’O guappo ’e cartone
Commedia in tre atti
Di RAFFAELE VIVIANI
PERSONAGGI
Gnesina
Affunzino, ’o 13
Taniello, ’o luciano
Pascale ’e dint’ ’e Virgene
Speniello
’Ngiulinella
Mariuccia
Assunta, la zia
L’Ingegnere Padula
Rachele, ’a guantara
Giovanni, suo marito
Erricuccio
Sanguetta, cioè Vincenzino
Donna Teresa, sua madre
Peppe Barracano
L’ostessa d’ ’a Pagliarella
Aniello Terremoto
Don Luigi, padre di Gnesina
La scena si svolge a Napoli. 1932
Commedia formattata da
ATTO PRIMO
Preludio. L’interno di un «basso», ripulito, rimesso a nuovo, nella zona del Vasto. Alla parete di sinistra, un letto di ottone, ad una piazza e mezza, con ricca coperta di seta celeste. Ai due lati, i comodini di palissandro. Alla parete di destra, il grosso armadio e la toletta con la specchiera. Nel mezzo della parete frontale, l’ingresso, che affaccia nel vicolo, con telaio a vetri e tendine; alla destra, il comò con sopra un'immagine della Madonna, e candelabri con ceri. Nell’angolo, un lavandino, con asciugamani. Nel centro, un tavolo rotondo. Dal soffitto, scende in mezzo un ricco lampadario. In prima quinta della parete di sinistra, una porticina che dà nella cucina. Ai piedi del letto un tavolino, ai due lati, scendiletti; sulla testata del letto, una figura della Madonna. È sera. Il vicolo è scarsamente illuminato. Il lampadario è acceso. Le giovanissime lavoranti guantaie: ’Ngiulinella, Mariuccia e Gneslna sono affaccendate a dare l’ultima rassettata all’ambiente, ridendo e scherzando tra loro.
’NGiulinella - (asciugandosi la fronte sudata con il rovescio della mano, ed appoggiandosi alla granata, guarda il pavimento, soddisfatta) Meglio ’e chesto nun pò veni’. L’aggio lavato quattro vote.
Mariuccia - (con un panno, va togliendo la polvere dall’armadio) Me meraviglio che ’a princepale nun l’ha fatto cagna’ adderittura…
Gnesina - (che «aggiusta» il letto) ’O che? ’O pavimento?
Mariuccia - Eh!
Gnesina - (con circospezione) E nun ha pututo fa’ vede’ ’o marito.
’NGiulinella - Sino ce ’o faceva mettere a musaico.
Gnesina - Ih che ddice! Di alibastro! (Si ride) Guarda ccà (indica il letto) lenzola fresche ’e bucato (sicura) e songo d’ ’a princepale: ’e ccunosco.
’NGiulinella - Overo?
Gnesina - E Donna Teresa, ’a mamma d’’o carcerato, teneva sta rrobba? (Scopre un lembo del lenzuolo) ’O merletto fatto a mano?
Mariuccia - (a ’Ngiulinella) E te pare ca veneva ’o ’nnammurato ’all’Isola, e Donna Rachele ’o faceva trasi’ dint’ a chella stalla ch’era primma?
Gnesina - …’A rinnuvazione d’ ’o vascio, ’a mubilia nova, ’o lampataro… tutte spese d’ ’a princepale!
’NGiulinella - Giesù! E Donna Teresa dice ca ’e spese 1’ha fatto essa, e ’a princepale ’e solde ce l’ha prestate cu l’interesse…
Mariuccia - ’O ddice, pe’ nun fa’ vede’!
Gnesina - Si ’a princepale nun era l’amica d’ ’o figlio, mo c’ ’e pprestava! (Guarda fuori, per assicurarsi di non essere ascoltata) Aiere, chelli llenzole s’ ’e stiraie cu ’e mmane soie. Io, tanto pe’ ruffianiggia, lle dicette: «Vulite ca v’ ’e stiro io?». E essa: «No, no, m’ ’e stiro io!».
’NGiulinella - Cu ’a mano d’ ’o core!
Gnesina - (inebriandosi comicamente) Ce ha miso pure ’addore ’e spigaddossa!
Mariuccia - (con il pugno chiuso e tirando un frego nell’aria) ’Ndranghete!
Gnesina - E vedite ca, stasera, ce faciarrà leva’ mano cchiú ampressa.
’NGiulinella - No, ce sta tutta chella fatica ’a fa’.
Gnesina - E aspettano ’e cliente, che ffa?
Mariuccia - Mo tene chillu cliente p’ ’e mmane!
’NGiulinella - A me però me pare ca ’o marito abboffa.
Gnesina - No… (Come dire: macché!).
’NGiulinella - Si. Ogge mentre io pruvavo ’a machina…
Rachele - (la principale, entrando dal fondo) Neh, vuie avite fatto? (È una donna imponente, sulla trentina, la bella figura, avvolta in uno scialle lussuoso e tutta piena di ori e di cianfrusaglie. Le ragazze si scuotono a quel richiamo e ammiccano, come timorose che il loro pettegolare sia stato udito).
Gnesina - Pronto!
Rachele - (guardando un po’ dappertutto) Nun ce ha dda manca’ niente, eh?
’NGiulinella - (alludendo all’invisibile ospite) Princepa’, ma stu giuvinotto che arriva, s’ha dda spusa’?
Rachele - (seccata, per la domanda inopportuna) Si, ma ce manca ’a sposa! (Dando ancora una sommaria occhiata intorno) ’Asciugamano pulito; ’o pettene; ’a scupetta ce sta… ’A butteglia cu ll’acqua ’ncopp’ ’a culunnetta!
Gnesina - (come colta in fallo) Subbito! (Scappa in cucina).
’NGiulinella - Princepa’… ma ’o sapite a stu Sanguetta ’o figlio ’e Donna Teresa?
Mariuccia - (interviene) E comme!
Rachele - Overo è scema, sta guagliona! (Sorride).
’NGiulinella - (incoraggiata da quel sorriso, che è un invito alla confidenza) E comm’è? comm’è?
Rachele - (ridiventando autoritaria) ’O vvuo’ sape’ ’a me?
Mariuccia - (alla compagna, con tono di rimprovero) ’A vuo’ perdere ’a lengua?
’NGiulinella - E che ce sta ’e male?
Rachele - (come per togliersi dall’imbarazzo, grida verso la cucina) Hê fatto cu st’acqua?
Voce di Gnesina - Sto facenno spila’.
Rachele - E fino a che s’ ’o bbeve, nun se fa càvera n’ata vota?
Giovanni - (marito di Donna Rachele, figura insignificante, sui cinquant’anni, un po’calvo, con i baffetti biondastri, entra nel basso, seccato, da padrone, ma non interviene. È in maniche di camicia).
Mariuccia - (rapida, a Rachele) ’O marito vuosto!
Rachele - (voltandosi) Ah! (E, senza scomporsi) È vvenuta bella ’a cammera, eh?
Giovanni - (con un sorrisetto tra il compiaciuto e il maligno) E pe’ fforza tu staie danno disposizioni ’a na settimana.
Rachele - Io?
Giovanni - (vedendo Gnesina entrare con la bottiglia dell’acqua in un piatto e con il bicchiere capovolto sul collo del recipiente) Pure ’a butteglia cu ll’acqua?
Rachele - E… nun ha dda vevere?
Giovanni - Ah, già. E mo, pecché nun manne a piglia’ due fiori, sparge nu poco d’acqua ’e culonia pe’ terra…
Rachele - (alle ragazze, turbandosi) Ma guardate…
Giovanni - (scattando) E va’ scola dintu a ddu te! Nun abbastano tre discepole? Ce vò pure ’a direttrice?
Rachele - (con l'aria di volersi giustificare, ma, in realtà, pronta a stizzirsi) Donna Teresa è gghiuta ’a stazione; e m’ha cercato ’o piacere che avesse mannato ’e gguaglione pe’ fa’ pulezza’ nu poco.
Giovanni - Nu poco? Tu stu vascio ll’hê fatto addeventa’ na reggia; manco si ce avess’a veni’ ’o principe ereditario! ’A cammera ’e lietto mia, a paragone a chesta, è na rimessa. Teh! (Ad un tratto, trasale) Uh, che te pozzano accidere! ’A cuperta nosta bbona? (La tira dal letto, con rapida azione) Pe’ mme, nun l’hê vuluta caccia’ maie, e ce ’a daie a Sanguetta?
Rachele - …E ’a mamma m’ha pregato tanto, pecché ’a cuperta soia ’a tene ’mpignata… (E ciò dicendo, la strappa dalle mani del marito e la rigetta sul letto) Dint’a ’sti juorne s’ ’a spigna. (Guarda le ragazze che, con esagerata dolcezza, rimettono a posto la coperta, stirandone le pieghe con lente carezze delle mani) Chillu puveriello s’ha dda muri’ ’e friddo? (Le ragazze ridono sommesse, Giovanni vorrebbe replicare, Rachele gli fa cenno di zittire).
Gnesina - Fatto!
Rachele - Jate dinto (allude al suo basso) ferniteve chella duzzina ’e guante; ’Ngiulinella ’e vva a cunzigna’, e po’ ve ne jate. (Le ragazze si guardano, sorprese).
Mariuccia - (a Rachele) Restate vuie, ccà?
Rachele - Pe’ fforza, si nun veneno d’ ’a stazione…
Gnesina - (dando uno sguardo in giro per la stanza) Tutto a posto.
’NGiulinella - (curvandosi all’orecchio di Rachele) Ce manca sulo… chillo affare, dinto ’a culunnetta.
Giovanni - (che ha udito, scattando) E gghiesce fore ’a porta, dinto a n’angolo ’e muro… Jh quanta delicatezza!
Gnesina - (spingendo ’Ngiulinella) Cammina!
Mariuccia - Chesta overo quanto è indisponente! (Escono).
Rachele - (al marito) Ma pecché scumbine cu sta vocca? ’E gguaglione po’ parlano e ’a ggente che ha dda dicere?
Giovanni - E che ssaccio, manco si Sanguetta fosse, ’o ’nnammurato tuio!
Rachele - (senza scomparsi) A mme?
Erricuccio - (giovane popolano del quartiere, entra premuroso ed entusiasta) Neh, è arrivato?
Rachele - No, è gghiuto tutt’ ’o vicolo ’a stazione p’ ’o i’ a piglia’!
Giovanni - (ironico) Arriva ’a bonanema ’e Don Peppe Garibaldi!
Erricuccio - Giesù! È la curiosità! Doppo chello ca Sanguetta ha fatto, cinche anne all’Isola… Rrobba d’ ’o quartiere, e lo ricevono con tutti gli onori!
Giovanni - Il reduce!
Rachele - E nun è nu reduce?
Giovanni - ’All’isola? Carcerato? ’O domicilio coatto? Comme si fosse nu reduce dalle patrie battaglie!
Erricuccio - Ma intanto, ’o vvedite…
Rachele - Erricu’, nun ’o da’ retta! (Giovanni la guarda male).
Erricuccio - E ’a mamma?
Rachele - S’ ’a so’ venute a piglia’, e è gghiuta ’a stazione pur’essa. Jh che festa lle stanno facenno!
Giovanni - La madre dell’eroe!
Erricuccio - Sentite: chillo, giuvinotto ’e primmo pelo, se l’ha pigliato cu ‘e gruosse. Don Aniello Terremoto, che era ritenuto nu Ddio, avette chilli schiaffe!
Rachele - (esalta) E pe’ mme!
Giovanni - (trasecolando) P’ tte?
Rachele - (fiera) Sí, mo t’ ’o ddico, pe’ mme! Don Aniello Terremoto me faceva ’a corte. Jeva dicenno: «Chella femmena sarrà d’ ’a mia, o cu ’o bbuono o cu ’a forza!». E na sera, ’mmiezo Sant’Anna, me fermaie: «Viene cu mme!». Io dette nu strillo, e scappaie. Doppo cinche minute, Sanguetta le dette ’e schiaffe, E cheste so’ ccose ca se teneno a mmente; e io ce tengo ’a riconoscenza!
Giovanni - …Pecché pigliaie a schiaffe a Terremoto? (Spavaldo) E m’ ’o ddicive a mme!
Rachele - (sprezzante) Vattenne! Ce ’o ddicevo a isso… Na vota, pe’ m’asci’ ’a vocca: «Io ce ’o ddico a maritemo!», Aniello sa’ comme me rispunnette? «Meglio, accussí ce ’a trova isso, na cammera!».
Erricuccio - (a Giovanni, che impallidisce) Nne faceva nu bellu rispetto!
Giovanni - …E bbravo! (Si odono voci di giubilo, prima confuse, poi, più chiare, ed, infine, entusiastici applausi).
Rachele - (s’illumina) So’ lloro?
Gnesina - (dal fondo, di corsa) Sta venenno!
Voci nel vicolo - (vicine e lontane) Auguri! Auguri! Bene arrivato!
Voce di Sanguetta - Grazie! Grazie!
’NGiulinella - (che con Mariuccia, ha seguito Gnesina, battendo le mani, come una bambina) Jh che onori!
Mariuccia - Applausi, bengali!
Erricuccio - (magnificando) ’O Rre d’ ’o quartiere! (Esce. Altri applausi).
Rachele - (si dimena nello scialle, con un brivido sensuale) Giesù! So’ ccose ’e pazze!
Giovanni - Ah! Overo so’ ccose ’e pazze! (Nel rifarla, gli vien fuori dai pantaloni, la camicia).
Rachele - Gué! Cummogliete!
Giovanni - (esasperato) …E appicceles ddoie cannele! (Mostra il comò) Sta passanno ’o Santissimo! (La folla si accalca fuori dal basso. Appaiono ragazzini che fanno ala con stellefilanti e bengala accesi, un giovane con una chitarra che va strimpellando, ed un gruppo di «mammasantissimi», amici di Sanguetta. Grandi acclamazioni).
Sanguetta - (il guappo di cartone, vestito di chiaro, con aria smargiassa, commosso e soddisfatto, seccato e nervoso per la manifestazione, entra al braccio di Donna Teresa, sua madre, che è raggiante. Sotto la porta dà un rapido e significativo sguardo a Rachele, che è fuori di sé dalla gioia, e non vede Giovanni che gli è di spalle, e morde il freno a tanto chiassoso cerimoniale) Grazie! Grazie! Ritiratevi! Vi sono molto obbligato! (Agli amici) Bene! Bene! Grazie! Sí, sí, ci vedremo più tardi. (Alle ragazze) Chiudite, chiudite sta porta!
Erricuccio - (vincendo la resistenza esterna) Permesso! (Serra l’uscio. Le voci di protesta, man mano, si affievoliscono).
Sanguetta - (come stordito) Ma… non è un’esagerazione?
Donna Teresa - (al figlio, mostrandogli Rachele, con un sorriso invitante) Gué! Hê visto chi ce sta?
Sanguetta - Ho visto. (Afferra con forza la mano della donna, che, prima, sorride a quel contatto voluttuoso, poi, avverte il dolore della stretta. Il giovane la fissa ancora, senza espressione, poi, si volge intorno, sorpreso).
Donna Teresa - Guarda che bella casa!
Sanguetta - E chesto sto vedenno. (Si turba).
’NGiulinella - (avanzandosi, cerimoniosa) Tutta opera mia! (Azione d’aver lavato il pavimento).
Mariuccia - E opera mia! (Azione di aver pulito i mobili).
Gnesina - Io po' aggio fatta ’a cosa essenziale: ’o lietto!
Sanguetta - (freddo, ma sorridente) Sta bene! Quanto v’aggi’a da’? (Mette la mano nel taschino del panciotto).
Gnesina - Niente, è dovere.
Sanguetta - Per amor di Dio.
Rachele - (interviene) Songo ’e ddiscepule meie, e ll’aggio cumannate io. (Insiste sulle sue parole).
Sanguetta - Ah?! (Pausa) Vi sono obbligato assai.
Rachele - Meritate.
Donna Teresa - (piano al figlio, ruffianeggiando) Tu ll’hê ’a vule’ bbene assaie a chesta.
Sanguetta - (non risponde, si volta, e vede finalmente Giovanni che, in un angolo, aspettava che ci si accorgesse di lui) Uh! Don Giuvanne bello!
Giovanni - Eh! Ve n’accurgiveve dimane!
Sanguetta - E chi vi aveva visto?
Giovanni - E voi stavate affarato. Io stongo ’a mez’ora, ’mpalato, ccà. (Le ragazze ridono).
Sanguetta - E venite ccà! (Lo abbraccia) Ringrazio anche voi per tutte le attenzioni fattemi.
Giovanni - A mme? E io che c’entro? Dovete ringraziare mia moglie!
Sanguetta - (rispettoso) Prego. Si rispetta sempre il cane per il padrone. (E guarda Rachele).
Giovanni - (fra i denti) ’O cane songh’io?!
Rachele - (parlando forte verso il marito, per fargli capire che deve tacere) Meh, ascimmo nu poco, ca Don Vicenzino sta stanco.
Sanguetta - No.
Donna Teresa - S’ha dda cambia’! (E fa un segno d’intesa con Rachele, che sorride).
Sanguetta - (sorpreso) M’aggi’a mettere ’a sciassa? Na dicina ’e minute: me lavo ’e mmane, me lavo ’a faccia… (Sfottente) M’aggi’a fa’ sí o no nu poco bello?
Giovanni - (tra i denti) S’ha dda taglia’ ’a capa!
Donna Teresa - Ma se sape. Mo accummenciano ’e vvisite.
Sanguetta - Qua’ visite, mammà? Aggio apierto ’o gabinetto anatomico!
’NGiulinella - (avviandosi alla porta) Permettete? Nuie venimmo cchiú tarde.
Mariuccia - (spingendola) Jh che ’ntenzione ca tene chesta! (A Sanguetta) Bonasera.
Sanguetta - Buonasera. (Si toglie la giacca, ed, istintivamente, la porge a Giovanni, che esita un istante, poi, rassegnato, la mette sulla spalliera d’una sedia).
Gnesina - (a Rachele) Vulite niente?
Rachele - No. Dimane, cchiú ampressa.
Sanguetta - (alla ragazza, che lo guarda con un sorrisetto malizioso) Gnesina?
Gnesina - Vi ricordate?
Sanguetta - Eh! (Come dire: altro che!).
Erricuccio - (sotto la porta del basso, alle ragazze, che vogliono uscire) Nu mumento, si no trase ’a folla. (Apre con cautela la porta, poi) Ascite, ascite! (Le ragazze escono. Di nuovo calca all’esterno, Erricuccio richiude in fretta) Un momento! (Grida) Non è aperto ancora!
Sanguetta - (togliendosi il panciotto) Ma chi so’? (Porge il panciotto a Giovanni, perché lo metta sulla sedia. Giovanni sta per perdere la pazienza) Chi so’?
Erricuccio - È ggente ca ve vò saluta’!
Sanguetta - E aspettano! Me pozzo presenta’ in decolté? (A Giovanni, un po’ risentito) Stongo ’a tre ore cu ’a mano accussí…
Giovanni - (con un sorriso acido) Scusate! (Mette il panciotto sulla giacca, appoggiata prima).
Sanguetta - (siede, si toglie le scarpe, ed a Giovanni) Per gentilezza, ’e scarpune sott’ ’o lietto…
Giovanni - …M’ha miso a ffa’ ’e servizie!
Sanguetta - Scusate, stongo scàvezo, (Giovanni s’avvia. Ad Erricuccio, che ride) Pecché ride?
Erricuccio - Pe’… (E mostra Giovanni, furtivamente).
Sanguetta - Ah… (cenno come dire: è un pover’uomo! Poi, forte) Erricu’, vide, ce sta ggente assaie?
Erricuccio - (dopo una rapida occhiata fuori) No. Se sta sfullanno.
Sanguetta - Io me l’immaginavo stu fatto. Avrei dovuto arrivare in incognito… (Con impazienza, a Giovanni, che non riesce a trovare le pantofole richieste) Don Giuva’, e quanno?
Giovanni - (seccato) Addo’ stanno? Nun ’e ttrovo!
Rachele - (dura, al marito) Là, dint’ ’a culunnetta!
Giovanni - (tra i denti) Te pozzano spara’ a tte e a isso! (Apre il comodino, ne cava fuori un paio di pantofole ricamate. Sempre fra i denti) Guardate: ha dda fa’ ’a canzunettista! Greta Garbo! (Porge le pantofole con delicatezza eccessiva) È servito. (Sanguetta le scruta).
Rachele - (piano, a Donna Teresa) ’O brodo l’aggio cucenato dint’addu me. Mo v’ ’o mmanno; ce avit’a cala’ sulo ’a pasta.
Donna Teresa - (commossa) Grazie.
Rachele - (a Sanguetta, avviandosi) Datece ’o permesso.
Sanguetta - (guarda ancora le pantofole, poi, la donna) Accomodatevi. (E si decide a calzare le pantofole).
Giovanni - (a lui, ironico) Vi occorre niente più?
Sanguetta - (lo guarda, sovrappensiero, gli risponde con semplicità) Per il momento, no: grazie.
Giovanni - (avviandosi alla porta) Tu vide ’o Pataterno! (Ad Erricuccio, che ride) Arape, ara’! (Ed esce, come stravolto, seguendo la moglie).
Sanguetta - (slacciandosi la cravatta e il colletto) Erricu’… Statte nu poco llà ffore. Fa’ capire agli amici, ca me sto pulezzanno. Na dicina e minute… ’E scucciature nn’ ’e manne; senza ca facimmo confusione. (Scherzoso) Fa’ un po’ da cerimoniere, ecco.
Erricuccio - (ridendo) Cerimoniere di corte! (Esce, chiudendo dietro di sé la porta).
Sanguetta - (con un sospiro di sollievo, si avvicina al lavandino, osserva il sapone, ne aspira il profumo, e, alla madre, che ora è presso il comò) Mammà! Ma che hê pigliato? ’A quaterna?
Donna Teresa - (maliziosa) Làvate. (Sanguetta, contro voglia, comincia a lavarsi. La vecchia apre un cassetto del comò e, sorridente e silenziosa, ne cava un vestito completo, un paio di scarpe, un cappello, una camicia, una cravatta ed un fazzoletto dai vivaci colori. Depone tutto sul tavolo, come per un’esposizione).
Sanguetta - (si volta, guarda e s’acciglia) Ma…
Donna Teresa - (olimpica) ’O vestito nuovo… ’e scarpe, ’o cappiello, ’a cravatta, ’o fazzuletto ’e seta, ’a cammisa, ’o culletto… Uno ’e tutto.
Sanguetta - (asciugandosi il viso) E ched è sta rrobba?
Donna Teresa - …Te l’ha fatto essa.
Sanguetta - Essa, chi? (Di scatto) Rachele?
Donna Teresa - (approva, poi, timidamente) Se facette da’ nu vestito viecchio d’ ’o tuio, nu paro ’e scarpe vecchie, nu cappiello, e po’ mm’ ’a vedette ’e veni’ cu sta rrobba dint’a nu scatolo.
Sanguetta - (freddo) E… ’a mobilia? Pure lle disteve ’a mesura d’ ’e mobile viecchie?
Donna Teresa - (vivamente) No, sta cammera l’aggio fatta io!
Sanguetta - (spietato) Ah? Cu ’e rennete meie? C’ ’o stipendio che v’aggio mannato ’all’Isola?
Donna Teresa - No…
Sanguetta - E allora?
Donna Teresa - (balbetta) …Me l’aggio fatto presta’…
Sanguetta - ’A Rachele?
Donna Teresa - (come per giustificarsi) …Cu l’nteresse…
Sanguetta - Ah? (Come dire: ho capito) E quanto t’ha dato?
Donna Teresa - Scarze ottuciento lire.
Sanguetta - (resta un attimo come assorto: quindi, di scatto, siede, si toglie le pantofole, come se i piedi gli bruciassero, rimette le scarpe, e, alla madre, mostrando gli indumenti, che sono sul tavolo) Miette tutta sta eleganza dint’ ’o cummò. (Si spazzola i pantaloni con gesto nervoso, mentre Donna Teresa non sa che dire). Stu cazone è buono ancora, have voglia ’e tira’… (Fissa la madre, che ora appare mortificata, quasi, l’aggredisce) E tu, proprio tu, hê permesso chesto?
Donna Teresa - …E chella m’ha cunfidato ca tu sì stato all’Isola pe’ essa…
Sanguetta - (sbarrando gli occhi per la meraviglia) Io?
Donna Teresa - …Ca pigliaste a Schiaffe a Terremoto pecché ire geluso ca lle faceva ’a corte…
Sanguetta - (scattando) Addo’! Ma sta femmena è pazza?! Che c’entra essa cu ’e schiaffe ca io dette a Terremoto? Quella fu una mia questione personale.
Donna Teresa - Giesù! E chella è cunvinta ca tu… ll’hê fatto pe’ essa! Ca pe’ essa si gghiuto all’Isola! E ca pe’ essa te sì ’nguaiato!
Sanguetta - (sbalordito) Ma sentite… (Come dire: è incredibile).
Donna Teresa - Ogni vota ca io ll’aggio ditto: «Donna Rache’, lassate sta’, nun facite cchiú spese…». (Rifacendo Rachele) «Chi? Io tengo ’o duvere d’ ’e ffa’! ’O figlio vuosto pe’ vule’ bbene a mme, s’è arruvinato; e tutto chello che faccio pe’ isso, è niente!».
Sanguetta - (dopo una pausa, con consapevole forza) E pe’ chi mme fa piglia’? Pe’ chi mme fa piglia’? Ma comme, io aggio fatto cinche anne all’Isola… Privazione ’e tutte specie… M’aggio magnato ’a zuppa d’ ’o guverno, capite, mammà! E pe’ fuma’ e pe’ manna’ quacche solde a vvuie, aggio carriato ’e pprete! Tengo ancora ddoie piaghe ’ncopp’ ’e spalle, pe’ nun me currompere! E si vulevo campa’ accussí, facevo ’o signore! (Si pettina, guardandosi allo specchio).
Gnesina - (dalla porta, con pignatta fumante) Permesso? (La porta si chiude alle sue spalle) Ccà sta ’o brodo.
Sanguetta - (girandosi verso di lei) Chi sta malato? (Pausa) Chesta pure ’a principale vosta l’ha fatto?
Gnesina - (un po’ interdetta) Sí, pe’ vvuie.
Sanguetta - E dicitele ’a principale vosta ca io nun aggio allatta’; e che non se mettesse più in cerimonie. (Si rimette la giacca, e torna a guardarsi allo specchio).
Gnesina - (a Donna Teresa) Ch’aggi’a fa’!
Donna Teresa - (supplichevole) Vicenzi’, pare brutto…
Sanguetta - (guarda la madre) No. (Pausa) Gnesi’, faciteme ’a cortesia, purtatavelle… (Gnesina esce silenziosa. Alla madre, mostrando la roba che è rimasta sul tavolo) T’aggio pregata, leva ’sta rrobba ’a ccà, si no ’o ffaccio arriva’ llà fore… (E mostra l’uscio, mentre la madre, silenziosa, rimette gli indumenti nel comò) Nun m’ ’o ffa’ vede’ cchiú! (Si spazzola la giacca, tentando di levarne qualche macchia, guarda ancora la madre, alla quale si rivolge con tono di profondo rimprovero) Sì ’a primma mamma ca nun ha capito ’o figlio! (Si gira alla specchio. Donna Teresa comincia a piangere, in silenzio).
Rachele - (entrando, di scatto) Permesso? (Chiude la porta dietro di sé). Pecché nun avite vuluto ’o brodo? (Sanguetta a quella domanda rimane immobile. La donna si accorge del pianto della vecchia) Giesù! Donna Tere’, vuie chiagnite?
Sanguetta - Sí. Chiagne, pecché ’a povera mammà s’e murtificata. Ha capito ca p’ ’a troppa gnurauza, e p’ ’o troppo affetto me steva facenno passa’ pe’ chello ca nun songo. (Insiste sulle sue parole, fissando la donna) E vuie ’o ssapite. (Pausa. Ride con sarcasmo) E se capisce… Turnanno ’all’Isola… cumpletavo ’a carriera, è così? (Con forza) Ma chi v’ha cercato maie niente? Chi? E po’ pecché? (Pausa) E… ’o tuorto ’e mammà è ca, chello ca vuie avite fatto, ve l’ha permesso.
Donna Teresa - (asciugandosi gli occhi) M’ha miso ’n croce!
Rachele - (dopo una lunga pausa) Mammà, ’on Vicenzi’, nun have colpa. ’A colpa è ’a mia. Ma… si v’aggio fatto quacche attenzione, è pecché tenevo ’o duvere d’ ’o ffa’.
Sanguetta - Duvere? No! Questo è l’equivoco. Nisciuno duvere, Donna Rache’. Io nun aggio fatto niente pe’ vvuie…
Rachele - Niente?!
Sanguetta - Niente! (Pausa) ’E schiaffe a Terremoto ce ’e ddette pe’ nu fatto d’ ’o mio. Vuie nun ce trasite. (Rachele è amaramente sorpresa) All’Isola? Nun ’o ssaccio manch’io pecché ce so’ gghiuto. Mo se va facilmente. E allora? Pecché sta riconoscenza vosta? E ammesso ca ve site creduto, comme avite ditto a mammema, ca chello che aggio fatto l’aggio fatto pe’ vvuie, e ca pe’ vvuie me so’ ’nguaiato, ched è, accussí me vuliveve ricompensa’? Spedennome ’e vaglia all’Isola, rinnuvanneme ’o vascio, vestennome ’a capo ’o pede, e mannannome ’o magna’? Eh, l’avissev’avuto ’a capi’ ca, comme v’aggio rifiutato ’e denare, ve rifiutavo ’o riesto. Sí, Rache’! Pecché quanno s’è saputo na cosa simile pe’ dint’ ’o quartiere, vuie, comm’ommo, m’avite distrutto!
Rachele - (dopo una pausa) E va bene: aggio sbagliato. E mo ve vulite calma’?
Sanguetta - E chella è ’a sciorta mia! Llà nun fuie capito (allude al carcere) e fuie pigliato pe’ chello ca nun ero; ccà nun songo capito, e me pigliate pe’ chello ca nun songo… E ’a peggia disgrazia mia è ca ’mmiezo a chille ca nun me capisceno, ce sta pure mammà mia!
Donna Teresa - Io? (E piange forte).
Sanguetta - (rabbonito, va ad abbracciarla) E va buono… Mo nun chiagnite… Vuie nun c’entrate… Forse è stato ’o bbene, ’o troppo bbene, che ve l’ha fatto fa’… (Donna Teresa esce, andando in cucina).
Rachele - …Ma allora ’o mio è stato nu suonno?
Sanguetta - (fermo) Sí, nu suonno, Rache’! E mo che ve site scetata, jatevenne! (Rachele sbarra gli occhi, come per protestare) Sí! Io m’aggi’a risorgere! So’ turnato pe’ me rifa’ na vita nova! Io so’ nato stammatina: quanno me so’ visto a ppede libero, ’ncopp’ ’o piroscafo. Songo nu neonato! Nu neonato ca tene trent’anne, ma nu neonato. E m’aggi’a svezza’: m’aggi’a da’ a mangia’ cu ’e mmane meie. Capite, Rache’? Cu ’e mmane meie… (Pausa) Pecché si vedono ca io, a chesta età, tengo ancora ’a nutriccia ca me dà a zuca’… me mannano n’ata vota all’orfanotrofio! (Allude al carcere).
Rachele - (perdendo ogni pudore) Ma io mo te voglio bene!
Sanguetta - Ah?! E chisto overo è suonno! Ma ve pare ca io mo songo asciuto a libertà, me metto n’ata catena ’o pede? A chi? Io aggi’a cagna’ na ’nnammurata ’o juorno; finché nun trovo na bona guagliona, e mm’ ’a sposo!
Rachele - (scattando) Chesto è chello che dice tu?!
Sanguetta - (aggressivo) Pecché mm’ ’o ppruibisce?
Rachele - (con accento di sfida) Cu tutt’ ’e mezze!
Sanguetta - (furente alza il pugno, per colpirla).
Rachele - (impavida, ferina) Accideme, io chesto voglio!
Sanguetta - (si frena, battendo con forza le mani l’una contro l’altra, poi, improvvisamente) No, nun t’accido! Mo dico tutto cosa a mariteto; accussí ’o guaio ’o passa isso! (Va alla porta).
Rachele - No! (Afferra il giovane per un braccio).
Sanguetta - (la spinge, e chiama nel vicolo) Erricu’! (Poi) Fa’ veni’ a Don Giuvannino.
Voce di Erricuccio - Don Giuva’!
Donna Teresa - (che ha udito, ed è accorsa) Vicenzi’, ma che ffaie?
Sanguetta - (ormai fuori di sé) Mammà! Io si nun tenevo sta capa gloriosa, nun ghievo all’Isola! (Giovanni appare sotto lo porta, timido e guardingo. Il giovane l’afferra per un braccio e lo tira avanti) Don Giuva’, trasite. (Poi, forte, ad Erricuccio) Erricu’, nun fa’ trasi’ e nun fa’ asci’ a nisciuno!
Erricuccio - (ch’era apparso) Va bene! (Richiude la porta).
Sanguetta - (deciso) Don Giuva’, sentite: la vostra coniugia ha avuto ed ha un debole per me.
Giovanni - ?!! (Livido) E mm’ ’o ddicite accussí?
Sanguetta - Me sto cunfessanno. Sto ’nnanze ’o cunfessore.
Giovanni - (guarda la moglie con violenta, sgomentata amarezza, e ripete macchinalmente) …La mia coniugia…
Sanguetta - Sí, primma che andassi all’Isola…
Giovanni - Ah?!
Sanguetta - …Aveva creduto che mi fossi compromesso per i suoi begli occhi… ’A luntano ’a riconoscenza è addeventata ammore, e ’o ritorno, ’ammore è diventato desiderio…
Giovanni - Ah?!
Sanguetta - Per fortuna vostra però, questi sentimenti non li ha saputi far arrivare al mio cuore… Me li ha esternati con mezzi che hanno ottenuto l’effetto contrario… hanno urtato la mia delicatezza, la mia suscettibilità… E perciò vuie nun tenite ’e ccorne!
Giovanni - E io ve ringrazio! (Pausa).
Sanguetta - Sentite! Il mio primo disgusto lo ebbi…
Rachele - (pallida, come una morta, e, a denti stretti) Ma che avit’a fa’, tutt’ ’a storia?
Sanguetta - Me sto cunfessanno!
Giovanni - (facendo il duro, alla moglie) ’O vuo’ fa’ cunfessa’? (A Sanguetta) Dicite.
Sanguetta - …Quando mi mandiede un primo vaglia di trecento lire.
Giovanni - (non credendo alle sue orecchie) Perché, ve ne mandiede pure un secondo?
Sanguetta - (approva decisamente) Di cinquecento!
Rachele - (non regge).
Giovanni - (a lei) Pure?
Sanguetta - (inesorabile) …Ma io li rifiutiedi e li respingiedi. Pecché, vuie ’o ssapite, io ’e stu ppane ccà nun ne mangio. (Pausa) E da qui cominciarono a piovere le lettere.
Rachele - (ansante, invano sostenuta da Donna Teresa, che vorrebbe trovarsi dieci cubiti sotto terra, riesce a biascicare in faccia a Sanguetta) Ma è agire ’a ommo serio, chisto?
Sanguetta - Sí!
Giovanni - Non interrompere la confessione. (A Sanguetta) Dite, dite.
Sanguetta - Le lettere… «Mio marito mme fa schifo… È spuorco… È muscio…».
Giovanni - !!! Che?!
Donna Teresa - (supplichevole, al figlio) ’A vuo’ ferni’?
Sanguetta - ’E llettere stanno llà… (Mostra una valigetta, che la madre aveva portato con sé) Pronto a documentare. (Poi continua) «Quanno tu tuorne a Napule, io ’o sperdo…».
Giovanni - ’O sperdo?!
Sanguetta - (conferma, quasi gridando) Lo sperdo! Testuali!
Giovanni - E ch’ero fatto? Nu cane?
Sanguetta - Ma io, Don Giuva’, vi ho rispettato e vi rispetterò.
Giovanni - (disfatto) Grazie.
Sanguetta - Però voglio campa’ cuieto, in santa pace, e godermi tutta intera, la sospirata libertà. (Pausa) Tuttavia, siccomme ’a signora vosta per quanto mi ha detto, di lasciarmi in pace non ha nessuna intenzione, allora ecco che io ho voluto confessarvi ogni cosa, onde voi, da uomo e marito possiate pigliare i provvedimenti del caso. Truvate onesto?
Giovanni - Altro che! (Alla moglie) …E tu? Che nne dice tu?
Rachele - (sfrontata, con sarcasmo) Ch’aggi’a dicere? È nu pazzo!
Sanguetta - (offeso) So’ nu pazzo? Ah, so’ nu pazzo! (A Giovanni) E allora, ce sta ’o riesto!
Giovanni - ’O riesto?!
Sanguetta - (aprendo il cassetto del comò) Venite ccà, ’on Giuva’…
Donna Teresa - (al figlio, vedendo che Rachele si sente perduta) E che ffaie?
Sanguetta - E chella dice ca io so’ pazzo! (Solleva le braccia di Don Giovanni a guisa di attaccapanni, e ci appoggia gli indumenti che va prendendo dal comò) Tenite: vestito, scarpe, cappiello, cammisa, fazzuletto, cravatta: tutta roba che la vostra signora mi ha fatto trovare in omaggio; e che io senz’altro rifiuto!
Giovanni - (con tutto il peso degli indumenti sulle braccia, alla moglie) È pazzo, eh??
Sanguetta - E mo sta rrobba v’ ’a putite pure purta’!
Donna Teresa - (al figlio, supplichevole, visto che Giovanni esita) E comme jesce ’a ccà dinto cu sta rrobba mmano?
Giovanni - Cu ’a folla ca sta fore, facimmo pubblicità?
Sanguetta - (solenne) E sulo cu ’o scandalo, facenno parla’ ’e giurnale ca io me songo ribbellato a na cosa simile, me pozzo riabilita’. (Spinge ancora Giovanni verso la porta) Ascite, purtateve tutto chello ca ve riguarda. Po’ chiammo a Erricuccio, e mettimmo ’e mobbile ’mmiez’ ’o vico!
Donna Teresa - (al figlio) Chi?! (Con forza) Chella è robba mia! Tengo ’a carta d’ ’o rivennetore. Ll’aggio pavata, cu ’e solde mieie.
Sanguetta - ’E solde ca t’ha prestato Donna Rachele?!
Rachele - E che c’entra?
Donna Teresa - E sissignore, ma ’a rrobba è d’ ’a mia! (Pausa).
Giovanni - (alla moglie) N’atu ppoco t’ ’o facive ’e brillante!
Sanguetta - (sbrigativo, a Rachele) Vuie a mammà l’avite ’mprestate nu ottuciento lire? E va bene: legalizziamo la situazione. (A Giovanni) Sentite: voi mi farete il favore di prestarmi ottocento lire. Debbo saldare subito la vostra signora, in modo che toglieremo… le donne di mezzo. Così resta un mio debito… personale con voi; che, al più presto, vi sconterò con i dovuti interessi.
Giovanni - (meravigliato) E scusate, non è lo stesso? V’ ’e ppigliate ’a me, ce ’e ppassate a mia moglie.
Sanguetta - E no: come dico io, sparisce ogni macchia.
Giovanni - E no, la macchia resta.
Sanguetta - Tra me e voi, sissignore; ma tra me e ’a signora vosta, no. Ll’aggio saldata, nun ha dd’ave’ niente cchiú, e chesta è casa mia. D’accordo?
Giovanni - (a malincuore) Va bene. (Ancora con il peso sulle braccia) E cu sta rrobba, che aggi’a fa’?
Donna Teresa - (supplichevole) Vicenzi’, figlio mio… (Come dire: lascia stare per ora).
Sanguetta - (si rabbonisce un poco, con pazienza) Mettitela llà. (Giovanni rimette ogni cosa nel comò) E po’ v’ ’o mmanno pe’ mammà.
Donna Rachele - (si abbatte, semisvenuta, con un gemito).
Donna Teresa - (afferrandola e sorreggendola) Madonna!
Giovanni - L’ha pigliata ’a cunvulsione. (Si accosta alla moglie pieno di premura).
Sanguetta - (seccato) ’A cunvulsione mo ce voleva!
Giovanni - Purtammola dinto addu me!
Sanguetta - Aspettate! Vuie nun vulite fa’ pubblicità… Nun avite vuluto asci’ cu ’a rrobba ’ncopp’ ’e braccia, ascite cu ’a signora svenuta? (A malincuore) Aspettate ca lle passa. (Rachele viene fatta sedere) Mammà, allargatela ’a vesta dint’ ’e fianche, spuntatela ’mpietto… ’Mpietto…
Donna Teresa - (mentre esegue, al figlio) Eh, e alluntànate…
Sanguetta - Ma pecché? P’ ’o marito? Mammà… (Come dire: di che ti preoccupi?).
Giovanni - Donna Tere’… (Come dire: io non conto niente).
Donna Teresa - (a Giovanni) Va bene, ma sempe…
Rachele - (comincia a lamentarsi sommessamente).
Donna Teresa - Rinvene, rinvene, quanno chiagne è buono. (Rachele dà un grido).
Erricuccio - (cacciando la testa attraverso la vetrata) Ch’è stato, neh?
Sanguetta - (rapidamente) Chiude ’a porta: na cunvulsione a Donna Rachele. (Erricuccio obbedisce).
Rachele - (grida più forte, smaniando, trattenuta invano da Giovanni e da Donna Teresa).
Sanguetta - (a Erricuccio, che riapre, come spaventato) Chiude!
Erricuccio - Ma… ’e strille se sentono…
Sanguetta - E nun ’e ffa’ senti’! (Erricuccio scompare in fretta. Sanguetta, obbedendo ad un impulso improvviso, allontana con violenza Giovanni dal suo posto accanto alla moglie e comincia a baciare appassionatamente la donna, sperando così di placare quell’evidente crisi sensuale. A Giovanni, che lo fissa, come un ebete) …Mi dispiace per voi…
Giovanni - Eh…
Sanguetta - …Perché vuie mo, certo, na bella figura nun ’a state facenno. (Ed ancora sonori baci alla donna, che freme tutta al contatto del maschio).
Giovanni - (quasi senza fiato) ’O ssaccio, ’o ssaccio…
Donna Teresa - (al figlio) Ma che ce ’o ddice a ffa’?
Giovanni - E quanno chella… s’avev’a fa’ veni’ pure ’a cunvulsione…
Rachele - (apre gli occhi).
Donna Teresa - L’è passata, l’è passata… (Alla donna, che si va ripigliando) Comme ve sentite?
Rachele - Meglio, grazie… (E guarda languidamente Sanguetta, che si allontana da lei, per fermare Giovanni, che ora vorrebbe inveire contro la moglie).
Sanguetta - Embè?! Nun vulite fa’ pubblicità?! E chesto pure fa parte ’e pubblicità! (Giovanni s’accascia) Mammà (dice, in fretta, Sanguetta) accompagnala tu ’a via ’e dinto! (E indica la porta, alludendo alla casa di Rachele, poi chiama) Erricu’! (Il giovanotto appare sull’uscio) Fa’ passare…
Erricuccio - Finalmente!
Sanguetta - Due…
Erricuccio - (spalanca la porta, ed esclama) ’On Vicenzi’, vedite chi ce sta? (Sulla porta, ecco i «mammasantissimi». Essi sono Pascale ’e dint’ ’e Virgene; Peppe Barracano, Don Affunzino, ’o tridece, Taniello, ’o luciano, e Speniello. Circondario Sanguetta, e lo abbracciano l’uno dopo l’altro con esagerate effusioni, quindi, si scappellano con ostentato senso di ossequio, in cui c’è dell’omertà e della canzonatura, ammirando Rachele e lasciandole libero il passo verso l’uscita).
Rachele - (a Donna Teresa) Lasciate…
Donna Teresa - Ve sentite ’e cammena’?
Rachele - Sí. (Esce, pavoneggiandosi con la sua aria di vittima bellissima, protetta dagli sguardi dei guappi, che ora ammiccano a Sanguetta).
Peppe - (un omone pletorico, con il cappello chiaro sulle ventitré, tende la mano al giovane) Complimenti!
Affunzino - (un tipo di mezz’età, con i baffetti, il capo nelle spalle, come se fosse ingobbato, perciò lo chiamano «’O 13», cioè portafortuna, alludendo a Rachele) Magnifica!
Peppe - Sta bene! Avete saputo scegliere.
Sanguetta - (rapido, per chiarire, mentre Giovanni impallidisce) Ma… che dite?
Peppe - Dico che avete saputo scegliere.
Sanguetta - Che «scegliere»? Non equivochiamo! Quella è… la signora di Don Giovannino qui presente.
Peppe - Ah… Scusate! (Si scappella).
Giovanni - Prego. (Ha un sorriso sinistro, ma scialbo).
Taniello - (un giovinotto con maglia turchina da marinaio e berretto calato sulla fronte, a Peppe, dandogli un colpetto alla spalla, mentre gli altri ridono) È ’a primma…
Pascale - (uomo anziano, fastoso, imbrillantato; sempre a Peppe, con tono di rimprovero) Accummencia a ffa’ guaie!
Peppe - E… mi sono sbagliato! Mi credevo ch’era la sua amante…
Giovanni - (tra i denti) Eh! (Come dire: quasi quasi…).
Peppe - …E mi complimentavo con Sanguetta per l’ottima scelta… (A Giovanni, che lo guarda, con piglio improvvisamente duro) Cos’è? Vi siete offeso?
Giovanni - Io? E… di che?
Peppe - (agli altri) Vedete? Non s’è offeso.
Sanguetta - (con estrema serietà) …Non è più il caso di avere delle amanti… (A Giovanni, fissandolo) Dico bene, Don Giovanni?
Giovanni - …Certo.
Sanguetta - Mo ce vò na bella ’nnammurata. Nun è overo, mammà?
Donna Teresa - (che è verso la porta della cucina) Chello che vvò Ddio!
Sanguetta - Beh, amici, accomodatevi. Erricu’, ’e ssegge. (Gli amici seggono) Mammà, miette a ffa’ na cocoma ’e cafè!
Peppe - (mentre gli altri fanno profferte di convenienza) Nu mumento! (Si leva) Signo’ (con il tono di chi ordina) menate nu paro ’e chile ’e maccarune!
Sanguetta - (colpito) Ma che stammo dint’ ’a cantina?
Taniello - (dando un altro colpo a Peppe) È ’a siconda… (Costringendolo a sedere) Assettate! Afforza vuo’ parla’!
Peppe - (come giustificandosi) Ma che facimmo cu stu ccafè?
Pascale - (a Donna Teresa, che è rimasta interdetta) Signo’, jate…
Donna Teresa - (timida) Ma ’e ttazze so’ ppoche…
Sanguetta - E… fanno a due per due…
Giovanni - Erricu’, pigliane ddoie dint’ addu me. (Erricuccio esce in fretta).
Donna Teresa - Grazie, ’On Giuva’! (Entra in cucina).
Sanguetta - (sinceramente) Amici miei, perdonate… Una tazza di caffè, basta il pensiero.
Pascale - Prego.
Sanguetta - Capirete… io vengo ’all’Isola, nun vengo ’all’America…
Affunzino - (maliziosamente) Nun viene ’all’America, però… ll’Isola è stata na meza America pe’ tte!
Sanguetta - (turbato) Sí?
Affunzino - E guarda ccà: (gli fa notare la ricchezza dell’ambiente in cui si trovano) io so’ stato a libertà, eppure stu lusso nun ’o tengo.
Sanguetta - (con grande disappunto) Don Giuvanni’, voi sentite? (Giovanni per sfuggire allo sguardo del giovane, va istintivamente verso la porta. Sanguetta fa un sorriso, quindi, ch’è una smorfia) No, ecco… È stata una debolezza di mammà. Io lle screvette: «Mo ca torno, vita nova…».
Affunzino - Capisco: e chella ha rinnovato pure ’a mubilia!
Sanguetta - (soddisfatto) Ecco.
Erricuccio - (ritorna) Tazze!
Giovanni - (lo ferma, gli chiede, con aria circospetta) Muglierema che sta facenno? Chiagne?
Erricuccio - No: se sta sbattenno ddoie ove a zabbaglione. (E fa il gesto con evidente ironia).
Giovanni - (fa anche lui il gesto, nervosarnente) Eh, aggio capito! (Erricuccio va in cucina con le tazze, e torna subito).
Pascale - (agli amici, mostrando Sanguetta) Però sta buono, eh? S’è ’ngrassato!
Sanguetta - (con amara ironia) Eh! ’A vita commoda.
Peppe - …Cumannava ll’Isola!
Sanguetta - Già: ll’Isola ’a cumannav’i’!
Peppe - Era un piccolo re!
Sanguetta - (turbandosi) Si è saputo?
Peppe - Altro che! Le voci sono arrivate…
Sanguetta - Sí? E dite, dite…
Taniello - E come: il rispetto che tutti avevano di voi…
Affunzino - …Il grande prestigio che godevate…
Peppe - E questo vi ha fatto molto gioco!
Sanguetta - E già… Io accussí aggio campato fino a mmo: facenno gioche ’e prestigio! (Con grande serietà) Amici mieie, nun pazziammo: io so’ nu guappo ’e cartone.
Taniello - Ah! Mo non dovete fare il modesto.
Speniello - (un tipo di tisicuzzo) Ccà ne hanno parlato ’e ggiurnale!
Pascale - (citando i giornali) E come! «Sanguetta ritorna dall’Isola», «Sanguetta a libertà», «Il ritorno di Sanguetta»…
Giovanni - (mugola, solo, a parte) Jh che sanguetta.
Erricuccio - (a Sanguetta) E… nun avite visto che dimostrazione?
Peppe - È per la curiosità che suscitate!
Sanguetta - (duro) So’ fatto na scigna?
Peppe - No.
Sanguetta - E vuie parlate ’e curiosità.
Taniello - (questa volta dà a Peppe uno scappellotto) È ’a terza… e statte zitto!
Speniello - Site nu terremoto, ogne vota che arapite ’a vocca.
Donna Teresa - (dalla cucina con due vassoi colmi di tazze di caffè) ’O ccafè. Neh, m’avit’a scusa’ comm’è venuto. (Erricuccio l’aiuta a dispensare la bevanda in giro).
Sanguetta - …Pigliateve ’o ccafè! (Come dire ai presenti: smettetela di dire sciocchezze, perché altrimenti perdo la pazienza. E mentre gli amici sorbiscono, sempre serviti da Erricuccio, va a togliere il vassoio ch’era rimasto nelle mani della madre, appoggiandolo sul tavolo).
Donna Teresa - (ammirando il figlio, agli altri) Sta buono, eh?
Pascale - È quello che ho detto poc’anzi.
Sanguetta - (ironicamente) Sí. ’O bagno m’ha giuvato.
Pascale - ’O bagno?
Peppe - Penale. (E sorride).
Sanguetta - È sottinteso. (Ride, suo malgrado) Il bagno, per noi, non può essere che penale. (Pausa) E mo non si dice nemmeno più bagno. Si dice aquarium.
Speniello - (mentre gli altri sorridono) Aquarium?
Sanguetta - E già perché llà anche i pesci ci stanno imprigionati!
Peppe - Sta bene! (Si ride. Pausa).
Sanguetta - Eh, cari amici, io ero una delle reclute più bersagliate!
Affunzino - Reclute?
Peppe - Reclusi.
Sanguetta - E si capisce… (Pausa) Tutti i giorni lavori obbligati…
Pascale - Ah ah… (Come dire: adesso sbagli) …forzati.
Sanguetta - E sissignore… Tenite stu maledetto difetto ’e specifica’…
Erricuccio - Facite ’o parla’! (Pausa).
Sanguetta - …Llà, anzi, se ne abusavano perché, sfortunatamente, io ero un minorenne…
Taniello - Vuie?
Sanguetta - (chiarendo) Minorenne di pena!
Erricuccio - Pecché ce stanno pure ’e maggiorenne?
Sanguetta - Eh! (Approva) E gli adulti. Chille nun ghiesceno cchiú! (Si ride).
Giovanni - E… a ffemmene stiveve buono? A ffemmene?
Sanguetta - Sí! (come dire: altro che!).
Peppe - Overo?
Sanguetta - (si china, come per dire una cosa che la madre non debba poter ascoltare. Gli amici si chinano, a loro volta, verso di lui, attentissimi) …Facevo ’a corte a na guardia carceraria… (Scoppio di risa) Don Giuvanni’ (riprende Sanguetta con estrema serietà) mo ll’Isola è na galera!
Affunzino - Ma se jesce?
Sanguetta - Sí: accumpagnate d’ ’e guardiane; pe’ gghi’ a ffatica’; pe’ ffa’ duiciento lire ’e fatica pe’ sette cienteseme,
Speniello - Overo?
Sanguetta - Ah? E ca che? (Richiamandosi ad una nota frase in uso nella vecchia camorra napoletana) «Ll’Isola ’a cumann’i’!». Chesto ’o ddiceva Ciccio Cappuccio dint’ a ll’Opera ’e Pupe. (Gli amici si guardano l’un l’altro, interdetti. Pausa) Ma qua’ femmene? (E guarda Giovanni) Qua’ prestigio? (Guarda Affunzino) Qua’ rispetto? (Pausa) Se jesce, sí, d’ ’o Penitenziario… Ma comme se jesce? Pecché se jesce? Sulamente pe’ gghi’ a ffatica’; quanno nun sì obbligato a sostitui’ a nu ciucco…
Speniello - Pure?!
Sanguetta - Pure! Io pe’ ddoie settimane ’e seguito, so’ stato soitt’ a na carretta, a valanzino. M’avevan’a da’ a mangia’ sulo ’a biada, e po’ stevo a posto! (Pausa) Che ve penzate ca ll’Isola fosse Capri, addo’ se va p’ ’a villeggiatura? (Con tristezza profonda) Avit’a vede’ ’a malincunia ca ve scenne dint’ ’o core quanno, a primma sera, v’avit’a ritira’ dint’ ’a cella vosta. ’O rummore d’ ’o lucchetto d’ ’a porta ca se chiude ’areto ’e spalle, ve fa l’effetto ’e comme si uno ve mettesse na chiave gelata, a carne annuda, ’areto ’e rine. E stu brivido ’e friddo ve scenne p’ ’e ccarne, e nun ve fa piglia’ cchiú calore. ’E mmane, ’e piede se gelano, nun v’ ’e ssentite cchiú. E ’o scuro d’ ’a cella ve fa l’anema cchiú scura. E chiagnite, chiagnite, chiagnite. (Pausa).
Peppe - (rompendo il solenne silenzio, al quale sembrano obbedire tutti i presenti) …Me state facenno passa’ ’a vulunta’ ’e fa’ ’o guappo!
Sanguetta - Comme m’è passata a mme. (Pausa).
Erricuccio - Don Vicenzi’, e ’a biancheria…?
Sanguetta - Nuie.
Speniello - E ’a pulizia…?
Sanguetta - (insistendo) Nuie.
Taniello - E tutt’ ’o riesto…?
Sanguetta - Nuie!
Giovanni - …Sicché, niente femmene, niente cunquiste?
Sanguetta - Ve site fissate! (Pausa) ’O carcerato fa troppo na pietà, pe’ pute’ fa’ gola.
Speniello - E ’a matina ce sta ’a sveglia?
Sanguetta - Comme: automatica: se ne saglie ’o lietto! E si nun sì lesto a te mena’, rieste attaccato sott’ ’a suffitta! (Pausa).
Donna Teresa - (mormora) Jh che ha passato, stu povero figlio mio!
Sanguetta - (sospirando) E perciò, mamma mia cara, pure nu lione, si è stato all’Isola, addeventa nu piecuro!
Giovanni - (dopo una pausa, meditabondo) …Pure si nun è stato all’Isola!
Pascale - (a Giovanni) Come sarebbe a dire?
Giovanni - (dissimulando il suo pensiero) Eh! Uno sente sta robba!
Pascale - Ah! (Come dire: ho capito).
Sanguetta - E chesto ched è? (Pausa) Avit’a senti’ ’o canto ’e quacche carcerato, ’a notte… (Si astrae nel ricordo e, inavvertitamente, accenna quel canto, tante volte ascoltato e sofferto. Gli uomini cominciano a seguirlo, con religiosa attenzione. Sulla porta, lasciata aperta da Erricuccio, l’uomo della chitarra, che curiosava con altra gente del vicolo, va strimpellando, a suo modo, un accompagnamento alla nenia). Musica Scurdato ’n terr’ all’Isola, guardanno sempe ’o mare, si nu vapore appare tu pienze ’a libbertà. Ma passa e se va a sperdere; ’o vide ca scumpare. Ce pare e nun ce pare, ll’hê perzo ’e vista già. Cammina sulo l’ansia: ma rieste sempe llà! Nun ’o ddice, ma ’a smania t’afferra, schiantato ’a sta guerra ca ’a legge te fa! Smaledice sta sciorta e po’ ’a terra ca nun te sutterra pe’ fatte accuita’! Ll’ore sane penzanno ’a famiglia. Nu chianto te piglia; vulisse vula’ Strigne ’e mmane: chisà quanta miglie… Na mamma, na figlia nn’ ’e ppuo’ cchiú vasa’. Scurdato ’n terr’ all’Isola guardanno sempe ’o mare. (Donna Teresa singhiozza piano). Spezza la musica.
Pascale - (a Sanguetta) Gué! Ll’hê fatta chiagnere!
Sanguetta - (con un balzo, è vicino alla madre, accarezzandola) Mammà! (La bacia).
Affunzino - S’è commossa…
Sanguetta - Gué! Ma io mo sto ccà! (Donna Teresa, sollevata, si asciuga gli occhi).
Peppe - (a Speniello e a Taniello) Facite ’e malandrine…
Taniello - Sí, pe’ gghi’ a ferni’ sott’ ’a carretta…
Speniello - …A vvalanzino…
Erricuccio - Io me faccio ’e fatte mieie…
Sanguetta - Fatte ’e fatte tuoie: è la migliore politica.
Pascale - Chi l’ha fatta sta canzone?
Sanguetta - (fa un gesto come dire: non so) Nu cundannato, certamente.
Pascale - Bella! (I presenti approvano).
Taniello - Ammaestra! (Dall’esterno si ode la voce stridula di un grammofono. È un anonimo soprano, che dà inizio all’aria di «Violetta», dal primo atto della «Traviata»).
Voce grammofono - «…Morire di voluttà nei vortici finire! » (E continua, con la rituale risatina, quindi, con l’attacco del «Sempre libera degg’io…». Lieta sorpresa di tutti).
Sanguetta - (sul pedale dell’«aria», a Giovanni, che va trasalendo) Chi è?
Giovanni - ’A signora mia!
Sanguetta - Sona ’o grammofono?
Giovanni - (con un gesto di ineluttabilità) «La Traviata»!
Sanguetta - «Sempre libera degg’io…»?
Erricuccio - Eh! E quanno so’ gghiuto a piglia’ ’e ttazze, se steva facenno nu zabbaglione! (E ripete il gesto di prima).
Sanguetta - (rifà anche lui il gesto, che Giovanni gli conferma, ripetendolo, poi, tra i denti) Ma tene nu bellu curaggio!
Pascale - Ma… hanno fatto chiacchiere?
Sanguetta - Sí… rrobba da poco… (E sorride).
Giovanni - (livido) …Sciocchezze! (La voce del grammofono tace).
Donna Teresa - E va bbuo’, ’o marito è sempe d’ ’a mugliera! (Giovanni la guarda male).
Pascale - (squadra Giovanni da capo a piedi) Ma pecché? S’ ’o vonno arrubba’?
Sanguetta - (scherzoso) Fa troppe scappatelle.
Affunizino - …E chella è gelosa! (Allude a Rachele).
Peppe - (con ironico accento di rimprovero, a Giovanni) Ah! Cu chella bella mugliera vicino…
Giovanni - …Tu vide chillu Ddio!
Peppe - Perciò quanno è asciuta ’a signora, steva turbata?
Sanguetta - Ecco!
Gnesina - (dal fondo, a Giovanni) ’On Giuva’, venite llà: ’a signora vosta vò na ponta.
Sanguetta - (scoppiando a ridere) Chesta è bona!
Giovanni - (seccato) E ’a me ’a vò ’a ponta? ’O ssape addo’ stanno.
Gnesina - E gghiate llà: chella ’a vò ’a vuie.
Giovanni - …Stanno dint’ ’o cummò… (Gnesina si avvia) E portame ’a giacchetta e ’o cappiello! (Gnesina esce).
Taniello - (battendo una mano sulla spalla di Speniello) Mpàrate! Accussí se trattano ’e femmene!
Affunzino - (a Sanguetta, ironico, alludendo a Giovanni, che freme) E se sape: mo ha dda fa’ ’a parta faticata…
Sanguetta - Si fanno i vezzi. (A Giovanni, che lo guarda) Don Giuva’, meh, jate dinto e… datele ’a ponta.
Affunzino - Facite pace e venite ccà cu essa e cu ’o grammofono.
Speniello - E sí: accussí abballammo nu poco.
Taniello - E si no che facimmo?
Pascale - Meh, sono gli amici tutti che vi pregano. (A Sanguetta) Diteglielo pure voi, Don Vicenzi’.
Giovanni - (rabbioso) Non è possibile!
Sanguetta - Se è per me, io non trovo nessuna difficoltà. Anzi…
Peppe - (a Giovanni) Vedete? Alla fine avete detto voi stesso che si è trattato di una sciocchezza.
Pascale - E allora… Vi avesse mancato in qualche cosa di serio, capisco il risentimento.
Giovanni - (sbarrando gli occhi) È ove’?
Pascale - (agli altri) Mo vò pure ’o riesto appriesso!
Affunzino - N’ata vota nun facite cunquiste.
Taniello - Oh! (Approva quanto ha osservato l’amico, poi, a Giovanni) E che volete? La colpa è vostra!
Pascale - Mo ve facite pure prega’?
Affunzino - Quello già si è convinto. Lo fa per dare colore alla furberia. (A Sanguetta) Pregatelo…
Sanguetta - (a Giovanni, che lo guarda) Sí, Don Giuvanni’, chiamate ’a signora e purtate ’o grammofono. (Fissandolo) Tutto questo non c’entra col fatto… vostro…
Giovanni - ?!
Sanguetta - E già. Avrete modo di riappaciarvi in seguito, quando vorrete e se lo riterrete opportuno. Ma ora, gli amici mi hanno onorato di loro presenza appunto per passare una serata allegra; e non bisogna guastare la festa.
Pascale - Giusto. (Gli altri approvano).
Sanguetta - (spingendo Giovanni verso l’uscio) Su, purtate ’a signora e purtate ’o grammofono.
Erricuccio - (mentre Giovanni, ormai costretto, sta per uscire, in un coro di soddisfazione, a lui) E facite veni’ pure ’e ffemmene. (Giovanni esce. Gli amici accennano ironicamente un applauso al suo indirizzo).
Pascale - Sta bene!
Affunzino - (agli altri) Almeno abballammo, ce spassammo nu poco cu ’e discepole…
Erricuccio - (euforico) Neh, scustammo stu tavolo… (Viene aiutato da Speniello e da Taniello. Anche le sedie son tirate in disparte).
Sanguetta - (avvicinandosi alla madre, che è rimasta al suo posto, perplessa) Mammà, ma ch’è stato?
Donna Teresa - (sottovoce) Ma te pare ca chella… (Allude a Rachele) vene, doppo tutto chello ca c’è stato, e se mette pure ’abballa’?
Sanguetta - (facendo spallucce) Vene o nun vene? Nun ce riguarda. Ccà ll’amice so’ venute pe’ me festiggia’, e io nun pozzo fa’ vede’… Quanno ce spassammo innocentemente, nun ce sta niente ’a dicere. P’ ’o riesto… fanno pace, s’accideno… s’ ’o cchiagneno lloro! Assettateve.
Mariuccia - (dalla porta di fondo, recando il grammofono, festosamente) Il grammofono!
Erricuccio - Ccà, ’ncopp’ ’o tavolo.
’NGiulinella - (entrando, con un pacco di dischi) I teschi!
Erricuccio - Eh! ’E ccape ’e morte! Miette ccà. (Prende i dischi e li poggia sul tavolo) Si dice: i tischi!
Gnesina - (avanza, correndo, con una scatola di puntine per il grammofono) Le ponte! (Le porge ad Erricuccio).
Speniello - (avvicinandosi al tavolo, al giovanotto) Prego, lasciate sta’. (Indica il grammofono) Se permettete, chesta è arta mia. (Si occupa egli stesso del funzionamento dell’apparecchio).
Donna Teresa - (piano alle ragazze, che le si sono raggruppate intorno) Neh che se dice?
Gnesina - …Hanno fatto pace.
Donna Teresa - (sbalordita, al figlio che la guarda) Giesù, tu siente? (Sanguetta si china su di lei) Rachele e Giuvanne hanno fatto pace.
Sanguetta - (sorpreso, alle ragazze) Overo?
Mariuccia - Appena isso è trasuto d’ ’a porta, essa se l’ha abbracciato.
Sanguetta - Ah?! E Don Giuvanne…?
’NGiulinella - Ha ditto «E giurame, ca me vuo’ bene!».
Sanguetta - (guarda il soffitto, ridendo) …E chisto mo che trase, ce sfonna ’a carta d’ ’o suffitto! (Le ragazze ridono. Egli si avvicina agli amici, che lo interrogano con lo sguardo, e dice loro) …Hanno fatto pace!
Peppe - L’ha dda vule’ nu bene pazzo, chella mugliera.
Sanguetta - (con ironia) Altro che!
Affunzino - Ma ’e che se n’è ’nnammurata?
Sanguetta - D’ ’o carattere. Don Giovanni è un uomo di polso!
Donna Teresa - (piano, al figlio) Jh che uommene!
Sanguetta - No, che femmene! (Il grammofono, azionato da Speniello, comincia a suonare una polka).
Taniello - (a Sanguetta) Don Vicenzi’, aprite voi la sala.
Sanguetta - Ma…
Pascale - Spetta a voi.
Sanguetta - Volete così… (A Gnesina) Saie abballa’?
Gnesina - Niente. (E ride).
Sanguetta - E viene ccà. (I due ballano, ammirati dai presenti).
Giovanni - (entrando, con timidezza) Per favore… Don Vicenzi’… (Sanguetta smette di ballare) Venite llà… La mia signora dice che vuole essere invitata da voi… (La musica cessa).
Sanguetta - (turbato) Da me? E perché?
Giovanni - (seccato) …E dice che… l’invito deve venire da voi.
Peppe - (ironicamente a Sanguetta, che lo guarda) Eh… Come padrone di casa, vi spetta…
Giovanni - Vuie ’a sapite che capa tene chella.
Sanguetta - (fra i denti) Che capa? Che stommaco! (A Giovanni) Ma io sto abballanno… Mammà, jatece vuie.
Donna Teresa - (timidissima) Ma si chella vò a tte…
Sanguetta - (a malincuore) Vò a mme? E io mo ce vaco… (Fa qualche passo verso la porta) ’On Giuva’, venite pure vuie.
Giovanni - E… che vengo a ffa’?
Sanguetta - (ha un piccolo moto di rabbia, che dissimula con un sorriso) Permesso. (Esce. Silenzio. Nessuno osa parlare. Ciascuno, però, con la sola espressione del volto, manifesta: Donna Teresa, il suo timore, il suo affanno per quanto potrà accadere; le ragazze, la sorpresa per quanto è già accaduto; gli uomini, il loro dubbio, che dietro quella situazione si nasconda qualche cosa di poco pulito; ed infine, Giovanni, sotto il tiro di tutti gli sguardi, una vergogna mal dissimulata e che va crescendo in lui man mano che trascorrono quegli istanti di un’attesa ormai troppo prolungata, per apparire normale. Quando la pausa si sarà protratta tanto, da ottenere il suo effetto, Giovanni comincia a smaniare, lanciando occhiate un po’ a tutti e particolarmente ad Erricuccio, che è alle sue spalle e che fa sforzi incredibili, per non ridere).
Giovanni - (finalmente si decide a rompere il ghiaccio; e a Speniello, con voce vibrata) …E sunate nu poco ’o grammofono, meh!
Pascale - (sottovoce, agli altri amici) …Almeno s’ ’o ffanno a tiempo ’e musica!
Speniello - E sunammo. (Il grammofono riprende a suonare. Ancora silenzio, a cui le note della polka danno uno strano colore d’inquietudine).
Giovanni - (fra i denti, sudando freddo) …Sta facenno na conferenza.
Peppe - (piano, agli altri amici) Me pare ca stu fatto fosse nu poco spuorco!
Pascale - Nu poco?
Donna Teresa - (che ha notato il commento ironico dei guappi, risolutamente) Don Giuva’, e gghiate llà… Ce ’o ddicite ’a signora ca ’o facesse veni’ a figliemo… Gli amici aspettano…
Pascale - Ma no, se è per noi…
Affunzino - Figuratevi…
Peppe - Facesse ’o commodo suio!
Giovanni - (s’avvia, quasi piegandosi nelle ginocchia, e gemendo) Che figura! (Si ode un grido lacerante di donna. È la voce di Rachele. Grande confusione. Gli uomini si levano in piedi, e fanno per uscire. Il grammofono viene fermato. Giovanni è rimasto pietrificato, al suo posto).
Donna Teresa - (sconvolta) Vicenzi’, ch’è stato?!
Sanguetta - (entra come un bolide. Ha il viso contratto come da rabbia, però, esorta tutti alla calma) È niente! È niente! Assettateve!
Pascale - Ma…
Sanguetta - È niente… È stato nu sorice sott’ ’a seggia… ’A signora s’è spaventata, e ha menato nu strillo. Don Giuvanni’, jate, datele a bevere, ca s’ha pigliato paura. E bevite pure vuie. (Giovanni esce in fretta, strascicando il passo. Ad Erricuccio, rapidamente) Chiude! Chiude! (Erricuccio chiude la porta. A Speniello) Sona! Abballate! (La polka ripiglia, allegra, e Sanguetta per primo, con impeto, apre le danze, stringendo a sé Gnesina, mentre gli altri, loro malgrado, vanno ad invitare le altre due ragazze, e Donna Teresa, come sgomenta, cade a sedere).
Fine del primo atto
ATTO SECONDO
Preludio Tela. La scena. Il giorno dopo all’Osteria di «Mimì, ’a Pagliarella» ai Camaldoli. Trattoria rustica di campagna. A sinistra, parete grezza di legno, formata da vecchi tavoloni a sghembo per il riparo dalla pioggia. Qui, in primo piano è l’ingresso alla cucina, poi, una finestra bassa e, in alto, il tetto a pennate, con travi sporgenti. A qualche metro di distanza, il «pagliaio» (capanna di cinque metri di lunghezza, due e cinquanta di larghezza e tre di altezza) che è ricoperto di canne, foglie ed erbe. Sotto c’è la tavola mezzo sparecchiata, con i resti di un abbondante pasto, e dove in un angolo, mezzo sbracati, giocano allo scopone Pascale e Peppe, contro Taniello e Speniello. Affunzino, sta a guardare. A destra, muro di tufo grezzo; a limite del giardino un campo, a cui s’accede mercè un cancelletto formato da piccole travi. A sinistra, sul davanti, Donna Teresa, Gnesina, Mariuccia e ’Ngiulinella, sedute a tavola, discorrono. Pomeriggio, assolato e tranquillo.
Pascale - (trionfalmente) Scopa! (Agli altri) Avimmo vinciuto!
Taniello - (dominando i commenti ironici sui perdenti) ’A rivincita! (Il gioco ripiglia).
Gnesina - (come continuando un discorso) …Sentite ma sta princepale nosta overo tene ’o curaggio ’e Belfagorre!
Donna Teresa - Oramaie, chella va tutto pe’ tutto.
Gnesina - Giesù, aieressera è succieso chello ppoco, e tu (come parlando a Rachele) cu n’uocchio ’nturzato, viene ’n campagna, e te puorte pure a mariteto?
Mariuccia - Chillo nun accusa e nun conta.
’NGiulinella - Comme si propreto nun esistesse!
Gnesina - Ma chi ’a mettette ’mmiezo sta scampagnata…
Donna Teresa - (ipocrita) Gli amici… ca chesto vanno facenno: vanno levanno quistione e po’ fanno ferni’ tutto cose a scampagnate. ’O vvedite? Se so’ fatte ciuotte ciuotte. Sigarette, sicarie …E mentre aspettano ’o ccafè, se fanno pure ’o scupone.
Donna Teresa - Eh. sentarraie che nota spara chesta…. (Allude all’ostessa).
Peppe - (a Speniello, che controlla il punteggio d’una partita) Che spriemme a ffa’? Songo quatto punte! (Il gioco ripiglia).
’NGiulinella - Oh, e chi pava?
Donna Teresa - (olimpica) Chi pava? Rachele!
Gnesina - ?! Rachele?
Donna Teresa - E chi? Chilli llà? (Mostra gli «amici») Figliemo? Vuie? Rachele ha dda pava’. Appena fuie misa ’mmiezo ’a scampagnata, essa, pronta: «Resta fatto! Dimane! E è carogna, chi se ricusa!». Figliemo allora, cu na santa pacienza: «Ma io dimane tengo che ffa’…». E essa: «Dimane! E chi se ricusa è carogna!». Capirete… Gli amici, vicino a figliemo: «Dovete venire… ’O ttenimmo pe’ n’offesa personale…» e Vicenzino ha avut’a dicere ’e sí pe’ fforza… E è venuto e avite visto comme sta? Io sto facenno ’e capitune ’n cuorpo! Rachele nun ’o lassa nu minuto; figliemo quanno vede a chella è comme si vedesse ’o diavulo… E si aiere ll’ha dato nu punio ’ncopp’ a n’uocchio; dimane lle pò fa’ nu straviso cchiú gruosso… E pare ca è asciuto a libbertà…
Gnesina - (guardando oltre il cancello) Ma addo’ sarrà juto?
Donna Teresa - Figliemo è asciuto pe’ ’mmiez’ ’a terra. E chella, appriesso.
Gnesina - Ma c’è gghiuto pure ’o marito?
’NGiulinella - Eh, e chillo nun ’a dà suggezione!
Mariuccia - ’O tene fatto.
Donna Teresa - Mo ca simmo venute, vuleva fa’ sagli’ a figliemo dint’ ’a carrozza, vicino a essa, e ’o marito ’o vuleva fa’ mettere a cascetta. Vicenzino ha pigliato a Don Giuvanne cu ’e ddoie mane… «Assettateve ccà, vicino ’a signora vosta! Io aggi’a accumpagna’ a mammema!».
Gnesina - Ma insomma ’o turmenta…
Donna Teresa - E chi sa comme fernesce!
Mariuccia - Facettemo bbuono nuie ca, aieressera, ce ’a squagliaiemo!
’NGiulinella - E si trasevemo pure nuie dint’a ddu Don Giuvanne, ce tuccava a rummane’ llà tutt’ ’a nuttata.
Donna Teresa - Comme l’aggio fatto io, chiara chiara, pe’ mmedeca’ a chella!
Gnesina - Avite fatta ’a ’nfermiera?
Donna Teresa - E comme: ’e ppezze ’nfose dint’ ’a posema; a leva’ e a mettere tutt’ ’a notte. E chella apposta ’e penza’ ca teneva n’uocchio arruvinato… «E pecché nun me l’ha chiuso pure chist’ato?» (Le ragazze scoppiano a ridere). «Mm’ ’e cchiudeva tutt’ ’e dduie, accussí nun ’o vedevo cchiú! Io ’o voglio bbene!». (Le ragazze restano sbalordite). Eh! E cu ’o marito dint’ ’a cucina… Io: «Zitto, ca Don Giuvanne sente…». E essa: «E chillo ’o ssape! Io nun ’o calculo! Cchiú ’e nnotte ca m’ ’o cocco a piede…».
Gnesina - Povero disgraziato!
Donna Teresa - Eh! (Approva) E quanno è trasuto Erricuccio, e m’è venuto a ddicere ca figliemo passava ’a nuttata dint’ ’o cafè… (Rifacendo Rachele) «Birbante! Cu chella gioia ’e lietto che l’aggio preparato! A passa’ ’a nuttata dint’ ’o caffè!». E, levannose ’e bbende: «Nun me voglio sana’! Voglio essere brutta! Tanto, si pure io fosse na fata, chillo nun me vede!».
Gnesina - (con interesse) Donna Tere’, ma… c’è stato niente fra essa e Don Vicenzino?
Donna Teresa - Niente!
Gnesina - Primma ’e parti’…?
Donna Teresa - Niente!
Gnesina - Ma comme ll’è venuto a essa tutto st’ammore?
Donna Teresa - Eh… ca figliemo è stato all’Isola pe’ via soia… L’ha pigliato a vule’ bbene, e n’ha fatto na malatia…
’NGiulinella - E mo se sana!
Mariuccia - Neh, e che dicette Don Giuvanne all’amice pe’ giustifica’ ca ’a mugliera teneva n’uocchio ’nturzato?
Donna Teresa - Ah! Ca p’ ’a paura d’ ’o sorice, era zumpata spaventata ’ncopp’ ’a na seggia; ’a seggia s’era abbuccata, e essa era tuzzata cu ’a capa ’n faccia ’o stipone.
Gnesina - E s’ ’o ccredettero?
Donna Teresa - Nisciuno!
Gnesina - Bravo!
Donna Teresa - Io ’e vedette ca se guardavano… Po’ accumminciaieno: «Che peccato… Giusto stasera che ci dovevamo divertire… Aspettavamo la signora che avesse portata la sua nota di allegria nella festa…». E n’ato, ’a copp’ ’a mana: «E va bene, vuol dire che se la festa è stata sospesa per stasera, la ripiglieremo domani con una bella scampagnata…».
Gnesina - (alle compagne) ’O vvì? (Come dire: che ti dicevo, poc’anzi?).
Donna Teresa - «…e brindiseremo alla guarigione della signora ed al ritorno di Sanguetta».
Gnesina - Ah! E allora chille hanno capito tutto cosa!
Donna Teresa - Sí. L’hanno capito al punto ca, quanno se ne jetteno, facetteno n’applauso a Don Giuvanne. (Le donne ridono). Musica
Speniello - (gridando verso la cucina) Neh! Stu ccafè…?!
Voce dell’Ostessa - Subito!
Donna Teresa - …A vvuie v’ha ’nvitato essa stammatina? (Gnesina fa cenno di sí).
’NGiulinella - (rifacendo Rachele) «Gué, ogge nun se fatica! Jammo ’n campagna!».
Donna Teresa - E che v’ha ditto p’ ’o fatto ’e ll’uocchio?
Gnesina - Niente… s’ ’o nnascunneva… (Mette una mano sull’occhio destro) Ma chesta (mostra ’Ngiulinella) sapite quant’è spuntuta? «Princepa’, che avite fatto vicino all’uocchio?» (Rifacendo Rachele) «Affari miei!» (Risate). L’OSTESSA (tipo di contadina anziana, entra dalla cucina con due vassoi, che va a portare al tavolo dei guappi) Caffè! (E rientra).
Donna Teresa - Stanno ccà… (Dal fondo a sinistra è entrato, infatti, Sanguetta, in maniche di camicia e senza colletto, le mani, in tasca, e pensieroso. Lo segue Rachele, l’occhio destro illividito).
Peppe - (si leva, premuroso verso i due) A tiempo a tiempo, pigliateve ’o ccafè. (Porge a Sanguetta due tazze, con evidente intenzione che ne passi una a Rachele).
Sanguetta - (ritirandone una) Ched è? Una tazza nun abbasta?
Peppe - (con un risolino) L’altro caffè è per la signora…
Sanguetta - (si volta) Ah! (È come se si accorgesse solo in quel momento che Rachele è alle sue spalle, resta un attimo indeciso, poi, a lei) Signo’, pigliateve ’o ccafè!
Rachele - …Grazie! (Accetta la tazza dalle mani del guappo, che ritorna a sedere, quindi, segue, sorbendo il caffè, Sanguetta che ha fatto qualche passo verso la cucina. Entra Giovanni dal fondo, a sinistra. È anche lui in maniche di camicia. I guappi nel vederlo gli sorridono, e lo applaudono).
Giovanni - (interdetto) …Non mi spiego perché questi applausi. (Mostra Sanguetta) Il festeggiato è lui!
Sanguetta - No, Don Giuvanni’, ccà nun se festeggia a nisciuno. Ccà se festeggia ’a panza. (Sorride) Gli amici scherzano. (Rimette a posto la tazza vuota che ha nelle mani, seguito da Rachele, che fa altrettanto, e va a prendere due tazze di caffè, che offre a ’Ngiulinella ed a Mariuccia) Pigliateve ’o ccafè.
Mariuccia - Grazie.
Sanguetta - (a Gnesina) Il vostro arriva. (E, difatti, torna un attimo dopo con altre due tazze di caffè, che offre alla madre ed alla ragazza, dopo aver mescolato la bevanda, la porta a quest’ultima. A lei, cerimonioso) …Girato cu ’a mano d’ ’o core! (Gnesina sorride, e sorbisce il caffè) Va bene??
Gnesina - Troppo gentile.
Sanguetta - (serio) È dovere!
Taniello - (mescolando le carte, a Peppe) Faie carte tu! (I guappi ripigliano a giocare).
Giovanni - Neh, che ve state jucanno?
Peppe - (alza gli occhi dalle carte, lo fissa) …Na zuppetella’e maruzze!
Giovanni - …Maruzze?
Pascale - Eh, le lumache…
Peppe - Quegli animaletti con le corna… (E fa il gesto).
Giovanni - (colpito dalla feroce allusione) Aggiu capito! (E guarda la moglie, che non s’è allontanata, per niente, da Sanguetta).
Sanguetta - (tra i denti) Mo ce guastammo ’a digestione!
Giovanni - (ingenuamente, a Peppe) E… ve mangiate ’e mmaruzze doppo ’o ccafè? (Gli «amici» non sanno che cosa rispondere, e ridono).
Sanguetta - (per distogliere) Don Giuva’, nun ce facite caso. Chiste gli amici so’ magnature ’e mestiere. Dopo ’o ccafè, accummenciano sempe d’ ’o capo.
Giovanni - E cu bbona salute! (Ridacchia).
Pascale - Grazie! (Giovanni rimane a guardare il gioco).
Rachele - (piano, a Sanguetta) Ce ’a facimmo pure nuie, na scopa?
Sanguetta - (fa un deciso gesto di diniego, poi) …Me faciarrie sempe nu sulitario! (Stacca il colletto e la cravatta da un chiodo infisso ad un palo del «pagliaio» e comincia ad indossarli).
Rachele - (sgradevolmente sorpresa) Già ve ne jate?
Sanguetta - (prorompendo, ma in sordina) E pe’ fforza! Vuie site peggio d’ ’o guardiano ca tenevo all’Isola. Chillo per lo meno m’accurdava nu poco ’e respiro, vuie site n’oppressione. Pure mo, io cammenavo pe’ ’mmiez’ ’a terra, e vuie appriesso comm’ ’o cane ca sente addore… Ma chi femmena fa chesto? A chi l’avite visto ’e fa’? Ottenite l’effetto contrario… (Va a prendere la giacca anch’essa appesa al chiodo e, indossandola, torna accanto a Rachele) Chiste vedono, parlano. (Allude agli «amici») ’O ssentite comme pogneno? «’E mmaruzze… Chelle ca teneno ’e ccorne…» (Con forza contenuta) E che ne vulisseve fa’ ’e me? Na specie ’e marito vuosto ca, ogne vota ca ’o vedono, lle sbattono ’e mmane? Avite capito sí o no ca chill’ommo me fa pena? Sí, me fa pena! E sta rrobba nun m’ ’a fido d’ ’a vede’!
Rachele - (lo ha seguito, incantata, lo fissa, esclama) Bello! (E si allontana).
Sanguetta - (sorpreso, cava uno specchietto e si mira, poi, esclama, a sua volta) All’anema d’ ’a palla!
Gnesina - (che dal suo posto non ha fatto altro che guardare i due, ora si avvicina a Sanguetta, e gli chiede) Che ll’avite ditto, ca è scappata comm’a na pazza?
Sanguetta - (la fissa e, risoluto) Che ll’aggio ditto? ’O vvuo’ sape’?
Gnesina - Sí.
Sanguetta - T’ ’o ddico. Ca faccio ’ammore cu tte!
Gnesina - !! Cu mme?
Sanguetta - Sí! E mo vaco a da’ l’annunzio in forma ufficiale! (E mostra «gli amici») Allora…?
Gnesina - Ma che vvuo’ ca dico, accussí…
Sanguetta - Tu dimme sulo ’o «sí», e po’ ce pienze doppo! Niente amori complicati, cammenammo p’ ’a via maestra. Te cunosco e tu me cunusce ’a guaglione. ’E sentimente mieie so’ bbuone, e ll’hê visto. So’ stato all’Isola? Embè, m’ha giuvato. È stata na casa ’e salute pe’ mme! Io primma nun raggiunavo e mo raggiono; primma nun riflettevo e mo rifletto. M’aggio ’mparato a campa’. Aggio fatta na vita scioperata? E doppo cinche anne d’astinenze ’e tutte genere, so’ addeventato zetiello. Che ddice?
Gnesina - (risoluta) Sí, accetto,
Sanguetta - E dimane, ogge stesso, veco chello che m’aggi’a mettere a ffa’!
Gnesina - (ha un moto di gioia, poi, improvvisamente, cava dal seno un biglietto da cinquanta lire, e chiama) Mariu’! ’Ngiuline’! (Le compagne le si avvicinano, a Mariuccia) Damme ’e cinquanta lire d’ ’a settimana!
Mariuccia - (gliele dà, chiedendole) Che nn’hê ’a fa’?
Gnesina - (non le dà retta, all’altra) ’Ngiuline’, damme pure ’e ttoie…
’NGiulinella - Pronto! (Le dà il danaro) Mo ca scennimmo a Napule, v’ ’e ddongo. (Le due ragazze si schermiscono, tornando, al loro posto).
Sanguetta - Ma che vuo’ fa?
Gnesina - (gli mette in mano i tre biglietti di banca, e, con forza) Tie’, e accummencia a ffa’ ll’ommo! Pava tu ’o cunto pe’ tuttequante!
Sanguetta - (commosso, ammirato) Uh! Quanto sì bella! (Frugandosi nelle tasche) Io n’ati seie o sette lire ’e ttengo…
Gnesina - Pava tu, e fa’ ll’ommo! Dimane ne parlarrà tutto ’o vico!
Sanguetta - Grazie! (È entusiasta, si vuol dare delle arie, grida) Cameriere, conto! (E cava il portafogli, nel quale mette il danaro. Gli «amici» lo guardano, poi ripigliano a giocare).
Gnesina - (piano) No, senza fa’ sape’…
Sanguetta - Chi?! E allora ’a bella figura comme ’a faccio? Io aggi’a fa’ pubblicità! (Grida di nuovo) Conto!
Voce dell’Ostessa - Viene!
Sanguetta - (alla ragazza) Puozze campa’ cient’anne! Quante sì ccara! Qualunque cosa aggi’a fa’, abbasta ca te faccio fa’ ’a signora!
Gnesina - Eh! Io tengo n’arta d’oro ’e mmane! Cu ’o cottimo ca me danno ’e ffabbriche, cu Mariuccia e ’Ngiulinella ca se ne veneno cu mme…
Sanguetta - …armammo nu guantaturificio. (Le stringe le mani con effusione, ma, ad un tratto, si turba. Dalla porta della cucina è comparso un uomo imponente, autoritario, vestito con una sua chiassosa eleganza. È Aniello Terremoto, guappo ed usuraio. Egli fissa Sanguetta, trasalendo, e si avvia, a lenti passi, verso il fondo) Buonanotte!
Gnesina - Chi è?
Sanguetta - (le accarezza il mento, le sorride) È Aniello Terremoto: chillo che avette ’e schiaffe ’a me, primma ’e parti’.
Gnesina - (impressionata) E che vvò?
Sanguetta - Che ha dda vule’? Niente! Oramaie… l’aggio scuntato. Lle dette dduie schiaffe, aggio fatto cinch’anne. Me ha dda da’ isso ’o riesto a me! ANIELLO Don Giovannino! (Si scappella. Giovanni, sorpreso, si avvicina egli stesso. I due uomini si salutano, con effusione).
Peppe - (che alzando gli occhi, ha scorto il nuovo venuto, con tono sommesso agli altri) ’O Terremoto…
Pascale - Sì pazzo?
Peppe - ’O Terremoto…
Speniello - (equivocando) Addo’ ’o siente? (Gli altri si spaventano).
Peppe - Llà, Aniello Terremoto!
Affunzino - Ah! (I guappi fissano minacciosi Peppe, per l’impressione avuta).
Pascale - E tu dice ’o terremoto.
Taniello - Chi è? (E mostra Aniello).
Peppe - Chillo che avette ’e schiaffe ’a Sanguetta!
Speniello - (preoccupato) Che sarrà venuto a ffa’?
Pascale - Avrà saputo ca Sanguetta è asciuto; se sarrà ’nfurmato dint’ ’o vico addo’ steva, e ll’è venuto a ffa’ na surpresa.
Affunzino - (osservando Aniello, che sbircia sempre Sanguetta) Già se guardano in cagnesco.
Peppe - Avimmo fernuto ’e magna’!
Pascale - Pecché, nun hê magnato ancora?
Peppe - (ad Aniello, levandosi con gli altri) Don Aniello, quali onori…
Pascale - (mesce del vino, e l’offre) Venite a bere…
Aniello - (ostentando bonomia, ed avvicinandosi al tavolo) Grazie, state comodi. Sto ancora digiuno.
Pascale - (insiste) Prego.
Aniello - (prende il bicchiere) Tanto per accettare… ’A salute!
I Guappi - Addo’ va! (Aniello beve. Restano, poi, a discutere in fondo).
Gnesina - Donna Tere’, venite ’a ccà. (La chiama con il gesto della mano).
Donna Teresa - (avvicinandosi al figlio, ed alludendo ad Aniello) Chi è?
Sanguetta - Niente, mammà. È chillu tale Terremoto che avette ’e schiaffe ’a me primma ’e i’ all’Isola, e ca po’ Rachele pigliaie ll’equivoco.
Donna Teresa - Madonna! E ch’è vvenuto a ffa’?
Sanguetta - (sorridendo) Giesù, e ccà pecché se vene? …A farse nu bicchiere ’e vino, a magnarse na cusarella… Nuie pecché simmo venute? (A Gnesina, che appare preoccupata) Nun te mettere paura. (La accarezza) E po’ ce aggio fatta ’a mana… (Allude agli schiaffi).
Aniello - (vedendo l’ostessa entrare, agli «amici») Statevi comodi, grazie.
L’Ostessa - Don Anie’, preparo ccà. (Mostra un tavolo, in fondo).
Aniello - Sí.
L’Ostessa - (grida verso la cucina) Puorte n’apparecchio, guaglio’.
Peppe - (ad Aniello) Ma noi abbiamo finito, ccà ce sta ’o posto. (E mostra il tavolo sotto il «pagliaio». Poi all’ostessa) Priparatelo ccà.
L’Ostessa - (ad Aniello) E allora?
Aniello - Sí!
L’Ostessa - (verso la cucina) ’A puorte sta tuvaglia pulita? (Entra, e esce subito dopo, per apparecchiare di nuovo la tavola sotto il «pagliaio». Frattanto Donna Teresa e Gnesina sono tornate al loro posto, e Giovanni s’è avvicinato a Sanguetta).
Giovanni - Avite visto chi ce sta?
Sanguetta - L’ho visto. (Ritorna Rachele e, con grande sorpresa, si avvicina ad Aniello) E l’ha visto pure la vostra signora.
Aniello - (ossequiando Rachele) Signora.
Rachele - Buongiorno. (Si danno la mano. Gli «amici» tornano al gioco).
Sanguetta - (a Giovanni, piano) ’O vvedite? Se so’ pure salutate. E se so’ fatte pure nu surriso. E si state n’atu ppoco vedite pure ’o riesto.
Giovanni - ?! ’O riesto?
Sanguetta - Discorrono. Come vedete, tutto è tranquillo.
Rachele - (piano, ad Aniello) Comme avite saputo ca stevemo ccà?
Aniello - Me l’hanno detto. (E sbircia Sanguetta).
Pascale - (agli altri «amici») È comme ve dicevo?
Aniello - Tenevo ’a fa’ pure cierti cuntarielle cu… (Scorgendo l’ostessa che, in quel momento esce dalla cucina, recando il conto da dare a Sanguetta) …cu ’a cantenera; e così…
Rachele - (ridendo, beffarda) …avite pigliato dduie surice dint’ ’a nu mastrillo.
Aniello - (con un sorrisetto cattivo) Ecco…
Sanguetta - (sarcastico a Giovanni) No. Ha pigliato nu sorice e na… suricessa!
L’Ostessa - ’O cunto.
Sanguetta - (ad alta voce, e, con intenzione, verso Aniello) Pronto a saldare ogni conto. (E mette mano al portafogli).
Rachele - (vivamente sorpresa) E che avit’a fa’?
Sanguetta - (con calma) Che aggi’a fa’? Pavo.
Rachele - (verso il marito, come una lazzara) Gué! Tiene ’e solde dint’ ’o portafoglio? E a chi aspiette? Pava!
Giovanni - (all’ostessa, mettendo mano al portafogli) Quant’è ’o cunto?
Sanguetta - (deciso) Lassate sta’. (Con la mano gli ferma il gesto, poi, a Rachele) Donna Rache’, per vostra norma, io nun me so’ fatto maie cumplimenta’ i pranzi da nessuno! A mme sulo ’o guverno mm’ha dato a magna’!
Pascale - Ma scusate, qua ci siamo anche noi…
Sanguetta - Gli amici mi scuseranno: ma non posso permettere che paghi Donna Rachele.
Giovanni - E… che c’entra, lei? Caso mai pago io, che sono l’uomo!
Peppe - Sta bene! (Accenno all’applauso, e tutti lo seguono).
Giovanni - (seccato) E mo… n’at’applauso? Ma che stongo ’ncopp’ ’o triato?
Sanguetta - (cava il portafogli, legge il conto) Centotrenta. (All’ostessa) Pagatevi, e purtateme ’o riesto. (L’ostessa esce).
Donna Teresa - (sbalordita, sottovoce, al figlio) Vicenzi’, ma te l’ha date Rachele?
Sanguetta - Che cosa?
Donna Teresa - ’E solde pe’ pava’ ’o cunto.
Sanguetta - (offeso) Mammà, mo me magno ’a capa! (Pausa) È una società per azioni: Gnesina, Mariuccia, ’Ngiulinella e compagni! (Ride).
Donna Teresa - E chi nne capisce niente!
Sanguetta - ’O ccaparraie doppo. (Grida) Princepa’! (All’ostessa, che rientra) Neh, stu riesto?
L’Ostessa - ’O guaglione è gghiuto a cambia’. (Esce)
Peppe - (agli amici) Allora ce n’avimm’a i’? E facimmece nu spaghettiello aglio e uoglio, na furchettatella ciascuno…
Sanguetta - (a Peppe) Manco site arrivate? (Pausa) Vedite, ’on Giuva’, chiste so’ magnature ’e prufessione: accummenciano sempe da capo. (Mette il cappello) Mammà, che t’hê ’a mettere?
Donna Teresa - ’O crespo. (E si avvia).
Sanguetta - (alle ragazze) Vestitevi.
Rachele - (vedendo Gnesina, che si avvia, la ferma) Tu pure tiene che ffa’? (Violenta) Cionca ccà!
Sanguetta - (rapido) E già… quella rappresenta ancora la vostra discepola… E alla discepola si può parlare in tono di comando. Se non che, c’è un «ma»… (Solenne, pigliando Gnesina per la mano, come per presentarla agli astanti) Ho il piacere di… (Agli «amici») Per favore, alzatevi… (Ma quelli non si muovono) Vi sto pregando: sositevi! (Gli «amici» si alzano) Ho il piacere, dicevo, di presentarvi ufficialmente la mia fidanzata! (Grande sorpresa di tutti).
Donna Teresa - E io non saccio niente?
Sanguetta - E nun ne sapevo niente manch’io. Nu mumento fa ce simme spiegate. Ma è una cosa antica. Ce vulevemo bene ’a primma ’e i’ all’Isola, ma da primma assaie… Eravamo ragazzissimi, così… (E mette il palmo aperto della mano, quasi a terra).
Giovanni - (tra sé) Erano duie scarrafune!
Sanguetta - Nu minuto fa ci siamo intesi. E la prima cosa che faccio, dichiaro alla signora Rachele che l’ex Gnesina domani signora Agnese, non fa più parte del suo laboratorio. (E spinge Gnesina verso le compagne, perché vada anche lei, ad approntarsi, per andar via).
Pascale - Auguri! (Tutti gli altri fanno coro).
Rachele - (sorridendo, amara) E bravo! Tanti auguri!
Sanguetta - E io l’augurie vuoste mm’ ’e ’nchiovo aret’ ’a porta! (Alle donne, che sono pronte) Fatto?
Gnesina - Pronta.
Sanguetta - (avviandosi, e, scappellandosi, agli amici) Signori…
Giovanni - (convinto di interpretare il pensiero della moglie, che lo guarda) E ma scusateme, nun sta bene: siamo venuti tutti quanti assieme…
Sanguetta - E mo ce n’avimm’a scennere in due scaglioni!
Giovanni - …Non per niente… p’ ’a ggente d’ ’o vico… Vuie sapite ca llà pe’ niente fanno congetture… e vorrei evitare discussioni malevoli…
Peppe - (agli amici che lo guardano, alludendo a Giovanni) Mo ce vò n’applauso! (E dà lo spunto, al che, gli altri applaudono).
Giovanni - E mo mme facite n’ato applauso?!
Sanguetta - (a Giovanni, con tono risentito) E ma si… (Pausa) Non vi preoccupate delle congetture malevoli, che potrebbero fare la gente del vicolo… Sanno voi chi siete… e vostra moglie chi è… Io tengo ’a fa’ quacche ccosa… E per me, oggi, il tempo è danaro!
Pascale - (a Giovanni, ch’è sempre interdetto) E nun ’o furzate…
Affunzino - Vuie ve trattenite ancora nu poco?
Giovanni - Se credete…
Taniello - E allora ce ne scennimmo ’a calata d’ ’o sole.
Speniello - ’A renfrescata!
Peppe - Benissimo! (Grida verso la cucina) Princepa’! (L’ostessa rientra) Menate duie chile ’e maccarune! (Gli «amici» lo guardano male).
Sanguetta - Sí, ma chiste, ’e ppavano lloro… (Indica i guappi, che con gesti disdicono l’ordinativo) Avite cagnato o no?
L’Ostessa - Sto vedenno. (Ed esce).
Sanguetta - (piano, a Gnesina) Mo aggi’a cumpleta’ ’a figura brillante: a vvuie ve metto dint’ ’o trammo, ’o ssicuro; e ve ne scennite a Napule.
Gnesina - (che ha intuito l’intenzione del fidanzato) No, io nun te lasso!
Sanguetta - Ah! Famme fa’! Si no… diceno ca io nun me so’ mosso ’a vicino ’e femmene, e mme ne so’ sciso a Napule cu lloro… E tu saie chisti ccà… (Indica gli «amici») quanto so’ ccarogne. (Pausa) Terremoto è venuto pe’ mme, o almeno, pe’ fa’ vede’ ca è venuto pe’ mme. E io nun m’ ’a pozzo squaglia’. Si no, penzano ca io songo nu guappo ’e cartone. E io nu guappo ’e cartone songo, ma nun l’hann’a sape’! Si no, nisciuno me rispetta cchiú, e ’a vita me se fa cchiú difficile.
Donna Teresa - (impressionata) Ma che vvuo’ fa’?
Sanguetta - Niente. Ma aggi’a fa’ vede’ ca voglio fa’ nu cuofeno ’e rrobba. (E guardando Gnesina, che mostra di essere molto preoccupata) E allora, secondo te, ancora m’aggi’a spusa’, già ’a resto vedova? (Accarezza la fidanzata) Aggi’a sistema’ ’sta cosa primma ’e me ’nzura’… E po’, faciarraggio cunto ’e sta’ all’Isola; ma cu tte! (E forte, verso la cucina) Princepa’… (Agli «amici») Accompagno a lloro fino ’o trammo, e vengo subito (Tutti si guardano. Forte, alle donne) Avviateve, io vengo cu ’o trammo appriesso. (All’ostessa, che rientra) Mo vengo, e me piglio ’o riesto. (L’ostessa fa un cenno di assenso, e precede Donna Teresa e le tre ragazze, che escono. Sanguetta guarda Terremoto, che non gli ha levato gli occhi di dosso, ed esclama) Ci vedremo. (Quindi, se ne va con andatura svelta e spavalda).
Aniello - (fa qualche passo in avanti, e lo vede andar via, fremendo e masticando amaro).
Taniello - (ammirato, agli altri «amici») Tene fegato!
Affunzino - È semp’isso!
Peppe - (sottovoce) Terremoto ha avuto na brutta scossa.
Pascale - Ondulatoria e sussultoria.
Rachele - (al marito, che è rimasto annichilito) Ce ne vulessemo scennere pure nuie?
Giovanni - E… aspetta, stammoce n’atu ppoco. Tanto, chillo mo torna. (Allude a Sanguetta).
Rachele - (come una vipera) E che aggi’a fa’?
Giovanni - (completando il suo pensiero) …Accussí ce ne scennimmo assieme.
Peppe - (con le mani protese, agli altri, pronto ad applaudire) Ce vò… Ce vò… (Gli altri approvano in coro, ed applaudono).
Rachele - (scattando, al marito) E… ma nun hanno ragione? Si tu sì nu cretino…
Giovanni - (agli «amici», con dolorosa esasperazione) E gghiammo, meh! N’ato applauso! E ched è? Vuie m’applaudite sempe?! (Quasi imprecando) E quanno m’ ’e facite ’e fische!? (Ed esce, attraverso il cancelletto, non dando il tempo agli «amici» di giustificare, sia pure molto superficialmente, il presunto fondo innocente del loro prolungato scherzo).
Rachele - (si avvicina ad Aniello, e gli parla alle spalle) E… pecché nun te ne vaie?
Aniello - Me ne vaco? (Sorride, sarcasticarnente, poi dissimulando) Io nun aggio mangiato ancora. (Ed indica il tavolo già preparato).
Rachele - E nun hê sentuto ca chillo mo torna?
Aniello - …Dimostra di avere carattere. ’O ssape ca so’ venuto pe’ isso.
Rachele - Pe’ isso?
Aniello - E pe’ tte! (Pausa) …Io jette apposta ’ncopp’ ’a ’Mmaculatella, quanno s’ ’o purtaino. E mentre ’o saglievano ’ncopp’ ’o piroscafo, ce ’o ddicette: «Ce vedimmo ’o ritorno!» E isso, per la verità, ammanettato, ’mmiez’ ’e carrubbeniere «’O ritorno ce vedimmo!». E mo ce simmo viste. (Pausa) N’ha mannato pure ’e ffemmene pe’ nun ’e spaventa’… Però (con accento torbido) nun me pare ca ’e ppò raggiungere cu ’o trammo appriesso… Che so fatto, nu police? Me scamazza e se ne va? (Ride, cattivo) Quacche trammo ’o perdarrà. Nun s’ha dda scurda’ ca, primma d’arriva’ a Napule… s’ha dda passa’ p’ ’o campusanto ’e Puceriale…
Rachele - (scattando) No!
Aniello - (con accento febbrile) Rache’ …io pe’ cinche anne me so’ miso scuorno d’asci’ p’ ’a via! Tu m’hê visto sempe ’e sera… Tutta Napule ’o ssape ca Sanguetta dette ’e schiaffe a Terremoto. E ’e schiaffe se levano cu ’o sango!
Rachele - No!!
Aniello - Sí! Na vita sana distrutta, capisce?! (Pallido d’ira, e biascicando le parole) Io prestavo denare cu ’o ’nteresse, tu ’o ssaie… Embè, doppo stu fatto, nisciuno m’ha pavato cchiú! (Pausa). È logico: cu che curaggio facevo ’o forte? Pe’ mme fa’ ridere ’n faccia? Pe’ mme fa’ ricurda’ ca Sanguetta m’aveva dato ’e schiaffe? O… pe’ mme fa’ piglia’ n’ata vota sul serio, avarri’avut’a fa’ n’omicidio ’o juorno? (Pausa) …Addo’ ca io, quanno passavo p’ ’a via, ’a ggente se metteva sugli attenti; na parola ca dicevo era na legge; parlava nu rre! E mo? Chi mme vede cchiú? Oscurato! (Con fermi propositi di vendetta) E… o fernisco ’e trasi’ dint’a ll’ombra o, Rache’, io aggi’a vede’ ’o sole! (Pausa).
Rachele - … T’addimanno na cosa, mme dice ’a verità?
Aniello - Parla.
Rachele - Pecché Sanguetta te dette ’e schiaffe? Pe’ mme?
Aniello - (sorpreso) Pe’ tte? No.
Rachele - …Nun t’ ’e dette pe’ mme?!
Aniello - No.
Rachele - (con forza) E pecché?!
Aniello - …Una questione d’interesse.
Rachele - (si sente crollare) Uh! (Mormora) Una questione d’interesse… (Comincia a piangere, poi, il suo pianto, improvvisamente, diventa angoscioso, isterico. Ella perde il controllo di sé, mentre Aniello la guarda stupido, e così gli «amici» che alzano gli occhi dalle carte. Ritorna Giovanni, e si ferma presso il cancelletto, non osando avvicinarsi).
Pascale - …’On Giuva’…
Giovanni - …Ma che sta succedendo llà?
Rachele - (accasciata su di una sedia, si dispera, esclamando) Che suonno! Che suonno!
Giovanni - (si avvicina a lei timidamente).
Rachele - (si volta, vede il marito, diventa una furia) Ah!!! (Vorrebbe aggredirlo, si domina a stento. Grida) Purtateve a chisto! Purtatavillo! Nun m’ ’o facite vede’… (Gli «amici» accorrono, circondano Giovanni) Faciteme sfuga’! Faciteme sfuga’!
Giovanni - Ma ch’è succieso?!
Rachele - (continua a disperarsi).
Peppe - (portando via Giovanni) Don Giuva’, meh, jammo nu poco ’mmiez’ ’a terra…
Giovanni - (sgomentato) Giesù! Chella chiagne! Ma pecché chiagne?
Affunzino - (mettendogli una mano sulla spalla) E ppo’ ’o ssapite…
Pascale - (afferrandolo per un braccio) Chello mo lle passa…
Taniello - Facite ’a sfuga’…
Giovanni - (fuori di sé, trascinato a forza) Tu vide chillu Ddio… (Esce, trascinato dagli «amici» attraverso il cancelletto. Pausa).
Rachele - (riavendosi, a stento, dalla sua crisi, balbetta) …Cinch’anne! Cinch’anne!
Aniello - Ma… pecché stu chianto? Che ce trasive tu ’mmiez’ ’a stu fatto?
Rachele - (torbida) Che ce trasevo? (Scatta in piedi, gli occhi negli occhi di Terremoto, per aizzarlo, esclama) Pe’ mme te dette ’e schiaffe Sanguetta… Sí, pe’ mme! ’A quistione d’interesse fuie na buscia! Chillo è ’o ’nnammurato mio!
Aniello - (sbalordito, rabbiosamente) Sí?!
Rachele - Sí! (Sfrontata ormai nella sua menzogna) Sapeva ca tu me facive ’a corte, e te dette ’e schiaffe pe’ gelusia!
Aniello - !! Overo?
Rachele - È overo! È overo! Pe’ te fa’ fa’ na brutta figura vicino ’a femmena ca tu vulive bene… E pe’ nun te dicere: «Chella è ’a femmena mia!», ha truvato na scusa qualunque e t’ha pigliato a schiaffe!
Aniello - (con proponimenti palesi di rivincita) E bbravo! (La fissa con malcelato disprezzo) Embè, tu ire ’a femmena ’e Sanguetta e cu mmico facive scrupolo?
Rachele - E pecché… è nu prepotente! Sí, è nu prepotente! (Gli mostra l’occhio pesto) ’O vì aiere che m’ha fatto? Aiere! Appena arrivato, n’atu ppoco me schiattava n’uocchio… Chesto, pe’ lle dicere ca nun ne vulevo sape’ cchiú!
Aniello - E… mariteto? (Sorride, beffardo).
Rachele - (disgustata) Addo’ ’o miette? E tu… ne facive suggezione ’e maritemo? Che ppò fa’? ’O vì… (Allude alla scena di poc’anzi).
Aniello - Embè… e sta ’nnammurata ca Sanguetta ha presentato? Il fidanzamento ufficiale? «Alzatevi… Sositevi…»?
Rachele - Buscie! Pe’ me da’ veleno, doppo ’e mazzate ca me dette aiere!
Aniello - (dopo una breve pausa) Sta bene! Allora la cosa cambia aspetto. (Pausa) Isso me pigliaie a schiaffe pe’ mme fa’ fa’ na brutta figura ’nnanze ’a femmena ca io vulevo bene??
Rachele - Sí.
Aniello - Sta bene! (Le prende una mano, la guarda negli occhi) E tu… nun ce tiene pe’ isso?
Rachele - Io? Ll’odio!
Aniello - (sorride, soddisfatto. Entra, improvvisamente, Sanguetta).
Sanguetta - (calmo) Io sto ccà. (Rachele lo fulmina con lo sguardo, si erge nella sua bella persona, e scompare attraverso il cancelletto).
Aniello - (attende, a pie’ fermo, il rivale).
Sanguetta - (gli è di fronte, calmo) Sono a voi.
Aniello - …Qua?!
Sanguetta - (guarda intorno, chiede) Non c’è spazio?
Aniello - …Ma…
Sanguetta - Ce vò nu campo sportivo? (Sorride) Avimm’a pazzia’ ’o futtebal? (Pausa).
Aniello - (in atto di sfida) Rachele me piace.
Sanguetta - Eh, certo… è na bella femmena.
Aniello - Me piace e m’ ’a piglio.
Sanguetta - Pigliatavella.
Aniello - Come sarebbe a dire?
Sanguetta - (scandisce) Prendetevela.
Aniello - E… vuie nun dicite niente?
Sanguetta - No: ve complimento pure ’o ccafè.
Aniello - E… nun te ribbielle?
Sanguetta - (impassibile) M’hann’accidere!
Aniello - E allora… Rachele è d’ ’a mia.
Sanguetta - È vostra. Certo, mia, non è.
Aniello - !! Come «non è»? Voi non ne siete l’amante?
Sanguetta - Io? No.
Aniello - Lo foste?
Sanguetta - Nemmeno.
Aniello - Lo sarete?
Sanguetta - Mai.
Aniello - …Ma comme? Voi sapevate ca io lle jevo appriesso, e me disteve ’e schiaffe pe’ gelusia?!
Sanguetta - Pe’ gelusia? Palle!
Aniello - …Pe’ me fa’ fa’ na brutta figura vicino a na femmena ca io vulevo bene?!
Sanguetta - Palle! Chesto chi ve l’ha ditto? Rachele?
Aniello - Eh.
Sanguetta - Palle! (Pausa) La vostra simpatia per lei l’ho saputa ieri, appena arrivato a Napoli…
Aniello - …E pe’ rappresaglia lle ’nturzasteve n’uocchio!
Sanguetta - No. (Pausa) L’intorzamento dell’occhio è una cosa che non vi riguarda… (Pausa) Donna Rachele ha creduto sempre che io vi diedi quegli affaretti per gelosia di lei; pecché sapevo ca vuie lle faciveve ’a corte… E, pe’ cinche anne, ha fatto cose ’e pazze… Ma ieri ho chiarito l’equivoco: le ho detto che doveva lasciarmi in pace; e quella, per vendicarsi, appena vi ha visto, v’ha ’ngrussato ’e sango, mettendo due uomini l’uno di fronte all’altro… (Serio, deciso) Oh, io già so’ stato all’Isola cinch’anne… e mo? Vò fa’ i’ all’Isola pure a vvuie…? (Lo guarda negli occhi. Pausa).
Aniello - …Sicché Rachele non è la vostra amante.
Sanguetta - Aggio parlato pe’ tre ore…
Aniello - (riflette, decide) Allora nun m’ ’a piglio.
Sanguetta - Nun v’ ’a pigliate! (Come dire: a me che importa?)
Aniello - (con tono provocatorio) Me l’avarrie pigliata si era ’a femmena vosta.
Sanguetta - Giusto. Ma dal momento che non lo è… (Gli porge la mano).
Aniello - (rifiutando di stringerla, anzi, abbassandola) Nu mumento. (Pausa) Abbiamo assodato ’o fatto d’ ’a femmena. Mo dobbiamo assodare l’affare degli schiaffi.
Sanguetta - (con un lieve sorriso) Già: sono due quistioni. ’A quistione d’ ’a femmena è passata e ’e schiaffe nun so’ passate ancora…?
Aniello - E no: ’e schiaffe ’a faccia nun passano. Se levano.
Sanguetta - E vuie v’ ’e vvulite leva’? (Porge risolutamente la guancia) Accomodatevi.
Aniello - (ha un sobbalzo) E… t’ ’e ffaie da’ accussí?
Sanguetta - (olimpico) E che m’aggi’a mettere ’o fracco? (Pausa) Comme me l’aggi’a fa’ da’?
Aniello - (a denti stretti) E nun reagisce?
Sanguetta - (con forza) No!
Aniello - (prorompendo) Ma allora che guappo sì?
Sanguetta - Nu guappo ’e cartone! (Lo fissa negli occhi, quasi a sfidarlo).
Aniello - (tremando di rabbia) Embè… e io, po’, m’aggi’a tene’ ’e schiaffe date ’a nu guappo ’e cartone?!
Sanguetta - E voi restituiteli… Io a ssule a ssule v’ ’e ddette, e nuie a ssule a ssule stammo…
Aniello - (si macera, fremendo).
Sanguetta - …Mm’ ’e vvulite da’ ’nnanze ’a ggente? Facimmo veni’ a Rachele, agli amici… quatto perzone ’e cchiammammo ’a fore… facimmo nu poco ’e pubblicità… (E attende).
Aniello - (è ossessionato, sconvolto, sente l’avversario più forte, e non vuole, al tempo stesso, rinunciare alla sua rivincita) Mannaggia… Ma guardate che situazione…
Sanguetta - E… nun ve pigliate collera… Tenite ’a faccia mia a purtata ’e mano…
Aniello - (lo guarda, con gli occhi inieitati di sangue) …Ma accussí? A sangue freddo?
Sanguetta - E si no pure avit’a rimane’ ’nguttuso… (Lo esorta) Jammo! …Uno sulo… me lo date leggermente…
Aniello - Lassammo sta’…
Sanguetta - (lo incalza) Son io, a pregarvi, meh! Uno schiaffo simbolo! Tanto p’ ’o gusto ’e me mettere na mana ’n faccia… (L’altro esita, combattuto) Vi prego…
Aniello - (finalmente, si decide a dargli un buffetto, sulla guancia destra).
Sanguetta - E chisto ched è? Chisto è troppo piano: chisto è nu carizzo. Io ve dette chillu buffettone…
Aniello - (come un folle) Nun m’ ’o rricurdate, si no… (Alza ambedue le mani).
Sanguetta - (mostra la faccia) Soh! Soh!
Aniello - Mannaggia! (È impotente, sfoga la sua rabbia, scatenata su di sé, ansimante e scornato. Lunga pausa).
Sanguetta - (con grande serietà) Date, date forte. Tanto io, ’e mmane nun ’aizo cchiú! (Pausa) E ricurdateve ca io sulo pe’ quacche piccolo precedente ca tenevo e p’ave’ aizato ’e mmane, me cumplicaino… e so’ stato all’Isola cinch’anne! Cinche! (Pausa) E vuie pure state su per giù nelle mie stesse condizioni… (Aniello ha un sussulto) E si sapisseve ll’Isola ched è! Ve faciarrisseve da’ n’ati quatto schiaffe, senz’arapi’ ’a vocca. Comme songo disposto a pigliarmele io, cu ’e bbraccia chiate, accussí! (Piega le braccia).
Aniello - (alza gli occhi su Sanguetta: è commosso, esclama) Avite raggione!
Sanguetta - (aprendo le braccia) E dateme nu vaso!
Aniello - Cu tutt’ ’o core! (I due uomini si abbracciano con grande effusione. Pausa).
Giovanni - (entra dal cancelletto, come uno stordito. Mugola) Ma è fernuto, vì… È fernuto… (E, macchinalmente, trovata la sua roba, appesa ad un palo del «pagliaio», comincia a vestirsi, con gesti concitati).
Aniello - (piano, a Sanguetta, ridendo) Oh, Don Giovannino. E che ttene?
Sanguetta - Avrà avuto quacche ato applauso.
Aniello - Chisto, ’o vedite? È n’ata vittima ’e Rachele!
Sanguetta - Chisto è ’a peggia vittima! Ma me fa pena, perché, in fondo, è nu buon’ommo. Ha il solo torto di essere un debole!
Aniello - (vedendo Giovanni munirsi del cappello) Ma che fa? Se ne va?
Sanguetta - No: n’avrà cacciato essa.
Aniello - Oh ma, dico io, comme va ca sta femmena ca ha tenuto sempe na debulezza pe’ ll’uommene pusitive, s’è spusato a Don Giuvanne? Forse, in gioventù, ha avut’a essere quaccosa pur’isso?
Sanguetta - No, m’ ’o ricordo: è stato sempe na muzzarella!
Giovanni - (ha messo il cappello alla rovescia, e fa per uscire dalla cucina con passo sollecito).
Sanguetta - (lo ferma) Don Giuva’, e che facite? Ve ne jate?
Giovanni - (con insolita espressione di rabbia) E io me sento ’e muri’! Chella piezza ’e carogna m’ha vestuto ’a pagliaccio!
Sanguetta - (ironico) Nostra moglie? Nostra moglie?
Giovanni - Eh! M’ha fatto addeventa’ l’urdemo ’e ll’uommene; l’ommo ’o cchiú applaudito d’ ’a vita! (È disperato).
Sanguetta - ’A colpa è ’a vosta!
Giovanni - Mia?
Aniello - (a Giovanni) È ’a vosta, ca ce n’avite fatto piglia’… Site debbole!
Sanguetta - Debole? È muscio!
Aniello - (è sbalordito).
Sanguetta - Me l’ha scritto essa: llà stanno ’e llettere… (Aniello scoppia a ridere).
Giovanni - …E che pozzo fa’?! Che pozzo fa’?! (al colmo del suo impotente furore) V’aggi’accidere a tutt’ ’e dduie?!
Aniello - Eh! (come dire: addirittura!).
Sanguetta - (scherzoso) Non vi mettete in cerimonia!
Giovanni - O aggi’accidere a essa?!
Aniello - (serio) Vuie nun avit’accidere a nisciuno!
Sanguetta - A nisciuno! (Con forza) Avit’a fa’ sulamente ll’ommo! Nuie pure ce avessem’avut’accidere per i begli occhi della vostra signora; ma simmo state uommene, e avimmo capito che non ne valeva la pena!
Aniello - Precisamente!
Sanguetta - (afferrando Giovanni per il mento) Chella nun è ’a femmena ’e nisciuno!
Aniello - (con la mano sul petto) Almeno per conto mio!
Sanguetta - E pure per conto mio! (Pausa) Quella è solamerite una isteroplasticalibitocrimineprovocaguaie!
Giovanni - !! Overo?
Sanguetta - Eh! E voi siete un anticoniugoraccogliapplausipassivofisico!
Giovanni - Jh quanta rrobba ca simmo!
Sanguetta - (afferma) È così!
Aniello - Nu disastro!
Sanguetta - E ’a colpa è ’a vosta!
Giovanni - Mia?
Aniello - Vostra! Ce n’avite fatto piglia’!
Sanguetta - Vuie site ommo, pecché tenite ’a giacchetta, tenite ’o cazone; ma dint’ ’a giacchetta, dint’ ’o cazone nun ce sta niente…
Aniello - Niente!
Sanguetta - P’ ’a mugliera vosta ce vuleva n’ommo comm’a nnuie… (Scostando Giovanni, per indicare Aniello) Permesso! Che, all’occorrenza l’avesse saputo scassa’ n’uocchio, come, con tutto il rispetto per voi, ce l’ho scassato io, ieri sera…
Giovanni - (trasalendo) …’O sorice sott’ ’a seggia?!
Sanguetta - Per l’appunto: ’o sorice sott’ ’a seggia. Quello che, per esempio, avreste dovuto fare voi. E ieri sera, in presenza di mia madre e della vostra coniugia stessa, quando vi confessai tutto quello che lei aveva fatto per me ed il bene che mi voleva, voi, invece piuttosto che mandarla subito ai Pellegrini, mme venisteve a dicere, quanno se ne jette ’a via ’e dinto: «Jate llà, chella vuole essere invitata da voi… Vuie sapite che capa tene chella…».
Aniello - (trovando enorme la cosa) Oh!
Sanguetta - Allora io, per non farvi fare una figura suina di fronte agli amici, jette dinto p’ ’a fa’ veni’ a balla’… Chella se mettette ’nnanze ’a porta: «No! Tu non te ne vaie ’a cca’!». E, dunque io che avev’a fa’? Me tuccaie ’e nierve, e con tutto il rispetto per voi… bum! (Ripete il gesto del pugno).
Giovanni - (sbarrando gli occhi) …’A capa dint’ ’o stipone?!
Sanguetta - (conferma) ’A capa dint’ ’o stipone!
Aniello - Ah, questa è stata la vera ragione…
Sanguetta - Questa!
Aniello - Uh! E a me m’ha fatto tutta n’ata storia… Ah, ma questa è una delinquente, sapete!
Sanguetta - …Per vostra moglie non ci vuole la remissività. Chella vò a n’ommo tuosto; voi la tostezza nun sapite manco addo’ sta ’e casa… Chella è una ’e chelli ttale e quale femmene ca vonno a n’ommo guappo vicino - fosse ’o marito, fosse l’amante - abbasta ca è malandrino… Ca quanno ce cammina sott’ ’o vraccio, cu ’o crespo ’e seta, ’a pettenessa int’ ’e capille, ’e rrusette e ’o serracollo, tuttuquante l’hann’a guarda’!
Aniello - Cheste songo femmene spiciale! S’era ’ntusiasmata cu mme, pecché me sapeva n’ommo pusitivo…
Sanguetta - Saputo il disgraziatissimo incidente mio con lui, lassaie a isso e s’entusiasmaie cu mme! Ora io sono sicuro che si vuie l’accuminciasseve a sevizia’… ma con mazzate secanti…
Aniello - …S’entusiasmarrie pure ’e vuie…
Giovanni - (come uno stordito) …’E me?
Sanguetta - ’E vuie! È tutto dire!
Aniello - Abbasta ca sapisseve fa’ ’o risoluto!
Sanguetta - Ogne parola storta, pah! Nu schiaffone. Cheste so’ ffemmene di tipo rinforzato… che hanno saputo ’o sapore d’ ’o cazzotto, e nun ne ponno fa’ cchiú a meno!
Aniello - Vuie a cazzotte state spruvvisto…
Sanguetta - Scazzottato del tutto! E chella cerca di procurarseli altrove!
Aniello - Scetateve!!
Sanguetta - Muviteve!!! Levateve ’o suttanino! Mettiteve ’o cazone! Vuie site Giuvannella! Chella vò a Giuvanne!
Aniello - Facite na guapparia!
Sanguetta - ’A primma parola storta: pah! Pah! (Mimica di schiaffi) ’O ssapite fa’ vuie, chesto?
Giovanni - (con improvviso furore, si erge) Mo vedimmo… (E guarda verso il cancelletto, facendo la faccia truce. Sanguetta, scherzosamente, fa il gesto di dargli la carica alle spalle, come se si trattasse di un pupazzo meccanico).
L’Ostessa - (entra dalla cucina, recando un piatto di maccheroni fumanti) Pronti! (Li serve a tavola).
Aniello - (avviandosi verso il tavolo) Neh, neh, state serviti?
Sanguetta - Facitene salute! (Aniello siede, e comincia a mangiare) So’ n’amico? (E, così dicendo, Sanguetta porge la mano a Giovanni).
Giovanni - Sì nu Ddio! (Gli stringe la mano con grande effusione).
L’Ostessa - (a Sanguetta) ’O riesto. (Gli porge del danaro. Entrano Gnesina, Donna Teresa, Mariuccia e ’Ngiulinella).
Sanguetta - N’ata vota ccà?
Gnesina - E tu nun venive…
Sanguetta - Me sta danno ’o riesto… (Mostra l’ostessa, che esce).
Gnesina - Mammà, steva ’mpenziero, e io pure. Simme scese ’a primma fermata e aspettavemo ’o trammo appriesso pe’ ce ne scennere aunite a tte. Ne so’ passate sette, e mammà s’è ’mpressiunata… E pur’io… (Sanguetta l’attira a sé, e l’accarezza teneramente).
Donna Teresa - (al figlio) Neh, ch’è succieso llà? (Allude ad Aniello).
Sanguetta - Niente.
Donna Teresa - Ma comme, ’o fatto…?
Sanguetta - (ad Aniello) Neh, mammà vò sape’ ch’è succieso…
Aniello - (alzandosi, premuroso, e pulendosi le labbra con il tovagliolo) Signo’, favorite con me!
Sanguetta - È fernuto a maccarune! (Si avvicina alla tavola di Aniello con Gnesina) Permettete che vi presenti la mia fidanzata? (Aniello si complimenta, vivamente, con la ragazza).
Donna Teresa - (piano, a Giovanni) E Rachele?
Giovanni - (sempre, con gli occhi fissi, al cancelletto) È morta ’e subbeto!
Donna Teresa - E chiammatela, accussí ce ne jammo.
Giovanni - (è indeciso, poi) E… datele vuie na voce… Si no, facimmo n’ata storia.
Sanguetta - (scattando, verso di lui) Vuie, vuie l’avit’a chiamma’! (Grida) Vuie!
Giovanni - (con poco vigore) Rache’…
Sanguetta - (rifacendolo con violenza caricaturale) Eh! «Rache’»! (E dimena esasperato il corpo in avanti più volte, come per dire a Giovanni: guarda che cosa vuol dire esser flaccidi! Poi, a lui) Forza!
Giovanni - (montato, rabbioso) Rache’!
Sanguetta - Eh, accussí, forza! (Gli ridà la carica, mentre gli altri ridono).
Giovanni - !!!Rache’!!!
Aniello - (lietamente sorpreso, a Sanguetta) S’è levato ’o suttanino…
Sanguetta - Eh! Mo vedite che gghiesce ’a sotto…
Giovanni - (sempre più rabbioso, verso il cancelletto) …Embè, ha dda ave’ cierti fforme ’e schiaffe!
Donna Teresa - Don Giuva’, e comme va?
Sanguetta - L’avimmo fatto na serenga! (E mostra Aniello, che viene in avanti, mentre le donne ridono).
Rachele - (appare accigliata dal cancelletto).
Aniello - Donna Rache’, ’o marito vuosto ve sta chiammanno!
Rachele - (ha uno scatto verso Giovanni) …Che anema ’e chi t’ ’è stravivo hê passato?
Giovanni - (minaccioso) Comme hê ditto? (Le tira uno schiaffo).
Rachele - (sbalordita, si porta una mano al volto) Ma che ssì asciuto pazzo?
Giovanni - Ripiete n’ata vota? (Le tira un secondo schiaffo) Pe’ chi mm’hê pigliato? Pe’ chi mm’hê pigliato? Pe’ chisti duie ccà? (Mostra Sanguetta ed Aniello, che scoppiano a ridere) Io t’accido! (Richiamandosi alle frasi di esortazioni che più l’hanno scosso) Giuvannella è morta! Mo ce ste Giuvanne! Chillu Pulicenella llà, nun ce sta cchiú! Mo ce stongo io! (Fa per scagliarsi contro la donna, che gli sfugge, con un grido. Accorrono gli «amici» che, credendo che il clamore sia determinato da un alterco tra Sanguetta ed Aniello, afferrano i due uomini e li tengono lontani, come imprigionati. Ciò, mentre Giovanni, con assoluto sopravvento sulla moglie, le grida) Viestete e ghiesce ’a casa! (E, a lei, che piange sbalordita e rabbiosa, con la guancia indolenzita) ’O scialle addo’ sta? (Si allontana, in fretta, per andarlo a cercare).
Sanguetta - (tentando di svincolarsi da quelli che lo hanno immobilizzato) Lassateme.
Aniello - (a quelli, che hanno immobilizzato lui) Ma che ce tenite a ffa’?
Sanguetta - Ma che ce stammo appiccecanno nuie?
Peppe - No?
Aniello - Nuie avimmo fatto pace.
Pascale - E allora?
Sanguetta - È Don Giuvanne che finalmente ha pigliato a schiaffe a Donna Rachele! (I presenti restano sbalorditi ed ammirati. Rientra Giovanni con lo scialle). Mo, l’avit’a fa’ n’applauso! (Tutti applaudono con gran calore).
Giovanni - (mettendo con malgarbo lo scialle sulle spalle della moglie, e spingendola verso sinistra) Jesce, cammina! (Rachele è avvilita, singhiozzante, mentre il marito, ringalluzzito ed applaudito ancora da tutti, la segue) E ’a casa te dongo ’o riesto! Musica (I due escono, salutati allegramente da tutti, mentre Sanguetta ed Aniello si stringono la mano).
Fine del secondo atto
ATTO TERZO
Preludio Tela. La scena. Un anno dopo. Il basso dove abita l’ex Sanguetta, oggi Vincenzino, con sua moglie Gnesina, e che funge da casa e da bottega. Un’arcata divisoria con una tenda è a destra; al di là della quale, il letto e pochi accenni di povera mobilia, che occupano il breve spazio di quel secondo ambiente. A sinistra, in fondo, l'ingresso, con telaio a vetri, che affaccia nel vicolo. Qui è appoggiato Vincenzino, immobile, silenzioso. Lungo la parete di destra, un tavolo, dove lavorano Mariuccia e ’Ngiulinella: l’una a tagliare e l’altra a imbastire dei guanti, ed una macchina da cucire, alla quale è intenta Gnesina, che completa il lavoro delle sue antiche compagne. Dal centro del soffitto pende una lampadina accesa, con piatto verde trasparente, che, con un cordino, è stata portata a cadere sulle donne che lavorano. In prima quinta, a destra, l’ingresso alla cucina. È sera, e sembra notte. S’ode la voce di un venditore, lontana.
VOCE DEL VENDITORE «Nocelline americane! Caldi! Caldi! ’O turrone, a nu soldo ’o pezzo!».
Mariuccia - (a ’Ngiulinella) Gué, chillo d’ ’e nocelline americane!
’NGiulinella - E sì arrivata cu ’e nocelline! Io tengo na famma…
Gnesina - (fermando la macchina, alle ragazze) A che state?
Mariuccia - Io n’atu ppoco, e aggio fatto.
Sanguetta - (seccato, a Gnesina) Ma ’e vvuo’ fa’ i’ a magna’?
Mariuccia - (a Sanguetta) Avimmo fernuto.
Gnesina - Fatto… fatto…
Sanguetta - Hê fatto una tirata ’a stammatina.
Gnesina - Saie ca dimane ’e guante s’hann’a cunzigna’?
Sanguetta - ’E cunzigne doppo dimane. Ma che vuo’ muri’?
Mariuccia - (a ’Ngiulinella) Faie nu guaio ’a vota, tu.
’NGiulinella - E tu dice: chillo d’ ’e nocelline. Comme t’aggi’a risponnere?
Gnesina - (alle ragazze) Lassate sta’. St’ati cinche o seie pare ’e ffacimmo dimane.
Mariuccia - Ma nuie che ce mettimmo?
’NGiulinella - (per riparare il malfatto, ad Agnesina) E sí, mo ce truvammo. Si è pe’ mme, chi tene appetito?
Mariuccia - (a ’Ngiulinella) Tiene ’a faccia d’ ’e ccorna vecchie!
Gnesina - (alle ragazze) Basta, basta. (E ad esse, che si alzano e fanno per rassettare) Lassate sta’, m’ ’o vvech’io. Jate a mangia’, ca ’a casa v’aspettano.
Voce di donna - (dalla strada, a Sanguetta) Don Vicenzi’, che ore songo?
Sanguetta - ’E sseie!
Gnesina - (dando il danaro della paga settimanale alle ragazze) Tenite.
Mariuccia - (intascando) E grazie.
’NGiulinella - Vulite niente?
Gnesina - No. Dimane, cchiú ampressa. (Piano, ad esse) Jate, jate, si no, chillo (indica Sanguetta) se tocca ’a nervatura.
Mariuccia - Bonasera.
’NGiulinella - (uscendo) Bonasera, Don Vicenzi’.
Sanguetta - Bonasera. (Le ragazze escono. A Gnesina, che è ancora al lavoro) Ancora?
Gnesina - (levando tutto di mezzo, a Sanguetta) Aggio fatto, aggio fatto.
Sanguetta - Hê fatto, da ’e sseie ’e stammatina a ’e sseie ’e stasera, una tirata. E io stongo cu ’e mmane ’mmane, inutilizzate dint’ ’a sacca, pecché nun saccio che n’aggi’a fa’!
Gnesina - (che ha accostato la macchina al tavolo, ed avrà levato tutto di mezzo) Pecché nun ce saglie n’ata vota ’ncopp’ ’a dd’ ’o ’ngigniere?
Sanguetta - Tre vote ce so’ stato stammatina, nun ce steva, aggio pure parlato cu ’a signora…
Gnesina - E t’ha dato speranze?
Sanguetta - Eh… (Rifacendola) «Glielo dirò, non dubitate… Capirete, mio marito deve superare delle difficoltà…».
Gnesina - (rabbuiata) E sempe llà…
Sanguetta - (esasperato) Ll’Isola! Ll’Isola maledetta! Ma tu hê ’a vede’ l’accoglienza ca me fanno. «Chi siete?». Caccio ’e documente, sponta ll’Isola… e cagnano rotta! Chi vuo’ ca me crede, si manco mammema ’o ssapeva ca io songo na persona onesta. Chi ’o ssape? Tu?
Gnesina - (dolcissima) E lassa fa’ a Ddio!
Sanguetta - E chi ’o mette pede avante. Anze, stamattina m’aggio ’ntiso ’a Messa, so stato mez’ora a guardarme ’a Madonna… Aggio chiagnuto…
Gnesina - Nun me l’hê ditto…
Sanguetta - E nun te l’avev’a di’. Llaggio pregata; e sulo Essa sape cu quanta fede. «No’ pe’ me» l’aggio ditto, «no’ pe’ me, pe’ chella povera mugliera mia, ca nun tene nisciuna colpa; e ca è stata l’unica ca m’ha aperte ’e braccia!» (S’accorge che Gnesina piange) Hê visto pecché nun t’ ’o vvulevo dicere? (Accarezzandola dolcemente, ed asciugandole le lagrime con il pollice della mano) Tu staie troppo sullevata… (Continuando sempre ad accarezzarla) …Doppo dudece ore ’e fatica, te dongo ’o cunforto.
Gnesina - (piena di fede) E vedarraie ca quacche ccosa jesciarrà!
Sanguetta - (con infinita amarezza) Figlia mia, t’aggio ’nguaiata!
Gnesina - Nun ’o ddicere.
Sanguetta - L’aggi’a sulo penza’? Staie facenno ’a facchina!
Gnesina - No…
Sanguetta - Sí. E si sapisse che me sento, quanno tu me guarde e ride. Ride pe’ m’annasconnere ’a stanchezza; e io chesto ’o ccapisco… e vulesse spari’!
Gnesina - Nun parla’ accussí!
Sanguetta - …E cu ’a saluta ’ncuollo, Padreterno! (Guarda verso l’alto) E cu ’o desiderio ’e fatica’! (Si guarda le mani, le scuote, le guarda ancora, e ad esse, con accento di profonda tristezza) E che me rappresentate?
Gnesina - (per distogliere il marito) E va’… Vance n’ata vota ’ncopp’ ’a dd’ ’o signore. Mentre io ’nfoco ’a caurara e metto ’a tavola. Se sarrà ritirato, ce parle e po’ viene e magnammo. È tanto buono. Aiere ca io stette ’o studio, me dicette: «Non dubitate, è una cosa che mi sta a cuore moltissimo. Per lui, e per voi, che vi conosco da bambina». E chillo è tanto nu signore, ca si dice na cosa, ’a fa!
Sanguetta - (sfiduciato) Ma hê capito ca ce sta ’o «ma»?!
Gnesina - E si vò isso, se garantisce, e ’o posto ’o fa’ asci’. (Pausa).
Sanguetta - (la bacia in fronte) Che magnammo stasera?
Gnesina - Tubbettielle dint’ ’o brodo. È dummeneca.
Sanguetta - E ’o baccalà ca purtaie io?
Gnesina - L’aggio miso a spugna’.
Sanguetta - Era tuosto! (Pausa) Tutta tosta ’a rrobba mia! E pe’ doppo?
Gnesina - ’A carne d’ ’o brodo l’avoto cu nu poco ’e cepolla.
Sanguetta - Miezu litro ’e vino t’ ’o ccumplimento io…
Gnesina - Lascia sta’.
Sanguetta - È dummeneca; e ringraziammo Ddio pure pe’ ogge. Dimane, Ddio ce penza.
Gnesina - Accummencia ’a settimana ’e Pasca!
Sanguetta - Digiuni seri! (E ride) Mah… ’O paese che ci ha dato i natali nun ce faciarrà sta’ diune a Pasca!
Gnesina - Va’, e fatte ’a croce. (Sanguetta si segna, ed esce. Gnesina sospira, e va al comò, rimanendo assorta davanti ad un’immagine sacra. Pausa. Entra Don Luigi. È il padre di Gnesina. Vecchio operaio, burbero, intransigente. Lo accompagna Assunta, la sua vecchia sorella. Dà uno sguardo in giro).
Don Luigi - Nun ce sta nisciuno. (Chiama verso la cucina) Gne’!
Gnesina - (scuotendosi) Papà! (Gli va incontro).
Don Luigi - Che facive? Pregave?
Gnesina - Sí. Buonasera, ’a zi’.
Assunta - Buonasera.
Don Luigi - Mariteto?
Gnesina - Mo è asciuto. Nun l’avite visto?
Don Luigi - (osserva il tavolo, la macchina, il disordine del lavoro da poco interrotto, alla figlia) Ogge pure hê faticato?! (Gnesina tace. Ad Assunta) Mo ha fernuto ’e fatica’! (Ancora alla figlia) Ma manco ’a dummeneca ’a fernisce, tu? (Ancora ad Assunta, che tenta di calmarlo) Mo ha levato mano.
Gnesina - E sí! Io dimane aggi’a cunzigna’ dudice duzzine ’e guante!
Don Luigi - (non osa replicare).
Assunta - …E figlia mia, pure ’o Padreterno faticaie seie juorne e al settimo giorno si riposò!
Don Luigi - (scattando) E chella vò essere cchiú d’ ’o Padreterno!
Gnesina - (convincente) E che faccio, papà, rifiuto ’a fatica? Ddio ’o ssape comme l’aggio nu poco ’e straordinario!
Don Luigi - Straordinaria sì ttu! ’A saluta toia ’a vuo’ lassa’ vicina a na machina. Pazza! (Ironico) Hê fatto ’o matrimonio, e te sì sistimata!
Gnesina - Nun parlate accussí, a me nun me manca niente.
Don Luigi - (alla sorella) Hê capito? Nun le manca niente. (Ed a Gnesina) Si arapesse ll’uocchie mammeta, te sbranarrie pe’ chelle che hê fatto!
Gnesina - (senza scomporsi) So’ cuntenta!
Don Luigi - (scattando, ad Assunta) Ma che mm’hê purtato a ffa’? Pe’ mme fa’ tucca’ ’e nierve? Io nun ce vulevo veni’!
Gnesina - (addolorata, al padre) Ma pecché dicite chesto?
Don Luigi - E tu ’o difiende!
Gnesina - ’O difendo? E pur’io l’aggi’a i’ contro?
Assunta - (dopo un attimo di pausa) Ma nepota mia bella, si chillo parla (allude al fratello) è pecché t’è pato e lle dispiace…
Don Luigi - E io nun ce tengo nisciuno scrupolo! Ce ’o ddicette, ce ’o ffacette capi’ ciento vote: «Nun è cosa, nun è cosa, nun è cosa!». Niente! Dinto a manco quinnice juorne: carte, pubblicazioni, Municipio, chiesa… Manco si teneva sette panze ’nnanze! Avev’a piglia’ ’o Palio! Comme si a n’ato nu poco cchiú meglio, nun ’o truvava! Dice: «Io perdo a chisto, comme ’a cumbino cchiú?». E ce ’mbriacaie pure a nnuie. (Pausa) ’O guaio l’ha voluto passa’ essa!
Gnesina - (dignitosa) Io nun aggio passato nisciuno guaio! So’ felice e ’o voglio bene! Pecché fatico? E faccio ’o duvere mio. Ogge fatico io, dimane fatica isso.
Don Luigi - (indisponendosi, ad Assunta) Jammuncenne, fallo p’ ’a Madonna!
Assunta - (trattenendolo) Aspetta!
Don Luigi - (a Gnesina) Ma che ha dda fatica’?! (Gridando) Chillo nun fa niente!
Assunta - (a Luigi) Zitto, nun facimmo senti’. (E guarda verso l’uscio).
Don Luigi - (replicando più sottovoce) Niente fa! Pecché nun vò fa’ niente!
Gnesina - (ferma) No. Nun trova! Nun è ca manca ’a fatica, ma pecché nisciuno s’ ’o piglia.
Don Luigi - ’O ssaie dicere ca nisciuno s’ ’o piglia? E tu te l’hê pigliato!
Assunta - (a Gnesina) Nun puo’ dicere ca nun te l’avessemo ditto. Te facetteme na capa tanta, ma nun hê voluto senti’ a nisciuno!
Don Luigi - Ah! (Disgustato) Se l’avev’a immagina’… (Ad Assunta) Comme si chillo turnava ’a l’Università; dice: «Io tengo ’a laurea, e me ’mpiego…».
Assunta - Ma turnanno ’all’lsola… che pputeva fa’?
Don Luigi - Sanguetta! Uno ca se chiamma Sanguetta! Neh, che ppò ffa’, Sanguetta? Ha dda zuca’!
Gnesina - (avvilita ed esasperata) E fernitela, facitelo pe’ Ddio! Nun me murtificate cchiú! Oramaie m’è marito, e ’o bbene se dimostra cu ’e sacrificie!
Don Luigi - Faticave e magnave tu sola!
Assunta - Mo hê ’a da’ a magna’ pure a isso!
Gnesina - Ma chillo se ’ndustria a mille cose pe’ purta’ quacche lira. È ’o posto fisso ca nun trova…
Don Luigi - E nun ’o truvarrà!
Gnesina - No!
Don Luigi - Sarrà sempe accussí: cu chilli precedenti…
Assunta - E va buono, meh, Lui’…
Don Luigi - ’O ssapeva, l’ha voluto essa!
Gnesina - (fiera) E l’aggio voluto io! Vincenzino è n’angiolo!
Don Luigi - E mo me n’aggi’a i’!
Assunta - (trattenendolo) Aspetta!
Don Luigi - E chella dice ca chillo è n’angiolo! Jh che hann’a essere ’e diavule!
Gnesina - E sí! È stato nu scapestrato ’a guaglione; ma ’e sentimente so’ buone! E si vuleva magna’ ’ncuollo a na femmena, teneva ’a via facile cu Rachele, ca l’ha miso ’n croce! E ’o ssaccio io comme l’ha trattata… ’o ssaccio io! E basta mo, basta! (Scoppa a piangere).
Sanguetta - (riappare, e si ferma, senza farsi scorgere, sotto la porta. Ha con sé una rozza bottiglia).
Assunta - E nun chiagnere. Pateto, si parla, è pecché te vede accussí…
Gnesina - (piangendo ancora di più) Che accussí, che accussí?! A me nun me manca niente! (Forte, al padre) Niente! È n’anno ca m’aggio ’mmaretata, v’avesse cercato maie quacche cosa?
Don Luigi - No.
Gnesina - E dunque! Fino a mo, avimmo campato cu ’o sciato ’e Ddio. E dimane, Ddio ce penza!
Sanguetta - (mostrandosi, nasconde la bottiglia, ponendola sul mobile, a sinistra, e ricoprendola con un tovagliolo) Caro suocero. (Ad Assunta) Buonasera. (Guarda Gnesina, e rivolgendosi a lei) Ched è? Mio suocero ti ha fatto i miei elogi?
Gnesina - (si sforza di sorridere) No…
Sanguetta - No? (La guarda fisso) Jh quanto si bella! Ride cu ’e llacreme all’uocchie…
Gnesina - (asciugandosi rapidamente gli occhi) Io? No…
Sanguetta - (le passa una mano sugli occhi, e la ritira bagnata) Cheste che so’? Nun so’ lacreme? Che t’hanno ditto? Ca hê passato nu guaio; ca io nun voglio fa’ niente; e ca isso te l’aveva avvisato… (Mostra Don Luigi, che sbuffa) T’ha ditto chesto? (Pausa) E dalle na tazza ’e cafè in cambio della sua tazza di veleno!
Don Luigi - Mo è meglio ca nun risponno!
Assunta - Se parlava…
Sanguetta - ’E me?
Gnesina - Sí… E dicevamo…
Sanguetta - …Ca io stongo a spasso!
Gnesina - E si nun me faie parla’!
Sanguetta - E si no, parlanno ’e me, che putiveve dicere! Ca stongo a spasso, ca so’ stato all’Isola, e che me chiammano Sanguetta! Stongo a spasso… Stongo a spasso… E pe’ fforza… Si trovo chiuso tutt’ ’e pporte! (Azione di Don Luigi e di Assunta come dire: per forza).
Gnesina - (alludendo all’ingegnere) L’hê truvato?
Sanguetta - Nun ce steva, me l’ha ditto ’o guardaporta. ’A signora, ’a coppo, m’ha visto pure, e io me songo scappellato. (A Don Luigi) È n’anno ca io me levo ’o cappiello. Me l’aggio cunzumato, a furia ’e m’ ’o leva’. È addeventato na fuscella!! Questo lo metteranno in un museo. «Il cappello che salutò il mondo!» (Pausa. Guarda il suocero, a lui, con impeto) Papà, io songo nu buon’ommo!
Assunta - E chesto stevemo dicenno…
Sanguetta - Songo sti benedetti precedenti… (Pausa).
Don Luigi - Pozzo parla’.
Sanguetta - Parlate.
Don Luigi - E quanno sapive sti benedetti precedenti, nun te spusave, cuntinuave a campa’ sulo. Hê visto mammeta? Se n’è gghiuta a ddu ll’ata figlia ’o paese, e ha ditto: s’ ’o cchiagne isso…
Sanguetta - E pe’ fforza se n’avett’a i’ ’a Napule. Io avett’a restitui’ ’a cammera ’e lietto a Rachele: chi mm’ ’e ddeva ’e sorde pe’ ce ’a pava’?
Don Luigi - …Oh! Mo site a dduie; ’a nati duie o tre mise site a tre…
Gnesina - E addo’ stanno ’e figlie, ce sta ’a pruvvidenza.
Don Luigi - No.
Assunta - Addo’ ce stanno ’e llire, ce sta ’a pruvvidenza!
Don Luigi - Si no ce sta ’a miseria!
Sanguetta - …Papà, ma ve pare ca io a stu fatto nun ce penzo? Si nun sapesse ’o duvere mio ’e marito, ’e pato, nun starrie accussí avvilito. (Pausa) Pe’ me ’a vita è stata tutta na tempesta; e me ne songo sempe reduto, pecché ero sulo a lutta’. Mo tengo dei doveri. Mammema? E che pò fa’? Chille tre cientesime ’e pensione ca tene, a stiento abbastano a essa; e quindi aggi’a penza’ io a tutto ’o riesto. Dice il Signore: «La moglie deve aiutare il marito». È giusto; ce ’o ddicette pure ’o prevete quanno jettemo a spusa’. Ma aiutare significa dare una mano; no che ha dda essere ’a femmena a ppurta’ ’a casa ’nnanze. (Pausa) Vedete, caro suocero, vedete cara zia, ca sti ccose ’e ccapisco. Capisco ca sta pover’anema ’e Ddio (indica Gnesina) sta facenno ’e nuttate sane sane a sgubba’… Ma io manco dormo; stongo pur’io cu ll’uocchie spalancate, tutt’ ’a notte, a guarda’ sott’ ’e trave…
Don Luigi - (piano, ad Assunta) Jh che ffa!
Sanguetta - …Chi nun sape, diciarrà: «E n’anno ca… è asciuto a libbertà, e nun vede ’e truva’ na via?».
Don Luigi - Oh! (Come dire: ci siamo!).
Sanguetta - (fissandolo) Nun veco? Nun trovo!
Gnesina - Costa a mme! Sta facenno ll’arte d’ ’o sole! (Entra in cucina).
Sanguetta - …Ll’arte d’ ’o sole, pe’ truva’ qualunque cosa; n’occupazione qualsiasi, niente! (Pausa) ’E precedente! Songo stato all’Isola (Pausa) A chest’Isola m’avarrian’a fa’ nu munumento, pe’ quanta vote ’a faccio annummena’. Ci sarà un giorno l’Isola Sanguetta. (Pausa) Songo stato all’Isola. E che aggio fatto? A chi aggio acciso? A chi aggio arrubbato? A chi figliola zetella aggio arruvinato? A qua’ associazione a delinquere aggio appartenuto? Niente! (Pausa) Politicamente ero un conservatore, nun conservavo maie niente, e me ritirai dalla politica. Cinche o seie cundannelle, sempe pe’ mazzate… Mannaggia ’e mmane, e quanno nun me cadevano! (Se le guarda con rancore) Mammema me l’avess’avut’attacca’ pe’ sempe dint’ ’e ffasce, accussí s’atrofizzavano… Ogne vota ca l’aizavo, facevo nu guaio. Mazzate, mazzate… Tanta piccole condannelle addeventaieno nu cundannone… «Essere turbolento! Andate all’Isola!». Comme avev’a risponnere? «Non accetto? Nun stongo commodo?». «Andate all’Isola! ». «E ghiammo all’Isola! ». Credevo pe’ ppoco… Cinch’anne! Cinche! (Pausa) Oh, e mo ca st’essere turbolento è asciuto, e è addeventato na pecora, ha dda cuntinua’ a campa’? Io tengo trentun’anno, aggio campato, mettiamo, ’a mmità; e ll’ata mmità che faccio? (Pausa) E si no, che songo asciuto a ffa’? Allora io nun songo asciuto? Io stongo ancora all’Isola? Nun m’avite dato cinch’anne, m’avite cundannato a vita? E chesto è chello ca nun me fa raggiuna’, e me fa asci’ pazzo!
Don Luigi - (ad Assunta, che lo guarda, convinta dalle parole di Sanguetta) Sarrie stato n’avvocato ’e primm’ordine!
Assunta - Have ragione!
Sanguetta - So’ stato all’Isola pe’ mazzate. E che significa? Papà, pure Napoleone è stato all’Isola pe’ da’ mazzate a tutt’ ’o munno. Anze, a ddoie Isole: Isola d’Elba e Sant’Elena!
Don Luigi - (al colmo dell’esasperazione) E mo me n’aggi’a i’!
Assunta - Pecché?
Don Luigi - E chillo mo se n’esce cu Napulione!
Sanguetta - E Garibaldi nun è stato all’Isola? A Caprera!
Don Luigi - Uh! (E gridando verso la cucina) Gne’, io me ne vaco, statte bona. (Gnesina entra).
Sanguetta - (a Don Luigi, che si avvia verso l’uscio) Ma sentite…
Don Luigi - Vattenne!
Gnesina - Papà…
Don Luigi - (sotto l’uscio) Chisto è nu pazzo! Puortatillo ’o manicomio! (Ed alla sorella) Jesce! Jesce!
Assunta - E mme vuo’ fa’ saluta’? (Don Luigi la trascina, escono).
Sanguetta - Ma guardate… Comme se io me fosse paragonato a Garibaldi e a Napoleone… Io aggio voluto dicere che anche quei grandi uomini…
L’Ingegnere Padula - (uomo serio, all’antica, entra) Permesso?
Gnesina - (scorgendolo) Vicenzi’, ’o signurino…
Sanguetta - (lietamente sorpreso) Ingegnere, servo! (Gli toglie, premurosamente, il cappello dalle mani, e lo poggia sul tavolo. Si guarda intorno, per cercare una sedia, ne piglia una, e la prova, poi, una seconda, ed anche questa è rotta; infine, riesce a trovarne una alquanto sana e fa accomodare il nuovo venuto) Questa… Questa… La sedia degli ospiti. (L’ingegnere, che ha osservato, ride bonario).
Gnesina - (pulendo, rapidamente, la sedia prescelta) Accomodatevi.
L’Ingegnere Padula - Grazie.
Gnesina - Perché vi siete voluto incomodare?
L’Ingegnere Padula - Prego…
Sanguetta - Ve lo ha detto la signora che sono stato a casa?
L’Ingegnere Padula - Sí, mi ha parlato; abbiamo discusso lungamente, e non vi nascondo che il posto per voi ci sarebbe… Anzi, c’è…
Gnesina - (felice) Puzzate essere benedetto!
L’Ingegnere Padula - C’è un «ma».
Sanguetta - (pronto) Ca so’ stato all’Isola?
L’Ingegnere Padula - Questo ormai è noto.
Sanguetta - ’O ssanno ’e cane e ’e puorce!
L’Ingegnere Padula - Ecco: per questo triste incidente, dovrei assumermi tutta intera la responsabilità sulla vostra condotta e sulla vostra onestà. Si tratta di un posto di fiducia, ed oltremodo delicato. Ci sarebbe da far parte del movimento spedizione di una importante azienda agricola procidana.
Sanguetta - (sorpreso) A Procida! Vaco n’ata vota all’Isola?
Gnesina - (supplichevole) Signuri’…
L’Ingegnere Padula - Dopo un primo periodo di sistemazione, quando le vostre cose lo permettessero, potreste farvi raggiungere anche da vostra moglie.
Sanguetta - Che vene a ffa’?
L’Ingegnere Padula - Là potrebbe continuare benissimo nel suo lavoro di guantaia.
Sanguetta - (piegandosi nelle spalle) E chi ’e pporta ’e guante a Procida?
Gnesina - Signuri’, ha dda resta’ a Napule… Fatica nu melione ’e ggente…
Sanguetta - …Facimmo nu melione e uno!
L’Ingegnere Padula - (dopo aver riflettuto) Sapete leggere?
Sanguetta - Così… Aggio fatto fino ’a terza elementare. (L’ingegnere rimane male) È poco. Ma nun ce sta nisciuno lavoro manuale? Ca ce vonno ’e braccia, ca ce vò ’a salute, ca ce vò ’o curaggio? Addo’ s’arriseca ’a vita? Quacche cosa ca nisciuno ’a vò fa’? ’A facc’io!
L’Ingegnere Padula - Lavori manuali, ma io non volevo…
Sanguetta - …Farme fatica’? E allora parlammo e nun ce capimmo? Io voglio fa’ qualunque cosa, abbasta ca guadagno denaro onestamente. Songo abituato a tutto, ingegnie’, ma ’a ggente ha dda vede’ ca io fatico… (Indicando la moglie) L’ha dda vede’ essa… L’aggi’a vede’ io…
L’Ingegnere Padula - Se aveste un mestiere…
Sanguetta - E si nun m’ ’o fanno ’mpara’!
L’Ingegnere Padula - (riflette, cava un biglietto da visita, ci scrive su, e lo porge a Sanguetta) Ecco, potrei farvi scendere domani a Pozzuoli, dove ho un appalto di lavori stradali… Come bracciante… Ma è una cosa provvisoria.
Sanguetta - Io so’ provvisorio ’a che sso’ nato! Mammema pure mme facette provvisoriamente; e stongo ancora ccà!
Gnesina - Ingegne’, chillo have bisogno ’e na sistemazione stabile…
L’Ingegnere Padula - Capisco benissimo.
Sanguetta - Ce vulesse, comme se dice: il pane quotidiano. Pecché ’a famma, quotidiana è! Anzi, è biquotidiana: pecché vene ddoie vote ’o juorno.
L’Ingegnere Padula - Domani mattina presentatevi al signor Spadoni, alla Zolfatara, con questo biglietto mio; e vi farà lui stesso vedere il da farsi.
Sanguetta - L’orario?
L’Ingegnere Padula - Alle sei.
Sanguetta - (alla moglie) ’E sseie! Llà.
Gnesina - ’Ngigne’, grazie!
L’Ingegnere Padula - Prego… E da cosa nascerà cosa. Provvederemo per il seguito.
Sanguetta - Io non ho parole…
L’Ingegnere Padula - (alzandosi) Arrivederci.
Sanguetta - (rispettoso) Arrivederci. (L’ingegnere esce).
Gnesina - (al marito, che è rimasto perplesso) Hê visto? Vulimmo mangia’, mo? E mettimmo ’a tavola. (La sistemano al centro della stanza) Sì cuntento?
Sanguetta - (fa un gesto con la mano, come per dire: così, così, poi, mormora) Provvisorio! (Soffia sul biglietto, perché si asciughi l’inchiostro, e lo intasca).
Gnesina - (incoraggiandolo) E po’, jesciarrà pure ’a fatica stabile. Tu ’o ddice sempe: io mo so’ nato!
Sanguetta - E allora tengo n’anno d’età. Mo me sto’ lascianno a cammena’… Accummencio a movere ’e primme passe, nella nuova esistenza… (Pausa) Sarranno ’e cchiú difficile, pecché aggi’a primma abbattere, e po’ aggi’a costrui’!
Gnesina - Fernisce d’apparecchia’ ’a tavola, vaco a piglia’ ’o brodo. (Esce).
Erricuccio - (apparendo sulla porta d’ingresso) Don Vicenzi’?
Sanguetta - Gué, Erricu’!
Erricuccio - Permesso! (E avanza).
Sanguetta - (cordiale) Trase.
Erricuccio - (avvicinandosi a Sanguetta) Me so’ truvato a passa’ e vi sono venuto a salutare.
Sanguetta - Tu sì stato sempe nu buono guaglione. Me fa piacere ca te sì ricurdato ’e me…
Erricuccio - Avit’a magna’?
Sanguetta - E che fa?
Erricuccio - ’A signora…?
Sanguetta - Sta dinto. Sta preparando il desco.
Erricuccio - Don Vicenzi’, niente ancora? (Alludendo ad un’eventuale gravidanza).
Sanguetta - Sta per la strada!
Erricuccio - Sta bene! Papà!
Sanguetta - (ironico) Eh, sul’isso ce mancava… (Pausa).
Erricuccio - È già quase n’anno ca site turnato, eh?
Sanguetta - (riflette) Già…
Erricuccio - V’arricurdate che feste?
Sanguetta - Pecché venevo ’all’Isola? Sí! (Pausa) Chesta è ’a vita! Cchiú peggio sì, e cchiú sì rispettato! (Sorride, mentre finisce di apparecchiare la tavola) …Mme facettero accuglienze, ca parevo nu Rre! Salute, scappellate, strette ’e mano; amice attuorno ca me festeggiavano; femmene ca me facevano ’a corte, ca m’offrevano denaro… Pecché? Pecché ero creduto nu guappo, pecché me chiammavo Sanguetta e pecché venevo ’all’Isola! Mo, da modesta persona perbene, nisciuno me vede cchiú! E accussí… che aggi’a dicere? Ca conta cchiú nu delinquente ca n’ommo onesto?
Gnesina - (dalla cucina, con la minestra, che mette in tavola) Gué! (È lietamente sorpresa alla vista di Erricuccio).
Erricuccio - Buongiorno, Gnesi’!
Gnesina - Mangia cu nnuie.
Erricuccio - Grazie!
Sanguetta - Tu puo’ resta’. Pigliate ’a seggia. (Erricuccio prende la più vicina) No, no… Cu chesta vaie ’n terra. Quella: è la sedia degli ospiti. (Gliela indica. Erricuccio siede) Mangiate nu tubbettiello.
Erricuccio - Grazie, aggiu mangiato. (Sanguetta e Gnesina cominciano il loro pasto) Sta bbona Gnesina, eh?
Sanguetta - Eh! Con me fa la vita comoda! Ha trovato l’America! Sono la sua Neviorca!
Gnesina - ’A fernisce? (Pausa).
Erricuccio - Don Vicenzi’, avite visto cchiú a Don Giuvanne?
Sanguetta - Ah! (Sorride, al ricordo) No, ’a che me ne so’ gghiuto ’e casa ’a llà.
Gnesina - Comme se porta Rachele?
Erricuccio - Fila deritto!
Sanguetta - Cu chella lezione…
Erricuccio - E pure pecché Don Giuvanne è addeventato manisco! Fa’ ll’ommo!
Sanguetta - (con amarezza, alla moglie) Hê capito? Don Giuvanne è addeventate ommo! Padreterno! Io ’mparo a ffa’ ll’uommene a ll’ate, e io mo me lasso a cammena’! (Pausa).
Erricuccio - E gli amici? Gli amici, li avete visti più?
Sanguetta - E io mo nun faccio parla’ cchiú ’e me… Me songo ritirato a vita privata, quindi nun ce sta nisciuno banchetto ’a organizza’…
Gnesina - Che ce veneno a ffa’?
Erricuccio - ’O ssapite ca a uno l’hanno arrestato?
Sanguetta - A chi?
Erricuccio - A Peppe.
Gnesina - Pecché?
Erricuccio - Ha dato cierti mazzate.
Sanguetta - (ridendo) Pure? E mo vide ca ’o mannano all’Isola e po’ addeventa celebre pur’isso; accussí quanno jesce, lle faciarranno ’o banchetto! (Pausa).
Gnesina - E tu che faie, Erricu’?
Erricuccio - Fatico, sto sempe llà… (A Sanguetta) E vuie avite truvato niente? SANGUEITA Sí. Tengo nu provvisorio p’ ’e mmane. (Pausa) Dimane avess’a i’ a fatica’ a Zulfatara, comme bracciante…
Erricuccio - (sorpreso e deluso) Bracciante, vuie? Sanguetta?
Sanguetta - Eh, Sanguetta… Vittorio Emanuele! (Pausa) E si nun custasse tanto l’onestà, sarriemo tuttu quante persone perbene! (Pausa).
Erricuccio - E a che ora v’avit’a truva’…?
Sanguetta - ’E sseie… llà! ’E qquatto m’aggi’a movere ’a ccà! Pecché m’ ’a faccio a ppede… podisticamente; e arrivo ’o primmo: la maratona!
Erricuccio - Insomma na specie ’e fatica ca faciveve all’Isola?
Sanguetta - Eh, cu ’a differenza, però, ca ce vaco a pede libero, senza tene’ ’o guardiano ca me cuntrolla ’e passe.
Erricuccio - Giesù! Vuie abituato a chella vita… a chillu lusso…
Sanguetta - E puteva dura’… (Pausa) E pirciò ca è fernuta!
Don Luigi - (ricompare, silenzioso, sotto la porta).
Gnesina - (premurosa) Papà, assettate, mangia cu nnuie.
Don Luigi - (avanza, a passi lenti, guardando il genero).
Sanguetta - …Dicevo che anche Napoleone e Garibaldi…
Don Luigi - (si allontana, in fretta).
Gnesina - (al marito, che ride) ’A fernisce? (Accorre) Papà! (Lo raggiunge e lo trattiene sotto l’uscio).
Don Luigi - E chillo accummencia n’ata vota!
Sanguetta - E m’aggi’a giustifica’? (Pausa).
Don Luigi - Hê truvato niente? No!
Sanguetta - (scherzoso) Sí. Buonaparte.
Don Luigi - (intuisce l’allusione) Buonaparte? Napoleone? (E vuole andar via).
Sanguetta - Nu mumento! Volevo dire: ho trovato non del tutto, buona parte… Tengo nu provvisorio p’ ’e mmane… Dimane vaco a Puzzule, ai lavori stradali… Comm’a bracciante.
Don Luigi - Chi te l’ha ditto?
Gnesina - ’O ’ngignere Padula.
Sanguetta - Mo m’ha dato ’o biglietto.
Don Luigi - ?! Bracciante? A carria’ prete?
Sanguetta - No, mo ’ncastravo brillante!
Don Luigi - E che guadagne? Quanto pò dura’?
Sanguetta - (si piega nelle spalle) …N’anno, nu mese, nu juorno, n’ora… Appena arrivo me ne cacciano.
Don Luigi - Nossignore, te ne viene cu mme.
Gnesina - (illuminandosi) Papà?!
Sanguetta - Cu vvuie? Dint’ ’a segheria elettrica?
Don Luigi - (fa cenno di sí con la testa) …Aggio avuto l’incarico ’e truva’ n’operaio specializzato. So’ trentacinche lire ’o juorno.
Gnesina - (con un’esplosione di gioia) Trentacinche lire ’o juorno? Sì cuntento?
Sanguetta - (freddo) Aspe’, nun t’allumma’! Llà ce vò uno, specializzato… Chi c’è trasuto maie dint’a na segheria elettrica?
Don Luigi - Te metto vicino a mme, e t’addestro io. Poche juorne ’e pratica, e tiene ’o ppane sicuro.
Sanguetta - Si nun se ferma ’a currente. (Pausa) E chesto, ’a quanno?
Don Luigi - ’A dimane.
Gnesina - (corre ad abbracciare suo padre) Papà!
Sanguetta - …Allora quanto guadagno? Trentacinche lire ’o juorno? (Don Luigi approva) …N’ati cinche lire so’ dduie napoleone…
Gnesina - (rabbonendo il padre, che scatta) Afforza!
Don Luigi - E chillo nun ’a fernesce! (Pausa. Il vecchio accarezza la figlia) ’A mo sto pensanno a stu fatto?! Pur’io, ’a notte, nun putevo durmi’ …Isso (e mostra Sanguetta) ha strutto ’o cappiello; ma io aggio cunzumato ’e scarpe! `
Gnesina - ’A Madonna ve pozza da’ cient’anne ’e salute!
Don Luigi - (intenerito) E pure a tte!
Erricuccio - (a Sanguetta, compiaciuto) State a posto!
Sanguetta - (dondolandosi sulla sedia) L’artefice della sega! (Si mette il cappello di traverso, alla Napoleone. Nervi di Don Luigi).
Gnesina - E comme faie mo cu ’o ’ngignere?
Sanguetta - Dimane lle puorte ’o biglietto e… rimandi. ’E chisti tiempe, nun se pò maie sape’… (A Don Luigi, tenero) Ve pozzo ringrazia’?
Don Luigi - Ringraziame…
Sanguetta - O ce l’avite ancora cu mme?
Don Luigi - ?! Ce l’aggio…?
Gnesina - E si ce l’aveva, nun faceva chello che ha fatto!
Sanguetta - E dateme nu vaso! (Si leva, lo bacia, poi, tenendolo stretto tra le braccia, perché non si muova) Papà! Napoleone e Garibaldi so’ state all’Isola!
Don Luigi - (vorrebbe svincolarsi) Lassa! Mo nun te faccio fatica’ cchiú…
Gnesina - Gué!
Sanguetta - …So’ state all’Isola! (E ride).
FINE
