PAN AL PAN E VIN AL VIN
Scene di ordinaria quotidianità
di Aleardo Noli ©
Eliana, moglie di un imprenditore locale
Serena, sposina fresca ad un frontaliere
Siamo sul lungo-lago di Menaggio, e due amiche stanno godendo una consumazione sui tavolini esterni del bar. Una giornata di sole, primavera.
Eliana (E’ VESTITA ELEGANTEMENTE, ASPETTO CURATISSIMO, E FARE UN POCO ALTEZZOSO, DA SIGNORA “ARRIVATA”) Cara la mia Serena, tì ta sarée anca serena, mì migna tropp.
Serena Dài, Eliana, cosa diset su? T’a manca propi nagott, nèla vita.
Eliana Eh già! Ta parerà a tì! (INDISPETTITA)
Serena Bisoeugna poeu contentàss, se de no ssa salvom pù.
Eliana (COME PARLANDO FRA SE’) Forzi a l’è per via del “jet-lag”.
Serena Cuss’èeeeee?
Eliana (E’ STUPITA DELLO STUPORE DI SERENA) E…..al “jet-lag”, t’al sée…………
Serena (INTERROMPE) No, mì al soo propi migna. Coss’èl ‘sto…….’sto ropp lì………
Eliana (UN PO’ SUL SACCENTE) L’è l’indisposizion che ta ciapa quaand che ta rivét con al jet d’en viacc taant loongh, e ta sa troeuvet un zich spaesada……..
Serena Ah, oo capii……com’è al maa dèla machina!
Eliana (RIDE DI GUSTO) Ma famm migna vegnì de riid!
Serena (UN PO’ OFFESA) Oh, beh, cosa voeutt che an sapia mì……Mì oo mai ciapaa un aeroplano in vita mia.
Eliana (NON CI CREDE) Coss’èeeeee? Vuna giovina come tì, e t’e mai ciapaa al jet?
Serena No, al mè Guglielmo g’a piaas migna volà.
Eliana De gnanca crédech! Nel domilaquindéss! Ma dai!
Serena Semm nàj fina a Capri…..in viacc de sposa.
Eliana Ma dai! Capri al sa usava per i viacc de sposa di ann ‘sessanta, cioè pù o meno sessant’ann fa. Adèss……..Mauritius, Seichelles, Bahamas, Santo Domingo……..Sharm-El-Sheck……….
Serena Fermétt, fermétt, che t’a ma fée girà la crapa. Mì, quii nomm lì, somm gnanca bona de tegnii a meent.
Eliana (SOGNANTE) Mì, de quaand che oo sposaa al mè Batistin………viagiom spess, numm.
Serena (SI FA LEGGERMENTE SFACCIATA, GIA’ STUFA DELLE SPACCONATE DELL’AMICA) Oh, beh, ‘scolta. Va ben e tutt, ma al tò Batistin………inzoma, g’aal migna desdòtt ann pussée de tì?
Eliana (CAMBIA DECISAMENTE ATTEGGIAMENTO, COME PUNTA DA UNA VESPA) E alora?
Serena ………Nagott, nagott. Però……….
Eliana (INCORAGGIA A CONTINUARE) Però coss’è?
Serena Però l’è migna un Clooney. Pelaa……..con ‘na panza….la pèll dèla facia che donda…………..
Eliana (PICCATA) L’è migna l’esterno che cunta, ma quell che gh’è de deent!
Serena E cosa gh’è de deent in quel Batistin lì?
Eliana (SI GUARDA LE UNGHIE) Oh beh, l’è vun che l’è bon de parlà………
Serena ……….che l’è bon de imbrojà…………….
Eliana Ma come sa permettet? (ALTERATA)
Serena (SBRIGATIVA) Ma se i l’a sa tutt al paees di afari del tò omm! Ciapa presempi la ca’ che gh’è vegnuda via per sett o per derzètt, quela del pòor Alessio, che al gh’eva pù nissun al moond!
Eliana Oh, beh, ala fin quell al s’è rivelaa ‘n afari stracch!
Serena Credi propi migna, credi propi migna.
Eliana Creed poeu a quel che t’a voeuret tì. Per mì………
Serena E poeu, gh’è la storia di teren dèla gésa……….
Eliana (FINTA TONTA) Quaa teren dèla gésa?
Serena Ah, sì, t’a gh’eet reson. L’è ‘na storia che m’à cuntaa su mila volt al mè suocer. Al tò omm a l’eva ammò giovin.
Eliana Se l’è domà per quell, a l’è giovin ammò adèss!!!!
Serena Ohhhh! Ta parerà a tì! (RIDE)
Eliana Perché, ta l’oo già dii, cosa g’a manca?
Serena Voeuret che t’a faga la lista?
Eliana Serena, ‘scolta! Somm vegnuda scià con tutt i bon intenzion, ma…………….se………………
Serena (VA AVANTI IMPERTERRITA) Alora: Ga manca ‘na brancada de cavì……….ga manca…………………
Eliana (LA INTERROMPE INVIPERITA) Adèss basta, poeu! Daghen un taj! E poeu……e poeu….al sarà al Clooney al tò, d’e un omm!
Serena Spécia, spécia…..se gh’eet de dì del mè omm?
Eliana Nagott, nagott! Lassemela bùj!
Serena Lassemela bùj un fiich secch. E già che semm in argomeent, al mè Guglielmo al sa ciama migna George, ma in quanto a véss un omm, l’è centmila vòlt pùssée omm del tò…..del tò…..de quel imbroja moond del tò Batistin, che poeu……se voeurom dila tuta……..
Eliana Cuss’è? Se gh’è de dì del mè Batistin?
Serena Al tò Batistin……..(SECCA) beh, al g’a la vista bona, per quell sì!
Eliana Adèss, cosa gh’entra la vista?
Serena Ta devet stacch pussée atenta, cara la mia Eliana! Perché al tò omett al fà spess e volentera l’oeucc del péss mòrt!
Eliana Com’è l’oeucc del péss mòrt? A chi?
Serena A tucc i tosann che g’abia i misuur giust!
Eliana Questa poeu! Varda, se avéss savuu che la nòssa ciciarada la nava a finì inscì, vegnevi gnanca scià!
Serena Oh varda, mì somm abituada a dì pan al pan e vin al vin, a foo migna tanti giir de paròl, mì!
Eliana Se l’è per quell, gnanca mì! Tsé…..pan al pan………..
Serena ……e vin al vin. E l’è propi inscì.
Eliana Alora, pan al pan………’scolta, che in fato de oeucc de péss mòrt, anca al tò Tell…….voeurevi dì al Guglielmo, pussée d’e ‘na vòlta al ma vardaa in una certa manéra……………………
Serena A chi???? (RIDE) Al t’a vardaa a tì??? Ma famm migna vegnì de riid!
Eliana Perché, cosa ma mancheress?
Serena Ah, per quell nagott. Vedemm: I cavì ta g’a ieet ammò, i oeucc a i’è un zich strabich, ma quela l’è la beleza de Venere, al naas l’è un poo tropp importaant………la boca………
Eliana Serena, famm migna na’ al fum ai oeucc, neh! Che ‘na sira, al tò frontaliere, che al m’à vist a Lugan che speciavi al mè Batistin, al s’è fermaa e al voeureva damm un passacc, varda poeu tì!
Serena (CONVINTA) A g’a credi migna!
Eliana Anca se ta ga credet migna, cambia nagott. La veritaa la viinc sempro!
Serena A paart al fato che al mè Guglielmo Tell quaand che al riva a ca’ stassira al pecéni mì per ben senza la riga in mèzz, cara la mia Eliana, se invece de na’ in gir con i ginoeucc in bèla vista ta sa vestiseresset un poo segoond la toa etaa…………
Eliana (GUARDANDOSI LE UNGHIE) Al mè omm a ga piasi inscì!
Serena Oh, quanti stori! Al mè omm, al tò omm…………
Eliana Voeutt savé ‘na veritaa? I omen i sa someja tùcc come i birili di fioeu.
Serena Cioè?
Eliana Cioè, che i g’à quii duu bej neuroni nèla crapa e i penza sempro de quii stupidaad che sta né in cieel né in tèra.
Serena Mì penzava………
Eliana A gh’è propi pooch de penzà. E poeu, al mè Batistin….
Serena Ta voeuret dì che al tò Batistin……..varda che foo anca la rima…….g’a manca pooch a tirà al sciampin!
Eliana Ma del bon! Che al Signoor al m’a la conserva ammò tanto teemp!
Serena E che al Signoor al conserva anca al cuunt in banca loongh com’è la famm…………..
Eliana Oh beh………..
Serena T’al sée? Se ta sa ciamavet Elettra, la roba l’eva diferenta! Ma ta sa ciamet Eliana, e alora…………….
Eliana Cosa diavol cuntet su?
Serena A gh’è la famosa tragedia: “Il lutto si addice ad Elettra” e alora, a l’Eliana “non si addice”. Quindi, tegnel bèl streenc, l’imbrojamoond! Con allegate corna.
Eliana Serena, anca se ta g’avesset reson, però, in ogni caso, al tò Tell al sedùssi migna. Prima perché ma piaas migna al nom, che l’è un nom cretino. Poeu, perché ma piaas migna quel che al porta quel nomm lì, e adio!
Serena T’oo già dii che al mè Guglielmino stassira al rangi mì per ben! In ogni caso, tì penza a slongà i sotann e a eliminà anca i decolletées esageraa, che l’è sempro roba prudenta.
Eliana Ma la femminilitaa………………
Serena Ma vardomm mì! Ta ma vedet foeura post? Jeans, majéta o camiséta, se l’è gòna l’è ‘na gòna normaal. Eh sì che somm pussée giovina de tì!
Eliana Cosa gh’entra?
Serena E tira migna scià la storia “del mago” che al fa còold, che tì t’a gh’éet còold anca al mées de genaar.
Eliana Al mè Batistin, che nel’intimitaa al ciami Tin…………….
Serena …….e ta féet ben, che l’è propi com’è un tin del most…………….
Eliana Piàntala, Serena, de dì su cretinaat. Disevi, al mè Batistin…..
Serena (INSISTE A OFFENDERE) Che ne l’intimitaa al fa un zich seens, dato che al g’à ‘na “tartarùga” che la soméja senz’oltro al grass che cola………..
Eliana (NON OSTANTE TUTTO, RIDE) Dài, Serena, cuntenn pù su…………….
Serena Vedet che ta vegn de riid………Inzoma, per fala curta, al tò Tin t’al tegnet stréenc perché al g’à al borzin bèl sgonfi!
Eliana E tì, alora, che ta gh’ee un tipo che al g’à al nomm svizer de quell dèla poma, e che del rest l’è poeu migna un divo de Holliwood, e gnanca de Bollywood, e gnanca de Cinecittà………….
Serena Ma mì g’a voeuri ben, l’oo maridaa che l’è migna un pèzz…….e poeu…….e poeu…….e poeu……..
Eliana T’a s’è incantaa al 45 giir? E poeu coss’è?
Serena E poeu, numm…….a specium un fioeu!!!!!
Eliana (ABBRACCIA L’AMICA) Oh, come somm contenta!
Serena Del bon?
Eliana Tana che sì! Anca perché, mì e al mè Batistin….t’al séet ben che de fioeu ‘n’è migna rivaa e donca……a sentì che ta speciet……………….
Serena T’a see ‘na vera amisa, non ostante tutt, Eliana!
Eliana Ma (RIDE) ‘scolta, tosa, ta sée ‘na bèla sposina, t’a seet giovina, t’a gh’eet un omm che sa ciama Guglielmo………’scolta, ma al fioeu che ta speciet, èl poeu sò?
Serena Eliana!!!!!!
Eliana Cosa?
Serena Famm un piesé.
Eliana Se pòdi……………..
Serena Cert che t’a po’!
Eliana Dimm, cara!
Serena VANN A FASS CIAVA’ ! ! ! ! !
fine