POLENTA CALDA E GALINA FREGIA
-quel che pò sucéed su ‘na banchéta de paées-
di Aleardo Noli
© 10/2014
Personaggi: la Piera, già seduta sulla panchina
la Stefi, fa compagnia alla Piera, giovane
la Giovanna, che sopraggiunge dopo
la Stefi ha con sé una copia de “la Provincia”
PIERA Cara la mia Stefi, tì ta séet ammò giovina, ma mì, che i “anta” a i’oo già passaa d’en pèzz, t’a disi che al moond l’è pù rodoond, ma quadro!
STEFI Eh, Piera, giovina fino a un certo punto! Duu fioeu, e al pussée grand al g’à già vòtt ann.
PIERA Iòo, dèl bon? Ma paar ieer che l’eva ‘pena nassuu!
STEFI Eh, già, al teemp al passa inscì mai svèlt.
(sopraggiunge la Giovanna)
GIOVANNA Bondì, tosann! Bèla giornada, neh, incoeu?
PIERA Eh, tosann, sì, propi! Gh’eva ‘na vòlta quela tosa che quaand al prèvet l’à dii gio’ de ‘na avanti le vergini in procession, l’à mandaa avanti la soa mamm.
GIOVANNA Off! Storia végia, barzeleta superada. Agiorness!
STEFI E poeu, al dì d’incoeu, nessun a varda pù quii ropp chì!
GIOVANNA (dopo qualche secondo di silenzio) Ma, i sentuu la novitaa?
PIERA Quaa novitaa?
STEFI A gh’è n’è inscì de novitaa. Quaa saressela questa?
GIOVANNA Tana, i ‘na parla tucc! Al sii la sciora Carminati?
PIERA Quela de Monza, che la g’à la ca’ de vacanza chì de numm?
GIOVANNA Propi. Al sii che l’à g’à l’amiis del coeur, che l’omm al s’è dividuu, no?
STEFI Beh, l’è ammò ‘na bèla dòna………….
PIERA …..’Na bèla formosa, t’aa voeurereet dì!
GIOVANNA Beh, quel che l’è, la misura del balcon i’è afari del so amiis. Ma la novitaa l’è ‘n oltra.
PIERA (si fa curiosissima) Del bon? Dai, cunta su!
GIOVANNA I novitaa i’è do: La prima a l’è che al so amiis, de mestée, giò per Monza, al fa al bécamoort!
STEFI (fa gli scongiuri) Oh, cara Madòna!
PIERA (le fa eco) Oh, caar Signoor!
GIOVANNA Piantéla lì de dì sù i litanì. L’oltra novitaa a l’è ‘na bomba: Sto asen al voeu métt su ‘na sucursaal chì de numm!!!!!!
PIERA Cuss’è??
GIOVANNA Sì, con ‘na camera ardente inzema.
STEFI I’ òo, geent, oo de sentinn ammò!
PIERA Ma al comun g’a lasséll fa ‘na roba del gener?
GIOVANNA Eh, se voeut fach, pompe funebri………….
PIERA Parla migna de pompe funebri, che la sciora Carminati de pompe migna funebri g’oo idea che la sa na intenda!!
STEFI Dài, Piera, cuntenn pù su de str………bagianaad, che ta gh’e pù l’etaa.
PIERA (punta sul vivo) Oh, beh, credoff che domà vialtri sposin giovin…….mì……lassemela bùj.
GIOVANNA E se fessum su un comitato contra questa iniziativa…….de galina frégia?
STEFI Ognun però g’à poeu dirito a fa’ l’ativitaa che al voeu!
PIERA Ma, indoa la meteress su ‘sta ativitaa alegra?
GIOVANNA Gio’ ala riva, nel mini-market che l’è voeuj.
STEFI Cuss’è? E mì, quaand che porti i mè fioeu al scuola-bus, dovréss specià al pullmin in compagnia dei candelabri?
PIERA Cosa voeuret fach? Libero commercio, al sa ciama. E poeu al dì d’incoeu, i defunti i’a mett lì inscì béj (ride)
GIOVANNA Già, anca col trucch com’è divi del cinema….
STEFI (ridendo) Cinema ………..muto, però.
PIERA Prima o dop, devom passach tùcc, de ‘sta porta strencia.
GIOVANNA Basomm i ciapp!
PIERA G’oo oltro de fa che basatt i ciapp a tì!
STEFI (ride di gusto) Oh, dònn, come ma fii riid. A sii già do béj sagom, v’al disi mì.
GIOVANNA Ma, ma domandi, cosa fala giò per Monza la sciora Carminati?
STEFI Ma, paar che la g’abia su ‘n ativitaa, ma sa sa migna de cuss’è.
PIERA Vialtri, l’ii già vist al tipo che al g’à n’ativitaa inscì mai alegra? Inzoma, l’amiis dèla Carminati.
GIOVANNA Oh, se l’oo vist. Anca sabet passaa. Al someja…………ai sò clieent. Magro com’è un piigh, smòrt, long com’è la famm…………………..
STEFI Che figo!
PIERA Ta voeurereet dì: “Che frigo”. (ride)
GIOVANNA T’aa séet sempro pronta con i batuut, tì.
PIERA Verameeent, dovréss véss pronta con i batuut quaand la mià metaa del cieel al ponta un poo tropp i oeucc sula Carminati, quaand al la troeuva.
STEFI Ma i oeucc i’è poeu faj per vardà, caar Signoor!
PIERA Ah, sì? Ta vedereet quaand al tò maritino, de chì e ‘n quaj ann, al scomencerà a dogià un zich tropp al lato B de ‘na quaj smorfioséta, cara tì!
GIOVANNA (rincara la dose) Perché tucc i omen (e quaand disi tùcc intendi “tucc”) a un certo momeent g’a scata di brutt fantasì.
STEFI A mì, al m’a sucederà mai! (categorica)
PIERA E GIOVANNA (assieme) Oh, ta parerà a tì!
STEFI (prende il giornale e sfoglia) (poi) Vardée chì! Oh, Signoor!
PIERA E GIOVANNA Cosa gh’è?
STEFI Ma numm, semm o semm migna a Borgovécc?
PIERA Tana che sì! Che domaand!
GIOVANNA E alora?
STEFI E alora, sentii questa: “Nella sede del dismesso mini-market di Borgovecchio verrà aperta una succursale della Ditta di Lucia Carminati di Monza, già abitante in loco. E’ stata inoltrata infatti domanda relativa all’apertura d’una moderna pasticceria, con annessa caffetteria, nello stile delle altre succursali esistenti della Ditta Carminati……..ecc….ecc….”
PIERA Che solieef!
GIOVANNA Dimel migna a mì.
STEFI Ma indoa seet naja a tirà foeura ‘sta notizia balorda che ta n’éet daj?
GIOVANNA (incerta) Ma……….i diseva in giir………
PIERA T’a séet migna ‘na bona giornalista. Bisoeugna acertass, prima de mett in giir scemaad.
GIOVANNA Speremm almen che al la faga migna nà la Carminati in perzona, sedenò i nòss omen…………
STEFI Beh, sempro mej al pericol che i faga ‘na pèll d’oeucc, che gnanca véch i cari estinti visin a ca’.
PIERA Alora, metemela inscì. Invece che ‘na galina frégia, l’è mej…………….i pastizin……..la sciora Lucia……..
GIOVANNA E STEFI Inveci che ‘na galina fégia, disemm inscì che preferissum…..’NA POLENTA CALDA!!!!!!!