U SAPITI COM'E'
Tre atti di Francesca Sabàto Agnetta
Cola
'Za Gati
Gaitanu
Mara
Vennira
'Za Pidda
'Za Nina
Lisidda
L'avvocato
Un Garzone
ATTO PRIMO
A sinistra, casetta rustica con pochi e radi ciuffi d’erba. Intorno al fondo muro di cinta, al centro piccola cappelletta rustica con l’immagine di S. Rosalia. A destra, alberato, il fianco di un casa.
Scena 1°
All’aprirsi della tela, Gati è seduta dinnanzi l’uscio di casa, sonnecchia. Gati è paralitica; tiene uno scialle sulle gambe ed i piedi su un panchetto. Intorno a lei seduti in semicerchio stanno cinque o sei bambini, tutti hanno chi al braccio chi per terra un piccolo paniere. Di fronte a Gati una panca ed un arcolaio.
I BIMBI
(cantano in coro con voce monotona)
Oh! Picciriddi, pirchì non arriditi?
‘Sti jorna n’aviti, poi non si ridi chiù!
O picciriddi curaggiu, non chianciti
La matri l’aviti, lu patri è Gesù
1° BIMBO
(al compagno che gli ha preso il pane dal paniere) Dammi ‘u pani.
2° BIMBO
‘U mio è...
1° BIMBO
Munsignaru! Non è veru! (corre uno scappellotto)
2° BIMBO
(piange ma non dà il pane)
GATI
(svegliandosi) Picciriddi, picciriddi, queti! Pirchì fai vuci tu?
1° BIMBO
M’arrubbo ‘u pani
GATI
(dividendo il pane) Spartitavillu comu du’ fratuzzi... Senza fari vuci e darivi botti... E ora, ‘sti picciridduzzi si ‘nsignanu la santa duttrina, e si mi rispunnunu beni, si nni vannu a jucari. Cu’ sbaglia faccia ‘o muru! Attenti! Chi vi ha creato?
BIMBI
(ripetono) Diu, Diu!
GATI
Rispunniti ‘nsemula, comu vi ha criati?
BIMBI
(chinano il capo mortificati)
GATI
(al 1° bimbo) Dillu tu.
1° BIMBO
Non ci pensu...
GATI
A sua immagine e somiglianza. Quanti voti vi l’haiu ‘a diri? (si ode un lontano vocìo, i bimbi si alzano e vanno a guardare fuori) Fermi ddocu! Fermi!
1° BIMBO
I picciotti fannu vuci... Vaiu a vidiri chi è.
GATI
Statti ddocu caru miu e rispunniti tutti... Siti cristiani?
BIMBI
Si, si! (altri) No, no!
GATI
A para! A para! Siti vui cristiani? (tacciono i bimbi) Comu finìu? Si dici Sissignura ppi grazia di Diu!
BIMBI
Sissignura ppi grazia di Diu! (il vocìo cresce, si avvicina)
GATI
Quanti dei vi sono?
BIMBI
Unu... Due... Tri... Unu...
GATI
Stunati! Testi ‘nta l’aria! Vi è un solo Dio! Uno! Uno!
BIMBI
Uno! Uno! Uno!
GATI
In tre divine distinte persone (voci vicine e sghignazzanti)
VOCI DI DENTRO
Ihi! Ihe! Ihi! Ihe! Si’ loccu! Si’ babbu! Buffati Cola! Buffati!
BIMBI
(precipitandosi al fondo) Cola! Cola!
GATI
(agitandosi sulla sedia) Picciriddi! Fermi! Fermi!
COLA
(viene giù precipitosamente, ansante, trafelato, pallido. Butta in un angolo un cesto pieno di biancheria male affardellato. Ha i panni fradici addosso; si asciuga il sudore con il dorso della manica, parla con voce strozzata) Si venunu finu cca... A pitrati ‘i pigghiu. (esce dalla tasca dei sassi) Figghi di buttana...
GATI
(fissandolo) Cola! Chi sunu ‘sti paroli! Madonna di l’Aiutu! Chi ti ficiru, figghareddu! Veni cca... Diccillu a to’ matruzza. Parra.
COLA
(con voce di pianto che a volte ha vibrazione di collera e, sempre pronto a tirare sassi che non lascia mai, ma sempre controllandosi negli atteggiamenti) M’hannu buffuniatu. M’hannu fattu disfiziari, m’hannu tiratu petri... Ma si tornanu, cci sfunnu la testa ccu ‘na pitrata, figghi di...
GATI
Arreri! Vaia, calmati... e cunta chi ti successi? Parra ccu to’ matruzza!
COLA
Lavai li robbi... Poi li stinnivi a lu suli... Vossia avia dittu: “nun lassari li robbi vagnati... Torna ccu la biancheria asciutta”... E’ veru?
GATI
Si... Si... E poi?
COLA
Li robbi asciutti si li purtava lu ventu... E iu comu cci ieva appressu senza lassari l’autri vagnati?
GATI
Li firmavi ccu li petri.
COLA
Li petri l’avi lu ciumi... Comu cci puteva jri? I picciotti mi dissiru: “curri,Cola, curri! Nun vidi ca lu ventu si porta li robbi? “Chi siti stupidi? Iu cci arrispunnivi: “lu ventu chi è latru? Si li porta li robbi sciusciannici di cca, poi mi li riporta sciusciannici di 'dda... Iu non mi pozzu mòviri, ca la mamma non voli...”
GATI
Ma figghiu miu, iu t’avìa dittu...
COLA
‘U sacciu chi m’avìa dittu vossia! Ora chi fa, duna ragiuni a iddi?
GATI
No... No... Ma...
COLA
‘U sapi, ‘u sapi chi dissi la zà ‘Nzula passannu? Dissi: “ca lassatulu stari... ‘U sapiti com’è...” Comu sugnu, mamà? Pirchì mi dicinu tutti di ‘sta manera? Pirchì mi fici accussì vossia?
GATI
Si’... Comu ti fici Diu!
COLA
E Diu chi po’ fari figghi! Diu, masculu è! Vossia macari mi fa ridiri (riprende il tono di prima) La zà ‘Nzula dissi puru: “povira donna Gati, chi havi ‘a cummattiri ccu nu figghiu comu chistu” (ansiosissimo) Non sugnu un bonu figghiu! Non t’obbidisciu? Mi dici: “scupa Cola...” E iu scupu... Mi dici: “ammogghia lu cuttuni Cola...” e iu l’ammogghiu... Si puru vossia si metti contru di mia... Chi haiu ‘a fari iu? Chi haiu ‘a fari, mamà?
GATI
No, no, tu si’ lu figghiareddu di matruzza to’.
COLA
Mamà!
GATI
Chi voi?
COLA
N’autra cosa mi dissiru.
GATI
E tu dimmilla!
COLA
Si la dicu... Chiangiu... No, oggi no... Pirchì già haiu chiangiutu... Chiangiu dumani!... Dici... Dici... Si la morti avissi l’occhi, si l’avirria purtatu (piange) Ora chiangiu.
GATI
Non chiangiri... Non chiangiri. La morti, chi è dannu? Quannu a lu Signuruzzu ci fa cori di vidiri ad unu di li me’ figghi, lu chiama, e lu porta in Paradisu.
COLA
Ora, a mia si mi chiama, non ci dugnu cuntu. Ci dicu: “Diu, haiu chi fari”, scupu e non cci vaiu.
GATI
Ora cuntamu li robbi!
COLA
Giusti su’! Ci mancanu chiddi chi mi havi a purtari lu ventu.
GATI
Ah, Signuri! Una cruci mi dastivu, ma è pisanti assai.
COLA
Mamà, haiu fami.
GATI
Chi mancu lu pani ti purtasti?
COLA
Mi lu scurdai dintra lu casciuni... Mentri lavava aviva pitittu e dissi: chi fazzu? Pinzai: ora cci dicu lu patri Nostru.
GATI
Chi cci trasi?
COLA
Dissi: Patri Nostru chi siti ‘ntra lu celu, datimi oggi lu pani quotidianu ca mi scurdavi dintra lu casciuni (più forte) Datici lu pani a Cola! A Cola!
GATI
Ah! Madonna mia!
COLA
Pinsavi: lu patri Eternu sta luntanu e non mi scuta e gridavi chiù forti! ‘U pani! Li picciotti si misuru a ridiri e a fari: ihi, ihe. Mi dissiru babbu, mi tirarru petri... Ma quarchi vota, si li càpitu, cci rumpu la testa a pitrati... E poi m’arrobbu li puzzudda e non si la ponnu cunsari chiù... Figghi di buttana...
GATI
(severa) Cola, basta! Pensa ca lu Signuri ti vidi e ti senti!
COLA
Oh, vidi ch’è bella! Ppi darimi lu pani nun mi senti... Bellu Signuri?...
GATI
Ah, si nun fussi ‘nchiuvata a ‘sta seggia, non avissi bisognu di tia, ppi fari li cosi di ‘sta povira casuzza.
Scena 2°
Sisidda e detti
SISIDDA
(viene giù portando anche lei della biancheria e una corona di foglie) Cola, Cola. Ossabanadica zà Gati.
GATI
Santa e bona, figghia!
SISIDDA
Purtavi li robbi chi lassò Cola, e la curuna di S. Rosalia.
COLA
Iu la fici... Ora venunu li sunaturi... E poi li robbi non mi li scurdavi... Ma lu ventu...
SISIDDA
Lu ventu... Lu ventu!... Babareddu! (lo dice con grazia)
COLA
Aiutami a mettiri la curuna (prende una seggiola, la porta sotto la cappelletta, sale. Sisidda l’aiuta, Cola ride) Ah! Ah! Mi cattigghiu! (ride per il solletico)
SISIDDA
(che ride anche lei) Eh, vaia... spicciati!
COLA
(dopo aver posto la corona) ‘U vidi ch’è bella! (accarezza con un dito che poi mette in bocca, il braccio di Sisidda)
SISIDDA
Chi ti pigghiò?
COLA
T’accarizzu! Hai la peddi liscia e frisca... Ti vogghiu beni... Tu mi buffunii...Veru?... E si’ bedda... Mamà, è veru ca Sisidda è bedda?
GATI
Sì figghiu, ma non è giustu di diriccillu!...
Scena 3°
Donna Pidda, detti poi la zà Nina
PIDDA
(che parla con qualcuno che non si vede) Un mumentu, un mumentu zà Nina. Nun facemu cosi precipitati.
COLA
(si avventa con le pietre in mano)
SISIDDA
E chi si’ pazzu? Finiscila cu’ ‘sti petri.
GATI
Cola!
SISIDDA
Ossabanadica, zà Gati...
COLA
(la tira a sinistra)
SISIDDA
Unni mi porti?
COLA
‘Ntra la carrittaria... Iu ti vogghiu beni.
SISIDDA
Patri, figghiu e Spiritu Santu! E allura chi si’ babbu birbanti? (esce)
PIDDA
Cci haiu ‘a parrari di primura.
GATI
Cola, pensa a lu cuttuni (a Pidda) Assittativi.
PIDDA
Nun vegnu ppi mia... Mi manna la zà Nina!
GATI
Nun puteva veniri idda? Chi è cosa seria?
PIDDA
Seria zà Gati... Seriissima. Si tratta di vostru figghiu.
GATI
Cola?
COLA
E sempri a mia? Tutti cosi a mia?
PIDDA
No, no. Di Gaetanu!
GATI
Ca ppi Cola... Guai nichi... Gaetanu è granni... Guai granni... Chi c’è? Chi successi?
COLA
(siede su la panca profondamente assorto)
PIDDA
Iucannu iucannu ccu Mara, ficinu cosi serii... Capistivu?
GATI
Chi dicitivu? Gaetanu?...
PIDDA
E allura... Sissignura... Si maritaru senza sinnacu e senza parrinu.
GATI
Gaetanu? Ma lu sapiti ca vuleva a Vennira, chidda viduva... ca iu nun vosi... Successi lu ‘nfernu. Mi dissi ca avevunu finutu tutti cosi... E poi seppi ca nun era veru... Capiti? Chidda è fimmina ca l’omini l’afferra ccu li manu e ccu l’ugna... E mi parrati di Mara. Nun po’ essiri!
PIDDA
Nun mi cridi? Aspittassi. (chiama) Zà Nina vinissi vossia... Non cci cridi!
GATI
(a Cola) Chi fai ddocu?
COLA
Pensu o’ cuttuni!
GATI
E accussì ci pensi? Ammogghiulu, ammogghiulu...
COLA
(comincia a dipanare la matassa all’arcolaio, avvolgendo il cotone sulla sua mano sinistra, invece del gomitolo)
NINA
(furente) Chi? Non ci cridi? No? E ppi daveru nun fussiru cosi di cridirici. Ma dumannatici a vostru figghiu si dicu ‘a verità o minzogna. Signuri mei. Avìa ‘na niputi ca era un ciuriddu! Mi l’avìa crisciutu ccu lu ciatu e lu suduri di la me’ frunti, guardannula ccu l’occhi di Maria, e vostru figghiu mi purtò lu disunuri, ca ci mangiassi lu cori a muzzicuni...
GATI
Ppi carità, zà Nina, nun faciti accussì. Sugnu vecchia e malata!... Comu lu sapistivu?
PIDDA
Iu ci avìa purtatu lu matrimoniu di don Turiddu abballa abballa... Una fortuna!...
NINA
Beddu comudu di casa sua, ccu tri tummini di iardinu... ‘Na casa patrunali...
PIDDA
Nun lu vulìa. Idda a diri di no, e nuatri a diri di si. A la fini s’inginucchiò chiangennu. E nuatri dissimu: chiddu c’avìa nun l’avi chiù!
GATI
Madonna pirdunatimi! Ma comu... Mara non veni cca, Gaetanu non metti pedi ‘nna vostra casa...
COLA
(seguitando sempre con la sua aria di scemo) I pedi no, ma i ginocchia sì, però di notti.
GATI
I ginocchia?
PIDDA
Di notti?
NINA
Quantu scutu, quantu scutu... Parra, tu ca si’ vucca di virità.
GATI
Nun ci dati cuntu donna Nina. ‘U sapiti com’è...
COLA
‘U sapiti com’è, ‘u sapiti com’è! Sugnu comu mi fici vossia, mamà!
NINA
Si’ un beddu figghiu... Ma parra... Parra...
COLA
L’autra notti vitti a Gaetanu ca acchianava supra la so’ casa, mittennuci i pedi ‘ntra li purtusa di lu muru.
NINA
Ppi chistu lu muru è tuttu spurtusatu.
COLA
E caminava supra lu tettu ccu li ginocchia... Iddu mi vitti e mi dissi: Zittu e vattinni! Cci staiu aggiustannu lu tettu ca è tuttu sfunnatu.Iu fici finta di iriminni, m’ammucciai... E vitti ca livava li canali a unu a unu!
NINA
E menu mali ca m’aggiustò lu tettu.
PIDDA
Aviti ‘ntisu?
NINA
E chistu nun basta!
GATI
Chi c’è d’autru?
NINA
Ca è ca dopu tantu amuri, tanti pazzii, tanti smanii, ora Gaetanu nun si fa vidiri chiù.
PIDDA
Accussì dissi Mara!
NINA
Dici... Ca avi ‘a parrari ccu vui... Dici... Dici... E non fa nenti! Sulu ppi lu dannu ha statu attivu! Ma ora, chi ci parsi, ca si nni nesci comu ‘nfilu di pasta? Ca pirchì semu fimmineddi suli, non si fidunu di ittallu ‘nta ‘na sconca d’aranciu?
GATI
Non parrati accussì, ppi l’amuri di Diu!
NINA
Lassatulu stari a Diu.
PIDDA
Chista è cosa ca s’havi ad aggiustari. S’hannu a maritari e ppi subbitu.
GATI
‘Nta ‘na casa di galantomini siti.
NINA
S’hannu a maritari!
GATI
Vui ccu ‘na manu e iu ccu centu.
PIDDA
Subitu!
NINA
Parru ccu vostru figghiu?
PIDDA
Lassati fari a mia!
GATI
Parra cu havi ‘a parrari, so’ matri. Cola vai a chiamari a to’ frati.
COLA
(mostrando la mano, sulla quale ha avvolto il cotone) Nun pozzu.
GARZONE
(a Pidda) Zà Pidda, la taverna è china di genti e vossia si la spassìa?
PIDDA
Passa avanti... Staiu vinennu. (garzone via)
Scena 4°
Gaetano e detti
GAETANO
Ossabanadica mamà... Baciamu li manu!
NINA
(urtata) Quantu mi nni vaiu ca è megghiu! (via)
PIDDA
(con intenzione) Addiu beddu spicchiu di mennula amara (via)
GAETANO
E chi hannu? Muzzicati di li vespi su’?
GATI
Nun lu sai? Nun ti lu figuri chi hannu? La cuscenza nenti ti dici?
GAETANO
Nun capisciu!
GATI
Non capisci, no, ca li picciotti schetti su’ acqua ca non s’intorbida? Ciuri d’altari? Non capisci... No, ca ‘dda povira fimmina chi ha campatu a so’ niputi consumannisi li pusa supra la pila, cci brucia l’anima, pinsannu ca l’havi a maritari affruntannisi? Pirchì tu ti mariti, Gaetanu. E subitu sparti!
GAETANO
Subitu! Subitu! Avanti! E chi divintai Cola?
COLA
E sempri ccu mia cci l’hannu?
GAETANO
Vossia matri, ccu ‘stu maritarisi è tantu a siccu o tantu a saccu!
GATI
Sugnu comu havi ad essiri ‘na matri.
GAETANO
Si m’avissi dittu di sì ppi Vennira, ‘stu dannu nun succideva.
GATI
E ti pigghiavi a Vennira, ‘na fimmina smammaniata...
GAETANO
Chi mi vulìa beni, e chi iu vulìa beni puru...
GATI
La fimmina chi havi ‘a stari a latu di lu maritu havi ad essiri bianca comu la nivi di la muntagna.
GAETANO
Tutti mali fami eranu.
GATI
Ormai su’ discursi persi! Ti hai ‘a maritari.
GAETANO
Senza fari vuci ca li cristiani sentunu...
GATI
Tantu megghiu! Sentunu e s’insignunu ca cu rumpi paga!...
GAETANO
Bonu, bonu, su’ paroli ca li sapemu tutti.
GATI
Allura sai chiddu ca t’arresta ‘a fari... Vai a pigghiari a Mara e purtammilla cca...
GAETANO
Vai a pigghiari a Mara! Maritati! Vai! Torna! Matri, e chi sugnu babbu comu a Cola?
COLA
Iu sugnu megghiu di tia! Caminu ccu li pedi ‘nterra e no ccu li ginocchia supra li tetti! E nun fazzu chiangiri a li matri.
GAETANO
Vossia cci dici a la zà Nina, ca ccu lu tempu... Poi...
GATI
Aspittasti ppi farici l’offisa? No! E accussì non aspetti ppi ripararla!
GAETANO
Matri, sugnu bonu e caru ma pedi supra la facci non nni voggiu misi.
GATI
Li pedi supra la facci, ti li mittisti tu stissu! Ora fai lu to’ doviri. Sugnu malata e non vogghiu chiudiri l’occhi cc’u rimorsu di coscenza... E se non ti basta, ti dicu ca iu, to’ matri ca ti fici, ti criscivi, ti fici omu, sudannu e travagghiannu notti e iornu, iu, povira fimmina, senza cumpagnu e senza aiutu, vogghiu accussì.
GAETANO
Matri, li cosi fatti ppi forza, non arrinnesciunu mai!
GATI
Vai a vasari li manu di la zà Nina e poi mi porti a Mara cca!
COLA
(lo spinge fuori scena)
GAETANO
Babbu, nun mi tuccari.
GATI
Lassalu stari e vattinni.
GAETANO
Si perdi lu me’ nomu si nun cci la fazzu pagari.
GATI
Tu hai ‘a pagari, no iddu!
GAETANO
A la fini, pari ca quannu unu sbagghia, sbagghia! La furzavi a Mara? No! Chiddu ca vosi iu, lu vosi puru idda! Iu l’offisi e pagu! Ma di la catina chi m’attaccu a lu coddu, cu mi paga a mia? Iddi? Vossia?...
GATI
Li to’ figghi, quannu l’avrai!...
GAETANO
A mia, mi stannu pigghiannu ppi picciriddu!...
GATI
E si puru? Non ti ci pigghia to’ matri? Vaia, calmati. Antura iu era to’ patri e facìa la vuci grossa... Ora sugnu to’ matri e ti dicu: vecchia sugnu e malata! Li me’ pedi ca nun sannu chiù camminari, sunnu comu ‘ntra la fossa.
COLA
Mamà, chi dici? Supra lu sgabellu su’.
GATI
E ti dicu: nun mi dari colliri! Lu me’ cori è comu un orologiu di chiesa. Avi assai, assai chi camina a lu suli e a lu ventu. ‘Na truzzatedda voli, e si ferma ppi sempri. ‘Stu rimorsu voi?
GAETANO
(silenziosamente, con la testa bassa, esce)
Scena 5°
Gati e Cola
COLA
(ha finito di avvolgere tutta la matassa sulle sue dita della mano sinistra e accorgendosi di non, poterla muovere si spaventa) Ora vidi ch’è bella. I dita m’ingagghiai, mamà! Mamà, pozzu mòriri!
GATI
Tira, tira...
COLA
E si poi mi scippu i dita? (ha l’idea di tornare ad avvolgere il cotone sull’arcolaio. Difatti, legato il filo ricomincia a lavorare vertiginosamente)
GATI
Cola! Cola!
COLA
(si ferma e coi denti tira il cotone della mano con le dita e và a sedersi presso la madre) Mamà, pirchì cci dicisti a Gaetanu ca avevi un orologiu ‘ntra lu cori?
GATI
Nenti figghiu, non su’ cosi ppi tia. Ti cunfunnunu la testa senza ragiuni...
COLA
Veru è mamà... Mi cunfunnunu... ‘Sti paroli ‘ntra la me’ testa furrianu... Furrianu... Comu si li sciusciassi lu ventu, fannu fffff (imitando il vento) E mi scappanu di la vucca comu vonnu iddi, no comu vogghiu iu! Pirchì mamà?
GATI
Pirchì accussì vosi lu Signuruzzu.
COLA
Ma quanti cosi ca voli lu Signuruzzu?
GATI
E quanti ni vorrà ancora...
COLA
Ora, comu fa a sapirlu vossia, si nun lu vidi mai?
GATI
Senti Cola, ora Gaetanu si marita.
COLA
Li durci, li cunfetti, unni sunu?
GATI
Quannu finisci la quinnicina di S. Rosalia. Mara, veni cca a stari ccu nuautri e addiventa to’ suruzza.
COLA
(stupito) Me soru?
GATI
Sì, figghiu...
COLA
Mamà, chi veni a diri maritarisi?
GATI
Vulirisi beni.
COLA
Allura iu sugnu maritatu ccu vossia?
GATI
No, iu sugnu to’ matri.
COLA
Ccu Sisidda allura? Iu la vogghiu beni! Macari mi la ‘nsonnu la notti. L’autra notti mi ‘nsunnai ca la vulìa affirrari, fici un sautu... Sbattivi ‘nta la barra di lu lettu e mi fici un cucuruni tantu!
GATI
Lassa stari ‘sti cosi. Non su’ ppi tia. Senti Cola, iu sugnu vecchia...
COLA
Vossia è la chiù bedda di tutti. (l’abbraccia)
GATI
Quannu non ci sarò più, promettimi...
COLA
Si vossia si nni va, iu mi nni vegnu puru!
GATI
No, figghiu! Quannu ‘u Signuri chiama...
COLA
Vossia nun cci arrispunni. Iu haiu ‘nfigghiu ca si chiama Cola... Sapi lavari... Sapi scupari... Ma senza di mia non ci sapi stari... Chiamativillu ca vi servi ppi scupari lu Paradisu.
GATI
Ppi chistu, figghiareddu, l’haiu dittu tanti voti, e ti ripetu, quannu ti dirannu: to’ matruzza è in Paradisu...
COLA
Mamà... Non moriri ora...
GATI
No... No, non ti scantari. Tu, inveci di chiangiri, si è veru ca mi voi beni, hai a diri: ora la mamma è cuntenta... è ccu lu Signuruzzu, godi... E mi guarda...
COLA
Vossia sempri mi guarda?
GATI
Sempri! E ridu ccu l’Angileddi. E tu hai ad essiri puru cuntentu, pirchì, signatillu ‘nfrunti, ppi li vivi si chiangi e ppi li morti si ridi... Pirchì stannu in paci.
COLA
Si, si mamà... Iu ridu (ride)
GATI
Allura obbedirai a to’ frati e a to’ soru, comu obbidisci ora a mia! Mi lu prometti?
COLA
Ti lu prumettu!...
GATI
E ora dicemuni lu Santu Rusariu... Santa Maria, china di grazie...
COLA
... Di grazie...
Scena 6°
Due suonatori con chitarra e mandolino e i bimbi e detti
SUONATORE
Ossabanadica zà Gati.
COLA
All’urtimu vinistivu!
SUONATORE
Attacca, Minicu! (dinnanzi la cappelletta contenti, Gati prega e Cola canta e balla)
Un cacciaturi ieva sularinu
Cacciannu supra munti Pellegrinu
Mentri d’accussì suliddu si nni iva
ci acccumparìu Santa Rusalia
Curri a Palermu bedda e scunsulata
Ppi pesti e ppi culera svacantata
Dicci ca su’ scurdati li me’ ossa
Senza la pietati di ‘na fossa
‘Ngran processioni li istivu a piggghiari
E ppi li stradi li istivu a purtari.
Passaru l’ossa di la Virginedda
Ppi strati, ppi stratuzzi e ppi vanedda
Palermu bedda comu una gulera
Libera di la pesti e di culera!
SUONATORI
Ossabanadica za Gati.
BIMBI
(via cantando)
COLA
Tantu abballai, ca mi stancavi...
Scena 7°
Gaetano, Mara e detti.
GAETANO
(spinge Mara vergognosa) Chi t’affrunti di me’ matri?
GATI
Figghi, affinnistuvu li liggi di lu Signuri... Ma siti picciotti e li piccati d’amuri Iddu li perduna... Chiddu ca successi, successi... Ora cuminciati arreri... Vulitivi beni sempri. In sustanza vi canusciti di nichi, siti puddicini di la stissa nassa. Mittitivi in grazia di Diu e dati a ‘sta vicchiaredda la cunsulazioni. Veni cca figghia, avvicinati...
MARA
(si avvicina, si inginocchia, bacia le mani a Gati e piange)
GATI
Non chiangiri figghia, chistu è jornu di cuntintizza.
COLA
Chiangi pirchì Gaetanu cci ruppi lu tettu.
GAETANO
(s’inginocchia) Mamà, mi pirdunassi.
GATI
Sì figghi è lu Signuri ca v’ha perdunatu. Iativinni ‘nchiesa a pregari lu Signuri.
GAETANO E MARA
(baciano ancora una volta le mani di Gati e silenziosamente, mano nella mano escono dalla scena)
Scena 8°
Gati e Cola
GATI
Suli ristammu, veni cca figghiareddu beddu. (intona una dolce nenia mentre Cola si mette vicino a lei con la testa appoggiata sulle sue gambe)
Dormi dormi figghiu miu
dormi dormi figghiu beddu
dormi dormi ccu to’ matri
ca ti voli tantu beni
Fine del primo atto
ATTO SECONDO
La bettola di donna Pidda. A destra un tavolo che serve da cassa, con seggiole; al fondo bottiglie e bicchieri. Alle pareti vi sono due cartelli con le seguenti scritte:
1° Credenza, il mal pagatore l'uccise.
2° Viva la Divina Provvidenza.
Un quadro di S. Rosalia ed il cacciatore.
Scena 1°
Filippo, Liddu, Ianu, Pidda,
poi un bimbo, poi un garzone
All'alzarsi del sipario, Filippo, Iano, Liddu sono seduti ad un tavolo. Pidda al fondo riordina e fa i conti al banco.
FILIPPO
(capovolgendo la brocca vuota) Zà Pidda, la lampa astutò.
PIDDA
Un mumentu di pazienza, Filippu (prende la brocca)
BIMBO
(entrando) Dissi me' matri, sei soldi di pani.
PIDDA
Te' cca! (glie lo dà)
IANU
'Sta trippa, za Pidda... Chi jiu a scannarilu ora 'ssu viteddu o ancora non ha nasciutu?...
PIDDA
E comu fazzu? Chi haiu a fari, tuttu u' chi fari 'ntà un mumentu e poi finu a 'sta sira nun veni un cani. Pazienza. Sula sugnu.
FILIPPO
E di Baffiti Cola, chi nni fici?
PIDDA
(dando la brocca del vino) Mischineddu, non lu sapiti! So' matri è malata tinta. Fu culpita. Signuri scansatini. 'Sta notti la zà Nina e Mara, si la visturu morta. E mancu c'era Gaetanu ca jiu a carriari quacina... Lu beddu di Tiliddu, mi chiantò... E ppi 'na manu d'aiutu aspettu a Vennira.
FILIPPO
Sicuru ca v'avìa 'a chiantari, manera di pagarlu era chidda?
PIDDA
Sintitivi a chistu ora! Ppi miraculu non havia 'a fari la cammarera iu... Ppi farlu addivintari patruni, e sparti si nni ivu 'nzurtannimi... Chi sacciu comu mi dissi... Frittatrici... Frittatrici... Paroli scunchiuduti di giurnali.
GARZONE
Salutamu 'za Pidda... Mi manna don Cicciu u' muraturi, voli tri angiovi, pigghiati nno' menzu di lu buttacciu, 'na vastedda di pani... E menzu litru di vinu. Dici ca si l'angiovi sannu di lignu, non ci li paga.
PIDDA
(preparando la roba richiesta) Perciò chiddi ca sannu di lignu, mi l'haiu 'a mangiari iu!... Mentri tutti li vonnu di lu menzu! Chi giudiziu!
LIDDU
Pirchì non pigghia 'n'autru garzuni?
PIDDA
(seccata) Non si nni trovunu... E non si cci pò cummattiri. Mi chiantunu a li quattru... Dici ca fineru l'ottu uri! E ppi lu travagghiu di la sira iu comu fazzu? Ci dicu: passami lu pomadoru ppi la salsa. E m'arrispunni: si pigghia lu cucineri! Ci dicu: scupa... Non sugnu sirvizzeri! Lava li piatti! Ci lu dici a la sguattera! A sentiri a iddi ppi 'sta taverna avirria a' pigghiari, un cucineri, aiutanti garzuni. Mai Maria! Abbuzzu travagghiari , ma 'stu saziu non ci lu dugnu.
LIDDU
Vi mettunu li pedi supra li caddi, pirchì siti sula.
PIDDA
(al garzone) Te', curri! Senza liccariti l'angiovi, ca a don Cicciu ci piaciunu ccu tuttu u' sali.
GARZONE
Sissi!... (via)
PIDDA
Vurria sapiri, di vui ca siti omu, siti cumminatu megghiu di mia, ppi cultivari li vostri terri?
LIDDU
E cu dici di no! Mah! Chi si pò fari! Ebbica stravutata avemu! Lu supra è lu sutta. E lu sutta 'ncapu.
IANU
Cu la scusa ca è isula... 'Sta Sicilia, a Roma, l'abbannunaru 'nmenzu lu mari... Comu 'na varca sfunnata.
FILIPPO
Curpa nostra! A lu 48 la capitali già s'avìa fattu in Palermo, pirchì la prima parola di libirtà la dissimu nuautri... Ppi mezzu di la bon'arma di Garibaldi... Poi vinni Cavour e scunsò li brigghia.
IANU
Veru è. Si apprisintò a lu re Vittoriu... Lu nannu di l'attuali supranu, chiddu cu li muschittuni, e ci dissi: Maestà, di la Sicilia haiu lassatu sultantu li muntagni. Poi tutto ho perduto, e tutto ho arricopigghiato, e l'ho portato quane...
LIDDU
E non cuntentu di chistu, ficinu avanzari all'autri nazioni! 'Sta Francia... 'Sta Russia... Chi esistevanu allura! Tuttu terrenu da pascolo era!
IANU
Ppi purtari 'nzinga, fu allura ca sprumintanu 'na qualità di Re, ca si chiama Zar... Lu Zar di la Russia.
FILIPPO
Scusati cumpari, non si chiama Zar ma Scià!
LIDDU
M'haiu persuasu ca ppi pulitica siti daveru 'nterra! Quali scià e sciù! Chistu è turcu... Ora chi ci trasi cu li russi, ca su' tutti francisi? Bah!...
IANU
Lu re turcu è surtanu... E cangia una mogghieri al giorno!
FILIPPO
Allura vi sacciu diri ca zar si 'ntisi diri, quannu finiu la guerra all'Africa.
LIDDU
Lu Re d'Africa si chiama Minnilicchi... E no Scià!
FILIPPO
Minnilicchi!! Comu nun s'affruntava...
LIDDU
Usanzi su', cumpari...
PIDDA
Iu sacciu ca lu Re d'Africa si chiama Mangascià...
IANU
(alzandosi) E iu sacciu ca la trippa ancora mancu 'ntra la pignata è misa... E mi nni vaiu...
PIDDA
Sta vugghiennu, lu tempu ci l'aviti a dari! Chi vi pari ca è sponsa, c'arrimodda allura? Iu poi haiu autru ppi la testa!
IANU
Chi aviti?
PIDDA
Lu 'zu Ninu mi vinnìu 'na partita di vinu... Non lu potti pagari... E fici curriri carta bullata. Dumani, dici ca m'hannu 'a fari lu sequestru... Armazza abbramata, mannari l'usceri a mia! A mia!
LIDDU
Vi chiamanu la strega... Viditi chi putiti fari.
PIDDA
Si fussi strega, ci facissi quarchi bona strigata. Ora aspettu a don Luiginu ppi un cunsigghiu.
FILIPPO
All'avvucatu dibulizza aspittati? Cu cridi a chiddu havi sette anni di mala sorti.
PIDDA
La dibulizza l'avi pirchì non si sazzìa mai, ma di liggi e littra nni sapi.
FILIPPO
Quantu 'u sceccu ni sapi di missa.
Scena 2°
Cola e detti
(tristissimo, confuso, come qualcuno che ha un pensiero) Za Pidda! za Pidda!
PIDDA
Ah! Menu mali ca vinisti! To' matri sta megghiu? Mittiti 'u fadali e duna versu... Iu non mi fidu chiù.
COLA
Ju, haiu a turnari nni me matri!
PIDDA
Nun sta megghiu?
COLA
Chi sacciu iu, macari haiu chiangiutu...
PIDDA
Si ti fai vidiri ca chiangi, la fai scuraggiari...
COLA
Iu, ammucciuni haiu chiangiutu.
PIDDA
E pirchì vinisti figghiu?
COLA
Mi manna la za Nina...Voli la buttigghia di l'acqua di l'ascenzioni.
PIDDA
Ma allura peggiu sta!
COLA
Havi l'occhi chiusi... Trema tutta... La cummigghiaru finu cca (segna il capo) Ma ancora trema.
FILIPPO
Chi cci havi 'a fari l'acqua biniditta?
COLA
'U miraculu! Iu cci dissi o' Signuri: si faciti stari bona a' me' matruzza vi portu un rotulu di cira e ci vaiu a cogghiri li gigghia bianchi supra la muntagna.
LIDDU
(a Filippo) Vecchia travagghiata, ccu li gammi persi... Chi ci teni a fari lu Signuri?
COLA
(tremante di collera pronto a scagliare i sassi che ha tolti dalla tasca) Chi cci teni a fari 'a matri a Cola? A mia? Vui l'aviti 'a matri?
LIDDU
L'haiu ma non è paralitica...
COLA
Non importa. Non ci sunu li gammi di Cola ppi idda? Nun pò travagghiari? Travagghia Cola... 'U Signuri a to' matri non la fici càdiri malata... E la mia sì! E iu, si non ci fa lu miraculu, inveci di preghieri, ci dicu... Ci dicu... U sacciu iu, chi ci dicu!...
PIDDA
Cola! Cola! Chi su' 'sti discursi? Non sai, ca lu Signuri castiga?
COLA
Chi mi nni fazzu... Si mi castiga (prende la bottiglia, s'avvia lentamente, giunge presso Liddu, gli sputa in faccia e scappa)
PIDDA
Vi lu miritastuvu!
LIDDU
Chi sapìa ca sintìa?...
FILIPPO
Iamuninni...
PIDDA
Ppi favuri dicitici all'avvocatu ca l'aspettu... Iu non mi pozzu mòviri...
IANU
Lu jemu a pigghiari e vi lu purtamu 'nfinu cca...
PIDDA
Lu Signuri vi lui renni. (via tutti meno Pidda)
Scena 3°
Vennira e Pidda, poi Gaetano
PIDDA
(riordina la scena)
VENNIRA
(entrando) Salutamu.
PIDDA
Menu mali ca vinisti! Arrizetta cca... Iu dugnu versu 'nta cucina (esce)
VENNIRA
Bih! Chi è cunfusa! (riordina)
GAETANO
(accigliato) Vennira!
VENNIRA
E semu chiù assai!
GAETANO
Chi vinisti a fari ca? Si pò sapiri?
VENNIRA
Chiddu ca mi pari e piaci.
GAETANO
Bada comu parri!
VENNIRA
Parru comu vogghiu!
GAETANO
Marcia a la casa!
VENNIRA
Vacci tu a la casa e duna versu a to' matri ca è malata tinta.
GAETANO
Me' matri?
VENNIRA
Fingi di non sapillu...
GAETANO
Fingiu? Non lu sai ca havi du' notti chi sugnu fora ccu lu carrettu? Dui notti senza dormiri ppi turnari chiù prestu... Appena arrivai, cu lu carrettu stissu currivi nni tìa... E mi dissuru ca eri cca.
VENNIRA
E si sugnu cca?
GAETANO
Marcia a la to' casa ti dissi.
VENNIRA
Cumanna a to' mugghieri!
GAETANO
Vennira finiscila, non mi fari perdiri la ragiuni.
VENNIRA
Vattinni e non mi siddiari.
GAETANO
Vennira, nun sacciu comu mi la pozzu pigghiari.
VENNIRA
Pigghiala comu voi, non m'interessa nenti... Chiuttostu, vattinni nni to' matri... Ppi forza mi voi fari parrari? Ppi forza haiu a fari diri ca iu sugnu lu to' destinu tentaturi? Vattinni! Vattinni ti dissi.
GAETANO
Si non torni dintra non mi nni vaiu...
VENNIRA
Haiu ad aiutari la za Pidda.
GAETANO
Cca? Lassariti iu cca? Pirchì, ppi fari la graziusa ccu libertà? Ppi avvilinarimi lu sangu chiù di quantu l'haiu avvilinatu?
VENNIRA
To' matri mori! Vattinni.
GAETANO
Non mi movu!
VENNIRA
A la fini chi voi? Cu quali dirittu parri? Si' me' frati, me' patri, me' maritu? No! Ma chi voi? Fatti l'affari di la to' casa. Pensa ca to' matri è malata tinta... Poi c’è to' mugghieri! Ah! Ah! Ti la pigghiasti cu' tantu amuri e cu' tanta alligrizza ca mancu putisti aspittari lu jornu di lu matrimoniu...
GAETANO
(alzandole i piedi) O ti risolvi o ti trascinu 'nfinu ad intra.
VENNIRA
(cerca di divincolarsi) Ppi lu nomu di Cristu, lassimi.
Scena 4°
Mara e detti
MARA
(vede Vennira e la collera le accende lo sguardo) Mi l'avìa a figurari ca eri in bona compagnia (calca le parole)
GAETANO
(scuotendola) Chi vinisti a fari cca?
MARA
Sparti dumanni! T'avemu aspittatu cu' l'occhi a la via... Vittimu lu carrettu e non ti vittimu spuntari... E vinni...
GAETANO
Scusi su'.
MARA
Scusi?
GAETANO
Si fussi veru, non l'avissi lassatu!
MARA
Curpa tua.
GAETANO
Curpa tua ca ti muvisti di dintra! Ma tu lu sai ca non pirmettu.
VENNIRA
(sottolinea spesso il diverbio dei due con una tossetta significativa)
MARA
Venatinni!
GAETANO
Chiddu chi haiu ‘a fari, non lu vogghiu dittu di li fimmini.
MARA
A la fini sugnu to' mugghieri.
GAETANO
Tantu megghiu!
MARA
Gaetano! Non mi fari perdiri 'a pazienza!...
GAETANO
Vattinni.
MARA
Ccu tìa!
GAETANO
Sula
MARA
Quannu unu pratica mali cristiani, macari l'amuri di la matri si scorda.
VENNIRA
Ppi cui parrati?
MARA
Parru ppi ccu si la senti...
GAETANO
Ti nni vo' jri?
VENNIRA
Vih! Mi staiu scantannu tutta!
GAETANO
Vattinni!
MARA
Mi nni vaiu ppi to' matri, senti? E di tìa, di chiddi ca ti stannu appressu chi s'allippanu, ppi farisi talìari, mi nni 'mporta lu restu di nenti. (via)
VENNIRA
Ppi mìa, tantu nun lu vosi, ca vi lu lassai!
Scena 5°
Pidda, Filippo, Liddu e detti
FILIPPO
(che è apparso dalla comune con Liddu, mentre Pidda entra dalla porta laterale fa cenno al compagno ed infila le braccia sotto quelle di Gaetano) Iamuninni... Chi t'havi 'a ristari 'stu scrupulu? La matri... E' matri!
LIDDU
L'amuri va e veni!
VENNIRA
E quannu si nni va, non torna chiù, don Liddu!
GAETANO
(la guarda storta)
PIDDA
Ccu 'na vasatedda, Mara si scorda tutti cosi. Vattinni fighiu, pensa a to' matri (sono a metà scena)
VENNIRA
(cantando)
Ciuri di patata
Lu filu ammogghia e l'annimula vota
e lu miu amuri ha fattu tanta strada
di quannu la vasai la prima vota!...
GAETANO
(si arresta, sono impressionati, una pausa. Li vince e dice:) Ossabanadica, za Pidda!
PIDDA
(dopo una lunga pausa) Senza vuliri, di dda intra, v'haiu 'ntisu. Gesù, Gesù! A li me' tempi quannu vulevumu beni 'n'omu, 'sti stracanacchi non li facìamu!
VENNIRA
Quannu lu vulevuvu beni!!
PIDDA
Pirchì... Tu a Gaetanu...
VENNIRA
Lu vosi beni, sì, quannu cci grapìi li vrazza, cridennumi so' mugghieri davanti a Diu...
PIDDA
La za Gati non vosi...
VENNIRA
Nenti, quannu li dui si vonnu, li tri non si sciarrìanu. A iddu cci parsi ca s'avia livatu lu capricciu. Ci dissi: o mugghieri o nenti! E mi lassò. Poi ppi darimi 'na risposta, si misi ccu Mara...
PIDDA
'Na picciotta schetta... Chi putivi fari?
VENNIRA
Si sapi! L'onuri sulu li picciotti schetti l'hannu, no li maritati. Iu pirchì era viduva, non nn'avìa, e si capisci, iu chi era onesta. Unu chiù, unu menu, chi cci fa? Ma ora, ora veni lu me' momentu. Ora ca è 'ncatinatu, cu 'na mugghieri, ca non voli beni, ci fazzu vidiri, ca cu mi appi 'na vota, mi desidera sempri. E sì! Videmu si vinciu iu o Mara.
PIDDA
(trasalendo) Patriarca Abramu!...
Scena 6°
Cola, Sisidda e detti
SISIDDA
(dalla comune) Veni, veni cca!
PIDDA
Cu è?
SISIDDA
Iu sugnu. Dice la za Nina, si lu tinissi cca a Cola... A la casa li fa nesciri pazzi.
PIDDA
Com'è?
SISIDDA
Ccu l'anima 'mpinta tra li labbra (esce, poi ritorna tirando per mano Cola) La za Pidda ti voli... Veni... Veni cca!
COLA
Iu... Iu vulissi turnari nni me' matri.
SISIDDA
Mancu hai trasutu, e ti nni voi jri? Ccu to' matri cci staiu iu, 'u senti?
COLA
Havi l'occhi chiusi, non parra.
SISIDDA
Dorme. Quannu s'arrusbigghia, ti chiamu.
COLA
Idda sempri a mia chiama (si alza) Cci vaiu!
SISIDDA
No, no... Tu hai a stari cca... Masinnò la za Pidda non ti paga. E comu cci l'accatti 'i midicini a to' matri?
COLA
(a Pidda) Non mi paga?
PIDDA
(che vorrebbe dire il contrario) No, figghiu, veni cca! Vennira, dammi li fasola, ca l'annetta.
VENNIRA
(gli dà il piatto)
COLA
(lo prende) Non li pozzu annittari nni me' matri?
PIDDA
No, no, statti cca... (a Vennira)
SISIDDA
Non ti mòviri, statti cca... E iu, appena to' matri s'arrusbigghia ti vegnu a chiamari. Si ti movi, non ti vogghiu chiù beni!
COLA
No... No, sempri m'ha vuliri beni.
SISIDDA
Ossabanadica (a mezza voce) Non lu facissi nesciri.
COLA
(versa i fagioli sul tavolo e incomincia a pulirli)
VENNIRA
(riordinando canta il suo stornello)
COLA
Vennira! Vennira!
VENNIRA
(non gli dà retta)
COLA
(forte) Vennira, auh!
VENNIRA
Chi voi, camula!
COLA
Non cantari!
VENNIRA
Pirchì?
COLA
Nun lu sacciu lu pirchì... Ma non cantari.
VENNIRA
Vaiu a sbarazzari. (dispettosamente esce cantando)
COLA
(si precipita verso Vennira)
PIDDA
(lo ferma) Ma lu sai ca si' troppu furiusu?
COLA
Nun la vogghiu beni a Vennira.
PIDDA
Pirchì?
COLA
(con orrore) 'Na vota 'a mamà mi dissi ca tinìa a Gaetanu 'ncatinatu... 'Ncantatu.
PIDDA
Non ci cridiri.
COLA
La mamà lu dissi, comu non ci cridu?
Scena 7°
Filippo, Liddu, Ianu, Don Luigino e detti, poi Vennira
FILIPPO
Cca c'è l'avvocatu.
DON LUIGINO
Donna Pidda... A li vostri cumanni.
PIDDA
Prighieri.. Vogghiu un cunsighiu... E ppi chistu 'u fici 'ncomodari... Dumani lu zu Ninu mi manna l'usceri ppi farimi lu sequestru di lu vinu. Veni a diri taverna chiusa... E fami davanti la porta. Dinari non nn'haiu e non mi nni trovu... Comu fazzu?
DON LUIGINO
Dunque, dicemu: citazione, consumata, spisi.
IANU
Chi pò fari?
DON LUIGINO
La legge cunsigghia il pagamento.
PIDDA
Pirchì non mi li duna la liggi li dinari?
DON LUIGINO
Intanto, sopralluogo, usceri, spisi ancora... In linguaggio volgare: supra vallera cravunchi.
PIDDA
E chistu lu sacciu... Ma lu rimediu?
DON LUIGINO
Vui aviti lu viziu di chiamari lu medicu, quannu lu malatu sta murennu! Si mi l'avissi dittu tri ghiorna fa, o si circavunu li dinari o si vidìa d'aggiustari la cosa... E vi niscevuru lu vinu.
COLA
'U su Ninu mi dissi a mia: Tu ca dici la verità, si l'ha nisciutu lu vinu donna Pidda?
PIDDA
Orva di l'occhi!
COLA
Iu cci dissi: Idda si lu vulissi nesciri, ma non si l'ha nisciutu. Dici, si lu nesci la mannu 'ngalera! Iddu lu dissi, no iu.
PIDDA
Lu senti chi cristianu è?
FILIPPO
Quannu si tratta di picciuli...
DON LUIGINO
Mi scantu , mi scantu ca siti fritta!
PIDDA
Oh, Gesù, Giuseppe e Maria
COLA
Ora iu... Facissi 'na cosa...
FILIPPO
Zittiti!
IANU
Parla lu presidenti di lu tribunali.
DON LUIGINO
Lassatulu parrari... ( rivolto a Cola) Chi facissivu, sintemu.
COLA
'U vinu unn'è?
PIDDA
'Ntra la cantina fora...
COLA
L'usceri di unni hannu a tràsiri?
PIDDA
Di la porta... Cola.
COLA
Ora iu, 'sta notti cci murassi la porta... E non putissi trasiri chiù! (torna al tavolo)
FILIPPO
Discursi di babbu.
DON LUIGINO
Quali babbu e babbu! Ragiuni havi! 'Sta notti murati la porta cu dui petri e un pocu di quacina... E l'usceri non ponnu tràsiri pirchì la porta non è chiusa ma inesistente.
PIDDA
E si pò fari?
DON LUIGINO
Si può fare. (con gioia)
VENNIRA
(traversa la scena va alla comune)
IANU
E' legale?
DON LUIGINO
Legalissimo!
PIDDA
Pigghiu tempu... Lu pagu (si slancia contenta verso Cola, l'afferra, gli fa cadere i fagioli per terra, l'abbraccia e lo bacia con molta profusione) Figghiu, figghiu binidittu! Tu non si' babbu! No! No! Tu si' prufeta... Prufeta! (seguita a baciarlo)
COLA
(dibattendosi) I fasola, i fasola.
PIDDA
Profeta ca mi livasti 'sta spina.
VENNIRA
(agitatissima) Za Pidda, za Pidda!...
COLA
(raccoglie i fagioli che rimette nel piatto, dà le spalle agli altri e non vede la scena)
PIDDA
Chi c'è?
VENNIRA
(fa il gesto della morte, poi mormora) Morsi!... (momento di grande silenzio; gli uomini si tolgono il berretto, le donne piangono. Cola è sempre intento a raccogliere i fagioli)
PIDDA
E chista è la strata, ca l'avemu a fari tutti... Tutti.
Scena 8°
Sisidda e detti
SISIDDA
(entra, ha il volto rigato di lacrime; senza ricomporsi s'avvicina a Cola e dolcemente sussurra) Cola!
COLA
'A mamà, s'arrusbigghiau?
SISIDDA
No... No... Cola... Assettiti... Senti, la mamma non soffri chiù!
COLA
Stetti bona? 'U miraculu...'U miraculu...
SISIDDA
No... No... To' mamma è in paradisu, cu lu Signuruzzu.
COLA
'A mamà? Si nni ivu... Accussì malata?
SISIDDA
Non soffri chiù... E' cuntenta... Ridi cu l'Angileddi e magari tu ha essiri cuntentu.
COLA
(è straziato dal pianto, ma si frena e con sforzo inaudito tenta di mutare la contrazione del pìanto in quella del riso) Chi fa ora, haiu, a ridiri?... Ah!... Ah! A mia non mi veni di ridiri, a mia mi veni di chiangiri. (con voce strozzata) Mamà... Mamà... (e fra i singhiozzi che gli squarciano il petto) 'A mamma, 'a mamma vogghiu.
Fine del secondo atto
ATTO TERZO
Una sala squallida. Credenza sul fondo con sopra un servizio di caffé; un cassettone, cassapanca a destra. Sul tavolo resti di una colazione: pezzi di pane, bucce di frutta, usci di uova ecc... Una porta a sinistra. Comune al fondo. Il seggiolo del 1° atto di Gati.
Scena 1°
Mara e Cola
MARA
(dalla comune guarda fuori, facendosi ombra agli occhi con la mano destra, trema di rabbia) Non veni, non veni!... M'abbruciunu l'occhi a furia di taliari 'stu stratuni biancu e chinu di suli!
COLA
(seduto sul seggiolone della mamma) Veniri havi! Non è chista la so' casa? Non si' tu so' mugghieri? Non sugnu iu so' frati? Non è cca lu so' lettu? Veniri havi.
MARA
E si veni 'sta sira, 'sta notti, dumani?
COLA
Veni a diri ca nun potti veniri prima.
MARA
Lu carrettu era a la strata, guardasti bonu?
COLA
A la strata era!
MARA
Davanti a la casa di Vennira cci passasti?
COLA
Cci passai!
MARA
D'intra era?
COLA
No!
MARA
'Nni la za Pidda c'era?
COLA
Nun voli Gaetanu ca Vennira sta a la taverna.
MARA
Nun voli? Si scanta ca cci la pigghianu? Ca cci l'arrobbunu? E' inutili! E' inutili! Ccu la pazienza, ccu li boni nun cumminu nenti. Si nun la rumpu, non pozzu aviri paci... No...
COLA
(dopo una lunga pausa) Iu sacciu 'na cosa, ma nun la pozzu diri... Pirchì Gaetanu dici: Rispunni a chiddu ca ti dumannu e parra picca. Tu non m'hai dumannatu e iu non parru.
MARA
Comu 'a dumannu su non sacciu di chi si tratta?
COLA
E iu... Pipa...
MARA
E' cosa... Di Gaetanu?
COLA
Si!...
MARA
(ansiosa) Prestu... Parra...
COLA
Dumanna... Dumanna...
MARA
'Stu babbu cci mancava.
COLA
Non sugnu babbu iu...
MARA
Va beni, non si' babbu... Parra!
COLA
Non pozzu.
MARA
Cola! Ti li sonu!
COLA
Sonammilli... Ma la mamà ti vidi!
MARA
Vidisti a Vennira?
COLA
No!
MARA
A Gaetanu?
COLA
No! Dumannimi, ca accussì parru!
MARA
Ti... Ti dissiru quarchi cosi d'iddi?
COLA
Si!
MARA
Cu ti lu dissi?
COLA
Tinicchia!
MARA
Li vitti?
COLA
Si!
MARA
Unni?
COLA
'Nsemula!
MARA
Unni?
COLA
A la casuzza sdirrubbata!
MARA
Suli?
COLA
Non lu sacciu!
MARA
E mi lu dici ora, doppu un'ura ca mi camulìu o' suli?
COLA
Pirchì non m'addumannasti prima, tu!...
MARA
Ah! Si nni vanu 'nzemula a la casuzza sdirrubata, mentri iu, stupida, staiu dintra? E sparti Gaetano mi pruibisci di nesciri? Si capisci! 'A fimmina dintra... E l'omu a divirtirisi! La fimmina chiangi... E l'omu si nni ridi!...
COLA
Non ridi mai Gaetanu!
MARA
Pò ridiri mai! Havi lu pinseri a n'autra? Non nni pozzu chiù! Alla fini, dui manu havi idda e dui manu haiu iu... Si nni ieru a la casuzza a la facci mia? Ora cci vaiu a la facci d'iddi! (mette lo scialle)
COLA
Non nesciri, non nesciri, Gaetanu nun voli!...
MARA
Si non voli iddu, vogghiu iu!... Ma staiu a la catina.
COLA
Ti li sona
MARA
Nni li spartemu. (è all'uscio)
COLA
Mara, Mara!
MARA
Chi voi?
COLA
Chi haiu 'a fari d'intra?
MARA
Chi hai 'a fari? Ietta tutti cosi all'aria! Non mi nni 'mporta nenti (via)
Scena 2°
Cola solo, poi Sisidda
COLA
(rimasto solo si guarda intorno con aria imbarazzata, indi prende la scopa e butta via il servizio da caffé. Lo stesso fa con le cose che si trovano sul tavolo, spazza tutto in un cantone, sospira di soddisfazione. Siede, toglie dalla tasca il rosario, lo bacia e incomincia a pregare) Chistu si lu scurdò me' matruzza... Salvi Regina... Matri... Rigina Signura Rigina... Nenti chista nun la sacciu! Dio si salvi Regina... Arreri chidda dicu! Dio si salvi a Maria... Lu Signuri è con vui... Pirchì ccu mia nun c'è! Vui siti biniditta...
SISIDDA
E' permesso?
COLA
Trasi, Sisidda!
SISIDDA
Non c'è to' cugnata?
COLA
Ora niscìu!
SISIDDA
Assai sta a turnari?
COLA
Nun lu sacciu.... Chi voi tu ?
SISIDDA
Cci vulìa dumannari si mi pristava li tazzi e li cucchiaini... Pirchì n'avemu pocu... E mi serbunu dumani sira.
COLA
Nun ti li pò pristari...
SISIDDA
Pirchì?
COLA
(accennando il mucchio della roba) Li scupavi ora... Ora.
SISIDDA
Bih! Piccatu! Lu bellu serviziu. Ma lu sai ca si' daveru babbu?
COLA
No! Iu sugnu prufeta!
SISIDDA
Bellu prufeta!...
COLA
Chi hai dumani sira?...
SISIDDA
S'appunta lu matrimoniu ccu Liddu!
COLA
Ti mariti? Mi lassi? Non eri maritata ccu mia?
SISIDDA
Ccu tia ppi scherzu.... Ccu Liddu ppi daveru!...
COLA
E com’è ppi daveru?
SISIDDA
Mi porta in Chiesa... Mi metti lu velu...
COLA
Pirchì, chi ci su' muschi?
SISIDDA
Vaiu a stari 'nta casa ccu Liddu...
COLA
E ccu iddu ti curchi?
SISIDDA
Chi dumanni fai?
COLA
Nun t'affrunti? Iu m'affruntassi... Già, ca si chiddu ti vidi spugghiata ti dici: scustumata e ti sona lignati, e poi iu ti viu ccu n'occhiu comu 'na mulinciana!
SISIDDA
Lu scustumatu tu si'!
COLA
Lu sai chi veni a diri maritarisi?
SISIDDA
Vulirisi beni!
COLA
No... No. Iu prima sapìa puru accussì... Ma ora vìu a Gaetanu e Mara... E lu sacciu.
SISIDDA
E chi sai?
COLA
Maritarisi veni a diri sciarriarisi tuttu 'u jornu. Sempri, sempri! S'u maritu voli nesciri... La mugghieri si siddia!... La mugghieri voli nesciri... Lu maritu non voli.. Si nni va e idda chiangi... Nesci, si nni và a la casuzza sdirrubbata ccu n'autra fimmina... Torna... Si sciarrianu... E' ura di mangiari, e non mangianu, nè iddi nè Cola. Iddu dici ca va a travagghiari?... E torna nni Vennira... Poi quannu è dintra, arreri si sciarrianu cchiù forti. Si diciunu tanti cosi larii... Tanti... A tia nun ti vulìa... ‘Dda fimminazza cci curpa...
SISIDDA
Tornu quannu c'è to' cugnata (va via)
Scena 3°
Cola, Pidda, Nina
(Entrano le due donne misteriosamente avvolte in scialli. Una di esse ha in mano una conca, l'altra un quadro raffigurante il diavolo o similare. Sono guardinghe; dinnanzi all'uscio si assicurano che non ci sia nessuno all'esterno. Dentro casa si tolgono gli scialli e posano ciò che hanno in mano)
COLA
(spaventato si rannicchia)
PIDDA
Beddu prestu za Nina... Pigghiassi soccu havi 'a pigghiari, e niscemuninni di 'stu 'ntricu, masinnò a lignati finisci.
NINA
(rivolta a Cola) Senti Culicchiu... Tu m'hai 'a fari un piaciri... Di chiddu ca vidi fari... Non hai a diri nenti a nuddu.... Senti? Su' cosi ppi lu beni to', di to' frati e Mara, ppi farli turnari in paci... E tu nn'hai aiutari!
COLA
Iu mi scantu...
NINA
No... No... Nun c'è scantu! Tu grapi li casciuna di lu cantaranu e pigghia un paru di mutanni di Gaetanu... Và, beddu.... Lestu.
COLA
Pirchì non li pigghia vossia?
PIDDA
Za Nina, non facemu sbagghi! Chiddu ca dicu iu, fu liggiutu di me' nannu, 'ntra lu libbru di l'arcu di Noé. E su' paroli singaliati... Si lu tradituri è l'omu, li mutanni l'havi 'a pigghiari un picciutteddu schettu! Si la traditura è la fimmina, li mutanni li pigghia 'na virginedda. Poi gnutticati, e attaccati ccu li stissi lazza, ittatili 'ntra lu focu vivu... Mentri abbrusciunu, cusiti e scusiti la trama di l'ingannu, pistati l'acqua 'nta lu murtaru, faciti promissioni a li Santi, e faciti lu scongiuru ppi dui voti consecutivi. Oh! Ora ca lu sapi si spicciassi.
NINA
Spicciati Cola, pigghia chiddu ca ti dissi...
COLA
No... No... Mi scantu.
NINA
Babbu!... Babbareddu!
COLA
Non sugnu babbu!
NINA
No... No... Si' un beddu figghiu. Ma non ti scantari. Facemu la fattura a Gaetanu e a Vennira, ppi lassàrisi. Capisci? Accussì torna la paci, e campati cuntenti. Non ti piaci? Non è puru ppi lu to' beni? Non ci si' tu intra 'stu 'nfernu?
COLA
Pirchì non ci la fa a Mara e Vennira la fattura? A Gaetano non vogghiu.
NINA
Cola, tal'è, 'nfinu a 'st'ura t'haiu prigatu... Ora si non accunsenti ti fazzu 'na bella lezioni di chianti di manu (sta per dargli uno schiaffo)
COLA
Vastunati mi duna?
PIDDA
Spicciati ca è megghiu ppi tia!
NINA
(sempre minacciosa) Abbuschi!.... Abbuschi!...
PIDDA
(incalzando) Si non li pigghi, Gaetano si nni va ccu Vennira, e ti lassa sulu comu un cani. Và, và, và, Culicchiu.
NINA
(dinnanzi all'uscio) Pigghiali, l'ammogghi stritti, l'attacchi e quannu ti fazzu un signali, li jetti tra lu focu!...
PIDDA
La quasetta la purtò?
NINA
(dandogliela) E cca! (a Cola che ritorna con le mutande sotto braccio)
PIDDA
Pigghia lu murtaru, mettici l'acqua. Porta tuttu cca!
COLA
(eseguisce e posa tutto sul seggiolone)
PIDDA
Lu quatru.... Lu quatru!
NINA
(pone su una seggiola il quadro che ha portato. Pidda pone presso il quadro la conca, accende lo spirito che le sta dentro poi estrae dal petto un involto dove vi sono dei capelli) Chisti su' li capiddi di ‘dda svirgugnata rovina casi. Accussì putissi bruciari dintra lu 'nfernu.
COLA
(fa per andarsene)
NINA E PIDDA
Non ti mòviri, non ti mòviri!
PIDDA
Vossia a la me' manca cu li capiddi ‘nna manu... Cola, quannu ti dicu: iettili, tu ietti li mutanni.
Trasi, spurtusa ddu cori 'ngratu
E fallu addivintari cori 'nnammuratu.
E si cori 'nnammuratu nun voli addivintari,
'ntra li magghi di catina facitilu 'ncagghiari!
Iettili, Cola... Iettili, Cola!...
NINA
Prestu, prestu!
COLA
(finisce col buttare le mutande nel fuoco)
PIDDA
(a Cola) Ripeti ccu mia! Vossia puru za Nina! (in coro con Cola e Nina. Cola fa finta di ripetere, ma gestisce soltanto)
Trasi, spurtusa ddu cori 'ngratu
E fallu addivintari cori 'nnammuratu.
E si cori 'nnammuratu nun voli addivintari,
'ntra li magghi di catina facitilu 'ncagghiari!
(a Nina) Li capiddi, li capiddi!...
NINA
(butta i capelli nel fuoco) Brucianu li pinzirazzi tinti!
PIDDA
(si scaglia su Cola e lo fa sedere) Assettati! Assettati!
COLA
(che si dibatte) Mi scantu!
PIDDA
(gli mette il mortaio fra le gambe e vi versa dell'acqua) Pista, pista ddocu! E dici accussì:
Ti pistu la facci, li vrazza, lu cori!...
NINA
(ripete anche lei con Pidda)
Ti pistu la facci, li vrazza, lu cori!...
COLA
(pesta, dice le parole, si bagna, l'acqua gli schizza sui pantaloni. Si alza, torna a sedere, sempre ripetendo)
Ti pistu la facci, li vrazza, lu cori!...
PIDDA
(con gesto simultaneo prende la calza, si inginocchia presso il fuoco scongiurando e dice)
Tu l'attacchi e iu lu sciogghiu,
Tu l'attacchi e iu lu sciogghiu
NINA
(con azione simulanea s'inginocchia e con voce solenne dice)
San Giuseppe! San Iacupo! San Iachinu!
Santa Leonarda! Santa Prizzita!
Facci ppi terra
Vi prumettu cira, ogghiu, elimosina.
Facci ppi terra addumannu rovina e precipizi
ppi cui si lu merita!
PIDDA E NINA
(si scaraventano su Cola imitandolo)
Ti pistu la facci, li vrazza, lu cori!
Pista, pista!
COLA
(butta tutto via, ride e batte le mani) Fli, flé, Fli, flé!
PIDDA
Chifù, chi hai?
NINA
Scumunicatu, pirchì ridi?
PIDDA
Pista, pista!
COLA
(le insegue facendo loro la baia) Fli, flé, Fli, flé! E vi la fici... E vi la fici...
NINA
Chi nni facisti?
COLA
La fattura cci la fici a Mara! a Mara!
NINA
A Mara?
COLA
Li mutanni non eranu di Gaetanu, ma di Mara.
NINA
(si precipita su Cola e lo precipita a terra) Scilliratu! Scilliratu! La fattura a ‘dda povira sfurtunata.
PIDDA
'Nfami, 'ngratu!
Scena 4°
Gaetano e detti
GAETANO
(accigliato entra e vede) Chi fù? Chi c'è? Chi aviti?
COLA
(raggiunge il fratello e non curandosi dei gesti di silenzio delle donne) Ti vulivunu fari 'a fattura!
NINA
Zittiti!
GAETANO
Pirchì vinni 'nta la me' casa? Mara unn'è?
COLA
Nisciuta è!
NINA
E'... a circari a tia! E' sparsa ppi li campagni... E' unni la vosi la so' disgrazia quannu si pigghiò a tia!
GAETANO
'U voli un cunsigghiu? E vossia puru za Pidda! Vi nni iti beddi lesti, lesti ca è megghiu!
NINA
Mi nni vaiu?
GAETANO
E cca, ppi fari magarii non cci vinissi tantu spissu.
NINA
Curpa tua!
GAETANO
E 'ntra l'affari mei non vi cci 'mmiscati...
NINA
Affari toi? Affari di me' niputi. Affari di 'na povira criatura chi chiangi lacrimi di sangu.
PIDDA
Iamuninni za Nina!
NINA
No! Chiddu ca haiu 'a diri lu dicu masinnò scattu! Ah! Si cci fussi viva to' matri, chidda sì ca era 'na fimmina ca 'nta lu cori avìa 'na vilanza! Ma si è veru ca si vivi 'nta l'autru munnu, la stai marturiannu morta, comu la marturiasti viva! Talé Gaetano, ppi li latri, ppi l'assassini e macari ppi li briganti, cci pò essiri paradisu; ma ppi li tinti figghi, no! No! (si svincola da Pidda che vorrebbe condurla via, si scioglie i capelli e guardando il cielo, s'inginocchia ed urla fortemente) Zà Gati, zà Gati! Vui ca siti 'nta lu Paradisu, sintiti li me' paroli! Giustizia! Giustizia! (è trascinata fuori da Pidda)
Scena 5°
Cola, Gaetano poi Mara
GAETANO
La me' casa addivintò 'na chiazza! Tràsunu, nésciunu! Pigghianu robba, fannu fatturi, e si sapi... Sparti 'dda vecchia ciocca carcarìa. Unn'è Mara?
COLA
(ha paura e tace)
GAETANO
Ohé! Ccu tìa parru! Unn'è Mara?
COLA
(piangendo) Nisciti, trasiti... E poi vi la pigghiati ccu mia! (si scanza temendo le busse)
GAETANO
Veni cca... Di mia ti scati? Nun lu sai quantu ti vogghiu beni? Parra... Unn'è Mara? Nisciu? Si? Unni ivu?
COLA
(tremante) A la casuzza sdirrubbata.
GAETANO
Cu cci lu dissi?
COLA
(pur tremando confessa) Iu!
GAETANO
(furente cerca di afferrare il fratello) Tu! Tu! E pirchì cci lu dicisti? Ppi farimi aviri la mala iurnata? Oh! Pirchì parrasti?
COLA
Pirchì era la virità...
GAETANO
La virità è chidda ca non si pò diri mai.
MARA
(entra violenta) E già, lu tortu è di cu parra. Tu hai 'a fari chiddu ca voi! L'autri non hannu ad aviri né vucca né aricchi!
GAETANO
Mara, abbada comu parri!
MARA
Chi ci isti a fari a la casuzza?
GAETANO
Non haiu 'a dari cuntu a tia.
MARA
Mi maritasti? M'apparteni!
GAETANO
Sbagghiu c’è.
MARA
‘Sta cosa havi ‘a finiri... O idda o iu!
GAETANO
Vai, curri... Spii... M’assicuti! Comu un cani senza patruni... Chi hai vistu, nenti!...
MARA
Ah! Si avissi vistu qualche cosa!
COLA
(fra i due, tenta di calmare ora l’uno ora l’altro. Non gli badano e gli danno degli spintoni per allontanarlo)
GAETANO
Chi avissi fattu
MARA
Quant’è veru Diu, v’affucava.
GAETANO
Talè bedda, o ti stai chiusa dintra, a fari la fimminedda di casa o pinsamu ppi lu rimediu.
MARA
Mi nni vaiu.
GAETANO
Prestu e lesta!
MARA
Mi fazzu la truscia.
GAETANO
Cci hai persu tempu.
MARA
Non ci nni perdu chiù! (va al cassettone, apre, ne toglie violentemente della roba da uomo e la butta a Gaetano, ma è Cola che la riceve in faccia) Chista è roba tua.
GAETANO
(apre l’altro cassettone, ne toglie delle sottane che scaraventa addosso a Cola)
MARA
‘Stu fazzulettu mi lu dasti tu! Té! Dunaccillu a ‘dda bedda pupa (glie lo lancia)
GAETANO
(lo prende)
MARA
Té! (s’avvolge in uno scialle) Vaiu, curru, addiventu pruvulazzu, basta ca non ti vidu chiù.
COLA
(tirando Mara per lo scialle) Lu sciallu di la me matruzza. Non ti lu purtari.
MARA
(toglie lo scialle e lo butta per terra) Té! Té!
COLA
(prende lo scialle e lo infila dentro la camicia che tiene aperta)
MARA
Malidittu tu e to’ matri ca ti fici!
GAETANO
Ah, tinta sirpazza vilinusa (afferra un coltello che è rimasto sul tavolo e lo tira violentemente a Mara) E té! Té!
COLA
(riceve il coltello nella schiena, dà un fortissimo grido disperato) Ahi! Ahi! (barcolla)
GAETANO
Cola! Cola!
MARA
Cola! Cola!
GAETANO
A me’ frati, a me’ frati ammazzavi... E lu vogghiu beni chiù di la me’ vita! Cola! Cola! Arrispunni. Chi hai? Non mi lassari! Fratuzzu miu!
COLA
(riapre gli occhi, guarda dinnanzi a sè e, come in estasi mormora) ‘A mamma viu!...
GAETANO
Non mi lassari! No! Cola!
COLA
Vuatri lassati a Cola!...
GAETANO E MARA
No!... No!...
COLA
(a Gaetano) ‘A lassi tu a Mara?
GAETANO
No!
COLA
(a Mara) ‘U lassi tu a Gaetanu?
MARA
No!
COLA
A Cola, lu lassati?
GAETANO E MARA
No!... No!...
COLA
(riunendo le teste di Gaetano e Mara i quali si sono inginocchiati ai suoi piedi) Vasativi! Vasativi! (li fa baciare, poi alzando lo sguardo) Mamma! Mamma! Tutti tri! ‘Nzemula semu!...
Fine della commedia
