Simmaco di Capua

Stampa questo copione

San Simmaco di Capua Vescovo

Simmaco di capua

Autore Posizione SIAE 184727 - Codice Opera SIAE 902393A

mail: macrisa@libero.it - anno 2012

Storia romanzata del Primo Vescovo di Santa Maria Capua Vetere

in due tempi di

Salvatore Macri

Primo tempo: Personaggi:

     Simmaco, indovino                                             U

     Roberto, discepolo                                    U

     Raffaella, Sebiba Kahina, schiava                                   D

     Agata, mercante di profumi                                 D

     Giosuè, mercante di frutta                          U

     Silvana, mercante di preziosi                               D

     Viola, giovane figlia di Silvana                              D

     Valerio, patrizio                                        U

     Giacinto, servo di Valerio                           U

     Vittorio, dignitario di Corte                         U

     Marianna, dignitaria di Corte                                D

     Ferdinando IV                                          U

Secondo tempo:      Personaggi:

(dal primo tempo)

     Simmaco, Vescovo                                    U

     Raffaella, Sebiba Kahina, schiava                                   D

     Roberto, discepolo                                    U

     Giosuè, mercante di frutta                          U

     Agata, mercante di profumi                                 D

     Vittorio, gentiluomo                                            U

     Marianna, gentildonna                                         D

     Ferdinando IV                                          U

    

     Viola, moglie di Nereo                                                  D

     Nereo, ex gladiatore                                           U      

     Egisto, sacerdote di Mitra                           U

     Silvia, prima Sacerdotessa                                  D      

     Rosa, seconda Sacerdotessa                                D

     Letizia, popolana                                                D

Musici e Comparse

Scena primo tempo: spazio aperto con sfondo l’Anfiteatro Campano (anche gigantografia); in scena siepi di arbusti verdi e sedili sagomati come rocce.

Scena secondo tempo: spazio antistante la Basilica di S. Maria C.V.

Nota: Tra il primo ed il secondo tempo trascorrono circa quindici anni.


Primo tempo - Scena Prima

(Simmaco entra da sinistra, zoppicando, lasciandosi guidare da Roberto)

Simmaco              Ecco, simmo arrivati finalmente… addo’ sta ‘a preta mia?

Roberto                Aiccanne, vieni cu’ me… (lo guida) mò te puo’ assetta’!

Simmaco              (sedendosi) Ahhh! Nun ce sta ancora nisciuno… nun se sente niente, sulo l’aucielli che cantano… ma l’ora è justa, ‘o sole è cavurillo… vene coccheduno?

Roberto                No, nun se vere proprio niscuno…

Simmaco              E nuje aspettammo! Anzi, pecchè nun me vai a piglia’ ‘nu poco d’acqua? Aieri era fernuta…

Roberto                Quasi quasi… aggio visto cierti cevuze vicino ‘a funtana… quasi ammature…

Simmaco              …e oggi se saranno ammaturate… però nun ce mettere ‘na jurnata!

Roberto                Va buono, duie minuti e stongo cca’! (prende una bottiglia da terra ed esce a sinistra)

Giosuè                 (entrando da destra con una sedia, portando un cesto coperto sotto un braccio)  E pure oggi stammo cca’! Speriamo ca ‘a jurnata ce vene bona! (si sistema al centro del palco)

(entrano da sinistra Agata, Silvana, Viola e Raffaella; le prime avranno una borsa a tracolla, Raffaella porta un piccolo tappeto arrotolato tra le braccia ed un nastro ornamentale al collo, con un medaglione)

Raffaella               (posando il tappeto a terra) N’ata vota cca’ Giosue’? Ma quanti vote t’amma dicere che chisto è ‘o posto nuosto? Vavattenne!

Silvana                 Brutto scemo! Nun te vulimmo cca’!

Viola                    Brutto viecchio! Sciò, sciò! (si siede, prende una bambola dalla sua borsa e la mette su un sasso, sistemandola) Ecco cca’, pure Mariella mo’ fa’ ‘o mercato!

Agata                   Pecchè nun te ne vai ‘a piazza Seplasia, aro’ stanno ‘e verdummari?

Giosuè                 (facendo spazio) E lassateme sta’! I’ voglio vennere cca’… e nun facite tutta chest’ammuina annanze a chisto sant’ommo!

Simmaco              Ma che d’ è ‘st’ammuina? Cu’ ‘na piazza accussi’ grossa nun ve truvate?

Raffaella               E chillo se mette justo ‘mmiezo!

Simmaco              Ma ve da’ fastidio uno che venne frutta? Mettiteve ‘nzieme, accussi’ chi vene a accatta’ ‘a frutta magari se accatta pure coccosa ‘a vuje… e po’ è arrivato primma isso!


Primo tempo - Scena Seconda

(I mercanti si sistemano i loro posti; nel frattempo entrano da destra Vittorio e Marianna, a braccetto)

Vittorio                 (a Marianna) Ma quanto è maestoso ‘a chesta parte! Ce l’aggia proprio dicere ‘o Re!

Marianna              E’ overo! E’ ‘nu peccato ca se perde chesta bellezza…

Vittorio                 E chi sape quanti cose ce stanno ancora ‘a chesti parti… ah! Bellommo!

Simmaco              Dicite pe’ caso a me?

Vittorio                 Sì, a vuje! Ma… stongo cca’, pecchè nun ve aizate, parlanne cu’ me?

Simmaco              Sì… scusate, songo ‘nu poco zuoppo!

Marianna              Uh, che impressione…

Simmaco              Signo’, io so’ ‘nu poco zuoppo ma nun so’ surdo! Ma dicite, vulite coccosa?

Vittorio                 Beh… ce simmo fatti ‘na passiggiata cu’… cierti amici… pe’ vede’ l’Anfiteatro… è bello! E vulevo sape’ si ce sta qualche altra cosa da vede’, int’ ‘a zona… si pure vuoi ce site ghiuto  (riceve una gomitata da Marianna) oh, scusate… cocche fattariello sfiziuso… sapite… (parla sottovoce) ce sta pure ‘o Re Ferdinando ca sta verenne ‘a parte ‘e dinto… se putesse diverti’ ‘nu poco e po’ essere che ce torna a veni’…

Giosuè                 (che ha origliato) E’ ‘na bella cosa … venesse tutt’ ‘e juorni ‘o Re!

Marianna              E te pareva! Vitto’, ‘e izato troppo ‘a voce! Mò ‘o sanno tutti quanti! Va buo’…allora che ce putite dicere?

Simmaco              Eh, signo’, io ne saccio, ‘e cunti! Cca’ songo comme a ‘nu pate pe’ chisti amici miei… ‘o verite, nun songo tanto viecchio… però p’ ‘o fatto ca stongo sempe cca’, stanne tutte a addimanna’ a me, e me ne contano, ‘e fattarielle! Quann’ è vierno, cca’ fore nun se po’ sta… allora ce ne jammo dint’ ‘o casone ‘e coccheduno, s’appiccia ‘o fuoco e mentre ca aspettammo ‘o mercato, se contano ‘e fatti viecchi, ‘e tanto tiempo fa…

Agata                   Sì, sì… ogni tanto, mentre aspettammo, facimmo pure ‘o triato… e spesso cagnammo pure ‘e storie, e ce mettimmo piezzi nuovi, a comme ce vene! Che saccio… l’Annunciazione, o facimmo ‘e pasturi ‘ncopp’ ‘o presebbio…

Marianna              Che bella cosa! E… se putesse fa’ cocche cosa, pe ce fa’ vede’… mò? Pe’ farlo vede’ ‘o Re!

Simmaco              Signo’… è difficile! ‘A gente è venuta cca’ pe’ vennere…

Silvana                 Ce ‘amma guaragna’ ‘a jurnata!

Vittorio                 E… si ‘o Re ve facesse ‘nu bello regalo?

Simmaco              Se putesse fa’! (agli altri) E’ overo?

Giosuè                 Sì, sì, facimmo, facimmo!

Raffaella               Tanto pe’ mo’ nun vene nisciuno…!

Silvana                 E pure si vene ‘a gente ‘o mercato pe’ fatti suoi… s’ammiscano cu’ ‘e nuosti! Chi sa che ne vene fore!

Viola                    (va davanti a Vittorio protendendo la bambola) Pure Mariella fa ‘a parta soia!

Vittorio                 Allora è deciso! Vaco a chiamma’ ‘o Re! Marianna, aspiettame cca’… e fa’ pripara’ tutte cose…! (esce di corsa)

Marianna              Ue’, ‘ate sentuto? Allora che state aspettanne…? Vulesseve che vene addirittura ‘o Re… e vuje nun site pronti?

Giosuè                 E quale facimmo?

Agata                   ‘A storia d’ ‘e Nucelle!

Silvana                 No, è scema… facimmo chella d’ ‘a Matalena!

Raffaella               Ce vo’ troppa gente… facimmo ‘a storia ‘e San Simmaco!

Giosuè                 Però è longa…

Simmaco              Basta! ‘Ave ragione Raffaella… è ‘a meglio, e ‘o Re l’amma fa vede’ ‘a cchiù bella ca sapimmo fa’… (sottovoce) chillo caccia ‘e sorde! Appriparateve!

Marianna              Nun ve preoccupate p’ ‘o tiempo e p’ ‘e sordi… facite ‘na cosa bella… ‘o Re sape a isso e ve’ vo’ bene!

Simmaco              Allora, pigliàte posto! Chi porta ‘o mantesino, ca s’ ‘o levasse! Chillo scemo ‘e Roberto, addo’ sta’?

Roberto                (entra di corsa con la bottiglia) M’aggio magnate tutte quante! E quante ce ne stevano!

Simmaco              Allora, sienteme buono… oggi facimmo ‘a storia ‘e San Simmaco, l’amma fa’ vede’ ‘o Re che sta arrivanne! Tu faje ‘o discepolo mio!

Roberto                Comm’ ‘o solito…!

Silvana                 E recitammo pure io e Violettella mia!

Simmaco              Tutti comm’ ‘o solito… appriparateve… e aizateve tutti quanti, ca vene ‘o Re!

Viola                    Io stongo già aizata!

Raffaella               ‘E musicanti! Nun ce stanno ‘e musicanti!

Simmaco              Robe’, spiezzate ‘e cosce… curri a chiamma’ chilli sciemi… sicuro stanno int’ ‘a piazza, senza fa’ niente!

Roberto                Vaco! (esce e per poco non si scontra con il corteo Reale, preceduto da Vittorio)


Primo tempo - Scena Terza

Vittorio                 Accomodatevi, Maestà!

Ferdinando            (entra con sussieguo, con altri due dignitari; tutti i mercanti fanno profondi inchini) Amati sudditi! Ma che d’ è ‘sta storia? Io tengo ‘e sudditi mercanti che sanno pure fa’ ‘o triato? E se fa int’ ‘o mercato? Bravi… si me facite vede’ ‘na bella cosa, ‘o Re vuosto nun ve fa perdere ‘a jurnata… ma addo’ sta ‘o triato?

Simmaco              Maistà, benvenuto! Aggiate pacienza sì nun me soso, ma io songo ‘nu poco zuppariello… nun ce serve ‘o triato, Maestà… ‘o facimmo cca’!

Ferdinando            Ah! E io addo’ m’assetto?

Vittorio                 Ve porto subbeto ‘a seggia, Maistà! (sottrae la sedia a Giosuè, che accenna una protesta, e la porta in vicinanza del Re, comunque vicino alle quinte)

Ferdinando            Ahhh! (si siede) E che ce facite vede’?

Simmaco              ‘A storia ‘e San Simmaco, Maistà…, ‘sta storia ‘a facimmo cca’ pecchè a chilli tiempi se faceva tutto dint’ ‘o mercato… nuie simmo moderni e cierti cose manco c’ ‘e ricurdammo… chi nun era ricco teneva a stiento ‘o sacco ‘e vegetale dint’ ‘a ‘na stanzulella senza porte… se parla ‘e mille e treciento anni fa! Chisto è ‘nu viecchio cunto ca facevano pure ‘e pati nuosti, che abbia ‘a quanne Simmaco nun era ancora cristiano, era cecato e faceva l’induvino… comme faccio io… po’, c’ ‘o tiempo, chi ci ‘a miso ‘na cosa, chi ce ne ‘a miso n’ata… San Simmaco ‘o faccio io… ognuno ‘e ll’ati fa a uno c’ ‘o stesso mestiere… ‘e nommi viecchi se so’ perzi… perciò ausammo direttamente ‘e nommi nuosti… è rimasto sulo ‘o nomme d’ ‘a schiava Sebiba.

Roberto                (rientrando di corsa, si inchina frettolosamente) Io songo ‘o guaglione d’ ‘o cecato,  Maistà! ‘E musicanti stanno venenne!

Ferdinando            Ah, ce sta pure ‘a musica? Bravi, bravi…

Raffaella               Maistà, io faccio ‘a… curtigiana! Songo io Sebiba!

Agata                   Io vengo ‘e profumi e songo ‘na strega!

Giosuè                 E io vengo ‘a frutta!!

Silvana                 Maistà, io faccio l’orafa, e chesta guagliuncella è ‘a figlia mia!

Viola                    Pe’ servirvi, Maistà! ‘O sapite, Maistà, recita pure ‘a bambulella mia!

Simmaco              Allora… nun aggio sentuto a Valerio! Ce manca Valerio!

Roberto                Sta venenne! L’aggio ‘ncuntrato p’ ‘a via, e l’aggio ditto tutte cose! Vene vestuto!

Simmaco              Ah, si, pe’ isso ce vo’ ‘a tunica ‘e senatore… (a Roberto, che poi esce) E tu che fai cca’? Jesci a piglia’ ‘e cevuze! Allora ancumminciammo, Maistà!


Primo tempo - Scena Quarta

(entrano i musici; dopo aver fatto inchini silenziosi al Re, si mettono dietro a Raffaella; sullo sfondo dei figuranti in costume nobiliare attraversano il fondo della scena conversando tra loro, poi escono; Simmaco non si muove dal suo posto; i mercanti si ritirano un poco indietro poi si portano al proscenio nello stesso ordine di prima; Giosuè si sistema al centro)

Raffaella               Insomma, Giosuè, te vulissi spustà ‘nu poco? (sistema il tappeto a terra) ‘O viri che nun ce sta posto p’ ‘e musicanti?

Agata                   E chillo fa sempe chesto!

Silvana                 Ma che te pienzi? Ca ‘o mercato è ‘o tuojo?

Viola                    Brutto viecchio! (sistema la bambola su un masso) Vavattenne!

Raffaella               Overamente, Giosuè! Vavattenne all’ata porta!

Giosuè                 Sì, me ne vaco… no pecchè m’ ‘o dici tu, ma pecchè ‘anna vede’ primma ‘a robba mia… ce vonno cinchemila sesterzi p’accatta’ chesta squisitezza! ‘O dio Mitra m’adda aiuta’ a vennere tutte cose…! E po’ venessero pure addo’ te… si teneno ancora sorde…

Raffaella               Hi! E ca te pienzi che so’, pe’ chi tene ‘e sorde? Io oggi sa‘ quanti balletti voglio vennere? E ogni ballo ca faccio io, costa duimila sesterzi!

Agata                   E’ quasi ‘o tiempo d’ ‘e Misteri, pure io tengo assai profumi… e cocche ‘ata cusarella ‘a vennere… Giosuè, vengo pur’io cu’ te!

Silvana                 (sedendosi) Io nun ce tengo proprio! Io e Velia rimmanimmo cu’ Sebiba… la’ è troppo apierto, ce stanno troppi mariuoli…

Viola                    Sì! Accussì pozzo pazzià cu’ Mariella!

Simmaco              Silvana, oggi puorti tanto oro cu’ te?

Silvana                 No, no… tutti vonno l’argiento, so’ pochi chilli che s’accattano l’oro… però tengo assai cullane!

Viola                    (girandosi verso di lui) Uh, e pecchè ‘o vuo’ sape’? Te vulisse accatta’ cocche cosa p’ ‘o servo tuoio?

Agata                   Allora io vaco! Giosuè, jammuncenne…

Giosuè                 Quanne aggio vennuto tutte cose, m’accatto ‘nu bello profumo! (mentre escono a destra) O vulisse invece ‘na jurnata ‘e fatica…?

Simmaco              Ohe’, tu che vinni ‘e balletti… nun m’arricordo bona ‘a voce toia… comme te chiammi…

Raffaella               Io so’ Sebiba, so’ ‘a schiava ‘e Levorino, aieri nun so’ venuta, forze c’è stata Fatima, ‘o posto mio.

Simmaco              Si’ è overo… e oggi ce stai tu… sempe sola sola? Ma pecchè nun te ne fui?

Raffaella               E addo’ vaco? M’ ‘a promiso che forse mi fa liberta… si ogni juorno le porto… e aieri a te comm’ è ghiuta?

Simmaco              Nun ne parlammo. Spero che coccheduno almeno oggi me fa addimanna’ cocche cosa a quacche dio d’ ‘o suoio… aieri nun aggio abbuscato niente, tengo ‘a panza chiena sulo d’acqua!

Viola                    Allora si’ ancora puveriello! Nun te puo’ accatta’ niente manco oggi!

Silvana                 Mannaggia, Agata se n’ è ghiuta! Chi sa, forze te puteva da’ ‘nu filtro d’ ‘e suoi… a me n’ ‘a dato uno aieri che ha funzionato proprio buono!

Simmaco              Silva’… ma ‘e avuto bisogno ‘e ‘nu filtro magico pe’ fa’ turna’ l’omme tuoio addo’ te?

Silvana                 Ca te pozzano appennere! Comm’ è fatto? Io nun l’aggio ditto a nisciuno…

Raffaella               E chillo è induvino… fa ‘o mestiere suoio… ohe’, Simmaco! Nun te permettere ‘e dicere ‘e fatti miei, ‘e capito…? Zitti… finalmente se vere coccheduno!


Primo tempo - Scena Quinta

(Entrano alcuni figuranti -popolani e nobiliari- che daranno vita al mercato, sistemandosi o camminando sul palco e commentando le mercanzie o meravigliandosi della recita in corso; mentre Raffaella recita, accennando una danza con gesti lenti, i musici cominciano una musica di sottofondo; la danza non dovrà avere valenza maggiore della recitazione, ma comunque evocare il più possibile un’offerta che va oltre la semplice esibizione. Per evidenziare la situazione, durante il canto, Raffaella si toglie il soprabito, affidandolo a Viola, fino a rimanere con una tunica bianca.)

Raffaella               Venite popolo, venite amici miei,

                          sulo ‘nu ballo, senza timidezza,

                          vicino a me ve faccio senti’ dei,

                          io ve ‘mbriaco co’ la mia bellezza!

                          Cca’ nun ce sta nisciuno ca m’ è pari,

                          guardate com’è janca chesta pelle,

                          io songo figlia ‘o re d’ ‘e sette mari,

                          mò faccio ‘a schiava, ma songo sempre bella!

                          Sentite che profumo ‘sti capilli,

                          ma nun guardate troppo st’uocchi niri!

(rivolgendosi al Re ed ai dignitari, che restano imbarazzati)

                          Si, dico a te, te chiuri int’ ‘o mastrillo,

                          e si te ‘ncoccia mugliereta, t’accire!

                          N’aggio sentuto ‘e viento, int’ ‘o deserto;

                          pur’isso m’ ‘a vuluto accarezzare,

                          ma quann’ ‘a fernuto, state certi,

                          ‘o regaluccio m’ ‘a duvuto fare!

                          ‘A Madre Terra e Diana Tifatina

                          me fanno fatica’ ogni mumento;

                          Forza, venite, Sebiba ‘a ballerina

                          ve da’ sultanto gioie senza turmienti!

Te vuo’ accatta’ ‘sta musica, ‘stu canto,

e chisto ballo d’accumpagnamento?

Te faccio ‘o ballo, annanze a te sultanto,

si tiene pressa, pure ‘nu mumento!

 (rivolgendosi al Re con fare provocatorio)

E chesta brutta veste ca tu viri

nun è chella che uso dint’ ‘a casa;

tengo coccosa ‘e meglio pe’ vestire,

si t’ ‘o faccio vede’…, te prore ‘o naso!

(il Re si alza a metà sulla sedia, ma viene trattenuto dai dignitari)

Jammo, fa’ ampressa, ‘a casa è cca’ vicina,

jammo e venimmo, ca nisciuno vede!

Te faccio vevere ‘nu bicchiere ‘e vino

accussì doce ca nun ce se crede!

                          Venite popolo, venite amici miei,

                          venite annanzi, che aspettate ancora?

                          Sto’ cca’ pe’ tutti, nobili e plebei,

e chi nun vene, vaca alla mal’ora!

(Raffaella conclude rimanendo in piedi, a braccia levate; Viola le rende il soprabito e la bacia; applausi solo dai figuranti nobiliari; il Re applaude in piedi)

Viola                    Ma comme sì brava! Sebiba, ‘o sai… pur’io me so’ ‘mparata ‘sta canzone… ‘a saccio tutta quanta! Ancora ‘nu poco e po’… ‘a canto pur’io!


Primo tempo - Scena Sesta

(entrano Giosuè ed Agata)

Giosuè                 (a Raffaella) Tu m’ è mannato ‘na seccia! Nisciuno ca se fermasse, manco a addimanna’! Nisciuno che accatta! Tutti corrono cca’… ma me vulissi fa’ muri’ ‘e famme?

Agata                   E’ overo, Sebiba! Vicino ‘a Porta Tifatina nisciuno ca se ferma, veneno tutti quanti cca’, forse vanno truvanne a te…

Raffaella               (rimettendosi il soprabito) Io nun aggio fatto niente per levarti ‘e clienti, servo ‘e Mitra!

Viola                    E’ vero! Forze è stata Mariella a chiammarli a tutti quanti! (si china a giocare con la bambola)

Valerio                 (staccandosi dai figuranti) Ohe’, ballerina! Quanto vuo’ pe’ canta’ ‘a casa mia?

Raffaella               Cca’ costa duimila sesterzi, si po’ vuo’ che ballo sola cu’ te…ce ne vonno diecimila!

Ferdinando            (immedesimandosi nella veste di potenziale cliente) ‘A faccia mia! E nun te pare ‘nu poco assaje? (girandosi verso i dignitari) Neh, quanti ducati fossero, oggi?

(i mercanti commentano tra di loro la spropositata entità della richiesta; i dignitari fanno silenziosamente confusi calcoli, consigliano il silenzio al Re e lo fanno accomodare)

Valerio                 (occhiataccia verso il Re) Io invece te ne dongo vintimila! Voglio vede’ che sai fa’! Però… metà ‘a vota! (girandosi verso un ragazzo che lo ha seguito) Giacinto! Vamme a piglia’ ‘na burzetella cu’ cento aurei! (Giacinto esce)

Giosuè                 (avvicinandosi) Padrone bello, accattate coccosa! Guarda che bella mela… chesta è ‘na rarità… tanto zuccarosa ca nun ce vo’ ‘o mele!

Silvana                 (avvicinandosi) Zitto, tu! Forze chisto bello signore vulesse riala’ n’aniello o duoje sciaquaglielle ‘a ballerina? Tengo l’oro e l’argiento!

Agata                   (avvicinandosi) Padrone mio, io te pozzo vennere ‘e filtri magici… levano ‘o maluocchio e ‘a ‘mmiria!

Valerio                 Jatevenne! Basta, ‘ate capito? Tu… comme te chiammi… mò ca torna, va’ c’ ‘o servo ‘a casa mia e canta pe’ muglierema… chella puverella sta sempe malata, cantale… coccosa ‘e sacro, ‘e capito? So’ sicuro che le fa piacere… Tu ce criri a Giove? Chi è ‘o dio tuoio?

Raffaella               ‘O Dio mio… nun tene nomme. Ma tene ‘nu Figlio, pure Isso è Dio… ma io nun so’ degna manco ‘e annummenarlo…

Valerio                 Ah, ma allora si’ adoratrice ‘e chillo dio nuosto… Ignotus. Nun sapevo ca teneva ‘nu figlio, ma nun fa niente! Famme ‘nu canto pe’ chisto dio… però… nun saccio addo’ tene ‘o tempio… nun è ca se ‘nquarta, si’ canti senza fa’ ‘nu sacrificio? Io manco l’aggio fatto mai niente… Apollo, Marte, Giove… ma pe’ ll’ati nun tenco tiempo… e nun vulesse che me se vota contro…

Viola                    (tirandola per il vestito) Mammà, chisto è ‘o mumento!

Agata                   (avvicinandosi a Valerio) Signore mio, tengo ‘nu filtro magico pe’ proteggere a te e ‘a famiglia toja…

Valerio                 Ma vavattenne, voglio sta’ quieto… Induvino!

Simmaco              Dici, signo’…

Valerio                 Tu ‘o sai si Ignotus se ‘nquarta? Che veri int’ ‘o futuro?

Simmaco              Caro padrone mio, l’uocchi miei so’ chiusi pe’ sempe, ma veco cose ca tu nun vidi… tu nun distingui ‘nu dio da n’ato, pe’ te so’ tutti ‘e stessi… me pare che chisto dio d’ ‘a ballerina nun è uno ca cunusci… però… me sento ‘na cosa… comme si stesse ‘a chesti parti… mo’ mo’!

Valerio                 (si guarda intorno)  Ma cca’ nun ce stanno statue, nisciuno dio… fosse ‘nu spirito? Io nun voglio spiriti attuorno a me!

Viola                    Mammà, ‘e ‘ntiso… spiriti! Io me metto appaura!

Giosuè                 Spiriti? Ce stanno spiriti, ‘a chesti parti? (prima esitante, poi scappa via, lasciando la cesta a terra) Aiuto, aiutateme!

(gli altri mercanti esprimono atteggiamenti timorosi; il Re si gira intorno, spaurito)

Silvana                 (accorre da Viola) No, piccerella mia… nun ave’ paura, nun ce stanno spiriti, nun ce sta manco ‘o Mammone…

Valerio                 Tu, ca fai ‘a strega! Che tieni contro ‘e spiriti…. ‘o spirito ‘e ‘nu dio?

Agata                   Io… contro a chesti cose nisciuno po’ fa’ niente, padrone mio… io tengo ‘e filtri ‘e magia pe’ l’uommene, ma si ‘nu dio te va contro, t’ ‘o puo’ aggarba’ sulo facenne sacrifici! Io tengo cierti profumi rari… veneno d’ ‘a Libia, dall’Egitto… sì fai ‘nu sacrificio cu’ chisti, ce jesce ‘nu rito assai putente…

Valerio                 (aulico) Giove, dio d’ ‘e tuoni, padre ‘e tutt’ ‘i dei, sienti a me! Nun permettere che ‘nu figlio d’ ‘e tuoi me sia nemico, e io le faccio ‘nu sarificio… (a Raffaella, cambiando tono)  neh, ballerina, ma chisto dio tuoio che le piace?

Raffaella               ‘O Dio mio nun vo’ sacrifici ‘e animali, nun vo’ robba ‘a mangia’, nun vo’ che s’accire pe’ Isso. Le piace ‘a vita, l’ammore, è ‘o Dio d’ ‘o perdono e d’ ‘a misericordia!

Valerio                 Ah, allora nun s’ ‘a piglia cu’ me! Buono, buono… me piace! E’ ‘nu dio facile e comodo… ma addo’ l’ ‘e truvato?

Raffaella               E’ ‘na storia longa… è stato Isso che ‘a trovato a me.

Valerio                 Ma guardate ‘nu poco! ‘Na schiava fortunata… io cerco, cerco e fosse ‘na vota che truvasse coccosa!


Primo tempo - Scena Settima

Roberto                (rientra portando una ciotola sotto il braccio) Zi’ ma’… io t’ è vulevo purtà, ma chelle erano troppo bone… mentre venevo, m’aggio mangiate tutte quante…

Simmaco              Stai parlanno ‘e chelli cevuze, overo?

Roberto                Sì, masto mio… l’aggio trovate vicino ‘a sorgente! (si siede al fianco dell’Simmaco)

Simmaco              (accarezzando Roberto) Padrone mio, ‘e sentuto?Chisto vuleva poco, e quann’ ‘a truvato è rimasto cuntiento! Chi overamente vole coccosa, se muvesse…

Ferdinando            (alzandosi in piedi, poi convinto a sedersi dai dignitari) ‘A ballerina, io voglio ‘a ballerina!

Valerio                 (riprende dopo un’occhiataccia a Ferdinando) Felice… pe’ accussì poco? E che felicità è chesta?

Viola                    (a Silvana) Mammà, ma quanto me piace chillo guaglione!

Giosuè                 (rientra guardandosi intorno, ancora incerto) Io nun aggio visto niente… chi sa chisti spiriti si ce stanno ancora o no… ah! Meno male che nisciuno ‘a tuccato ‘a cesta mia! Che bellezza!

Valerio                 Pure tu si’ cuntiento? E pe’ ‘na cesta scassata?

Giosuè                 Ma qua’ scassata? Uh, scusate padro’… vulevo dicere che cca’ ce sta ‘a frutta mia, ahhh… che addore… (controlla nella cesta)

Silvana                 (avvicinandosi a Raffaella con una collana) Signo’, vulissi riala’ ‘na cullana ‘a ballerina…? Accussì fa ‘a figura soia quanne va a canta’… guarda comme le sta bella! E va bona pure si vuo’ fa ‘ ‘nu regalo a una cchiù piccerella… guarda a figliema comme le va bona… (esegue)

Raffaella               Signo’, ma che ‘amma fa? ‘O servo tuoio nun se vere… io aggia fatica’, si no stasera a chilli duje che le porto?

Valerio                 ‘O patrizio Valerio tene ‘na parola sola! Aspietta cca’, chillo scemo mo’ ‘o viri ‘e veni’, e i sordi nun c’ ‘e pierdi!

Viola                    (a Silvana che le vuole togliere la collana) No, mammà, lassamella, Mo’ me serve!

Giosuè                 (avvicinandosi a Valerio) Forze, mentre aspetta, ‘o padrone mio vulesse assaggia’ ‘nu frutto?

Valerio                 Sì azzeccuso comme ‘a ‘na mosca! Mo’ te faccio vede’ io… ! (gli strappa la cesta e la getta fuori scena)

Giosuè                 Noooo! ‘A povera robba mia…! (corre fuori scena)

Agata                   Sebiba, Silva’, vaco a da’ ‘na mano… guardatemi ‘a robba! (esce)

Viola                    Vaco pure io! Tu statte accuorta a Mariella! (indica la bambola ed esce)

Silvana                 E tu nun me perdere ‘a cullana!

Giacinto                (entrando da sinistra, con un sacchetto) Padro’, cca’ ce sta ‘a burzetella cu’ ciento aurei. Aggi pacienza, ma io nun aggio perzo tiempo, ‘a padrona se steva facenne ‘nu salasso, e aggio duvuto aspetta’ fino a che non è fernuto…

Valerio                 Dalla a chella ballerina!

Giacinto                (esegue) Va  buono, come vuo’ tu. (si va a sedere accanto a Roberto, e dopo convenevoli gestuali comincia a giocare a morra con lui)

Valerio                 Cuntatilli, là ce stanno diecimila sesterzi. L’ata mità te ‘a dongo quanno ‘e  fernuto!

Raffaella               Padro’ ma allora… io vaco mo’ mo’? E tu nun vieni pe’ senti’?

Valerio                 E me pare che ce venesse cu’ te…

Ferdinando            (si alza in piedi) Nun te prioccupa’, ce vaco io cu’ essa…!

(scena dei dignitari per calmare il Re)

Valerio                 (irritato) E me pare che ce venesse cu’ te… cu’ tutt’ ‘e sorde che t’aggio dato! Ma mo’ nun se ne parla… chella ‘nziriosa ‘e muglierema sicuro m’abbia a dicere che le fa male cca’, e po’ lla’… e chilli cerusici… ancora peggio!

Raffaella               Ma io nun pozzo sta’ senza fatica’, padrone mio… chilli me vattono!

Simmaco              Balleri’, e nun ‘a fa’ longa! Chillo te pava doje vote! Canta primma p’ ‘o padrone, accussi’ sentimmo pure nuje, e po’ canti n’ata vota ‘a casa soja…

Valerio                 E’ overo…io aggio pagato doie vote… perciò ancummincia!

Ferdinando            (solita mimica) Io te voglio ‘a Reggia! Te pavo dieci vote!


Primo tempo - Scena Ottava

Raffaella               Caro padrone, tu vuo’ senti’ ‘nu canto a ‘nu dio… sarrà diverso assaie ‘a chillo che ‘e ‘ntiso primma… a me chisto me piace overamente, ma si a te nun piacesse, ‘o pozzo cagna’! (fa un gesto ai musici) Ecco… ‘a mugliera toia le faccio senti’ chesto… (luce su di lei, penombra sul palco, si avvia la musica, mentre lei recita, senza ballare. Gli altri figuranti sospendono ogni attività, anche i nobili sul fondale)

                          Canto l’ammore ‘o Dio che m’ ‘a scegliuto,

                          l’aggio truvato senza  mai guardare.

                          ‘A meglia cosa che io aggia mai avuto,

                          e nun ce stanno mezzi a ricambiare.

                          Nascietti int’ ‘a ‘na reggia ‘ncopp’ ‘o mare.

                          Ascette ‘a guerra e addiventai ‘na schiava;

                          ‘a gente l’aggio vista trucidare;

                          ‘o juorno e ‘a notte ‘a morte camminava.

Senza cchiù niente, famiglia e l’innocenza.

Mò me ne scappo? E dove me ne vaco?

Pruvavo sulamente indifferenza,

senza speranza, campanne comme ‘mbriaca.

Cchiù de ‘na vota, vennuta e po’ marchiata.

Nisciuno me trattava cu’ rispetto,

ma ‘a capa mia nisciuno l’ha fermata;

cierti nuttate, penzavo dint’ ‘o letto:

                         

                          “Ma quale dio me po’ mai da’ n’aiuto,

io songo “cosa”, pozzo mai prega’?

Nun songo degna manco ‘e ‘nu rifiuto,

nisciuno dio cu’ me ce vo’ parla’!

Diana solare, Madre Tifatina,

o Venere e Minerva, me sentite?

I’ stongo cca’, so’ ‘a schiava ballerina,

                          stongo chiagnenne e vui nun ve muvite!”

                          ‘Nu juorno fui vennuta n’ata vota

                          e fui purtata int’ ‘a ‘na casa strana.

                          Chill’omme a ‘nu dio nuovo era devoto:

                          chisto padrone mio era cristiano.

                          La’ dento se parlava ‘e carità

e d’ ‘o significato d’ ‘o dulore.

All’intrasatta avietti ‘a libertà

e tanta bella pace dint’ ‘o core!

Essere schiava e serva ‘e chesta gente

ormai nun era cchiù l’assillo mio.

Isso scigliette, io nun facietti niente.

Me battezzai, e so’ figlia di Dio.

Chi songo io, eletta ‘a chist’Ammore,

che pe’ me pure, ha dato ‘a vita soia?

Pe me ‘a sufferto tutto, ogni dulore,

p’ammore nuosto è ghiuto annanze ‘o boia!

E Isso nun vo’ schiavi pe’ cumpagni;

Isso ce chiamma amici e ce cunsola;

che ponno fa’, chist’idoli grifagni?

Cu’ Isso io nun me sento mai cchiù sola!

‘Sto canto mio è chino ‘e lode e ammore

sulo pe’ Isso, Ammore sopra tutto!

L’anima mia magnifica ‘o Signore,

pure si ‘o corpo mio l’hanno distrutto!

(Raffaella conclude appoggiandosi su un ginocchio; tra le Nobildonne figuranti qualcuna applaude, Ferdinando prende un fazzolettino per asciugare gli occhi, imitato da qualche dama)


Primo tempo - Scena Nona

Simmaco              Padro’, ‘e capito chi è ‘o Dio d’ ‘a ballerina?

Valerio                 Si… n’aggio ‘ntiso ‘e parla’… pure cocche suddito romano ha rinnegato i nuosti viecchi dei pe’ passa’ a chisto nuovo dio… e quanne ‘o fanno, pure ‘e servi ‘anna fa’ ‘a stessa cosa.

Roberto                Ohi ma’, ma pecché all’uommene le serve ‘nu dio? Chilli nun fanno mai niente… che ce ne facimmo?

Raffaella               (rialzandosi) Padro’, allora t’ è piacuto? Pienzi che ‘a signora toia le piaciarrà?

Valerio                 Me pare ‘nu poco strano… è ancuminciato c’ ‘a tristezza, ma ‘a fine è ‘nu poco meglio!

Giosuè                 (rientra con Agata, portando la cesta) Grazie ancora, cumpagna cara… si nun ce fussi stata tu… e senza l’aiuto ‘e Mitra…! (si siedono, Giosuè verifica la cesta, Agata fa cenni di rigraziamento a Silvana, e controlla i suoi oggetti)        

Viola                    (rientra mangiando un frutto e si siede a giocare con la sua bambola)

Silvana                 (va a controllare che la collana di Viola sia al suo posto) E miettatella bona… falla vede’ e nun ‘a perdere!

Roberto                Masto Simmaco, allora, che me rispunni?

Simmaco              Nun sienti…? So’ tutti quanti cuntienti pecchè ‘e dei l’anno aiutati… e tu addimanni ancora?

Giosuè                 (urla ad un gruppo di nobili in transito sullo sfondo del palco) I’ tengo ‘e mele belle! Pere spadone, tutte ammature! Venite cca’, nun ce sta nisciuno cu’ robba comme a chesta!

Valerio                 Aggio deciso, schiava. Tu vai a canta’ chello ca m’ è fatto senti’ ‘a casa mia! Nun cagna’ niente! Giacinto!

Giacinto                (si alza e si avvicina a Valerio) Padro’, stongo cca’!

Valerio                 ‘A viri a chesta? Puortala ‘a casa mia, dicce ‘o fatto a muglierema e dopo che ‘a fernuto, le fai da’ ciento aurei. Doppo torna subito cca’!

Giacinto                Ohe, ‘ate sentuto? Jammuncenne! (attende un momento che i musici si alzino e si raggruppino e poi esce a destra, seguito da loro e da Raffaella)

Agata                   (vede avvicinarsi un gruppetto di figuranti e mostra la sua mercanzia. Nessuno si avvicina a Silvana o Giosuè) Venite cca’… vengo ‘e filtri ‘e magia e cierti profummi speciali…!

Silvana                 Vaco pur’ io… chi ‘o sape, forze a chella signora le serve ‘na cullana nova… (si alza e segue il gruppo) Viola, jammo!

Viola                    (si alza e segue la madre in silenzio, assorta nel gioco)

Giosuè                 E io chest’occasione nun ‘a perdo! Cca’ nisciuno accatta niente… (si alza e segue il gruppo) 

Ferdinando            (solita mimica) Stanno jenne la’ tutti quanti! Mo ce vaco pure io!

Valerio                 (irritato verso Ferdinando) Tu…, induvino! Vogli che me fai ‘na predizione! A muglierema chisto canto le piaciarrà? Statte accuorto a chello che dici, si sbagli, sì muorto!

Simmaco              Padrone mio, io nun me metto appaura, mo’ te dico chello che succere… a mugliereta le farà piacere, ma nun comme pienzi tu. Le piacerà cchiù assai!

Valerio                 Comme te permetti, maleritto servo? Tu stai dicenne che lieggi chello che stongo pensanne int’ ‘o core mio! Nun ce pruva’!

Simmaco              Padro’, nun te ‘nquarta’. Io aggio sulo risposto ‘a dumanda toia… mò viri tu… quanne torna ‘o servo tuoio t’ ‘o fai dicere…

Valerio                 E si a muglierema nun l’ è piaciuto?

Simmaco              Io nun so’ nisciuno e nun pozzo dicere comme t’ ‘e cumpurta’. Si l’è piaciuto, allora famme da’ ‘nu paniello ‘e pane… e si nun l’ è piaciuto, pigliatella c’ ‘a lengua mia!

Roberto                Ohi masto mio, ma te siente buono?

Simmaco              (accarezza Roberto) Ancora nun tiene fiducia a chello che faccio, Roberto?

Valerio                 ‘Nu paniello ‘e pane? Induvino, ‘a felicità toia costa poco!

Simmaco              ‘A felicità mia sta proprio int’ ‘a chillo piezzo ‘e pane, ca farrà campa’ pe’ cocche juorno tranquillo a me e ‘o discepolo mio. Nun me serve niente cchiù.


Primo tempo - Scena Decima

Giacinto                (entra spedito) Padro’ io stonco cca’! So’ turnato subbeto subbeto, appena chella ‘a  fernuto!

Valerio                 (guardando significamente Simmaco) E muglierema… che ‘a ditto?

Giacinto                Io nun so’ stato a senti’ tutte cose, ma mugliereta l’ha ditto ‘e ancumincia’ d’ ‘o capo!

Roberto                (esulta) Le è piaciuto!

Valerio                 (a Giacinto) Allora le è piaciuto?

Giacinto                Padro’, mentre ascevo aggio sentuto che n’ha cacciato pure ‘e cerusici… forze le vulevano fa’ n’ato salasso!

Valerio                 Induvi’, te si’ guaragnato ‘o piezzo ‘e pane!

Simmaco              Grazie a signuria!

Roberto                (danza e manifesta gioia)  Se magna, se magna!

Valerio                 Giacinto, va’ ‘o bancariello d’ ‘o pane e piglia ‘nu bello piezzo ‘e pane, si è ‘nu tortano cu’ doje ova, è meglio… poi dallo all’Induvino… quanto costa ‘o pane?

Giacinto                Uno accussì, quatto o cinche serterzi, padro’!

Ferdinando            Ohe’, purtateme coccosa pure a me, m’ è venuta famme!

Valerio                 (irritato con Ferdinando; fruga in una borsa e dà il denaro a Giacinto) Cca’ ce ne stanno cinche… Induvino… ‘a felicità toja costa overamente poco!

Roberto                Giaci’, aspetta! Zi’ ma’, mò nun te serve niente, overo? Pozzo i’ cu’ isso?

Simmaco              Vai, ma fa’ ‘a perzona onesta… nun t’arrubba’ niente!

Roberto                Grazie, masto bello! (a Giacinto) Jammo, che aspietti? (escono)

Agata                   (si avvicina a Valerio) Padro’, a mugliereta sicuro che le fa piacere ‘nu bello filtro d’ammore… o vulissi ‘na cullana ‘e sciuri profumati?

Valerio                 E lassame sta, nun voglio niente! Induvino… comm’ è fatto a sape’? ‘E fatto cocche magia o ‘e dimannato ‘o dio tuoio?

Simmaco              No, padro’, niente magia, nisciuna invocazione… io nun pozzo prega’ a nisciuno, nu tengo sordi p’ ‘o sacrificio… tutti ‘e dei vonno coccosa e io nun tengo niente. Quanne coccheduno vene addo’ me pe’ n’oracolo, porta isso stesso chello che ce vo’. Ma aggio capito che a mugliereta le piaceva assai!

Valerio                 Però… chillo dio d’ ‘a ballerina… pare che nun va truvanne animali…

Simmaco              Padro’, hai ragione, pure a me me pare accussì… voglio addimanna’ meglio quanne …

Raffaella               (rientra con i musici, che riprendono i precedenti posti; riceve i complimenti dei figuranti; si ferma vicino al Re e gli sorride, destando un forte coinvolgimento in Ferdinando; dopo ritorna al suo posto e stende di nuovo il tappeto a terra) Padrone, mugliereta l’ è piaciuto assai chello che l’aggio fatto senti’… m’ ‘a fatto fa’ tre vote… l’ è passato ‘o male ‘e capa, s’ è misa n’copp’ ‘o triclinio e… s’è addurmuta!

Valerio                 E comm’ ‘e fatto? Chella è ‘na fetula… vacce ancora, io te dongo tutto chello che vuoi… ah, no! Po’ tu l’essa da’ ‘o padrone… io te voglio accatta’! Tu adda sta’ dint’ ‘o palazzo mio e canta’ pe’ muglierema d’ ‘a matina ‘a sera! Chi è ‘o padrone tuoio?

Raffaella               Io me chiammo Sebiba Kahina, so’ schiava d’ ‘o senatore Levorino… e d’ ‘a mugliera soia.

Valerio                 Conosco a Levorino…

Ferdinando            (infervorandosi) Chillo ‘o cunosco pure io! E’ ‘nu nfame, isso e ‘a mugliera! Chillo nun dà niente a nisciuno, manco a chi fatica pe’ isso! Povera guagliona! (i dignitari obiettano l’incongruenza temporale, a mezza voce)

Valerio                 (riprendendo) Levorino… nun me po’ dicere che no! Da mò, fai cunto che sì proprietà ‘e muglierema, ‘e capito?

Raffaella               Sì, padro’ mio… ma io aggio bisogno pure d’ ‘a musica…

Valerio                 Nun stongo a guarda’ ‘e sordi! M’accatto pure ‘e musicanti, ma tu ‘e cura’ a muglierema! Ma… chisti canti… ne tieni paricchi, o no?

Raffaella               Io… sì, padro’… se po’ fa’… tu vuo’ dicere comme chillo ca ‘e sentuto… aggio capito buono?

Valerio                 Sì, voglio sulo canti sacri, sulo chilli vanno buoni pe’ essa… ‘e tieni pronti o l’ è fa’ ancora?

Raffaella               Cierti songo già pronti… sicome nisciuno ‘e vuleva, erano cose che facevo sulo pe’ me… cierti nuttate sulitarie, quanne nun tieni suonno… traseno cierti cose dint’ ‘o core… e senza sape’ comme, jesce ‘o canto…

Valerio                 Allora cantamenne n’ato, mò mò!

Simmaco              Pure io vulesse sentere… Sebiba.

Ferdinando            (si fa più avanti con la sedia)

Raffaella               Padro’, io mò canto, però… fosse meglio addo’ nun sente troppa gente… e nun ce l’aggio cu’ te, Simmaco…

Valerio                 Ma allora ce sta coccosa ‘e periculoso? E chi s’essa mettere appaura d’ ‘e parole toie?

Ferdinando            (si porta più indietro con la sedia)

Simmaco              Padro’, te risponno io… ‘e parole ‘e ‘na femmena, e pure schiava, sicuro ca nun toccano a te o ‘a famiglia toia, ma ponno da’ fastidio a chi nun le piace chisto nuovo dio… gente gelosa assai… putissi pure perdere ‘a serva nova!


Primo tempo - Scena Undicesima

Agata                   Padro’, sienteme… ‘nu filtro magico po’ aiuta’ ‘a schiava toia! Leva ‘a ‘nanze maluocchi e fatture a essa e a te!

Giosuè                 (entra con Silvana e Viola) Agata… ‘e fatto ‘na fesseria a nun veni’ cu’ nuie! ‘O dio Mitra ce ‘a mannato l’abbondanza! E’ overo, Silva’?

Silvana                 Aggio vennuto tutte cose, e me so’ accattata cierti piezzi belli pe’ niente!

Viola                    E pure io ce so’ ghiuta bona! M’anno rialato ‘nu soricillo p’ ‘a bambula mia! (mostra un sacchetto di tela)

Ferdinando            E chesti schifezze se venneno int’ ‘o Regno mio?

Simmaco              (staccandosi un momento dalla recitazione secondaria) E dalli… Maistà, nuie stammo recitanne! ‘A storia è vecchia cchiù ‘e mille e treciento anni fa… vuie nun ce steveve ancora… si ve sta piacenne, fino a mò, facitece ghi’ annanze!

Valerio                 E stateve zitto, si no nun ce capimmo cchiù niente… Maistà!

Ferdinando            (mette le dita in croce sulla bocca)

Agata                   (riprendendo) Giosuè, addo’ è succieso ‘stu fatto?

Giosuè                 ‘O Mitreo, cca’ addereto… ascevano cierti fedeli, robba ‘e lusso… se so’ accattati tutt’ ‘a robba mia, e pure chella ‘ncopp’ ‘all’ alberi…! Aggio fatto ‘nu sacco ‘e sorde! Mò pozzo vevere e magna’, voglio… terre… schiavi, cani e cavalli… Mitra m’ ‘a mannato l’abbondanza! Tu, schiava, fammi ‘nu canto!

Valerio                 Comme te permitti? Io…

Raffaella               (interrompendo) Padro’, aspetta… ce parlo io cu’ chisto, tu nun te ce mettere! Giosuè, adoratore ‘e Mitra… io nun canto pe’ te e manco p’ ‘o dio tuoio!

Giosuè                 Ma io te pavo bona! Tengo tutti ‘e sesterzi che voglio! Te pavo overamente!

Raffaella               Ma io nun voglio canta’ per te. Nun canto per Mitra, o pe’ Pan o pe’ Giove! Nun songo ‘a serva toia, e ‘e sorde tuoi nun me servono! Chi me cumanna vo’ che io canto ‘o Dio mio, e pure io voglio canta’ sulo a Isso!

Giosuè                 Tu si’ ‘na schiava… chi t’ ‘a dà tanta autorità? Guarda che io porto ‘a spia… ce dico ‘o padrone tuoio che nun fatichi…

Simmaco              Giosuè, sì tu che stai parlanne, overo? Statte zitto, sì scemo? ‘E parole volano… si te sente ‘o padrone, putissi passa’ ‘nu guaio…!

Valerio                 (sarcastico) E’ tardi, Induvino… ‘o padrone ‘a già sentuto tutte cose!

Giosuè                 (impaurito) Ah, ma sì tu ‘o padrone suoio? Aggi pacienza, scusa… i’ nun ‘o sapevo…

Roberto                (entra precedendo Giacinto che porta un sacco) Zi ma’, sta arrivanne ‘a pagnotta! ‘A signora ‘a ‘ntiso ‘o fatto, e m’ ‘a rialato ‘na pagnuttella… dice si le può fa’ ‘n invocazione a Mercurio pe’ farla guaragna’ cchiù assai… e visto che te truovi, pure a Esculapio, pe’ farla sta’ bona! (si siede a fianco all’Simmaco)

Giacinto                (a Valerio) Padro’, chello che vulivi è stato fatto! (porge il sacco a Roberto, che lo fa tastare a Simmaco e poi lo mette da parte)

Valerio                 Chesto va buono. Ma mò voglio sape’ che sta facenne ‘a mugliera mia! Curri ‘a casa e torna c’ ‘e scelle ‘e Mercurio!

Giacinto                Sarrà fatto, padrone mio! (esce a destra)

Viola                    (a Roberto) Ohe, guaglio’! Vuo’ fa’ ‘o papà d’ ‘a bambola mia?


Primo tempo - Scena Dodicesima

Raffaella               Musicanti, forza! (si avvia la musica)

‘Nu sentimento nuovo dint’ ‘o core,

nun saccio comme, aggia spiega’ ‘o padrone!

I’ voglio canta’ tutto chist’ammore

ca nun sapevo, e ca mò invece “sono”!

Io stessa songo ammore, finalmente!

E sulo Dio me sento pe’ padrone!

Vaco vulanne leggia ‘mmiez’ ‘a gente,

e chest’ è sul’ ‘a primma ‘e ll’emozioni!

 

‘Nu juorno aggio sentuto ‘sti parole,

ca mai nisciuno aveva ditto primma;

parole assai lucenti, comme ‘o Sole,

bone pe’ tutti, comme simmo simmo!

Beato chi se sape accuntentare,

e d’ ‘e sesterzi nun sarrà guastato.

Beato chi nun vive per magnare,

pecchè d’ ‘o Papà mio sarrà saziato.

Beato chi pe’ me soffre int’ ‘o core,

pecchè Dio Padre ‘o cunsolerà

Beato chi mò sta dint’ ‘o dulore,

pecchè ‘nt’all’ato munno riderà!

Ma guai si tieni sordi dint’ ‘a sacca

e ‘o frato tuoio nun tene che magna’!

Ma guai chi penza sulo a ‘ngrassa’ ‘a vacca,

‘nu juorno ‘sta ricchezza perderà!

Tu benerici a chi te porta male,

a chi te vatte, tu l’ è ringrazia’.

Si sì trattato peggio ‘e ll’animale,

sta’ zitto e prega, Dio t’aiuterà!

Ma guai a chi te scippa pure ‘e panni,

dancelle pure, senza protesta’!

E si’ cocc’ata cosa va truvanne

nun dicere che no, falla piglia’!

Chello ca tu vulissi, dallo all’ati,

e po’ nun dumanda’ restituzione;

Iddio guarda int’ ‘o core e sape ‘e ‘ngrati,

tu penza sulo a fa’ ‘na bona azione!

Nun giudicate o cundannate ‘a gente,

vulite bene pure a chi è nemico;

chi segue ‘a legge ‘e Dio nun se ne pente

Isso è l’Ammore, in verità ve dico!

Chi nun ‘a cundannato ‘e frati suoi

e ‘a perdunato sgarri e mariulizie,

trase ‘nto Paraviso primma o poi,

e pure ‘n terra campa dint’ ‘e grazie!

Chi sente ‘sti parole e se cunverte,

sarrà d’ ‘o Pate Nuosto perdunato;

po’ sta’ sicuro, tene ‘a porta aperta,

‘a casa ‘ncopp’ ‘a roccia ‘a fravecato!

Chi ‘a ditto ‘sti parole ‘o core mio?

L’aggio creruto e manco l’aggio visto:

n’omme speciale, generato ‘a Dio,

‘o Figlio suoio divino, Gesù Cristo!

(Raffaella conclude appoggiandosi su un ginocchio; Ferdinando incita i nobili all’applauso)


Primo tempo - Scena Tredicesima

Giosuè                 Ma tu sì pazza overamente! Che stai dicenne?

Agata                   Ma comme, vai contro ‘o dio Mitra? Guarda che i cristiani fanno tutti quanti ‘na brutta fine!

Viola                    Mariella, statte accorta ‘a ballarina…!

Silvana                 Diana d’ ‘o monte Tifata, perdonale chisto grande sacrilegio! Minerva, miettele n’ata vota ‘e cerevelle ‘ncapo! Falla turna’ a te!

Valerio                 Tu allora sì contro ‘e dei ‘e Roma… ‘e dei miei?

Raffaella               Io nun songo contro a nisciuno. Io stongo cu’ Isso, l’ati nun ne voglio sape’ niente… ve piaceno? Tenitavilli vuie!

Giosuè                 Rinnegata! Mannaggia a te e ‘a gente toia!

Silvana                 Chesta setta nova… chisti fanatici… stanne cancellanne chilli belli dei nuosti… ce s’è miso pure Custantino!

Valerio                 Ma comme te permietti ‘e dicere che ‘o dio tuoio è superiore a Giove?

Raffaella               Io dico sulo che ‘o Dio mio è diverso. Isso ha sofferto, pure pe’ me. Quanne mai Giove ‘a fatto ‘na cosa ‘e cheste?

Valerio                 Allora nun capisci! Chisto dio t’ ‘a cagnato ‘a capo, ma io t’ ‘a metto a posto!

Simmaco              Padro’, fermate ‘nu poco! ‘A fine, chesta ‘a fatto chello che dicivi, ha cantato p’ ‘o Dio suoio, e allora? Falla credere chello che vo’, ‘o massimo le fai fa’ ‘nu canto ‘e gloria a Giove, accussì va tutto a posto!

Raffaella               Ma io nun ‘o faccio. Comme nun aggio vuluto primma, manco mò me metto a canta’ pe’ Giove. Te pozzo fa’ ‘nu bello canto d’ammore, sì vuo’… ma ‘e canti sacri ‘e faccio sulo a Dio!

(i mercanti esprimono meraviglia)

Agata                   Te malerico, mannaggia a te! (si alza in piedi, braccia levate e recita salmodiando in tono minaccioso)

                          Te venga ‘ncuollo ‘na sorte nera,

                          Malo chiavello te trase ‘n core,

                          ponta o curtiello primma de sera,

                          chi nega a Mitra ca oggi more! (sputa in direzione di Raffaella e si risiede)

Silvana                 (durante la maledizione si avvicina a Viola e le tappa le orecchie)

Ferdinando            Mamma d’ ‘o Carmene, aiutaci! (ai dignitari) Nun aggio mai ‘ntiso ‘na malerizione cchiù brutta! Stateve accuorti, chesta è ‘na strega overamente! (scongiuri generali)

Valerio                 (dopo aver guardato male Ferdinando, a Raffaella) Si’ cucciuta comme a ‘nu mulo! Ma ‘o sai che io pozzo pure decidere d’ ‘a vita toia?

Raffaella               E tu, padro’, ‘e sentuto buono? Tu tieni diritto ‘e vita, e io tengo diritto ‘e murì, senza tradi’ ‘o Dio mio!

Simmaco              Che stai dicenne… è mai possibile che tieni ‘na passione accussì forte?

Raffaella               Sì, Simmaco. Tu a chi cridi?

Simmaco              Io nun tengo ‘nu dio speciale. ‘O dio mio è chello pane che aggio avuto, ca me fara’ campa’ pe’ quacche jurnata. Ma ‘stu dio tuoio m’interessa… me può dicere cocche ‘ata cosa? Tu permetti, padro’?

Raffaella               Io tenesse tanto ‘a dicere… ma nun pozzo fa’ ‘nu canto mettennece tutte cose ‘e rinto… troppo lungo, chi s’ arricorda?

Valerio                 E chello che ‘e ritto non t’abbasta? Tu ‘e rinnegato ‘e dei ‘e tutt’ ‘o munno! Che ‘ato vulissi dicere?

Simmaco              Balleri’… ma tu stai dicenne overo?

Raffaella               Sì… ‘o fatto è che io manco m’arricordo tutte cose… chillo Libro che aggio letto era tanto gruosso…

(i mercanti esprimono meraviglia)

Viola                    Mamma, ‘e ‘ntiso a Sebiba?

Agata                   Chella se sta sunnanne!

Valerio                 Ma tu a chi vuo’ fa’ ridere? Tu, ‘na femmena, sapissi pure leggere?

Raffaella               Io songo figlia ‘e ‘nu Re. ‘Nu Re putente e bravo. Quann’ero piccerella m’ ‘a fatto sturia’ assai cose, e saccio leggere pure ‘o latino e ‘o greco. Dint’ a chillo Libro ce stevano tante cose, tanti fattarielli, ma erano scritti cu’ parole ‘e fuoco… sulo chi legge capisce… è comme a sta’ dint’ ‘o deserto mentre che fa ‘na bufera, c’ ‘o viento che te piglia, te sbatte, te gira comme vo’ isso… io tengo ‘na voce che è niente, sulo ‘nu suscio, nun pozzo dicere chelli cose cu’ chella forza… e me dispiace. Io nun tengo ‘a forza ‘e ferma’ ‘o male che sta attuorno a vuie… pozzo sulo sciuscia’… ‘o riesto… ce penzera’ Isso!

Simmaco              Io so’ ‘nu povero cecato che nun fa male a nisciuno… chi po’ vule’ ‘o male mio?

Raffaella               Si’ tu stesso che te fai male, si rifiuti ‘o regalo ‘e Dio.

Valerio                 Ancora cu’ ‘sta storia, schiava! Nisciuno dio regala coccosa… tutti quanti vonno sacrifici e funzioni speciali! E po’…, che fosse ‘sto regalo d’ ‘o dio tuoio?

Raffaella               ‘O dono è accettare l’ammore suoio, e ricambia’, vulenne bene a Isso e a tutt’ ‘a gente, pe’ Isso!

Giacinto                (rientra da destra)  Padro’ mio! Mugliereta, ‘a padrona mia, s’ è scetata e va truvanne ‘a ballerina…

Valerio                 ‘E sentuto? Vai, che aspietti? Invece ‘e parla’ comme a ‘na scema, va’ a fatica’, fa’ sta’ zitta a muglierema!

Raffaella               Faccio chello che vuo’ tu, padro’… guagliu’, jammuncenne! (prende il tappeto ed esce a destra con gli altri)

Valerio                 Giacinto, vai pure tu, voglio sape’ ‘a te che succere, ‘e capito?

Giacinto                (batte la mano sul petto ed esce) Aggio capito, padro’!

Giosuè                 I’ vaco a chiamma’ ‘e Pretoriani! Mitra aiutace, chesta è pericuolosa! (esce)

Silvana                 Agata, jammuncenne… si mò veneno chilli, ‘ncumenciano a dimanna’, a vule’ robba… e po’ nun pavano, chilli fetienti!

Viola                    Hai ragione mammà, pure Mariella s’ è stancata! Mariella… e fa’ ‘a brava… saluta a patete!  (moine verso Roberto)

Agata                   I’ sento cocche cosa che nun va… cierti vote sento l’addore d’ ‘e spiriti… mò ce sta ‘na cosa strana cca’… ‘nu malefizio! Jammucenne ampressa, primma ca jesceno guai… jammo a fa’ ‘o mercato all’ata porta… (escono; i figuranti clienti del mercato ed i nobili si ritirano tutti anch’essi, gradatamente)


Primo tempo - Scena Quattordicesima

Roberto                Zi’ masto… tu nun m’ è mai ‘nsignato ‘na cosa ‘e cheste! Chisto dio me piace, pare che serve a coccosa!

Simmaco              Io vulesse capi’ meglio… ce vulesse n’omme ca me liggesse chillo Libro e m’ ‘o spiegasse… ‘e femmene nun ‘essera leggere niente… chelle so’ bone sulo a canta’ o a prega’ int’ ‘o coro!

Ferdinando            Veramente so’ bone pure a cocche ‘ata cosa, zi’ ma’!

Valerio                 (irritato come sempre, usando volutamente il singolare per la prima battuta) E statte zitto… servi! Stateve zitti! Aggia penza’ ‘nu poco… tu induvino… che sai ‘e chesta religione?

Simmaco              Bello padro’, chella ‘a ditto che chi s’accuntenta sta buono… è una d’ ‘e cose che io dico sempe… chi nun è arraggiato, è cuntiento, pure si nun tene denari!

Roberto                Si, però ‘a ditto pure che s’adda vule’ bene’ ‘a gente… tutti ll’ati comme a se stessi, t’arricuorde?

Valerio                 Chesto non è overo! Nun è possibile vule’ bene a uno ca ci è nemico, a n’antipatico… tu vulissi bene a uno che t’arrobba o te piglia a paccheri?

Simmaco              Eppure chella diceva accussì… ‘e parole so’ state chiare… forze ce sta’ ‘nu spirito pe’ miezo… io sento sempe ’na presenza, nun saccio comme…

Giosuè                 (entra da sinistra) Nun ce sta nisciuno, Simmaco… aggio visto io stesso e nun aggio truvato niente!

Roberto                Ohe, Giosuè… ma tu nun te mettivi paura d’ ‘e spiriti?

Giosuè                 Me’ so’ pigliato ‘o filtro ‘e Agata, m’ ‘a fatto passa’ tutte cose!

Roberto                E pecché si’ turnato?

Giosuè                 Ma tu che vuo’? Io mò ‘essa sta’ a chiedere ‘o permesso a te pe’ chello che faccio? Fatti ‘e fatti tuoi! (sbircia nervosamente verso le quinte e si gira in ogni direzione) Chisti tribuni nun se vereno!

Valerio                 Ecco… giuvino’ tu te sentissi ‘e vule’ bene a chisto? (ironico) Si te piace ‘sta religione, l’ è fa’!

Simmaco              Cha strana duttrina… ma allora pure tu, padrone mio… ‘issa vule’ bene ‘e servi tuoi…

Giosuè                 (ritornando verso i due) Simmaco… chella schiava che canta, Sebiba… sai addo’ sta?

Roberto                E’ ghiuta ‘a porta ‘e l’Anfiteatro… s’ è fatta ll’ora d’ ‘e giochi e ce starra’ ‘nu sacco ‘e gente!

Giosuè                 Sicuro! Hai ragione… io l’aggia truva’! (esce a sinistra)

Simmaco              Roberto… pecche’ dici ‘e buscìe? ‘A ballerina nun è ghiuta là!

Roberto                Hai ragione, zi’ ma’, ma neppure io saccio pecché aggio ditto ‘sti parole.

Simmaco              Me sape che ‘e fatto buono… chillo nun me piace…

Giacinto                (entra da destra) Padrone mio! So’ succiese cos’ ‘e pazzi, ‘a casa toia! Mugliereta ha sentuto n’ata vota a chella, n’ ‘a mannato tutt’ ‘e cerusici, s’ è susuta d’ ‘o lietto e s’ è vestuta bona…

Valerio                 Io a chesta nun m’ ‘a venno cchiù! ‘A purtato ‘a pace dint’ ‘a casa mia! Faccio ‘nu sacrificio a Concordia!

Giacinto                Padro’… ‘o sacrificio a Concordia è justo, ma fosse meglio farne primma uno a Esculapio… chella ha ditto ca se sente bona… e sta ascenne! Sta jenne ‘o cenacolo cristiano!

Roberto                Zi’ ma’… tu chesto l’ivi ditto!

Simmaco              No, Roberto, quanne mai? Io aggio ditto sulo che ‘a mugliera ‘e chisto patrizio ‘o canto le faceva n’ato effetto.

Valerio                 Giacinto… servo bello mio… ‘a padrona toia con chi è ghiuta?

Giacinto                Ah, s’ ‘a pigliato doie serve, chillo ‘o cenacolo nun è luntano… ‘a schiava nova nun ce ‘a vuluto ghi’, pe’ via ca essa ‘a canosceno, e allora nun ‘a vuluto ca murmuriavano ‘a padrona.

Valerio                 ‘Sta schiava sape fa’… a Levorino le dongo chello che vo’, pe’ chesta guagliona!

Simmaco              Roberto, m’ è purta’ ‘o cenacolo! I’ sento che ce aggia i’, aggia parla’ cu’ chilli… (mentre fa per alzarsi, entra Raffaella)

Roberto                Zi’ ma’, è turnata ‘a schiava!

Simmaco              Ah, no… allora aspetta… le voglio prima addimanna’!


Primo tempo - Scena Quindicesima

Raffaella               (rientra con i musici; stende di nuovo il tappeto a terra) Padrone mio nun te ‘nquarta’. Fino a quanne Levorino nun me venne a te, io l’aggia purta’ ‘e sorde, perciò aggia fatica’ ancora… (i musici si siedono come nelle scene precedenti) Forse le putissi manna’ n’ammasciata pe’ fa’ primma …

Valerio                 Chesto è overo! Nun c’avevo penzato! Giacinto…

Simmaco              Signore mio, m’ ‘e da’ ‘o permesso ‘e fa’ ‘na domanda a chesta guagliona… pe’ me è impurtante assaje… e forze ‘a risposta serve pure a te…

Valerio                 Va buono, faccella…

Simmaco              Allora, rispunneme buono: ‘e ditto che ‘o dio tuoio ‘a sufferto pe’ te da’ ammore… ma sì è dio overamente, comme po’ suffri’?

Raffaella               Io nun songo sacerdotessa, e manco saccio tutt’ ‘a Legge… songo sulo n’umile figlia ‘e Dio. Prego ‘o Spirito Santo ca m’aiuta… me metto appaura ca si sbaglio vaco contro ‘o progetto suoio… ma aggia risponnere.

Valerio                 E allora, che rispunni?

Raffaella               Simmaco, ‘a tieni presente ‘na famiglia? Pate e mamma so’ cuntienti d’ ‘e figli, ma si ‘e figli se tagliano ‘nu dito pe’ sbaglio, provano dulore pe’ loro, pure si pate e mamma nun se so’ fatti male.  ‘A stessa cosa, forze, pe’ Dio. ‘Nu Dio ca nun è fatto ‘e preta, ma vivo e verace, perde ‘e cuntentezza si le manca l’ammore nuosto… senza perdere niente… nun ‘o saccio spiega’, è ‘nu mistero!

Valerio                 Allora tu parli ‘e ‘nu dio talmente grande e putente che po’ pure scegliere ‘e suffri’ pe’ nuie?

Raffaella               I’ nun saccio Dio quanto è gruosso. Aggio sulamente capito che è Ammore infinito… ‘a stessa cosa.

Valerio                 Hm? E se ‘o dio tuoio è accussì gruosso, comme mai nun ‘o verimmo ‘n cielo?

Raffaella               Io credo ca nun se fa’ vede’ pe’ ammore. Si ‘o veressimo, nun ce stesse bisogno ‘e credere a Isso. E’ l’unica cosa che putimmo fa’; si ‘o veressimo, nisciuno ‘e nuie putesse scegliere ‘e ave’ ‘a fede. Tu ‘o viri ‘o Re? E allora sai che si’ suddito. Ma Dio nun vo’ sudditanza, vo’ fede e amicizia!

Ferdinando            (si pavoneggia)

Simmaco              Chesto me pare ‘na cosa overa.

Valerio                 Allora chisto dio nun se fa vede’ ma è tanto gruosso, perciò… mò sta cca’?

Raffaella               Io credo che ‘o Spirito Santo mò sta cca’, vicino a me… cu’ nuie.

Simmaco              Io aggio sentuto cocche cosa… ‘na presenza… ‘a stammatina.

Roberto                Si Giosuè t’avesse sentuto, se ne fosse fiuto n’ata vota… addo’ sta chisto spirito? Io nun veco niente! E si chisto dio nun tene statue, comme se fa a fa’ ‘e cerimonie, comme se fa a farle ‘e sacrifici?

Ferdinando            (ai suoi dignitari, ad alta voce) Ma comm’erano ignuranti, chesta gente!

Valerio                 (con intenzione, rivolto a metà verso Ferdinando) E statte zitto ‘na bona vota… servo! ‘O sai ca stai danne ‘nu sacco ‘e fastirio… cu’ chesti dumande?

Raffaella               Padro’… padro’… calmate! Le risponno io, ‘o guaglione… Isso nun vo’ sacrifici ‘e animali… vo’ sulo ammore vivo int’ ‘o core, che po’ se vere ch’ ‘e bone azioni verso tutt’ ‘a gente… tutta quanta. Sentìte buono che ‘a fatto pe’ me. E l’ ‘a fatto pure pe’ vuie, nun fa niente ca non ‘o credite… ancora.


Primo tempo - Scena Sedicesima  (musica adatta)

Raffaella               Figlio dell’uomo, e quanto bene ‘e fatto!

                          Sulo ‘nu Dio d’ammore po’ fa’ chesto:

                          insieme ‘o Pate, ci ‘e riscritto ‘o Patto,

                          ‘e apierto ‘o Paraviso ‘a gente onesta!

Anema e corpo all’intrasatta, sani,

pe’ chi mureva niro d’ ‘e peccati;

pe’ sta’ cu’ nui, tu scinni dint’ ‘o pane

e pure ‘o vino l’ ‘e santificato!

Invece ‘e ammore, ‘a ‘mmiria e ‘a gelusia:

primma t’anno vennuto pe’ denaro,

chi t’era contro, ‘a sceuto ‘a peggia via:

farte muri’ cu’ morte ‘nfame e amara!

Ma chillo calice tu t’ ‘o bevisti sano.

Invece ‘e fa’ vede’ comme si’ Dio,

t’abbracciasti ‘na croce cu’ doie mani:

”Mò faccio tutto nuovo, Padre mio!”

Tu potevi ferma’ chillo maciello,

primma che te sturdessero ‘e frustate,

e doppo ‘e fatto ‘a parte ‘e ll’ainiello,

‘ncopp’ ‘a ‘na croce, tutto sfracellato!

Chi te vuleva muorto cu’ disprezzo

venette annanze ‘a croce a festeggiare:

“Tu, scinne ‘a lloco, avrai gloria e salvezza!

Si si’ Dio vero, te putrai sarvare!”

Fuie volontà d’ ‘ Pate e pure toia

si nun scennisti, ‘a copp’ ‘a croce, ‘n terra.

Troppo gruosso, ‘o peccato, troppa ‘a foia,

sultanto Dio puteva fa’ sta guerra!

Dicette n’ato appiso, ‘nu brigante:

“Ricordati di me, d’ ‘a faccia mia!”

“Tu oggi stesso stai vicino ‘e santi.”,

dicette chella carne, ch’era Dio.

‘E chilli ca sciglisti, sulo uno

scegliette ‘e sta’ cu’ te, vicino ‘a croce.

Quanne se rire, nun manca mai nisciuno,

Si stai chiagnenne, hai voglia d’aiza’ ‘a voce!

‘A mamma toia patette ‘nzieme a te;

‘A quanne avisti ‘a primma d’ ‘e frustate

e po’ pe’ tutt’ ‘a via, sempe a vede’;

‘a rinto se senteva ‘e curtellate!

Lacrime, ormai, nun ne teneva cchiù,

ce steva chi ‘a purtava sott’ ‘o vraccio,

pregava a Dio e ‘o figlio suoio, Gesù:

“Dio mio, famme muri’ ca nun ce ‘a faccio.”.

Quanne muristi, ‘o munno se cagno’;

‘o terremoto, ‘e lampi dint’ ‘o cielo,

‘o viento forte e ‘o Sole s’oscuro’;

d’ ‘o santo tempio fuie stracciato ‘o velo.

Chi se vatteva ‘m pietto e chi fuieva,

dicette ‘nu Tribuno: “Chisto è Dio!”

Int’ ‘o silenzio ‘e morte se senteva

‘nu debole lamento: “Figlio mio…!”

(Raffaella conclude appoggiandosi su entrambe le ginocchia)

Ferdinando            (ripete la scena del fazzoletto, per il tempo necessario a far diminuire la tensione, soffiandosi rumorosamente il naso alla fine)

Valerio                 E chisto sarebbe ’o dio tuoio? Chesto chello che ‘a fatto? Ma site pazzi tutti quanti!

Simmaco              Però ce stanno tanti pazzi… so’ troppi, che sceglieno chesta religione… chesto me fa penza’… vulisse vede’ che ce sta coccosa ‘e overo, ‘a sotto? Roberto, io aggia parla’ cu’ chella gente, chilli cristiani! Puortami addo’ loro!

Roberto                (aiuta Simmaco ad alzarsi, prende il sacco col pane e lo guida verso sinistra; Giacinto li aiuta) Jammo, zi’ ma’… pure io voglio senti’… (escono)


Primo tempo - Scena Diciassettesima

Raffaella               (si rialza) Padro’, se vere ca ti si’ ‘nquartato, ma io risponno sulo a chello che m’ è addimannato… forze chello che faccio nun te va buono? Eppure ‘a mugliera toia l’ ‘a fatto tanto bene…

Valerio                 A me nun me ne ‘mporta ‘e chello che dici! Basta sulo che muglierema me lassa ‘n pace… a proposito! Giacinto!

Giacinto                Dici, padro’…

Valerio                 Nun voglio che se scatenano ‘e malelengue! Va’ a chillo cenacolo, e dici a muglierema ca turnasse ‘a casa!

Giacinto                Vaco, padro’! (esce a sinistra)

(la scena si rianima con i fuguranti che entrano ed escono sul fondo)

Raffaella               Padro’ mio… forze te si’ scurdato che vulivi manna’ ‘nu messaggo ‘o senatore Levorino…

Valerio                 E’ overo! Hai ragione, l’aggia proprio fa’!

Silvana                 (entra da sinistra, parlando con Agata) Sperammo che cca’ vennimmo ancora…

Viola                    Sì, siì! ‘A bambula mia le piace chisto posto… ma chillo discepolo aro’ sta?

Agata                   Io sento ancora chella presenza… si’ tu, schiava rinnegata che ‘a puorti cu’ te? Si’ maledetta fino all’ossa?

Silvana                 Io cu’ chesta nun ce voglio ave’ a che fa’! (sputa nella direzione di Ferdinando e poi si siede)

Ferdinando            Vi’ che schifezza…! (verso i dignitari) Chella pe’ poco nun me cuglieva!

Valerio                 Uffa…! Strega! Che sienti? ‘E chi parli?

Agata                   (avvicinandosi a Valerio) Padro’… chesta è maleritta! Porta cu’ essa ‘e spiriti ‘e l’Averno… tu ‘issi fa’ ‘nu rito ‘e purificazione… caccia’ chisti spiriti… sacrifica’ ‘o dio ca nun se dice… io te pozzo vennere ‘e profumi e ll’incensi… e pozzo pure fa’ ‘a magia pe’ te…

Valerio                 E che ‘essa sacrifica’ ‘o dio Ade?

Agata                   (sgomenta) Zitto! Nun dicere chillo nomme! ‘O dio ‘e ll’Inferi se ‘nquarta sulo si ‘o nuommene! (con complicità) ‘E fa’ ‘nu sacrificio ca le piace… ‘nu bello lupo!

Raffaella               Padro’… nun ‘a senti’ a chesta… si coccosa che aggio fatto nun te va buono, cerco ‘e cagna’… ma nun te fa convincere a fa’ sacrifici a statue favuze!

Silvana                 (compiangendola) Povera femmena pazza!

Agata                   Minerva te desse ‘a luce soia, rinnegata… (si avvicina a Raffaella e le gira intorno) si… ‘e sento… si’ tu che puorti ‘e spiriti cu’ te… padro’, cca’ s’adda fa’ subbeto, primma che ‘sti spiriti traseno dint’ ‘e case noste… e pure dint’ ‘a toia!

Viola                    (segue Agata nel giro, con la bambola tra le braccia)

Valerio                 (incerto) E che s’essa fa’?

Agata                   (complice) Nun accatta’ chesta schiava, padro’… fossero sordi jettati! ‘O sacrificio ‘e ‘nu lupo nun abbasta… s’adda sacrifica’ pure essa!

Ferdinando            (scatta in piedi) Maronna d’ ‘o Carmene, aiutaci! Simmaco, o comme te chiammi… chesta… che vo’ fa’? (solito lavoro dei dignitari)

Valerio                 (taglia l’accenno di risposta di Simmaco) Pe’ Giove, Marte e Nettuno, e basta mò! (cambiando tono) Vavattenne, strega! A n’ato poco me fai cari’ ‘a casa ‘ncuollo p’ ‘e spiriti ca sienti sulo tu! Chesta schiava ‘a sanato a muglierema c’ ‘o canto, i cerusici nun so’ stati capaci, manco ch’ ‘e salassi, e io l’essa fa’ accirere?

Agata                   (ritraedosi) Me stai confermanne che chesta tene cchiù potere d’ ‘e cerusici … padrone mio, penza buono a chello ca fai… io te stongo sempe vicina e quanne vuoi, facimmo ‘o sacrificio…

Giacinto                (entra da sinistra) Padro’… ‘a padrona mia m’ ‘a visto ‘o cenacolo e le aggio fatto l’ammasciata, mò sta turnanne ‘a casa, ma vo’ n’ata vota ‘a ballerina…

Agata                   (interrompendo) Nooo! Nun ‘o fa’, padro’… nun ‘a manna’… chella ‘a fatto ‘a malìa a mugliereta!

Valerio                 Basta, strega! Statte zitta! Schiava… ‘e sentuto? Vai ‘a casa mia… ‘e che le parli?

Raffaella               Le dico ‘e comme è stato apierto l’Ade, e d’ ‘a festa ‘n cielo p’ ‘o ritorno d’ ‘o Dio mio dall’Inferi…

Silvana                 Comme a Proserpina! ‘O dio tuoio nun ‘a fatto niente ‘e nuovo!

Agata                   Padro’… ‘o sacrificio d’ ‘a schiava è nicessario overamente… famme fa’ a me tutte cose…

Valerio                 Nun te voglio vere’ cchiù, ‘e capito? Tu… ti chiammi Sebiba, overo? Vai addo’ muglierema e falla sta’ tranquilla…

Raffaella               Faccio chello che vuo’ tu. (Raffaella fa un cenno ai musici ed esce con loro, prendendo il tappeto)

Valerio                 Ma stavota vengo pure io… accussì cierte perzone… (volto a metà verso Ferdinando) nun ‘e veco cchiù! Ahhh! Che suddisfazione! Giacinto, jammucenne! (escono)


Primo tempo - Scena Diciottesima

Agata                   Giosuè aveva ragione! Chesta schiava è periculosa… sta streganne pure ‘o padrone suoio, chella jatta morta! Silva’, io l’aggia fa ferni’!

Silvana                 Ce penza Diana Tifatina a mannarle ‘nu guaio… e po’ tu l’ è gia maleritta!

Viola                    Ua’, che vulisse fa’ ancora?

(entrano un gruppo di figuranti nobili che percorreranno adagio il fondo scena, entrando ed uscendo; Viola va da loro con la bambola in braccio, mostrando la collana)

Giosuè                 (entra da sinistra) ‘Ate visto pe’ caso chella ballerina? Io ‘a vaco truvanne, ma niente!

Agata                   Justo tu! Vieni cca’, Giosuè… me serve pure n’omme! Voglio fa’ ‘nu rito ‘o dio Mitra pe’ castiga’ chella rinnegata che vai truvanne… e pure tu, Silvana, me serve ‘na mano!

Silvana                 E che te serve?

Giosuè                 Ce stongo pure io, si chesto ‘a fa sta’ zitta ‘na vota bona! Ma p’ ‘o rito ce vo’ ‘nu sacrificio…

Agata                   Sì, ce vo proprio… (guarda Viola)

Silvana                 Che stai guardanne…? (inorridita) Figliema? Pecché guardi a essa?

Agata                   Nun tenimmo niente… me serve proprio essa…

Silvana                 Si’ pazza! Vulisse sacrifica’ mia figlia?

Agata                   Calmate, nun l’acciro… (a voce bassa) me serve comme ara virginale, sarrà essa a mantene’ ‘a vittima che ce manna Mitra… facimmo ampressa! Chiammala e falla assetta’ cca’, e vuie mettiteve vicino a me… e dicite chesto quanne ve faccio ‘nu segno… (parla all’orecchio dei due, poi prende un bruciaprofumi a candela dalla sua sacca e lo dà a Giosuè; terrà in una mano un sacchetto di incenso) Tieni, appiccia chesta cannela e miettila cca’ annanze!

Giosuè                 (accende la candela del bruciaprofumi con un accendino –girandosi in modo da non essere visto dal pubblico–, simulando difficoltà, e la sistema nel bruciaprofumi che poi poserà sul palco) Chest’esca è ‘nu poco umida… ecco… no… si! S’ è appicciata!

Silvana                 (va a prendere Viola e la fa sedere accanto al fuoco sacro, lei e Giosuè si siedono alle sue spalle, lasciando spazio tra loro) Ecco, assettate cca’ e ‘mparate…! Chesto nun succere tutt’ ‘e juorne!

Agata                   (mette dell’incenso sul fuoco e poi si mette al fianco di Viola) Allora, sentite buono! Velia, acala l’uocchie, ca vene ‘o dio e ce sente… ancuminciammo!


Primo tempo - Scena Diciannovesima

(faro [basso] su Agata, luci ridotte sul palco; i figuranti si fermano)

Agata                   (a braccia levate, periodicamente aggiungerà incenso colorato sul fuoco sacro)

                          Grande dio Mitra, siente chesta voce!

Agata toia te fa’ chest’ammasciata:

te chiedo morte, per chi v’appriesso ‘a croce,

nisciuno ca l’aiuti o sia sarvata!

‘Sta figlia toia nascette doppo ‘o mare,

e te rinnega, è chesto che l’accusa!

Servenne a te, ca se ‘mparai a ballare,

mò nun te vo’ cchù bene e te ricusa!

‘A rinnegato tutto d’ ‘o passato,

e tutt’ ‘e riti fatti annanze a te;

mò parla ‘e ‘na duttrina stralunata

‘e n’omme-dio ca nun se fa vede’!

‘Adda muri’! Ce vo’ n’esempio chiaro,

s’adda capi’! Chi nun tene creanza,

adda muri’, e pure ‘e morte amara,

nun l’adda cunsula’ manco Speranza!

(fa un cenno verso Giosuè e Silvana ed aggiunge incenso)

Giosuè e Silvana (insieme)

                          Mitra putente te s’avvicina,

                          cu’ ‘nu curtiello te da’ la morte,

                          scinni ‘n galera addo’ Proserpina,

                          schiava dannata, chesta è la ciorta!

Silvana                 (a Viola)  Viole’, dici pure tu!

Agata                   Zitti! Si no se spezza ‘o rito e Mitra nun accetta ‘o sacrificio e nun manna ‘o segno suoio… Viole’, acala ‘a capa, Mitra te sta guardanne! (fruga nella sua borsa ed estrae un vistoso coltello, nascondendolo alla vista di Giosuè e Silvana, ma non del pubblico, e lo infila sotto la tunica)

Grande dio Mitra, sienti ‘sta preghiera:

fa’ scennere a Sebiba dint’Averno,

ca se purtasse ‘a fede menzognera,

pur’essa tummulata pe’ l’eterno!

Ritorna ‘a pace ‘ncopp’ ‘a chesta terra,

si more chesta schiava e ‘a magia soia;

‘o sangue suoio fermasse chesta guerra,

se stesse zitta chi tene tanta foia!

E si nun vuo’ che more pe’ curtiello,

Falla muri’ abbruciata dint’ ‘o fuoco,

cugliuta ‘e freccie comme a ‘nu criviello,

attussecata o corda che l’affoca!

Essa vo’ ‘a croce? E croce lle sia data!

sturduta ‘e schiaffi, ‘nchiuvata ‘a travicella,

‘miezo a ‘sta chiazza adda resta’ spugliata,

‘nu juorno almeno e doppo, pigliatella!

(fa un cenno verso Giosuè e Silvana ed aggiunge incenso)

Giosuè, Silvana e Viola (insieme)

                          Mitra putente te s’avvicina,

                          cu’ ‘nu curtiello te da’ la morte,

                          scinni ‘n galera addo’ Proserpina,

                          schiava dannata, chesta è la ciorta!

Agata                   (a Viola) Avanti, acàlate, miette ‘e mmani pe’ terra, e pure vui! (i due si inginocchiano)

Viola                    (eseguendo ed assumendo la posizione di un tavolinetto) E ‘a bambulella mia…?

Agata                   Dammella a me… ‘a metto cca’… ‘ncopp’ ‘e rini… (esegue)

Grande dio Mitra, sienti che addimanno,

chello ca voglio tu fammello avere!

I’ songo serva toia, cca’ tutt’ ‘o sanno,

e mò falle vede’ che d‘ è ‘o putere!

Mò vieni ‘miez’ ‘a nui comm’a lione,

spezza int’ ‘o sanghe ‘o filo ‘e chesta ciorta,

scinnele dint’ ‘o core a sta zuzzona,

menale ‘ncuollo ‘a rezza della morte!

Ca scenne ‘a notte ‘ncopp’ ‘a ‘st’impunita,

e ca protegga chisto rito sacro!

(si abbassano le luci)

I’ t’offro ‘o sacrificio ‘e chesta vita,

comme t’acciro chisto simulacro!

O grande Mitra, chesto m’ ‘e mannato

e faccio chisto rito pe’ tuo onore!

‘Stu sacrificio sarrà perfeziunato:

si oggi è pezza, dimane pigli ‘o core!

(luce solo su Agata che estrae il coltello e pugnala la bambola, bucando una bustina di succo di pomodoro prima sistemata nella stessa; leva in alto la bambola ed il coltello, ormai sporchi di rosso, mentre Giosuè, Silvana e Viola recitano i versi successivi)

Ferdinando            (simula un malore, viene circondato dai dignitari che gli fanno aria)

Giosuè, Silvana e Viola (insieme)

                          Mitra putente te s’avvicina,

                          cu’ ‘nu curtiello te da’ la morte,

                          scinni ‘n galera addo’ Proserpina,

                          schiava dannata, chesta è la ciorta!

(la luce ritorna sulla scena)

Giosuè                 (ancora chino) Agata, chisto è ‘nu miraculo! Mitra ‘a cacciato ‘o Sole… s’ è eclissato a mità jurnata!

Silvana                 (anche lei ancora chinata) Agata… è fernuto? Chillo era ‘o segno che ha mannato Mitra?

Agata                   (pulisce il coltello sulla bambola e lo rimette nella veste) E che ‘ato vai truvanne? Nun t’ è abbastato? E’ fatta… Sebiba n’ato poco e po’ sarrà comme a chesta pupatella! (ride, levandola in alto)

Viola                    (rialzatasi) Ahhh! Mariella… è morta! (la prende e cerca di pulirla)

Agata                   Nun è morta, scema! ‘A bambula toia nun è mai stata viva!

Giosuè                 E allora… chisto sangue?

Agata                   Segno d’ ‘a potenza ‘e Mitra e d’ ‘a magia d’ ‘o sacrificio… ‘e mai visto ‘nu dio ca ne caccia ‘o Sole?

Silvana                 Si, ma chello sanghe… aro’ vene?

Agata                   E’ ‘o sangue ‘e chella rinnegata! ‘A putenza ‘e Mitra l’ ha mannato cca’, accussì ‘o sacrificio è stato cumpleto!

Giosuè                 Allora Sebiba è morta? Ma ‘o corpo, aro’ sta?

Silvana                 Io nun ce credo si nun ‘o veco!

Agata                   Tu statte accorta, che a Mitra cierti cose nun le piaceno… jammo ‘a casa d’ ‘ padrone nuovo… sulo lla’ po’ sta! (esce con Giosuè e Silvana; Viola rimane da sola)


Primo tempo - Scena Ventesima

Viola                    (seduta, sguardo fisso nel vuoto, recita a bassa voce, cullando la bambola)

Venite popolo, venite amici miei,

sulo ‘nu ballo, senza timidezza,

vicino a me ve faccio senti’ dei,

io ve ‘mbriaco co’ la mia bellezza!

Cca’ nun ce sta nisciuno ca m’ è pari,

guardate com’è janca chesta pelle,

io songo figlia ‘o re d’ ‘e sette mari,

mò faccio ‘a schiava, ma songo sempre bella!

Sentite… sentite…  me so’ scurdata ‘o riesto! (si china e nasconde la testa fra le braccia)

Silvana                 (entra alle sue spalle, recita a bassa voce)

… Sentite che profumo ‘sti capilli,

ma nun guardate troppo st’uocchi niri!

Si, dico a te, te chiuri int’ ‘o mastrillo,

e si te ‘ncoccia mugliereta, t’accire!

(va vicino a Viola, che gradatamente si riprende) Tu t’iri scurdata ‘a canzone… e io m’ero scurdata ‘e te, pe’ ‘nu mumento… ma ‘e visto comme so’ turnata ampressa? Sienti, figlia mia, Capua nun fa cchiù pe’ nuie… ce ne vulessemo i’ a Roma?

Viola                    Chella strega m’ ha acciso Mariella…

Silvana                 Nun sapevo che vuleva fa’… aggi pacienza… ma famme vede’ ‘sta bambulella… (esamina la bambola) hmmm… nun ce putimmo mettere l’unguento armario… ma ’ a ferita nun è grave! ‘O viri ca nun esce cchiù sangue…! Nun ce sta niente… è pulita!

Viola                    Allora putesse guari’?

Silvana                 Ma sì! Vieni, jammucenne ‘a casa; basta vennere, pe’ oggi! Le lavammo ‘a ferita c’ ‘o vino, po’ ce mettimmo ‘a ragnatela, ‘a cenere janca… e po’ tu le cusi ‘a ferita! Guarda ca te dongo l’ago nuovo e ‘o filo ‘e cuttone!

Viola                    (si alza e trascina via Silvana) Allora jammo, che aspietti? Curri! Facimmola guari’ subbeto subbeto!

Silvana                 Si, vengo… jammucenne, Mariella! (escono insieme)

Ferdinando            (applaude all’uscita delle due)

                         


Primo tempo - Scena Ventunesima

(Simmaco entra da sinistra, lasciandosi guidare  da Roberto)

Simmaco              Ecco, stammo n’ata volta ‘o posto mio… aro’ sta ‘a preta?

Roberto                Masto Simmaco, aiccanne… assettate!

Simmaco              ‘Nu poco d’acqua…

Roberto                Sta cca’, zi’ ma’… nisciuno ‘a tuccata. (gli porge una scodella)

Raffaella               (entra, senza tappeto, senza musici e con un nastro al collo diverso, senza medaglione)  Oh, Simmaco… ave!

Simmaco              Sì tu ballerina…? Io aggio avuto cierti risposte impurtanti… stongo penzanne ca me faccio cristiano.

Roberto                E pure io… stongo abbianne a capi’ che è ‘o Dio tuoio pe’ te. T’aggia ringrazia’…

Raffaella               Io nun ho fatto nulla. Sono solo la serva del Signore, è Lui che opera in me, che si serve della mia apparenza… io ci sono, ma potrei anche non esserci… sono come una fantasima che percorre questa terra al suo servizio, solo Lui è vivo e reale.

Simmaco              Ma che parole strane, furastiere… però te capisco… e pecché dici chesto?

Raffaella               Perché questo è il mondo della vanità. Tutto passa: ricchezza, povertà, padroni, schiavi, guerre, fame, peste… nulla è eterno, siamo polvere, e polvere ritorneremo. Sono passati quattro secoli da quando è venuto sulla terra e tutto è passato… tranne Lui e le sue parole. Chi crede in Lui ha destino di salvezza eterna. E se non credete in Lui sarete perduti! Non aspettate tanto prima di convertirvi!

Roberto                Pure chillo bell’ommo che ha letto ‘o Libro ‘a ditto accussì…

Simmaco              Sebiba… tu sai tanti cose… cchiù assai ‘e chello che m’aspetto ‘a ‘na femmena… forze si’ ‘na strega?

Raffaella               Non sono strega e non opero magie… mi aspettavo che venissi qui, e sono tornata per farti ascoltare il mio ultimo canto… nessuno è degno come te di sentirlo… e poi quando sarà terminato, capirai molte altre cose… anche tu, discepolo. E allora son sicura che questa idea che hai diventerà certezza. Tu farai molto bene agli altri, Simmaco; finora hai aiutato chi ti chiedeva; da domani salverai il loro spirito!

Simmaco              Se chesta nun è magia, è overamente ‘o Dio tuoio che te porta!

Raffaella               Taci ora, ed ascolta! Ho poco tempo… (musica da fuori scena)

Io credo nel Dio Padre Onnipotente,

Colui che fu, che è, solo Creatore,

giammai creato e sempre pre-esistente

che si rivela in Cristo salvatore!

Il primo error dell’uomo fu l’orgoglio,

che fece entrar nel mondo morte e male.

Come in un mare azzurro, nero scoglio

causa rovina e lutti e non ne cale!

Soltanto Dio potea ristabilire

la persa pace e amore vivo e vero;

amando l’uomo, volle altresì soffrire,

per fare tutto nuovo il mondo intero.

Con un piccolo Fiore immacolato

lo Spirito di Dio generò l’Uomo.

Figlio del Padre, scevro di peccato,

offrì se stesso, in olocausto e dono.

Ma Dio morir non può, per sua natura,

quand’anche fosse un uomo trucidato;

dopo tre giorni dentro tomba scura

resuscitò, nel mondo rinnuovato!

Negl’Inferi discese a liberare

i morti che attendevano la vita;

chi visse con amor, potette andare

a contemplare la Bontà infinita.

Dopo aver vinto morte ed il peccato

or dimora con noi, anche qui, adesso.

Ci chiede amore, come lui l’ha dato:

“Ama il prossimo tuo come te stesso!”

Per darti il modo di capire meglio,

la fede in Lui può fare bene assai:

ferma una guerra chi domanda al Figlio!

Nel nome del Dio vero, tu vedrai!

(termina in piedi con le braccia levate)


Primo tempo - Scena Ventiduesima

Silvana                 (entra da sinistra, con Viola che porta la bambola) Sebiba! (la prende e la porta lontano da Simmaco e  Roberto, impegnati a parlare tra di loro) Fortuna ‘a vuluto ca te trovassi! Ce ne vulimmo ghi’ a Roma, e so’ ghiuta ‘o tempio ‘e Feronia, pe’ vede’ chi m’accumpagnava… l’oracolo m’ ‘a ditto ca tu può veni’ pecchè si’ libera! Si’ stata affrancata! E’ overo? Vuo’ veni’ cu’ nuie?

Viola                    (aggrappandosi al suo braccio) Dici ca sì, vieni cu’ nuie… ce sta ‘a carretta pronta a parti’!

Raffaella               Posso venire. Sono finalmente libera… e qui ho finito.

Viola                    Uh, comme parli strano… e ‘e cagnato ‘o nastro…

Raffaella               Un ladro ha rubato quel che avevo, ma un… amico me ne ha regalato un altro… questo mi piace molto di più!

Silvana                 Allora jammo! (si avvia) E forza!

Viola                    (esce tirando Raffaella e agitando la bambola verso Roberto) Mariella, saluta a patete! (escono entrambe)

Ferdinando            (si muove per seguirle, ma viene trattenuto e dissuaso)

Roberto                (pensoso, che non ha risposto al saluto di Viola) Zi’ ma’… ‘a ballerina ‘a ritto ca guarisci… ca te s’arapono l’uocchie… ma chella forze nun vulevadicere… forze ‘ammo capito malamente! Però… si fosse overo, che bellezza!

Simmaco              Chella ballerina è chiena d’ ‘a sapienza d’ ‘o Dio suoio… ma pe’ quanto putente Isso po’ essere, io nun credo che ‘me fa’ turna’ ‘a vista…

Giosuè                 (entra da destra) Che stai dicenne, induvi’? Aggio ‘ntiso ll’uldime parole… ‘a qua’ dio si’ ghiuto pe’ ‘na grazia accussì difficile?

Simmaco              Nun so’ ghiuto a nisciuna parte. Sebiba ‘a ritto che io pozzo guari’…

Giosuè                 Sebiba ‘a ballerina? Chella schiava rinnegata che steva cca’?

Roberto                Sì… proprio chella…

Giosuè                 Ohe’ ve penzassive che stongo ‘mbriaco? ‘A ballarina sta morta pe’ terra, ‘a via Tifatina… i’ stesso l’aggio tagliato ‘o cuollo e l’aggio accisa… cuntinuava a niga’ a Mitra! Ecco… guardate… (si fruga in una tasca e mostra il nastro) me so’ pigliato ‘o nastro suoio, comme trofeo!

Ferdinando            (ai suoi) Chisto è proprio ‘nu fetente! Facitelo arresta’… l’aggia fa’ appennere!

Roberto                E chesto quanno è succieso?

Giosuè                 Ehh… oramai se sarrà fatta pure fredda…

Simmaco              Roberto… mò io ce veco!

Roberto                Maestro… ma che stai dicenne? Si’ asciuto pazzo? Vulissi dicere… che vuo’ dicere…? Può cammena’? (gli si para davanti) A me, me viri?

Simmaco              Nun è ‘e chesto che parlavo! Cheste so’ sulo vanità! Io mò overamente nun songo cchiù cecato… veco ‘a gloria ‘e Dio! E  mò capisco che diceva… mò capisco tutte cose …

Giosuè                 Ma che capisci? Te vulissi pure tu… insomma… ce parli pure tu cu’ chillo dio?

Simmaco              Si. Nun aggio mai ‘ntiso niente dint’ ‘o core a paragone ‘e chello che sento mò! Chisto Dio m’ ‘a apierto l’uocchi d’ ‘o core!

Giosuè                 Ma chella Sebiba… quanne è venuta cca’?

Roberto                Justo ‘nu poco primma ca venissi tu …

Giosuè                 Spirito! Maleretta! Addo’ stai? (girandosi intorno) Fatte vede’, ca fernisco buono chello che aggio ‘ncuminciato… addo’ stai? (impugna il coltello che aveva Agata e continuando a girarsi intorno, esce)

Roberto                Zi’ ma’… io nun saccio che me sento… nun ce capisco cchiù  niente… ma era ‘nu spirito o era Sebiba overamente?

Simmaco              Che ce ne ‘mporta, Robe’? (si alza da solo e cammina come in estasi a braccia levate verso un gruppo di figuranti)  L’impurtante è che è turnata pe’ parla’ cu’ me, cu nuie… e che canto che ‘a fatto! Ringraziammo a Dio, ca ce ‘a apierto ‘o core… ringraziammo a Dio, ca ce ‘a dato ‘a vita overo!

Roberto                Masto Simmaco, aspetta! Fermati, fatte aiuta’…! Ma tu ce viri! Ce viri buono! Miraculo! Miraculo!

Simmaco              (entra nel gruppo dei figuranti)

Amo il Signore per quel che mi ha dato,

io non sapevo che cosa cercare

ero tra i miseri e Lui mi ha salvato,

per la mia vita lo voglio lodare!

Egli ha ascoltato la mia preghiera,

quando ero preso da funi e lacci,

tristezza e angoscia da mane a sera,

Egli è venuto e mi ha preso in braccio!

Pace è discesa sul mio cuore stanco,

anima e corpo tornati alla pace;

questo miserrimo preso dal fango

vuole lodarti e non è capace!

Il mio Signore mi ha fatto del bene,

mi ha preservato dalla caduta,

mi ha liberato delle catene,

ha ritrovato l’agnello perduto!

Io mi trovavo tra odio ed inganno,

falsa e infedele la gente dintorno;

ora che vedo, io scorgo il mio danno,

d’essere servo di ogni menzogna!

Merita tutto, il mio grande Signore,

ma non conosco il dono perfetto!

Che gli offrirò? I miei beni, l’onore,

o ‘l sacrificio di un mio caro oggetto?

Offro me stesso, siccome io sono,

anima e corpo, com’Egli m’ha fatto.

D’ora in avanti la vita gli dono,

anche se prima ho sporcata coi fatti.

Ho sollevato una coppa d’amore

colma di fede e ringraziamento;

contra il peccato, se pugna è dolore,

offro le pene del combattimento!

Meglio morir che restare sconfitto,

salvami, o Dio, da questo delirio;

per il tuo amore non resterò zitto,

anche se questo vuol dire martirio!

 (i figuranti escono assieme agli attori)

fine primo tempo


Intermezzo

Ferdinando            (si alza e passeggia sul palco, rivolgendosi ai dignitari) ‘E capito che so’ stati capaci ‘e fa’! ‘Sti sudditi miei s’ammeritano proprio ‘nu regalo!

Marianna              Maestà… io me so’ commossa! S’ammeritano, e comme!

Vittorio                 Certo che erano overamente puverielli… e po’, cu’ tutti chilli dei…

Ferdinando            Gia’… ‘e primmi cristiani n’anno passato ‘e guai… chella povera Sebiba… aggraziata, bellella… meno male che l’anno accisa sulo pe’ finzione! E’ overo… che dicite?

Vittorio                 Eh, si Maestà…

Marianna              Forze ‘a Maestà vosta ‘a vulesse canoscere l’attrice… veco d’ ‘a truva’… permettete! (fa un inchino ed esce)

Ferdinando            E’ proprio overo! Sulo ‘e femmene capisceno cierti cose…! E chillo fetente d’ ‘o verdummaro…? Arrestatelo!

Vittorio                 Maestà… ma chillo faceva sulo ‘a parte soia… e Sebiba è ‘nu perzunaggio, nun è overa…

Ferdinando            E che ci azzecca? Chillo faceva pur’isso ‘o perzunaggio? E io faccio appennere ‘o perzunaggio!

Vittorio                 Maistà… se sentono cierti rummori… stanne turnanne!

Ferdinando            (sedendosi) E cca’ me trovano! Io nun indietreggio annanze a niente! (girandosi verso i dignitari) Ohe’ io tengo sempe famme, e vuie nun m’avite purtato ancora niente! Vulisseve fa muri’ ‘e famme ‘o Re vuosto?

 


Secondo tempo - Scena Prima

Nereo                  (entra da destra, spingendo un carrettino con delle ceste, pezze di tessuto e materiali vari; si guarda intorno) Ah, chesta pare ‘na basilica… allora ce fermammo, che dici, Viola…

Viola                    (entra, smarrita; sarà truccata come se fosse incinta) Ma io chesta nun m’arricordo… pare nova… pigliame ‘a seggia, pe’ piacere.

Nereo                  (prende uno sgabello dal carretto e lo sistema sul palco) Ecco… mò te dongo ‘nu poco d’acqua… (le dà una borraccia) stai bona?

Viola                    (si siede e beve) Grazie, sì… nun me sento stanca, ‘a strada era poca…

Giosuè                 (entra da sinistra portando una sacca, uno sgabello e assi con cavalletti, porta vestiti logori ed una parrucca incolta) Nun ve canosco! Chi site? Aro’ venite? Facite spazio!

Nereo                  (affrontandolo) E manco io saccio a te! Vavattene in pace… si nun vuo’ che te faccio canoscere ‘a spada mia!

Giosuè                 Te ne approfitti pecché so’ vecchio, pe’ Mitra! Io nun ce ‘a faccio a te vattere… e tu te si’ pigliato ‘o posto mio!

Viola                    Si’ ‘nu mercante?

Nereo                  Allora è chesta ‘a piazza d’ ‘o mercato?

Giosuè                 No, ‘o mercato è nun è assai luntano, ma oggi ce sta ‘nu rito cristiano cca’, ce starà assai gente… perciò so’ venuto!

Nereo                  Velia, allora ce fermammo. Aspettammo pure nuie int’ ‘a chesta piazza!

Viola                    Chi sa ‘e quale rito si tratta…

Giosuè                 Ma io… ‘o posto mio… tutti veneno cca’…

Nereo                  Basta, viecchio! Mettiti a fianco a nuie e ferniscela ‘e te lamenta’!

Viola                    Aspetta, Nereo! Ma tu che vinni, viecchio?

Giosuè                 Io vengo ‘e noci. E tengo pure cocche sorice…      E tu che vinni?

Viola                    Allora puo’ sta’ pure tu! Nuie vennimmo stoffa… ma tu sai che rito ‘anna fa’?

Giosuè                 (brontolando dispone le sue cose, prendendo il maggiore spazio possibile) Cristiani… loro e ‘e prucessioni… che scemità… ‘o dio Mitra nun vo’ prucessioni… (continua a borbottare)

Roberto                (entrando da sinistra) Ecco, vipere, scorpioni ca site! Chi v’ ‘a ritto ca cca’ se po’ fa’ mercato? Abbasta che guaragnate cocche cosa, nun ve ne ‘mporta ‘e profana’ ‘nu posto sacro! Jatevenne, cca’ adda passa’ ‘a prucessione, via, jatevenne!

Nereo                  (affrontandolo) Bell’ ‘o, ce sta ‘nu sacco ‘e spazio, e ce cape ‘a processione toia e ‘o banco mio, ’e capito, scemo ca si’? Io nun me movo ‘e ‘nu vraccio! E po’, tu chi si’, pe’ dicere chesti cose?

Roberto                Io songo ‘o diacono d’ ‘a Basilica! E te dico che nun puo’ rimmane’ cca’!

Nereo                  Ma io nun me ne vaco… che vuo’ fa’? Vulissi lotta’ cu’ me? E provaci, chierico d’ ‘a mala ora! (assume posizione di combattimento)

Giosuè                 Ohe’, tu, statte fermo… ‘a gente s’appaura e se ne va… e nuie nun vennimmo niente! E tu … che ce stai facenne cca’, invece ‘e partecipa’ ‘o rito?

Roberto                Songo ‘o diacono, aggio ritto! E stongo cca’ pe’ tene’ aperta ‘a Basilica pe’ quanne vene ‘o Vescovo… senza ca nisciuno arrobba niente! E vui nun putite sta’ cca’! Jatevenne!

Viola                    Nereo… lascia sta’ chisto religioso… sposta ‘nu poco ‘a carretta, pe’ fa’ spazio… mittela arreto ‘o cantone…

Nereo                  Chierico, ringrazia ‘a sposa mia! (a Viola) Faccio comme vuo’ tu… mò monto ‘nu bancariello… (esce con il carro; ritornerà ad intervalli in scena con assi, cavalletti e mercanzia per montare un banco di mercante, poi si siederà a fianco di Viola)


Secondo tempo - Scena Seconda

Roberto                (a Viola) Eppure ‘a faccia toia io già l’aggio vista! Si’ ‘na nova fedele? Si’ stata battezzata cca’?

Viola                    No, so’ tornata justo oggi… venimmo ‘a Roma… stevemo ‘nzieme ‘a mamma mia… è morta ‘a poco tiempo…

Roberto                Allora tieni parienti?

Viola                    No, nisciuno… ce ne simmo dovuti fui’ pe’ sta’ in pace… no pe’ me, ma pe’ Nereo… (fa un cenno verso Nereo)

Roberto                Forse aggio capito. Maritete pare ‘nu gladiatore che ce ‘a fatta a affrancarsi… e addo’ ve site spusati?

Viola                    A Roma nun ce putevamo sta’ proprio cchiù… nun è facile affrancarsi e ‘o padrone suoio ‘o putesse vule’ n’ata vota… e c’è mancato ‘o tiempo pe’… simmo cristiani, ma nun è ancora mariteme… (distoglie lo sguardo)

Roberto                Peccatrice! Tu vai all’Inferno si nun ripari… si nun riparate subbito…!  Comme fai a dicere che si’ cristiana… zitta! Stanno arrivanne!

(entrano da destra alcuni figuranti che si pongono in attesa sulla sinistra)

Giosuè                 Venite cca’ bella ge’! Vengo ‘e noci e tengo pure ‘e surici!

(suono crescente di tamburi, con coro salmodiante indistinto, che poi diviene comprensibile: entrano da destra due portatori di turibolo, poi due tamburi, due portatori di un quadro della Vergine, ed infine il baldacchino portato da sei penitenti in cappa e cappuccio con Simmaco vestito da Vescovo. La processione attraverserà il palco salmodiando, e si fermerà con i turiboli agli estremi; al centro l’immagine della Madonna e il baldacchino, sul fondo i figuranti)

(Roberto si inginocchia al centro del palco rivolto al quadro; il ritmo della recita ricalca la metrica del “Dies Irae”)

Penitenti               Santa Madre beneritta,

“Gratia Plena” tu si’ ditta,

d’ ‘o Signore sposa eletta!

Simmaco              Madre Santa d’ ‘o Creatore,

figlia e madre d’ ‘o Signore,

sempe a te sia gloria e onore!

Sovrumana creatura,

santa Madre sempe pura,

tu cunfondi chi t’oscura!

Di Nestorio ‘o gruosso errore

tu redimi, pe’ favore,

grande grazia d’ ‘o tuo core!

Penitenti               Santa Madre beneritta,

“Gratia Plena” tu si’ ditta,

d’ ‘o Signore sposa eletta!

Simmaco              Chiedi grazia ‘o divin Figlio,

ca ce scampi d’ ‘o periglio,

d’ ‘o dimonio tristo artiglio!

‘O Creator fatto perzona,

vero Iddio e nun icona,

chesta è ‘a toia regal corona!

Tu che si’ d’ ‘o Ciel regina

‘o tuo Figlio ci avvicina,

regal stella d’ ‘a matina!

Penitenti               Santa Madre beneritta,

“Gratia Plena” tu si’ ditta,

d’ ‘o Signore sposa eletta!

Simmaco              (imponendo silenzio) Exultate, popolo! Fratelli ‘e Cristo, laudate et benedicite Iddio p’ ‘a luce d’ ‘o Santo Spirito che Isso ha vuluto manna’ ‘ncopp’ ‘e padri d’ ‘o Concilio! ‘A santa assise ca si è giuntata a Efeso int’ ‘all’anno domini quattuciento vintotto, ha cundannato l’errore ‘e l’eretico Nestorio, ca era già patriarca ‘e Costantinopoli! Laudate l’Imperatore d’Oriente Teodosio ‘o Sicondo e ‘o sommo padre Cirillo, pariarca ‘e Alessandria, che hanno fortemente vuluto chesta santa assise! Ammo avuto ‘a Bolla Imperiale addo’ è stata cunfermata ‘a divina maternità d’ ‘a Vergine Maria, che ‘a avuto n’ata vota ‘o il titolo ‘e “Theotokos”, d’ ‘o quale nisciuno fedele d’ ‘a santa madre Chiesa ‘a mai dubitato! Nestorio è stato scomunicato, comme i seguaci d’ ‘a dottrina soia, favuza e diabolica, ca afferma ca Maria è sulo Madre di Cristo-uomo e non ‘e Cristo-Dio! Anatema su Nestorio e scumunica totale et perenne a chi nun va appriesso ‘a dottrina ‘e santa madre Chiesa! Exultate, popolo! Stateve in letizia p’ ‘a ristabilita verità! Chist’ anno sia n’anno ‘e grazia particulare pe tutti quanti vuie, sotto ‘a protezione d’ ‘a Vergine, ‘a luce d’ ‘o Santo Spirito ‘e Dio e l’ammore ‘e Cristo! Exultate, popolo!

(i figuranti applaudono)

(riprendono i tamburi; Roberto va vicino a Simmaco mentre la processione si riavvia per uscire a sinistra)


Secondo tempo - Scena Terza

Roberto                Padre Simmaco, grandissimo Vescovo! Cca’ ce sta ‘na coppia in peccato! ‘Nu peccato gravissimo! S’anna cunfessa’ ampressa!

Simmaco              Bravo a Roberto, hai ragione… ma ‘a processione nun se po’ ferma’! Simmo quasi arrivati, mettimmo ‘o quadro a posto, benerico ‘o popolo e po’ verimmo… forza, damme ‘stu braccio, ca mo’ me serve aiuto p’ ‘e scalini!

(riprende il salmodiare dei penitenti, tutti escono a sinistra, meno un gruppo di figuranti; da essi si staccano Letizia e Agata, gli altri vanno ai banchi)

Letizia                  Che cosa scucciante! M’aspettavo ‘na cosa cchiù ‘mpurtante… quanno se fanno ‘e Misteri ‘e Mitra è n’ata cosa! E po’ chillo parla difficile, nun aggio capito niente… no, cara Agata, chesta religione nun fa pe’ me! E nun se po’ fa’ chesto e nun se po’ fa’ chello…! Meglio Magna Mater!

Agata                   Eppure te dico, aspetta… i’ nun songo stata cunvinta ‘a nisciuno e nun te voglio cunvincere; quann’ è ‘o mumento, viri pure tu!

Letizia                  E tu ch’ è visto?

Agata                   (sospiro) Tanto tiempo fa aggio visto ‘na bella guagliona… scannata… e doppo morta è ghiuta addo’ Simmaco che era cecato… e isso doppo ce vedeva!

Letizia                  Ancora chesta storia! Tu te suonni, vecchia! Forze durmivi pure allora…

Agata                   Addimanna a Simmaco! E pure Giosuè steva cu’ me… chi meglio ‘e isso te po’ dicere … (tace guardandosi intorno)

Letizia                  Vabbuo’, doppo… aspetta, aggia vede’ chillo piezzo ‘e tela… (va da Viola)

Giosuè                 (va vicino a Agata) Pe’ Mitra, t’aggio sentuto! Tu l’ è ferni’, ‘e capito? Nun te scurda’ ca tu ‘a tenivi ferma mentre ca io… pure tu ‘e fatto ‘a parte toia!

Agata                   ‘O saccio buono. E’ ‘na vita ca stongo pavanne chillo sbaglio… ogni notte veco l’uocchi suoi… uocchi chini ‘e cuntentezza… pure quanne se so’… stutati… brillavano sempe comme ‘e stelle… io nun dormo da allora… campo comme fussi già dint’all’Averno!

Giosuè                 T’aggio ditto statte zitta! Basta! Io te faccio fa’ ‘a stessa fine! (ritorna al suo banco)

Simmaco              (esce con una semplice tunica, rivolgendosi a Agata) Si’ tu ‘a femmena che ‘a peccato? Te vuo’ cunfessare ‘o Vescovo tuoio?

Agata                   Io… si, Vescovo… tengo ‘nu peccato gruosso ‘ncopp’ ‘a cuscienza… io… nun aggio acciso, ma aggio aiutato…

Giosuè                 Io t’acciro! (gira intorno al banco e corre verso Agata con le mani levate)  

Nereo                  (scatta anche lui e immobilizza Giosuè) Aho’, bello! E fèrmate! Vulissi fa’ male a ‘na femmena vecchia?

Viola                    Nereo, statte accuorto…!

Letizia                  Magna Mater, pruteggici!

(i figuranti mostrano timore ed escono)

Giosuè                 Pe’ Mitra, lassame!

Simmaco              Fratelli, calmatevi! (a Giosuè) Tu che strilli, nun peggiora’ ‘e peccati tuoi! Vieni vicino a me… io nun songo ‘nu tribuno, nun te minaccio… guaglio’, lassalo…

Nereo                  (esegue) Guarda ca io te guardo ‘a luntano… nun ce metto niente… (ritorna da Viola e la tranquillizza)

Agata                   Giosuè… chisto è ‘o mumento ‘e ce leva’ ‘a preta ‘a copp’ ‘o core!

Giosuè                 Io nun sento niente! E chello che aggio fatto, ‘o  facesse n’ata vota!

Ferdinando            (rivolgendosi ai dignitari) ‘O vedite? Perzunaggio o no, chisto ‘adda essere appiso! Nun ce sta perdono pe’ uno ‘e chisti!

Simmaco              (riprende) Donna, allora ‘e fatto male a coccheduno?

Roberto                (entra e raggiunge Simmaco)  

Agata                   (indica Giosuè) Chillo ‘a acciso ‘na schiava pecché nun vuleva rinnega’ Cristo… e io l’aggio aiutato. E’ stato tanto tiempo fa, ma ‘a allora nun riesco a levarmela ‘a capa.

Roberto                (sgomento) Gesù aiutaci! V’ata penti’ ‘e chello che ‘ate fatto e fa’ ‘na grossa penitenza!

Simmaco              Povera gente… Roberto, chisti se portano ‘a penitenza ‘ncuollo ‘a quann’ è succieso ‘o fatto… venite cu’ me, jammo a prega’ ‘nzieme, ve faccio vede’ comme ve sentite meglio…

Giosuè                 (ritorna borbottando al suo banco)

Viola                    Vecchia… ma chi era… comme se chiamava chella schiava?

Agata                   Si chiammava Sebiba… Vescovo… è chella schiava che t’ ‘a fatto turna’ a vede’…

Viola                    (dal suo posto) Sebiba? Ma che scemenze state dicenne? Chella è venuta cu’ me e ‘a bon’anema ‘e mammema quanne simmo partite pe’ Roma, me ricordo buono, pure si ero piccerella! Po’ nun saccio che fine ‘a fatto a Roma… quanne simmo arrivate se n’è ghiuta all’impruvviso!

Giosuè                 Era ‘nu spirito! Io so’ sicuro che l’aggio accisa!

Roberto                Mò m’ ‘a ricordo pure io…

Simmaco              E io nun me la so’ mai scordata, chella dolcezza, chella fede formidabile… ma vuie nun l’avite accisa… ‘ate peccato sulo ‘e intenzione…

Agata                   No, Vescovo, nun è stato ‘nu peccato piccirillo… i’ sento comme a ‘nu muro tra me e Dio… io aggio fatto tanti peccati… a Dio ‘o sento sempre cchiù lontano…

Roberto                Vescovo, pure chella mercante e… ‘o cumpagno suoio so’ peccatori! Nun songo spusati e essa è…

Simmaco              Sulo chi è senza peccati po’ mena’ ‘a primma preta, Roberto! Nun maltratta’ ‘a gente, ca po’ sarrai maltrattato ‘a Dio! Forza, vui che vulite fa’ pace c’ ‘o Signore… venite cu’ me int’ ‘a basilica…

Viola                    I’ vengo subito, Vescovo! (a Nereo, allegra) Vieni pure tu… ce facimmo spusa’!

Nereo                  E ‘o bancariello nuosto?

Letizia                  V’ ‘o guardo io! A me, me piace chesta robba!

Nereo                  (minaccioso) Aho, sienti, cosa… coccheduno ce ‘a pruvato a arrubba’… ma nisciuno ‘a scampata… e ‘a pavato tutte cose, cu’ l’interessi!

Letizia                  Puo’ sta’ sicuro, io nun arrobbo… però doppo, pe’ Diana, me regali chisto piezzo ‘e tela!

Agata                   Vescovo, vengo pure io… nun pozzo sta’ cchiù cu’ chisto peso… so’ quinnici anni che nun tengo requie… nun ce ‘a faccio cchiù…

Simmaco              Venite da me, voi ca site stanchi e affamati, e io ve ristorerò, dice ‘o Signore… Roberto accumpagname, me serve ‘na mano p’ ‘o matrimonio… (esce con Roberto)

(li seguono Agata e poi Viola e Nereo, abbracciati)


Secondo tempo - Scena Quarta

Giosuè                 Ma quanne fernisce ‘sto rito? Pecché ‘sta gente nun esce ancora?

Letizia                  Bellommo… è overo chello che ‘e ditto? L’hai accisa veramente a chella? Ma… te piace chesta ferza? Me ce faccio ‘nu bello mantesino, che dici? ‘O culore va buono pe’ una ‘e l’età mia? Po’ ce metto ‘na cinta janca, cu’ doie maruzze…o forze… no, ‘e sciuri vanno meglio… m’ ‘e metto pure ‘n capo…

Giosuè                 Pe’ Mitra, statte zitta! I’ nun me so’ spusato pe’ nun ave’ femmene int’ ‘e recchie!  Cca’ ‘o fatto è serio! Nisciuno ca vene a accatta’, e ‘e surici miei stanno murenne ‘e famme! Stongo penzanne pure che Agata nun me po’ accusa’… ma ‘o Vescovo sì!

Letizia                  Hai ragione! Si chillo parla ch’ ‘e Tribuni, a isso ‘o sentono, e putesse testimonia’ contro a te!

Giosuè                 E’ chesto che stongo penzanne… chillo Vescovo s’adda sta’ zitto… pe’ sempe!

Letizia                  E comme putissi fa’… ‘o vuo’ accidere, forze?

Giosuè                 No… l’essa fa’ subbeto, primma ca parla … ma ce sta ‘nu sacco ‘e gente cca’ dinto… nun se po’ fa’!

Letizia                  Allora l’ ‘e scredita’, annanze a tutti quanti!

Giosuè                 Si… e saccio chi ‘o po’ fa’! Canosco a uno impurtante… ce vaco a parla’ ‘nu poco… tu guardame ‘e noci, po’ te faccio ‘nu bello regalo… ‘e capito ca vengo subbeto?

Letizia                  Sì, tanto stongo guardanne pure ‘e pezze ‘e tela…

Giosuè                 Statte accorta ca sì ‘mbruogli fai ‘na brutta fine… ma tanto cca’ nun vene nisciuno… (esce)


Secondo tempo - Scena Quinta

(entra un gruppo di comparse, che inneggiano a Viola e Nereo sposi)

Ferdinando            (applaude in piedi, unendosi alle acclamazioni) Viva gli sposi!

Viola                    (entra al braccio di Nereo) Grazie, grazie… nun tengo ‘o vestito ‘e sposa, ma me sento ‘o stesso comme a ‘na rigina…!

Nereo                  Grazie, gente… l’auguri ce fanno piacere… ma ‘o pranzo ‘e nozze nun l’ammo priparato!

Simmaco              (entra al fianco di Roberto) Cari fratelli, facite buono a da’ l’auguri ‘e sposi, ma fossero meglio l’auguri pe’ essere turnati int’ ‘a chiesa, ricunciliati cu’ Dio! Chisti duie l’anno apprumiso ca nun ‘o lassano cchiù, e pure vui nun v’alluntanate ‘a Cristo, che è sempe l’amico vuostro, pe’ quanti guai e disgrazie ve ponno veni’! Dicitelo pure ‘e figli vuosti… pruvate quanto è bello si tutt’ ‘a famiglia sta ‘n grazia ‘e Dio! E’ overamente ‘o Paraviso ‘n terra, nun guardate a chilli falsi idoli ca ve promettono ricchezza e successo! ‘A pace dint’ ‘o core è l’unica cosa che conta, e chi ‘a prova, ‘o sape buono!

Agata                   (entra) Grazie, Vescovo! I’ me sento comme si fossi nata n’ata vota! Aggio passato ‘e pene ‘e ll’inferno… e ne songo asciuta! Poveri a chilli ca ce capitano doppo muorti… pure si chelli pene nun fossero toste, l’eternità sarria insupportabile!

Roberto                Bella femmena, l’inferno è fuoco vivo, comme ha ditto ‘o Signore Gesù Cristo… ‘e duluri so’ tuosti, e comme!

Nereo                  (andando al suo banco) Allora, paisana! E’ venuto coccheduno?

Letizia                  Nisciuno! Guarda, pure chillo ca venne ‘e noci se n’ è ghiuto a fa’ ‘nu servizio… ma io t’aggio guardato ‘a robba, e tu m’ ‘e da’ ‘nu spiezzo ‘e tela!

Viola                    (andando al suo banco) Fammi vede’ qual’ è ca te piace… (parlano tra loro)

Agata                   (andando al banco di Viola) Aspetta, sposa… comme te chiammi? (parlano tra loro) 

Simmaco              Cari fratelli, pure int’ ‘a vita comune, quanne accattate e vennite, nun ve scurdate ‘e offri’ ogni azione ‘o Signore! Ogni respiro, ogni mumento, penzate che Isso sta a fianco a vuie, e regalatele ‘e gioie e ‘e sufferenze ca ve veneno! Isso ve manna tutte cose, vita, duluri e gioie, pe’ rinfurza’ ‘a fede vosta e pe’ fa’ arripusa’ ogni tanto!


Secondo tempo - Scena Sesta

(suoni di temburello e flauto in crescendo; entra da destra Egisto, con due sacerdotesse al fianco in sontuose tuniche con strascico (stesso modello, ma in diverse tonalità di colore), due schiavi che portano ciascuno un vaso basso, due musici ed altri figuranti. Le sacerdotesse portano un’anfora ciascuna; nella seconda ci sarà dell’acqua)

Giosuè                 (entra dietro il corteo di Egisto e ritorna al suo posto)

Egisto                  (fronteggiando Simmaco) E’ finalmente venuto ‘o mumento ca te dico chello che penzo ‘e te, profeta ‘e chisto nuovo dio inutile e busciardo! Tu nun pierdi occasione pe’ suttomettere  ‘a gente, sulo pe’ arraffa’ denari! Ma oggi ‘e esagerato, cu’ ‘sto rito pe’ tutta Capua! Io te fermerò pe’ sempe!

Simmaco              Tu me puo’ sulo accidere pe’ fermarmi, ma non fermerai Dio!

Roberto                Ma tu chi sì, che te permitti ‘e parla’ accussì ‘o Vescovo?

Egisto                  Fedeli ‘e Mitra, chisto fa finta ca nun sape chi songo io! Te voglio leva’ chesta scusa, sienti: io songo Egisto, oracolo e sommo sacerdote d’ ‘o dio Mitra! ‘A forza soia ‘a sanno tutti quanti, è invincibile, sempe presente e i Misteri suoi songo straordinari! E’ talmente putente che io aggio bisogno ‘e cinche o sei sacerdotesse pe’ soddisfa’ ‘e desideri suoi, quanne trase dint’ ‘a me pe’ parla’ ch’ ‘e fedeli!

Simmaco              Frati miei, penzate che chisto dio è favuzo e crudele! Sulo in Cristo, che ha sufferto senza limiti p’ ‘a salvezza vosta, truvate ‘a speranza d’ ‘a vita eterna, e chi non crere a Isso è cundannato!

Egisto                  E tu, sulo parlanne ‘e speranza futura, lassi chesta gente a campa’ ‘na vita ‘e miserabili, senza nisciuna felicità, senza oracoli, senza nisciuno ca ‘e cura, sempe mortificanno e scamazzanne tutti quanti! Ma io ve faccio vede’ comm’ è ipocrita! Dici, chi ‘a fravecato chesta basilica p’ ‘o dio tuoio e addo’ ‘e pigliato ‘e denari?

Simmaco              L’ordine l’aggio dato io, e ‘e sorde ce l’anno miso tutti i fedeli, p’ ‘a gloria ‘e Sancta Maria Madre di Dio! Chesto ‘o sanno tutti quanti, in città e campagna, e pure ‘nu sacco d’artisti ‘a faticato pe’ senza niente, pure chi ‘a fatto ‘o mosaico int’ ‘a volta!

Egisto                  Tu si’ n’illuso! L’ ‘e fatti fatica’ pe’ niente! Venite cca’, tutti quanti… io ve dongo ‘o sangue d’ ‘o toro justo mo’ sacrificato a Mitra, e ve faccio veni’ forza, salute e ricchezza! Forza, popolo, vieni addo’ me… e tu, sacerdote inutile, guarda chi sceglieranno, tra me e te! Sacerdotesse!

(le sacerdotesse si portano al proscenio, con movenze allusive; i figuranti faranno tutti ala alle due, ed anche Giosuè si porterà vicino a loro)


Secondo tempo - Scena Settima

Simmaco              Fedeli ‘e l’unico Dio, cheste so’ ‘o demonio! Nun ‘e state a senti’!

Egisto                  Statte zitto! Cca’ ce stevamo primma nuie! Pecchè si’ venuto a scucciarci? (a un cenno di Egisto, si avvia la musica) Ancumminciammo ‘o rito!

Silvia                   I’ porto ‘o sanghe ‘e ‘nu vitiello niro

ch’ è stato, poco fa, sacrificato;

‘o tengo cavuro c’ ‘a pelle e c’ ‘o respiro;

si se fa friddo, resterrà quagliato!

Song’ io che sceglio e curo l’animale

‘a quanne nasce, fino a che è maturo;

subito scarto chi se facesse male,

s’adda sacrifica’ sulo chi è puro!

E po’ addimanno ‘a dea Selene ‘n cielo

qual’animale a Mitra è cchiù gradito;

i’ metto ‘ncanne a tutti ‘o poco ‘e velo,

chi resta senza primma, è ‘o preferito!

Chill’animale è ‘o meglio overamente,

e tene ‘o sangue ricco e prufumato!

Vene purtato annanze ‘o dio putente

e dint’ ‘o tempio, subbito scannato!

Rosa                    Io so’ ‘a sacerdotessa d’ ‘a rugiada;

ogni matina ‘a piglio ‘a copp’ ‘e rose;

‘a manna Diana, e ‘a copp’ ‘o cielo care,

quanne Selene sta tutt’annascosa!

 

‘St’acqua lustrale è pura comme ‘a gemma

e fa fa’ puro ‘o sacrificio ‘o dio.

E’ comm’all’oro pulezzato ‘a fiamma,

proprio accussì ‘o pulezza, l’acqua mia!

E pure vuie, nun v’accustate ‘o rito

si nun tenete pura la perzona!

Primma pigliate l’acqua della vita,

e doppo ‘o sangue, ‘nzieme all’ati doni!

Perciò, venite primma a chesta fonte,

pigliatene ‘nu poco ‘n copp’ ‘a faccia,

e quanne site tutti quanti pronti,

capa acalata e aizate tutti ‘e braccia!


Secondo tempo - Scena Settima

Egisto                  (si porta al proscenio tra le due sacerdotesse, braccia tese in fuori, come un saluto romano a due mani; le sacerdotesse pongono davanti a loro i vasi e lo imitano)

                          Ecco ‘o dio Mitra ca s’ incarna in me!

Stateve zitti e datemi obbedienza!

‘Sto corpo mio, mò tene ‘a rinto ‘o Re

ca da’ ricchezza, forza e la putenza!

Ausanne ‘a voce mia ve parla Mitra:

“Facite o’ rito comme ve cumanno,

comme aggio ditto a chisto mio ministro;

ve faccio fa’ ‘nu masculillo ogni anno!

Po’ ve scurdate ‘a peste e ‘a carestia,

ve dongo dieci vote ‘o semmenato,

nisciuna bestia piglia ‘a malatia,

e quanne vene ‘a guerra, ne scampate!

Annanze a me mettiteve ‘nginocchio!

Si coccheduno ‘e me ne parla male,

e me ricusa o me vo fa’ ‘o maluocchio,

scannatammillo, comm’ ‘a n’animale!”

Ferdinando            Maronna d’ ‘o Carmene, aiutaci! Che impressione!

(le due si pongono su un ginocchio; i due schiavi le raggiungono e si pongono in ginocchio accanto a loro, protendendo i loro contenitori; anche Giosuè si fa avanti e si china, come qualche figurante)

Egisto                  Venite tutti quanti a chisto rito,

vui che ‘sto dio temite e rispettate;

pigliatevi chest’acqua della vita,

venite a me, ca ve purificate!

Rosa                    Chest’acqua addora ‘e rose cunsacrate,

vi farrà degni d’accostarvi ‘o dio,

venite annanze, forza! Che aspettate?

Doppo ve vaccio ‘o poco ‘e cumpagnia!

Ferdinando            (fa per alzarsi, ma viene trattenuto dai dignitari)

(la seconda sacerdotessa versa dell’acqua nel vaso dello schiavo vicino che poi egli protende ad Egisto; quest’ultimo, servendosi di un rametto che è già nel vaso, asperge chi gli è vicino; alla fine lo schiavo riprende la sua posizione)

Egisto                  ‘Na goccia ‘e sangue te darrà putenza,

ricchezza e cuntentezza dint’ ‘o core;

‘o dio d’ ‘e cose bone a te ce penza,

e vieni dint’ ‘o tempio, che fai fore?

Silvia                   Venite allora, ‘o dio sarrà contiento,

mo’ site tutti pulezzati e puri;

quanti cchiù simmo, è meglio ‘o godimento,

‘o rito, dint’ ‘o tempio, se fa annuri!

Ferdinando            (fa per alzarsi nuovamente, ma viene scoraggiato dai dignitari)

Roberto                Egisto, e tu dici che ‘o Vescovo è lussurioso? Ma ‘e viri a chesti doie… sacerdotesse? Addo’ se so’ ‘mparate a fa’ chesti cose?

Simmaco              Signore Dio, ferma chesta pazzìa, nun permettere che tanta gente vene tentata ‘a satana… Signore, p’ ‘e meriti d’ ‘o Figlio tuoio, accogli ‘sta preghiera! Tu, che ci ‘e salvati dall’avversari, ‘e confuso ‘e nemici nuosti, aiutaci, ‘e forze nostre nun abbastano!

(la prima sacerdotessa sorridendo in modo provocante inclina la sua anfora per versare il sangue nel vaso dello schiavo vicino, e dimostra prima sorpresa, poi paura, nel vedere che non esce nulla)

Silvia                   Putente sacerdote, ‘o sangue è sparito! 

Giosuè                 ‘O sangue è scumparzo! ‘O dio Mitra nun è cu’ nuie!

(meraviglia e sgomento generale; Ferdinando si segna)

Egisto                  (padroneggiando la situazione) Zitti! Parla l’oracolo d’ ‘o dio Mitra! Isso m’ ‘a subbito spiegato chisto segno meraviglioso! Ce vo’ tutti ‘o tempio suoio, jammo a fa’ ‘nu grande sacrificio nuovo, e ‘o sangue d’ ‘a vittima ‘o pigliate la’! Jammucenne!

(il corteo di Egisto si ricompone ed esce, alcuni figuranti lo seguono; i figuranti nobiliari rimangono in scena) 

Roberto                Vescovo! ‘O sangue d’ ‘e sacrifici è scumparzo! Chisto è’ ‘nu miraculo! E’ tutto merito vuosto!

Tutti                    (raggiungono Simmaco, gridando al miracolo; Ferdinando inneggia anche lui; Giosuè e Letizia si tengono da parte)

Simmaco              Robe’, che dici? (impone il silenzio) Fedeli del Dio vero, nun state a senti’ a Roberto… io nun aggio fatto niente… è stata ‘a vuluntà ‘e Dio, si chella cerimonia barbara è fernuta malamente! Comme l’aggio pregato pecchè intervenisse, accussì mò ‘o jammo a prega’ int’ ‘a basilica pe’ chelle povere anime… forse Iddio nun aspetta che ‘a preghiera nosta pe’ illuminarle… (esce accompagnato da Roberto e da alcuni figuranti; i mercanti ritornano ai loro posti)


Secondo tempo - Scena Ottava

Viola                    Nereo, che jurnata… me so’ stancata proprio… vulessemo truva’ ‘na locanda?

Agata                   Povera spusina! Tu m’ ‘e sempe perduna’ pe’ chello che t’aggo fatto quann’iri piccerella… venite ‘a casa mia… è cca’ annanze, mettite ‘a caretta dint’ ‘o purtone, ‘o spazio ce sta, e ‘o bancariello v’ ‘o guardate d’ ‘a fenesta… io stongo sola… troppo sola cierti vote… me fa’ piacere si venite…

Viola                    Grazie, Agata… io t’aggio perdunato già… Nereo, che dici, a me me piacesse…

Nereo                  Comme vuo’ tu, spusina bella… (a Letizia) tu, femmena… aiutami a carica’ ‘e pezze ‘ncopp’ ‘a carretta, chelle ce l’amma purta’, ‘o bancariello sta buono…

Viola                    Sì… accussì dimane è già muntato… (porge i tessuti a Letizia, che li passa a Nereo, il quale li porta fuori scena, fingendo di caricare il carro; mentre si svolge la scena, Giosuè si avvicina a Agata)

Giosuè                 Allora, si’ cuntenta? Mò ‘o Vescovo sape tutte cose!

Agata                   Ma io nun ne putevo cchiù… e sulo c’ ‘a cunfessione d’ ‘e peccati uno po’ fa’ pace cu’ Dio… mò stongo in pace c’ ‘a cuscienza mia… me sento comme si fosse liggera, vacante…

Giosuè                 E io pe’ causa toia aggio perduto ‘o sacrifico nuovo a Mitra! Forze ‘anno pigliato dui tori… che cosa grande… e io nun ce pozzo i’!

Agata                   Ma va’, chi te tene?

Giosuè                 Io canosco ll’arte toia… tu ‘e fa’ ‘nu sortilegio… mò mò!

Agata                   I’ mò aggio fatto pace cu’ Dio! Tu si’ pazzo! Vavattenne!

Giosuè                 O fai chello ca te dico o io… acciro ‘a guagliona incinta!

Agata                   Nun puo’ fa’ chesto! E po’, nun te mitte paura d’ ‘o marito?

Giosuè                 Hi! Pur’isso è ‘e carne… primma isso, a tradimento… e po’ a essa ‘a scanno, pe’ Mitra… comme facietti allora… doppio sacrificio… anzi… so’ tre!

Agata                   Tu si’ ‘nu pazzo! Nun te mietti appaura d’ ‘o giudizio ‘e Dio?

Giosuè                 ‘O dio mio se chiamma Mitra, a isso le piace ‘o profumo d’ ‘o sangue… mi farrà turnare ricco n’ata vota! Allora?

Agata                   Lascia sta’ ‘a sposa… che te serve?

Giosuè                 Mi serve che chillo Vescovo nun parla c’ ‘o Pretore…

Agata                   Statte zitto, ‘anno fernuto! Lassa ca c’avviammo, e po’… ce verimmo… e che Dio me perdoni!

Viola                    Allora, Agata… pe’ ‘do se va?

Agata                   Ecco, venite cu’ me… (a Nereo) tu che si’ forte, puorte ‘a carretta… (esce con Viola e Nereo)

Letizia                  (con un pezzo di tessuto in mano) Ehi, v’aspetto dimani… e grazie! (a Giosuè) ‘E visto? Me so’ guaragnata ‘a tela!

Giosuè                 Tu putissi guaragna’ ancora, si vulissi…

Letizia                  Vai int’ ‘a chillo vico… ‘o viri? Ce sta ‘a locanda chiena ‘e femmene comme vuo’ tu!

Giosuè                 Ma no, che ‘e capito? Chella è Agata che le serve ‘na femmena… vo’ fa’ ‘nu canto ‘e ringraziamento… ‘a invitato pure a me… (prendendola per un braccio) jammo, doppo te faccio ‘nu bello regalo…

Letizia                  Io nun saccio canta’! (si divincola ed esce)

Giosuè                 Che femmena furtunata! Te si’ sarvata uno piezzo! (esce)

Ferdinando            ‘O verite che avevo ragione? E vui sempe a cunziglia’ prudenza, calma, a dicere che nun è overo… ma qua’ nun è overo? Chillo s’adda appennere! Ogni doie e tre vo’ accidere a coccheduno! E’ n’assassino matriculato!


Secondo tempo - Scena Nona

Roberto                (entra da sinistra con Simmaco) Vescovo Simmaco, nun ce stanno cchiù… so’ rimasti sulo ‘e banchi!

Simmaco              Hai ragione, Roberto, ma chi ‘a lassato ‘o banco, nun è luntano!

Giosuè                 (entra da destra) Aho, jatevenne! V’aggio sentuti! Me vulevate arrubba’ ‘e noci, eh?

Simmaco              No, frato mio, nun ce serve niente, tenimmo tutte cose.

Giosuè                 Tu si’ ‘o Vescovo, overo? Che sai ‘e me?

Simmaco              Frato mio, io saccio sulo che si’ ‘nu peccatore comme a me, avimmo bisogno tutti e duie d’ ‘a misericordia ‘e Dio!

Roberto                Vescovo, chisto è chillo che ‘a…

Simmaco              (interrompendo) E’ ‘nu povero peccatore, comme a me e a te… Nun serve sape’ ‘ati cose. Si decide ‘e ricorrere ‘o perdono ‘e Dio, sarrà meglio ‘e me. Isso almeno se po’ cunfessa’… io aggia i’ addo’ Paolino a Nola, e nun è tanto facile!

Giosuè                 Allora tu nun sai niente?

Simmaco              Te l’aggio ditto già, frato mio. A me ‘e fatti d’ ‘a terra nun me ‘mportano, a me m’interessano l’anime. E si te cunfiessi ‘e peccati, chello che dici, pe’ me resta segreto, e m’ ‘e porto sotto terra cu’ me.

Giosuè                 Nun ce credo!

Roberto                Ma tu creri a Dio?

Giosuè                 Io crero a Mitra! Quann’ero giovane m’ ‘a fatto ricco, po’ s’ è scurdato ‘e me…

Simmaco              ‘O dio tuoio nun esiste. Tu stesso ‘e visto e t’ ‘o sienti che nun ce sta…

Agata                   (entra da sinistra) Giosuè! Oh… Vescovo, scusate… stevo aspettanne a chisto…

Giosuè                 Ah! E essa che ‘a fatto, neh Vescovo?

Simmaco              E’ ‘na peccatrice comme a me e a te… sulo che l’anima soia mò è pulita, e chello che m’ ‘a ditto io nun ‘o pozzo dicere a nisciuno… fa’ cunto ca me l’aggio scurdato!

Giosuè                 Allora si io facessi comme a essa… chello ca dico io nun ‘o puo’ dicere a nisciuno? Manco ‘o Prefetto o ‘o Console?

Roberto                Ma manco si ‘o pigliano ch’ ‘e tenaglie ‘o po’ dicere!

Simmaco              Proprio accussì. Allora, te vuo’ cunfessa’ e fa’ pace cu’ Dio?

Giosuè                 E che me da’ ‘a reta chisto Dio?

Simmaco              Te regala l’ammore, ‘a pace dint’ ‘o core e ‘a vita eterna!

Agata                   E’ accussì! Proprio comme te dicevo io!

Giosuè                 Ma nun me farrà ricco?

Simmaco              Nuie cristiani simmo chiammati busciardi, eppure dicimmo ‘a verità; scanusciuti, eppure ce sanno tutti quanti; malati, e invece campammo; castigati, ma nun murimmo; afflitti, ma sempe cuntienti; poverielli, ma faciamo ricchi a ‘nu sacco ‘e gente; gente che nun tene niente e invece tenimmo tutte cose!

Giosuè                 Io nun saccio che aggia fa’… Mitra ‘o capisco… ormai saccio tutte cose… cca’ ‘essa ‘ncumincia’ ‘a capo, comme si fussi guagliunciello…

Roberto                Vescovo, famme dicere ‘na cosa… Giosuè, pare che tu stai facenne ‘nu piacere a Dio, ma guarda che ‘o piacere t’ ‘o sta facenne Isso! T’ ‘a scevuto, te dà ‘nu poco ‘e luce p’ ‘o vede’… ma comme quann’iri piccirillo e nun capivi niente ‘e che vuleva patete, mò che vuo’ capi? Puo’ sulo da’ ‘na risposta… tieni doie pussibilità…

Simmaco              O dici “sì” e allora se farà festa ‘n Cielo… o te stai comme a mò… e Isso cuntinuerà, c’ ‘a pacienza ca tene sul’isso, a tuzzuliea’ ‘a porta toia, fino a quanne campi… vieni cu’ me, te pozzo spiega’ cocche cosa, e po’ scigli tu… (prende Giosuè al braccio ed escono insieme)

Agata                   Ringraziammo a Dio! Diacono… dimme ‘na cosa… ma fa’ ‘na fattura è peccato, overo?

Roberto                E che m’addimanni a fa? Tutto chello che nun puo’ dicere ‘a luce d’ ‘o sole, tutto chello che fai annascuso, è peccato! Ma nun te scurda’ che Isso te vere sempe!

Agata                   Ecco… ma si una è custretta… p’evita’, che saccio… che more coccheduno… pure è peccato?

Roberto                E tu chi sì, pe’ dicere che more coccheduno? Si Dio nun vo’, ‘e frecce se sviano, ‘o curtiello se perde, ‘a fune se spezza… nun se po’ fa’ ‘o male penzanne ‘e fa’ bene!

Agata                   Sì, ma… si teneno ‘o curtiello già vicino ‘o cuollo…

Roberto                Comunque ‘o male nun s’adda fa’. T’accireno? E che te levano? Tanto ‘amma muri’, nun sapimmo quanne… e sì fosse chillo ‘o mumento che ‘a vuluto Dio? Nisciuno ‘e nuie è mai sazio ‘e campa’, verimmo sempe ‘nu futuro annanze… ma ‘nu juorno ‘o futuro camminerà pure senza nuie! E tu, nun sapenne niente, vulissi fa’ ‘o giudice?

Agata                   Ma n’ato putesse fa’ male, accirere…

Roberto                So’ fatti suoi. Tu nun fa’ mai ‘o male. Chi ‘essa accirere po’ s’ ‘a vede cu’ Dio. E chi fosse acciso, sarrà ‘nu martire… e va cchiù ampressa ‘n Paraviso. Io pure so’ peccatore, ma campo ogni juorno comme si fosse l’uldimo d’ ‘a vita mia… putesse pure muri’ ‘a n’ato poco, che ne saccio?

Agata                   E’ overo. Grazie… vaco a cucena’ coccosa pe’ chilli dui sposi… comm’ è bello sta’  ‘n pace! (esce)


Secondo tempo - Scena Decima

Rosa                    (entra con un mantello che la copre completamente)  Tu, sacerdote…

Roberto                I’ me chiammo Roberto e nun so’ ancora sacerdote… e tu chi si’? Te serve coccosa?

Rosa                    Io t’aggio visto poco fa, quanne ce steva ‘o Vescovo e Egisto… e pure tu ‘e visto a me!

Roberto                Po’ essere… ma si nun te lievi ‘sta cosa ‘a faccia…

Rosa                    Nun m’ ‘a pozzo leva’. Si vene coccheduno… io so’ venuta cca’ sulo pe’ te… nun l’adda sape’ nisciuno!

Roberto                A me nun me piaceno ‘e cose annascoste… ma che vuo’?

Rosa                    I’ aggio bisogno d’aiuto… so’ sola, senza marito e manco figli… dormo dint’ ‘a ‘nu tempio… e tengo sempe famme… e nun faccio niente annascuso… sulo che me metto scuorno!

Roberto                Puverella! Te faccio ave’ ‘nu sacco ‘e grano, va buono?

Rosa                    E che me ne faccio? Nun tengo addo’ stiparlo, nun tengo addo’ cucina’… me l’essa vennere… ma tu ‘o sai ca si’ ‘na femmena se mette a vennere essa sola…

Roberto                Vai ‘o mercato vicino a coccheduno che te po’ aiuta’…

Rosa                    E pecchè ‘o mercato nun ce vieni tu? (si avvicina a Roberto) Dice che ‘e cristiani ‘anna essere bravi c’ ‘a gente… i’ po’… si’ m’aiuti… nun m’ ‘o tengo! Tu dammi ‘o grano… e po’ te faccio vede’… (si scopre la testa e scuote i capelli)  ‘o grano addo’ ‘o tieni?

Roberto                E nun fa’ accussì… mò nun te miette cchiù scuorno?

Rosa                    E nun ce sta nisciuno!

Roberto                ‘O grano sta dint’ ‘a cucina d’ ‘a sagrestia… ma tu ce ‘a fai a purtà ‘nu sacco chino?

Rosa                    Facimmo mità perono! Si no che me porto cu’ chesti braccia? (si scopre le braccia) Guarda… pozzo mai aiza’ ‘nu sacco chino? Si po’ tenissi ‘na carrettella, ‘o mettimmo ‘ncoppa, ‘o jammo a vennere… e turnammo subbeto! ‘O sai addo jammo? Vicino ‘o tempio ‘e Mitra ce stanno chilli che accattano sulo ‘o grano e ‘a frutta…

Roberto                Nun ‘o saccio… ‘essa addimanna’ ‘o Vescovo… chillo ave bisogno ‘e me ogni tanto…

Rosa                    Facimmo subbeto! Chillo mo’ sta dint’ ‘a basilica, è overo? Mentre che ‘o vai truvanne pe’ l’addimanna’, simmo già turnati… io nun pozzo purta’ ‘nu sacco… ma tengo ‘e cosce bone, pozzo correre… (scopre una caviglia e la gamba, con studiata lentezza) che dici… so’ bona a correre?

Ferdinando            (scattando in piedi) M’ ‘e cunvinto… jammucenne!

Roberto                (riprendendo, perplesso) Però facimmo ampressa…

Rosa                    Nun te preoccupa’… i’ saccio a me! Facimmo ampressa ampressa… (prende Roberto per un braccio ed escono a sinistra)


Secondo tempo - Scena Decima

Silvia                   (entrando con soprabito analogo a quello di Rosa) E chillo è fatto! Mitra, damme ‘na mano che a me è capitato ‘o cchiù tuosto!

Giosuè                 (entrando di fretta da sinistra) ‘E noci mie! ‘E poveri surici miei… famme vede’… (controlla i sacchetti sul banco) so’ muorti!

Silvia                   Sienti, scusa… sai addo’ sta ‘o Vescovo?

Giosuè                 Int’ ‘a basilica… povere bestiulelle mie! Ancumminciammo buono!

Simmaco              (esce rimanendo vicino alle quinte) Frato mio, allora, comme stanno ‘sti suricilli tuoi?

Giosuè                 So’ muorti! Povere bestiulelle mie… a dieci sesterzi l’uno… so’ arruvinato! Bello regalo, aggio avuto! E nun aggio vennuto manco ‘e noci…

Simmaco              E mò vulisse dicere che fosse colpa ‘e Dio?

Silvia                   Va’ vicino ‘o Tempio ‘e Mitra… io ne vengo da la’ e aggio visto che stanno accattanne assai…

Giosuè                 Overamente? Allora ce vaco… (raccoglie in fretta i suoi materiali ed esce)

Simmaco              Sora mia… comme mai stai accussì ‘ntabarrata? Tieni ‘a lebbra?

Silvia                   No… nun me pozzo fa’ vede… aggia parla’ c’ ‘o Vescovo…

Simmaco              Songo io ‘o Vescovo… dici…

Silvia                   Vescovo… io songo sola, senza marito e manco figli… dormo dint’ ‘a ‘nu tempio… quanne se fanno ‘e sacrifici, ll’ati se vottano, s’ammuinano… io nun ce veco niente, nun me sento niente… aggio sentuto ‘e parla’ ‘e te… e vulevo sape’ si me spiegavi… però io songo femmena… si me vereno cca’…

Simmaco              E allora?

Silvia                   Pecchè nun ce ne jammo ‘a cocche parte cchiù tranquilla… e tu me spieghi tutte cose…

Simmaco              Putimmo i’ dint’ ‘a basilica!

Silvia                   No, e si vene coccheduno ca me cunosce?

Simmaco              Significa che pure tu cunusci a isso… e allora? V’incuntrate dint’ ‘a casa ‘e Dio… ‘a luce d’ ‘ sole, nisciuno te po’ critica’!

Silvia                   Ah… però fa cavuro… è overo? (si scopre la testa e scuote i capelli)  

Simmaco              Che belli capilli! Ah, quanto è grande Dio, che bellezze che ‘a saputo cria’!

Silvia                   Ah, te piaceno ‘e capilli miei?

Simmaco              Me piaceno, comme me piace tutto chello che ‘a criato ‘o Signore… n’aucielluzzo, ‘na spiga ‘e grano, ‘na risatella ‘e ‘nu guaglione…

Silvia                   …’na bella guagliona ca abballa…

Simmaco              Fino a ‘nu certo punto… io ‘e guardo sempe comme si fossero figlie mie… ma io nun voglio parla’ ‘e chesto. Tu m’ ‘e addimannato, e io voglio parla’ ‘e Dio… e d’ ‘o Figlio suoio Gesù.

Silvia                   Ah! Nun teneva figlie femmene? A isso le piacevano… ‘e guagliuni? E tu comm’ ‘a pienzi?

Simmaco              Tu nun sai niente, puverella… e nun sai che ‘o stai jastemmanne… ma Isso te perdunerà… si addimanne scusa.

Silvia                   Uh, io nun voglio ca ‘nu dio s’offende… sienti, sienti… (gli si fa vicino) vulessemo fa’ ‘na bella cosa… ‘nzieme? (si allarga il soprabito, scoprendo il collo)

Simmaco              Bella figliola…

Silvia                   (provocante, allargando ancora di più il soprabito e scoprendo le braccia) Vieni cu’ me, allora…

Simmaco              Bella figliola, dicevo… stai perdenne tiempo, cu’ me! Io songo ‘nnammurato ‘e Dio, l’ammore mio è sulo pe’ Isso e nisciuno me po’ cunvincere a fa’ peccato… (allontanandosi) vavattenne, satana! (esce)

Silvia                   E mò che le dico a Egisto? Chisto nun ne vo’ sape’ proprio… nun le piace niente…

Rosa                    (entra da destra) Ohe’, comm’ è ghiuto?

Silvia                   Niente…! Me pare ‘na preta! E tu?

Rosa                    (sghignazzando) Tutto a posto, ma nun so’ pututa stata fino ‘a fine…! Era paricchio che nun se faceva ‘nu sacrificio accussì speciale! Mitra sarrà stato cuntiento assai!

Ferdinando            ‘E capito chesti doie fetenti…! Arrestatele! S’anna appennere pure cheste!

Silvia                   Cca’ ce vo’ coccosa ‘e cchiù meglio… forze ‘na fattura a morte ‘e ‘na strega ‘e chelli bone… o ‘na bella freccia… quanno esce cca’ fore, e se po’ fa’ pure dint’ ‘a basilica, quanne sta assettato!

Rosa                    Hai ragione… e si tu nun c’ è fatto… è inutile ca provo pure io…

Silvia                   L’amma cogliere ‘e surpresa… cunsigliammoce cu’ Egisto…


Secondo tempo - Scena Undicesima

Agata                   (entra e si ferma sul limitare della scena, incerta) Ah! E che ce facite, cca’?

Silvia                   Ohe’, Agata!

Rosa                    E’ Mitra che te manna! Ce serve ll’arte toia!

Agata                   Chell’arte nun ‘a faccio cchiù! Aggio fatto pace cu’ Dio, ‘e Mitra nun ne voglio cchiù senti’ parla’!

Silvia                   (minacciosa) Tu sai che succere a chi rinnega a Mitra… (le alza il mento con un dito) t’ ‘o ricuordi o no?

Rosa                    Fermate Silvia… Agata sta pazzianne… (le abbassa la mano) Agata… stai pazzianne… o ce mettimmo a pazzia’ nuie? T’arricuordi quanto tiempo ce mettimmo, quanne ce vulimmo diverti’?

Ferdinando            (scatta in piedi) Lancieri, a me! Arrestate chesti doie janare!

Agata                   (si sottrae alle due) Mo’ ‘o curtiello nun ‘o tenite! E po’ m’ ‘ata primma acchiappa’… ‘o saccio che site a doie… ma io nun songo cchiù sola… tengo a Dio cu’ me, ca me sta aspettanne dint’ ‘a basilica… (indietreggia, verso sinistra) Salutateme a Mitra!

Egisto                  (entra alle sue spalle, anche lui con un mantello che lo copre completamente, e le cinge il collo con un braccio) Agata… comme stai? E’ ‘nu poco ‘e tiempo che nun te fai vede’ ‘o tempio… che è succieso? Te fussi stancata ‘e Mitra… pure tu?

Silvia                   Fermati, sommo sacerdote… chesta ce serve viva!

Egisto                  Che è succieso… (le leva il braccio dal collo di Agata, ma la mantiene per un braccio; poi si rivolge alle due con tono inquisitorio) …si ce serve chesta strega è pecchè quaccheduno ‘a sbagliato… Silvia!

Silvia                   (si inginocchia davanti a Egisto) Nun è colpa mia! Chillo è peggio ‘e ‘na preta, nun tene niente arò se po’ acchiappa’… te sguiscia a dint’ ‘e mani…

Egisto                  Tu ‘e sbagliato. Sai buono mò che succere…

Silvia                   Damme n’opportunità… pe’ chello che aggio sempe fatto pe’ Mitra!

Egisto                  Nisciuna opportunità! Può sulo fa’ chello che nun ‘e fatto!

Silvia                   Va buono… (si alza; Egisto lascia Agata) Agata!

Agata                   (al centro dei tre, guarda smarrita intorno e non risponde)

Silvia                   Me serve l’arte toia, t’aggio ditto!

Agata                   (smarrita) Che… vuo’?

Silvia                   Voglio’o Vescovo… muorto… mò!

Agata                   E che v’ ‘a fatto?

Rosa                    Nui stevemo tanto buoni… stammo perdenne ‘a gente!

Egisto                  E’ colpa soia! E’ isso che è venuto cca’…

Silvia                   E tu si’ una! A te, te tene fiducia… piglia chisto! (estrae dalla veste un vistoso coltello e glielo porge) E vai!

Agata                   Ma chisto era ‘o mio… è chillo che aggio regalato a Mitra!

Egisto                  E nun s’è perzo…

Rosa                    ‘Na vota ‘o sapivi ausa’ buono… chillo te tene fiducia, ce vai vicino…

Agata                   E si nun ‘o vulesse fa’?

Egisto                  Allora ‘o faccio ausa’ io a Silvia… ce simmo capiti?

Agata                   (assentisce tristemente) Damme cca’! (prende il coltello ed esce a sinistra)

Ferdinando            Fermatela! Chiammate ‘e guardie, avvisate a Simmaco…!

(i dignitari lo fermano)

Egisto                  I’ voglio vede’ Agata che fa. Rosa, vieni appriesso a me, Silvia, fa’ ‘a guardia, avvisace si vene gente…

Silvia                   Va buono… (tra sé) I’ vulevo farle fa’ ‘na fattura, ma accussì facimmo primma…

(Egisto e Rosa escono mostrando cautela nel seguire Agata)


Secondo tempo - Scena Dodicecesima

Giosuè                 (entra da destra e si dirige a sinistra; ha una piccola incertezza nel vedere Silvia)  

Silvia                   Ohe’, addo’ vai?

Giosuè                 Vaco a ringrazia’… Dio! Aggio vennuto tutte cose, pare che so’ turnati ‘e viecchi tiempi…

Silvia                   Ma tu, ‘na vota, nun ghivi addo’ Mitra?

Giosuè                 (mentre fa per rispondere, Egisto e Rosa incappucciati entrano ed escono a destra con passo spedito, ignorando Silvia) Valli a capi’…!

Silvia                   (si allontana fin quasi ad uscire)

Simmaco              (entra, con voce flebile) Aiuto, aiutateme…

Giosuè                 (accore vicino) Vescovo Simmaco, ce stongo io… ‘o verdummaro! Che è succieso? Ve sentite buono?

Simmaco              (gli prende un braccio) Frato mio… vieni… è succieso coccosa int’ ‘a basilica…! Io stevo a prega’… è trasuta ‘na femmena, s’ è assettata arreta a me… aggio sentuto ca se lamentava ‘nu poco… e po’ è caduta! S’ è tirata ‘na curtellata… quanto sangue!

Giosuè                 Currimmmo…! (esce con Simmaco a sinistra)

Silvia                   Agata… ‘e sempe tenuto ‘a capa tosta…! Nun ‘e mai vuluto fa’ chello che te dicevo… sempe a capa toia!

Giosuè                 (entra da sinistra) Silvia… tu si’ femmena… ce serve aiuto pe’ spuglia’ ‘na puverella… ‘o Vescovo ‘a sta cunfessanne, ma si l’ammerecammo è meglio!

Silvia                   Che tene… chesta femmena?

Giosuè                 E’ Agata… forze’a sai pure tu, s’è data ‘na curtellata ‘m pietto… essa sola!

Silvia                   Quanto è trasuto… ‘o curtiello?

Giosuè                 Nun ‘o saccio, pare assai… nun ce l’aggio levato, si no more subbeto! Jammo… e movete!

Silvia                   Te pare facile? Io si traso lla’ dento… so’ morta!

Giosuè                 Siente… i’ so’ sulo ‘nu verdummaro… nun voglio ‘nzigna’ niente a nisciuno, ma saccio ca ce stanno cierti mumenti che nun s’adda penza’ si cunviene o no… e mò chella ‘ave  bisogno! Là dento nun t’accire nisciuno…! Ce sta sulo essa e ‘o Vescovo, che male te po’ fa, chillo? Vai!

Silvia                   (inizia a muoversi, prima piano, poi a passo normale) Aggio capito che ‘aggia fa’… mò ce penzo io… (esce)

Giosuè                 Chisto Vescovo m’ ‘a ‘nfanfarito a me! I’ stevo tanto buono… mah! ‘E surici so’ muorti… ma ‘e noci l’aggio vennute a buon prezzo… e chella bella femmena s’ ‘è accattato pure ‘o bancariello! Forze chisto Dio nun va truvanne che se vennono l’animali… ma nun ce capisco niente…

Letizia                  (entra, frettolosa) Ohe’, bellommo! Justo a te jevo truvanne… me serve ‘nu panaro ‘e noci!

Giosuè                 Justo mò? L’aggio vennute tutte quante poco fa… ‘a casa tengo ‘e cucozze… vulissi chelle?

Letizia                  Ma tu fussi scemo? I’ aggia fa’ ‘o tuortano ch’ ‘e noci…

Giosuè                 …e fai pane e cucozze! E’ buono, a me me piace assai…

Ferdinando            (si alza ed avanza un poco) Giosuè, ma tu fussi scemo overamente? E chi se magna ‘sta schifezza? A proposito… (ai dignitari) Ve vulesseve spiccià a purtarme ‘nu piatto ‘e pasta? Io tengo famme!

Letizia                  (va vicino al Re, pugni sui fianchi) Maistà, ve site pigliata ‘a parte mia! E io mò che ce dico, a chisto?

Ferdinando            (indietreggia, a disagio) Mah… forze…

Giosuè                 Leti’, lassa sta’… Maistà, nun ve prioccupate… Leti’, facimmo pure nuie ‘nu piezzo nuovo… va’ pure tu addo’ Agata…

Letizia                  E te piacesse! Accussì l’applausi t’ ‘e pigli sulo tu!

Giosuè                 Nonzignore, ‘o sai pure tu comme fernisce… 

Letizia                  Allora ripigliammo… Maistà, stateve zitto!

Ferdinando            (mette le dita sulle labbra e si siede nuovamente)

Letizia                  Giosuè, inzomma, che aggia fa’ p’ ‘ave’ doie noci?

Giosuè                 Bella femmena, pe’ mò nun se ne parla… e po’ ce sta ‘na femmena che sta murenne dint’ ‘a basilica… s’ è data ‘na curtellata ‘m pietto… va’ a vede’ si pozzo trasì!

Letizia                  E io ‘essa trasì int’ ‘a ‘na basilica… cristiana? E che me dice Magna Mater?

Giosuè                 Nun te dice niente… comme nun m’ ‘a ditto niente Mitra a me… anzi, ce aggio pure guaragnato!

Letizia                  Vaco a vede’, ma sulo ‘nu mumento! (uscendo a sinistra)


Secondo tempo - Scena Tredicesima

Giosuè                 Hmmm… ce vuleva che parlavo cu’ chesta, pe’ capi’… ce aggio proprio guaragnato… e Mitra nun m’ ‘a mannato a nisciuno pe’ m’accirere… ma allora… fosse overo, ‘o fatto? Fosse che chillo Egisto vuleva sulo ‘e sorde? Cca’ nun m’ ‘anno addimannato niente…

Letizia                  (affacciandosi da sinistra) Ohe’, verdummaro! Vieni cca’, da’ ‘na mano a chisto… Vescovo!

Giosuè                 Comme sta ‘a femmena?

Letizia                  ‘E femmene accurtellate so’ doie! E ce sta ‘nu curtiello sulo! (esce)

Simmaco              (entra, con la tunica sporca di rosso) Ohe’, verdummaro… damme ‘na mano, famme appuggia’… aggio bisogno ‘e ‘nu poco d’aria… me gira ‘a capa… quanto sangue!

Giosuè                 Vieni cca’… (lo guida al centro) Ma che è succieso?

Simmaco              E’ trasuta ‘na femmena, è caruta vicino a me, sentevo addore ‘e sangue… aggio guardato, e teneva ‘nu curtiello ‘m pietto… aggio chiammato aiuto… è trasuta chell’ata… ‘a luvato ‘o curtiello… io stevo cunfessanne ‘a primma, nun l’aggio data assai retta, aggio sentuto sulo che parlava ‘e Mitra… e po’ ‘a dato ‘nu strillo…! Aggio fernuto c’ ‘a primma e aggio sentuto ‘a siconda che se lamentava… pur’essa c’ ‘o curtiello… l’aggio cunfessata pure a essa… e l’aggio fatto l’estrema unzione…, puverelle, quanto sangue…!

Giosuè                 E mò?

Simmaco              E mò stanno ’int’ ‘e mani d’ ‘o Signore. Aggio ditto a chella femmena che sta là d’ ‘e fascia’ strente… vedimmo si ce ‘a fanno… e mò damme ‘na mano…

Giosuè                 Che te serve?

Simmaco              Prega cu’ me pe’ l’anima loro, e pe’ tutti quanti… pe’ te e pe’ me! Ce raccumannammo ‘a divina Misericordia!

Giosuè                 Ma io nun saccio che aggia fa’, che aggia dicere… pe’ me è tutto nuovo…

Simmaco              Fa’ cunto ce Dio è patete. Comme facivi, quanne vulivi coccosa? Avanti fatte ‘o segno d’ ‘a croce cu’ me… (si segna; Giosuè lo imita goffamente) sienti e ‘mparate! E almeno dici “amen” quanne fernisco!

                          Sia sempe gloria ‘o Pate Onnipotente,

‘o Figlio Salvatore che ci ‘a dato,

‘o Spirito d’ammore, pure Santo,

tre dint’ ‘a uno, eterno e mai criato!

Primma di tutt’ ‘e tiempi era accussì,

nun è cagnato mai, manco ‘nu juorno;

pe’ tutt’ ‘e tiempi resterà accussì,

e accussì sia, pe’ vulontà ‘e l’Eterno!

Giosuè                 Nun aggio capito buono… ah, già… “amen!” Cioè ‘e parole l’aggio capite, ma uno… tre… comme po’ essere?

Simmaco              Nun si’ ‘o sulo…, nisciuno ‘a capito chisto mistero, e chi dice che ‘a capito, è busciardo! Nuie simmo sulo pòvere, che ‘amma capi’? Ma tu dillo cu’ sincerità, ca sulo chesto conta…

Ave Maria, donna perfetta,

tu che si’ ‘a grazia fatta perzona,

senza ‘o peccato che Eva facette,

d’ ‘a sposa ‘e Dio è avuto ‘a curona!

Figlia d’ ‘o Pate, mamma d’ ‘o Figlio

e pure sposa d’ ‘o Spirito Santo!

Rispetto a te, nisciuno sta’ meglio,

pe’ ‘na parola ‘o Cielo è cuntiento!

Pe’ tutti quanti si’ beneritta

e beneritto Dio nuosto, Giesù!

‘A che nascette int’ ‘a chella grotta,

Isso t’ ‘e figlio e nun-te lassa cchiù!

Isso te sente pecchè tu si’ ‘a Mamma,

ca perdunasse de juorno e de notte!

Nun simmo buoni, però ce pruvammo;

aiutace pure ‘o mumento d’ ‘a morte!

Giosuè                 Amen…

Ferdinando            Amen!


Secondo tempo - Scena Quattordicesima

                         

Simmaco              Mò nun te scandalizza’! Giesù Cristo, quanne s’ è fatto accirere pe’ nuie, ci ‘a regalato tutto isso stesso, comme si fosse stato n’olocausto! ‘E capito? Perciò mò nun fa’ dumande… m’addimanne doppo!

Giosuè                 Aggio capito… è comme fosse ‘e nun spezza’ ‘o rito… si no nun avimmo ‘o segno!

Simmaco              Ma che te pienzi ‘e essere? Sicondo te, abbasta ‘na preghiera e Dio se fa vivo… pe’ te, pe’ nuie, comme si ammeritassemo ‘na risposta? Nuie simmo sulo pòvere! Servi inutili! Jammucenne, ‘mparati e dici “amen!”.

Eterno Padre, ‘a ‘ncarnazione ‘e Cristo

ci ‘a fatto figli a te pe’ n’ata vota!

Nun c’è regalo cchiù ‘mpurtante ‘e chisto:

è apierto ‘o Paraviso a chi è divoto!

T’offrimmo ‘o corpo e sangue di Giesù,

inzieme all’anima e ‘a soia divinità,

pe’ ll’espiazione, comm’ ‘e ditto tu,

‘e chi dà ancora retta ‘a vanità!

‘A toia misericordia mannancella,

abbracciate ‘sto munno e ‘sto triato!

Nun te ferma’ sultanto ‘e peccatielli

ma dalla pure a chi ce sta ‘mpastato!

Giosuè                 Amen!

Simmaco              Statte zitto ca nun è fernuto!

P’ ‘a dolorosa passione ch’ etta fa’,

pe’ nui e ‘o munno sano, aggi pietà!

(si rivolge al Re) Pure vui, forza! Vulisseve dicere ca peccati nun ne tenite? Rispunnite!

P’ ‘a dolorosa passione ch’ etta fa’…

Ferdinando            (impressionato) Pe’ nui e ‘o munno sano, aggi pietà!

Simmaco              P’ ‘a dolorosa passione ch’ etta fa’…(incita tutti a rispondere)

Tutti                    Pe’ nui e ‘o munno sano, aggi pietà!

(si ripete per altre sette volte; la risposta coinvolgerà gradatamente tutti)   

Simmaco              (alla fine) Santo Dio, Santo Forte, Santo Eterno,

p’ ‘a misericordia toia, scampace l’inferno! (si segna ed invita gli altri a farlo)

Giosuè                 (incerto) Amen… e mò chelli doie… sò sanate?

Simmaco              Ma allora nun ‘e capito niente! Te pienzi ca Dio è comme a ‘nu cane, ca le basta ‘nu sisco, e vene?


Secondo tempo - Scena Quindicesima

Letizia                  (entra, mestamente) Comme te chiammi… Vescovo…

Simmaco              (senza girarsi) Comme stanno?

Letizia                  Dincello ‘o Dio tuoio ca l’aiuta, si tene genio… o coccheduno d’ ‘a famiglia jesse a fa’ ‘nu sacrificio a Esculapio… inzomma stanno ‘nguaiate! ‘O sangue l’aggio lavato… ma s’adda abbrucia’ ‘nu poco ‘e zucchero, si no l’addore ‘a copp’ ‘e scannetielli nun se leva!

Simmaco              Grazie, brava femmena… chi sa Roberto che fine ‘a fatto… mò me servesse proprio ‘na mano…

Giosuè                 Vescovo… i’ nun saccio niente… ma ‘na mano ‘a pozzo da’… (prende Simmaco sotto braccio ed escono)

Letizia                  Magna Mater aiutace! Io vulevo fa’ ‘o tortano… m’ è passato ‘o genio… povere femmene!

Nereo                  (entra con decisione da destra)  Manco cca’ sta’! (a Letizia) Ohe’… tu si’ chella d’ ‘o piezzo ‘e tela… ‘essi visto chella femmena ca steva cca’… Agata?

Letizia                  Sì che l’aggio vista… sta dint’ ‘a basilica… ma mò è comme si nun ce stesse!

Nereo                  Che dici? Ce sta cocche rito, stanno preganne…?

Letizia                  No… sta murenne… ‘na curtellata!

Nereo                  (chiama verso destra) Viola! L’aggio truvata! (tono normale)  Ma comm’ è succieso? Chi le ‘a dato ‘a curtellata?

Viola                    (entrando) Curtellata? Che è?

Letizia                  (tristemente) Ohe’ sposa… chella femmena… dint’ ‘a basilica… s’ è data ‘na curtellata ‘mpietto…

Viola                    Maronna, aiutala! Nereo, jammo a vede’! (esce a sinistra, seguita da Nereo)

Letizia                  Fèrmate…! Niente…! Nun m’ ‘a sentuto… sperammo che ‘o guaglione nun le succere niente… chella basta ‘na ‘mpressione… subbeto jesceno ‘e voglie!

Nereo                  (entra) Io nun ce pozzo sta’… chella è meza spugliata!

Letizia                  Ma ce stanno ‘o Vescovo e ‘o verdummaro…

Nereo                  Sì, ma loro sò cchiù viecchi e pò stanne preganne luntano… io nun saccio prega’…

Letizia                  Tu che ‘a canusci, ce vulissi i’ tu, ‘o tempio ‘e Esculapio?

Nereo                  Ohe’, i’ sò cristiano, nun ce voglio ave’ a che fa’ cu’ chisto!

Letizia                  Dici che si’ cristiano, e nun sai prega’ ‘o Dio tuoio?

Ferdinando            (interviene in scena) Chesta ‘ave proprio ragione! Che cristiano sì, allora? Tu ‘issa fa’ comme faccio io! Pure ‘o Re tuoio…

Letizia                  (interrompe la recitazione secondaria, e va davanti al Re, nella posa precedente) Ohe’, Maistà… stateve zitto!

Ferdinando            (indietreggia, a disagio) Va buono, va buono… (mette le dita a croce sulle labbra e si siede nuovamente)

Letizia                  (riprende) Nere’… allora? Addo’ s’ è visto ‘nu fedele che nun sape prega’?

Nereo                  Io nun aggio mai tenuto tiempo… me so’ battezzato pe’ sta’ appriesso a Viola… chella ce tene assai! Ma nun putevo ghi’ ‘e funzioni a Roma… facevo ‘o gladiatore… e me ne so’ scappato!

Letizia                  Ah, mò capisco tutte cose… si t’acchiappavano, te facevano nuovo nuovo!


Secondo tempo - Scena Sedicesima

Raffaella                   (entra da sinistra, con un soprabito lungo e malridotto con un cappuccio che le copre anche la testa; porterà il nastrino al collo) Facite ‘a carità…

Letizia                       Uh, e tu che vuo’? Nun tengo manco n’asse, vavattenne!

Nereo                       Tu… si’ cristiana, overo?

Raffaella                   Sì, padro’… famme ‘a carità… tengo famme… me so’ vennuta pure duie rienti… damme dui assi… pe’ ‘na fella ‘e pane…

Nereo                       ‘A zi’, cca’ nun tengo denari… ma si’ tieni famme overamente, veco si’ muglierema te da’ coccosa…

Raffaella                   Arrifrischi l’anime d’ ‘o priatorio…

Viola                         (entra da destra) Nereo! Agata… chella puverella… sta cumbinata male overamente… ‘a ritto che… si more, ce putimmo piglia’ ‘a casa soia!

Nereo                       Allora parla? E’ buono, significa che sta meglio…

Viola                         Pure mammà facette accussì… è ‘a migliorìa d’ ‘a morte… è bianca comm’ ‘o latte… sta fredda comme a che… lla’ dento ce fa pure friddo…

Letizia                       E pecchè nun ‘a purtammo fore? E chell’ata?

Viola                         Si ‘a muvimmo, s’arape ‘a ferita… e chell’ata manco parla… se lamenta sulo ogni tanto…

Raffaella                   Facite ‘a carità… bella signo’…

Nereo                       Ah, Viola, ‘sta puverella dice ca tene famme… tenimmo coccosa?

Viola                         Sì! Pane e furmaggio ‘e pecora! Nereo, vaccilli a piglia’!

Nereo                       E nui, che ce magnammo?

Raffaella                   Sulo ‘nu poco, padro’… sulo ‘nu poco…

Nereo                       Vabbuo’! Io vaco! (esce a destra)

Ferdinando                (ad alta voce, girandosi verso i dignitari) Neh, ‘o piatto ‘e pasta pe’ me… state ancora macinanne ‘o grano?

Letizia                       Maistà…!!!

Ferdinando                (a mezza voce) Ma quanto è terribile chesta… peggio ‘e muglierema!

Raffaella                   (a Viola)  Signo’, pe’ ll’anime ca tenite int’ ‘o priatorio…

Viola                         Puverella… ma tieni ‘a lebbra, ca vai cuperta accussì?

Raffaella                   No, no… sulo ca tengo assai friddo… mò mò me so’ vennuta duie rienti… e chillo se n’ è fiuto senza pava’… ogni tanto me jesce ‘nu poco ‘e sangue… e nun ‘o voglio ca se vede… me metto scuorno!

Letizia                       Puorco, fetente… (si fruga in borsa e prende una moneta)  Tiè… faccio cunto che aggio pavato duie spiezzi ‘e tela!

Nereo                       (rientra, con un sacchetto e lo da’ a Raffaella) Tieni, aggio fatto quatto parti, una a te, una a me… e doie pe’… (fa segno a Viola) e ce stanno pure dieci sesterzi…

Viola                         (sorride a Nereo)

Raffaella                   Grazie padro’, grazie, signo’… stanotte pozzo durmi’… mò vaco dint’ ‘a basilica! So’ sicura che ‘o Vescovo nun me mena fore… l’ata notte pure m’ ‘a fatto sta’… Dio ve benerice, pe’ chello che ‘ate fatto! Mò… sentite… vulite magna’ cocche cosa cu’ me?

Ferdinando                (si gira verso i dignitari e mima l’atto del mangiare, facendo gesti di impazienza)

Tutti                         Ma no, ma no, che dici, puverella, magna… addo’ te vuo’ mettere?


Secondo tempo - Scena Diciassettesima

Simmaco                   (entra) Chelli doie puverelle… so’ morte! Mò finalmente s’arreposano, stanno dint’ ‘e braccia ‘e Cristo!

Nereo                       Io vulesse dicere ‘na preghiera… ma nun me l’aggio mai ‘mparate… nun saccio che putesse fa’, pe’ loro!

Simmaco                   Ormai sulo chesto se po’ fa’. (a Viola) Tu, t’arricuordi cocche cosa?

Viola                         Vescovo, no… io… ‘a cunuscevo a Agata… ‘a quann’ero piccerella… tengo ‘na ‘mpressione ‘n cuollo… nun m’arricordo niente!

Simmaco                   Me dispiace… ce sta ‘na preghiera che pare fatta apposta… ma si ‘a dico ‘a sulo nun è ‘a stessa cosa…

Raffaella                   Forze pozzo da’ ‘na mano io…

Simmaco                   Tu? E chi si’? Si’ cristiana?

Raffaella                   Io so’ ‘na serva inutile d’ ‘o Signore… (si segna)

(durante la recita della preghiera [ispirata al Salmo n. 129], gli attori ed i figuranti faranno gradatamente corona intorno a Raffella e Simmaco)

                               ‘Sta voce ca ne vene ‘a dint’ ‘a fossa,

voce di chi è cupierto d’ ‘e peccati,

te chiamma forte, santo Crocefisso,

Signore che pe’ me t’anno ammazzato!

Simmaco                   Chesta è ‘a pruvvidenza divina! Signore, grazie! (si segna anche lui)

O Dio putente, sienti chesta voce,

io manco saccio buono che ‘aggia di’;

sultanto tu, pe’ me, si’ muorto ‘n croce,

sultanto tu puo’ sentere e capi’!

Te voglio di’: Me pento d’ ‘o passato,

‘e quanne t’aggio dato ‘e schiaffi ‘n faccia!

Me metto scuorno, quanto aggio abusato,

nun me mena’ ‘nt’ ‘o fuoco che m’appiccia!

Raffaella                   L’anima mia confida int’ ‘o Signore

      e spera cu’ fiducia ‘a grazia soia.

So’ asciute ‘e cose vane ‘a dint’ ‘o core

trase ‘o perdono ‘e Dio e, appriesso, ‘a gioia!

Simmaco                   Si tu vulissi giudica’ d’ ‘e fatti,

pe’ tutt’e vote che nun t’aggio amato,

Signore Iddio, e io comme t’appatto?

Penzanne ‘a vita mia, stongo ‘nguaiato!

Ma saccio che ‘o perdono nun sparagni,

ca ce vuo’ bene e che ce vuo’ salva’.

Nisciuno ‘e nuie po’ dicere che è degno,

facce ‘sta grazia, nun ce ne caccia’!

Raffaella                   L’anima mia confida int’ ‘o Signore

      e spera cu’ fiducia ‘a grazia soia.

So’ asciute ‘e cose vane ‘a dint’ ‘o core

trase ‘a misericordia e, appriesso, ‘a gioia!

Simmaco                   L’anima mia t’aspetta int’ ‘a nuttata,

caro e m’aìzo, e porto ‘a croce mia;

po’ arriva ‘o sole e schiara ‘sta jurnata,

nun me lassa’ senza ‘o perdono, Dio!

Nui di peccati ne facimmo tanti,

ma ‘a toia misericordia è assai cchiù grossa;

falla scenne ‘n cuollo a tutti quanti,

perdona pure a chi mò va’ ‘int’ ‘a fossa!

Raffaella                   L’anima mia confida int’ ‘o Signore

      e spera cu’ fiducia ‘a grazia soia.

So’ asciute ‘e cose vane ‘a dint’ ‘o core

ce trase ‘a pace eterna e, appriesso, ‘a gioia!

Simmaco                   (si segna, insieme a Raffaella; gli altri rimangono smarriti) Ohi bella femmena, ma tu aro’ vieni?


Secondo tempo - Scena Diciottesima

Raffaella                   Io ne vango ‘a ‘nu posto luntano, ma nun è ‘a primma vota che ce ‘ncuntrammo. Pure aiere m’ ‘e fatto durmi’ dint’ ‘a basilica, te si’ scurdato?

Simmaco                   Ah, ma io ‘a tengo aperta proprio pe’ chesto… ‘e nuttate songo fredde, cca’! Ce stanno paricchi che veneno a durmi’… e cu’ ‘sto cappuccio ‘n capo, chi t’accunosce!

Viola                         Sì, sì cca’ fa friddo, io auso sempe ‘a cupertella!

Letizia                       Allora se po’ sape’ chi si’?

Raffaella                   Io songo sulo ‘na puverella, che ve penzate… (si scopre la testa) oggi ce stongo e dimane…

Viola                         Ma tu assumigli… tu si’ Sebiba! Nereo, guarda! Chesta è Sebiba! Chella schiava che ce aiutaie e po’ scumparette a Roma!

Raffaella                   (scuote la testa, negativamente)

Simmaco                   Sebiba? Chella ballerina che me arapette l’uocchie…? Signore, te ringrazio! Sebiba, m’ ‘e fatto tanto bene, te vulesse fa’ ‘nu regalo… ‘a benerizione d’ ‘o Signore!

Raffaella                   ‘A benerizione l’accetto cu’ gioia… ma io nun songo Sebiba. Me fa piacere ca l’avite canusciuta… io songo ‘a sora soia, e ‘a jevo truvanne…

Viola                         Me dispiace, ma… penzo ca nun ‘a truovi cchiù…

Letizia                       Uh allora è morta, overo?

Simmaco                   E’ viva ‘n Cielo! ‘A semmenta ‘adda muri’ pe’ purta’ frutto… ma chi porta tanto frutto è figlia ‘e Dio e Isso nun s’ ‘e scorda, ‘e figli suoi, e s’ ‘e chiamma ‘n Paraviso!

Raffaella                   Io penzavo ca campava ancora comme schiava, invece è morta… povera sora mia… finalmente libera! Vescovo, tu dici che sta ‘n Paraviso? ‘O core me diceva ca nun ‘a truvavo… però meglio accussì che schiava…

Ferdinando                Io… permettete…? Io però l’essa vuluto vere’ ancora balla’…

Letizia                       (scandalizzata) Maistà…!!!

Ferdinando                (a mezza voce) Mamma d’ ‘ Carmene, cu’ chesta nun se po’ dicere proprio niente!

Raffaella                   (riprendendo) Vescovo… ma tu si’ proprio sicuro che sorema sta ‘n Paraviso?

Simmaco                   Io songo sicuro. Si criri a Gesù Cristo, che è venuto pe’ salvarci, nun può dicere che ‘o Paraviso nun ce sta. Po’, sta scritto pure dint’ ‘o Vangelo, quanne Giesù dice: “Chi parla male d’ ‘o Figlio ‘e l’ommo, sarà perdunato; ma chi jastemma ‘o Spirito Santo nun sarrà perdunato, ne’ mò né mai!”([Mt 12:32]) Chesto significa che ce sta ‘nu giudizio e ‘nu perdono… o ‘na cundanna… e allora ce stanno duie posti… e ‘o posto buono ce va chi è stato perdunato! Soreta ‘a fatto tanto bene… ‘e ‘ntiso stesso tu!

Raffaella                   Allora, Vescovo, dammi ‘sta benerizione… po’ me ne vaco… pure si nun saccio cchiù che via aggia piglia’…

Viola                         Sienti… nui ce simmo truvati cu’ ‘na casa grossa proprio cca’… si te vuo’ arrepusa’ primma… cocche juorno… accussì parlammo ‘nu poco ‘e soreta… ‘o ssai, m’arricordo ancora ‘na cosa che cantava essa… forze te facesse piacere d’ ‘a senti’, e po’… me servesse ‘nu poco ‘e aiuto… chisto adda nascere…(si sfiora la pancia finta)

Raffaella                   Si… me stongo ‘nu poco cu’ te… ‘sto posto me piace… pure c’ ‘a basilica vicina… parlammo ‘nu poco ‘e sorema… tanto… aggio fernuto ‘e cammena’… e po’ ‘e guagliuncielli me piaceno…

Viola                         (contenta) Allora è fatta! Te stai cu’ nuie… quanto vuo’… accussì t’arripuosi, stai ‘nu poco sciupatella… te faccio vede’ ca te rimitti… cucino io!

Raffaella                   E allora… meglio accussì, me dispiace che nun ‘a veco… ‘a vulevo cunsula’ ‘nu poco, chi sa quanti duluri ‘a duvuto suppurta’…

Simmaco                   E chi ‘e nuie nun ne tene? Chi è che se po’ dicere cuntiento, ‘n terra? ‘Amma purta’ tutti quanti a croce… però, quanne ‘a pusammo… facimmo festa! Mò a chella puverella ‘e soreta ‘a sta cunzulanne Giesù… e ‘a Maronna! E sta’ sicura, che ‘o fanno meglio ‘e comme putisse fa’ tu… e si’ tu te putisse stanca’, loro nun se fermano mai! Cunsulata e cuntenta pe’ l’eternità! Ringraziammo ‘o Signore pe’ chi è vivo e pe’ chi è muorto…

Giosuè                      (mentre si svolge l’azione seguente, entra con il coltello sacrificale in mano e si ferma sul limitare della scena a guardare alternativamente, incredulo, Raffaella ed il coltello; i figuranti si scosteranno, lasciandolo isolato; nasconderà il coltello sotto un braccio e si avvicinerà a Raffaela per scrutare anche il suo collo).

Ferdinando                (arretra con la sedia)

Letizia                       (si accosta a Giosuè, fingendo indifferenza)

Nereo                       ‘O ringraziamento ‘o Signore… ‘o faccio io!

Viola                         (lo prende sotto braccio, sorridendo) Che ‘e ‘a fa’ tu? A chesto nun si’ buono!

Nereo                       Ma ‘o Signore ‘o pozzo ringrazia’ ‘a manera mia?

Simmaco                   Pure ‘a sincerità è ammore! Quanne se prega tutti ‘nzieme ‘e preghiere s’anna sape’ pe’ forza, ma si stai sulo, può dicere chello che vuo’!

Nereo                       Ah, allora pozzo parla’ pure io! (assume un atteggiamento da orante)

Ringrazio a Dio pecchè tengo la forza,

pecchè so’ sano e bravo int’ ‘e battaglie;

i’ vinco a tutti quanti dint’ ‘a corza,

saccio ausa’ ‘a spada e tengo ‘a cotta ‘e maglia!

‘A morte m’ ‘a sfiurato sulamente,

e Dio ‘a vuluto ca ‘ncuntrassi a Viola;

mò che ’aggio spusata, finalmente,

ringrazio a Dio p’ ‘a bella famigliola!

Viola                         Invece io dico grazie ‘o mio Signore

pecchè me vonno bene tutti quanti;

tengo cocche difetto, sissignore,

me vaco appiccecanne ch’ ‘e mercanti!

Ma mò che chisto figlio sta arrivanne,

n’ata benerizione che aggio avuto,

me piglio tutt’ ‘e croci ca me manna,

pecchè mò tengo pure chi m’aiuta!

Sarraggio cchiù gentile c’ ‘o marito,

c’ ‘a gente nun me metto a quistiona’,

e a chisto ninno bello e sapurito,

appena nasce, ‘o porto a battezza’!

Simmaco                   Brava… bravi a tutt’ ‘e duie! Accussì se parla c’ ‘o Signore! Si facite ‘na preghiera ‘e cheste ‘o juorno, levate ‘a miezo ‘o riavulo tentatore! Mò venite cu’ me dint’ ‘a basilica… aggia abbenericere ‘sta figliola annanze ‘o quadro d’ ‘a Madonna… (esce con Viola, Nereo e Raffaella)


Secondo tempo - Scena Diciannovesima

Giosuè                      Ma tu ‘e vista a chella? Sicondo te, era ‘nu spirito?

Letizia                       Ma qua’ spirito… se, see… chella ‘a ditto ca s’ è vennuta duie dienti… e teneva famme!

Giosuè                      Mò aggio capito tutte cose, finalmente! Mitra ce l’ave cu’ me pecchè nun aggio fatto buono ‘o servizio! Non saccio comme ‘a fatto… ma chello che aggio ‘ncuminciato ‘o pozzo sempe ferni’…

Letizia                       Ma tu che stai dicenne? ‘E chi parli? Ah! A proposito ‘e famme… tu m’ ‘e dicere ‘na cosa… dice ca te piace pane e cucozza…

Ferdinando                N’ata vota ‘sta schifezza? (incrociando lo sguardo con Letizia) Aggio capito tutte cose! (mette le dita in croce sulla bocca)

Giosuè                      (distratto) Pane e cucozze… si, ma mò tengo che fa… (sbirciando verso le quinte)

Letizia                       Si, ma tu m’ ‘e ditto ca nun si’ spusato! E allora chi t’ ‘o cucina? ‘O fai tu? E ‘o furno ‘o tieni ‘a casa toia? E t’ ‘o magni tu sulo? E quanto tiempo…

Giosuè                      Ohe’, basta! Tu te vuo’ ‘ntrica’ d’ ‘e fatti miei? Io nun t’aggio addimannato niente, perciò…

Letizia                       Male facisti, cumpare mio! Io, ‘e me, te pozzo dicere tutte cose! Songo pulita comm’ ‘all’acqua d’ ‘a surgente e nun tengo niente ‘a annasconnere! Addimanna, che vuo’ sape’? (enumerando) Nun songo spusata, tengo ‘o poco ‘e terra ‘o sole, ‘na casarella ca me lassaie mammema bon’anema, che chella, quanne rimmanette vedova ‘a primma vota, se spusaie cu’ Capa ‘e Pecora ‘o masterascio…

Giosuè                      Mò si nun te stai zitta… t’acciro!

Letizia                       (per nulla intimidita, lo affronta a pugni sui fianchi) Ma tu te pienzi che me mettesse paura ‘e te? Tu vai dicenne che ‘e acciso a chesta, a chella… tu nun sai accirere manco ‘na vallina!

(entrano Nereo, Viola e Raffaella, queste ultime parlando tra loro con voce non udibile)

Giosuè                      (le mostra il coltello) ‘O viri chisto? Pe’ Mitra, t’ ‘o ficco ‘n canne si nun te stai zitta!

Nereo                       (scatta in avanti e immobilizza Giosuè, togliendogli il coltello) E bravo ‘o vicchiariello! Te vulivi ammunna’ ‘e cucozze?

(i figuranti escono, impauriti)

Giosuè                      Pe’ Mitra, damme chisto… io aggio accirere a chella miscredente… te ne approfitti pecchè si’ cchiù giovane, eh?

Simmaco                   (entra) Ma che sta succerenne?

Nereo                       (lascia Giosuè)  Mò chisto m’ ‘o piglio io… me piace! Ma chi vulive accirere?

Giosuè                      (indica Raffaella) Chella schiava… Sebiba… Mitra me s’è arrevutato contro pecchè io nun… l’avevo fatto buono…

Simmaco                   Frato mio… chella Sebiba è morta ‘a tanti anni… chesta è ‘a sora… e vulive accidere a ‘na femmena pe’ ‘nu dio fauzo? E pe’ ave’ doi noci ‘e cchiù? Te si’ scurdato ca ce sta chi è muorto pe’ te, pe’ darti tutt’ ‘o Paraviso?

Raffaella                   Allora tu si’ uno ‘e chilli che ‘a fatto pati’ a sorema?

Viola                         Puverella! (consola Raffaella)

Giosuè                      Sòreta… rinnegava sempe a Mitra pe’… Giesù… l’aggio… l’aggio tagliato ‘o cuollo, sissignore! L’aggio lassata pe’ morta, ma m’ ‘a trovo sempe pe’ ‘nanzi, peggio ‘e primma… è addiventata comme a ‘nu spirito ca me perseguita!

Letizia                       ‘O vi’ ca nun si’ buono a accirere nisciuno…? Tu stai sulo ‘a troppo tiempo… comme a me… a te, te serve ‘nu bastone pe’ t’appuia’, e pure a me, ca so’ anziana… appuoiate ‘n cuollo a me… io po’ te cucino pane e cucozze… te faccio rimettere ‘nu poco…

Simmaco                   E io te pozzo aiuta’ a truva’ ‘a pace che vuo’… a tutt’ ‘e duie…

Letizia                       Sì… ne stongo sentenne troppi, ‘e fatti ca nun me spiego ‘n copp’ ‘a ‘sto Giesù!

Raffaella                   (con voce commossa) Che ‘a ditto sorema quanne ‘a stivi… accerenne?

Giosuè                      (avvicinandosi a Raffaella, alla fine si inginocchia davanti a lei) Nun parlava cu’ me… diceva sulo “Giesù.”. Nun se ribellava manco… purtava ‘a fascia comme a te… ce l’aggio levata e… era cuntenta! Teneva l’uocchie apierti e lucenti… brillavano comme l’acqua d’ ‘a notte quanne jesce ‘o sole… sempe a dicere chella parola, senza ‘nu lamiento… po’… s’ è stata zitta… s’ è lassata pe’ terra… ‘na femmena ca steva cu’ me l’ ‘a chiuse chill’uocchie… ancora lucenti… pe’ me era morta… perdoname!

Viola                         (si stringe a Raffaella) Sòreta è ‘na santa martire!

(i figuranti rientrano gradatamente)

Raffaella                   Nun songo io che t’aggia perduna’. Io nun songo nisciuno… Vescovo Simmaco… mò so’ cunvinta ca sorema sta ‘n Paraviso!

Letizia                       (fa rialzare Giosuè) Jammo bello… e tu chesto tenivi ‘n cuorpo? E comm’  ‘e fatto, pe’ tanto tiempo… senza parla’ cu’ nisciuno, senza sfugarte ‘nu poco? (lo porta in disparte)


Secondo tempo - Scena Ventesima

 (i figuranti e gli altri attori fanno corona a Simmaco e Raffaella)

Simmaco                   Frati miei, oggi ‘a Maronna ce ‘a fatto tanti ‘e chelli grazie, senza che manco l’ate addimannate! Doie femmene se so’ salvate ‘n punto ‘e morte, ‘na famiglia è trasuta dint’ ‘a grazia ‘e Dio, ‘na povera pellegrina ‘a truvato ‘a pace, doie anime perdute stanno turnanne ‘a casa d’ ‘o Padre… e chi sa quanto ‘ato bene ‘a fatto, e nuie manco ‘o sapimmo! Comme ‘ammo ringraziato a Dio, mò nun ce putimmo scurda’ ‘e Essa…

Nereo                       Zitti! Vescovo… aspetta… ‘o sentite chisto lamento?

Tutti                         Ma che dici, no, no, ma quanne mai…

Nereo                       Io facenne accussì, aggio scampato ‘a morte! (esce con circospezione)

Raffaella                   Vescovo, io ringrazio ‘a Madonna pecchè so’ una d’ ‘e cchiù cuntente…

Maronna benedetta e Madre ‘e Dio,

      Che grande cosa ‘a pace ritruvata!

Mò sta’ cchiù ‘n grazia ‘e Dio l’anema mia,

sora Sebiba, ‘n Cielo aggio truvata!

L’aggio cercata pe’ tanti paisi,

e quanto aggio duvuto cammena’;

mò chesta croce, ca Dio ‘n cuollo m’ ‘a miso,

l’aggio pusata, e pozzo respira’!

Vulevo farle sulo ‘na carezza,

vulevo dicere ‘e stare cchiù serena,

comme a ‘na mamma, vulevo farle ‘a trezza,

vasarla ‘n fronte e di’: “Te voglio bene!”.

Invece mò te prego comme a santa,

e aspetto ‘o juorno justo pe’ veni’;

pe’ te chist’uocchie nun farranno ‘o chianto,

sulo chi crede a Dio me po’ capi’!

Nereo                       (rientra da destra portando Roberto supino sul carretto, con una vistosa fasciatura al collo, macchiata di rosso) Nisciuno ca senteva niente, eh? Vescovo, chisto sta ‘nguaiato!

Simmaco                   Roberto! Ma che t’ è succieso…? (si china su di lui)

Giosuè                      (scostando leggermente la fasciatura) E’ capitato int’ ‘e mani ‘e cocche sacerdote ‘e Mitra…

Nereo                       Ma ‘a tagliato troppo abbascio… o vuleva farlo muri’ lentamente… chilli fetienti… trattato peggio ‘e ‘na bestia!

Simmaco                   Stateve zitti… chisto è ancora vivo, ma nun risponne, nun ‘o pozzo manco cunfessa’…

Viola                         Comme sta janco!

Simmaco                   Zitti… (in ginocchio, braccia aperte, al centro del palco)

Maronna mia, ‘sto juorno assai speciale

‘sto puveriello ‘a avuto ‘a mala ciorta,

l’anno scannato comme a n’animale,

già s’ è partita e sta arrivanne ‘a morte!

Maronna mia, ‘sto povero guaglione,

‘nu servo della vigna comme a me,

‘a sempe dimustrato ‘a divuzione,

chello che ‘a fatto, ‘a dedicato a te!

Maronna mia, tu che sai tutte cose,

sai pure ca nun saccio dumanda’,

ce rimettimmo a te, divina rosa,

a Dio piacenne, Roberto po’ campa’!

Maronna mia, tu sai che cosa è meglio;

‘o bene suoio, se sape, è ‘o Paraviso,

pe’ isso tu ‘e sufferto, inzieme ‘o Figlio

ce ‘a aperto ‘a porta Giesù Cristo appiso!

Maronna mia, nun fa’ che chesti pene

non servono p’ ‘o povero Roberto!

Cristo Signore, ca ce vo’ tanto bene,

dincelle che ‘o pigliasse a braccia aperte!

Maronna mia, si po’ nun ‘a fernuto,

ma tene ancora ‘a vigna da cura’,

fancillo arriturnare cu’ salute,

chillo le piace overo ‘e fatica’!

Maronna mia, te dammo gloria e onore,

tu che si ‘a rigina dell’Apostoli,

dincello tu a Cristo Salvatore

ca p’e Roberto facesse ‘nu…

(Roberto si mette a sedere da solo)

Viola                         (indicando Roberto)  Miraculo! Miraculo… guardate…!

Giosuè                      ‘O spirito! ‘O spirito!

Letizia                       Giosuè… calmate… chillo nun è ‘nu spirito… io me faccio cristiana… ‘na cose ‘e cheste nun s’ è mai vista!

Giosuè                      (trasognato) Nun è ‘nu spirito? Ma allora… ma allora… ‘a stessa cosa adda essere succieso a chella guagliona…, Sebiba!

Nereo                       Ma comme, cu’ ‘na ferita ‘e cheste… ‘o sangue che ‘e lassato p’ ‘a via… e tu te susi? Vescovo…, è ‘nu miraculo!

Tutti                         Miracolo, miracolo! N’ato miracolo! Vescovo Santo! Sì, santo!

Simmaco                   Ma che dicite? Io songo sulo ‘nu povero servo  ‘e Dio… jammo a ringrazia’ ‘a Isso e ‘a Maronna…! Robe’… mò ce aiutammo ‘nzieme a cammena’… (lo prende sottobraccio)

Roberto                     (annuisce; tenendosi la fasciatura) Sì, si… oggi sogno nato n’ata vota!

Giosuè                      Aspettate, Vescovo… chello che ‘ate fatto a chisti duie poco fa… (indica Viola e Nereo e abbraccia Silvana) se putesse fa’ pure pe’ nuie?

Letizia                       (a Giosuè) Ma tu dici overo? Te vuo’ spusa’… a me…? (lo abbraccia)

Simmaco                   Ve vulite spusa’ annanze a Dio? Ma che bella nutizia ca me date… frati miei, oggi è festa, grossa festa ‘n cielo!

Giosuè                      Eh, ce sta poco ‘a fa’! Chisto Dio tuoio è capace pure ‘e svia’ ‘e curtellate…

Simmaco                   Po’ viri che è capace ‘e fa’… te fa senti’ felice sempe, basta che le sì amico e ‘o vuo’ bene…

Giosuè                      Po’ essere pure ca… cunvince ‘sta femmena a starse zitta?

Simmaco                   Nun te prioccupa’, quanne vuo’ pace e silenzio, vieni dint’ ‘a basilica… e te ‘nzegno a prega’… anzi, jammo tutti quanti a ringrazia’ Dio e ‘a Maronna, che oggi è ancora ‘a festa soia…

                               (esce salmodiando al braccio di Roberto, seguito da tutti; ad ogni sua invocazione risponderà Roberto con “Prega per noi”, e mano a mano si uniranno nella risposta anche tutti gli altri)

Santa Madre di Dio,

Santa Vergine delle vergini,

Madre di Cristo,

Madre della Chiesa,

Madre della divina grazia,

Madre purissima,…


Secondo tempo - Scena Ventunesima

Ferdinando                (applaudendo) E bravi ‘e sudditi miei… le voglio fa’ proprio ‘nu regalo… ‘nu regalo… (si rivolge ai dignitari)  comme se dice?

Vittorio                     ‘Nu regalo… regale!

Marianna                   Maestà… ‘nu regalo… munifico!

Ferdinando                Ce sta poco ‘a fa’! Sulo ‘e femmene capisceno cierti cose! Munifico… me piace… ma… addo’ sta chillo Simmaco? Simmaco! Simmacooo!

Simmaco                   (esce zoppicando) Dicite, maistà!

Ferdinando                Avite fatto ‘nu capolavoro e ‘o Re vuosto l’ è piaciuto assai… bravi! ‘O regalo ci esce… ‘nu regalo… (schiocca le dita, non ricordando la parola) mugnificente! E ve faccio veni’ pure ‘a Reggia a fa’ ‘o triato, accussi’ ‘o spettacolo ‘o vere pure ‘a rigina…

Simmaco                   Maistà, pe’ nuie è ‘nu piacere… quanne putimmo veni’?

Ferdinando                Facimmo dimane! Però… ‘ata cagna’ ‘na cosa!

Simmaco                   E che ‘amma cagna’, Maistà?

Ferdinando                Ah… ecco… ma chella Sebiba… chella è ‘na bella figliola… me piace assai comme abballa… facite ‘nu sforzo… tanto, ve truvate, facite ‘nu miraculo pure pe’ essa… nun ‘a facite muri’!

fine

    Questo copione è stato visto
  • 0 volte nelle ultime 48 ore
  • 0 volte nell' ultima settimana
  • 0 volte nell' ultimo mese
  • 1 volte nell' arco di un'anno