Mài stigà la tèrsa età!

“Mài  stigà  la  tèrsa  età”

di Memo Bortolazzi

Personaggi

==================================================================

Cèco:                      Sesànt’àgn. Consàt mal. Ghè tocàt andà al Ricòvero perchè ‘l gà la Bronchite crònaca a fórsa dè fömà. Ansèma a lü ghè ‘ndat a stà...

Pina:                      sò moér, che la gà mìga ulìt lasàl sul. Stèsa età, ma la sömèa ón tòch pö zùina. La ga öl bé a Cèco amó cóme dè s.cèta.

Paulì:                     Antùren ai sesantasìch. Industriàl an gàmba, dòpo ìga ìt ón bröt Infarto, al gà pö ulìt sta a càza sò, pèr mìga éder la sò fónna e i sò fiöi che i s’éra mes.cc a majà föra ‘l fröt dèl sò laorà.

Franco:                 Söi setànta. A la mórt dè sò moér, i fiöi i l’à mèst al Ricovero.

Lina:                      Dài vìnt ai trènta. On tezór dè fiöla che la fà l’Infermiera cón dè ‘na gràn pasiù e la sa fà ulì bé dè töcc chèi che la conós.

Tirizìna:            Söi setànta. Nüsü parèncc e, pèr dè pö, la gà ‘na quàch rödèla che gìra pèr treèrs. Ma l’è töt’óter che màta, cóme sa edarà a la fì.

Giulìva:                Dài vìnt ai trentasìch. La fà le intervìste pèr T.V. Brescia.

Cameramen:      Stèsa età. L’è chèl che dòpra la telecamera.

Tecnico T.V.:     On pó pö zùen. Al contròlo le lùci, i microfoni e...i mür.

Banchér:              Dài quarànta ‘n sö. Al gà póra che Cèco ‘l möre prìm dè fenéser dè pagà ‘na quàch cambiàl.

Giacumì:           Gnàro. L’è niùd dè Paulì, ma l’è mìga stróns cóme i sò dè càza.

Tré Bandìti:        I’è tré, i’è mascheràcc...e pöde dìv pö neènt. (Pèr adès)

 =================================================================

S C E N A

L’è sèmper chèla, per fà pö bèl. Al salù dè töcc i Ricoveri. Taulì, scàgne, quàter pultrùne: dò zbendéte e dò quàzi nöe. Televiziù, teléfono, on armadiét e ‘n carèl dè öspedàl pèr le midizìne. Dò pórte e ‘na finèstra, che sa pödes dopràle. ‘Na pörta l’è chèla principàl, l’ótra l’è chèla dèl cèso. Ansìma a chèsta ghè stat ampitulàt ón retràt dè MARADONA!

==================================================================

OGNI RAPPRESENTAZIONE DELLA PRESENTE COMMEDIA VA DENUNCIATA ALLA S.I.A.E. DI CUI L’AUTORE E’ SOCIO PER  LA  SEZIONE   D. O. R.

==================================================================

A  T  T  O     I°

SCENA  I°

Lina - Cèco - Pina - Paulì

Lina:                 (Distribuisce alcune pastiglie e compresse. Poi afferra una siringa) Francesco... (rivolta a Cèco) prónto ‘l “Voltarèn”!

Cèco:               (Si alza e abbassa le bretelle dei calzoni) ...e prònt apó a Cèco!!

Pina:                 Che fét, spurchignù?! Sa càet föra ‘n mès a la zènt? Va dè là a fà la püntüra! Ta ghé le ciàpe che le ma sömèa dò camaradàrie öde...ta ölaré mìa fàghele éder a töcc, nò?

Cèco:                (rimettendo le bretelle e avviandosi alla porta con Lina) Se le mé i’è camaradàrie...le tò i’è coertù dè tratùr! (Escono insieme)

Paulì:                Adès capése perchè va sìv spuzàcc...Oter du! ’N tra coertù e ...camaradàrie, ga faèv concorènsa a la “PIRELLI”...ah?

Pina:                Té...làsa sta ‘l mé óm! Antàt che ga le dìze mé...l’è ón cönt. Ma té ta ghé dè fà sìto! Apüs a té...Cèco l’è cóme Alèn Delòn! Ta ghìet de éder, quànd che l’ìa zùen, che cülatì che ‘l ghéra...e che spàle! Al parìa fat cól penèl, al parìa pütüràt!

Paulì:                Ma adès la tìnta...l’è ‘ndàda zö töta!

Cèco:               (Che, rientrando ha sentito il dialogo) Ma ‘l penèl a sta ‘n pé amó!

Pina:                 Però...la prima ólta che ‘l sücéd...dàm óna us a la zvèlta!

Cèco:               (Ignora la battuta, sfoglia il giornale) Sènt ché! : “Bloccato il riesame di tutte le Pensioni di Invalidità,per coloro che hanno superato i sessantacinque anni d’età”...” E isé, Laurìna,che la ga n’à setantòt...e i gà ricunusìt al sènto pèr sènt an dè l’ültima Vizita dè contròl,la ‘n cùca pö gna ü!

Paulì:                Ma nò...! Cól tép i ga i’à darà...

Pina:                Quànd che la compiesarà i noànta! Càro ‘l mé Paulì, lùrle i spèta che la möre...pèr tègner a mà!

Cèco:                Chisà perchè pö...i stóngia sèmper chèi pö ècc, chèi pö poarècc...e chèi pö ‘gnoràncc?!?

Pina:                Ma nò! I ga i’à dà, le Pinsiù! L’è apéne quistiù...dè Latitudine!!!

Paulì:                Ché ga èntra le Pinsiù...có la Geografìa?

Pina:                La ga èntra...e cóme! Ché, dè nóter, i ma fà trübülà quarànt’àgn e laorà cóme i stüpecc...

Cèco:                ...e a sesantasìch àgn i blòca i Aumènti...

Pina:                ...e ‘nvéce: pö ta ‘ndè ‘n zó... e pö le Pinsiù le crès!

Paulì:                E i ga i’à dà apó a chèi che gà ...l’Orzöl söl dìt gròs!!! Se nàse ‘n’ötra ólta...nàse ‘n “CALABRIA SAUDITA”...ta ‘l dìze mé!

1

SCENA II°

Cèco - Paulì - Franco - Pina - Suor Gioia

Cèco:                Majóm al formét che góm ampientàt!!! Chi che i a mànda, i làder, al Goèrno? Nóter! E alùra? Al sét cóza che i dìs, a Lömezàne? : “Quànd che l’è hö...l’è hö!”...e ta i tìret pö zó!

Paulì:                 Ormài l’è tàrde...ma garèsem dè ‘mparà, prìm dè mörer, a fà cóme i fà tàcc: fàsel pagà ‘l Vóto! Mé ta vóte té...e té ta ga tróet al pòst dè laorà, a mé fiöl! Oter che bèle idèe...óter che : LIBERTAS, Garòfoi Fiochèi...! On vóto?: Mès quintàl dè cazonsèi!

Franco:             (Entra, si  siede e segue le ultime due battute)...e töcc chèi che ‘nvéce i fà sìto, i laùra...e i pènsa a tirà sö bé i fiöi...gài zbagliàt töt, a scultàt té?

Paulì:                 Ta ghé ‘ndöenàt, Franco! I’è pròpe chèi lé...che ma ruìna: la zènt che zgòba e tàs! Dìzem perchè, chèi che comanànda, che ma té lezér dè scarsèla e gréf dè fadìga, chèi che ma ciücia ‘l sàngh...i reès a comandà? Perchè chèi che ga sérca i piazér, chèi che i ga dè fàga ènser ón Concórs, chèi che i gà dè crompà...i’è amó tròp póch! ‘Na ólta che i gà tacàt al mèl giöst, i’è chèi póch lé che va ‘nnàcc a zlargàga ‘l furmintù sö l’éra! E a töcc i óter...ai macù cóme mé!, cóme té, cóme Cèco...i ga dà ‘na scorbaciàda söl zgarlèt...e: “Iö, Gìna!” L’è asé ‘na bràca dè fé...e l caàla la tìra ‘l carèt!

Cèco:                Pènsa, Franco, se fösem töcc ambruiù, se fösem töcc lecapé, se fösem töcc làder! Cóme farèsei a contentàm? Ga tocarés dàga töt a töcc,...o neènt a nüsü! Se ghès de sparì i cojö cóme nóter...ai fürbi ga tocarès zbasà la gòba! I garès pròpe dè südàsel lùr al pagnòcc anvéce dè scampà söl tröbölà dè i óter! Ghét an mènt che bèl che’l sarès!? (Sulle ultime parole di Franco è entrata Suor Gioia, in silenzio)

SCENA III°

Cèco - Pina - Franco - Paulì - Suor Gioia

Suor Gioia:        Sèntel! Sèntel...al Rivolusionàre!

Cèco:                Só ón “Terorìsta”...mé!

Suor Gioia:        Eh, Cèco, Cèco! Ta sé amó piè dè spirìt...ah?

Cèco:                E cóme! Tóte le ólte che pìse...fó ‘na butìglia dè Gràpa!

Suor Gioia:        Té...ta ‘ndaré a l’Infèrno!

Cèco:                Ölela dàm dè ‘ntènder che ghè ón sìto amó pès dè chèsto?

Suor Gioia:        Edet che bèla fòza dè ringrasiàm...pèr chèl che fóm pèr voàlter! Cón töte le cüre che góm, cón töta la pasiènsa che ma tóca ìga...Cón töte le ólte che...

Cèco:                La ‘l dìze, Suor Gioia! Cón töte le ólte che va laóm, va sügóm...e va dezmerdóm! (Pausa) Lé ‘nvéce la garès de ringrasiàm: cón dè tàt predecà che la fà, sö le òpere dè mizericòrdia...töte le ólte che la ma dispitùla, la fà ‘n panèl de pö...sö la scàla dèl Paradìs!

Franco:              Ta par mìga dè ezagerà, adès, Cèco? Ghét dè zbatìga adòs a l’ünica persùna che ma té stüdicc...töte le tò ràbie dè sesànt’àgn?!

Paulì:                (a Cèco) Gà rizù Franco! Ta ghé deànti óm mónd antréch che tràta i vèci cóme dèi Vuoti a perdere...e ta sa la ciàpet có Suor Gioia?

2

Cèco:                 Che gói dè ciapàmela cón chi, alùra? L’è l’ünica che pàsa dè ché!

Pina:                 E dóca...chi pàsa: càta sö! Té, Cèco, ta sé ‘na gràn carògna!!! Che ga guadègnela Suor Gioia...a fà töt chèl che la fà, pèr nóàlter e pèr té? Neènt dè neènt!

Cèco:                 Antàt che la scàmpa...! (Ironicamente) Ma dòpo...öt mèter chèl che la garà...dòpo?!?

Pina:                 Gàla capìt, Suor Gioia? L’è mìa apéne ‘na carògna: l’è apó ‘n tirangìr! Sicóme che pèr lü al Paradìs al ghè mìga...al sa deertés cóme ‘n mat a l’idèa che lé...la trübüla pròpe pèr neènt...tat an dè ‘l mónd dè ché, cóme dè chèl dè là. Ah, ma ’l garà dè pintìsen!

Suor Gioia:        Pàrla mìga isé, Pina! Ta ghé mài de ‘ngüràga dèl mal al tò òm. I la sà töcc al bé che ta ga öt...

Cèco:                ...fìmel saì apó a mé...

Suor Gioia:        E pó Cèco, cón dè ‘l sò far ón pó zgrès, al ma té sèmper cói pè ‘n tèra...al ma dà ‘na quàch lisiù dè “Umiltà”. Menemà che mé ma sa crède bràa e bùna, che só sücüra dè ìga fat töt al mé doér...rìa Cèco, có ‘na casolàda dè le sò, a tignìm a mènt...che, pèr fa ‘l mé doér, gó dè südà sèmper on brìs dè pö! A la fì...mé garèse amó dè ringrasiàt, Cèco!

Cèco:                Neènt, Suora! (La fa avvicinare) Se la ma dà dò sigarète sóm ...pàri parèncc! Èdet, Pina, quàt póch che gà öl...a fàga dèl bé a la zènt?

Pina:                  La ga ‘n dàghe ón pachèt antréch, Suora, isé ‘l crèpa pö ‘n frèsa!

Paulì:                Ta n’è l’àze! Chèl lé ‘l sömèa sèmper dré a tirà i ültem...e ta edaré che ‘nvéce ‘l ma sotrarà töcc!

Suor Gioia:        ‘Ndóm, Paulì, che l’è ùra dè la medicasiù. Lùrche ...i gà bontèmp!!

                          (Suor Gioia e Paulì escono assieme dalla porta più grande)

SCENA IV°

Pina - Cèco - Franco

                          (Cèco sta per accendere una sigaretta. Pina è furibonda)

Pina:                 E adès che fét...dizgrasiàt? Al sét che l’è la tèrsa an dò ùre? Zmórsela sübit, Cèco!

Franco:              Dàga scólt, Cèco! I’è dés àgn che ta dìze: “Làsa lé dè fömà! Àrda che se ta’ ndé aànti isé, ta fenéset a l’öspedal o al ricòvero...” E adès ta sé ché, consàt mal...! Ta tóca postàt ai mür pèr tirà ‘l fiàt, a sesant’àgn apéne cumpìcc...e ta sé dré amó a fömà!

Cèco:                Antàt che föme...völ dì che scàmpe. E fìn che scàmpe...föme! (Una pausa per aspirare di gusto) Pèr l’ària che ma ocór ché déter...a fà neènt...i mé pulmù i na tìra sö apó a tròp tànta! E pó...se ma tüìv apó ‘na quàch bocàda...che ma ànsa...a mé?!

Pina:                  Ma se ‘l fömà l’è stàt la tò ruìna...perchè sögötet?

Cèco:                Mé, dè fürtüne, ga n’ó ìt póche...e le m’è düràde cóme ‘n zbròf dè Primaéra. Le mé ruìne ‘nvéce, le pö gróse, i’è stàde dò...e le ma s’è tàt ampitulàde...che le m’è ‘gnìde dré apó al Ricòvero!

Pina:                  (Lacrimosa) Pèr té, le sigarète e la tò fónna...le gà ‘l stès efèt?

Cèco:                Ma nò, Pina! ‘Nvèrset mìga...ga mancarès! (Pungente) Le sigarète, ‘na ólta che i’ó töde, le stà ché’ n scarsèla, quàcine, sènsa bofà e le spèta che mé le tìres föra...che mé decìdes quànd che gó dè ‘nvelenàm! E quànd che ga pòste la fiàma (esegue) ...le sa ‘mpìsa, le sa consöma...e quànd che i’è finìde...zbàte vià ‘l mucì!!! (Si accorge che Pina piange. Spegne) Dài, Pina, móchela, L’ó zmorsàda!!!

3

Pina:                  ...e isé...ta ölarèset zmorsàm apó a mé!

Cèco:                L’è ‘n perìcol che té ta córet mìga! Prìma dè zmorsàt, bizognarès éser bu a ‘mpisàt...e chi ta ‘mpìsa, té?

Pina:                  Mé n’ó asé amó dè la Primaéra, ma pèr tè ga ölarès al Padretèrno! E Lü...al n’à gnà òja gnà tép dè fà sèrti meràcoi! (Cèco si mette a tossire forte. Pina corre a massaggiargli la schiena)

SCENA V°

Cèco - Pina - Franco

Franco:             Östa!!! L’ét preparàt l’Epitàfio? Perchè ta ‘l sé che garó de fàt al discórs...quànd che ta möret.

Pina:                  Ma che ciciàret pó? Ta ghé dés àgn dè pö dè lü...e ta ölet fàga ‘l discórs?!?

Franco:             Ma mé föme mìga...e pö só védov!

Cèco:                 (Smettendo di tossire) Só stat mé a prumitìghel. (A Franco) E se ta ghé ón tòch dè càrta...ta ‘l dète sübet...l’Epitàfio! (Franco si munisce di carta e penna) Scrìv, lé e àrda che i ga la fàghe sta töt, sö la mé préda!

                          “Ché pólsa i òs dè Cèco, che a tèmp pèrs,

                          al scriìa le Comédie e ‘n qualche Vèrs.

                          (Cèco constata che Franco non regge il ritmo della dettatura. Gli toglie il foglio e scrive il resto di suo pugno. Alla fine porge il testo a Franco)

Franco:                                               “ Ché pólsa i òs dè Cèco, che a tèmp  pèrs,

                          al scriìa le Comédie e ‘n quàlche Vèrs.

                          Ga pàsa ‘n bànda i òbecc dèi sioràs

                          che i l’ìa vardàt cón dè la spösa al nàs

                          e, adès che i gà perdìt töta la gösa,

                          Cèco ‘l làsa le Rìme...e lùr la spösa!!

                          (Congratulazioni mimiche reciproche, tra Cèco e Franco)

SCENA VI°

Lina - Pina - Cèco - Franco - Suor Gioia

Lina:                 Ghìv vést Paulì, óter? (Rientrando affannata)

Pina:                  L’è ‘ndàt cón dè Suor Gioia an Infermerìa...e l’è gnamó turnàt.

Lina:                 Eco! Al gà zbagliàt ös amó ‘na ólta!

Cèco:                 Anvéce al l’à ‘ndöenàt! A petàtela a té...sa la ‘ndüìna sèmper!!

Lina:                 Brào Cèco, brào!! Bèla amicìsia che l’è la tò! Al sèt che töta le ólte che ìl ma scàpa...al va a béer a l’Osterìa? Paulì al garès gnà dè ardàl, al vì. ‘Na quàl vólta al na bearà ‘n becér dè pö...e ‘l restarà sèch!

Cèco:                 Se mài al restarà ümid...mìga sèch! E pó...sarèsel ón bröt mörer?

Pina.                 Dàga mìa óra, Lina. Ta ‘l sé che  sté bröcc vèci...i ga töcc al só ése!

Cèco:                 (a Lina) E se ta ma ègnet a tìr...ta ‘n fó conóser ón óter dèi mé ése... (Si protende a pizzicarle il sedere) ...bèle ciapilìne dóre!

Franco:             Èdet, Pina, che Cèco ‘l sa ‘mpìsa amó? L’è asé cambià minèstra...

4

Pina.                  ...Che ‘l ga bùrla zó da la finèstra!!! (Entra Suor Gioia e Lina la interroga)

Lina:                 Lé...la l’à mìa ést Paulì, éra?

Suor Gioia:        L’ó medegàt e...ma él mìa ché? (Guardandosi attorno)

Lina:                  A st’ùra, al gà za bèle fàt föra ‘l tèrs bicér...zó dè Guido!

Suor Gioia:      Va a töl sübit, s.cèta, prìm che ‘l ma sa ‘mbreàghe! (Si rivolge ai presenti) M’à apéne telefonàt giü dè...TI.VU BRESCIA...che i völ vègner a fà ‘n Servìsio sö i Ansiàni e se ‘l ma rìa ché ciòch...

Pina:                  Quànd vègnei?

Suor Gioia:      Dè ché a ‘n’ùra! (Si guarda attorno preoccupata. Poi si rivolge a Lina) Té, và a regòer Paulì, che mé ‘ntàt fó ‘n pó dè ùrden! ) Lina esce veloce. Suor Gioia riordina un po’’ con l’aiuto di Pina)

Cèco:                 Comöd Suora...éla dré a trücà ’l Salù? O gàla la cosiènsa sporca? Fómega éder la eretà...a la Televiziù!

SCENA VII°

Cèco - Pìina - Paulì - Franco - Suor Gioia

Pìina:                Adès mùchela...nèh, Cèco? E dat ‘n petenàda ‘nvéce, che l’è mèi! (Gli porge il pettine e specchio. Cèco fa tenere lo specchio a Franco e si pettina. Ma Franco fa tremare lo specchio. Cèco segue con la testa il movimento, fino a perdere l’equilibro e cadere a terra)

Cèco:                 Sét bu a sta férem?! A fórsa dè curìt dré...só ‘ndàt a burlà zó!

Franco:             Ma mé...al fàe pèr vötàt. Dal momènt che ta trèma ‘l có...mé fàe tremà ‘l spècc...e té ta sa idìet férem!

Cèco:                 Mèt zó chèl spècc lé...che ma sa rànge dè pèr mé cönt! (Franco esegue. Cèco si pettina un po’. Al termine dice) Suor Gioia?

Suor Gioia:      Ché ölet, Cèco? (Gentilmente)

Cèco:                 Farèsela mìga ‘na ulàda ‘n Profumerìa...a crompàm ón tübet dè Gèl?

Suor Gioia:      Ta ghé sèmper vòja dè schersà!

Pina:                  Se ta spètet l’ùra dè séna...ta pödet doprà ‘l “Budìno”

Cèco:                Bràa Pina! Ta ghé rizù. Al sènt östa dè petròlio!

Suor Gioia:        Ma recomànde, nèh, s.cècc...a chèl che dizarìv...a la Televiziù!

Franco:             La edarà che bèi discórs che faróm!

Cèco:                 La sa preòcupè mìga, che dè lé parlaróm bé!! Ga dizaróm che la gà dè ‘ndà ‘n Paradìs...nomösta perchè la màngia töt chèl che majóm nóter! E só mìa se ma spiéghe... (Rientra Lina sorreggendo Paulì, ostentatamente brillo)

Paulì:                Andó éi i “MASS MEDIA”? Só prónt pèr la “DIRETTA” ‘Ndó éla la RAI?

Cèco:                 L’è mìga la RAI! L’è TI.VU. BRESCIA DUE!

Suor Gioia:      L’è TI.VU. BRESCIA...mìga: Brescia dùe!

Cèco:                 L’è TI.VU. Brescia dùe! Ciòch cóme che l’è...cóme fal a idìn giöna apéne?!?

Paulì:                (Si siede a fatica) Alùra...sómei prònti? ‘Ndó éla la TELECAMERA...che cumincióm l’INTERVISTA? (China la testa e si mette a russare)

Lina:                  L’è mèi che àghe a fà ‘l cafè! (Esce di scena)

Franco:             (Si alza e declama) Dal Pìo Istituto “VIENI E MUORI”...

Cèco:                 ...vi presentiamo: (Cantando) Quant’è bella la terza Età... (in coro con Franco e Paulì) ... ma sta meglio chi non ce l’ha!!!

5

SCENA VIII°

Cèco - Pina - Franco - Paulì - Suor Gioia

Franco:             (A Cèco) Tèe... ma se lüle al va ‘nnàcc a dòrmer  isé... cóme fómei a fà ‘l “Pokerì”... staséra?

Cèco:                 Zbàsa la us! (Sussurrando ) Paulì... l’è gnà ‘ndormét... gnà ciòch!!!

Franco:             Ma fét dèbù? (Cèco annuisce) Ela ‘na “fìnta”? (Nuovo assenso. Ridono)

Pina:                  Che ghìv dè gregna, óter du? Va a cambiàt chèla camìza lé, Cèco,che l’è piéna dè “padèle”... !

Cèco:                N’ó mìga òja! E Pó, an Televiziù, le màce le é mìga föra!

Pina:                  Anema spórca... camìza spórca! (Esce, con Suor Gioia, portando fuori la biancheria che hanno cambiato di fretta sui tavoli del salone)

Franco:             (Sbirciando Paulì) Cöntemela giösta adès... la menàda...

Cèco:                 Ghè póch dè cönta! Quànd che Paulì ‘l sparés... e töcc i dìs che ‘l sàpe a l’Osterìa dè Guìdo... lü ‘l ga à mìga pèr béer! Ga ‘nterèsa mìa le butìglie a Paulì... ma la sorèla dè Guìdo!

Franco:             Ma perlamadónega! Però, capése mìa perchè ‘l gàbe bizógn dè tra ‘n pé... ‘na Comédia dèl gèner!

Paulì:                 (Svegliandosi di colpo) Perchè,’ ndè ‘n pòsto cóme chèsto, se ta sé ciòch töt al dé, i ta perdùna. Ma se ta é a fónne i ta scomunica!! Ampàra a sta al mónd, Franco, se ta öt éser pacìfech! (Esce di scena)

SCENA IX°

Cèco - Franco

Franco:             Ghét capìt! (Pausa) E alùra... ‘l Pokerì dè staséra?

Cèco:                 (Consulta l’orologio) Fórse l’è mèi che spetóme a fàl domà...Gà dè rià chèi dè la T.V.!... e pó té a mènt che la àca sa gà dè munzìla ón pó a la ólta... se sa öl mìa che la s.ciòpe.

Franco:             Ta fé bèl té, a ciciarà! Mé ga n’ó pö gna ü... amó ‘na ólta.

Cèco:                 J’ét bèle maiàcc föra töcc... chèi dè Mercoldé?

Franco:             Chèl vé! Ma sét mìga quàte palànche che ‘l gà Paulì? Se ‘l ghès dè ìghen vòja... al pödares crompà töt al Ricòvero!

Cèco:                 Mé però... farès mìga càmbe cón dè lü. L’è pié dè palànche, sé... ma l’è apó a pié dè dispiazér! I’ét vés.cc amó té... i sò fiöi?

Franco:             Gó mài vést gnà fiöi, gnà fónna...

Cèco:                 Edet? Mé ‘nvéce i’ó és.cc: ‘na ólta! Quànd che i l’à menàt ché...e pó bàsta! E la só fónna?Al sét? La s’è bèle fàda la “Plastica” trè ólte! Quànd che ga cèd le teràche... (mima con le bretelle) ... la à a fàs tirà sö Töta... e pö la pàrt an Crociéra!

Franco:             Mé só ché apéne dè tré més... pöde mìa saì töt. Ma comöt alùra che sò moér e i sò fiöi i fà la bèla vìta... e lü ‘nvéce l’è gnìt ché?

Cèco:                 Quànd che ‘l gà fàt l’ “Infàrto”, Paulì al s’éra ‘n pó strimìt e ‘l ghìa cidìt töt ai fiöi, pèr schià la “Sucesiü”.La vìla,‘nvéce, al ga l’à lasàda a la fónna.Amó tat che ‘l s’ìa tignìt al Librèt dè la Bànca...e che ‘l gà la sò Pinsiù,södenó ‘l farès i spì a més!

Franco:             Ma perchè, i sò dè càza, l’ài tratàt isé?

6

Cèco:                 Perchè, ... có la scüza che l’ìa malàt, i l’à mèst cóme ‘n prizù ! La prìma ròba che gà fàt só moér, l’è stàda chèla dè ‘ndà a dórmer dè pèr só cönt. Capéset, lü ‘l s’èra ón pó ‘nquaciàt... cóme màs.cc... e lé, ‘nvéce, la s’era desedàda föra cóme ‘na gàta ‘n calür! A fàla cürta i ghéra: Camere separate, infermiera Zvissera personale....

Franco:             Bèla?

Cèco:                 Eeh! Bröta cóme ‘n pecàt fat mal, che, ‘nvéce dè cüràl, la ‘l tignìa saràt sö! E i fiöi e la fónna... a zmàndria pèr il móndo! Cèrto... al garès püdìt andà ‘ndè ‘na Clinica dè Lüso. Ma quàndo che ‘l gà saìt che mé e Pina  sérem ché dèter, al gà ülìt vègner apó a lü!

Franco:             Pèr fürtüna,alà. Isé ‘l sta ‘n compagnìa... e quànd che ocór al ma fà l’ordenàre a Poker!

Cèco:                 Dè le ólte... al ma dà l’impresiù che ‘l la sàpe... che ‘l ciaóm. E che ‘l sìes contét löstès!

SCENA X°

Cèco - Franco - Lina - Paulì

                                 (Rientra Paulì di corsa, per non farsi vedere da Lina. Si rimette al tavolo, fingendo di dormire. Poi entra Lina, con tre tazze di caffè)

Lina:                 Eco ‘l cafè pèr al siòr Paulì ‘mbreaghì... (Versa) e pèr le gemelle Kessler! (Idem. Torna da Paulì) Desedómes però nèh? (Lo scrolla)

Paulì:                 (Dopo aver bevuto) Sómei prónti pèr al Pokerì? (Si finge intontito)

Cèco:                (Assecondandolo) Ga stóm mìa pö déter, oramài! Arda lüche, té! Al va a l’Osterìa...al bàt al Record mondiàl dè velocità an dè ‘l ciapà la ciùca...al sa ‘ndormènta cóme ‘n sòch per mèz’ùra...e dòpo...al völ zögà a Poker!

Franco:              Adès pó gà dè rià chèi dè la Televiziù!

Paulì:                Ma...éi mìga za stàcc ché?

Cèco:                 Ta sa i’è ‘nsomiàcc!

                          (Lina raccoglie le tazzine ed esce. I tre ridono dell’imbroglio)

Franco:             Mé ‘ndó ‘n càmera ‘n quàrt d’ùra...se fóm mìa la partidìna. Isé ma sa tró ‘n pó a sègn...pèr la Televiziù.

Paulì:                 Mètet sö ‘l vistìt dè la dutrìna...ma recomànde! (Franco esce)

SCENA XI°

Cèco - Pina - Paulì - Rìco Banchér

                          (Entra Pina, che ha incrociato franco sulla porta)

Pina:                 Cèco! Ghè ché ‘l Siòr Rìco, ‘l Banchér,...che l’è pasàt a salüdàt.

Cèco:                 (A Paulì) Arda se ‘l fiòca! (Paulì fa per alzarsi) Schersàe, Paulì! Sta sentàt zó. Al véde apó a sta ché...che ghè föra ‘l sul!

Banchér:          (Entrando tronfio) Permès! Sta còmod, Cèco, distürbet mìa pèr mé! (Ma Cèco non fa una piega) Cóme àla? Al sét che ta ghét ‘na gràn bèla céra? Pödei sentàm zó ‘n münüt? (Esegue) Ma che bèl pòsto! Cóme sìv comodàcc bé! (Vede Paulì. Scatta in piedi e lo raggiunge) Ma Dio...ghè apó ‘l Siòr Paulì! Al sìe mìga mé. Ma sömèa che adès...al stàghe pö bé! Se ga ocór vergóta, al sa fàghe nüsü riguàrdi...éra? Sóm vizì dè càza: la Bànca l’è apéne dè là dèl mür...

7

Cèco:                 L’è apéne dè là...dèl mür dèl cèso!

Banchér:          Pödarèsemei fà dò paròle...dè pèr nòst cönt?

Cèco:                 Al pàrle! Al pàrle pör! Paulì...l’è ‘l mé “Consulente” finansiàrio!

Banchér:          Alùra...se l’è isé... (A disagio, si fruga in tasca)  ma só permitìt dè portàt ón pachèt dè sigarète. Ta fömet amó, éra? (Le porge a Cèco ma Pina le sequestra)

Pina:                  Al föma a pèr despèt! Fà neènt se ‘l gà la “Bronchìte crònaca”!

Banchér:          Mé só ‘gnìt östa a éder cóme ‘l stàa perchè gó sintìt...an Bànca, che ‘l ghéra i màntes ‘n pó ‘n giànde...

Pina:                  (Quasi tra se) ...e isé...al ga pórta le sigarète!

Banchér:          e sicóme al Venerdè... saróm a le sìch e mèza precìze...gó pensàt dè fà du pas an pö...

Cèco:                 (Ironico) ...pèr véder se, pèr càzo, rìe a scampà fìn a la fì dèl més...pèr pagàga la sò Cambiàl!!!

Banchér:          Ma perchè pàrlet isé, Cèco? Cóme ghét fàt a pensà...

Cèco:                 Cóme gó fàt? Al gà apó ‘l fìdech dè domandàmel! I’è tré àgn che só ché déter...e lü, che l’è apéne dè la bànda dè la dèl cèso...quàte ólte él vignìt a troàm? Góm zügàt a Fóbal ansèma, sa sóm spartìcc apó ‘na quàch muruzìna...e lü...

Banchér.           Perchè ma dét dèl: “lü”?

Cèco:                 Perchè, dèl “té”, gal dó a chi che ma öl bé! (Pausa) E alùra...”Lü”...quànd él che ‘l vé a troàm?: Quàndo i va a dìga che Cèco ‘l gà la bronchìte...che l’è ‘n giànde...e che ‘l pödarès tirà ‘l zgarlèt prìma dè la fì dèl més!

Banchér:          Scüzìm...ma mé, alùra, só mìa riàt a fam capì. Ma dispiàs che té...

Paulì:                 Al s’è fàt capì a pèr tròp! Dè quàt éla la Cambiàl?

Banchér            Ma nò! Ma pèr Dio...l’è ‘na stüpidàda... (Cambia tono) Trezentmìla!

Paulì:                 Alùra ‘l vàghe pör vià sènsa póra...che, a guàl dè la fì dèl més, i “Trezentmìla” dè la sò Cambiàl i sarà söl sò tàol. Respónde mé!

Pina:                 (Lascia le sigarette sul tavolo e spinge il Banchér alla porta) Al stàghe bé, Siòr Rìco! Chisà cóme ‘l gà dè dórmer dè göst lü, dè nòt, cón töt al bé che ‘l ga fà a la zènt! (Sta per mandarlo fuori dalla porta,Cèco afferra e gli butta dietro le sigarette nuove)

Cèco:                 .e töt só apó a chèste, che isé pöl das che Cèco al rìes apó...a la fì dèl més ché é!!!

SCENA XII°

Cèco - Paulì - Pina

Paulì:                Ma che stróns...che l’è lüle!

Cèco:                 (Raccogliendo le sigarette) Oramài...la bèla fügüra l’ó fàda e...ma convié tignìmele.

Pina:                 Però ta ma le dé a mé (Le sequestra) Che sìet dré a dì, Paulì?

Paulì:                 Che ‘l Banchér l’è ‘n stróns! Al ma sömeàa giü dè chèi ozelàs che ùla ‘nsìma ai caài ferìcc...an dè ‘l Far West!

Pina:                 Certo che ‘l ma sömèa mìa ‘n gràn bu óm...Però ga n’è apó dè pès!

8

Cèco:                 Pès dè lüle...ta n’aré mìga ést tàcc! Al searà apó ‘l mestér...ma ‘nsóma...! Té, Paulì, ta ghé sèmper vìt palànche e, magàre, sèrte ròbe ta le sé gnàch. (Pausa) Ma ölet saìl cóme le fà le Bànche? Pröa...a ‘ndà a domandàga ón prèstet e dìga che ta ga n’è gnà ü! Giü al gà bizògn dè sólcc...e ‘l và a éder an Bànca: al s’è gnamó sentàt zó ‘ndè l’ufìcio...che i ga domànda quàcc che ‘l ga n’à! (Mimando la sorpresa) “Ma, se ga i’ére ...ignìe mìga ché!” Alùra i völ saì se ‘l gà argót al sul. ”Al sul? Mé?: Gó le cülàte quànd che vó a fàla ‘n dè i teré!”...E i ta dà neènt! Ghét capìt, Paulì?

Paulì:                L’è pö düra dèl fèr!

Pina:                  Spèta!...Se ‘nvéce dè ‘ndà a sercàghen, ta öt andà a mitìn sö argü, l’è amó àch chèl bazàmel!! Se ta ghé ‘na brachìna dè Mìla Frànch, i ta fà ‘l “LIBRETTO DI RISPARMIO”...cól tré pèr sènt dè Interès! Isé, a Dezèmber, ta ga n’è pö póch che a Zenér!...Se ta rìet a sìch Miliù...e ta sa fé ‘ntènder...alùra i ta fà ‘l “BOT” e ta ciàpet al növ o ‘l dés pèr sènt...ma quàcc ga n’è, de èci cóme nóter, che pöl mèter an Bànca sìch Miliù?!

Cèco:                Però, se ta sa prezèntet...cón dözènt Miliù, alùra i ta dà apó...al “sédes” pèr sènt! Dal momènt che ta ga n’é isé bizògn! Arda. Paulì, mé...só sèmper stat onèst, gó mài portàt vià gnà ‘n tòch dè pà, gnà ‘nà palànca a nüsü... (Aumenta il tono) Ma se ghès dè saì che la ma à reèsa dè fà ‘n büs, an dè la parét dèl cèso...e dè portàghei vià töcc...andó sübit a sercà ‘n martèl e ‘n scalpèl...giùro!!!

SCENA XIII°

Cèco - Pina - Paulì - Franco - Tirizìna - Suor Gioia

Franco:              (Rientra, tirato a lucido) ‘Ndói bé isé? Sói bèl...o mìga?

Pina:                 Ta ma sömeèt...al Presidènt dè la Repüblica!

                          (Intanto entra Tirizìna che canticchia mentre spolvera i quadri)

Cèco:                 ...e chèla lé...che fàla?!

Franco:             Ta ‘l sé...cóme l'è Tirizìna. La m’è gnìda dré...

Tirizìna:             Piéro, Piéro l’è ‘ndàt a fà l’èrba, ‘l s’è ‘mpinìt le bràghe dè...mèrda... (Pulisce un altro quadro, si inginocchia. Segno di croce. Ne spolvera un altro. Stessa pantomima. Tutti la osservano)

Franco:             La ölarà compàrer apó a lé, ‘n Televiziù...

Paulì:                 Ma ga sarà dè portàla vià...prìm che i rìe!

Cèco:                Làsa che i la èdes! I’è chèle lé, le ròbe dè fà éder bé...an dè ‘n Ricòvero! E pó...la ga fà dèl màl a nüsü...! (Tirizìna intanto si avvicina al quadro di Maradona) Tirizìna! L’è Maradona chèl lé...!

Tirizìna:             L’è la Madóna...l’è Maradona... (Bacia il quadro. Si inginocchia: Fa ancora un segno di croce) Piéro, Piéro, l’è ‘ndàt a fà l’èrba... (Entra correndo Suor Gioia. Afferra Tirizìna, poi la affida a Pina)

Suor Gioia:      I’è ché, nèh! Dè ché a ‘n münüt i rìa! Sìv prònti? Ma recomànde...! (Suor Gioia e Pina trascinano fuori Tirizìna recalcitrante, mentre si chiude lento il sipario)

F I N E   A T T O   I°

 9

A  T  T  O   I I°

SCENA I°

Intervistatrice - Cameramen - Cèco - Pina - Paulì - Franco

Intervist.:           Tutto a posto? (Al cameramen, già pronto con la telecamera puntata)

Cameramen:    Mé só a pòst. Le lùci le ghè...Pödóm cumincià quànd che ta ölet.

Intervist.:           Allora, statemi attenti un attimo... (Gli anziani parlano tra loro) Fì sìto! E scultìm ón münüt! Adesso una panoramica larga dell’ambiente. Poi io dico due cose d’introduzione...e infine vi faccio qualche Intervista. (Gli anziani si guardano confusi)   Mé va domànde argóta...e óter rispundìv! Ghìv capìt...o nò gnamó?

Paulì:                Chèsta l’è ‘n ótra che crèd...che éser vècc al völes dì éser semi! Cèrto che góm capìt! Mé, però, ölarès saì...se góm dè rispónder chèl che la öl lé o chèl che n‘óm vòja nöter!

Intervist.:           Ma ci mancherebbe! Ghì dè dì chèl che va sintìv! TI.VU. Brescia, la gà mai fàt la Censüra a nüsü! L’è asé che ardìghev dè parlà ón pó söl mèret, sènsa parolàse...

Cèco:                ...se pó vè föra ‘na Trasmisiù “PORNO” ...la trasmetarì dòpo le dò dè nòt!

Intervist.:           Bene! Mi piace lo spirito della cosa. Gó edèa che egnarà föra...ón bèl mistirulì!

Cameramen:    La Càmera l’è prònta. Mète sö la “Sigla”?

Intervist.:           Okèi! Ta fé pàrter la Sigla, ta ma fé ón bèl “Primo Piano” a mé...e ‘ntàt che pàrle, ta zlàrghet sö ‘n dè l’ambiènt.

Cameramen:    Four - Three - Two - One...vìa! (Accende un registratore con musica assordante)

Intervist.:           CARI AMICI DI T.V. BRESCIA...(Per il volume della musica,deve smettere.Urla) Férma! Férma töt! Zmórsa chèl laùr lé! ( Il Cameramen spegne)

Cameramen:    Che ghè amó?!

Intervist.:           (Con tono furioso e retorico) Ma che fét sö, pó?! Che ròba éla mài chèsta? Sómei an Discotéca, ché? Rispóndem: Sómei a le Cùpole? Nò! Ché, sóm an dè ‘n Ricòvero! Ga öl ‘na Müzica pö quéta...pö dólsa!!

Cèco:                Pecàt...a mé la ma .piazìa...

Intervist.:           (Sceglie una cassetta) Eco mèt sö chèsta. Albinoni al va sèmper bé!

Cameramen:    Quàter - tré - du - giü! (Fa partire l’Adagio di Albinoni e la ripresa)

Intervist.:           Cari amici di TI.VU. Brescia!!! Buon pomeriggio dalla vostra Giuly Ochetto! Giùly, come saprete, accidenti a mia mamma, è il diminutivo di: Giuliva! Non azzardatevi mai a chiamarmi per intero, perchè io non voglio passare alla storia come...Ochetto Giuliva! Capito?...Bene! Oggi la nostra Squadra Esterna ha puntato le sue Telecamere su un ambiente ben preciso...e su un problema altrettanto preciso e scottante: La Casa di Riposo e gli Anziani: Stiamo entrando ora nel Soggiorno di questa struttura...e quelli che vedete sono gli ospiti, più precisamente, gli Anziani, che hanno accettato di buon grado di partecipare alla nostra Trasmissione, la quale oggi sarà: “INTERAMENTE SPONSORIZZATA DAL PANNOLONE PIAVE, il PANNOLONE degli adulti incontinenti...il PANNOLONE che non si arrende!! PANNOLONE PIAVE... (Cèco, Pina, Franco e Paulì si sono alzati e affiancando la Giuly, intervengono a tempo, cantando)

Tutti:                ...Non passa lo straniero...ZAM ZAM!

10

SCENA II°

Detti

Intervist.:           Ed ora iniziamo le interviste proprio con il nostro contestatore, il Signor Paolo...

Paulì:                Paulì!...e ‘l cognòm al vocór mìa!

Intervist.:           Si esprima pure in dialetto. La nostra è una “Rete Televisiva” che si vanta di essere locale. Vedrà che il nostro pubblico la capirà!

Paulì:                Va bé!...Alùra: Sebbene io possa esprimermi, nella lingua di Dante, in modo pressochè perfetto e scevro da inflessioni di vernacolo e ancor più da anglismi, Francesismi e Germanismi demenziali, per non dire massmediali...preferése parlà ‘n dialèt Bresà! (Applauso)

Intervist.:           Naturalmente! Ma , mi dica: In questa casa di riposo, qual’è il vostro tenore di vita?

Paulì:                Ma che tenùr! A fà bèl l’è giü che cànta a l’Osterìa, quànd che l’è ciòch...e ‘l stùna àch!...tenùr! Ga ‘l dìze mé cóme l’è ‘l nòst...tenùr...e pó l’è mèi che ga cönte chèl che à bé, perchè se ghès dè cöntàga chèl che à mìga...ga mète tré més!

Intervist.:           Allora...mi illustri, brevemente, i lati positivi.

Paulì:                I’è du! Prìmo: só ché cón dè i amìs pö sincér che gàbe mài vìt...e, secóndo: góm la fürtüna dè ìga Suor Gioia che, töte le ólte che la é déter dè l’ös...la ma fà bé a l’ànema...

Franco:              ...e ai öcc!

Paulì:                Pèr al rèst, chèsto, l’è mìa ‘n Ricòvero. L’è ‘n depòsit dè rotàm...che spèta la demolisiù!

Cèco:                 La nòsta dizgràsia...l’è chèla dè scampà pö tat che ‘na ölta! Sóm dür a crepà...e ga ocórem a nüsü! Apéne che le nòste palanchìne...i’è mìga pö asé a mantègner i óter...sàla che sücéd? (Invita Pina a seguirlo a centro-palco a imitare figlio e nuora)

Pina:                 (Nuora) Té, bèlo...! Adès che tò pàder l’è ‘n pinsiù, che fómei?

Cèco:                 (Figlio) Cóme: che fómei? Al m’à sèmper dat sölcc,...al m’à sèmper vötàt an càza...al gà tindìt ài s.cècc quànd che i’éra pesègn...

Pina:                 Sé! Ma adès i s.cècc i’è gràncc e i gà bizògn dè spàsio! Sa pöl pö fai dórmer an du, an dè ‘na càmera!

Cèco:                 E isé...garèsem dè casà vià mé bubà...pèr fài sta còmocc lùr?! Se i fös màs.cc e fèmena...nó dìze... (Pausa) E pó...té a mènt che mé pàder al gà mìa bizògn dè la caretà! Al gà i sò ses-sèntsinquànta mìla dè Pinsiù e, cón chèi, al tìra aànti mìga mal! Se ta ga zóntet che, la càza, al l’à fàda sö lü...

Pina:                 ...ma ‘l ta l’à ‘ntestàda a té! E dóca: l’è tò!...se pó ölóm parlà dè sólcc, al sét che a mé ‘l ma dà apéne...mès Miliù?

Cèco:                 Ulìet che ‘l ta ia dàes töcc?! Bözognarà lasàga ‘n quàch bianchì...e ‘na quàch sigarèta!

Pina:                 ...E isé...che fét, che fói...al vé a càza löstracì...al zbàt i mucì dè pèr töt...sènsa le coèrte che ‘l m’à brüzat!

Intervist.:           Bravi! Benissimo! Il discorso è chiaro ed il concetto è logico!

Cèco:                ...e alùra...se l’è “lògico”...comöd che quàzi töcc nöter, dòpo ón quàlche més che ghè stat fàt ón discórs isé...comöd che m’è tocàt vègner a rifinì ché déter?!?

                          (L’Intervistatrice è imbarazzata. Medita. Entra Lina col carrello del tè)

11

SCENA III°

Detti - Lina - Tecnico

Lina:                  L’è l’ùra dèl té! (Ai “Televisivi”)  An vulìv ón gós apó a óter?

Intervist.:          Ma sé, alà. (Al Cameramen) Férma e tùrna ‘ndré...che la zóntem dòpo.

Cameramen.      L’è ‘n pecàt! Ma dispiàs tirà vià ‘na bèla s.citulìna isé...

Intervist.:          Ga la metóm dènter dòpo. Adès polsóm sìch münücc e beóm al té...

                          (Viene servito il té a tutti. Entra il Tecnico che scambia segnali con l’Intervistatrice. Lei gli indica la finestra praticabile e la porta del W.C. Lui estrae un metro, carta e penna. Misura e scrive)

Paulì:                 (Che stà per andare al W.C.) E lüche...dè che bànda ègnel föra?

Intervist.:          L’è Giàngi...al nòst Tecnico Elettronico. L’è dré a controlà al spisùr dèi mür, pèr calcolà l’INCIDENSA DEL SUONO...e l’ISOLAMENTO ACUSTICO...

Cameramen:      ...e la PARALLASSE MULTIMEDIALE DELLE ONDE SONORE!

Paulì:                Eco! Adès gó capìt töt! (Infila la porta del W.C. Il tecnico misura e scrive, scambiando occhiate complici con il Cameramen)

Intervist.:           (A Lina) E lé, Signorìna...cóme sa ciàmela?

Lina:                 Lina.

Intervist.:           Lina. Cóm’èl al sò laorà? Quàte ùre fàla...ché, ‘n mès ai nóni?

Lina:                 Fó dà le òt a le sés dè séra. Dés ùre al dé, dàl Lönedé al Sàbot...quànd che ma capéta mìa dè fà la nòt...e quànd che vé mìga...chèi dè la Tiliviziù... (Guarda l’orologio) ...a l’ùra dè ‘ndà a càza!

                          (Il Tecnico si infila nella porta del W.C. dove era entrato Paulì)

Pina:                  L’è tròp bràa, chèla gnarèla lé...pèr la sò età! Se töcc i vècc i ghès dè ìga ‘n càza ‘na fiöla isé, i Ricòveri i ‘ndarès an malùra!

Cameramen:    Ma té, la séra...a che ùra destàchet?

Lina:                  Sés...sés e ‘n quàrt... (Curiosa) ...e té, perchè ölet saìl?

Franco:             ...’ndüìna!

Intervist.:           Però...i ta darà ‘l càmbe, vegnarà argü a fà la nòt!

Cèco:                Ché, dè nóter, ga n’è mìa bözògn! Sa rangióm dè pèr nòst cönt. An dè i óter Repàrti ghè i Infermiér...ma nóter góm la PATENTE... (Finge di guidare) ...sóm: AUTO-SUFFICENTI!

Lina:                  Ogni tàt, vé Suor Gioia a fà ‘n girèt, ma mìga sèmper. Pròpe staséra l’è za partìda pèr fà ón “Ritiro”  a Breèsa...e lùrche i sa ràngia, ga fa ‘nfìna cómod...isé i pöl sta sö fìn a le dò, a zögà a Poker!

Paulì:                (Dal W.C.) Ma candelòstrega!...tèe...! (Entra in scena allacciandosi la cintola, seguito dal Tecnico) Va bé che ta ghé dè tö le mizüre! Ma ègner a mizürà ‘l Water...antàt che ga só ‘nsìma...al ma sömèa ‘n pó ezageràt!!! (Il Tecnico, impassibile, riprende a misurare ogni muro e gli infissi di porte e finestra. Durante l’intervallo del té, l’Intervistatrice si è accesa una sigaretta e Cèco è andato a rubargliela di nascosto. L’Intervistatrice termina di bere il tè, si alza e indica al Cameramen di rimettersi in postazione. Poi si avvicina a Lina e si appresta ad intervistarla ancora)

12

SCENA IV°

Detti

Intervist.:           Questa graziosa Signorina è Lina, l’Infermiera e responsabile unica del REPARTO AUTOSUFFICENTI. Lina ci ha confermato che lavora per un minimo di dieci ore al giorno, senza contare gli straordinari. Lina...allora, al giorno d’oggi, si può ancora parlare di “MISSIONE” più che di LAVORO?

Lina:                 Pòta, só mìa mé...só mìa tàt bùna, có le paròle! E pó dòpo, le paròle le cönta póch: cönta i fàcc! Mé so apéne che...a chèi discuzìcc lé ga öi ón gràn bé...e che, se fó fadìga a ègner a laorà...fó amó pö fadìga a ‘’ndà vià! Dè le ölte ga ragiùne sùra e, la sàla...che da lùrche, ma sömèa dè riséer sèmper dè pö dè chèl che ga dó?

Cèco:                 Ma quàcc ghè n’è cóme té, Lina? Té ta laùret ché, perchè ta ragiùnet isé! Ma quàcc ga n’è, dè zuègn, che sa sacrìfica pèr i óter? Se i fös töcc cóme té, i ricòveri i sarès vöcc e le famìe le garès i sò ècc...stüdìcc e rierìcc cóme ‘na ólta!

Paulì:                L’è cólpa nòsta, Cèco. Quànd ghè finìt la guèra, i zùegn dè alùra...nóter...che sóta i bombardamèncc sa ‘ngrögnàem an dè i cantù, cóme pèr turnà ‘n pànsa a nòsta màder, che majàem pa e spüda perchè ghìa neènt dè majà...nóter...che a növ e a dés àgn ris.ciàem dè éser taiàcc a mès da le mitragliàde dèi tedèsch...pèr rià a robàga tré tòch dè fèr ai càmion che i ghìa ‘ndè i depòsiti...e dòpo baratài cón dè ‘n tòch dè làrd... (I giovani non capiscono l’ultima parola) Il LARDO! Adès...al làrd...i sà pö gnà cóza l’è...nóter che ghìem redetàt n’Italia ‘n dè la mèrda e che, bé o mal, l’óm tiràda a leèl dèl mar...che gómei fat, nóter? Góm vülìt dàga ai fiöi chèl che nó ghérem mài vìt. E l’óm fat an dè la manièra pö balùrda! (Lina esce)

Franco:              Mé só ‘ndàt an gìr cói tròcoi? (A un figlio immaginario) ...e té ta crómpe du péer dè scàrpe...firmàde. Ta töe la “Timberland”! Mé majàe póch e neènt? E té: ‘mböset e fàt vègner al Diabéte a quìndes àgn! Mé só ‘ndàt an biciclèta fìna a quarànt’àgn? E a té...al muturì a quatórdes...e ‘l “FUORISTRADA” s dizdòt!

Paulì:                (Incalza) Mé ga n’ìè gnà ü ‘n scarsèla? E a té...sentomìla al cólpo! Vólet mìa fà ìl laorà dè tò pàder...pèr mìa sporcàt le mà? Spèta! Spèta fìn quànd che ta tróet chèl giöst...dè südà póch!! Sét riàt a trènt’àgn dizocupàt? Fà neènt...l’è asé che ta sàpet mìa drogàt. (Pausa) E dàghen...e dàghen, sènsa mài pretènder neènt...e a la fì i m’à turnàt ‘na gràn pesàda...e i m’à zbatìt ché dènter!!

SCENA V°

Cèco - Paulì - Franco - Pina - I Televisivi

Cèco:                 Al màl...l’è mìga perchè i gà dè töt. ‘L màl l’è che lùr i s’è mài guadegnàt neènt...che i sa mìa chèl che m’è costàt...dàga dè töt!

Pina:                 A fórsa dè sintìs a dì dè sé...la prìma ólta che ga piöv adòs ón “No!”, magàre giü dè chèi bèi sèch...iè bèle röenàcc!

Franco:              I sömèa fàcc dè fèr:Töcc löster,cói giübì pié dè capèle dè cióda...e ‘nvéce,a le prìme dò góse che i ciàpa,ta sa ‘n encórzet che i’è fàcc dè càrta: i sa ‘nquàcia e i delégua!

Intervist.:          Ma ...se questo è vero...se chèsto l’è éra...comöd che sa tröa amó s.cècc cóme Lina?

Cèco:                 I sàlta föra pèr zbàglio! O perchè, cóme ghè sücès a Lina, i gà tat patìt e tat tröbölàt...che i gà ‘mparàt a rispetà ‘l patéser e ‘l tröbölà dè i óter!

13

Intervist:            Ma, a strènzer. Se sóm vignìcc sö isé. La cólpa l’è mìa töta nòsta!

Pina:                 Sé, càra, la sarà apó a crüda...ma l’è pròpe isé! (L’Intervistatrice tenta di intervenire) Spèta bèla. Al só chèl che ta öt dì: se l’è cólpa nòsta, perchè stóm a lamentàs e, sùra töt, che pretèndómei dè ‘nsegnàv? Pödöm ansegnàv a mìa fà i stès erùr che góm fàt nóter...perchè, té a mènt belìnda, che la giòstra la gìra e che, se nóter i m’à zbatìt zó a sesànt’àgn...óter i va zbatarà zó a quarànta!

Intervist.:           E perchè?

Paulì:                Perchè?! Perchè fórse nóter sarèsem bu amó a ‘nsegnàv argót óter! Góm pröàt a scampà mal...e sóm riàcc a scmpà löstès! Eco perchè adès ga la fóm dì amó: Nóter sarèsem bu amó...dè fa só ‘n tàol, dè giöstà ‘n mutùr, dè ‘mpientà ‘na còla! Se ‘l mónd al ghés dè turnà ‘ndré dè cólp, e ga ölarès póch, nóter riesarèsem a scampà, ma óter? Artigiàni, ga n’è pö! Töcc i va ‘n fàbrica e ...che ‘mpàrei? A schisà ‘n butù o a strènzer dò ìde!...Va sìv mès.cc an dè ‘l có che l’è asé zmanetà ‘n’ “Computer”...pèr fà saltà föra ‘n chìlo dè patàte! Se ghès dè ucurìv dè saì ‘ndó mèter le mà...se ghèsev bözògn dè ‘n pó dè esperiènsa, pèr zbarcà ‘l lönàre...prüì...a ‘ndöenà andó che va tocarès mitìvela...la TELECAMERA!

Intervist.:           Ma ‘nsóma! Dal momènt che sóm ché có la Telecàmera,l’è perchè ma ‘nterèsa chèl che pinsìv...chèl che ülìv!Se nò...perchè sarèsemei vignìcc?Ghìv argót dè dì... söl mónd dè föra? Eco! Nöter sóm chèi che va permèt dè fàghel conóser a la zènt!...

SCENA VI°

Detti

Pina:                 O sìv ché pèr spiàm...pèr sercà dè capì che fastìde pódom dàv amó...o se, a fórsa dè mandà zó e dè éser tratàcc cóme ca,...nó pödes süceder che deentómes periculùs? Ardì gnàri che a nóter, al servèl al ma funsiùna amó...pö bé che a óter! (Alzandosi e incalzando) I “Veci”...i sa àrda ‘ndré. Ma i vàrda apó deànti! I sa preócupa dèl domà, dè cóme ‘l pödarà éser, apó se ‘l garès mìa dè ‘nteresàm, ...perchè ‘l domà l’è òst e sìv vóter che gà dè pensàga!

Intervist.:           Ga pensóm, Pina, ga pensóm. Antàt...nóter, dè guère, n’öm mài fàt!

Franco.             A pòta! Pèr fà la guèra... va tocarès leà sö tròp a bunùra!L’è mìa éra che sìv cóntra la guèra!Ghè za pasàt quàzi sinquànt’àgn,da l’ültima.Ghìv za votàt,ón péer dè ólte,e ‘ndó èl al Goèrno che ghéra dè desfà l’Ezèrcito, magàre pèr dàga dè majà a chi ghìa fàm?

Cèco:                 (Interviene) Se ghèsem dè ardà chèl che góm fat nóter...garèsem dè ‘mpinìs al có dè sèner! Però, Franco...al gà mìa püdìt catà föra!: Se ‘l fös mìga partìt an guèra...i l’arès füzilàt!! Chèi dè la mé età, ‘nvéce, i gà ìt gnà ‘l tèmp dè pensà! Sìem tròp ciapàcc a tirà ‘n pé la baràca...a cùzer la séna cól diznà! (Pausa) Ma ...óter?!?

Cameramen:    Téé...nóno...! Garèsem dè ‘ndà ‘n guèra...pèr mìga fà la guèra?

Cèco:                 Ma ga mancarès...!Séfol! Bözògna difènder la “Pàtria”...nò? Al sét pèr quàt pödarèsem difindìs, se ghès dè s.ciopà argóta? Ot münücc! Ot münücc...ma sul perchè i missili...i ga metarès tat isé a rià. Pridichìv cóntra le armi...e ‘ndìv a fabricàle a Gardù. Zbaüsì dè ECOLOGIA...e spurchì dè pèr töt. Pianzì pèr i anemài...e cumprìv i giübì de pèl. “A MORTE L’INQUINAMENTO!”...però: Diintì surcc an Discotéca...zbatì föra quintài dè tòsech da le “KAWASACHI”...va sa mitì söl có ón chìlo dè làca e dòpo...uzì pèr “Al büs dè l’ozòno”! Ma fì ègner dè gometà!

14

SCENA VII°

Detti - Tirizìna

                                   (Attimi di imbarazzo da ambo le parti. Entra Tirizìna con una bombola Spray.   Avanza verso il centro palco, spruzzando tutto e tutti.)

Tirizìna:           Al büs dè l’Ozòno...tòh! (Cambia vittima) Al büs dè l’Ozòno...tòh!

Intervist.:           Ma éla màta...chèla lé?!

Tirizìna:           Ta sé té màta! Al büs de l’Ozòno... (All’Intervistatrice) ...tòh!

Intervist.:           Fìla dözmetèr, nò? (Al cameramen) Arda che se la ta zbròfa la càmera...sóm bèle röenàcc! (A Tirizìna) Bàsta nóna, pèr piazér...  (A Cèco) Ma éla scleròtica lèche?

Cèco:                On pó sé...e ‘n pó nò, De sòlit la frìga zó i quàder sènsa bofà. Sa èd che ‘ncö l’è ‘n fùrma...e le ga é föra nüde, crüde e centràde!

Tirizìna:             (All’Intervistatrice) Quànd’él che ‘l büs dè l’Ozòno al farà rustì töt al mónd?

Intervist.:          Se la à aànti isé...dè ché a dés o quìndes àgn.

Tirizìna:             E ‘ntàt...che sücéd?

Intervist.:          Antàt...sögötarà a crèser la temperadüra...e farà sèmper pö càld!

Tirizìna:             Edet, macùna! A mé...i m’à dìt che scamparó amó sìch àgn...e sicóme ché déter ghè dèi piügiù...che i té a mà ‘l metàno...mé fó crèser la temperadüra! (Dopo l’ultima spruzzata, Tirizìna depone lo spray e va a spolverare Maradona) La Madóna...Maradóna...la Madóna... (Pina le si avvicina e la porta fuori con dolcezza)

Paulì:                Eco...ghè s’è zmorsàt al perlì! Adès l’è bùna dè saràs sö ‘n càmera e dè pö dèrver bóca pèr ón més.

Intervist.:           Adès, però, lasóm lé dè pèrder tép e ‘ndóm aànti có l’Intervista. Mi dica lei, Signor Franco, quanti sono gli ospiti che vanno  e vengono da questa sala, oltre Teresina?

Franco:             Pòta! Nóter! Ga n’è mìga tacc che gà la “PATENTE”! Chèi dè là...ga tóca sta ‘n dèl lèt. Nóter sóm ché...e Tirizìna la va e la vé: l’è malàda ‘ndè ‘l có...ma le gàmbe le ga funsiüna a pèr tròp!

Intervist.:           Ma...quando Lina va a casa...viene sostituita, o nò?

Pina:                 L’ötra Infermiéra l’è za ché...ma, dè nóter, la ga é mai. La sà che sa rangióm! Se ga fös argót dè particolàr, Lina la ga la dìs, prìma dè ‘ndà vià...o södönò la ga làsa ón biglièt an Infermerìa.

Intervist.:           Quindi...fino a domattina, qui, ci siete solo voi!

Cèco:                A ésega vià Suor Gioia, staséra fóm baràca! (Pausa) Ma...che ràsa dè domànde éle chèsta? Sìv dè la Tiliviziù...o sìv dè la DIGOS?!

SCENA VIII°

Detti

Intervist.:           Gàl vòja dè schersà, Cèco? Io volevo solo misurare...l’efficienza del personale nelle funzioni di assistenza.

Paulì:                Ga l’óm za dìt che nóter sa ràngem a pèr tròp e, ànsi méno zènt ma gìra ‘ntùren...e pö sóm contécc!

Intervist.:           Bene. Bene! (Rivolta alla telecamera) Gentili telespettatori, questi nostri amici della Terza età, si accingono ora a trascorrere...una piacevole serata in compagnia della Televisione...

15

Cèco:                E dè ‘na partìda a Poker. Ma prìma ‘ndóm a séna!

 Intervist.:          Certo. (Alla telecamera) Vi abbiamo già offerto uno scorcio suggestivo del Refettorio, nel salire. Una bella saletta ariosa...

Pina:                 La ölarà dì: piéna dè ària...che ta sifùla ‘ndè le gàmbe! Però fà neènt...al mangià l’è mìga gram...

Franco:              A pàrte ‘l budìno...

Intervist.:          E’ stata comunque un’Intervista piacevole e toccante...quella che si dice: TELEVISIONE DAL VERO...DAL VIVO...

Cèco:                 Ma dispiàs apéne che sìv mìa riàcc ón quàrt d’ùra prìma...södenò garèsev pudìt registrà apó la Vìzita dèl Banchér!

Intervist.:          Che ga èntrel al Banchér? (Sguardi di complicità con i soci T.V.)

Paulì:                 Chèla sé... che la sarès stàda ‘na bèla “Intervìsta”! Al Banchér...che ‘l ghìa sintìt che Cèco ‘l stàa mìga tat bé...l’è curìt an sà pèr véder se ‘l pudìa scampà fìn a la fì dèl més...e rià a pagàga ‘na Cambiàl an scadènsa. Al ghìa portàt ón pachèt dè sigarète, cóme scüza pèr vègner ché...e Cèco al ga i à zbatìde dré!

Intervist.:          Ma sömèa dè capì che óter...ai Banchér...ga ülìv mìa tat bé!

Cèco:                 I Banchér j’è al contràre dè Robin Hood! Lü...al gà robàa ai Siòr pèr dàghen ai poarècc...e i Banchér...

Paulì:                ...i gà ròba ai poarècc, pèr dàghen ai Siòr! Se ma é ‘n mènt...che gó laoràt trènt’àgn pèr fà dórmer bé...la zènt cóme chèi lé...

Intervist.:           Ma...che mestér fàel lü?

Cèco:                Al ghìa ‘na Fàbrica dè pórte blindàde...cassefòrti...e i campanèi lé...chèi che sùna apéne che i a tóca...

Paulì:                 I “SISTEMI D’ALLARME”. Pinsì che l’impànto che ghè dè là dèl mür dèl cèso...l’ó fat mé apó a chèl! E adès ma sa tróe pintìt fés!

SCENA IX°

Detti - Lina - Bruno

Lina:                 (Entra. Poi si rivolge all’esterno) Vé dènter Bruno...ghét argògna?  (Entra Bruno, con chitarra. Scambia cenni di saluto con gli Anziani) Chèsto l’è Bruno, al mé murùs. (Stretta di mano con i Televisivi)

Pina:                  Ardì che l’è ‘n gràn brào s.cèt! Al vé sèmper ché a fàm ‘na quàch sunàda, pèr tiràm sö ‘l moràl. E ghì dè sènter cóme che ‘l sùna bé!

Franco:             (A Bruno) Ma ghìet mìga dè ègner domà...té?

Lina:                  La cólpa l’è mé. Só stàda mé a telefonàga. An dè ‘l véder che ghìa ché la Televiziù...gó pensàt che...

Cèco:                ...che se i ga làsa fà ‘na cansù ‘n Dirèta, al pödarès fà carìera!

Pina:                  Che ghè dè mal? L’è ‘n brào s.cèt, l’è ‘n bèl s.cèt, al cànta bé...

Cèco:                Gói dìt dè nò, mé? (All’Intervistatrice) Lasìghela fà...’na cantàda! Va garantése che va troarì mìa pintìcc!

Bruno:               Ma nò, Cèco. Mé só ‘gnìt apéne perchè só curiùs...ma gó argògna...e pó gó zó la us fés, fés!

Paulì:                Però, la chitàra, ta l’è töda sö!

Bruno:               Sé. Ma dè cantà...ma sa sènte pròpe mìga.

Intervist.:          E poi si sta facendo tardi...

 

16

Bruno:               ...ma se cànta Cèco, mé ‘l compàgne ontéra!

Paulì:                La sàla mìa che Cèco ‘l scriìa le Comédie e ‘l fàa ‘l Cantautóre?

Intervist.:           O perbacco! Anche se è tardi...uno “Scoop” simile non me lo voglio proprio perdere! (Al Cameramen) Pronto?

Pina:                 Dài s.cècc, müivela! Sa sà mài che ‘ndìghev a la “RAI”...ansèma!

Cèco:                 Nóter ölóm andà a San Remo! Cón töcc i ansiminìcc che ga à adès...sa sà mài dèbù!

Intervist.:          (Alla telecamera) In prima assoluta mondiale, il “Duo” Bruno e Cèco...

Paulì:                 ...e Paulì...  (Si alza)

Intervist.:           ... vi presenteranno una loro canzone...

Bruno:              Quàla fómei, Cèco?

Cèco:                 Cantóm la...”Serenàda”! Chèla che ghìè scriìt a Pina trènt’àgn fà, quànd che la ma ulìa mìga...

Pina:                 Però...dòpo t’ó ülìt!

Cèco:                 Quànt e mài che l’ó scriìda! Dài tàca Bruno, alà...!

                          (Bruno accorda la chitarra. Paulì prende un mandolino dalla parete oppure un’altra chitarra. Parte la base registrata strumentale de la “Serenàda”, oppure la registrazione completa, se Cèco non canta in diretta)

SCENA X°

Detti

Cèco:                                      Nòt dè stèle, ciàra - ciél födràt dè séda

                                    dài chitàra, cànta - sùna, piàns e rìd cón dè mé...

                                               dèrv la só finèstra - cón dè ‘n sfrìs dè lüna,

                                    dài chitàra, cànta - sùna e dìga che mé só ché!

                                               Va a postàt söl cusì - va e dàga ‘n bazì

                                    e dighèl té, Serenàda - chèl che patése pèr lé.

                                               Va a postàt söl cusì - va, dàga ‘n bazì

                                    e dìghel té, Serenàda - che pèr lé vöi cantà fìn domà!

                                               Nòt dè stèle, ciàra - dórma, cör dè préda,

                                    cànta pö chitàra - : l’è matìna e ma tóca ‘ndà vià...

Intervist.:          E’ bella! Molto bella! (Singhiozzo) Non so se i nostri ascoltatori più giovani la potranno apprezzare completamente, ma sono convinta che, nei meno giovani, questa serenata avrà fatto vibrare le corde del sentimento e della nostalgia... (Altri singhiozzi ed eventuale spremitura di un fazzoletto intriso d’acqua)

Cèco:                 Se la va sömèa ón pó ‘mpianzoléta... (Prende la chitarra) prüì a scoltà chèsta!

Paulì:                Dall’Undicesima Sinfonia di Beethoven, in SI bèl mòlle Maggiore...vogliate gradire:

CORO:                                   Mödandìne - ricamàde  -   ricamàde dè séda négra

                                         pèr mantègner la frétola alégra,  -   pèr mantègner la frétola alégra.

                                               Mödandìne - ricamàde  -   ricamàde dè séda négra

                                  pèr mantègner la frétola alègra,  -   pèr fà crèser al föch dè l’amùr!

                          (A questo punto i“Televisivi”raccolgono gli attrezzi ed escono di scena veloci)

F I N E    A T T O   II°

17

A  T  T  O  I I I°

 

SCENA I°

Paulì - Pina - Bruno - Lina - Franco - Cèco

Lina:                 ( Da un vassoietto distribuisce pillole e gocce) Le göse dè Paulì. La pastìglia dè Pina. (Si sente dal bagno lo sciacquone) La capsula dè Franco... (Si guarda attorno. Franco esce dal bagno)

Franco:              Só ché! (Prende e inghiotte)

Lina:                 E chèla de Cèco. An dó él Cèco?

Paulì:                 L’éra zó an Refetòrio...

Pina:                 Ma nò! L’è ‘ndàt a mitìs la “Divìza dèl Pòker”. (Si sente Cèco che canterella e entra in giacca da camera e visiera da Poker) Ardel ché...che ‘l rìa.

Cèco:                 Ghè riàt “l’uomo dal braccio d’oro”! Ei pròncc i polàster pèr fàs pelà?

Lina:                 Prìma ghè dè tö la pastiglia pèr dórmer! (La porge. Cèco la mette in tasca)

Cèco:                 Ta sé malàda ‘ndè ‘l có...té! La töe pö tàrde. Ta ölaré mìa che ma ‘ndormènte antàt che só dré a majàga le palànche a lürche...éra?!

Lina:                 Però ghé dè töla, nèh Cèco? Se nò domà matìna, ta sè amó ché a lèzer i giornài e a consömà la corènte! (Pausa) Adès l’è pròpia l’ùra dè ‘ndà...éra Bruno?

Bruno:               Eh sé! Però...l’è stàda ‘na gràn bèla séra...nèh Cèco?

Cèco:                Ma sa sènte ‘ndè ‘l sàngh...che, ‘n có a ‘na setemàna sóm só töcc i Giornài! (Ironico)

Lina:                  A riidìs a dómà, alùra.

Bruno:              Durmì bé, nèh! (Bruno e Lina escono. Pina fa per accendere la T.V.)

Cèco:                 Zmórsa chèl redàbol lé! Ta faré mìa debù...nèh?!

Pina:                 Ma...a le òt e mèza...i fà: “La Piovra”!

Franco:              Nóter anvéce fóm...i pès gàcc...oltàcc e perlàcc!

Paulì:                Sèntet zó, Pina. Ta ‘l sé che ma piàs mìga zögà ‘n tré.

Pina:                  Ma ardì, Signùr, che ma tóca fà! Só ‘gnìda al Ricòvero che ghìe mài zögàt gnà a “Brìscola”...e m’è tocàt amparà a zögà a Pòker!

Paulì:                E ta ghé ‘mparàt bé, àch! Mé pèrde sèmper...e té...mài!!!

Pina:                  Però...vignì mìga a lamentàv dòpo...se va péle cóme ché ‘n mà!

Franco:             Sentomès zó, dài! (Preparano il tavolo da gioco) Andó éle le càrte?

Cèco:                 (Le toglie di tasca) Ardele ché ‘ndó i’è. (A Pina) Tö sö le tachèle!

18

SCENA II°

Detti

                          (Pina si dirige all’armadietto per prendere le fiches)

Paulì:                Arda dedré a la scàtola dè le fasète... (Pina esegue) che ghè la mé butìglia dè gràpa!

Pina:                  (Prende)  Ma n’ét mìga asé...dè la mèza bàla che ta ghé zgurlìt ancö dopodiznàt?!

Cèco:                (Giocando sull’equivoco) ‘Na ólta o l’ótra ta egnarà ón cólp, a té!!

Paulì:                 (Versa per tutti e brinda) Se chèsto l’è ón cólp...che Dìo ‘l ma na mànde giü ògni sìch münücc! (Tutti bevono, mentre Pina distribuisce le fiches) Chi fà ‘l màs?

Pina.                 La càrta pö àlta. (Pescano una carta per uno) Tóca Cèco...tat pèr cambià!

Cèco:                 ( Mescola le carte) Sa dèrv al “Piàt” e ‘l “Rilancio Massimo” dè quàt al fómei?

Pina:                 Rilancio libero! Isé va péle pö ‘n frèsa. E tirì föra la palànche: “Marinai an coperta”! (Toglie dalla scollatura diecimila lire)

Franco:              Chì...pó! Ché sa zöga só la “Paròla”!

Paulì:                (Ironico) Cèrto! Isé, a la fì’, chi ga i’à, i pàga...

Cèco:                 E chi ga i’à mìga i sègna! (Distribuisce le carte.Gli altri mettono una fiche sul tavolo)

Paulì:                (Dopo aver visto le carte) Pàse!

Pina:                  Mé dèrve...al “Piàt”! (Mette delle fiches al centro)

Franco:             Vìa, vìa! (Depone le sue carte, meno una che intasca)

Cèco:                 Mé zöghe. (Conta e mette in centro le sue fiches)

Paulì:                Dò ólte!! (Butta platealmente un numero di fiches doppio)

Pina:                  Al tàca...Onassis! (Pensa e aggiunge le fiches) Però zöghe löstes!

Cèco:                Apö a mé...zöghe! (Pareggia le fiches. A Paulì) Quànte càrte?

Paulì:                Dò. (Avutele, incomincia a scrutarle adagio. Pina si distrae,guardando la finestra)

Cèco:                 (La sgrida, seccato) Té! Quàte ‘n völet?

Pina:                 (Riprendendosi) Servìda! (Si volge ancora alla finestra) Ma óter...ghìv mìa sintìt ón rumùr...cóme dè ‘n camiunsì?

Franco:              Andóe pó!?

Pina:                 Lé! ‘Ndè ‘l vìcol!

Cèco:                 Té ta dé i nömer! Al vìcol l’è strèt, l’è stòp! E dè quànd che i gà müràt la pórta dè Gìno...ghè pö gnà ón ös! Che ga ègnel a fà ón camiunsì, lé déter?! (Pina e Paulì guardano la finestra.Franco approfitta per passare a Cèco la carta  nascosta)

Franco:             ‘Ndóm aànti a zügà, pötòst!

Paulì:                 Tóca Cèco...nèh! Té, quàte ‘n càmbiet? (A Cèco)

Cèco:                 Mé? Giöna! (La prende dal mazzo, la unisce alle sue) Chi tóca bofà?

Paulì:                 (Aggiungendo altre fiches) Sichmìla!

Pina:                 (Raddoppia) E sìch...dés!

Cèco:                 (Triplica) Trentamìla!!!

Paulì:                I vède (Pareggia le fiches di Cèco)

Pina:                  (Scrutando Cèco e Franco) Ghìv za tacàt a zögà sót-gàmba...óter du? (Pausa) Mé le mète sóta...ma adés va tènde!

Paulì:                (Radioso) Mé gó ón “Full dè Gèch”! (Distende le carte sul tavolo)

Cèco:                 (Fingendosi contrito) Mé, ‘nvéce...gó apéne...quàter biciclète!

Franco:             Pòker dè òt! (Guarda le carte di Cèco) Ma che cülàte che ta ghé!

Pina:                  Sèntei! I fà apó le “Comédie”! Ma l’è gnamó séra!!! (Cèco raccoglie la vincita)

 19

SCENA III°

Detti - Intervistatrice - Cameramen - Tecnico

Paulì:                (Mescola molto bene le carte)Tóca a mé, éra? (Distribuisce. Pina si volta ancora alla finestra. Quando Paulì’ le dà la terza carta, gli blocca il polso)

Pina:                  E mé va dìze che lé föra ghè ón Camiunsì!! Gó ést apó ‘l  zbarbelà dèi fanài!

Cèco:                E alùra? Al searà ón quàch...gnarelòt...che ‘l völ tègner a mà la benzìna! E ‘nvéce dè ‘ndà ‘n camporèla...al s’è ‘nfilsàt lé déter!

Paulì:                 I va mìga a leàl nüsü...lé, ‘n dè ‘l vìcol!

                          (Pina ignora gli appelli e si dirige verso la finestra. La spalanca...e si trova davanti un mitra, puntato dal Tecnico elettronico,coperto da passamontagna e tuta nera)

Pina:                 (Arretrando atterrita) Cèco...Ceco!

                          (Cèco, combattuto tra l’invocazione di Pina e l’istinto di fuggire verso la porta, rimane bloccato in mezzo alla scena. Paulì e Franco corrono alla porta laterale e sono fermati dall’Intervistatrice e dal Cameramen, anch’essi mascherati ed armati di pistola. I quattro anziani vengono spinti verso la parete senza aperture. Il Tecnico scende dalla finestra e la rinchiude dall’interno)

Tecnico:             (Ai suoi compari) Purtì dènter la ròba! (I compari escono  e tornano con due borse e una valigia. Depongono il tutto a terra. Riprendono la sorveglianza degli ostaggi)

SCENA IV°

Detti

                          (Gli anziani sono con le mani in alto. Cèco ne abbassa una dietro)

Tecnico:             Fermo!

Cèco:                (Riporta le mani in alto) Ulìe gratàm le tunsìle...

Pina:                  Cèco...ta prèghe...fa sìto!

Paulì:                Öh, la Madóna! Al gà mìa copàt nüsü...

Tecnico:             Fì sìto töcc!

Franco:             (Si accascia sorretto da Paulì e Cèco) Oh dio...ma é dè stà mal... (Il Tecnico affida il mitra all’Intervistatrice e con il Cameramen trascina Franco a sedere al tavolo da Poker. Paulì è preoccupato)

Paulì:                 Bizògna dàga le göse...

Tecnico:            Che ròba éla? (Indica la bottiglia di grappa sul tavolo)

Paulì:                 L’è la mé gràpa.

Tecnico:            Al bée ‘n gós dè gràpa! (A Franco, che esegue volentieri)

Pina:                  (Furiosa) Ma schèrsel?! Al völ fal mörer...al völ fam mörer töcc!

Franco:             (Beve ancora a canna) Ma sömèa dè stà ón brizinì pö bé... (Singulto)

Tecnico:             Adès bàsta, nèh? (Ai compari) Ligómei! (Legano Cèco,Paulì e Pina.L’Intervistatrice, per legare Pina, mette la pistola sull’armadietto. Poi la dimentica. Pina la prende come può, a mani legate e la punta sull’Intervistatrice)

Pina:                 Signorìna...la s’è dezmentegàda...chèsta... (L’Intervistatrice si volta, vede la pistola. Alza le mani.Il Tecnico,da dietro,disarma Pina. Si rivolge all’Intervistatrice)

20

Tecnico:             Crètina! Lìga chèl lé, a la zvèlta! (L’Intervistatrice lega Franco) Adès...metóm le càrte ‘n tàola! (Dà la pistola all’Intervistatrice) E té...àrdet atùren, ’n ’ótra ólta! (Rivolto agli anziani) Óter, dirvì bé le olàne. Fìn dès v’óm ligàt apéne le mà. Se stì quacì...sènsa müìv ...e pinsì apéne a tirà ‘l fiàt...nóter va tóchem pö...fóm al nòst mistirulì, va salüdóm e partóm. Ma...se ghè argü che völ fà ‘l fürbo, a ‘ndà bé va ligóm i pè e va stopóm la bóca cól ceròt...e a ‘ndà mal, prìm che i ma ciàpe, va fóm crèser ón péer d’èti pèr ü!!!

Cèco:                Ma nò, ma nò, Siòr. L’è isé grév dè digerì...’l piómb. Fó za fadìga có la càrne a lès...

Tecnico:             Eco, brào. Ciapómela söl rìder, che l’è mèi. Però ‘ndómeghen an föra...prìm che ègne matìna!

Paulì:                Càpo...ga rincrès dìmel...chèl che ülì? Me gó ‘n scarsèla setànta mìla frànch... e trentamìla gó za dè dàghei a Cèco. Poker dè òt...

Pina:                  I mé...i’è za sö la tàola.

Franco:             Mé gó...quatermìla frànch!

Cèco:                Mé dudesmìla...ma gó mìa edèa che va ocóres le nòste zmelegösie!!

Tecnico:             Ga pórtem mìga vià la monéda ai vèci, nóter!

Cèco:                L’è chèl che pènse apó a mé. E alùra? (Pausa. Pensa di aver capito) Gó ‘l sospèt che óter...ghì òja dè fà ‘na giràda ‘n dè ‘l cèso!!!

SCENA V°

Detti

Pina:                  La Bànca!

Paulì:                Ma cèrto! L’è Venerdé dè séra...le pulisìe i’à za fàde...domà l’è Sàbot...

Tecnico:             ...e se óter stì quacì...a guàl dè domà matìna a bunùra, nóter fóm ón bèl buzilì an dè la parèt dèl cèso, dèrvóm chèla farenéra che i ciàma “Cassaforte”...

Paulì:                Só curiùs dè éder... (Molto scettico, da buon costruttore)

Tecnico:             ...e ga petènem töt... apó le monéde dè sinquànta frànch!

Cèco:                Pèr chèl che ma ‘n fréga...pudìv cumincià apó a sübet! Za che sì dré...fìl bèl grànd, al büs. Isé. Lönedé matìna, pödaróm véder bé la ghìgna che ‘l farà ‘l Banchér!

Pina:                  A belàze... cól cumincià! Se va ga öl isé tat tép...l’è mèi che ma lasìghev andà a fà ‘na pisadìna, prìma: só débola dè isìga mé!

Tecnico:            A la zvèlta però...e fóm mìga schèrs! (Indica all’Intervist. di scortare Pina al bagno)

Pina:                  Che schèrs gói dè fà? Dè pö che v’ó dat andré apó la pistóla...  (Si dirige al bagno, mostrando le mani legate all’Intervistatrice e questa annuisce. Entrano in bagno)

Tecnico:            Dóca. Cèco l’è decórde, Pina l’è mìa contrària...e óter du, (A Paulì e Franco) ghìv argót an contràre, se ga dóm ‘na rezentàda...dè la bànda dè là? (Indicando il bagno)

Franco:              Se ülì portàga vià apó le scàgne...pèr mé l’è löstès!

Paulì:                Se ma ‘l domandàev stamatìna...v’arès dìt dè nò. Ma dòpo ìga ést al Banchér...cóme ‘l gà tratàt Cèco, va dó la mé Binidisiù!

Tecnico:             Decórde alùra! E se töt al va bé...prìm dè pàrter va làsem zó apó argót dè ordenàre!

Franco:             Chèla l’è ‘na bùna idèa!

Cèco:                 Però...ghè ‘n péer dè cöncc che ma tùrna mìga. La Bànca...l’arìv apó stüdiàda. Al vìcol...löstès, ma...

21

Tecnico:            (Estrae dei fogli) Gó ché la piantìna dè töt al quartiér e, ‘n pö, só stat ché ‘n gìr pèr dùdes dé a tindìga a chèi che laùra ‘n Bànca, a le fónne dè le pulisìe e a la vigilànsa. La “Vigilànsa”... (Guarda l’orologio)... la pàsa dè ché a dés münücc e, dòpo, la tùrna a le sìch. (Il Cameramen prende da una borsa uno stetoscopio e lo indossa)

Paulì:                 Fìn ché...’ndóm bé. Ma, a la zènt che girarà ché déter, ghìv pensàt?

Tecnico:            Ché? Fìn domà matìna a le òt...vé nüsü!

SCENA VI°

Detti

Cèco:                 Ghét capìt...lüche? Se l’è mìa ‘l Signùr...l’è só niùd prìm! (L’Intervistatrice e Pina escono dal bagno. Il Cameramen vi entra)

Tecnico:            Adès ghè ‘na ròba sùla, dè decìder. (Spiana la piantina sul tavolo e invita Cèco e Paulì a consultarla) Se scaóm al mür ché, dedré dè la cassafòrte, pödarèsem apó ‘ndà a belàze, perchè dè là i vedarès  neènt. L’è asé che sa fermómes per le sìch, lasà che pasè chèi dè la Vigilànsa...e ‘ndà aànti dòpo. Però, a fà isé, ma nas dèi perchè.

Paulì:                 Brào!

Tecnico:            Da adès a ‘n quàrt a le sìch...góm ón sàch dè tèmp pèr zbàter zó ‘l mür dedré a la cassafòrte. Ma se fenésem...metóm a le tré...ma tóca fermàs e spetà che pàse la rónda!

Cèco:                 Perchè va tocarès fermàv? Se dè la sa edarès neènt...püdìv mìga taiàla löstès...la parét de fèr? Se a dés a le sìch...sìv gnamó riàcc a dèrver al cül dè la cassafòrte...sa ‘n bèv ón gós ansèma ‘ntat che pàsa la rónda...e dòpo sa fenés dè taiàla e sa la öda!

Tecnico:            L’è mìga isé fàcil! Sa pöl mìa taiàla có la “Fiàma osìdrica”...se prìma nó sa ga  destacàt l’alàrme! Metóm che ...a le quàter e mèza...góme gnamó finìt. Che fómei? Tacóm ansèma i fìi dè l’alàrme...antàt che pàsa la rónda...e dòpo i destacóm amó ‘na ólta?

Franco:              Andó pàsei andóe, ‘nsóma, stè fìi?!

Tecnico:            (A Paulì) Lü che dìzel?

Paulì:                 Dè dré a la cassafòrte i va ‘n pó dè pèr töt...ma sö la parét an bànda i’è töcc ünìcc. L’è lé che bözognarès taiài. (Si blocca) Ma...perchè ma ‘l domàndet pròpe a mé?! Perchè mé ‘l só...ndó che pàsa i fìi...e té ta sé che ‘l só!

Cèco:                E só argót apó a mé! Dòpo séna gó töt an mà la Guida dèl Telefono...e TI.VU. Brescia...la ghè mìga!

SCENA VII°

Detti

Pina:                  Perchè l’ét mìa dit sübet?

Cèco:                Perchè i’è Televiziù che...’ncö le ghè e domà le ghè mìa! E ‘n pö ülie éder cóme la ‘ndàa a finì E, a la fì, ghè riàt lùrche...!

Tecnico:             Alùra...ghè dè pasà a la secónda solusiù. Anvéce dè zbüzà de dré al Water, sa zbüza ‘ndo ghè la dòcia e sa é föra a sinìstra dè la cassafòrte. Sa ga mèt al “Plàstico” e sa fà saltà ‘l sportèl. Ma alùra...o sa fà töt prìm dè le quàter e mèza...o sa ‘l fà pö!

Franco:             Ardì che ‘l tèmp al pàsa. Metóm ai vóti.

Cèco:                 Ma té...che ga èntret chì? Sómei dré a fà la “SOCIETA”?!

22

Pina:                 Ta ghè rizù, Cèco. Ma, a nóter vèci, dòpo més e àgn che i ma dà mai neènt dè fà e dè pensà...cóza öt che ta dìze...se ma sàlta föra ón ‘ocaziù cóme chèsta...mé ma sa sènte amó ìa, ma fügürarès dè...

Tecnico:             Nèh, Siòri! Ardì che l’è ‘ndè ‘l vòst interès...se ma dì ‘na mà!!!

Cameramen:    (Rientrando) La rónda l’è apéne ‘ndàda vià! (Il Tecnico annuisce)

Franco.              Ragionómega sùra. Al sìv...che se ga stóm., góm neènt dè pèrder...e töt dè guadegnà? Se i vötem...garèsem la gràn sudisfasiù dè éder al Banchér a cridà cóme ‘na ìt! E... (Guardando i banditi) ...apó ‘n brìs dè sólcc! (Pausa) Se ‘nvéce la à mal...la à bé löstès! Töt chèl che i pöl fà...l’è mitìm an prizù. E ché, ‘ndó sómei?! Ela mìga ‘na prizù apó a chèsta?! L’ünica diferènsa l’è che adès ma tóca pagà dè pö dè ‘n Miliù al més... e ‘nvéce, an galéra, i ma mantegnarès a GRATIS! Metóm ai voti: chi ga stà al vàlsa la mà!!!

SCENA VIII°

Detti

                          (Cèco, Pina e Paulì alzano le mani. Il Tecnico deposita il mitra)

Paulì:                Al sàpe ciàr che: dal momènt che va ötóm. Ris.cióm apó a nöter la galéra...e alùra l’Ordenàre l’è mìa pö asé!

Tecnico:             Sóm decórde! Se la à bé...spartóm an sèt möcèi!

Cèco:                Adès sa ragiùna! Caìv i preservatìv che ghì söl có, che ormài i va sèrv pö a neènt! (I banditi si tolgono i passamontagna, suscitando reazioni di sorpresa o conferma) Óter du, (Al Tecnico  e all’altro) purtì dè là i fèr e ambiìv a scaà ‘ndó che va dìs Paulì! (I due vanno verso il bagno con le borse, seguiti da Pulì che mostra le mani per farsele slegare)

Franco:              Lùrche, se ga fösem mìga nó...i sarès bu gnà a dèrver al Giornàl!! Oter che cassefòrti!

Cèco:                (All’Intervistatrice) Té, biónda! Peséga a dizligàm föra! (Lei esegue, mentre dal bagno arriva il rumore delle prime martellate) Paulì!! (Paulì si affaccia) Dìga dè mèter ón stràs...söl scalpèl, södenò sa desèda i mórcc!

Pina:                  E sàra l’ös...che sa sentarà méno cazì (Paulì torna in bagno, esce subito dopo e si dirige al telefono)

Paulì:                Gó dè fà ‘na telefonàda.

Intervist.:           (Gli punta la pistola) Férmo lé! Chi ta l’à dit?

Paulì:                 L’ó dit mé...Giulìva! Se l’è éra che sóm sòci...teléfone. Se nò...ma sènte zó...e sa ‘n pàrla pö dè guèra!

Intervist.:          (Va alla porta del bagno. Aumenta il rumore) Paulì al völ telefonà!

Cameramen:      (Appare sulla porta, con la mazza in mano, impolverato) Làsa pör che ‘l teléfone. Sóm za decórde! (Rientra in bagno e chiude la porta)

Paulì:                (Compone il numero) Ardóm se rispónd mé fiöla. Prónto? Luìza? Só mé! ---Só tò pàder!---Andóe?---A le Seicelles? Gó göst pèr té!---Sét bùna dè fà sìto’n münüt? Scólta: Ma ocór chèla  valizìna che ghè söl scafàl, an dè ‘l Stüde---Chèla négra, sé! La “Ventiquattr’ore”---Cóme: Quàndo? Sübet! La ma ocór sübet!---Ma se ga öl dés münücc a rià ché!---La valìs ta la fé dòpo. Pórtamela ché sübet...perchè se nò ta la scöntet! Ghèt capìt?---Nò, la ciàv ga l’ó amó mé---Sé möetela!---Ciào. (Riappende)

23

SCENA IX°

Detti

Pina:                  El mìga mèi che àghe zó a spetàla?

Paulì:                Cèrto. Góm dè schià ‘l perìcol che la ma càpite ché ‘nsìma, Se però ta édet che la öl vègner sö pèr fórsa...dàm óna us, prìm dè lasàla pasà. Dìga dè ötàt a fà le scàle...

Pina:                  Fó parì dè ‘ndà sòpa!  (Esce dalla porta principale)

Cèco:                Che ghét dènter...an dè la valizèta?

Paulì:                 Töte le schéde dè i Impiànti che gó mitìt zó fina al dé che i m’à obligàt a ‘ndà ‘n Pinsiù.

Intervist.:          E...ghé déter apó a chèla lé?  (Indica il bagno)

Paulì:                 Cèrto! Dal momènt che sóm sòci, ma convé ‘ndàghen an föra ‘n frèsa! Mé gó sèmper calcolàt ‘na “cumbinasiù” a la setemàna...pèr quàter setemàne. L’è asé fà ‘n pó dè cöncc...e sa pöl dervìla cón du dìcc!

Intervist.:          Sìv pròpe dré a guadegnàvela...la òsta pàrt!

Franco:              L’è chèl che ülìe dì mé!

Intervist:           Mé, però, ölarès saì cóme ghìv fat a rincurzìv che nóter...sìem amó chèi dè TI.VU. Brescia?

Cèco:                 M’ìv töcc pèr stüpecc...ah! Nóter anvéce sóm vècc...che l’è töt al contràre dè stüpecc! Dóca: ancö rìa ché tré saiòcc dè la Televiziù. Du i pàrla...e giü ‘l fà sìto. Dòpo séna an rìa ché amó tré...töcc mascheràcc. Steólta ga n’è apéna giü che ciciàra...e i öter i tàs! Dìzemel té...al perchè! Pèr mìga fav conóser da la us!

Paulì:                E perchè, ‘l tò sòcio, el vignìt a domandàmel pròpe a mé...ón parér sö la cassafòrte? Perchè ‘l sìa za che l’ére mèsta zo mé! Pèr mìa parlà dè töte le domànde söl personàl...che le m’à fat vègner...i prìm sospècc!

Intervist.:           E Franco...l’al capìt apó a lü...dè pèr sò cönt?

Franco:             Sé, bèla! Ma mé sö mìa stat lé tat a scarpelàm al có. Quànd che éde ón bèl cülatì...ma ‘l dezmènteghe pö !! E quànd che ‘l stès cülatì al ma capèta a du dicc dè i öcc...dò ólte ‘ndè la stèsa séra, cóme öt che fàghe a mìa ricunusìl?

SCENA X°

Detti - Giacumì

                          (I due “scavatori” rientrano dal bagno, tutti impolverati)

Cameramen.      Dè là ghè ón büs...che ga pàsa ‘n tratùr! Che ùre éle?

Cèco:                L’è gnamó mezanòt. Sóm an antìcipo sö la tabèla dè màrcia!

Tecnico:             Ma góm amó dè destacà l’alàrme...e dè dèrver al sportèl. (Pina si affaccia e comunica a gesti che è arrivato qualcuno dall’esterno)

Paulì:                Ghè dré a rià la ciàv pèr dèrver al sportèl! (Ai banditi) Zvèlti, ‘n dèl cèso! (I banditi si chiudono nel bagno. Piìna apre la porta) Ma ardì, Signùr...ghè ché ‘l mé Giacumì! (Entra Giacumì con una valigetta)

Giacumì:            Ciào nóno! (Assonnato e seccato. Paulì lo accarezza)

Paulì:                Comöd che ta sé isé gnèch?

Giacumì:            Chèl’òstrega dè mé màder...la m’à fàt desedà dè nòt...pèr portàt chèla laùra ché! (Gli consegna la valigetta)

24

Paulì:                Ma ...sét vignìt dè pèr tò cönt?

Giacumì:            Ma nò, nóno. L’è zó ‘n màchina a spetàm. L’éra drè a fà le valìs...an pigiàma, e l’è mìa stàdda lé a istìs. E isé la m’à töt dré mé, có la sòn che gó adós!

Paulì:                Dizóm che la gà mìa ülìt fà la fadìga dè salüdà sò pàder. Fa neènt alà! Sa, vé ché a dam ón bazì. (Giacumì lo bacia e riceve la mancia)

Giacumì.            Gràsie, nóno! Östa  pèr chèl...ta ‘n dó amó giü! (Va verso l’uscita, poi si volta) Mé...gó bizògn dè fà ‘l pisìì..

Franco:             Fèrmet! Sa pöl mìga!

Giacumì:            Perchè?

Cèco:                Dè nòt...al bàgn i la sàra! I gà póra che s’andormentóm söl Water!

Piìna:                 Vé cón dè mé, Giacumì, ché ta la fó fà zó dè bas. (Esce con Giacumì. Paulì  apre la valigetta.Toglie delle schede,le studia.Cèco va al bagno,chiamae i banditi che escono)

SCENA XI°

Detti

Cèco:                An dó i ìv zbatìcc i quadrèi?

Cameramen:      An pó dè sà...e ‘n pó dè là.

Cèco:                Brào macù! Mitìi an bànda bé...e dìga ‘na netàda, ndè ‘l pasà, per mìga lasà zó le pèche dè le scàrpe!!Al sìv che i pödarèss ancapàv apó cón chèle?(Intervist. e Teecnico tornano in bagno. Pina li raggiunnge con scopa e stracci. Il Cameramen si toglie le scarpe)

Cameramen:      Isé làse zó neènt! Sómei a sègn, pötòst, có le càrte? E l’alàrme...cómei,cóme ‘l destacómei?

Paulì:                (Richiude la valigetta, trattenendo una scheda) Dóca. Al sét andó che l’è l’Ufìcio dèl Banchér? Dè dré a la pultrùna  ghè ‘n armadièt,. Té ta ‘l dèrvet... (Intanto rientrano dal bagno Pina e i banditi. Pina rimette al loro posto stracci e scopa)

Cameramen:      E se l’è saràt?

Paulì:                 (Scherza il Cameramen) Ma delamadóna! I völ saltà le Bàncche...e i’è mìga bu dè dèerver ón antèl! Tö sö ‘n casaìde...e tóca neènt sènsa guàncc. Mètei sübet!

Cameramen:      (Mettendo i guanti) E dòpo?

Paulì:                Ta dèrvet l’antèl. A dèstra, sö la parét, ghè ón perlì. Ansìma ghè: “ON” e sóta ghè: “OFF”. Ta zbàset sö: “OFF” e l’alàrme l’è destacàt!Dòpo ta é a la Cassafòrte. Deànti ghè la rödela cón dè i sò nömer. Tò! (Gli mostra la scheda) Tré  adèstra...Quàter a sinìstra...Du a dèstra...amó òt a sinìstra...e ta tìret le manésa!! E pó i dizarà che i gà fat töt lùr!!! (Il Cameramen si dirige verso il bagno,c con la scheda. Paulì estrae dalla valigetta una pistola che punta su di lui. I tre banditi si bloccano e alzano le mani)

Tecnico:             Ta l’ìè dit dè mìa fidàt! Ta l’ìe dit che i m’ambroiàa!

Paulì:                Mà é gnà ‘n mènt dè ‘mbroià. Chèsta l’è apéne pèr mìa éser fregàcc a l’ültem müinüt! E ritignìv förtönàcc che pretendóm mìga dè pö...cón töt chèl che sóm drè a fà! (I Banditi si tranquillizzano) Vignì a ligàm amó) vignì a ligàm amó le mà! Se rià la Pulisìa...nóter sóm prizonér!

Cèco:                 E ‘n ótra ólta...dìga ‘n ‘öciàda ‘ndè le valizète...macù! (Il Cameramen va nel bagno)

Pina:                 (Mentre i compari  li legano di nuovo)Ghìv pensàt a tö sö dèi sachèi pèr i sölcc?

Tecnico:             Cèrto che góm pensàt! (Apre la valigia e toglie qualche sacco di plastica che dà all’Intervistatrice) Va dè là a ötàga!

25

Pina:                 Vègne apó a mé! Vöi véder cóme fiv a spartìi!

Cèco.                 Bràa Pina! Arda che ‘n dè i nòs.cc sachèi, i mète apéne i bigliècc üsàcc. Oter ghìv tèmp pèr spindìi...nóter nò!  (I due vanno coi sacchi in bagno)

Cameramen:    (Che ne esce euforico)L’ó dervìda! (Paulì  fa abbassare la voce) L’ó dervìda...zvèlti!

SCENA XII°

Detti

                          (Pina e i banditi sono in bagno  a riempire i sacchi di soldi)

Franco:              L’è la ólta che ga ‘ndóm apó a nóter ...a le Seicelles!

Cèco:                Paulì...! Mé e Franco sóm dei poarècc che gà neènt dè pèrder...ma té, có la tó puzisiù e i tò sölcc...perchè fét ‘na ròba dèl gèner?

Paulì:                 Perchè ma só mài diirtìt tat...dè che só al mónd!! Ma  só tiràt zó trènt’àgn dè dòs. Vègne a mé...a le Seicelles! Ta ‘mmàginet...che góder a capetàga dènàcc a mé moér e a mé fiöla...a bracèto cón dè ‘na polàstra dè dözènt més?! (Entra l’Intervistatrice con un sacco gonfio di soldi e lo sventola davanti agli anziani)

Intervist.:          Ga n’è amó giü...pö gròs amó dè chèsto! (Infatti escono anche gli altri due,portando con Pina un sacco ancora più gonfio)

Pina:                  Chèsto l’è ‘l nòst! Töcc bigliècc üzàcc!

Paulì:                Pórtel an dè la tò càmera, sóta ‘l lèt. Le pàrcc le fóm domà (Pina e l’Intervistatrice escono, col sacco grande)) Dè là...ghè töt a pòst?

Cameramen:      Góm pasàt al stràs an tèra...e góm frigàt zó töte le manése!

Cèco:                E alùra...che spitìv a ‘ndà föra dèi pé? Mé tàche a ìga sòn! (Rientra l’intervistatrice. I tre si rimettono i passamontagna)

Tecnico:             Va salüde. Gó edèa che egnaróóm a troàv... ’na quàch vólta.

Intervist.:          Ardì dè mìa strepasàv nèh!

Franco:             Ciào...bèl cuölatì!

SCENA XIII°

Detti - Tirizìna

                          (Il Tecnico afferra il sacco dei soldi e gli altri la valigia e le borse. Si avvicinano alla finestra. Entra Pina seguita da Tirizìna, che scruta i banditi curiosa)

Pina:                  L’ó troàda ‘n fónd al curidùr, pròpe vizì a la mé càmera...

Cameramen:    Möòmesela...fiöi! (Il tecnico apre la finestra, monta sul davanzale ma, d’improvviso, viene illuminato dall’esterno)

VOCE:              (Amplificata, da fuori) SEI SOTTO TIRO! SCENDI LENTAMENTE E TIENI LE MANI BENE IN VISTA! (Il Tecnico fa cadere il sacco di soldi dentro il salone. Poi scende all’esterno. I due soci raccolgono il sacco e si precipitano alla porta. La aprono e la Voce riprende) USCITE CON LE MANI IN ALTO! (Allora buttano il sacco a terra, alzano le mani  e si arerendono, mani  e si arrendono,uscendo dalla porta)

Cèco:                Ma piazarès saì...chi gà ciamàt i Caarabiniér!

Tirizìna:             (Mimando una telefonata) Centotrédici! Prónto? Prónto! Ché i ròba! Centotrédici! Centotrédici! (Si affaccia alla finestra.Guarda giù)

VOCE:             VA TUTTO BENE LI’ DENTRO?

Tirizìna:             Òchei, tutto òchei! (Accentato sulla prima o, come l’OKEY su prato)

VOCE:             QUANTI ERANO?   (Tirizìna si volta. Cèco le mostra quattro dita)

26

Tirizìna:             (Torna a voltarsi verso l’esterno) Quàter! I’éra ‘n quàter!

VOCE:             CHIUDETEVI A CHIAVE NEL SALONE...FINCHE’ NON CATTURIAMO IL QUARTO BANDITO! (Tirizìna chiude la finestra, Pina pensa alla porta. Paulì nasconde la pistola in una poltrona. Cèco fa sparire la valigetta nell’armadietto. Nella confusione, Tirizìna prende il sacco rimasto e si mette a dividere i soldi in cinque mucchietti, sul tavolo)

Tirizìna:             Cèco...Franco...Paulì...Pina...e Tirizìna!(Altre banconote) Cèco...Franco...Paulì...

                          Pina...e Tirizìna..., Franco, Paulì, Pina...e Tirizìna!  (Altri soldi)    Cèco...Franco...Paulì...Pina...

                          e Tirizìna...Cèco...

Pina:                 (Tutti hanno ancora le mani legate) Ma che sét dré a fà...Tirizìna?

Tirizìna:             (Continuando a far mucchietti) Gó pensàt...che se i làder...i’è deentàcc quàter...chèi che spàrt i palancù...i deènta...sìch!!!!!

Pina:                 ...e a Lina ...ga dómei neènt? (Tirizìna fa un altro mucchietto)

Paulì:                 ...e a Bruno...che i gà mìga i sölcc pèr spuzàs? (Altro mucchio)

Franco:             ...e a Suor Gioia, cón töt al bé che la ma öl? (Altro mucchietto)

Pina:                  ...e i tré s.cècc che và ‘n prizù? I garà bözògn de l’Aocàt... (Tirizìna fa l’ultimo mucchioo. Cèco si alza e guarda sconsolato)

Cèco:                Gó a dè éder... se a la fì... ma ga entrarà ’na stéca dè sigarète!!!? 

                     (Musica de “IL VECCHIETTO”di Domenico Modugno. Sipario che si chiude lento)

F  I  N  E

 

27