TRE VOOLT « A »
di Aleardo Noli (2002)
Scena in 1 atto
Classico triangolo sentimentale di personaggi DAL NOME CHE INIZIA PER “A”; il lato maschile del triangolo è defunto da qualche mese, e si trova in attesa di giudizio. Gli viene concesso di fare una capatina in terra, ovviamente non visto; possiede qualche piccolo potere,e, nella sua città, s’imbatte nella propria vedova e nell’amica che egli ha avuto.........
Su d’una panchina comunale, al parco.............
I personaggi: La prima “A” del triangolo è Agenore, il defunto marito (quasi) esemplare, visibile al pubblico ma non alle donne che aveva avuto in vita. La seconda “A” è Annunciata, moglie leggermente pedante, abbastanza elegante. La terza “A” è Amanda, l’amica del morto, moderna, un po’ spregiudicata, ottimamente curata. Il defunto sarà vestito completamente di bianco, con un cappellino che porta la scritta di uno sponsor; occhiali da sole.
Inizialmente, sulla panchina c’è solamente Agenore, inteno a scorrere il “Corriere della sera”.....................
AGENORE Off, credevi che dèla paart de là, gh’eva la püssée bèla libertaa, e inveci a l’è com’è süla tèra, o quasi. Presempi: Vüna di ropp che i m’à conzigliaa prima de damm al permèss de vegnì ‘na corza süla tèra, l’è staja quela de leeng “preferibilmente” “L’Avvenire”. Ma mì somm furbo, e oo tolt al “Corriere”, perchè......vardi se gh’è sü un quaj anuncio de quii che......ah, eco: “AAA Affascinante bellissima riceve amici veramente distinti 9-18 zona Giambellino....citofonare Ugo..........”
AMANDA (PORTA UNA RIVISTA, PASSEGGIA UN POCO E POI SIEDE) Per l’amoor del cieel! Meno male che gh’è ‘na bancheta voeuja! An pòdi pü!
AGENORE Eco, questa a l’è la mia segonda “A” del mè “ménage” de quaand sevi chì süla tèra. Che emozion! Amanda, se podess ammò.......Ah, ma devi stacch atenti de migna sgarà, sennò, adio piani alti, i ma manda agli inferi!
AMANDA (TRASOGNATA) A l’è inütil, pòdi migna desmentegà al mè Agenore, che ciamavi Aggy nel’ intimitaa...beh, propi mè l’eva poeu migna, per véss sincera, ma per mì....generoos....ah, come l’eva generoos!
AGENORE Già, sevi propi generoos; tant che la moa dòna, che la rispoond al dolce nome de Annunciata, la seva pü come fà per rivà ala fin del mees.........
AMANDA Mì, al soo migna come faroo a nà avanti...al doloo al sa veed migna de foeura, ma de deent....de deent.....(FAZZOLETTO AGLI OCCHI)
AGENORE A veduff come a l’è sensibila? Un tesoor....sì, voeuri dì che l’à metüu via un tesoor con mì...per lée sevi ‘na vera miniera, perchè, per mì,lée....(SOSPIRO)
ANNUNCIATA (GIUNGENDO, SALUTA AMANDA) Bonasira.
AMANDA Buonasera.
ANNUNCIATA Pòdi setass giô? L’è libera?
AMANDA Ah, per véss libera, purtropp somm libera....Ah, la voeureva dì la bancheta? Sì, sì, l’è libera, la sa figüra!
ANNUNCIATA Mì, a goo bisoeugn dela bancheta, la scüsa, migna de lée!
AGENORE Semm a post! La terza “A” del nòss vecc triangol equilatero. Vardée che l’è verameent ridicol, come diseva quel là. Che incontro-scontro! Se fudess migna già mort, moriress in quel preciis istaant chì.
ANNUNCIATA L’è staja ‘na bèla giornada, neh?
AMANDA Già, propi bèla, la g’à reson.
AGENORE Conversazion varia e interessanta!
ANNUNCIATA Magari un zich còlda, ma inzoma.....Signorina, a l’oo mai vista de ‘sti paart. Perchè a l’è signorina, eh?
AMANDA (SECCATA) Sa capiss che somm signorina!
ANNUNCIATA Sa pò migna vedell del de foeu!
AMANDA Cosa? Ma la ma faga al santo piesé! No, somm propi migna de ‘sti paart, a stoo in un quartieer püssée in là; ogni taant a vegni in quisti giardinitt; anca se, a dì la veritaa, a i’è un poo pelaa...........
ANNUNCIATA (TRASOGNATA) Pelaa....anca al mè poor omm a l’eva......
AMANDA .........un giardinett?
ANNUNCIATA No, che la scherza migna con al mè doloo....che a l’è fort com’è...com’è...........
AGENORE ..........come ‘na legnada sui deenc.
ANNUNCIATA ..........com’è...............
AMANDA .........com’è ‘na legnada sui deenc.
AGENORE E mì cosa oo dii?
ANNUNCIATA Fort come al ligamm che na tegneva inzema de tanti ann....
AGENORE ............indissolubile..............
ANNUNCIATA ............indissolubile...........eterno. E inveci, al ma lassaa chì de per mì.
AMANDA A l’è....naj via?
ANNUNCIATA L’ a pò ben dill. Un viacc pütost loongh.
AMANDA L’è naj via......in compagnia? La ma scüsa, i’è migna afari mè, ma.....l’è naj con un’altra dòna? Cert che l’è un gran doloo!
AGENORE Beh, inzoma, se t’avress tiraa a drée anca tì, cara Amanda, al saress staj migna ‘sto gran doloo!
ANNUNCIATA Ma come la sa permett? Al mè poor omm a l’eva ‘na perzona seria (ASCIUGA IL PIANTO). A l’è............partii............inscì......senza visamm....... l’è mancaa.........se sa pò dì inscì!
AMANDA In parole povere.......l’è crepaa!
AGENORE Come la s’è rafinada ultimameent l’Amanda!
ANNUNCIATA Ma la siéess un poo püssée fina, che diamine!
AMANDA La varda che l’è ‘na roba che prest o tardi la capita a tücc; e al sò omm a l’eva migna inscì speciaal.
AGENORE Et capii? Quaand g’a tôca a lée.....e quaand inveci g’a tôca ai oltri..............
ANNUNCIATA Vialtri giovin a sii senza coeur, eco.
AMANDA Ma la ma faga migna vegnì de..........e poeu, l’è migna question de giovin o vécc, al coeur l’è sempro al coeur.
ANNUNCIATA E difati al mè poor omm a l’è moort de coeur. Un colpett, inscì, via de ca’, in tèra straniera...............
AMANDA Ah, l’è moort a l’ester? Legione straniera o emigraant?
AGENORE Chì, la padèla la sa fa sbrojenta....per mia bôna fortüna i ma veed migna, se de no.................
ANNUNCIATA No, disevi tèra straniera perchè i l’à trovaa per strada....la sa...al capita a tanti........
AMANDA (COLPITA DA VAGHI DUBBI) Già, già, al capita a tanti........
AGENORE La tragedia incombe....speremm che i troeuva altro de parlà, se de no i sa ciapa per i cavì...........
ANNUNCIATA Al m’eva dii che al nava a tô i zigarett....ma i l’à trovaa a un chilometro de ca’.....e poeu, ma vegn in meent ‘na roba!
AMANDA ..............che al fumava migna!
ANNUNCIATA Ma come l’à faj a indovinà? Oo gnammò capii perchè al m’è saltaa foeura con ‘na trovada simila.
AGENORE .....perchè ma n’eva migna vegnüu in meent vüna mej,e, ormai, una vòlta verdüu bôca “Voce dal sen fuggita più richiamar non vale; non si trattien lo strale, quando dall’arco uscì”.
AMANDA (CON NONCURANZA, SI GUARDA LE UNGHIE E DICE) La veed, cara lée, i omen, a un certo punto dèla vita, g’a vegn in meent de na’ a toeu i zigarett, e i torna pü indrée....L’omm al sta migna tropp teemp ligaa ala stéssa cavéza, veh!
ANNUNCIATA Ma al mè al saress tornaa ammò indrée, a somm sicüra; l’è domà staj impedii “dall’avverso destino”!
AGENORE Pòra donéta, l’eva migna un granché, ma l’è inocenta com’è un fiolett deent nèla cüna.
AMANDA Ma che avverso destino d’Egitt! La sa regorda ben che i zigarett, g’al ripeti ammò, i’è sempro staj la scüsa püssée classica. Magari al voeureva pü tornà indrée del bon.
ANNUNCIATA Alôra, saress naja a “Chi l’ha visto?”, e g’avress dii a quela.....a quela...Federica Sciarelli lì de na’ a cercamel.
AMANDA Propi una bèla idea, sì. Inscì, al sa inamorava de quela lì, e al ga restava là a Rai Tre.
AGENORE Ma alôra, i donn, per inventà stori, i’è faj aposta.
ANNUNCIATA (SOSPIRANDO) Eh, al mè omett....al saress staj sempro disponibil con i sò fioeu............
AMANDA Perchè, a gh’ii fioeu?
ANNUNCIATA No!
AMANDA E alôra, cosa la parla de fà de fioeu?
ANNUNCIATA Che la ma lassa finì. Disevi che al saress sempro staj disponibil coi sò fioeu se g’an avessum avüu.
AGENORE Oh, geent! (RIVOLTO AL PUBBLICO) Questa l’è la mia Annunciata. Che resonà profoond, eh? Beh, va disi una roba: Mì, somm chì, nè sôra nè sôta, senza destinazion per al momeent. Ma anca chì, i resonà i’è migna inscì ciaar; tücc i rüza per rivà prim e i sa gnanca per na’ indôa.....racomandazion.....sponsors (INDICA IL CAPPELLINO) ......vederemm......Intaant, stemm a sentì l’interessaant parlà di mè dô dònn.
AMANDA Decisameent, lée l’è ‘na dòna singolaar.
AGENORE Per fortüna a l’è singolaar, che se l’eva pluraal, a navi al manicomi.
ANNUNCIATA Oh, beh, somm ‘na dòna come tücc i altri.
AGENORE Quasi. A l’è quasi umana.
AMANDA Apunto. Una dòna com’è tücc, la véed, l’è pü assée per l’omm moderno. La sà, quell che “non deve chiedere mai”.
ANNUNCIATA Ma al mè omm, quaand al gh’eva voeuja, al domandava.
AMANDA Eco, l’è migna giüst. Deef vessich intesa, complicitaa, inscì al deev véss.
ANNUNCIATA Capissi migna un granché. Ma per forza che al doveva domandà. Somm migna ‘na maga, per indovinà che al gh’eva voeuja....presempi dèl ròst pütost che dèl léss.
AGENORE E queste erano le “performances” dèla nòssa Annunciata..
AMANDA (SCOPPIA A RIDERE) Ma.....ma....la ma disa migna....lée..lée...la parlava de mangià?
ANNUNCIATA Ma tana che sì, de cosa la credeva che parlass?
AMANDA Ma....nagôtt...nagôtt...ma cambiemm argomeent. Come l’eva cognossüu al sò omm?
ANNUNCIATA (PRONTA) A l’ospedaa.
AGENORE Inizio entusiasmante.
AMANDA Indôa? Ma paar che al siess migna al post püssée bèll del moond per cognoss quajdùn.
ANNUNCIATA Al fato a l’è che mì sevi infermera, e al mè poor omm al gh’eva nissün che ga fava i puntüur...e alôra al vegneva a l’ospedaa.
AMANDA E lée la s’è inamorada del bel cüu che al gh’eva.
ANNUNCIATA (SCATTA IN PIEDI) Ma cosa la diis sü? Mì.....mì....guardava migna!
AGENORE Guà, l’è vera...difati in quel periodo lì i mè soci i ma domandava perchè navi via zopp.
AMANDA Come, la guardava migna? Come favela alôra?
ANNUNCIATA Oh, beh......la sa.....la graand abitudin.............
AGENORE In pochi parol, l’è staj un amoor incominciaa col cüu, e finii ala stessa manera (PREOCCUPATO, GUARDA IN ALTO) Scusemm...sì, parleroo mej....oo capii....come al voeu Lüu....(DI NUOVO AL PUBBLICO) A l’è al mè Cap, sü de sôra.... a i’è severi sul linguacc.....i voeur migna che sa parla maa, se de no i tira via poont per....nà in vòlt, e ta sa ritroeuvet...in bass!
AMANDA E dopo, come l’è naja avanti la storia?
ANNUNCIATA L’è naja che, intaant che al spongevi, lüu al ma vardava....
AGENORE Come favi poeu a vardala con al dé drée....che bèla fantasia!
ANNUNCIATA Mì al vardava.............
AMANDA Sempro de schéna...e..poeu...fiori d’arancio!
ANNUNCIATA Ma gnanca per soeugn!
AMANDA Com’è “gnanca per soeugn”?
ANNUNCIATA Sevum düu timid, e poeu lüu, quaand che al gh’eva i calzon sbassaa giô..............
AMANDA ...............al cercava de.................
ANNUNCIATA Ma per piesé! Disevi, che quaand al gh’eva i calzon giô, al gh’eva tanta de quela vergogna.............
AMANDA Inzôma, a l’eva un vergognoos.
ANNUNCIATA Sì, ma migna nel senso che la penza lée.
AGENORE ........perchè sevum migna geent normaal!
AMANDA Ma sa incontravüff domà in “zona ospedaliera”?
ANNUNCIATA No, dopo un poo de teemp, emm decidüu de vedess anca foeura, perchè lüu al m’eva daj un puntèll..........
AGENORE ...........visin ala ruèra.
ANNUNCIATA ........foeura de l’ospedaa, quaand che finiva al turno.
AMANDA E....dopo?
ANNUNCIATA La voeurerà migna sentì al rosari de tüta la mia vita, eh? E poeu, de inscì interessaant gh’è poeu migna taant de dì. Pütost, lée, sciôra....sciôra....a proposit, semm migna presentaa...come la sa ciama ?
AMANDA Prima de tütt, somm signorina, e ma ciami Amanda.
ANNUNCIATA Mì, ma ciami Annunciata.
AMANDA Annunciata? Alôra, l’è napolitana.
AGENORE Aeh, l’è nassüda sôra al Vesuvio, ma l’è mai staja tropp sbrojenta.
ANNNUNCIATA Ma propi! Mì somm de quisti post, a l’è che i mè geent i m’à speciaa tanto teemp, ma i a mai perdüu la fiducia, e i m’à ciamaa istess “Annunciata”.
AMANDA Mì, a somm signorina, come detto, somm “single” e lavori in un “beauty center” come massaggiatrice.
ANNUNCIATA Ma come mai l’è migna spôsada? Una bèla tôsa come lée.....
AMANDA Per l’amor del cielo!
ANNUNCIATA Cosa avroo dii de inscì strano? Sposass l’è diventada ‘na roba inscì stramba o foeura del moond?
AMANDA Cara lée, libertaa, libertaa! A i’è pü i teemp che Berta filava. Aggiornarsi!
ANNUNCIATA Cert, se nasses ‘n altra volta................
AMANDA Mì, lavorando in un “beauty center” a senti tanti de quii confideenz....incoeu, l’amoor eterno al gh’è pü, g’al disi mì!
ANNUNCIATA Mì, somm ala vegia. La sa figüra che quaand a goo dii ala mia mamm e al mè pa’ che evi cognossüu al mè omm, a g’a l’oo dii dopo vech penzaa sü trii mees e mezz.
AMANDA Che coragio! Brava, lée la nava ben ai tempi di antichi romani e di leon.
AGENORE Ma vardée se qui dô chì i doveva incontrass, con tanti geent che gh’è in questa citaa.....e mì che voo a scernì foeura quisti giardin per fa’ ‘na scapada in tèra.
ANNUNCIATA Ad ogni bon cuunt, i omen, a vardà ben, a i’è sì necessarui, ma i fà un poo schivi.
AGENORE L’è sempro staja esagerada de natüra.
AMANDA Adèss, a l’è a dréé a esagerà. Tanti volt i’è anca piasevoj.
AGENORE Brava! Brava! Quasi quasi, quel dì lontan che ta riveree scià a questa sponda, ta ofrisseroo un cafe’. Taantm in paradiis o a l’inferno, un cafè t’al rimediet sempro, come sa veed in television. Domà che quel che sa beev....de sôtt, a l’è naturalmeent püssée sbrojeent, per via dèla “temperatura ambiente”.
ANNUNCIATA Piasevoj? E quaand che i saress piasevoj, al ma la disa lée.
AMANDA (MALIZIOSA) Beh, presempi.....quaand i smorza la lüus.
ANNUNCIATA Questo l’è vera; perchè inscì i sa veed migna.
AMANDA Ma l’a g’abia pazienza, ma come l’è indrée !!!!!!
ANNUNCIATA Mì, qui ropp che la voeu dì lée, soo ben cosa a j’è, ma i m’è mai piasüu tropp.
AGENORE Se somm mort per strada, un perchè al ga sarà staj!
AMANDA Ma dai, la faga migna la püritana, che i sò batagli.....(LE DA’ DI GOMITO) i avrà faj anca lée!
ANNUNCIATA I mè batagli, come i’a ciama lée, i’è sempro staj quii........
AGENORE ........Con al spazeton, la cera e i patìn sui pè.
ANNUNCIATA .....Quii per fà rigà drizz al mè Agenore.
AGENORE (SPAVENTATO) Ahia, adèss vegn al bèll!
AMANDA (BALBETTA) Co....co..come l’à dii che al sa ciamava al sò omm?
ANNUNCIATA Agenore, perchè?
AMANDA Perchè....perchè....a l’è un nom raar.......
AGENORE (VANTANDOSI) Per quell, a sevi anca un omm raar!
ANNUNCIATA Ma.....l’è diventada smòrta; la sa seent ben, cara?
AMANDA Sì, sì, la sa preocüpa migna, adèss al ma passa, al sarà al caald.......
AGENORE (ALZANDOSI) Un quaj potere extraterreno (in proeuva) a g’a l’oo anca mì. A proeuvi a doprall, per fa stà mej la mia Amanda (SI AVVICINA E SI METTE DIETRO ALLE DONNE)
ANNUNCIATA Ma....la seent migna anca lée un’aria frégia?
AMANDA Sì, sì, la ma fà migna maa, anzi stto già mej.
AGENORE Ma sciocchina, a l’è per questo che al tò Aggy al s’è metüu chì de drée. La mia presenza la mett adòss un poo de frécc.
ANNUNCIATA Come sevi drée a dich, al mè Agenore al filava lisc com’è ‘n oli, perchè al curava con al fusiil.
AMANDA (SOTTOVOCE) Oh, come no?
ANNUNCIATA Cosa? Cosa la voeu dì? Oo sentii, veh! La voeur dì che al mè omm al ma meteva sü i corni?
AGENORE Oddio, l’è vün di impedimeent a nà per mì ne l’eterna beatitudin, e questo al ma mett adòss un zich de strèss.
AMANDA Mì soo domà che, come già spiegaa, i omenn ogni taant ga piaas cambià menu.
ANNUNCIATA Ma migna al mè Agenore! Lüu l’eva speciaal.
AGENORE Roba de matt! Quaand che sevi süla tèra, varevi poch e nagôtt; adèss, che ga somm pü, diventi anca speciaal.
AMANDA (CATEGORICA) Gh’è migna omen speciaj! A i’è tücc tiraa come coord de violin, quaand i veed ala tela la Manuela Arcuri o la Ferilli.
ANNUNCIATA Ma va là! Somm convinta che al mè poor omm, se, presempi, al la vedeva lée, che a l’è ‘na bèla dòna, al sa girava gnanca.....perchè mì.....
AGENORE .....perchè lée la ma dava ‘na tirada de maniga,e, se la gh’eva scià l’ombrèla, anca quela (sui pée).
ANNUNCIATA Mì, sevi la lüus di sò oeucc.
AGENORE Oh! Lampadina fülminada.
AMANDA Ma che lüus di oeucc d’Egitt!
ANNUNCIATA Epuur, per al mè Agenore, avress metüu la man sul foeugh.
AMANDA E al sa la brüsava in düu segoond.
ANNUNCIATA Ma....come al fa a véss inscì sicüra?
AGENORE Lée, la mia adorabile Amanda, la sa ben lée al perchè.
AMANDA Ma....ma...come oo già dii...la mia idea...i omenn........
ANNUNCIATA (TAGLIA CORTO SECCAMENTE) Ball de pü!
AGENORE Che la mia Annunciata la sa siéss ‘n’incorgiüda de un quajcòss?
ANNUNCIATA Mah! La senta un poo: In che paart la stà dèla citaa?
AMANDA Chi? Mì? In viaal Europa; perchè, la voeur vegnì a trovamm?
ANNUNCIATA Oh, varda che coincidenza: Al mè poor Agenore l’è moort propi lì, in quel viaal lì.
AMANDA (AGITATA) Ah sì?
ANNUNCIATA Già. Al soo poeu migna perchè al girava de quii paart, che oltre tütt a gh’è nissün tabachin che veend zigarett. Però, l’è crepaa lì.
AGENORE Adèss, somm gnanca pù moort, a somm crepaa.....gh’è pü quel bel rispett de ‘na volta per nümm defunti........
AMANDA Inzoma....l’etaa....la sa.....bisoeugna rassegnass..........
ANNUNCIATA Ma che etaa e etaa.....al mè omm al gh’eva sessant’ann e l’eva püssée giovin de mì.
AMANDA Adèss oo capii!
ANNUNCIATA Cosa l’avress capii? Gh’è poch de capì.
AMANDA Oo capii che se l’eva püssée giovin al voeureva côrr la cavalina.
AGENORE Mai naj a cavall in vita mia.
ANNUNCIATA Ma in che lengua devi dighel? Al mè Agenore l’à mai corüu nissuna cavalina. Lüu al gh’eva la crapa sui spall.
AMANDA ...Ma magari al resonava con quajcòss d’altro.
AGENORE Battuta decisamente volgarotta....ignobile. Va beh che al mè punto de vista l’è già pütost elevaa...........
ANNUNCIATA Ma dove la va a parà? Dove la voeur rivà con quisti insinuazion del lèla? L^è mez’ora che la seguita con ‘sti presüunt infedeltaa del mè pòor Agenore.
AGENORE Varda, Annunciata cara, che la sa lée al perchè.
AMANDA Cara Annunciata, come la capissi.....(INTANTO CHA PARLA, LE CADE DAL PORTAFOGLIO CHE AVEVA ESTRATTO LA FOTO DEL FU AGENORE)(ELLA NON SE NE ACCORGE E PROSEGUE) G’a dôo la mia carta de visita, inscì de la voeu.......
ANNUNCIATA (RACCOGLIE LA FOTO) A gh’è borlaa giô........(VEDE LA FOTO ED INORRIDISCE) Ma questa......questa chì............
AMANDA ...........a l’è ‘na fotografia.
ANNUNCIATA Al vedi...ma....che èl quel scioor chì?
AGENORE Però, somm vegnüu ben nela foto.
AMANDA (PANICO) A l’è...a l’è....al mè...al mè.....frédèll, eco!
ANNUNCIATA Ah, del bon? (FALSAMENTE GENTILE) Alôra, lée a l’è la mia cugnada. (IMITANDO RAFFAELLA CARRA’) dall’Argentina....dopo 35 anni....è qui!!!!!!!!!
AGENORE Mì alôra saress al cugnaa dèla sorèla de l’amante....capissi pü nagôtt, pòra mì!
AMANDA Cosa la diis? Al doloo al l’à sconvolgiüda!
ANNUNCIATA Questa chì, cara la mia bella di giorno, a l’è ‘n imagina de quel disgraziaa che è naj a toeu i zigarett! Al mè Agenore, che s’el füdéss chì adèss.............
AGENORE Purtropp, somm chì.
AMANDA La sa calma! Mì e l’Aggy (Agenore per gli estranei) a sevum come al pan e la marmelada. Sa veed che lée la ga dava migna la carica necessaria, e al vegneva a cercala in Viaal Europa al 131.
ANNUNCIATA (SCONSOLATA) Ormai.......va beh, a voeu dì che somm sempro staja sorpassada dai tempi moderni.
AMANDA (MALIZIOSA) Ma sa pò sempro rimedià!
ANNUNCIATA Rimedià com’è?
AMANDA Se la vegn adèss inzema a mì, a g’oo un amiis che al g’à un amiis, che al cerca un’amisa...............
AGENORE Tüta questionde amicizia, sa veed.
ANNUNCIATA E mì.....cosa dovress speciass de quisti amiis?
AMANDA Lée la poderess vess l’amisa perfeta per l’amiis che......(SI AVVIANO A BRACCETTO, SEMPRE PARLANDO DEL FUTURO AMICO)
AGENORE (SOLO IN SCENA) Eco, la fritada l’è staja girada per ben....chi la fa l’aspetti anca dopo moort.....Mej nà a l’inferno con un Breil che in paradiis senza......(CHIUDE IL GIORNALE) Vann a fach del ben ai dònn......Annunciata....Amanda.....oh, beh, a g’oo ammò un poo de teemp prima de tornà de là. Lassum vedé: (SCORRE ANCORA IL GIORNALE,E, INTANTO CHE ESCE, DICE:) Vedemm......Nuovo arrivo.....russa bionda mozzafiato..........vent’anni..........338.5.6.7.2.3.6.0..............