I figghi i Niddu

Stampa questo copione

“I FIGGHI I NUDDU”

 


Commedia

in due atti


di

 


Francesco Chianese

I FIGGHI I NUDDU

 
 


                                                                 Come

ANNA:

MARIA:

ANGELA:

Altri bimbi:

 

Bambini

 
 

 


“I FIGGHI I NUDDU”

PRIMO ATTO

SCENA 1

(Sulla scena tre panchine- una centrale e le altre due di lato- a voler rappresentare una villa comunale. Da poco hanno aperto nelle vicinanze una casa d’accoglienza per bambini senza genitori e/o poveri , e in questa villa i bambini ci vengono spesso per giocare)

(Vi sono dei bambini che giocano… entrano in scena Bartolo e Luca. Luca ha un giornale in mano. Bartolo caccia i bambini che si allontano uscendo dalla scena)

BARTOLO: Da quannu apreru sta casa pi carusi… zumma sta speci di orfanotrofiu… cà finiu a

 paci. Non si capisci chiù nenti. Sunnu sempri ta sti pedi, pedi…

LUCA: Matri chi si  esageratu… i carusi hannu aviri modu di giucari, no?

BARTOLO: E proprio cà l’hanna fari? Propriu davanti a me casa?

LUCA: Vidi chi non sunnu davanti a to casa… sunnu intra  a villa comunali

BARTOLO: Sì, ma si duna u casu chi a me casa è a mancu deci metri i cà.-  Fannu tantu di du

 baccanu chi si senti purru si staiu chi finestri chiusi.

Prima mi viniunu sti tizi…., ca c’era u Paradisu…. Iò, non finia mancu i manciari chi subutu mi ni vinia cà e mi sittava ta sta panchina, e cu mia vinia purru me mugghieri….- C’era na paci, un silenziu… si sintiunu sulu l’aceddi cantari….  Ou, purru all’aceddi ci ficiru chianari…  tantu chi alcuni si trasfireru altrove e autri, inveci ristaru cà, ma pì protesta non cantunu chiù.

LUCA: Iddi almenu fannu na protesta silenziosa, tu inveci non fa chi parrari e a vanvera…

BARTOLO: Si, si tu ci schezzi è inveci a cosa è gravi…. Me mugghieri, per esempio,  da quannu ci

sunnu sti carusi , ta sta panchina non s’à volutu sittari mancu p’un sulu minutu… e così passa u tempu sempre davanti o televisori… e cu volumi beddu fotti, in modu di  non sentiri i buci i sti picciriddi  

LUCA: Bhè, a to mugghieri a capisciu… Cettu chi non è facili  pi idda… vaddari, sentiri a tutti sti

carusi senza pinzari chi… propriu idda non potti e non po’ aviri figghi …

           

BARTOLO: Oramai non ni parra chiù… ma sugnu convinto chi ci pensa continuamenti. 

Non cridiri chi non ci penzu purru io a chistu…. Ma idda a pigghiò ancora peggio i mia. Non supporta l’idea chi pi coppa so…. iò non potti aviri u figghiu ch’è sempri desideratu…., un beddu masculeddu.

LUCA: Ma comu faciti a essiri così sicuri chi è idda a non putiri aviri figghi e non tu.

BARTOLO: Quannu n’accuggemmu chi non c’era nenti i fari, io non vulia chi si sapissi di cu iera a

causa, Concetta però insistiu a vulirlu sapiri e così ni ficimu tutti l’analisi

LUCA: E ad essiri sterili risultò proriu idda, to mugghieri…

BARTOLO: E sapissi comu a pigghiò??? Mi vulia lassari… dicia ch’era pu me beni… chi io non

meritava na fimmina comu idda. Picchì na fimmina chi non po’ parturiri non è bona a nenti, mancu a fari di mugghieri

LUCA: Ma vò diri, mai ci pinzastu ad adottari un picciriddu? Non sunnu cettu i soddi chiddi chi vi

mancunu.

BARTOLO: Picchì chi è un problema di soddi? Fu a prima cosa chi ci dissi, chidda di pigghiarni un

picciriddu. Mi rispuniu chi idda voli un figghiu, u voli cu tuttu u cori, ma avi a ghiessiri du nostru stissu sangu e no un estraneu chi non si sapi cu è  so patri…  Non ni voli intra a casa di sti “figghi i nuddu”: così i chiama idda. Figghi i nuddu.

LUCA: (vede in lontananza Concetta) Mutu Bartulu…. Mutu chi st’arrivannu to mugghieri…

SCENA 2

(In scena appare Concetta con alcune borse per la spesa in mano)

CONCETTA: (al marito) Mu magginava ch’eri cà…

BARTOLO: Posa sti buzzi e settiti na picca cà cu niautri

CONCETTA: Cu tutti i cosi chi aiu i fari… e poi, u sa chi cà non ma passu chiù…

LUCA: E comu mai, signora Concetta?

CONCETTA: Comu mai??? Picchì, si po’ stari tranquilli cà cu tutti sti carusi chi bazzucunu stu

postu?

LUCA: (facendo finta di niente) Ma quali carusi? Si riferisci a chiddi chi stanno giuocannu da via?

 (non si vedono)

CONCETTA: Proprio a iddi mi riferisciu… sunnu na cosa insopportabili… sempri ittati cà,…

fannu buci, si sciariunu…. Non si po’ chiù mancu ripusari…

SCENA 3

(mentre parla una palla rotola verso di loro e finisce fra i piedi di Concetta. Tre bambine si avvicinano per riprenderla.  Concetta prende la palla fra le mani)

CONCETTA: (seccatissima) A viditi cu sunnu…. E si inveci di essiri na palla era na petra? E si

inveci di rotolari a tiravunu pì l’aria e mi cadia ta testa? E si io era sula e nuddu   mi putia puttari o spidali? Chi facia?… muria dissanguata!!!… capistu cu sunnu? Sunnu piccoli diliguenti assassini…. Chisti sunnu….

ANNA: Signora, m’ava scusari… niautri non giucamu chi petri, sulu ca palla. Chi fa na duna  pi

 cortesia?

BARTOLO: Concetta, fozza dacci sta palla, così si ni vannu

CONCETTA: E unni è chi si ni vannu? Chisti cà restunu a fari dannu. Iò quasi, quasi cià scoppiu

 sta palla

LUCA: Ma cià dessi… non ci fannu pena?

MARIA: Pi favori signora, ni dassi a palla e niautri nannamu a giucari chiù pi da via, unni non

 distubbamu a nuddu-

CONCETTA: E inveci distubbati purru si siti chiù pi da via. Basta a sula vostra presenza pi

 disturbari

ANGELA: Ma a lei chi disturbu ci damu?

CONCETTA: Viautri non mu dati sulu a mia u distubbu… viautri siti disturbanti naturali….

 Disturbatori della  quiete pubblica

LUCA: (cercando di mettere pace) Bonu figghioli chi ora a  signora vi duna a palla… Idda

 schezza….. Com’è chi vi chiamati?

CONCETTA: picchì chi hannu un nomi?

ANGELA: Cettu chi l’avemu…. Io mi chiamo Angela come gli Angeli che stanno in cielo

MARIA: Io mi chiamo Maria come la Madonna

ANNA: ed io Anna come la mamma della Madonna

LUCA: Complimenti…. Avete proprio dei bei nomi

CONCETTA: Hannu i nomi chi ci affibbiaru ta stu speci i cunventu… Cettu chi non ci putiunu

 mettiri i nomi di so nonni, si non sannu mancu chiddu di so patri… sti poveri figghi i nuddu

MARIA: Niautri non semu figghi i nuddu… niautri i genitori l’aviumu…..

Me patri facia u carabinieri e me mamma…. maestra i scola. Poi un ghionnu ci fu un incidenti d’auto… e ora non ci sunnu chiù.

ANGELA: Me patri, invece, era un avvocato famoso e me…. matri dottoressa. Me mamma cadiu

malata di na brutta malattia e muriu, me patri pa disperazioni si ittò sutta un treno

ANNA: Invece me patri era impiegato ta na banca e me mamma puru… ta stissa banca. Ci fu na

 rapina…. i ladri spararu e iddi…

BARTOLO: …Bonu figghiuleddi, non cuntati chiù nenti chi mi facistu commuoviri… Concetta,

dacci sta palla.

CONCETTA: Va bene, va… cà c’è, u palluni (lo da ad Anna) Ma a mia non mi facistu commuoviri.

Iò u cori duru l’aiu… e si purru non siti figghi i nuddu… siti sempri diliguenti casinari..

LUCA: (A Maria) Non ci badati….  E così, to patri faciva u carabinieri….

MARIA: No,  pompiere

BARTOLO: Ma non dicisti carabinieri?

ANNA: S’eppa sbagghiari

CONCETTA: Ah, si sbagghio? E allura dimmillu tu chiddu chi facia to patri

ANNA: Me patri, me patri… era… era ( le altre cercano di suggerire) pru..fissuri

BARTOLO: E u bancariu cu era allura?

CONCETTA: (ad Angela) E tu allura, tu ricordi tu chiddu chi facia to patri?

ANGELA: Cettu chi mu ricordu… facia l’avvocatu e me matri… e me matri…

LUCA: (pacato) Bambine, picchì vi vintastu tutti i cosi?

ANGELA: E chi aviumu a fari? Veru è, no sapemu cu sunnu i nostri genitori né chiddu chi faciunu,

 ne canuscemmu. Ma te nostri cori, te nostri pinzeri esistono piddavveru e niautri i videmu e

purru ci paramu ca nostra immaginazioni.… Un ghiornu sunnu avvocati, nautru iornu muraturi. Si. Si, esistunu… puru si te nostri sogni e lei Signora, non ni po’ chiamari figghi i nuddu, picchì niautri non semu figghi i nuddu … semu … semu…. figghi du Signori (e scappano uscendo di scena)

CONCETTA: (dopo un po’ di silenzio) Sunnu purru rispusteri…

LUCA: Signora, a verità… ma non ci fannu na picca i pena….

CONCETTA: Cettu chi mi fannu pena… Ma iò chi ci pozzu fari… Già fazzu abbastanza pi iddi.

C’è fattu aviri coperti… roba i manciari, come pasta, salsa e tanti autri cosi… E pì Natali ci portu u panettoni e tanti cosi boni…. Ch’è fari di chiù?

LUCA: Io cridu chi iddi avissuru prifirutu na carizza ogni tantu…. E na parola d’affetto.

BARTOLO: A cosa chi chiù mi duna fastidiu è sapiri chi cetti carusi non sunnu orfani, ma

abbandonati di so genitori.

CONCETTA: Propriu così, abbandonati come si fussuru cani. A mia u Signori non mi desi

figghi….. a sti cristiani inveci… sti cristiani …. Basta così… io vicinu a casa (al marito) Chi fa tu, veni cu mia????

BARTOLO: Si, si… vegnu cu tia… ni videmu poi, ti salutu Luca.

LUCA: arrivederci

(i due escono di scena)

SCENA 4

(Luca si siede sulla panchina, apre il giornale e lo comincia a leggere mentre da lontano si sentono voci di bimbi che giocano)

(entrano in scena Gregorio e Adele)

GREGORIO: (a Luca) chi potta di interessanti u giornali?

LUCA: (guarda i nuovi arrivati) a ciao, sittativi na picca

ADELE: Comu mai sulu, sulittu?

LUCA: Veramenti fino a un mumentu fa era cu Bartolo e so mugghieri…

ADELE: So mugghieri cà? E comu mai? Non ci ni dununu chiù fastidiu i picciriddi?

LUCA: E comu? Non mi ni parrari…

GREGORIO: Sempri sul sentiero di guerra cu di povirazzi, vero?

ADELE: Sti cristiani, ne capisciu, hannu tanti di soddi chi non sannu unni l’hanna a mettiri, eppuri,

sunnu sempri incazzati.

LUCA: Non sempri i soddi fannu miraculi. E ti pozzu garantiri chi purru iddi annu problemi, e

beddi rossi…

GREGORIO: Vulissi a vidiri cu non avi problemi di sti tempi….

LUCA: Viautri chi problemi aviti? Siti giovani, beddi… anzi a cu spittati vi mi maritati?

GREGORIO: e cun quali soddi? E unni è c’avissimu annari a stari, unni mia o unni idda? A parti

chi nostri casi sunnu piccitti… non esiste propria…., niautri vulemu a nostra libertà….  Ma  non avemu né occhi pi cianciri, né soddi minni maritamu…

ADELE: u vidi… purru niautri avemu problemi…

LUCA: Mi parri, chi l’unucu chi non avi problemi sugnu sulu iò…. E chistu sta divintannu un

problema

GREGORIO: E si tinissi sti problemi… è a megghiu cosa. (si alzano) Vabbò niautri continuamo a

passiari… lei continuassi a leggiri….

(ed escono, Luca riapre il giornale e legge)

LUCA: (guardando il giornale) Miscula… sì.. sì… sta notizia mi fici veniri n’idea geniale…. Ora

vaiu unni Bartolo e c’inni parru…. (ed esce)

SCENA 5

(la scena è vuota per qualche secondo… poi entrano dei bambini…. Prima uno  si affaccia tipo volersi accertare della presenza di qualcuno)

MARIA: Nuddu c’è…. Putiti veniri tutti…

(entrano i bimbi)

ANGELA: Vò diri ti fissasti cu stu postu.. comu sa villa fussi tutta cà.

MARIA: Chistu è u postu megghiu unni c’è chiù largu e putemu giucari megghiu

ANNA: Comunque oramai semu ca e giuocamo cà….. Forza carusi… sittattivi tutti cà… davanti a

sta panchina…

(i bimbi si siedono dando le spalle al pubblico, facendo una specie di mezza luna davanti alla panchina centrale.)

ANNA: Si mette al centro alzata… forza come giochiamo?

MARIA: picchì non giucamu a 1,2,3 stella

I BIMBI. (tutti): si, si ….

ANNA: Va bene alzativi… chi cuminciu iò a mettirmi sutta

(si schierano Anna da una parte laterale del palco e gli altri bimbi dall’altra parte)

ANNA: ( si gira e si mette le mani davanti agli occhi) 1,2,3 stella (e si gira)

(i bimbi giocano… il gioco dura alcuna minuti)

SCENA 6

(entrano in scena Luca, Bartolo e la moglie) (i bimbi nel vederli fuggono via)

BARTOLO: Iò non capì nenti di chiddu chi mi dicisti tu…

LUCA: Eppuru è semplici e ti dicu chi già l’hannu fattu… pensatici bonu…

CONCETTA: in effetti purru iò l’è sintutu stu fattu…. Ma semu sicuri cu putemu fari purru niautri?

LUCA: cettu… o almenu cridu di sì…

CONCETTA: A vidi chi u dubbiu l’avi purru lei?

LUCA: Ma chi c’entra… chi sugnu dutturi iò? E poi, parramuni chiaru… senza offesa, vi piacessi

aviri un figghiu?

BARTOLO: Cettu… chi ni piacessi ma….

CONCETTA: ….Vulemu un figghiu nostru … no unu di chiddi a scatola chiusa…

LUCA: E allura a soluzioni è sulu chidda. Zumma, si lei sapissi chi so marito avi un figghiu chi fici

cu n’autra ? lei chi facissi da creatura?

CONCETTA: A creatura ma tinissi …. Ma non prima di scipparici l’occhi a me maritu e ‘mmazzari

a da fitusa fimmina…

 

LUCA: E si inveci sapissi chi stu figghiu…. So marito no fici…  facennu di cosi cu na fimmina?

BARTOLO: Basta, stu discussu non mi sta piacennu chiù… Io sugnu masculu e di cosi i fazzu sulu

chi fimmini (guarda la moglie) i facissi… ma ne fazzu….

CONCETTA: Mutu tu chi ancora non ha caputu nenti… Luca sta parranno du … -comu si chiama-

 …concepimento ta provetta…

BARTOLO: Comu? Concepimento ta chi? ????

CONCETTA: Ta provetta…

BARTOLO: provetta? E chi voli diri ?

CONCETTA: Voli diri, voli diri…. Ciù spegassi lei chiddu chi voli diri.

LUCA: comu si fussi facili…. Zumma. E’ risaputu chi tu i figghi i po aviri, ma to mugghieri no…

Quindi, si metti u to semi ta na provetta che a sua volta si metti intra a l’ovu di na fimmina

chi po’ parturiri e…chista… resta incinta…. Così quannu nasci u picciriddu si sapi di cu è

figghiu… e siti tutti contenti…

BARTOLO: Miscula ch’è complicatu… Io sugnu tradizionali e secunnu mia è megghiu evitari tuttu

stu giru di cosi strani come a provetta, l’ovu… io ignoranti sugnu… facemu i cosi

naturalmente e cu si visti, si visti… chi ni diciti?

CONCETTA: Iò dicu mi ti rigetti i sensi o ti sceppu l’occhi… Facennu u bastasi ca provetta….

U carusu chi nasci eni figghiu to, a mia mi sta beni, e io… tuttalchiù diventu  cornuta o 10%. Facennulu in modo naturali, comu dici tu…. U figghiu è sempri u to, e mi sta beni o stissu… sulu chi iò diventu cornuta o 100 %. E chistu non non mi sta beni chiù…

LUCA: Allura…. Vistu chi capistu chi ni pinzati?

BARTOLO: Bhò????

CONCETTA: Ma siti sicuru chi tuttu chistu è legali?

LUCA: Veramente no… anzi mi parri di no… ma chistu non è un problema… cu na picca di soddi

tuttu diventa lecitu. Un dutturi disposto e chi ni spiega tuttu… non vi preoccupati cu trovu iò…

BARTOLO: Bravu… e a fimmina chi mi duna l’ovu, chi facisti a trovasti?

LUCA: Bhè, veramenti ancora no…. Ma purru pi chistu non c’è problema

BARTOLO: Già, è sulu na questioni di soddi…..

CONCETTA: Però, a fimmina ava a ghiessiri comu dicu io…. Bedda, giovani e forti… zumma

comu a mia…

BARTOLO: Mi raccumannu comu a idda ava a ghiessiri…. Ma dicu iò, non si po’ fari cu metudu

naturali…..

CONCETTA: Tu dugnu iò u metudu naturali… va bhò va… ora ci penzu bonu… intantu viautri

pinzati a quali fimmina ciù putemu diri… Pi soddi non ci sunnu problemi…

E si tuttu va beni… chi ni dici Bartolo… un beddu regalu ciù facemu purru all’amicu Luca

BARTOLO: E non sulu… ava ghiessiri purru u padrozzu di Battesimu

LUCA: Troppu onori pi mia…

CONCETTA: L’onori eni u nostru… comunque… io vicinu a casa chi aiu tanti cosi i fari…

BARTOLO: Io restu ca cu Luca… anzi cu compari Luca….

CONCETTA: Arriderci e buona caccia….

LUCA: Arrivederci …. Cummari

(Concetta esce di scena)

BARTOLO: Allura già accordato… farai u padrozzu di Battesimu…. Ma si tu cunviccissi me

mugghieri di fari i cosi naturalmente e non pi provetta… ti fazzu fari u padrozzu non sulu di battesimu ma purru di Cresima e testimoni o so matrimoniu….

LUCA: Si io m’azzardassi a farici na proposta i chista… idda u coddu mi scippassi e poi chi ti ni fa

d’un compari senza testa?

SCENA 7

(entrano in scena Gregorio e Adele)

GREGORIO: (a Luca) ancora ca siti? (a Bartolo) Saluti a vui signor Bartolo

BARTOLO: Buongiorno Gregorio, signorina Adele buongiorno

GREGORIO: Cettu chi ta sta villa c’è na frischizza che è na bellezza… è un piaceri stari cà

LUCA: Sunnu sti alberi chi ni fannu ombra e chi ni fannu ciauru (poi in un orecchio a Bartolo) Chi

 ti ni pari di Adele? Ciù dicemu a idda?

BARTOLO: (sempre in un orecchio) mizzica idda è propriu bedda…. Ma si sicuru chi ci staci?   

LUCA: (parlando piano) si po’ tintari e comunque hannu bisognu di soddi

GREGORIO: Forsi disturbamu? Avi na picca chi vi parrati te ricchi…

ADELE: se è così nannamu…

LUCA: No signorina… è chi Bartulu mi stava cuntannu na cosa interessanti chi vi po’ riguardari…

ADELE: Ah sì… e chi è di tantu importanti….

BARTOLO: Na cosa delicata… difficili da spiegari….

GREGORIO: Forza spiegatinnillo senza problemi

BARTOLO: Si tratta… si tratta di ova…

ADELE: Ova? Vi servunu ova?

BARTOLO: Si e no… zumma ova chi è mettiri assemi a na cosa me ta na pro… pro… com’è chi si

chiama da cosa, Luca? Ah sì, provoletta…

LUCA: Provetta, non provoletta… comunque cumminasti un macellu… facisti na gran

confusioni…

BARTOLO: Comu si fussi facili mi ci dicu a unu mi  mi presta a so zita ch’è fari un figghiu cu

idda…

GREGORIO: Chi è chi stati dicennu? Io v’è pristari a me zita ? Pezzi di depravati…

LUCA: No, Gregorio… non è comu penzi tu…

BARTOLO: Già… io na vogghiu pristata… a vogghiu vinnuta….

ADELE: Ma pi cù mi pigghiastu? Io vinnuta…. Non sacciu si mi faciti chiù schifu o pena

GREGORIO: Non vi tumpuliu picchì siti chiù ranni i mia…

LUCA: Aspetta…. Non è così… si stati calmi vi spiegu ogni cosa iò

ADELE: Forza… chi forsi è a megghiu cosa….

LUCA: Bene… Non sacciu si sapiti chi Bartulu e so mugghieri non ponnu aviri figghi

BARTOLO: Ma a cuppa non è a me…. Me mugghieri non ni po aviri, io si…

ADELE: E così u voli fari cu mia stu figghiu?

BARTOLO: Si, picchì chi c’è di mali?

GREGORIO: Io a chistu u mazzu…

LUCA: Gregoriu no sentiri… e tu Bartolu ti vo stari mutu chi scunchiuti?

ADELE: Forza continuassi chi mi staiu innervosendo sempri chiossà…

LUCA: Allura, Bartulu  po’ aviri figghi, a mugghieri no… Zumma, Gregoriu, Adeli dietro un

grosso compenso ciavissa pristari u so utero pi aviri un figghiu … ma senza fari nenti

ADELE: Sta parranno du famosu utero in affitto….

LUCA: Proprio così… non ava a fari autru chi ristari incinta senza fari nenti cu nuddu

BARTOLO: Già cu nuddu, sulu cu na provoletta

LUCA: Provetta, Bartolo… no provoletta…

GREGORIO: Capì, anzi cridu di avere capito… ma non si ni parra… o ca provetta o senza provetta,

iò non ci prestu nenti a nuddu, figuramuni a zita… e poi, vi scuddati chi stamu ton paisi piccittu? E…. pi cristiani di cà… sempri curnutu saria…

BARTOLO: Curnutu… quali curnutu… al massimu u siti o 10% comu a me mugghieri…

Certu chi si i cosi fussiru naturali… divintassi curnutu o 100% ma ci guadagnastu chiossà.

GREGORIO: (offeso) non mi interessa io non fazzu u ruffianu…

LUCA: Eppuru i soddi fussuru assai… e così vi putiti maritari… Chi ni pensi tu Adeli?

ADELE: Io penzu… chi è na pazzia… ma quantu fussi stu compensu?

LUCA: Già, Bartulu quantu fussi stu compensu?

BARTOLO: Chissacciu… quantu si duna ta sti casi?

LUCA: E chi sacciu non mi parri chi c’è na tabella prezzu… Però io diria mi ci duni

n’appartamentu unni stari, magara da casa chi ha vicinu o mari e soddi spicci…. Chissacciu cinquanta milioni di liri, vannu beni?

BARTOLO: Comu no! Sciocchezze, a casa a mari… cinquantamilioni… e chi sunnu… caramelli?

Tantu i me sunnu sti soddi…

LUCA: Ma sarà u to purru u picciriddu… e poi tu i soddi l’ha…

GREGORIO: Si, viautri mercanteggiati… non è dittu però chi ci stamu….

LUCA: Ma ci putiti pinzari…

ADELE: Va beni ci putemu pinzari… ma po essiri possibili sulu sti sta gravidanza sarà portata

luntanu di stu paisi e a spisi vostri…

BARTOLO: Chistu non è un problema…

GREGORIO: Io dicu di no… megghiu a fami chi sti vergogni

LUCA: Ma quali vergogni… i vergogni sunnu sulu chiddi chi si sannu… e niautri facemu di tuttu

picchì non si veni a sapiri nenti.

ADELE: Io dicu…. Chi ci pinzamu… dopututtu l’utero è u me e na casa e cinquanta milioni non

sunnu picca…  Va beni ci penseremo. Ora però è megghiu si nannamu…

LUCA: Si, si discurritivilla con calma e poi ni parramu attorna… Arrivederci

ADELE: Arrivederci (i due escono di scena)

LUCA: Fatta è… ti dicu ch’è fatta… Hannu bisognu di soddi e diranno di si

BARTOLO: Ma u sa chi non mi ni avia mai accuggiutu chi Adele è così bidditta?

LUCA: Megghiu così, vorrà diri chi u figghiu chi nasci… si non ni pigghia i tia,  sarà bellissimo

BARTOLO: Cettu,  si non ni pigghia i mia….. Ma, senti na cosa… non penzi chi è un peccatu chi

na bedda figghiola i chidda avi a parturiri pi mezzu di na provoletta….?

LUCA: Provetta, cretino…. No provoletta.

FINE I ATTO

 

II ATTO

SCENA 1

(Sulla scena Bartolo da solo che passeggia da una parte all’altra, pensieroso….. Entra un bambino e si siede sulla panchina)

NINO ( il bambino): Le dispiace se mi siedo qua ?

BARTOLO: A villa di tutti ieni e a panchina fa parti da villa.

NINO: Intendevo chiedere se la mia presenza la disturba.

BARTOLO: (lo guarda un po’… poi si siede accanto) e picchì m’avissa disturbari… basta chi non

parri… 

(passano dei secondi in silenzio facendo finta di ignorarsi ma incontrandosi con lo sguardo)

BARTOLO: E chi fa non parri

NINO: Veramente è stato lei a dirmi di restare in silenzio…

BARTOLO: Giustu… propriu così… (pausa) com’è chi ti chiami?

NINO: Posso rispondere o debbo restare in silenzio?

BARTOLO: Cettu chi m’ha rispunniri.. e a cu cià fici a domanda allura, visti chi ca ci semu sulu io

e tu.

NINO: Nino… Nino è il mio nome

BARTOLO: Nino…. Purru tu fa parti di du postu?

NINO: Si, diciamo che abito là dentro…

BARTOLO: allura purru tu… apparteni e…..

NINO:    ….figghi i nuddu?

BARTOLO: (imbarazzato) No… non vulia diri propriu così… zumma non vulia essiri offensivo…

u fattu è chi cà… tutti vi intennunu i stu modu…

NINO: E probabilmente è vero… siamo figli di nessuno… dimenticati da tutto e da tutti, ci

illudiamo di entrare, un giorno, a far parte di chissà quale famiglia… ci crediamo così

fermamente che in ogni persona che viene a trovarci o incontriamo per strada, crediamo che

sia quella giusta, quella che viene a prenderci, che viene per… (pausa) Poi, però, la persona va via senza degnarci di uno sguardo e allora tutto diventa triste.

BARTOLO: Ma tu… no canuscisti a to patri o a to matri?

NINO: No…. Non li ho conosciuti… non so se nemmeno se sono vivi o morti… non so niente di

loro.. e non mi interessa sapere chi sono… so soltanto che adesso sono qui…

E forse questa volta … è veramente quella giusta…

BARTOLO: Picchì… quacchi dunu è interessatu a tia?

NINO: Sembrerebbe di si… è venuta una coppia a vedermi, abbiamo parlato un po’… ci siamo

messi a scherzare… Mi sono subito piaciuti…

BARTOLO: Spero bonu pi tia… ti fazzu tanti auguri….

NINO: Grazie. Spero che sia veramente la volta buona, non credo sopporterei un’altra delusione…

( a questo punto si sente la voce di Concetta che chiama)

CONCETTA (fuori campo): Bartolo, Bartolo a unni sini

BARTOLO: (a Nino, agitato) Me mugghieri ieni, forza Nino, pi favuri vattinni, non ti fari vidiri i

me mugghieri… Però, ritorna chi ti vogghiu vidiri ancora, chi vogghiu parrari ancora cun

tia…

(Nino fa cenno di annuire, saluta con la mano e fugge via)

SCENA 2

(entra Concetta)

CONCETTA: Ah, ca eri… e unni è chi putivi essiri… sempri sittatu ca

BARTOLO: Ca mi sentu megghiu da me casa… beddu rilassatu e friscu comi i rosi…

CONCETTA: Rilassatu… comu si fussi facili cu di buci chi fannu sti picciriddi

BARTOLO: Buci… dicemu na picchicedda i rumuri… chi tuttu sommatu fannu piaceri

CONCETTA: O Bartolo… chi è ti ubriacasti? E di quannu ti fa piaceri sentiri u casini chi fannu ddi

figghi i nuddu…

BARTOLO: (alzando il tono) Concetta, ora basta… non è chiù u casu mi i chiami a stu

modu… Io cridu chi iddi già soffrunu abbastanza… senza ….. na vera famigghia…

CONCETTA: Bartolo…. Svigghia!!! Ma si sicuru chi sini propriu tu… Bartulu Gullitta, nonché me

maritu?

BARTOLO: Sogno proprio io… in carne ed ossa

CONCETTA: Lassamu peddiri va…. Parramu di cosi seri… Telefonò compari Luca, dissi chi ci

sunnu nuvità a propositu i du fattu…

BARTOLO: Di chi  du concepimento ta pro.. provetta?

CONCETTA: E allura i chi?

BARTOLO: sicuramenti dissi…. Chi non c’è nenti i fari

CONCETTA: Veramenti, io capì o cuntrariu…. E cioè chi a cosa è possibili…. E senza ricorriri a

metodi naturali , comu i chiami tu.

BARTOLO: Pazienza… vorrà diri chi m’è cuntintari di na…. Provetta…. E quannu s’ava farri sta

operazioni…

CONCETTA: Chistu ancora non l’ha dittu… dissi sulu chi a cosa si farà ta na clinica privata a

Milanu.  A figghiuledda luntanu da occhi indiscreti voli compieri u so doveri….

BARTOLO: Beddu doveri…. Cun chiddu chi ci damu… (pausa) Chistu vorrà diri ch’ema annari a

Milanu purru nui…

CONCETTA : di sti cosi non ni capisciu, non sacciu si c’è bisognu da nostra prisenza … e                    

            comunqui, dopotuttu, canciari aria pi na picca i tempu  io a trovu salutari… pichhì a tia ti

dispiaci?

BARTOLO: No, è picchì m’avissa dispiaceri… sulu chi stava pinzannu chi mi parri esageratu

arrivari finu a Milanu, a mezzu a tutti di polentoni pi fari conoscenza cu na provetta… io

tradizionali sugnu… e magari avia preferitu na bella provetta nostrana….

CONCETTA: Menomali chi tu ha sempri voglia di schirzari, purru quannu u mumentu è criticu

cumu ta stu mumentu.

BARTOLO : (pungente) Picchì, Cuncetta, è criticu… Staiu pi divinatri papà e non è ghiessiri

cuntentu ? Tu non sini contenta?

CONCETTA: Io? Cettu chi sugnu contenta!!!!

SCENA 3

(entrano in scena Luca, Gregorio ed Adele)

LUCA: Cari compari, salute a voi….

BARTOLO: Salute a tia e a tutta la compagnia…. Picchì non vi sittati, pigghiati postu… a villa di

 tutti ieni e i posti sunnu in abbondanza

(Gregorio e Adele si siedono su una panchina laterale)

CONCETTA: Veramenti… io avia prifirutu mi ni sittavunu to salottu da me casa….

BARTOLO: E picchì… ca si sta chiù frischi

GREGORIO: Signura Concetta, io sugnu daccordu cu so maritu… ca si sta beddi frischi

BARTOLO: Comu li  rosi… frischi comu i rosi….      

CONCETTA: (a Luca) Propriu ora ci stava cuntannu i nuvità chi mi dicistu vui pi telefunu, caru

            Compari

LUCA: E confermo quantu dissi prima…. A cosa è possibili anzi certa.

BARTOLO: E chistu u capì… è fari u bastasi a Milanu….. picchì ca di nostri parti non era possibili

ADELE: Signor Bartolo, io vi l’avia dittu a cosa è possibili sulu sé è luntanu e… a spisi vostri….

BARTOLO: Già a spisi nostri, menomali chi mu ricuddasti, picchì mi l’avia scurdatu….

GREGORIO: Du vostru tonu…. Mi parri di capiri chi c’è qualcosa chi non và…. Chi è vi ni

           pintistu? Oppure vi parrunu assai i cosi chi vui stissu ni offristu minni conviciti

ADELE: Sia chiaro, cinquanta milioni e a casa a mari…. Così ristammu e così ava a ghiessiri

LUCA: Bonu, Adeli, non ti biliari… chisti cristiani seri sunnu…

CONCETTA: E si ti promettemmo cinquanta milioni e a casa a mari…. Tu avrai cinquanta milioni

             e a casa a mari.

ADELE: Chiù i spisi…

BARTOLO: Chiù i spisi!  Serve altro?

CONCETTA: O Luca, quannu pensati chi po avveniri stu fattu?

LUCA: Bhè…. Non cridu chi passerà tantu tempu… già io, tramiti n’amicu,  pigghiai contatti cu na

            clinica privata…. Ora tocca a niautri stabiliri quannu u vulemu fari… chiù è rossa a busta

            chi ci damu all’amicu me, e prima cuminciamu.

BARTOLO: E c’ava a fari ca busta stu to amico… e chi c’ema a mettiri intra a busta…..

GREGORIO: Soddi…. Per oliari a cosa… zumma pi rendirla chiù veloci e sicura…

CONCETTA: E comu mai ci l’ema a dari o vostru amicu?

LUCA: Picchì è un tipu discretu e non vi fa cumpariri….

BARTOLO: Capì… niautri ema pagari e scumpariri…. Ma almenu stu figghiu u facemu?

LUCA: Cettu… allura picchì semu cà…..

ADELE: Va bo… allura è tuttu decisu… quannu vui siti pronti ni chiamati…

GREGORIO: Io, veramenti, tantu convintu non sugnu… ma si è convinta a me zita, pi mia va

              beni… Però, prima ni sbrigami e megghiu ieni pi tutti.

ADELE: (si alza) Niautri nannamu…. Prima di pattiri avemu sbrigari parecchi cosi… Sapiti,

              appena sta storia si risolvi ni maritami subutu, subutu.

CONCETTA: Bravi, auguri assaissimi….

GREGORIO: (si alza) Allura, ristamu così, quannu ci sunnu nuvità vi faciti sentiri viautri.

(escono di scena)

LUCA: A vidistu? I ficimu contenti e o stissu tempu iddi stanno pi fari felici a viautri dui…

CONCETTA: Non vidu l’ura di brazzari stu picciriddu….

BARTOLO: Purru io, non vidu l’ura (guarda l’orologio) A propositu c’ura si ficiru….

SCENA 4

(Sulla scena entrano due bambine Anna e Maria che timidamente si avvicinano a Bartolo)

ANNA: Signore, na viti a scusari ma v’avemu a dumannari na cosa.

CONCETTA: Chi vonnu soddi sti dui? Bartolo, dacci milli liri e i manni…

MARIA: Non vulemu soddi… vuliumu sulu dumandari si pi casi vidistu passari i cà un figghiolo

CONCETTA: Ca l’unici figghioli chi passunu sunnu chiddi chi stanno ta da speci i cunventu…

BARTOLO: (alla moglie) Ma lassili parrari…. (alle bambine) a cu iè chi stati ciccannu?

MARIA: Niente, sicuramenti non passò i cà…

LUCA: Ma cu iè chi avia a passari i ca…

ANNA: (guarda verso Concetta) Unu di sti figghi i nuddu… era sconvolto e scappò di cussa… e

              ora tutti u stamu ciccannu?

BARTOLO: (preoccupato) Comu si chiama stu figghiolo? C’avia, pi casu, na camicia blu?

MARIA: Si, na camicia blu…

BARTOLO: Chi si chiama Nino?

MARIA: Sì, propriu iddu ieni, ma vui u cunusciti?

CONCETTA: Già, comu fa a sapiri chi si chiama Nino, comu fa mu canusci….

BARTOLO: U canusciu e basta….   U canuscì stamattina…

LUCA: Va beni, scappò… poi si stanca e ritorna… non mi parri u casu mi ti prioccupi chiù di tantu

            di unu chi… poi…  canusci a malapena..

CONCETTA: Io vaiu a casa, (al marito con tono minaccioso) cammina veni cu mia chi te parrari

BARTOLO: Tu va io resto nautra picca cà

LUCA: Purru io minni vaiu, è un pezzu chi sugnu fora….

(ed escono di scena)

SCENA 5

(In scena le due bambine e Bartolo)

BARTOLO: Cuntatimi ogni cosa….

MARIA: Era cuntentu picchì na coppia era interessato a iddu

BARTOLO: Chistu u sacciu…

ANNA: Però, poi inveci…. Non sinni fici nenti…

MARIA: Comu sempri. E iddu ci ristò mali… appena ciù dissuru, si misi a cianciri e scappò

BARTOLO: (resta un attimo in silenzio) Annati figghioli, annati a ciccarlu… Io non mi movo di cà,

                 cu sapi avissi a passari e fatimi a sapiri quando u truvati

(le bambine escono di scena, Bartolo resta da solo in silenzio seduto con le mani davanti la faccia)

SCENA 6

(riappare la moglie)

CONCETTA: O Bartolo, ma si po sapiri chiddu chi ti sta succidennu?

BARTOLO: Io sugnu convinto chi Ninu…. Fici na pazzia rossa

CONCETTA: Bartolo, mi sta facennu divintari paccia… ma cu iè stu Ninu… chi c’entri tu cu stu

                 Figghiolu

BARTOLO: (parla guardando nel vuoto) Appena sta matina mi dissi chi finalmente s’accuggeru di

               iddu e chi avia truvatu na famigghia (pausa) Mi dissi purru chi nautra delusioni na

               suppottiria…

CONCETTA: (molto dolce) E così pensi chi…. Ma no… non ti preoccupari… sunnu cosi chi si

               diciunu … ora u  trovunu…. Anzi non cinnè mancu bisogno, picchì ritorna iddu stissu.

BARTOLO: Non è giustu illudiri sti carusi… Già i pratichi pi adottari un figghiolo sunnu longhi e

               complicati e non sempri vannu a buon fine. No, non è giustu…

(A questo punto, in scena entra la piccola Maria… alla vista di Concetta fa per andare via…Concetta se ne accorge…)

CONCETTA: (alla piccola) Aspetta, non tinna annari…..

MARIA: (si ferma… si guarda intorno) Sta parranno cu mia?

CONCETTA: Si, propriu cun tia… non ti scantari…

BARTOLO: (si alza) Ci sunnu nuvità?

MARIA: Ancora nudda….

CONCETTA: Assettiti picciridda…

MARIA: Vinni cà pi sapiri si magari… Nino avia passatu i cà… ma capì chi non è così

BARTOLO: Già… non è così…

CONCETTA: Ma e carabinieri l’avvertisto?

BARTOLO: E anche quando… iddi si non prima passunu almenu 24 uri non si movunu mu u

            ceccunu… 

SCENA 7

(Entra Luca)

LUCA: (pungente) Minzica, mu mmagginava chi eri ancora cà… eppuru sulu a ieri mi dicevi chi

             sta villa non  ti piaceva chiù… pi via du rumuru chi fannu sti figghioli…

BARTOLO: A ieri era ieri… oggi inveci i rimura chi fannu sti carusi mi piaciunu… e poi non mi

              pari chi te dari cuntu a tia…

LUCA: (sempre più pungente)A mia no… ma a to mugghieri sì… u sa chi ci dununu fastidio…

             Oppure cummari, chi è… non ci ni dununu chiù fastidiu?

MARIA: (si alza) Io forse è megghiu mi vaiu a ciccari Ninu… a nautra mezza…

BARTOLO: fammi sapiri quannu u truvati… io restu cà ad aspettare notizi….

(la bambina esce)

LUCA: Ma picchì… du figghiulu non sa ricugghiutu ancora?

CONCETTA: No… e u stanno ciccannu…

LUCA: Bà… spirami bonu pi iddu… Comunque…. Io aiu notizii da darvi…

CONCETTA: Di già?

LUCA: Mancu arrivai intra chi si misi a sunari u telefunu… era du amicu me e non v’immaginati

              chiddu chi mi dissi

BARTOLO: Chi non c’è chiù nenti i fari…

LUCA: O cuntrariu… ch’è fatta e u sapiti pi qunnu?

CONCETTA: Chissacciu… fra sei misi?               

LUCA: No cummari. A data è fissata pu quindici du misi prossimu… Non siti contenti?

CONCETTA: Cettu…. Finalmente… mi parri cent’anni… Bartolu non sini cuntentu magara tu?

BARTOLO: (molto serio)  Na Pasqua sugnu…. Picchì non si vidi?

CONCETTA: Compari Luca, l’avvisastu ad adeli e a Gregorio?

LUCA: Cettu…. I truvà pi casu… Mi dissuru chi passavunu di cà…

(A questo punto vengono quasi di corsa Anna e Maria)

MARIA: U truvaru… signor Bartolo…. U truvaru

ANNA: U purtaru cu l’ambulanza o spitali

BARTOLO: O spitali? Picchì o spitali?

ANNA: U truvaru ta riva svinutu…tuttu bagnatu ….. non si sapi si cadiu o si ittò a mari…

BARTOLO: U spitali non è luntanu… io ci vogghiu annari …..

CONCETTA: No, tu resta cà cun Luca…. Ci vaiu io o spitali…..

(Ed esce insieme alle bambine)

SCENA 8

(Vi è qualche secondo di silenzio…. Bartolo è seduto, Luca va avanti e indietro da un punto all’altro)

LUCA: Bartolo, vidi chi a cosa dispiaci purru a mia…. Sicuramenti si ripigghia… Insomma mi vu

          Scutari?

BARTOLO: Chi è chi è Scutari?

LUCA: Nenti… ti vidia così silenziosu chi mi facisti stari in pensieru….

BARTOLO: Iò… in pensiero?

LUCA: Cettu… ti vidu stranu… quasi, quasi non ti canusciu chiù….

(entrano in scena Gregorio e Adele)

ADELE: Allura, pari chi ci semu….

GREGORIO: S’a cosa sava a fari è megghiu mi si fa subutu… così ni livamu u pinzeri

LUCA: A proposito Bartulu… vidi chi pi dutturi ci vonnu nautri cinquanta milioni….

BARTOLO: Cinquanta milioni? …. Va beni poi ni parri cu me mugghieri

ADELE: A signora Cuncetta i sapi i nuvità

LUCA: I sapi ed è contenta

GREGORIO: Almenu è contenta idda… picchì u maritu mi sa chi non è propriu cuntentu

LUCA: No, non è così Gregorio, è sulu dispiaciutu… picchì unu di di orfani chi stanno ca vicinu 

           parri chi cadiu o si ittò a mari e non si sapi comu staci….

ADELE: Mamma mia…. Nuncinteddu… e unni è ora….

LUCA: O spitali…. Annò a signora Cuncetta… e niautri semu cà a spittari nuvità…

GREGORIO: Cettu chi sti cosi dispiaciunu… (cambiando il tono) Quannu è c’avissimu a ghiessiri

              a Milanu???

BARTOLO: (lo guarda in viso per un attimo, poi…) O 15 du misi entranti

ADELE: E viniti purru vui?

BARTOLO: A menu che… non si po farri pi corrispondenza u fattu ca provetta…

LUCA: Chi c’entra… cettu ca veniri purru tu… ed è u casu chi veni purru to mugghieri.

SCENA 9

(Entra Concetta)

(Vi è un attimo di silenzio, Bartolo la guarda senza chiedergli niente)

LUCA: Comu finiu… comu staci du picciriddu….

CONCETTA: (guarda Bartolo) Si ripigghiò… e appena mi vitti mi dumandò i tia…

BARTOLO: I mia? U vitti na vota sula e na vota sula ci parrai        

ADELE: Vò diri chi ci bastò mi si affeziona a lei

LUCA: Non po’ essiri… non dicemu fissarii, probabilmente ti vidia da finestra

BARTOLO: Ma comu staci, parrasti chi dutturi?

CONCETTA: E’ deboli ma non ci sunnu problemi….

LUCA: Menomali va… turnamu a niautri… Allura io dicissi di pattiri giorno 13

ADELE: E picchì così tardu…. Pattemu o 10 così avemu tempu puru di visitari Milanu e fari

               quattro acquisti…

BARTOLO: Ca cettu… e a spisi nostri…

GREGORIO: Mi parri chi così ristammu….

CONCETTA: Cettu, così ristammu…

BARTOLO: A gita si programmaru chisti.

LUCA: Cummari Concetta… ci pinzati…. Fra menu d’un annu sarete mamma….

CONCETTA: Veramenti propriu mamma no…. Dicemu mamma adottiva….

LUCA: Ma quali mamma adottiva… chistu  figghiu di so maritu è… e si sapi purru cu iè a mamma

                  vera. Mamma adottiva diventa si si pigghia a unu di sti figgi i nuddu….

CONCETTA: Non mi parri u casu mi i chiama Figgi i nuddu…. Non basta chiddu chi stanno

         suffrennu….

LUCA: Ma cummari…..

CONCETTA: E poi non mi chiamassi cummari, ancora non emu fattu nuddu San Giuvanni….

GREGORIO: Signora, non ci staiu capennu chiù nenti…

BARTOLO: Veramenti mancu io… staiu capennu chiù nenti….

ADELE: Io inveci capì… ca signora no voli chiù un figghiu…

CONCETTA: Ti sbagghi Adeli, cettu cu vogghiu un figghiu… ma stava pinzannu chi ormai staiu pi

             divintari vecchia e non sacciu si saria capaci di pasciari un picciriddu neonatu….

BARTOLO: Chiddu chi penzava purru io… sava a cattari u latti in polveri… c’ema a fari fari u

             ruttinu… e pi non parrari di notti chi ni facissi fari addritta…

LUCA: E cun chistu chi vuliti diri… chi è chi vuliti fari?

BARTOLO: Io nenti, e tu Cuncetta

CONCETTA: Mancu io nenti…

ADELI: Voli diri chi stu figghiu non l’ema fari chiu?

CONCETTA: Veramenti… io dicessi di spittari….

GREGORIO: E a casa a mari e i cinquanta milioni?

LUCA: Già…. E a casa e i soddi pi iddi e pu du me amicu a Milanu?

BARTOLO: (si alza) U to amico e i manciatari di di dutturi i soddi si ponnu scuddari… Ma i

            promessi io i mantegnu…. E a casa a mari e i cinquanta milioni u stissu vi damu…

GREGORIO: A si è così… siti padruni di non fari chiù figghi cu nuddu o cun cu vuliti vui

ADELE: Grazie, signor Bartolo, grazie signora Cuncetta… ni facistu felici

GREGORIO: E pi gratitudini, u primu figghiu chi nasci u chiamami Bartulu e l’aviti battiari viautri.

BARTOLO: Troppo onore, grazie tanti….

ADELE: Ora però vema lassari… arrivederci a presto

GREGORIO: Arrivederci e a presto…

BARTOLO: Arrivederci… a presto… a presto…

(Gregorio e Adele escono)

LUCA: E così non sulu non coronastu u vostru sognu di aviri un picciriddu… ma pizzastu purru na

             casa a mari e cinquanta milioni…

CONCETTA: E chistu è veru…. Non ti putivi stari mutu… tu e i to promessi…

BARTOLO: E picchì… io a penzu diversamenti. Non pizzai soddi, anzi risparmiai cinquanta

           milioni, chiddi chi ciavia a dari all’amico to…

CONCETTA: Cinquanta milioni vulia?

LUCA: Ma pozzu sapiri almenu com’è chi canciastu idea e non vuliti chiù figgi?

CONCETTA: E cu dissi chistu… Io un figghiu u vogghiu e cun tuttu u cori… però… quannu trasì

             ta du spitali… quannu vitti tutti di figghiuoli chi prigavunu pi Ninu… Mi sintì persa, io u

             vogghiu un figghiu, ma qual è a ragioni vera, chidda di soddisfare u me sensu di vuoto cu 

             un picciriddu accantu o chiddu di donari amuri, affettu… No, Luca, capì chi essiri mamma

             non è patturiri un carusu ma criscirlu, aiutarlu e dandogli amuri… E sunnu propriu sti

             figghioli, chiddi chi finu a ieri chiamava figgi i nuddu chi annu bisognu di amuri…

BARTOLO: Purru io vogghiu un figghiu… ma no vogghiu fari ca provetta…

SCENA 10

(entrano in scena Maria, Anna ed in mezzo Nino.)

BARTOLO: Nino, ma tu si deboli, ta stari cuccatu

ANNA: Vosi essiri puttatu pi forza cà…

NINO: Non sono debole… sto sulle mie gambe… ho bevuto solo un po d’acqua…

BARTOLO: Ma picchì… chi bisogno c’era di fari chiddu chi facisti…

CONCETTA: Basta, ormai du fattu appartieni o passato

LUCA: Già menomali… eru veramenti dispiaciutu pi iddu… ma ora è megghiu mi mi ni vaiu…

CONCETTA: Spittassi compari Luca

LUCA: Comu compari… chi è vu scuddastu chi non vi è chiù battiari a nuddu?

CONCETTA: Battiari no, ma u putiti cresimari

LUCA: A cu?

CONCETTA: Comu a cu… a nostru figghiu Nino… o almenu così spero si i pratichi nu permettunu

           e me maritu voli?

BARTOLO: Chi…. Chi …. Chi dicisti? Ninu me figghiu (lo abbraccia) certo che voglio (si stacca)

         sempri si u vo purru tu…

MARIA: E comu si voli… appena vostra mugghieri ciu proponiu guariu di colpu…

BARTOLO: E così, birbanti, sapivi tutti cosi…

NINO: Si e sono felice, signor Bartolo…

BARTOLO: Ma quali signori.. me cuminciari ad abituari i subutu… chiamami babbo….

          aspetta…. Babbo no… si po pinzari mali… Papà ma chiamari…

NINO: Certo… Papà.

F I N E