lì col signor fattore, perchè a mi hinn adree a incomincià a giramm....

Lucia - Ch’el se figura a mi! (servendolo) El gh’ha dò man che paren dò badil, e ie moeuv semper! E siccome mi voeuri dagh confidenza a nissun, anca la sèttimana passada gh’hoo mollaa on slavadent...

Gino - Al fattor?

Lucia - Si, a lù, a lù!

Gino - T’hee faa ben! Brava!

Lucia - Ch’el mangia. Ghe pias el pètto?

Gino - A chì?

Lucia - A lù, nò? Gh’el domandi a lù!

Gino - A mi me pias tusscòss, t’el seet!

Lucia - Ne voeur ancamò?

Gino  - Oeuj! Ma te voeuret famm s’cioppà?

Lucia - Ch’el mangia, ch’el mangia! Se gh’è de mei de la tavola, a sto mond?

Gino -Te gh’hee reson! Sopratutt quand se troeuv ona coeuga come se dev! Perchè gh’hoo de dill: per quell che riguarda el disnà, quasi quasi stoo mei de prima. Però, anca lee, (accenna al quadro).... Come la cusinava!... T’avessètt saggiaa i rostitt negaa che la faseva... (e sta per còmmuoversi)

Lucia - Ch’el ghe beva sora! (e versa)

Gino - Allora d’accòrd, èh? Cont el fattor, da incoeu in avanti, tratti mi!

Lucia - D’accòrd! Ch’el toeuva! (dandogli tutti i soldi) Ch’el faga i cunt e ch’el ghe daga quell che ghe va perchè el me stufissa pù! Numm sèmm pari! Voo a toegh el dolce! (esce col vassoio)

Gino (ripone i soldi) Sto pelabrocch! Ma con chì el cred de avegh a che fà? Cont ona quai paisanòtta che l’è assee digh: “Sono un perito agrario” che la te borla in di brasch?? L’ha faa benone! Giò ona bèlla sberlascia! Inscì l’impara!.

SCENA IX

Ugo e dètto, poi Lucia

Ugo - (rientrando) Buon appetito, scior padron.

Gino - Ancamò?

Ugo - Gh’è chi el fattor!

Gino - (di soprassalto) Giamò?

Ugo - El dis che l’è de gamba bona.

Gino - E allora te ghe diset che doman el dovarà fà ona corsa pussee longa: cascell via; anzi nò, spètta! Digh che doman mattina ai ses or el gh’ha de vess de là in del mè offizzi!

Ugo - Ch’el staga tranquill! (tra sè) Poer fattor! (via)

Gino - Villan, ignorant, paisanasc! E con insistenza el ven chi per tampinalla!

Lucia (entrando con un altro vassoio) El dis a mi?

Gino - (si avvicina al tavolo, incavolato e) Sèttèmmes giò, ch’el sarà maj, sèttemes giò (e si siede)

Lucia- (stupita, dòpo un attimo) Ma mi... seri in pee!

Gino - E s’el voeur dì? (come seccato) Se te seret in pee, sèttes!

Lucia (incominciando a còmmuoversi) Nò, scior padron, nò... ch’el ghe pensa ben... perchè, se poeu el dovaria pentiss mi andaressi via subit!

Gino - Ma quand mi disi ona ròbba.... (e restano per qualche istante a guardarsi)

Lucia - (Dòpo una breve pausa) E allora... se lù el voeur inscì... ch’el Signor me la manda bona (e va a sederglisi di fronte. Ma il quadro vicinissino alla sedia le impedisce di muoverla)

Gino (guardandola) Se gh’è?

Lucia - Gh’è... gh’è el quader che me da fastidi! Cioè...disi nò...

Gino - L’è on attim! Te tirètt pussee indree el cavallètt e te spostet la cardega!

Lucia - Ma, per fa certi ròbb, ghe voeur vess in duu.

Gino - Cià, te doo ona man mi. (si alza ed eseguono) Ciappa el cavallètt de la part de lì....

Lucia - Adasi... ch’el faga adasi.... E ch’el pensa a quell che l’è adree a fà!

Gino -(portando il quadro con lei verso la parete) El rovini minga!

Lucia - (còmmossa) Disi minga quest!

Gino - Doe el mèttom?

Lucia - Me le disa lù. (sono còmmossi entrambi, ma passa subito)

Gino - (dòpo aver guardato) Lassemell chì, ti se t’en diset?

Lucia - Se podaria scapuscià.

Gino - E allora mèttemell chì, arent al mur. (eseguono)

Lucia -- Ch’el faga adasi! Ch’el gh’abbia minga pressa! Pian...

Gino - Tosa, me se sfregiss tusscòss!

Lucia - El gh’ha reson: se se moeuvom nò, el se sfregiss!

Gino (fermandosi vicino al muro) Fatto! Me par che chicchinscì el daga pù fastidi!

Lucia (controllando) Che le gira on poo vers la lùs.

Gino - Si, l’è mei. (ed esegue)

Lucia - Adèss l’è a pòst.

Gino - (deciso e con sollievo) E adèss, a tavola!!

Lucia - E andèmm a tavola! (eseguono; ma, mentre stanno per sedersi, li assale il ritegno: si guardano, si ricòmmuovono e ridono; lei sembra che si vergogni di lui).

Gino - Dai, sèttess giò!

Lucia - Prima lù!

Gino - Ma mi sont on cavallerizzo: prima le signore!

Lucia - Ma lù l’è el padron!

Gino - Ma ti te seet ona dònna! ( E su questo battibecco veloce la tela!)

FINE II° ATTO

ATTO III°

SCENA I°

(non c’è più il cavallètto)

Lucia e Ugo, poi Laura

Lucia (indossa un abito semplice ma abbastanza elegante, senza più il grembiale da domestica. Pèttinatura seria, còllana, orecchini e anelli. E’ seduta al tavolo e sta controllando una fattura. A Ugo, che le è accanto) Se spend tropp! Sti cavai chì me costen l’iraddidio! In on mes tutta quèlla biada??... Sii adree a diventà matt???

Ugo - Ma l’è quell ch’èmm semper spenduu!!!

Lucia - Minga vera! E se te se ricòrdet, anca la pòra sciora Marcèlla la borbottava semper! (e si alza)

Ugo - E adèss gh’è chi borbotta ancamò pussee de lee!

Lucia - Perchè i temp hinn cambiaa! E perchè l’è pù come ona vòlta! Ma vialter credii che se spenda pòcch, adèss? El soo mi!

Ugo - E chi l’è che dovarira savell?

Lucia - E mi capissi nò perchè devòmm tegnì duu cavai: vun l’è minga assee?

Ugo - E lee la cred ch’el scior Gino el poda dà via el morell che anca quest’ann l’ha vinciuu di prèmi ai cors? Se la disariss la gent?

Lucia - La disariss che adèss el corr pù perchè l’ha corruu assee: ecco se la disariss!

Ugo - Ma la disariss anca che quest el succed perchè gh’è chi ghe tira la bria!

Lucia - Padroni de dii quell che voeuren: l’è assee che sappien che mi cerchi de fà el sò interess. Cerchèmm allora de consumà men biada, perchè la question l’è tutta lì: sti animai mangien tropp!

Ugo - Ma el scior Gino el voeur che sien bei rotond e, se deven vess rotond, devom impienii.

Lucia - E vialter fasei on poo pussee quadraa, su!!

Laura - (dalla comune, con la sporta dèlla spesa piena) Ecco faa la spesa, sciora.

Lucia - E el rest?

Laura - Tell chì: e questa l’è la lista (consegnando tutto)

Lucia (leggendo) Ma come te scrivet mal! Se fa fadiga a legg!

Laura - Se la voeur... mi hoo minga studiaa come lee!

Lucia - Hoo minga studiaa nanca mi, ma quel che scrivi el se capiss! E adèss andii pur (prendendo una spazzola e la giacca che è appesa a una sedia) E.... economia, me raccomandi, economica in tutt, se se voeur che i ròbb in quèlla cà chì, vaghen come deven andà! Se de nò, sarà pesg per tutti (entra in camera spazzolando la giacca)

Laura - (a Ugo) Per mi quèlla lì la stà per vedè on quaicòss de bell!

Ugo - Per mi l’ha bell e vist!!! Eccome! (via dalla cucina)

SCENA II°

Lucia e Gino

Lucia - (rienra dalla camera sempre con la spazzola in mano, ma con un paio di pantaloni che stende sul tavolo per spolverarli) Quand ch’el pioev, el se sbroffa tutt; el gh’ha la palta fin sul coppin! (e spazzola)

Gino ( entra dal fondo; è ringiovanito; le si avvicina alle spalle, mentre lei continua a spazzolare)

Lucia - (non vedendolo) Balabiott!

GIno - Grazie.

Lucia (sobbalzando) Te m’hee faa stremì! (e la conversazione si svolge quasi sottovoce, come chi ancora non vuol far sapere....)

Gino - (guardandola) Ma perchè t’el fee ti quel lavorà lì? Gh’è minga quell’altra?

Lucia (continuando a spazzolare) Si, quell’altra!!! Ma se l’è bonna de fà nagòtta!!!

Gino - E allora ciappemen on’altra.

Lucia - E doe? Doe te la troeuvet on’altra che te podètt fidass?

Gino - Ma gh’è minga la Giannina che l’aveva cercaa....

Lucia - Siii! Con quèlla lì sarissom a pòst cont i liber! Allora si che te sentariet.... E poeu, ti te la ciappariet, èh, ona tosa inscì giovina in cà!!! Ma ti te see vecc...te see vecc... T’el seet o nò che te gh’heet on pee in la fossa?

Gino - (facendo gli scongiuri) Ma ti te m’hee semper dii che mi sont un uomo abbastanza giovanile!

Lucia - Ma mi te l’hoo dii per fatt on compliment!!! E ti te gh’hee creduu?

Gino - Evviva la sincerità!

Lucia - Ti te seet on òmm per ona dònna come mi, minga per ona tosètta de vint ann!! Bèlla figura te ghe farisset!

Gino - Ma se te diset semper che mi sembri...

Lucia - Te sembret quell che te seet, nient de pù! Ti te seet quell ch’el  pò stà cont ona dònna come mi, ma minga fà el ganivell cont i spitinfi! E poeu te credet che on’altra l’accèttariss de viv in sta manera? On’altra la cercariss de tiratt el còll, invece mi, che sont ona pòra vedova, sari su i oeucc, me contenti e ringrazi el Signor! Troeuvela on’altra come mi!

Gino - Ma ti te see contenta o...???

Lucia - Contentona! Te l’hoo dii e t’el ripeti cont el coeur in man: per mi l’è fin tropp stà chì... come se fudessi la padrona. Ma me n’approfitti nò, t’el seet! Me n’approfitti nò e domandi nient alter!

Gino (sottovoce, vicinissimo) L’è per quest che te voeuri ben!

Lucia (quasi alle lacrime) Sperèmm che te duret... perchè, t’el vedet, te spazzètti fina i sbroffad!

Gino (ridendo) Ah ah ah! Ma dimm on poo: se te farisset se mi duraressi nò? Èh? Se te farisset?

Lucia - Nagòtta! Còssa dovarissi fà?

Gino - Ona bèlla tragedia!

Lucia - Macchè tragedia! Son minga nancamò rembambida, te seet! E poeu, con che diritto? Tiraria arent i me quatter strasc, faria su el me fagotell e menarissi i boccol: Còssa dovarissi fa? (accennando le gioie) Questi però i portarissi con mi, t’el seet: i boccol, la còllana e el braccialètt perchè credi de avei guadagnaa!

Gino - A spazzèttam i sbroffad?

Lucia - Varda ti che ròbba! Guarda! Te ghe i avevet fin sui cavei!

Gino (ridendo) Sta tranquilla, quiètta, tant t’el seet: gh’hoo paura a stà de per mi, paura!

Lucia - (guardandolo) Ma gh’hoo paura anca mi!

Gino - De còssa?

Lucia - Che ti te toeuvet ancamò miee!

Gino (dandole un bacio) Sta quiètta, stupidotta!

Lucia - E allora... sperem che te me sgonfiètt nò! (e asciuga una lacrima)

Gino - E adèss còssa te fee? Te pianget?

Lucia - Se te voeuret... podarissi nanca dì che te m’heet obbligada, te par?

Gino - Va la, va la! Quièttes! (Colpo di qualcosa che cade)

Lucia (staccandosi subito da lùi) El solit colp, ghe sèmm (e riprende a spazzolare)

Gino - Adèss el me sent! (girandosi) Avanti!

SCENA III°

Tògn e dètti

Tògn - (entrando con un bastone da passeggio, dal grosso pomo) Permesso?.... Buongiorno a tutti.

Lucia - Bon dì, scior Tògn (e spazzola)

Gino - Tògn, spiegom ona ròbba: perchè, da on poo de temp a sta part, quand te vegnet a cà mia, te se portet adree quel baston chì che, puttòst che on manich, el gh’ha on proièttil de cannon? E come te seet in de l’atrio: “Pum” giò de colp per terra; e numm fèmm di salt inscì! Te me fee cagià el sangu!

Tògn - Ti te ghe credaret nò, ma la scappa de man, ghe la foo nò a tegnilla!

Gino - Pòr nan, te seet inscì debol?

Tògn - Car el mè amis, ogni dì che passa m’infiacchisi semper pussee!

Lucia - (mordendosi le labbra) Eggià! El scior Tògn el diventa tutt i di pussee debol (andandosene con i pantaloni puliti) Malattia grave, la soa! (a Tògn) On dì o l’alter ghe la spieghi mi! Grave!!!

Tògn -Esaurimento!

Lucia - Nò, sovraccarico; da lùnga vedovanza: hoo indovinaa? Lù l’è on gran carna de còll! (ed entra nèlla camera di Gino)

Tògn - Che balossona che l’è, quèlla lì!

Gino - E ti che malizios!

Tògn - Chiamala malizia!! Però t’hee faa ben: quèlla l’è la dònna che va ben per ti! (e nell’appoggiare il bastone in un angolo, questo cade) T’hee vist? El sta minga su!

Gino - Adèss el troo in de l’ort e el doperi de imbroccà i tomates! Inscì t’el vedaret s’el stà minga drizz!

Tògn - E adèss scoltomm mi, se son vegnuu chì l’è staa per evità on mezz scandal (piano) T’el see chi gh’è rivaa ier sera in paes?

Gino - Chi?

Tògn- E’ rivaaa tò nevod!

Gino - Mè nevod? E se l’è vegnuu a fà?

Tògn - Per forza: ti te  vee pù a Milan e lù l’è vegnuu a trovatt!

Gino - Ch’el vegna pur!... per mi.... Ma capissi nò perchè l’è minga vegnuu dirèttament chi! Gh’è on quaicòss che va nò? Adèss ghe mandi minga puntualmente quanto èmm stabilii?

Tògn - Ah! Se l’è per quest, el gh’ha propri nient de di! Par quasi che ghe sia on quaivun che tutt i mes el te ricòrda la scadenza.

Gino - E in anticip!!! Adèss ghe i mandi semper in anticip, t’hee capii?

Tògn - E chi te dis on quaicòss?

Gino - E allora perchè l’è minga vegnuu dirèttament chi?

Tògn - L’avrà vorsuu fà come foo mi quand vegni chi in de ti. Prima de vegni denter: “bumm!” Perchè l’è minga educazion compari in cà di alter quand nissun te spètta! Se podariss disturbà, interromp on quai còlloquio important: per cui, l’è mei preannunciass. Ed ecco el perchè mi vegni chi cont el baston.

         “bumm” (si scuote come sorperso) “Chi l’è?” “Son mi. Se pò?” “Avanti, avanti”!

Gino - Quanto te see stupid!!!

Tògn - Ma, scusa, quand l’è arrivaa tò nevod l’avarà dii: “La ghe sarà ancamò la mia camera, in cà del zio? El gh’avarà minga miss on quaivun d’alter a dormì?”

Gino - Si! Hoo dovuu mèttigh la Lucia!... E con quest?... Siccome hoo dovuu ciappà on’altra dònna de servizi, doe la casciavi la Lucia?

Tògn - E ti te l’hee missa in de la camera visin a la toa?

Gino - Ghe n’hoo minga d’alter! Se de nò dovevi fa sgombrà el spazzacaa che l’è pien de ratt!

Tògn - Te gh’hee reson!! Ma scusom on attim: ma te gh’avevet minga trii o quatter gatt chi in gir?

Gino - Hinn vecc, bacucch, ormai hinn in pension.

Tògn - Ah, gia! Gatt pensionaa: infatti me par d’avei vist al 5 del mes a la posta a toeu la pension!

Gino (stando allo scherzo) I compagni mi per compassion!

Tògn - Te fee benoni! E allora vialter dormì tutti chi al pian terra.

Gino - Lee de là e mi de chì. Con demezz sto salon. L’è minga assee?

Tògn - Fin troppo! E poeu, s’el fuss minga assee, gh’è chi, per vigilà, anca (cercandolo).... si ....gh’è..... o almen gh’era.... el ritratt! L’è cont i gatt? In pension anca lù?

Gino - (stizzito) L’hoo mandà a riparà, perchè s’è rott el veder!

Tògn - Ma mi el sospèttavi che l’avariss faa ona brutta fin!

Gino - Te see pussee zabètton ti che ona slandra de Brescia!

Tògn - E perchè? Ma se l’è inscì natural, quel che t’è capitaa!! Se poeu ti te voeuret salvatt dal sabèttamento tipico fèmminile, occio ai donn, sopratutt a quei che doveva salvatt e consolatt!! Hinn staa lor che, perduda la partida, gh’hann faa savè a tò nevod che ti t’hee trovaa chi te suga i lacrim da i oeucc e i danee dal portafoeuj, quei stess danee che on dì o l’alter sarann del Carlètto!

Gino (nero) Dò loeuggi! Ma m’hann ciappaa mi per on rembambii e la Lucia per una sanguètta?

Tògn - Hinn dò pover donn cont i oeucc stoppaa de l’invidia: ecco perchè gh’hann scritt al tò nevod de vegni chi a stà con ti, se de nò bonanòtt: el resterà lì cont ona man davanti e voeuna dedree!

Gino -Vegnì a stà chi?

Tògn - El ven chi apposta! Siccome ti te seet triste e lacrimoso...

Gino - Ma mi adèss son content: son quasi alegher!

Tògn - Ah! Finalment!!!!

Gino - Se te voeuret di?

Tògn - Ti te l’hee confessaa!!

Gino - Ma mi gh’hoo nò el diritto de sentimm on poo su?

Tògn - E chi te dis on quaicòss?

Gino - Hoo minga patii assee?

Tògn - Fin tropp.

Gino - E chi son mi, per dovè soffrì ancamò?

Tògn - Vun come i alter!

Gino - Donca....

Tògn - Donca....

Gino - Donca .....

Tògn - Trii conchitt fann ona conca!!!!

SCENA IV°

Ugo e dètti, poi Carlètto

Ugo - (dalla comune) Scior padron, gh’è chi el sò nevod!

Gino - Doe l’è?

Ugo - L’hoo faa entrà in giardin, perchè l’è minga de per lù.

Tògn - (subito) L’è chi cont on sò amis! Su, donca, fall vegni avanti!

Gino - Si, fall pur vegnì avanti.... (ridendo) Ah, ah, ah!... L’è mei ch’el veda cont i sò

           oeucc se mi sont triste e lacrimoso come gh’hann riferii! E ch’el veda anca se

           mi gh’hoo bisògn d’on qualcuno che mi sollevi il morale e non mi lasci solo. La compagnia mi me la catti foeura de per mi, come voeuri e quand voeuri.

Ugo - Bravo, scior padrom! Che la catta foeura lù!... Mi voo a ciamall! (tra se) Quest chi ghe n’ha minga assee de la Lucia, ne voeur on’altra! (Via)

Gino - (passeggiando) Ah, ah, ah!... Ma varda ti che ròbba! On invalid! M’hann ciappaa per on invalid!... Gh’è propri de morì del rid!

Tògn - Stagh attent, che se te ridet tropp, el te ciapparà per matt!

Gino - (c..s.) Mej.

Tògn - Pesg, disi mi! Perchè, se ghe passa per el coo che ti te faghet ona quai mattada, el te se piassa visin e el va via pù!

Gino - Dimm allora ti come devi comportass: se piangi foo mal, se ridi foo pesg... Se devi fà??

Tògn - Te devet vess te stess, punto e basta! Oh, Tel chì!

Carlètto (dalla comune e andando incontro a Gino, con ansia) Bon dì, zio, bon dì! Come la va, èh? Come andèmm?

Gino - Benone, la va!!! Come la dev anda?... Ma te me diset che ball t’hann cascià? Còssa t’hann scritt? Voeuri savell!!!!

Carlètto - Ma allora.... meno mal: podi tirà el fiaa! (vedendolo) Anca lù chi, scior Tògn?

Tògn - Alter che! Son chi per mèttes d’accòrd de andà a giogà ai bocc!

Gino - E cont ona bògia de 27 chili!

Carlètto - E allora, se l’è inscì, m’hann propri cascià di gran ball!

Gino - Bagoll!!!

Tògn - Bon de fà boeuj!

Carlètto - Però, siccome t’avevi pù vist vegnì a Milan....

Gino - E se mi adèss sto benone chi, in cà mia?

Carlètto - Tant mej per ti, figurètt!

Tògn - Ma guardel in faccia! El te par on òmm afflitto, quel li? On òmm accasciato dal dolore?

Gino - Nò, adasi, on moment! Se l’è per quell, anca se, inscì, in on prim moment, parariss nò, invece, si bèh... invece...

Carlètto - Invece cosa?

Gino (sospirando) Èheèh!... Te capissarètt...

Carlètto - Se gh’hoo de capì còssa?

Tògn - Oh, mi l’è tanto temp che l’hoo capii!

Gino - Mi disi domà quest: pò sembrà, in apparenza, ona certa ròbba, ma, car el mè nevod, certi dolor resten, se cancellen pù: te resten incòllaa in fond al coeur!

Carlètto - Andèmm, andèmm zio! A sto mond bisogna fass coragg! Ma adèss hoo capii. A vedètt par ona ròbba, mentre sott sotta, l’è tutt el contrari! Allora quell che m’hann scritt l’era vera! E siccome l’è quest che mi vedi, vorarà di che mi stoo chi fin quand....

Gino (spaventato) Ma nò, nò, l’è minga el caso... voeuri di che...

Tògn - El voreva di quel che l’è minga bon de di nanca lù. El to zio el traversa quel moment critich che tutt i vedov passen, e cioè, quand, miss de front al mond el sa pù come regolass. el voraria seguità a piang, ma el ghe riess pù; el voraria sbatt i ali on’altra vòlta ma el gh’ha paura... si paura!

Carlètto - Sbatt i ali?!?... Ti te vorarissètt...

Gino - Ma dagh minga a trà a quel pistola chi! Oramai son soll e intendi restaa de per mi; e intorna a mi ghe voeuri pù nissun Capii??? Nissun.

SCENA V°

Lucia e dètti.

Lucia - (entra dalla Comune con in mano un cappello: guardandolo non si accorge degli altri) Se te m’hee dii, Gino? Che te voeuret regalagh al giardinier quell cappell chi?

Gino - (cerca di avvertirla con un colpo di tosse) Èheèhèmm!

Carlètto - (girandosi a mezza voce) Benone.

Lucia (tra se) Prima o dòpo el doveva scappamm el ti cont on quai vun present! (poi tranquilla si mètte a sistemare il cappello) Oh scior Carlètto, ben arrivaa! Come el sta?

Carlètto - Minga mal, e ti?.... Cioè, e vialter? (e guarda lei e lo zio, sorridendo)

Lucia - Ben, anzi, grazie al ciel, benone!

Gino - (imbarazzato si gira e fa finta di sistemare la cravatta)

Lucia - E inscì lù l’è vegnuu de Milan fin chi a ciappà ona boccada d’aria? L’ha faa propri ben, benone!!

Carlètto - Nò, Lucia, l’è nò per l’aria.

Lucia - Allora indovini de per mi: l’è vegnuu perchè gh’è staa chi l’ha faa corr! Gh’hoo reson?

Carlètto - In pieno. Propri inscì; m’hann scritt che chi a la fattoria....

Lucia - Borla giò el mond e lù l’è cors subit! L’avaria giuraa!! Ma ch’el me disa on poo: lù l’ha ricevuu puntualment el sò mensil, cioè quel che sò zio ghe manda?

Carlètto - Se l’è per quell...

Tògn - Anca pussee, se l’è per quell;  me l’ha dii a mi: “El  zio l’ha slargaa i cordoni!”

Gino - Cosa? Cosa? Che slargaa e strengiuu! Chi gh’haa mandaa pussee?

Lucia - Ma che pussee!! I danee i hoo semper spedii mi e gh’hoo semper mandaa quel che ghe se spètta!

Tògn - (a Carlètto) Propri inscì, e ti te dovarisset savell mei di alter!

Carlètto - El soo de sicur... E se l’è inscì (a Lucia) te ringrazi!

Lucia - L’è sò zio ch’el dev ringrazià, minga mI! Se ghe entri mi?

Gino - Hoo capii, hoo capii: lee la ghe entra nò, ma stagh attent....

Lucia - Ch’el lassa che parli mi, el voeur trà all’ari amò on quaicòss? Lù, scior Carlètto, se da temp l’ha semper ricevuu regolarment tutt i sò danee, el voeur di che se la fattoria l’è adree a andà a ramengo, la va con class o nò? Adèss mi riessi nò a immaginà còssa sariss success se fudess entraa chì voeuna de chi dò là. Disi ben, scior Tògn?

Tògn - Te parlet come on liber stampaa!

Lucia - (a Carlètto) Ghe le disa, donca, scior Carlètto, a quei che l’hann faa vegnii de corsa in fin chì! Chissà se con lor lù l’avariss ricevuu cont i vaglia el sò (marcato) precis mensil! Mah!... E adèss voo giò in giardin per portagh al giardinier sto cappell che sò zio el gh’ha promiss fin da la sèttimana passada.

Gino - Mi me recòrdi nò; e poeu, el me par ammò bon!

Lucia - Me ricòrdi mi e l’è assee! (va p.p.)

Carlètto - (fermandola) Scusom, aspètta....

Lucia - Se gh’è? Le voeur lù? El ghe sarà largh. El ved nò che crapon?

Carlètto - Nò... ma...

Lucia - (sorridendo) Ch’el me lassa andà, se vedom dòpo; hoo vist da la finestra che gh’è el giardinier che l’è tutt in truscia per fagh vedè la serra a ona bèlla signorina.... La dev vess ona modèlla de Milan, se ved dal tipo. Eggià, quèlla lì l’è ona modèlla de sicur, perchè l’è vestita con troppa class e signorilità!

Tògn - (tra se) Balossona! Se l’aveva lassada foeura per minga fà vedè che l’aveva portada adree, adèss l’è a moeuj! Ah, ah ah! (ride)

Gino - (raddrizzandosi, tra se) Ona modèlla de Milan?

Lucia - Voo e vegni (piano a Carlètto) Calma e gess!! (via)

Gino - Eggià! (e viene sul davanti a destra lanciando occhiatacce al nipote)

Carlètto - Eggià! (stessa scena a sinistra)

Tògn - (tra se) Tei chi oeui! Vun contra l’alter! E come se guarden de brutt! Adèss voeuri divertimm on poo a vedè come la va a fini! (e si mètte a cavalcioni di una sedia tra di loro)

Gino - (tra se) El porta chì la modèlla, in cà mia; senza coscienza!

Carlètto - (tra se) El gh’ha propri nient de dimm: l’è pesg lù de mi!

Gino (dòpo che si sono scrutati a lùngo, a denti strètti) Bravo! Bravo Nevod!

Carlètto - E mi disaroo: bravo zio! Si, perchè quand rivi e senti che in quèlla cà chi doe ti te vivet de par ti gh’è chi te da del ti...

Tògn - Carlètto el gh’ha reson!

Gino - E allora mi, quand vedi che ti te gh’hee la faccia de palta de menamela chì, in cà mia!

Tògn - El gh’ha reson anca el zio!

Carlètto - Ma mi sont giovin!

Gino - E mi sont on.....!

Tògn - Vedov, vedovo inconsolabile (tra se) Se fa per di!

Gino - (tentennando) Ahaaaah! Nevod, nevod, nevod!

Carlètto - (come lo zio) Ahaahaah! zio, zio, zio!

Tògn - (ridendo) Ah! Ah! Ah! L’è inutil che menov su el coo: il più puro e casto sono io... si mi, el pussee carna de còll.

SCENA VI°

Lucia - Lidia e dètti

Lucia - (entrando con Lidia, a Carlètto) Lù, perchè l’ha lassada de per lee? Che la vegna avanti, che diamin! Gh’è minga chi el diavol, le sa?

Lidia - (appare timida, elegante e con dei fiori freschi in grembo, inchinandosi a Tògn) Signor Gino...lei mi perdonerà....

Tògn - (subito) Che la me scusa, bèlla popola, ma purtròpp el scior Gino son minga mi! Tel là!

Lidia - Mi scusi, mi scusi tanto! 

Tògn - Ma nò, gh’è nient de scusà! E poeu (e forma gruppo con le due donne)

Carlètto (avvicinandosi allo zio, adagio) Porta pazienza, zio, ma mi gh’avevi dii de spèttam de foeura!

Gino - E mi a quell’altra gh’avevi minga ordinaa de minga fass vedè?

Carlètto - Ma come se fa? Hinn donn!!!

Gino - Ecco: l’è propri quel che disi semper mi: come se fa?

Carlètto - Ti te capissarètt... anca mi son giovin....

Gino - E mi?.... cioè.... si, insòmma.... anca mi....

Carlètto - Ma ti te see minga vecc!

Gino - Nò, èh? Perchè, chissà anca ti còssa t’averet pensaa quand t’hann scritt che...

Carlètto - Ma zio!!! Che diritto gh’hoo mi de sindacà quel che te fee ti?

Gino - Si, d’accòrd, però, t’el set, dispias...

Carlètto - Ma puttòst ti te podarisset dimm...

Gino - Ma nanca per sogn!! Ti te see pù on fiolin e quindi te podet fà come te voeuret. Anzi, scolta, adèss che l’hoo vista e siccome soo anca che l’è ona brava tosa, che la lavora e che te ghe voeur ben, te disi che mi ghe n’hoo piasè!

Carlètto - E mi per ti! Almen soo che el me ziètto l’è minga de per lù e che gh’è on quaivun che le guarda, che le cura e che ghe ròbba men di alter!

Gino - (guardando) La gh’ha on bel faccin la toa... la toa?...

Carlètto - Lidia, la se ciama Lidia!

Gino - Propri bellina!

Carlètto - Perchè? La Lucia l’è pòcch simpatica? Tutti i vòlt che la rivedi, mi...

Gino - Quand l’è che te partissètt? (continuano fra di loro)

Tògn - (seguendo i due con la coda dell’occhio, adagio) Signore, ho il piacere di annunziarvi che, invece che pentirsi dei loro peccati, i due poveri peccatori si congratulano a vicenda per le loro malefatte!

Lidia - (sollevata) Oh, meno male!... Perchè io avevo una gran paura...

Lucia - Mi nò, mai avuda! Male non fare, paura non avere! Numm ghe fèmm del maa a on quaivun?

Lidia - Non mi sembra!

Tògn - Domandéghel on poo a la Lia e a quèlla slandra de sò mader!

SCENA ULTIMA

Ugo e dètti

Ugo - (entra dalla comune, indossa un’antica livrea ed è sorridente) Signori, la colazione è servita!

Tògn - L’antica livrea dei Mazzacurati?!?

Gino (piano a Lucia) Ti te corrètt tropp!

Lucia (piano a lùi) Bisogna vedè chi ha corruu pussee!.... (agli altri) A tavola! Èmm preparaa sotto el gazebo!

Carlètto (presentandogli Lidia perchè le offra il braccio) Zio!

Gino (stesso gioco con Lucia) Oeui, nevod, accomodes!

Tògn - (accomiatandosi) Bèh! Buon appetito!

Lucia (fermandolo) Hoo faa preparà la tavola per cinqu, el sa! E con la livrea dei Mazzacurati!!!

Tògn - (porgendo il bastone a Ugo) Allora.... e allora mi disarmi e te regali   el materiale bellico! Da incoeu se pò andà e vegnì senza preavvisi! Disi ben?! Perchè se sa che: chi moeur va in su l’assa............ e chi viv se la spassa!!!!

Tutti - Ah, ah, ah! (risata generale e veloce la tela)

FINE

N.B. QUESTA COMMEDIA E’ TUTELATA DALLA S.I.A.E.