Un moond...faj inscì!
breve scenetta, Aleardo Noli, 1998
La Lena
Il Renzo
Il Pèpp
(ALL’INIZIO, LA LENA E’ SOLA E MONOLOGA, POI SOPRAGGIUNGE IL RENZO ED INFINE COMPARE ANCHE IL PÈPP)
LENA Ahhhh !!!! Voeureress vecch i brasc inscì loongh de podé ‘brascià sü tütt al moond, come se al fudéss ‘na fassìna de nisciôla (GESTO D’ABBRACCIO AMPIO)
RENZO Oh, bondì, vardée la nòssa Lena come la predica. Seet metüda a parlà anca de per tì, adèss?
LENA No, Renzo. Somm piena de bon intenzion, stamatina. Sevi dée a penzà che al mmond al saress inscì mai bèll se tücc da voeureressum ben, sa brasciassum sü. El migna vera, divoolt, tôos?
RENZO Se t’al diset tì....ma varda che incoeu al moond a l’è, püssée che rodoond, quadro e pien de spigôl. Brascià sü tücc, ma, al soo poeu migna. (CON FARE SCETTICO)
LENA Ma Renzo, ‘scolta. Semm migna tücc frédéj? Tücc!! (SI RISCALDA) De tücc i coloo. Biaanch, negri, giaald, veerd........
RENZO Veerd? Parlet di ecologisti?
LENA No. Parli di extraterestri; meti deent anca loor!
RENZO Ma varda che i extraterestri i deev migna vess poeu inscì bej de vedé, neh!
LENA Ta capisset un osti d’en nagôtt. Varda, è scià anca al Pèpp: Domandeghel a lüu, che de tanti ropp al sa na inteend.
PEPP Bondì a tüta la compagnia. Bèla giornada, eh?
RENZO ‘Scolta, Pèpp: Sa parlava con la Lena......Tì, ta piasi i extraterestri? Quii omin veerd?
PEPP (SCHIFATO) Mì? A i oo vist ‘na volta al cinema e g’a n’oo avüu assée. No, i m’è piasüu nagôtt del tütt. I someja....i someja..........
RENZO .......i someja a ‘na gelatina naja a maa, per migna dì de pegio..........
LENA (ALTERATA) Omen senza co......coeur! L’è migna la beleza de foeura quela che cunta, veh!
RENZO Alôra, Lena, ta sée bèla anca tì!
PEPP Diseress, Renzo, che quela dèla Lena, a l’è ‘na beleza.....sfuggente, che scapa, inzoma!
LENA Scomencée migna a roomp i ball, vialtri.
PEPP Però, a penzach sü ben, anca la Lena l’a g’a migna tütt i toort.
RENZO Sa metet a fà al filosofo a bon mercaa, adèss?
PEPP A l’è migna question de filosofia, a l’è che i ropp, caar al mè tôos, bisoeugna penzaj ben. Presempi.....Lena, se ma diset de quii dela pell scüra?
LENA (BRUTALE) Parlet di negri?
RENZO Aeh, uheila come ta seet fina, Lena; al parla propi de loor.
LENA (IN CRISI) Mì, mì, a....a.....a...brasceress sü anca loor.....
PEPP A goo i mè dübi. Cert che se........
RENZO ....se i g’avess la pell un poo meno scüra de l’ asfaalt.........
LENA Beh......alôra.....a sa poderess.... (FACENDO MARCIA INDIETRO SULLE DICHIARAZIONI DI INIZIO) .....tocacch sü la man!
RENZO (RIDENDO) Com’è, un momeent fà ta brasciavet sü anca i extraterestri veerd, e adèss.........
LENA Ma...ma.....l’è migna la question.....a l’è che....che.....(AMMUTOLISCE, NON AVENDO SCUSE A DISPOSIZIONE)
PEPP Questa a l’è bèla del bon, Lena. Seet già fermada con i bôn intenzion?
LENA No, ma l’è che.....de visin.....t’al seet.........
RENZO Però a i’è propi bej quii fiôlett coloo cafelacc............
PEPP Ma dopo i créss, e i resta pü inscì bej.........
LENA Quajvoolt, però......j’è ammò bej........quajvoolt!
RENZO In ogni modo, se bisoeugna brascià sü, bisoeugna fall e basta; che coloo d’Egitt!
LENA Al Renzo al g’à propi reson. Mì, presempi, g’a mandi sempro via un vaglia..........
RENZO De cinchmilaliir, ovvero due euro e mèzz..........
LENA Ma seent questo chì! Cosa dovress mandà via, segoond tì, eh?
RENZO Ma, tra la rendita che t’à lassaa indée la tôa pòra mamm, i cà ficiaa, tì t’eet sempro lavoraa........
LENA In dôa voeuret rivà? Mì t’oo mai faj i cuunt in sacocia a tì?
PEPP Al voeur rivà, che a oeucc e crôos t’a seet piena de danée, e costa püssée al vaglia postaal che l’oferta che ta mandet via..........
LENA Perchè, vialtri Paperoni cosa g’a mandüff via? Eh? Miglioni? Migliaard? E sii poeu migna inscì poveritt come paar, neh?
RENZO Ah, ma mì....mì.........
PEPP Mah, de paart mia...........
LENA V’al disi mì cosa fii per i pover ? A ciapuff a Lügan sôta protezion i orfanej de Santo Domingo, però portuff al metro di saart e misuruff: 85-60-90, sennò, niente da fare!
RENZO Oh, dai, Lena, tira migna scià mess de moort!
PEPP (PRONTAMENTE) Cambiemm argooment!
LENA Eh, già: Cambiemm argooment, e dopo metemm al lott i numer delle povere orfanelle!
RENZO (PICCATO) Oh, beh, di mè danée, devi rendet cuunt a tì?
LENA Oh, sicur che no, signor depravato.
PEPP Dai, mochemela tücc, adess. L’importaant emm dii che l’è voeuress ben, o no?
LENA Eh, già, l’è vera. Voeuress ben. Migna facil. (PAUSA) Gh’eet propi reson. (ALTRA PAUSA) Vialtri, se penzuff de quii giaald, va piasi?
RENZO Semm sempro scià al stessa discoors: Gh’entra migna al coloo dela pell!
PEPP A dii la veritaa, i m’à fà un zich impression, se a i’è.........
LENA Già, se a i’è propi taant giaald com’è al risott col zafran. Sennò, i ma dispiaas migna........
RENZO E dai che l’è un gatt! Ma alôra a l’è inutil. I geent o i sa brascia sü, o.............
PEPP ........o i sa brascia migna sü. Però, a mì, i cinees i ma piaas poch, cosa voeuruff fach!
LENA Ma sevuff migna quii che ga voeureva ben a tüta l’umanitaa? O sbagli? O i già cambiaa idea?
RENZO (PENSIEROSO) Ma, al Signoor, al podeva migna fann tücc istess? Sa evitava inscì problemi...........
PEPP Sì, coi stampin che giüga i fioeu con la sabia al maar. Dai, famm migna riid!
LENA Oh, beh, saremm d’acordi almen con quii che g’à la pell coloo dela nossa!
PEPP Tirando via quii spacon di american.........
RENZO Tirando via quii mangia-ran de francees...........
LENA Oh, mì inveci ma piaas i francees con i barbisin, e quel “savoir faire” chi g’à!
RENZO Oh, quii lì, i penza dì e nòcc a ‘na roba sola, con quel “savoir faire”. Tütt de riid, Lena!
PEPP Penzi che nümm itaglian sa troeuvum ben domà tra de nümm.....Che semm unii...........
LENA Ah, ‘na beleza. Seent la ricèta: “Mettete insieme un venetoc no un sardo, unite un pizzico di siciliano, mezzo pugliese e un friulano. E fate cuocere a fuoco lento.......” Famm migna vegnì i gômet! Unii! Semm unii col fischio!
RENZO Eh, ma alôra gh’è pü religion! (PENSA, POI SPARA) Cert che nümm dela nòssa bèla Lombardia, sì, che sa voeureum ben, ma del bon! (SOSPIRO)
PEPP Sì, Lombardia: (RECITATO) La Lombardia è composta dalle seguenti province: Turck, Senegal, Albanees, Marochin e Serbi.
LENA Pepp, adess ta esageret del bon; a i’è poeu geent come i oltri......divoolt anca simpatich...............
RENZO Mì, ‘na volta ala fera de magg un marochin al m’à dai ‘na fregada de quii.............
PEPP Mì, ala fera de agosto a m’à fregaa un biaanch...de Saronn!!
LENA Per quell, de bon e catiif g’à nè per tütt........
RENZO Mì, quaand disevi Lombardia, intendevi al nòss bel laagh, i sò geent..............
PEPP (PRONTO) Escluus quii de Sampedro.
LENA Se t’aj faj quii de Sampedro?
PEPP Nagôtt, al soo mì e basta !
RENZO Mì, inveci, quii de Valsolda.................
LENA (SCUOTENDO LA TESTA) Anca i ticinees t’aj racomandi!
(SILENZIOSI PER QUALCHE MOMENTO TUTTI E TRE, NON TROVANO UNA VIA D’USCITA)
RENZO No, geent, chì bisoeugna dass ‘na regolada e vardà i ropp con bontaa, v’al disi mì!
PEPP Eh, del bon, sa pò migna resonà inscì. Se fudessum inveci nümm antipatich ai oltri?
LENA (VANTANDOSI) Parla per tì, che mì somm simpatica a tücc e tücc i ma cerca!
RENZO E PEPP (INSIEME, GESTO ELOQUENTE) Oh, tana che sì, come no! Ha parlaa la regina dela simpatia, la Miss Italia del sorriso stampato.
LENA Perchè, gh’ii quajcòss che sta sul gòss? Spudée foeura al sciatt, alôra!
RENZO Ma dai, Lena, se veet adrée a penzà cuss’è!
LENA (COME CONCLUSIONE) Beh, piantemela lì. Regordemess però che i unich che tradiss migna a i’è i paesan!
PEPP Bèla roba! Prima de tütt ta devet spiegamm chi che i’è i paesan incoeu, dato che al püssée porlezin a l’è vün nassüu a Milan, col pa’ de Taranto e la mamm svedesa.
RENZO Taant, i fregaduur i sa ciapa anca in paees, e anca di paesan, veri o presunti.
LENA E se fudessum nümm che dà via i fregadüur? Tütt al moond....
RENZO .......l’è paees, eh? L’è quel che ta voeuret dì?
PEPP (PENSA, POI) La famiglia! Eco indôa trovà comprension e afett!
LENA Oh, tana che sìé. Mì somm depermì, ma g’oo di pareent che a l’è mej perdi che trovaj, v’al disi mì.
RENZO L’e vera, “fratelli coltelli” e via de ‘sto pass. Proverbi eficacissim.
PEPP Mì, somm chì stracuntaa. Emm parlaa per un quaart d’ora, emm giraa intorno a l’argomeent, semm partii de tütt al moond, e sa ritroevum............
RENZO Ma g’a l’oo dii prima ala Lena che al moond l’è pü rodoond, ma quadro e pien de spigoj, come devi divel? In latin?
LENA Alôra, tüta la nòssa filosofia la va a fass ciavà.
RENZO Ha parlaa Miss Finezza 1998; ta se fina, Lena, a gh’è nagôtt de dì, ta manca propi nagôtt per véss ‘na vera sciôra, danée a paart.
PEPP Oh, dai, scomencée migna ammò a tacà liit. Dopo al noss discoors, i unich amiis a semm poeu nümm trii. O no?
RENZO Ah, certameent. L’è bèll vess trii amisoni, l’è propi bell, t’al disi mì.
PEPP Beh, ciao, a devi na’. A goo poeu migna al bonteemp che gh’ii violtri düu menafrecc.
RENZO (ACCOMPAGNA CON LO SGUARDO PEPP, E POI) Lena, voeut savé ‘na roba? Mì brasceress sü tütt al moond, ma brasceress migna sü al Pepp, quel scemo lì, chissà cosa al sa creed, con i arii che al sa dà.................
LENA Eh, se voeuret fach, renzo, migna tücc i’è in gamba com’è nümm düu.
RENZO Ciao, Lena, an voo anca mì, che l’è ora de na’ a fà un quajcòss..............
LENA (DOPO CHE RENZO E’ ANDATO VIA) Vann, vann anca tì, che de scimiott a n’oo cognossüu, ma mai come tì................(RIVOLTA AL PUBBLICO, RIPRENDE IL MONOLOGO INIZIALE) Vardée geent, mì somm disposta a brascià sü un australian, un eschimees del Polo Nord, un african, un rüsso; ma, per l’amoor del cieel! Trovemm un omett de sesso maschiil anca per mì, che somm adrée a tramontà come il sole dietro il Resegone, e ala mia etaa oo gnammò trovaa un can che m’abia vorüu !!!!!!!!!