Un quadretto abbastanza improbabile, comunque impostato sulla vita di qualche anno fa. Abbiamo Katia, con il camice, che sta attendendo di andare al lavoro, e la coppia Lena+Pepp,che, con il loro fortuito incontro con Katia, danno vita a qualche momento (si spera) di allegria per il pubblico presente.
Aleardo Noli, 1999
PEPP E LENA ............’Bondì!
KATIA Buongiorno. Vi occorre qualcosa?
PEPP Verameent......nümm.....cercavum...........
LENA Adèss, sa metett a parlà con la prima che ta troeuvet? I nòss ropp a i’è migna de sparpaià in piaza, ma paar!
KATIA Oh, che la senta, lée! Sii staj vialtri a vegnì scià a tacà buton, ma paar, o no?
PEPP Séntela, Lena, la parla dialèett. Sa pò fidàss!
LENA E va ben, fidemess. Ma t’oo già dii un miglion de vòlt che mì ma ciami, in publich, Maria Maddalena.
PEPP Oh, quanti ball de pü. Fala curta. Pütost, signorina, la savress dimm dove podumm trovà al scioor dotoor di besti?
KATIA Al voeur dì al veterinari? A sii fortunaa, perchè mì somm propi la sua segretaria.
LENA Oh, che bell! Piacere: Maria Maddalena Sgarletti in Piralli (al Piralli al saress al mè Pèpp).
KATIA Piacere: Io sono Katia.
PEPP Piacere: Giuseppe detto Pèpp.
KATIA Pòdi aiütaff in quajcòss? A gh’ii un bisoeugn particolaar?
LENA Mì, un bisoeugn particolaar verameent ga l’avress, ma lée la pò migna aiutamm. Roba privada.
KATIA Capissi migna.........
PEPP La ga daga gnanca a tra’, la mia véga a l’è un poo.....elvetica!
KATIA Al voeurerà dì.....ermetica!
PEPP No, no, propi elvetica. La vegn di moont dèla paart de là ; a i’è püssée rüstich di nòss dela paart de scià.
LENA Pepp !!!! Varda che, bèla o brüta che siess diventada, somm sempro la tua consorte, neh ! Regordetel!
KATIA Adèss, tachée migna liit per mi. Pütost, sevum drée a dì di vòss bisoeugn per via del veterinari.
LENA Eh, voeurevum portala giô, la nòssa Bianchina, ma l’è migna in caas de fà tüta ‘sta strada (FAZZOLETTONE PER ASCIUGARE LE LACRIME)
PEPP Su, su, Lena, fà migna inscì. Ta vederee che................
KATIA Ma la Bianchina....che bestia è?
PEPP Ma come la sa permett....la Bianchina a l’è la nòssa tôsa, la nòssa unica tôsa, lüus di nòss oeucc....e....la g’à l’influenza!
LENA .......l’influenza e la bronchite asmatica!
KATIA Ma alôra, cosa gh’entra al veterinari, se l’è la tôsa che l’è malada?
PEPP Ma nümm infati vegnevum migna giô per la Bianchina!
LENA Al la sa perchè l’emm ciamada Bianchina? Per amoor de ‘na galinèla bianca che gh’evum nel polée quaand a sevi incinta e che la ma piaseva inscì taant!
PEPP La nôssa tôseta....la g’a trentasett ann; se füdess migna per la bronchite, l’è sana come un péss, la someja un coregon de quisti chì che gira visin a la riva. Ma adèss....la pò migna cert moeuvess de ca’.
KATIA Alôra, oo gnammò capii al vòss problema!
LENA L’è al nòss bell gatt sorian, che al pèrd al peel, al nòss problema. E questa roba, neh Pepp, l’è migna bèla.
PEPP Eh sì, l’è ‘na roba brüta. Bisoeugna metela a post.
KATIA E induèla la bestioeula? In machina? In un cest?
PEPP E LENA Ma nümm...semm chì a pè.
KATIA Ma alôra indôa diavol èla ‘sta bestia malada?
PEPP A ca’, a specià al dotoor che al va a trovall.
KATIA Ma per l’amoor del cieel! Indôa a stii de ca’?
LENA Migna propi a Seghebia, un zich püssée in sü. Lée la riva a Bügiol, poeu a Seghebia, poeu la ciapa la mülatiera vegia dèla caserma dela Finanza......e.........
KATIA (STUPEFATTA) Cosa??????????? E al dotoor, che al g’à ‘n etaa e al pesa vutantott chili bundant, al dovress rampegass fin sü là per un gatt che peerd al peel?
LENA Oh,beh, che la senta. Mì, a tocal, gh’evi schivi, e alôra......
KATIA Ah! E alôra, sicome che la gh’eva schivi lée.............
PEPP Ma..........i dotoor di besti........èl migna al sò mestée de tocà i besti malaa? E alôra, avanti Savoia, e via!
KATIA Chì, va avnti nè i Savoia nè i Borboni.....vardée se al pò pèrd un dì per vegnì sü del vòss gatt pelaa!
LENA Ma la giornada a la perderess migna, che a düu pass de chì gh’è ‘n oltra bestia che sta migna taant ben. E questa l’emm portada giô.
KATIA E che bestia saressela, stavolta?
PEPP ‘ Na vaca!
LENA Pepp, parla ben davanti ala signorina: Sa diis ‘na muca, eh!
PEPP Senta, vaca, o muca, o manza, l’è sempro un bovino malaa.
KATIA E......e.....e.....dove la sress ‘sta vaca-muca-manza?
LENA Sü chì, in un praa, ligada a ‘n paal.
PEPP Adèss voo sü, e la porti giô.
KATIA Per l’amoor de tücc i Saant, fermo. No,no. Fermo!
LENA Perchè no?
KATIA Perchè al mè dotoor al visita migna besti gross, domà pinin. Animaj domestich, inzoma, ma capissuf?
LENA La nòssa Mora la saress migna de ca’? L’è püssée al teemp che l’è deent per ca’ che altro!
PEPP E......per vess domestica, gh’è migna bestia püssée domestica de lée. Educada, la fà un sacch de lacc, ma ultimameent la sta migna taant ben.
KATIA No, no, s’an parla gnanca. Tornée ai vòss monti e che s’an parla pü.
LENA Ah, e nümm sa saressum metüu in marcia stamatina ai tre oor, per sentiss dì che al veterinari di besti al visita migna i besti? E al cavall? Al nòss Rôss?
KATIA Quaa cavall?
PEPP Ma al cavall che emm portaa giô e che adèss a l’è nel praa visin ala vaca a mangià l’erba e a speciann!
KATIA (ACCENNA AD UNO SVENIMENTO) Oh, caar Signoor di poveritt!!!!
LENA Mì, a diseress pütost: “Caar Signoor di sciôritt”, perchè ai poveritt sa nega la visita d’en poor cavalin che g’à fà maa ‘na sciampa! Che moond!
KATIA Ma no, l’è migna quela la question! Voo già spiegaa che al mè dotoor a l’è per i animaj pinin.
PEPP E alôra perchè al varda migna al nòss gatt?
KATIA E dai che l’è un gatt! Ma se g’a lii migna scià! O no?
LENA No, infati.
PEPP Pero’, ‘na pasegiada in montagna, al sò dotoor, la ga faress migna maa. Magari al perd un quaj eto.
KATIA Ma se al sofriss de gôta de un sach de mees!
LENA Ma alôra.......a l’è lüu de curà, migna i besti.
KATIA Scià, scià, disem migna sü bestiaad.
PEPP Ma se semm propi adrée a parlà de besti in continuazion!
LENA E de diove vegnel ‘sto dotoor?
KATIA De Milan.
PEPP Ma alôra de besti in giir a l’è un pezz che al na veed pü.
KATIA Bata dì sü castronerì; adess l’è ora che vaga a ciapà servizi, se de no al ma licenzia.
LENA La ga disa che chì de foeura.............
KATIA Mì, ga disi propi un bel nagôtt!
PEPP Alôra, avressum faj al viacc per nagôtt. Magari se gh’evum ‘na furmiga malada, che l’è pinina...............
KATIA Niente insetti!
LENA Magari, se na fava maa un deenc, già che sevum chì.........
KATIA L’è migna un dentista!
PEPP Lena, varda, l’eva mej ai nòss teemp, quaand a sevum sü ni selvi de castan, de giovin, a pascolà i cavri...........
LENA Parla migna. Sa vardavum ‘ni oeucc..........
PEPP .........e la sira.......i stell ni tò bej oeucc celest.............
LENA E vardess mì che ta vardi tì....e a furia de vardass............
KATIA ............è nassüu la Bianchina!
LENA Ma che tôsa inteligenta. Come l’avrà faj a passà di oeucc....ala Bianchina?
PEPP E, se voeuret fach, Lena, i giovin incoeu a i’è balòss, ma balòss............
LENA Intaant, con tücc quii bej ball chì, emm migna risolvuu, nè al problema del gatt, per mancanza del malaa; mè al problema dela Mora e del cavall per esagerada grandeza; emm perdüu teemp, che gh’eva sü ammò al mageengh de tirà deent, che al vegn a pioeuf.............
KATIA Beh, geent, mì devi na’, come già detto. Arrivederci.
LENA Arivedess......che giornada straca!
PEPP (SQUADRA KATIA CHE SI ALLONTANA) Mah, propi ‘na giornada inutila diseress migna (ALLUSIVO)
LENA Uhei, bèll, a ta cerchet de fà al menafrecc, adèss ?
PEPP Ma dai, Lena,m che sü de nümm riessi mai a vardà oltro che pegoor e cavri, e tì.
LENA Se gh’entri mì coi besti?
PEPP Vedet, Maria Maddalena Sgarletti in Piralli, siamo tutti un po’ animali e alôra mì, a vedé ‘sta tôsa.................
LENA (RISPONDE DOLCEMENTE, MENTRE AFFERRA IL BASTONE DA MONTAGNE CHE PORTA CON SE’) Ah sì, neh, Pepp, siamo tutti animali, neh?
PEPP Ma dai, che m’à colpii i’è staj i sò oeucc..................
LENA Varda che i oeucc de solit a i’è un zich püssée in vòlt dela direzion di tò, de oeucc..........
PEPP (ALLARMATO) Lena, fermet, ritiri tütt........
LENA (RINCORRE PEPP, CHE FUGGE) E penza migna de vegnì giô de per tì in paees, perchè mì ta lengi nel penzee, e alôra ma materess mì a fà al veterinari e ciapi la pinza che i dopra per tajach i oong ai cavai, e dopo sì che la vegneress bèla!
FINE
