Rosti e Menarosti

ROSTI E MENAROSTI

di

Nicola Pegoraro

PRIMO TEMPO

(inserto musicale)

SCENA 1 - Toni batte la falce

TONI- Pineta sito contenta che te gò tirà la soga par distendare?
PINETA-speremo che la me basta con che caterba de roba che gò da trar fora, gnanca fusimo in venti in fameia, che semo tri gati.
TONI- a te ghè vosudo ciamare el paroco, e deso te lavi. Che se jera par mì me sentavo a toa con le strase dea stala e invese me gha tocà vestirme da festa.
PINETA- vilan, a ghe voe rispeto par la gente. Par queo go meso la tovaia de fiandra, la sugaman e anca i tovaioi. 
TONI- e dopo la traversa bea, quea de lin ricamà.
PINETA- che la me ga cavà i oci a so tempo, co fasevo la dote par tì.
TONI- par mì, ma se te tea meti sù solo co riva foresti!
PINETA- a non te poi mia presentarte davanti al prete con la traversa da mesteo, non ghe saria rispeto.
TONI- e dopo a te te rompi la schena a star piegà a sfregoare par farla diventar neta.
PINETA- ma se te disi che la schina te fa mae, l'omo el te varda col muso duro. El mio lè cusì; dei altri non sò gnente, ma ari ari.
TONI- te te lamenti anca, la Gina la ga lavà la roba come tì e non la ghà gnanca parlà
PINETA- che la ghai lavà poe esare ma che non la ghai gnanca parlà me pare strano, la ghin dise tante che la so lengua la pare na sciarpa
TONI- va là che la sè na brava femena
PINETA- se la sè cusì brava a te podevi fermarte da ea che volta, sensa vegnerme rompare i totani a mì, che se tornasse indrio
TONI- deso tea conti cussì ma chea volta non te te si mia sconta co so vegnù sercarte, te ricordito?
PINETA- a non gho tempo no par chee matità, Angela, Angela
ANGELA- rivo mama, rivo
PINETA- vanti che la se mova on can la magna. Porta fora la secia de roba turchina, eco una che la ghe pensa ale matità.
TONI- e quando gala da pensarghe co la sarà gaina da brodo come tì?
PINETA- sta tento che anca i caponi fa brodo bon!
ANGELA- eco quà la roba, ma sito sempre dri dirghe sù a meo pà, cosa gheto in mente?
PINETA- a go giusto in mente de fare un capon, da 80 chili.
ANGELA- popà la gheto fata inrabiare ancora?
TONI- ma no se scherza, a parlavimo de tì
ANGELA- ben ciò e cosa disevi?
TONI- che te si na bea tosa e che tra poco rivarà i mosconi
ANGELA- parchè, cambia el tempo?
TONI- a te ghè capio sì, ala to età sì pì furbi de queo che fè credare par serte robe
PINETA-Toni asea stare sta pora tosa e bati la falsa, che a batare i mosconi ghe penso mì. E po tasi che sè drio rivare la Gina con la so sciarpa.

SCENA 2 - Entra Gina a fare "comarea"

GINA- buon giorno cari, come stemo Pineta, gheto visto che bea giornata, oncò sì che sughemo la lissia, però mì a ghò pena finio de tra fora
PINETA- infati, a gò visto to mario che el iera drio stendarte la roba, te si fortunà ad avere on mario che te iuta, el mio invese el pensa solo a batare la falsa
TONI- me sà che faria meio a batare la femena.
GINA- e te te lamenti de to mario bell'omo come che lè, che el mio le sempre fora de casa
PINETA- el garà i so motivi
GINA- el tuo almanco el te fa compagnia, el me omo el me dirà na' parola al giorno
PINETA- in compenso el te scolta tanto
ANGELA- mama mì quà a ghò finio, te serve altro?
GINA- che bea tosa che te si diventà, ormai sè ora de moroso, me sà che tra poco a vedaremo gente coa bicicleta sbusà che gira par casa, vero Pinetà?
ANGELA- cosa, centra la bicicleta con la rua sbusà?
PINETA- asa perdare e cori in casa e metate sopressare quatro strasse.
ANGELA- arrivederci Gina.
PINETA- Angela, me racomando, sta tenta col fero che non te brusi le camise. Sè on tocheto che la ghà la testa via coi angei sta tosa.
GINA- ormai la sè da dote, se voì a poso informarme de qualche bon partito, poso metare in giro qualche ciacola.
TONI- o savemo si che te si de mestiere, ma non ocore, co la fruta sè matura i mosconi riva 
GINA- bon vala mì vò casa e non ste preoccuparve, non ghe digo gnente a nessuni
PINETA- a te poi imaginarte...sbetega.

SCENA 3 - Gina esce ed entra Menego in bicicletta

MENEGO- Toni sito drio batare la falsa?
TONI- parchè vuto che te bata tì?
MENEGO- Pineta, el ga na bea giornata to mario onco, e ti come la contito?
PINETA- mì taso seno a faso caponi.
MENEGO- me sà che sè meio che vaga casa.
PINETA- asa perdare, se ghemo acorti de colpo che la tosa sè diventà granda e ormai sè ora che la se cata on moroso
TONI- fa conto che la Gina la voe catarghe on bon partito
MENEGO- la Gina, Toni, ma gheto batù la falsa con la testa? Gavevito altri da andare in serca?
TONI- varda che non semo mia ndà sercarla, sè ea che ne ghà trovà.
MENEGO- l'Angea non la gha mia bisogno che tea juti, te vedarè che te girarà tanti tosati par casa tra poco

SCENA 4 - Entra Fulvio, marito della Gina

FULVIO- salve a tutti, par caso ghavio visto la Gina?
PINETA- vista e sentia
FULVIO- bon, se la sè pena ndà casa alora me fermo.
TONI- ciò Pineta va in casa tore on gioso, che go la gola arsa.
PINETA- sta tento che se no tea tien bagnà, la gardegala se brusa. 

SCENA 5 - Pineta esce

TONI- ciò Fulvio cosa te inventito ndare trar fora la roba?
MENEGO- cosa galo fato?
TONI- le ndà trar fora che deso la Pineta la voe che ghe vaga anca mi
MENEGO- Fulvio, ma gheto perso la baricocola? 
FULVIO- a gavi tute le rason de sta tera, ma la Gina la me ghà fato na testa che o 'ndavo picare via le strase, o ndavo picare a femena.
MENEGO- forse jera meio la seconda.

SCENA 6 - Entra Pineta

PINETA- quala jerea sta seconda?
TONI- gnente, gnente, robe che ghe piase ai omeni
PINETA- le robe che ghe piase ai omeni le sè do, e una la gho in man.

SCENA 7 - Entra Angela

ANGELA- e chealtra quala sea?
MENEGO- la bicicleta.
ANGELA- anca tì con la bicicleta, onco la Gina la me diseva che anca meo pà el girava in bicicleta, solo che la jera sbusà.
FULVIO- la sè na storia vecia, de quando chel jera moroso de to mama.
TONI- asea stare chea storia par piasere
MENEGO- no, no questa la vuio sentire anca mì, e pò cosa ghe sè de mae.
PINETA- ma cosa vuto savere che se lo sa la Gina a lo sa tuto el paese.
MENEGO- proprio par questo tanto vae che lo sapia anca to fiola.
FULVIO- Angea te ghe da savere che to papà el ghavea tuto on so modo par conosare le tose
PINETA- ma quante ghin'alo conosude così?
TONI- gnanca una, solo tì, amore.
FULVIO- insoma sti ani bisognava star tenti 'ndare pae case a conosare le tose parchè, ai foresti, i ghe tirava i sassi, alora cosa galo fato, el gha tirà sù na bicicleta, lè rivava tacà la casa de to mama e el gà sgonfià na rua.
MENEGO- cusì con la storia de farse gonfiare la rua el ghà conosudo to mama
ANGELA- furbo, vero mama?
PINETA- furbo lù o oca mì.
TONI- te sarè anca stà oca però chea sera a sò vegnù in bici da femena e so 'ndà casa coa bici da omo.
PINETA- cosa che me toca sentire, boca onta. E tì Angela vien drento con mì, che to pare oncò el va sò de brenton. 

SCENA 8- Pineta va in casa con Angela ed entra Gina

GINA- Fulvio, ecote dove che te ieri 'ndà, sito sempre drio bere tase
MENEGO- a furia de scoltarte a ghe sè vegnù sen 
GINA- ga parlà el pì bon dea combricola, menarosti che non te si altro, come se mì fuse sempre drio parlare, come se mì non gavese gnente de meio da fare, te pare che mì sia una che gha la lengua longa, mì son una persona discreta che non se mete mai in meso i afari de chealtri
TONI- smorsea par carità
GINA- eco naltro che se mete in meso e che non me asa gnanca dire do paroe come se mì fuse solo bona de parlare e ti Fulvio non te disi gnente?
FULVIO- mì scolto
GINA- alora ndemo scoltarme casa che non go mia finio.
FULVIO- me toca 'ndare
GINA- come me toca ndare, posibie che non te me disi mai gnente e co te parli a te me toi in giro, mì che so cusi discreta che so sempre l'ultima a severe le robe.
TONI- co te sì casa daghe da bere.
MENEGO- me sè vegnù mal de testa.
TONI- pa ‘ste robe, se te fusi maridà a te sarisi vacinà pal mal de testa.
MENEGO- più vedo la Gina e pì me convinso a restare da maridare.
TONI- sè soo question de tempo, prima o dopo a te te combinarè anca ti.
MENEGO- cambiando discorso, sè tuto pronto pa stasera?
TONI- pa oseare?
MENEGO- e par cosa?
TONI- tuto aposto, le ree sè pronte, i pali anca, speremo in ben.
PINETA- Toni, ndemo drento che go da parlarte
MENEGO- Toni el generae te ga ciamà
TONI- e ma la cambia.
MENEGO- par deso a non so mia de leva, pi vanti se vedarà. 
TONI- eh se vedarà, se vedarà

(inserto musicale)

SCENA 9 - Buio, c'è la roba stesa a creare una barriera, da destra si vede un torcia che fa luce, al buio si intravedono tre elementi con una rete

TONI- Schhhh! Fè pian! Porco e fora!
BEPI- cosa vuto che femo pian, tasi tì che te sì l'unico che parla.
TONI- alora d’acordo, tì Bepi te vè soto chea siesa là e te bati, mì verso la ree (apre la ree) e tì Menego, quando che mi ciapo i osei te ghe da coparli.
MENEGO- e cosa goi da fare, ghe tiro el colo?
BEPI- varda che non le sè miga gaine, sea va ben a ciaparemo dee seleghe e qualche strioo.
TONI- te ciapi i osei e te ghe struchi la testa
MENEGO- par mì iera meio se ghe tiravo el colo.
BEPI- deso basta ciacolare che non riva gente
MENEGO- chi vuto che ghe sia in giro a ‘ste ore, al salvaneo?
TONI- steo siti che magari a bechemo i guardiacaccia
MENEGO- mì se fuse on guardiacaccia a 'ndaria farme na tassa a ste ore.
BEPI- ma voio finirla o se metemo fare anca na canta?
TONI- te ghe rason deso tasemo.

Cominciano a camminare quando si vede una luce

BEPI- fermi ghe sè na luce.
TONI- via via, ghe sè i guardiacaccia
MENEGO- invese de berse na tasa.

SCENA 10 - Si avvicina una luce, due individui e due lunghi pali

PIERO- Fulvio, Fulvio, l’è diventà permaloso. Ti Fulvio te ve so che siesa là e te bati, mì i ciapo
FULVIO- me toca sempre mì batare, gnanca fose na brica.
MENEGO- ciò, ma i guardiacaccia vai a oseare?
BEPI- sti chi noi sè mia guardiacaccia, sti chi i voe farse el speo
TONI- parlè pian, spetè che i riva rente che dopo ghe femo un scherso. Voialtri parecè la ree che stasera a ciapemo dei merli.
MENEGO- cosa vuto fare?
TONI- ti tasi che mì ghe vago dedrio
PIERO- deso tì serca de fare pian, va verso chea siesa là e bati soto
FULVIO- a pensavo da batare pà insima, cusi i osei i copavo a bastonà
PIERO- basta deso che non i me cata

Si accende la luce di un faro a carburo che li illumina

TONI- fermi tuti cosa fasio?!
PIERO- Fulvio scapa
FULVIO- a sò drio

Fulvio corre verso Bepi che lo avvolge con la rete, Fulvio cade tutto legato, Piero corre attraverso le lenzuola e si avvolge attorno ad un lenzuolo

TONI- varda che bel finco che ghemo ciapà
MENEGO- varda come che el trà le ali
FULVIO- aiuto juteme, non vedo gnente. (poi vede Piero avvolto nel lenzuolo). Aiuto on fantasma
PIERO- on fantasma, dove ? (esce con la testa dal lenzuolo e vede Fulvio avvolto nella rete). Aiuto on striolo gigante, aiuto...

Si mette a correre ma va a sbattere contro Toni che accende la pila illuminandosi la faccia dal basso.

TONI- dove veto de corsa?
PIERO- aiuto un fantasma

Piero vuole scappare ma inciampa su Fulvio che si dimena per terra, e cade sopra Fulvio

FULVIO- aiuto aiuto i me copa.
PIERO- Fulvio sito tì o sito on fantasma?
FULVIO- a so mì in carne e ossa, i ossi i sè on poco roti ma a so mì.
PIERO- e cosa feto vestio da fantasma?
FULVIO- ma te gheto vardà tì?
MENEGO- e alora la finio de pacioare?
PIERO- la me scusa siora guardia, a ierimo drio tra fora la roba.
FULVIO- giusto vedio che ierimo drio tra fora
BEPI- ma si proprio du ochi, o non ne gavì mia riconosudo? A semo nialtri
PIERO- ma ve ramengo tuti, voio farme fare on infarto galoppante?
FULVIO- mì i gaveo riconosudi suito pero ghe stavo al scherso.
PIERO- ma cosa fasevi in giro de note, con i fari a carburo e con la ree?
MENEGO- andavimo trar fora, come voaltri, tenti parché non demo trar fora la roba tuti insieme cusì ghe metemo metà tempo e lavoremo el doppio tutti d’accordo?
FULVIO- mì ghe stò.
TONI- alora tuti all'opera.

(inserto musicale)

SCENA 11 - Angela e Pierpaolo avevano assistito alla scena ed escono dai loro nascondigli

ANGELA- Pierpaolo, Pierpaolo, sò quà, ndemo fora 
PIERPAOLO- eccomi, eccomi, ma dimmi Angela, che cosa facevano quei signori?
ANGELA- signori, ma i gheto vardà, comunque i ndava a oseare!
PIERPAOLO- uccellare, che roba è?
ANGELA- uccellare sè come se invese de pescare i pesi con le reti i pesca i osei 
PIERPAOLO- pescare gli uccelli, deve essere una cosa complicata
ANGELA- parchè te par fasie vegnere fora de note sensa che meo pà el se inacorsa. Varda che mì non ghea faso più de catarse de scondon
PIERPAOLO- Angela, amore mio, me lo hai detto tu, "finchè te sì disoccupà non te poi presentarte da meo pà", e i miei vogliono che trovi lavoro solo come ingegnere, dato che sono un ingegnere civile
ANGELA- l'unica roba che te restarà de civile sarà l'invalidità se me papà te cata. Speremo che te cati on lavoro e presto.
PIERPAOLO- dai adesso vieni quì
ANGELA- sito mato? Quante volte goi da dirte che me papà el fa sempre on giro par vedare che non ghe sia vache molà in stala, se el vien so e el vede che l'unica roba molà so mì a te diventi vedovo prima de sposarte. 
PIERPAOLO- almeno un bacetto
ANGELA- queo certo, ma in pressa.

SCENA 12 - Arriva di ritorno Menego che aveva dimenticato la pila

MENEGO- eccola qua dove che la jera!
ANGELA- Menego! Mì taio la corda e ti inventate qualcosa
PIERPAOLO- grazie
MENEGO- ma lù chi seo, cosa fao quà?
PIERPAOLO- andavo a pescare gli uccelli
MENEGO- cosa?
PIERPAOLO- mi hanno detto che da queste parti si possono pescare dei bellissimi uccelli, vero?
MENEGO- me sa che sto chì lè on guardacaccia che fa el furbo, cossa volo che se pesca, noialtri semo gente onesta, sé fa qualche caminada

SCENA 13 - Arriva Fulvio

FULVIO- eora Menego te movito che chealtri i gha sa tachà batare?
MENEGO- a iero drio parlare col signore quà dea pesca dei osei
PIERPAOLO- battere, cosa state battendo?
FULVIO- adesso, dirgheo cusi non savaria, batevimo le le nose
MENEGO- le nose de sta stagion?
FULVIO- le va ben par fare el nocino, bisogna battare le piante parche cosi le nose 
MENEGO- anca se el proverbio dise che spalare la neve, tendare le tose e batare le nose sè tempo perso
FULVIO- infati deso noaltri andemo casa perchè a ghò sono, anca ti vero Menego?
MENEGO- a no vedo l'ora de ndar casa stasera.
PIERPAOLO- scusate ma cosa diceva il proverbio, spalare, battere ...
FULVIO- el proverbio, spalare la neve, battare le nose e tendare le tose sè tempo perso,
MENEGO- ma se uno el tende la neve, el spala le nose e el bate le tose sè tempo guadagnà.
PIERPAOLO- bello questo proverbio, ma adesso scusate devo ritornare a casa anch’io. Spalare le tose, …….batare la neve……

SCENA 14 - Pierpaolo se ne va

FULVIO- ma dove lo gheto catà queo lì?
MENEGO- tasi, ringrasia el signore che te ghè catà on guardiacaccia furbo che ga sarà i oci
FULVIO- sè meio che ndemo da chealtri, che pa stasera ghinemo ciapà che le basta.
MENEGO- che el vaga a ramengo, lù e le so nose.

(inserto musicale)

Scene 15 - Pineta e Gianna si stanno raccontando delle filastrocche

PINETA- deo meneo, so fradeo, gamba longa, cura oci, struca peoci, sta chi la jera na filastroca che me contava la me pora nona co la jutavo a scapinare i scalsaroti o a taseare e braghe dei omeni.
GIANNA- me nona invese la me ghà insegnà questa: deo deolin, questo va par vin questo va par acqua questo fa la fugasa e questo la magna tuta, e a mì che so el pì picinin, non ghin resta gnanca on tochetin?
PIERO- ciò a me pare che gavì magnà e bevù abastansa voaltre oncò, cosa gavio che ve contè le storiete?
PINETA- a iero drio ricordarghe le filastroche a to morosa, così quando che si insieme a gavì qualcosa da fare.
BEPI- co semo insieme qualcosa da fare lo cato sempre.
GIANNA- Bepi, non sta dire cusì che se te sente la Gina parlare cusì la me rovina la reputasion.

SCENA 16 - Entra Gina

GINA- a buon giorno cari, come steo oncò, jeri drio parlare de mì parcaso?
GIANNA- deso a so rovinà.
BEPI- le jera drio contarse le filastroche.
GIANNA- a ghinò una giusto par ti: deo deolin, campo marin, persego seco, corni de beco beeeeee, cusì te impari.
BEPI- be vala, mì vo in stala da Toni, bona ciacolada Gina, e buon ascolto a voialtre.

SCENA 17 - Bepi torna nella stalla

GINA- simpatico el so moroso, vero Pineta, a pensare che el gà quasi la stessa età dell'Angela.
PINETA- che non te vegni fora con dee novità. Varda che noaltre jerimo drio contarse le filastroche.
GINA- e alora vin conto una anca mì. Questa la sè la storia de Peton e Petee. Peton e Petee andava a nosee. Peton ghe nà catà on saco e Petee ghi nà catà quatro. Peton ghe dise a Petee "Viento casa?", "No parchè voio catarghine on saco anca mì." "Alora mì ciamo el can che vegna morsegarte. Can viento morsegare Petee che nol voe vegnere casa senza nosee?" "Mi no eh"
PINETA- bea sta storia.
GINA- la sè pena scumisià.
GIANNA- a posto semo.
GINA- "Alora mì ciamo el baston che vegna bastonarte. Baston veto bastonare el can parchè el can non voe morsegare Petee che nol voe vegnere casa sensa nosee?" "Mi no eh" " Alora mì ciamo el fogo che vegna brusarte! Fogo veto brusare el baston che nol voe bastonare el can che nol voe morsegare Petee che non voe vegnere casa sensa nosee?" " Mi no eh"
PINETA- Mi no eh
GINA- "Alora mì ciamo l'acqua che vegna stuarte! Acqua, veto stuare el fogo che nol voe brusare el baston che non voe darghe al can che nol voe morsegare Petee che nol voe vegnere casa sensa nosee?" " Mi no eh"
PINETA- Mi no eh!
GIANNA- Mi no eh!
GINA- "Alora mì ciamo el bò che vegna bevarte! Bò veto bevare l'acqua che nol la voe stuare el fogo che nol voe brusare el baston che nol voe darghe al can che nol voe morsegare Petee che nol voe vegnere casa sensa nosee?" "Mi no eh"
PINETA- Mi non ghin poso pi eh
GIANNA- anca mi eh
PINETA- Gina fermate par carità
GINA- Alora mì ciamo el masante chel vegna coparte
GIANNA- Gina varda che el masante lo ciamo mì se non te ghe la moi.
GINA- ma manca ancora el sorse e el gato.
PINETA- a ti te intaresa qualcosa?
GIANNA- mi no eh.... mì jero pasa de qua pa saludare l'Angela che la sè 'ndà al mercà, ma la prosima volta a ghe mando na cartolina.
GINA- a si cative però, e mì che voevo contarve cosa che sè sucesso jeri note, e pò non veo conto gnanca.
PINETA- grasie.
GINA- sè inutie che insistì che non veo digo.
GIANNA- va ben non importa.
GINA- ve go dito che non ste insistare.
PINETA- ghemo capio.
GINA- veo digo solo parchè gavì insistio tanto. Me ga dito Fulvio che jeri sera fin che i oseava i gha catà na guardia, ma che l'è stà cusì gentile che nol ghe ga gnanca fato la multa.
PINETA- la guardia i gha catà
GIANNA- purtropo sè vero meo ghà dito anca me moroso.
GINA - a proposito de morosi varda chi che sè drio rivare.

SCENA 18 - Torna Angela dal mercato con due sue amiche Chiara e Elda

GIANNA- ciao Angela, ma vedo che te sì in compagnia
ANGELA- anca tì vedo.
GIANNA- purtroppo
ANGELA- sè da tanto che te me speti?
GIANNA- no parqueo.
CHIARA- ma con la Gina el tempo el pasa in presa.
ELDA- Chiara a voevo domandarte na roba.

Si formano tre coppie e tutte parlano assieme

PINETA- sè strano che me mario nol me ghai contà gnente.
GINA- non ghe sarà pasà par la testa.
PINETA- ma dove lo ghai trovà?
GINA- Fulvio el gavea perso la torcia 
PINETA- come la gaveveo persa?
GINA- nol meo ghà mia dito, ma l'è tornà indrio a torla e el ga trovà sto omo in meso la corte.

CHIARA- dime Elda cosa vuto?
ELDA- parchè mì non so bona de catarme on moroso?
CHIARA- cosa vuto che ghin sai mì, anca l'Angela la sè sensa
ELDA- e nò cara, ea lo ghà catà!
CHIARA- a questa la sè nova, deso gheo domando.
ELDA- tasi che so mama non la te senta.

ANGELA- e cosa gheto fato fin che te me spetavi?
GIANNA- se ghemo contà le storiete to mama e mì.
ANGELA- che storiete ve sio contà?
GIANNA- a deo meneo so fradeo e dopo ghinà contà una anca la Gina 
ANGELA- immagino che la sia stà curta vero?
GIANNA- ma no eh

SCENA 19 - Entra Toni con Bepi

TONI- basta femene, tasì on'atimo par carità. 
GINA- assane finire
TONI- le vache co le burla le fa manco casin de voaltre.
PINETA- oh, eco l'omo che el fa el paron.
GINA- el me omo a lo go costumà meio, nol me garia mai tratà da vaca!
BEPI- Toni varda che le sè tante par barufare con tute.
GINA- non ste preocuparve no che deso mì vao via, e ti Gianna viento con mi?
GIANNA- mi no eh!
GINA- a te sì villana, non ghe sè pì rispeto. E po' a vo casa che non go mia tempo da perdare in ciacoe
GIANNA- senti da che pulpito
PINETA- deso che sè ndà via la compagnia o vo drento cusinare, e ti serca de finire i to lavori par mesodì che se magna.
TONI- senti che pace, deso che le vache non burla pì a poso anca ndar vanti. 
BEPI- spetame che rivo.

SCENA 20 - Bepi e Toni tornano nella stalla

GIANNA- Angela a go sentio che i gà vudo visite ieri sera.
ANGELA- tasi valà, a ghe mancava anca che i ndese a oseare.
CHIARA- cosa ghe sè de mae se i se andà a oseare, pitosto che a done visto che ghe jera anca me moroso.
ELDA- insoma quà che resta sensa morosi semo solo che l'Angela e mì.
GIANNA- tasì on atimo, jeri note i ghà catà el guardiacaccia.
CHIARA- o sacranon, de boto se catemo sensa morosi, ti te si xa sensa (guardando Elda).
ANGELA- ma qualo guardiacaccia, el jera Pierpaolo, el me moroso!
GIANNA / CHIARA / ELDA- el to moroso?
ELDA- a te gavevi el moroso e non te ghè dito gnente, non sè mia vaido cusì. Me tocarà morire zitella.
GIANNA- ma conta conta da quanto sta storia?
ANGELA- a sè da on tocheto solo che spetavo che el catase lavoro prima de dirlo in giro.
CHIARA- a non te gheo ghè mia dito ala Gina vero?
ANGELA- mi no eh!

PINETA- (da fuori scena) Angela ndemo dai che sè ora de pareciare la tola.

ANGELA- bisogna che vaga, me racomando, che non sai gnente nesun. (Esce)
ELDA- se gavese mì el moroso lo diria in ciesa, e invese a non ghò gnente e me toca tasere.
GIANNA- prega el Signore no, ogni sera dighe così "Signore benedeto mandame on toseto, belin, belin, beloto, dai venti ai ventoto".
CHIARA- o prega i santi "Santa Rosa fame sposa, Santa Agnese drento on mese, San bastian magari doman, Sante e Santi dei magari on vedovo ma pien de schei”
ELDA- varda che non sposa el tuo de vedovo.

SCENA 21- Arriva Menego

MENEGO- buon giorno signorine, sio stà al mercà oncò?
GIANNA- Certo Menego, pa far na caminada.
MENEGO- e par vardare se ghe jera qualche bel moro.
ELDA- ma non ghemo catà nessun.
MENEGO- sè vero oncò a so sta casa.
CHIARA- senteo che gaeto, intanto con tuta la to beesa a te si senza femena.
MENEGO- a so sensa dea mia, ma no de quea de chealtri.
GIANNA- se anca me moroso el parla come ti a ghe taio....la lengua.
CHIARA- tuti compagni i omeni, una le ghe sè masa e tante le ghe sè poche, a si dee figure porche.
MENEGO- capio Elda, sarà par questo che ti te si sensa moroso.
ELDA- solo parchè non lo cato, a me contentaria anca de un fantoin purchè el fuse on'omo.
MENEGO- te vedarè che te cati anca tì ‘na strassa de moroso, con chei bei oci che te ghè.
GIANNA- vardai quà i omeni, le uniche robe che i varda dee femene sè el davanti e el de drio.
MENEGO- e se le sè bone de cusinare.
CHIARA- a te parli cusì parchè te si sensa femena, speta che te ghin cati una, te vedare come che te cali la gresta.
MENEGO- sarà ma intanto a faso el gaeto, largo cioche che go da andar casa.
ELDA- tento non rabaltarte.
MENEGO- sto tento si, ciao bei oci.
CHIARA- gheto sentio come che parla i omeni?
GIANNA- el voeva far bagolo, e comunque el me omo sè diverso

SCENA 22 - Entra Bepi

BEPI- Gianna, mì quà go finio, se te vui te compagno casa, ma ghe sé anca le to amiche, ciao beese, voio che ve compagna casa anca voaltre dopo?
CHIARA- sentio Elda?
ELDA- sentio sì.
GIANNA- anca mì go sentio, Bepi, portame casa che go da farte on discorseto.
BEPI- Ciao, ma cosa goi dito?
GIANNA- ti le me amiche te le asi stare senò te vedi che fine che fa le to beese!
CHIARA- gheto visto Elda come che sè i omeni?
ELDA- sarà ma a mì i me piase osteso.

SCENA 23 - Entra Pierpaolo

PIERPAOLO- scusate, è in casa L'Angela?
CHIARA- el guardiacaccia, però, che toco de omo.
ELDA- e mì che me contentavo de on fantoin, varda dove che la gà piantà le onge chealtra.
PIERPAOLO- scusate l'Angela?
ELDA- non saprei dirghe, se vuole la spetemo insieme.
CHIARA- Elda varda che l'Angela la sè drento in casa.
ELDA- ooh, gao sentito, l'Angela è in casa, ma se vuole possiamo fare due ciacoe, finchè la mia amica va a ciamarla.
CHIARA- e disivimo su dei omeni a me sa che le femene le sè compagne.
ELDA- ooh, non sè gavimo neanche presentati, mì sono Elda, un'amica del cuore di Angela.
PIERPAOLO- piacere, Pierpaolo, sono anch’io un amico di Angela.
CHIARA- Elda, ga dito l'Angela che la riva sobito, la sè drio lavare i piatti.
ELDA- ha sentito, l'Angela arriva subito, sta broando sù.
CHIARA- el me scusa on'atimo sior, Elda n'demo quà.
ELDA- el me scusi.
CHIARA- a disevimo dei omeni che i sè tuti gaeti ma tì te sì peso.
ELDA- ma le tanto bon.
CHIARA- ma le anca tanto moroso de l'Angea, finisea.
ELDA- e va ben, a non lo go mia rovinà, comunque lo aso stare.

SCENA 24 - Entra Angela.

ANGELA- ecome quà, chi sè che me voe?
ELDA- el to guardiacaccia.
ANGELA- Pierpaolo ma cosa feto quà de giorno?
ELDA- geto sentio i moroseti, solo de note i ga da vedarse.
CHIARA- a go pensiero che noaltre sè meio che ndemo casa
PIERPAOLO- passavo di qui e mi sono fermato a salutarti
ANGELA- va via prima che te veda meo pà.
ELDA- dato che el gà da ‘ndare, mì sto un poco pì vanti se el voe far do ciacoe.
ANGELA- me toca sentirghine altre. Tì sgonfiate. E tì fermo qua, muto e rassegnà. 
ELDA- se podevo esare utile, a tì e anca a lù.
ANGELA- a lu ghe so utile solo che mì.
CHIARA- sè meio che noaltre ndemo prima che ve ciapè pai cavei.

SCENA 25 - Entra Toni

TONI- buon giorno sior guardiacaccia.
ANGELA- ecola che la nase.
PIERPAOLO- fatto una buona pesca ieri sera?
TONI- poca roba, queo che basta par na magnada.
ANGELA- non so papà se al signor ghe poe piasere fermarse, vero?
PIERPAOLO- non è una cattiva idea, (riceve un calcione da Angela) forse è una cattiva idea.
ANGELA- vidito, el sior el gà da andare via.
TONI- ma non disevo miga pa oncò, femo doman.
ANGELA- ma no lù el ga da fare, doman, dopodoman, sempre vero? (continua con i calci)
PIERPAOLO- si, lavoro sempre, sempre sempre.
TONI- poche ciacoe, se mì lo invito lù nol poe farme on torto.
PIERPAOLO- allora cercherò di venire.
ANGELA- ma come falo con tute le robe che el ga da fare?
PIERPAOLO- troverò un sostituto perché non posso più camminare ormai.
TONI- galo problemi ai senoci?
PIERPAOLO- no agli stinchi.
ANGELA- forse con na bea cura de calcio
PIERPAOLO- credo di averne preso troppo.
ANGELA- o masa poco (calcio)
PIERPAOLO- aia, scusate ma devo andare finché posso camminare, ci vediamo per il pranzo, arrivederci. (esce zoppicando)
TONI- varda poareto, cusì sovane e cusì ciompo, me sà che co lè vecio el ciaparà l'invaidità civile.
ANGELA- se non te ghe la fe ciapare tì a ghea faso ciapare mì.
TONI- cosa disito?

PINETA- (da fuori scena) vegnio magnare che sè pronto?
TONI- deso rivemo.

(inserto musicale)


SECONDO TEMPO


SCENA 26 - Piero e Bepi discutono

PIERO- insoma Bepi, gheto sentio la novità?
BEPI- che Toni el ghà invità al speo anca el guardiacaccia?
PIERO- proprio quea lì, serio come guardiacaccia, el và a magnarse el speo invese che punire i fuorilegge
BEPI- lo farà par far sparire el corpo del reato
PIERO- e ghemo anca da star ziti parchè la podeva finir peso.
BEPI- ma ghinè roba da magnare?
PIERO- cosa vuto, quatro seleghe e qualche striolo.
BEPI- le seleghe meiaroe non le sè miga mae però.
PIERO- a gho capio mì, ma vuto metare na fista, o na lodoa?
BEPI- e se ghe fuse on lugarin, ti lo butarisito via?
PIERO- bei coti che tei meti in boca e drio man na bea feta de poenta onta!
BEPI- e on bel goto de cabarne!
PIERO- o anca merlot
BEPI- meio el cabarne.
PIERO- basta bere ben. Be speremo che el guardiacaccia el se contenta de on strioo
BEPI- speremo che el gai denti boni.

SCENA 27 - Arriva Menego

MENEGO- bon giorno bona gente, sio quà da soi?
PIERO- Menego, co te vedo a so contento, parche vol dire che non te si co me morosa.
MENEGO- ma par chi me gheto ciapa, non ndaria mai coe femene dei amici
BEPI- proprio come el gato col lardo, non ghe metaria mai le sate doso.
PIERO- le lardee!!
MENEGO- gheto problemi?
PIERO- a parlavimo del speo e me iero dismentegà le lardee, te piasee?
MENEGO- se gò da dir la mia preferiso la panseta.
PIERO- na lardea con la so foieta de salvia.
BEPI- e on goto de cabarne.
PIERO- de merlot.
BEPI- e on bel toco de copa al speo...
PIERO- de straculo.
BEPI- de copa, la resta pi morbida.
PIERO- straculo, le manco graso.
BEPI- cusì te fe pari con le lardee.
PIERO- non te capisi gnente, ti Menego cosa disito, copa o straculo?
MENEGO- asa pur che el mondo digha la meio roba se… i osei!
BEPI- alora me sa che te ghin magnarè pochi.
MENEGO- con tuti quei che ghemo ciapà?
PIERO- ma ghemo gli invitati
BEPI- noialtri
PIERO- le morose
BEPI- parche le ghà paura che bevemo masa
PIERO- i guardiacaccia
MENEGO- i guardiacaccia, e de chi sea sta invension?

SCENA 28 - Entra Toni

TONI- mia la sè, parchè non la ve comoda mia?
MENEGO- insoma se prorio ne toca.
TONI- a meo so catà in corte, a ghò pensà de invitarlo, cusì almanco el tegnarà acqua in boca
BEPI- acqua, vin, on poca de poenta onta
PIERO- on par de lardee, on toco de straculo
BEPI- on toco de copa
PIERO- straculo
BEPI- copa
MENEGO- e tanti osei!
TONI- nol te cava el pan daa boca no
MENEGO- el pan no ma i osei sì.
TONI- non sta preocuparte che i me ospiti noi sè mai morti ne da fame ne da sen.

SCENA 29 - Entra Pineta. Escono gli uomini

PINETA- a gavì tanto da dir su dee femene, ma onca voaltri omeni a ve piase paciolare.
TONI- noaltri a semo drio discutare, no paciolare.
PINETA- e de cosa discutio?
MENEGO- del speo, qua me sà che a furia de invitati a restemo sensa osei.
PIERO- mae che la vaga te metarè su un bel toco de straculo.
BEPI- non sta scoltarlo Pineta, meti su un bel toco de copa.
MENEGO- va a finire che a femo un speo solo col mas'cio.
PINETA- tenti omeni, aseghe ae femene fare da magnare che si solo drio perdare tempo par non lavorare, e deso via, arpegare!
MENEGO- Toni, e ti te vui che mì me sposa, gnanca morto, ve saludo parona.
TONI- e mì torno in stala, che un cò la marca mae.
PIERO- Pineta, me racomando, on bel toco de straculo.
PINETA- a ghe meto el tuo de straculo se non te vè via.
BEPI- a te ripeto che sè meio la copa.
PIERO- el straculo.
PINETA- sti omeni, i dise su dee femene ma co sè ora de perdar tempo noi se tira mia indrio, Angela n'demo darme na man a piegare i nesui.

SCENA 30 - Entra Angela

ANGELA- mama, a te gavarè on bel da fare a darghe da magnare ai omeni.
PINETA- e so curiosa de vedare quanto che magna el guardiacaccia.
ANGELA- a ghe penso mì a farghe pasare l'appetito.
PINETA- cosa gheto dito?
ANGELA- che el sarà uno de apetito.
PINETA- ma i me gha dito che l'è on bel'omo, sè vero?
ANGELA- bè, non l'è mia da trar via, ma el gha anca lù i so difeti
PINETA- e come feto dirlo?
ANGELA- beh…le on guardiacaccia e el va magnare el speo coi braconieri.
PINETA- a beh, de serto non lè mia onesto.
ANGELA- speremo de sì.
PINETA- co sti tempi moderni a sè difisie trovare omeni onesti, e ti serca de star tenta.
ANGELA- parcosa po'?
PINETA- perché i omeni i sè farabuti, boni solo da cavesa. Ti serca de trovarte on omo onesto e che el gai on bon lavoro, magari col stato.
ANGELA- a gò capio dove che te vui rivare, te voi combinarme col guardiacaccia.
PINETA- lè on bel'omo, el gha on lavoro sicuro e magari l’è sensa morosa.
ANGELA- no, no el ga la morosa.
PINETA- sito sicura?
ANGELA- cusì i dise.
PINETA- magari el la mola.
ANGELA- speremo de no.

SCENA 31 - Entra Gina

GINA- bongiorno cari, sento che si drio paciolare, alora me fermo.
PINETA- ma semo anca drio piegare i nesui, ti i gheto xà piegà?
GINA- sicuro, me gà jutà Fulvio.
PINETA- te parea, se gheo domando a Toni el me impica coi nesui.
GINA- te dovevi insegnarghe a so tempo. Ciò a go sentio che el guardiacaccia le drio trovarse la morosa.
ANGELA- e chi sè sta dirteo?
GINA- l'Elda, da quando che lo ghà visto non la fa altro che parlare de lù.
PINETA- ma lo gheto visto anca tì?
GINA- mi no eh.
PINETA- a sento che te parli isteso.
ANGELA- contame, el guardiacaccia le drio smorosare con l'Elda?
GINA- cusì dise l'Elda.
ANGELA- la farò tasere mì
GINA- la continua che lè on bel'omo, che lè on bon partito, pecà che na tosa ghe gà sa piantà le onge doso.
ANGELA- speta che la brinco e te vedi cosa che ghe pianto doso a ea.
GINA- e che ea la ga tante robe da ofrirghe, che ea non la sè mia seca come na stropa
ANGELA- infati la sè grosa come na bondola.
GINA- fè conto che da quanto che la ghà parlà a me sè vegnù el mal de testa. 
PINETA- e si che te sì abituà ale ciacoe.
GINA- visto che le me ciacoe non le sè gradie deso vo casa, che gò na fameia da parar vanti.
PINETA- sentio Angela, l'Elda la sè dà e man torno.
ANGELA- e mì ghe dao le man doso.

SCENA 32 - Entra Gianna

GIANNA- bongiorno, sio drio piegare i nesui?
ANGELA- cosa te pare che semo drio fare, on giro in gondola?
GIANNA- Pineta me pare che l'Angela la gai la luna de traverso
PINETA- cosa vuto cara, la scomisiava invaghirse del guardiacaccia ma pare che qualcheduna la ghe gai rubà l'omo.
GIANNA- i te ghà robà el guardiacaccia, e chi sè stà?
ANGELA- bei oci.
GIANNA- l' Elda, a maria santissima.
PINETA- on cusì bon partito, jera chiaro che i gheo rubava, ciao Gianna, mì vo drento, consolea tì se te poi.

SCENA 33 - Esce Pineta

GIANNA- contame, contame cosa gala fato l'Elda?
ANGELA- cosa che ghe faso mì co la vedo, la struco come na canavasa.
GIANNA- eccola che la riva.

SCENA 34 - Entrano Elda e Chiara

ELDA- ciao a tute.
ANGELA- ciao cara, steto ben?
ELDA- o si ciò, oncò sè proprio na bea giornata, a so tuta on boio.
ANGELA- lo vedemo, e par resto come vala, gheto trovà morosi vegnendo quà?
ELDA- e non sè mia fasie, intanto me vardo in giro, buto i oci de quà e de là.
GIANNA- e co tuto sto affar de oci, nesuni che te varda, me pare strano.
ELDA- a dire el vero qualcuno ghe saria che el me comoda, ma nol se fa sentire
CHIARA- o anca l'Elda la se cata el moroso.
ANGELA- basta che nol sia de chealtre.
ELDA- mì non ghe faria mai el filo ai omeni de chealtre, sensa dirgheo.
ANGELA- a no vero, bruta sprota che non te si altro.
ELDA- Gianna ma la gala sù co mì?
GIANNA- e feto finta de gnente anca, dopo che te ghe rubi el moroso.
ELDA- ma cosa sio drio dire?
CHIARA- gheto butà i oci doso al guardiacaccia?
ELDA- mi no eh, al masimo a ghe go dito do paroe
ANGELA- vito che te ghe ghè parlà.
ELDA- non ghe sè mia la targa col to nome.
ANGELA- se te voi na targa col to nome tea meto mi, in cimitero.
ELDA- mì ghe go solo dito che non gho el moroso
ANGELA- imagino come che te gheo ghe dito.
ELDA- ognuna mostra queo che la gà
ANGELA- queo che te ghè tì lè tuto fora e gnente drento.
ELDA- ti invese a te ghe tuto drento e gnente par fora.
ANGELA- tasi che te sì na' bondola.
ELDA- e ti na' stropa de selgaro.
ANGELA- bondola
ELDA- stropa
GIANNA- sè meio dividarle
CHIARA- prima che le se taca.

SCENA 35 - Entra Menego

MENEGO- ciao ragase, ma cosa fasio, ve tireo pai cavei?
GIANNA- le se magna pa on'omo.
MENEGO- ste ferme. Non ocore che barufè, a ve contento tute mì.
CHIARA- le sè robe che ti non te poi capire.
MENEGO- sè vero, mì non go mai barufà pa on omo.
ANGELA- te si na soeta, questa a te mea paghi.
ELDA- ma se non gho fato gnente, ghe go solo parlà.
ANGELA- ghe mancaria anca, cosa voevito farghe?
MENEGO- o tose ste calme par carità, Angela, na tosa cusì carina e delicata...
ANGELA- va via che te sbrego co ste onge.
MENEGO- grrr, che tigre. 
CHIARA- Menego a te convien portare via l'Elda, che noaltre calmemo l'Angela.
MENEGO- ciò Elda, a onge come sito mesa?
ELDA- sè ea quea che pianta le onge no mì.
ANGELA- ti te pianti solo che rogne.
ELDA- stropa de selgaro.
ANGELA- bondola, tuto fora e gnente drento.
MENEGO- 'ndemo con mì Elda, e no sta preocuparte se te ghè tuto fora che va ben cusì.

SCENA 36 - Escono Menego ed Elda.

ANGELA- bruta soeta che non la sè altro, e voaltre moleme. 
GIANNA- noialtre te molemo
CHIARA- se tì te te calmi
ANGELA- vardae quà le amiche, le te ruba anca i morosi.
GIANNA- bisogna vedare, non te vorè miga che el to Pierpaolo el te mola par chealì, o seo un oco?
ANGELA- se non l’è un oco, l’è un pito per perdarse drio ‘na pai così.

SCENA 37 - Entra Fulvio

FULVIO- bongiorno signorine, gavio visto la Gina, la me Gina?
ANGELA- la to discreta sè pena andà via, ea e la so lengua.
FULVIO- bon alora me sento, che sè tuta onco che la me fa piegare nesui.
GIANNA- vito, ga rason la Gina, così bisogna tratarli i omeni.
CHIARA- ma ti te asito sempre comandare da to moiere?
FULVIO- ma cosa credio, che sia ea a comandare, noaltri omeni a semo i paroni.

SCENA 38 - Entra Piero

PIERO- te ghe rason Fulvio, semo noaltri che le comandemo.
CHIARA- sta tento Piero, a ghin tegno da conto de queo che te disi.
PIERO- no sta badarghe Fulvio, noaltri le done le tegnemo par la cavesa,
FULVIO- le sè le nostre schiave, noaltri le done le dominemo.

SCENA 39 - Entra Gina

GINA- vardeo quà dove che l'è. Cosa feto in volta, vanti casa che ghe sè ancora un mucio de nesoi da piegare, e movarse anca.
PIERO- Fulvio, ma noaltri le done le dominemo
FULVIO- mì lo sò, sè ea che non lo sà.

SCENA 40 - Escono Fulvio e Gina.

CHIARA- Piero, come sea sta storia che voialtri ne tegnì par la cavesa?
PIERO- a disevo par scherso Chiara, voevo tore in giro Fulvio
CHIARA- senti come che el fa presto calare la gresta
PIERO- dai no, non te te sarè miga inrabià vero?
CHIARA- sicuro che sò inrabià, non so mai se credarte o no.
PIERO- ma dai che scherzavo.
ANGELA- si boni solo de schersare voialtri, varda chi che bei scherseti che fè, si boni solo de tore in giro.
PIERO- ma cosa gala la to amica, la luna de traverso?
GIANNA- asea stare che oncò non sè giornata.
PIERO- e cosa sucede poareta, te sè morto el gato?
ANGELA- va via che te morsego.
GIANNA- ecola che la sè irabia
ANGELA- non ghin poso pì de voaltri omeni.
GIANNA- asea stare che on cò la gà la luna de traverso

SCENA 41 - Angela e Gianna escono

CHIARA- la gheto fata rabiare, te sarè contento deso.
PIERO- a sè colpa mia se la se inibia come i sucui?
CHIARA- se non te sè gnente tasi, no i teo ga mia insegnà?
PIERO- a non te vorè mia dire che so sta mì a farla inrabiare, dime cosa che ghe sè soto.
CHIARA- robe da donne
PIERO- così voialtre a spieghè tuto.
CHIARA- robe da donne innamorà.
PIERO- l'Angela se gà inamorà, speta che lo sai so pare.
CHIARA- ti prova solo parlare che me faso insegnare dalla Pineta a fare i caponi.
PIERO- non sta preocuparte, mì taso basta che te me conti.
CHIARA- gheto presente el guardiacaccia?
PIERO- chel magna osei a tradimento.
CHIARA- queo le so moroso dell'Angela.
PIERO- però, la gha fato presto a inamorarse.
CHIARA- ma no cuco, lo conoseva sa da prima.
PIERO- adeso capiso, la ga el moroso lu el ga on bel lavoro,
CHIARA- ma qualo bel lavoro che lè disocupà.
PIERO- adeso capiso, la gà el moroso disocupà.
CHIARA- ma qualo moroso che l'Elda ghe gà butà i oci doso.
PIERO- adeso capiso, non la ga pì el moroso e la sè disocupà.
CHIARA- el guardiacaccia lè disoccupà.
PIERO- adesso non capiso pi gnente. Come disoccupato, non lavora pì?
CHIARA- nol ga mai lavorà.
PIERO- però i osei li magna isteso.
CHIARA- par fortuna che te si tì el furbo dea coà, ndemo con mì che te spiego

SCENA 42 - Entra Toni

(inserto musicale)

TONI- Bepì, Angela, Pineta,...Gina.... Benon non ghe sè nesun.

Si guarda in giro con circospezione poi tira fuori un fiasco che era nascosto e tracanna.

SCENA 43 - Entra Pineta

PINETA- te gò dito che el vin fa mae!
TONI- (sputacchiando il vino che gli è andato di traverso) par forsa che el fa mae se te sighi insta maniera.
PINETA- non te mori no e deso dame el fiasco.
TONI- gnanca on gioso in santa pace.
PINETA- te pensi a bere tì, non te vedi mia che la tosa la sè inamorà?
TONI- ma come inamorà se non go visto nesuni?
PINETA- fa conto che teo ghè invità a magnare el speo.
TONI- ma seo el guardiacaccia?
PINETA- sicuro, e la garia scelto on bon partito.
TONI- alora dame el fiasco che festeggemo.
PINETA- ma quao fiasco, ghe sè na rogna.
TONI- dame el fiasco che la dismenteghemo.
PINETA- moeghea. L'Elda la ghe gà piantà le onge doso.
TONI- alora l'Angea non la gha pì el moroso.
PINETA- no par deso ma se tì te ghe parli al guardiacaccia.
TONI- e cosa goi da dirghe?
PINETA- parlaghe da omo e serca de combinarli.
TONI- co lo vedo a ghin parlo, ma dame on gioso che me faso coraio.
PINETA- sto fiasco chì a non teo vedi pì pa oncò, e serca de fare l'omo par na volta.

SCENA 44 - Esce Pineta

TONI- serca de fare l'omo, fasie pa ea che la sè na femena. Peta valà che me faso coraio, fortuna che go la riserva, beh la riserveta! (e tracanna da un fiaschetto nascosto).

SCENA 45 - Entra Menego

MENEGO- Toni, cosa feto?
TONI- naltra volta, porco e fora!
MENEGO- bevito de scondon?
TONI- vuto tasere, che se me vede la Pineta la me cava anca questo.
MENEGO- e anca qualcosaltro.
TONI- a gho na rogna da gratare, ghe sè l'Angea inamorà del guardiacaccia.
MENEGO- non la sè mia na rogna, le on affare.
TONI- si ma ghe sè l'Elda che lo voe anca ea. Non so che santi ciamare.
MENEGO- sta tento Toni se te voi mì ghe parlo all'Elda, e ti te ghe parli al guardiacaccia.
TONI- questa sì che sé un’idea, a te sì un amico.

SCENA 46 - Entra Pierpaolo.

PIERPAOLO- Buongiorno.
TONI- varda chi che se vede, buongiorno.
PIERPAOLO- ho portato del vino per la cena.
TONI- bravo, fato ben, ma bisogna saiarlo par savere se el se cata co speo.
MENEGO- bisogna; tira fora i goti.
TONI- Pineta, porta fora i goti che ghemo gente.
PINETA- (da fuori scena) chi vuto che ghe sia, n'altro imbriagon come tì.
TONI- te digo che ghemo ospiti.

SCENA 47 - Entra Pineta.

PINETA- eco i goti, imbriagoni che non si altro. (vede Pierpaolo) Oh el me scusa, non parlavo mia de lù, che l'è cusì distinto, ma de sti dù slandroni chì.
TONI- grasie, e deso torna in casa che noaltri a ghemo da parlarse.
PINETA- serchè de fare puito. (Esce)
MENEGO- ti sì fortunà ti Toni
TONI- e parchè?
MENEGO- non te si mia come mì che gò da preocuparme de cosa faso deso, cosa faso doman, ti basta che te scolti to moiere.
TONI- nol staga mia scoltarlo, in sta fameia so mì che comando
MENEGO- se la parona ghe asa, comunque el vin el jera bon
PIERPAOLO- sono contento che il vino piaccia.
TONI- non serviva el vin no, bastava la so presensa.
MENEGO- a mì me bastava el vin, na boca in manco saria sta meio.
TONI- nol staga mia scoltarlo el ga sempre voia de schersare, el staga tento invese, a gavaria da domandarghe na roba
PIERPAOLO- mi dica se posso esserle utile.
TONI- vedeo, mì go na tosa sovane, bea e che ormai la sè da moroso.
PIERPAOLO- l'Angela, sì la conosco.
TONI- eco, vedeo l'Angela la gavaria catà on bon partito, on'omo serio che ga on bon lavoro e che ghe piase.
PIERPAOLO- Ah. Così sua figlia ha trovato un moroso?
MENEGO- par cosa me vardeo mì? La dona che diventarà me moiere i gha ancora da stamparla!
TONI- el poe imaginarse se divento so suocero, pitosto a faso i voti come un frate
MENEGO- tanto el voto de obedienza teo ghe sa fato
TONI- insoma me fiola la ghà trova un moroso ma lù non lo sà gnancora
PIERPAOLO- bisognerebbe dirglielo.
TONI- a saria drio
PIERPAOLO- scusi, ma non capisco.
MENEGO- e si che non la sè mia difisie, lè lù el moroso dell’Angela.
TONI- come che ghe disevo le on'omo serio, che gha on bon lavoro.
PIERPAOLO- Io? Buon lavoro? Sono contento ma ci sono dei problemi, cose da chiarire.
TONI- par la dota nol staga pensarghe, noialtri semo onesti lavoratori.
PIERPAOLO- proprio di questo volevo parlarle.
MENEGO- el va subito al sodo l’amico.
TONI- ma se ghe digo che la dota la sè sa pronta, e l'Angela la sè na tosa seria, mì non la gò mai vista smorosare con nesuni.
PIERPAOLO- per fortuna mia.
TONI- e anca dell’Angela parchè se la catavo....
MENEGO- el fasa conto che tute le sere Toni el fà on giro con la scusa de tendare le vache e invese el tende la fiola
TONI- e ghe dò la me parola che non gho catà nesuni senò al posto de chee strope lì a ghe saria na crose
MENEGO- in memoria dei morosi andati
PIERPAOLO- ma io dovrei chiarire una cosa, è un po' complicato da capire…
TONI- so tutto, gho capio tuto, pena che meo ghà dito me mojere. Le done par serte robe le gha le recie lunghe, anca masa longhe, e la gà capio tuto.
MENEGO- a semo omeni, ghemo visto anca noaltri che bei oci che ghà l’Elda.
PIERPAOLO- l’Elda e cosa centra l’Elda?
MENEGO- ma se ghemo dito che lo capimo, e insoma serte robe le fa boiare el sangue.
TONI- ghemo capio tuto, semo contadini ma gati.
MENEGO- deso però l’Elda la asa stare
TONI- sicuro e nol staga preocuparse, la starà mae on pocheto e dopo la se dismentegarà de lù
PIERPAOLO- ma tra me e l’Elda non c’è stato niente
TONI- bravo, cusì se fà, tra tì e l’Elda non ghe sè stà gnente
MENEGO- i sè forti però sti guardiacaccia i se dismentega tuto, i fa presto a voltare la fortaja
TONI- e all’Elda ghe pensa Menego, cusì la consola on pochetin
MENEGO- el vedarà caro el me guardiacaccia ghe faso on discorseto e la torna come nova
PIERPAOLO- mi raccomando faccia un bel lavoro
MENEGO- nol staga preocuparse che mì con le femene a gò sempre fato bei lavoreti

SCENA 48 - Entra Piero

PIERO- Salve, o varda chi che se vede, el guardiacaccia, queo furbo.
TONI- ciao Piero, te rivi giusto par la novità, so drio convinsare sto bel giovanotto quà a sposarse con l'Angea, cosa ghin dito?
PIERO- Toni, furbo (rivolto a Pierpaolo), no sta avere presa, pensaghe puito, forse ghe sè dee robe che non te se.
TONI- cosa vuto intendare?
PIERO- vigni quà e scoltè, chel sior lì lè on drito, so dee robe su de lù che te faria cambiare idea soe nosse.
TONI- Piero, ma varda che so tuto.
MENEGO- e ghemo sa risolto tuto
PIERO- come savì tuto, ma se a mì i meo gà pena dito.
TONI- ti no sta preocuparte, se te digo che savemo tuto, vol dire che savemo tuto.
PIERO- e ghe deto lo steso to fioa da maridare?
TONI- la sè na bea tosa e la ga na bona dota.
PIERO- ma vuto che i sè mantegna con la dota?
TONI- ma dopo i lavora, i se da da fare.
PIERO- de questo voevo parlarte, del lavoro.
TONI- sì sì deso asa che parla col me genero.
PIERO- che non te gai da pentirte on doman
TONI- che non te gai da pentirte deso se non te ghea moi.
MENEGO- e deso molame che go da andare anca mì
TONI- sè meio che tea combini chea pora tosa
PIERO- ma quaa sea sta pora tosa?
MENEGO- vito tì te credevi de savere e non te sè gnente, noaltri non savevimo gnente e invese a savemo tuto
PIERO- a mì non capiso pì gnente
TONI- se mai te ghe capio calcossa
MENEGO- bon mì vao note Toni, note Piero e note palpaciocche e se vedemo pal speo.

Menego esce

TONI- Caro el me genero, cosa ghin pare della me proposta, na bona tosa, seria, bea e co na dote sà pronta?
PIERPAOLO- mi sembra impossibile, ma l'Angela lo sà?
TONI- basta dirgheo, Angela, 'ndemo fora che go da parlarte.

SCENA 49 - Entra Angela con Gianna

ANGELA- ecome ecome, cosa ghe sè ancora oncò.
TONI- Angela seto chi che sè questo? (indicando Pierpaolo)
ANGELA- un busiaro, un bon da gnente, e anca un palpaciocche
PIERPAOLO- forse è meglio che vada via.
TONI- stà fermo qua
PIERO- Toni come nose no che le scomisia ben.
GIANNA- quae nose, parchè deso se sposeo anca? 
ANGELA- certo che fe le robe in pressa voaltri omeni.
TONI- varda che non ghemo fato gnancora gnente, mì sercavo solo de combinare dee bee nose.
ANGELA- ancha tì te te meti in meso deso, parfin le nose el ghe combina.
GIANNA- robe dell'altro mondo, a soo pa te ghe ghe fato combinare le nose con l'Elda, vergognate.
PIERPAOLO- con l'Elda, cosa centra l'Elda, non c’è stato niente con l’Elda
TONI- bravo, ma alora quà tuti sa tuto.
PIERO- mì taco pensare che qualchedun non sai gnente.

SCENA 50- Entra Pineta

PINETA- cosa ghe sè co sto sigamento?
ANGELA- meo pà gha combinà le nose.
PINETA- almanco na roba giusta che el ghai fato. Cusi te te sposi sto bel giovanotto.
ANGELA- no mì, l'Elda.
GIANNA- e pensare quanto ben che ghe voe l'Angea a sto busiaro quà.
PINETA- Toni ma te gheto bevù el serveo, che casoto gheto combinà?
TONI- calmi tuti. La cagnara la gavì fata voaltri. Mì ghe ghò dito al giovanotto che so tutto, e lù sa cosa, e che non importa, se lu voe el poe portarse casa la tosa, la dota e anca la suocera.
PINETA- questo lo vedaremo. E lù el se gà impegnà con l'Elda?
PIERPAOLO- ma tra me e l'Elda non è successo niente.
TONI- bravo, va vanti .
PIERPAOLO- io non sapevo che voi sapevate tutto.
TONI- teo go sà dito, semo gati noaltri.
PIERPAOLO- sono felicissimo che non ci siano problemi.
TONI- gnanca uno, tutto oro.
PIERPAOLO- e sono felicissimo di sposare l'Angela.
TONI- bon, portatea casa che la sia finia.
PIERPAOLO- ma l'Angela mi voule?
ANGELA- ma ti gheto fato gnente con l'Elda?
PIERPAOLO- fatto niente.
TONI- bon, parchè senò (indica le fascine dove avrebbe messo la croce)
PIERPAOLO- nooo, fatto niente, niente, lo giuro.
ANGELA- gnente gnente o gnente..
PIERPAOLO- niente.
TONI- se el te gà dito gnente, vol dire che nol gà fato gnente.
ANGELA- ma mì si che te vuio ben, grasie papà, grasie mama
PINETA- che bea coppia.
TONI- paremo noialtri, tanto tempo fà.
GIANNA- o che bei che i sè i sposeti.
PINETA- quà ghe voe na bossa de chel bon, vero Toni?
TONI- o miracolo, te gheto convertia? Demo drento a fare on brindisi, prima che la cambia idea
PIERO- sarà ma par mì non i sà mia tuto, e deso i va fare on brindisi anca. A poro Toni che rogna che el se porta casa, on guardiacaccia disoccupà. Speremo che el beva tanto vin cusì el se dismentega del genero. Ben valà dato che i gà dismentegà on fiasco, lo saio....Hummm se i beve sto vin chì i se consa come la salata, sto chì pì che vin el pare asedo, le duro da mandar sò, proprio come el genero de Toni, quasi quasi a gheo digo, ma Toni l’è cusì contento, intanto ‘ndemo dentro fare on brindisi, e speremo che el gai na bossa de queo bon, parchè se bevo sto chì a faso la fine del poro pearon, vò soto asedo!

(inserto musicale)

SCENA 51 - Entra Toni

TONI- movarse, moverse che tra poco riva i ospiti. Anca la cravata me gà tocà metarme
PINETA- movarse, movarse, intanto lù nol fa gnente. Gnanca la cravata no l’è bon metarse
ANGELA- mama stoi ben vestia cusì?
PINETA- pì che l'angela te pari on'angelo.
TONI- sito drio fare le prove par le nose?
ANGELA- oncò a sè on gran giorno par mì, sè come se me fasese novissia.

SCENA 52 - Entra Gina con Fulvio

GINA- sta tento Fulvio de no bere masa, che teo digo da quando che semo sposà.
FULVIO- cosa goi fato chea volta.
GINA- a bere masa?
FULVIO- no a sposarte
ANGELA- eco i primi ospiti.
GINA- mama mia che bea tosa, te si talmente bea che non sò pì cosa dire.
FULVIO- a me pare strano, ma la tase davero.
ANGELA- Fulvio te piaseo el me vestito?
FULVIO- pì che un vestito, lè on miracolo, la Gina tase.
GINA- cosa vuto dire tì, credito che mì sia sempre drio parlare
FULVIO- la se gha ripreso.

SCENA 53 - Entrano Gianna e Bepi

GIANNA- semo rivà in tempo par sentirve barufare?
ANGELA- ciao Gianna, come me vedito?
GIANNA- ben diria
BEPI- anca mì te vedo puito, anca de pì de puito.
GIANNA- sta tento che te casca i oci a furia de vardala.

SCENA 54 - Entrano Chiara e Piero

CHIARA- varda che bea che te sì oncò, ma come mai ciò.
ANGELA- teo sè si parchè, e tra poco el dovaria rivare.
PIERO- pena che el finise de lavorare l'è quà.
CHIARA- ma tirito fora ancora chea storia lì, te ghè visto i savea tuto e ala fine l'amore ghà vinto.
ANGELA- davero o gò du bravi genitori.
PIERO- la sarà così.
ANGELA- ma l'Elda rivea?
CHIARA- la dovaria esare quà.
ANGELA- chissà che la riva, cusì a femo pace e che la sia finia.

SCENA 55 - Entra Elda (tutta in ghingheri)

ELDA- ciao a tutti.
BEPI- mama mia Elda, te gheto tirà con la malta fina!
ANGELA- Elda, ma vuto fare colpo sol me omo.
ELDA- non ghe sè mia solo el to omo al mondo.
CHIARA- ghe sè anca i nostri, vero Gianna.
GIANNA- che deso nol diventa on visio queo de vardare i omeni de chealtre.
ELDA- ste chiete che mì go el me omo.
PIERO- poro martire, e dove seo?
ELDA- el gà parcheggià la bicicletta, ma deso lo ciamo. "Menico, Menichino"

SCENA 56 - Entra Menego.

MENEGO- ecome che rivo amore.

PIERO / BEPI / FULVIO- Menichino (rivolto a Menego)

GIANNA / CHIARA / ANGELA- Menichino (rivolta all'Elda)

MENEGO- Menichino
ELDA- Menichino

TONI- Menichino... Menego, ma cosa sè sucesso, te gheto bevù el serveo?
MENEGO- te si sta tì dirme de ndarghe drio all'Elda.
TONI- gho capio, ma no cusì tanto, e cosa sè successo?
MENEGO- la gho portà drio al pajaro e jero drio parlare con l'Elda e tuto on tratto sè scoppià..
TONI- l'amore?
MENEGO- anca, queo, ma dopo.
ANGELA- ziti tuti, sè drio rivare Pierpaolo, ferme ferme, ti metate quà, ti quà e mì dove me meto?
PINETA- aposto semo se te tachi agitarte deso.

SCENA 57 - Entra Pierpaolo.

PIERPAOLO- salve a tutti.
PIERO- bongiorno ai lavoratori
TONI- o ecco quà el me futuro genero.
GIANNA-gheto visto Elda che bel'omo?
CHIARA-Gianna vuto che scomisiemo danovo.
ELDA-soreve, soreve che mì so a posto vero Domenichino?
PIERO- anca Menego lè a posto.
ANGELA- o eco quà el me futuro mario, semo o no semo na bea copia!
TONI- e deso basta, tuti in casa a fare festa, e mì in meso ai sposi.

PIERO- mì me pare strano che Toni el sia cusì contento de darghe so fiola a sto guardiacaccia, cosa disito Menego?
MENEGO- l’amore è cieco.
PIERO- a go visto sì che te si diventà orbo patoco
MENEGO- co l’amore te ciapà sè inutile ribearse, la sè na bataglia persa
PIERO- te ghè rason, l’amore sè la coporetto dei omeni.
MENEGO- la Waterlo dee femene.
PIERO- el quatro novembre la festa dea vittoria par l’Elda
MENEGO- l’8 setembre el giorno della resa dei suoceri. 
PIERO- e el 2 novembre la festa dei morti par tì, e deso vo bevare parche gò sen.
MENEGO- e insoma la sè finia, anca questa la sè na storia de stì ani, de omeni e de femene, de merli e de ree, che con le te ciapa non le te mola pì e se la te va ben a te finisi in gabbia senò te finisi afare i rosti o, meio, i menarosti.

ELDA-Domenichino, ‘ndemo movate che femo na canta.
MENEGO- il generale ha chiamato, anca par mì sè scomisià la leva.



FINE